मकवानपुर । राज्यको लगानी रहेको सामुदायिक विद्यालयहरुले अग्रेजी माध्यमको पढाइ गरेको नाममा शुल्क उठाएको प्रति विद्यार्थी संगठनले ध्यानाकर्षण गराएका छन् ।
अखिल नेपाल राष्ट्रिय स्वतन्त्र विद्यार्थी युनियनले विभिन्न माग राख्दै हेटौंडा उपमहानगरपालिका नगरप्रमुखलाई ज्ञापन पत्र बुझाएको छ । नगरभित्रको शिक्ष क्षेत्रको बेथितीलाई स्थानीय सरकारकाले नियन्त्रण गर्नुपर्ने भन्दै संगठनले उपमेयर राजेश बानियाँलाई ज्ञापन पत्र बुझाएको हो ।
हेटौंडा उपमहानगरपालिका भित्र शिक्षा क्षेत्रमा देखिएका गम्भीर समस्याप्रति ध्यानाकर्षण जनाउँदै युनियनले ज्ञापन पत्र बुझाएको अध्यक्ष विशाल पौडेलले बताए ।
हेटौडा उपमहानगर भित्रका सामुदायिक विद्यालयमा अध्ययन गर्ने विद्यार्थीहरुलाई दिवा खाजा बापत १५ रुपियाँ मात्र उपलब्ध हुने भनिएकोमा मुल्य बृद्धिलाई ध्यानमा राखि कम्तिमा २५ रुपियाँ कायम गर्न माग गरिएको छ ।
उपमहानगर भित्रका निजी शैक्षिक संस्थाहरुले शैक्षिक वर्ष २०७९ को लागि गरिएको चर्को शुल्क वृद्धि प्रस्ताव अवैज्ञानिक र
समयसापेक्ष नरहेको भन्दै निजि विद्यालयहरु सेवाभन्दा नाफामुखि भएको प्रति शुल्क वृद्धि प्रस्ताव पुन नयाँ ढगंबाट गराउनका लागि संगठन माग गरेको छ ।
संगठनले उपमहानगर भित्रका निजी शैक्षिक संस्थाहरुको वर्गीकरण आवश्यक भएको ठम्याउँदै पटक पटकको आग्रहलाई बेवास्ता मनन गर्न खबरदारी समेत गरेको अध्यक्ष विशाल पौडेलले बताए ।
यसैगरी निशुल्क विधुत वितरण गर्न सक्ने उपमहनगरले सामुदायिक शिक्षा निशुल्क गर्न नसक्ने कुरा व्यवहारीक भएको ज्ञापन पत्रमा उल्लेख छ ।
सामुदायिक विद्यालयलाई कारबाहीको दायरामा ल्याई यथाशिघ्र शुल्क लिने परिपाटीको अन्त्य गर्न माग गरिएको छ । निजी शैक्षिक संस्थाहरुले कमिसनको चक्करमा वर्षे पिच्छे पाठ्यपुस्तक परिवर्तन गर्ने गरेको अध्यक्ष पौडेलले बताए ।
संगठनले पाठ्यपुस्तक अपडेटेड वा अपग्रेडेड भएमा मात्र परिवर्तन गर्न माग गरेको छ । निजी शैक्षिक संस्थाका विद्यार्थीहरुको कलिला काधमा गरुङ्गो भारी बोकाउने गरेको र यसको अन्त्यको लागि उपमहानगरले पहल गर्नुपर्ने माग समेत संगठनले गरेको छ ।

मकवानपुर । हेटौंडा उपमहानगरपालिका १० बसपार्क क्षेत्रमा उम्रेको गाँजाका विरुवा फडानी गरेर नष्ट गरिएको छ।
हेटौंडा-१० बसपार्क स्थित सामुदायिक प्रहरी सेवा उप केन्द्र पछाडी आफै उम्रिएको लागुऔषध गाँजा फडानी गरेर जलाएर नष्ट गरिएको हो।
प्रहरी चौकी बसपार्क,सामुदायिक प्रहरी सेवा उप केन्द्र बसपार्क,आदर्श टोल विकास संस्था,नेत्रज्योती टोल विकास संस्था,सचेत नागरिक युवा समुह मकवानपुर र स्थानीयहरुको सहभागितामा लागुऔषध गाँजा फडानी गरी जलाएर नष्ट गरिएकाेको हो।
उक्त स्थानमा रहेको गाँजाका कारण युवाहरु दैनिक उक्त स्थानमा आएर गाँजा सेवन गर्ने,होहल्ला गर्ने प्रवृत्ति बढेकोले मकवानपुर प्रहरीको समन्वय र टोल विकास तथा स्थानीयको सकृयतामा गाँजाखेती नष्ट गरेको सामुदायिक प्रहरी सेवा उप केन्द्र बसपार्कका अध्यक्ष प्रदिप कँडेलले बताए।
उक्त अभियानमा प्रहरी चौकी बसपार्कका प्रमुख प्रहरी सहायक निरीक्षक मान बहादुर तामाङ,टोल विकास संस्था अध्यक्ष शान्ता गजुरेल, स्थानीय दुर्गा नेपाल, निलम दवाडी, जनप्रतिनिधि र सचेत नागरिक अभियान मकवानपुर अध्यक्ष शिव नारायण श्रेष्ठ लगायतको सहभागिता रहेको थियो।
मकवानपुर । स्वास्थ्य कार्यालय मकवानपुरले असार ९ गतेबाट बालबालिकाहरुलाई फाइजर खोप लगाउने भएको छ ।
नेपाल सरकारले कोरोना विरुद्धको खोप अन्य उमेर समूहलाई लगाइसकेको भए पनि १२ वषभन्दा मुनिका बालबालिकालाई उपयुक्त हुने खोप उपलब्ध गराउन सकेको थिएन । ५ वर्ष लागेका र १२ वर्ष ननाघेका बालबालिकाहरुको लागि असार ९ गतेबाट १५ गतेसम्म पहिलो चरणमा यो खोप लगाउन लागिएको जिल्ला स्वास्थ्य कार्यालय मकवानपुरका प्रमुख भीमसागर गुरागाईले बताए ।
खोप लगाउनको लागि सामुदायिक बिद्यालयलाई खोप केन्द्रको रुपमा व्यवस्था गरिने छ । बिश्व स्वास्थ्य संगठनले मान्यता गरेको यो खोप ९१ प्रतिशत प्रभावकारी भएको गुरागाईंले बताए ।
पहिलो चरणको खोप लगाएको २१ दिनपछि यसको दोस्रो मात्रा लगाउनु पर्ने उनले बताए । यो खोप ५ बर्षभन्दा कम र १२ बर्षमाथिको उमेरका बालबालिकाहरुले लगाउन नहुने स्वास्थ्य कार्यालय मकवानपुरले जनाएको छ ।
यो अभियानमा मकवानपुर जिल्लाका ६१ हजार ७५ बालबालिकाले खोप लिने छन् । यसका लागि ३९० जना स्वास्थकर्मी परिचालन हुने स्वास्थय कार्यालय मकवानपुरका सूचना अधिकृति लक्ष्मण घिमिरेले बताए ।
बिद्यालय नजाने वा बिद्यालयमा खोप लगाउन छुटेमा यस्ता बालकालिकाहरुलाई अभियान सकिएको भोलिपल्ट नजिकको स्वास्थ संस्थाबाट लगाउन सकिनेछ ।
स्वास्थ्य कार्यालय मकवानपुरले कोभिड १९ विरुद्ध संचालित खोप अभियानको प्रगति समिक्षा तथा फाइजर खोप अभियान संचालन बारे जानकारी दिने उदेश्यले आयोजना गरेको पत्रकार अन्तरक्रिया कार्यक्रममा यसबारे जानकारी गराइएको हो ।
मकवानपुर । मानव अधिकार उल्लङ्घन तथा ज्यादतीको घटनाहरु बढ्दो अवस्थामा रहेको एक तथ्याङ्कले देखाएको छ । अनौपचारीक क्षेत्र सेवा केन्द्र (इन्सेक) ले मानव अधिकार वर्ष पुस्तक २०२३ को लागि संकलन गरेको घटना विवरणले यस्तो देखाएको हो ।
मकवानपुर जिल्लामा सन् २०२२ को जनवरीदेखि जुन महिनासम्ममा मानव अधिकार उल्लङ्घन तथा ज्यादतीका ३३ ओटा घटना भएका छन् । जसमध्ये २२ जना महिला ११ जना पुरुष गरी ३३ जना पीडित भएको तथ्याङ्कले देखाएको छ । इन्सेक जिल्ला प्रतिनिधि पुष्प अधिकारीका अनुसार बाल अधिकारका घटनामा नौ जना बालिका पीडित भएकोमा आठ जना बलात्कारका घटना र एक नवजात शिशु हत्याको घटनामा पीडित रहेका छन् ।
यसै समयमा एकै विद्यालयका ३ शिक्षकहरुबाट सात जना बालिका यौन दुरुपयोगका घटनामा पीडित भएको घटना पनि इन्सेकले अभिलेख गरेको छ ।
महिला अधिकारका घटनामा १० जना पीडित भएकोमा सात जना बलात्कार र तीन जना बहुबिबाहको घटनामा पीडित भएको इन्सेकमा अभिलेख भएको छ । यस अवधिमा पाँच ओटा हत्याका घटना भएका छन् । जसमा एक जना महिला र चार जना पुरुष छन् । यस्तै ९ ओटा हत्या प्रयासका घटनामा दुई जना महिला र सात जना पुरुष पीडित भएको इन्सेक बागमती प्रदेशका कार्यक्रम संयोजक गणेश भण्डारीले बताए ।
६ महिनाको अवधिमा परिवारजनबाटै तीन जना बालिका सहित चार ओटा बलात्कार, एक नवजात शिशु (छोरी) सहित पाँच ओटा हत्याको घटना भएको भण्डारीले बताए ।
इन्सेकको अभिलेखालयमा गत वर्ष सन् २०२१ मा मानव अधिकार उल्लङ्घन तथा ज्यादतीका ७८ ओटा घटनामा अन्य पक्षबाट ७८ जना पडित भएका थिए भने सन् २०२० मा मकवानपुरमा ६२ ओटा मानव अधिकार उल्लङ्घन तथा ज्यादतीका घटनामा ५० जना महिला, १२ जना पुरुष र एक लैङ्गिक तथा अल्पसङ्ख्यक महिला पीडित भएको तथ्याङ्क छ ।
नागरिकको अधिकारलाई राज्यले सुनिश्चित गर्छः राज्यमन्त्री नेपाली
बागमती प्रदेश स्वास्थ्य राज्यमन्त्री कल्पना नेपालीले नागरिकको अधिकार सुनिश्चितताको लागि प्रदेश सरकार प्रतिबद्ध रहेको बताएकी छिन् ।
अनौपचारिक क्षेत्र सेवा केन्द्र (इन्सेक) ले हेटौँडामा आयोजना गरेको नेपाल मानव अधिकार वर्ष पुस्तक २०२३ को अर्ध वार्षिक पूर्व समीक्षा कार्यक्रममा उनले यस्तो बताएकी हुन् । संविधानले प्रदान गरेको मौलिक अधिकार प्राप्तिको लागि नागरिककले अझै लडाँई लड्नुपर्ने अवस्था रहेको भन्दै प्रदेश सरकार नागरिकको अधिकार सुनिश्चित गराउने गरी अघि बढेको राज्यमन्त्री नेपालीले बताइन् ।
कार्यक्रममा गैसस महासङ्घ बागमती प्रदेश समिति अध्यक्ष आरती पाठकले इन्सेकले गर्दै आएको मानव अधिकार उल्लङ्घन तथा ज्यादतीका घटनाहरूको अभिलेखले समाजमा महिला तथा बालबालिकाको अवस्था कस्तो छ भन्ने देखाउनुका साथै यसले राज्य र समाजलाई जिम्मेवार बन्न मद्दत पुग्ने बताइन् ।
कार्यक्रममा इन्सेक बागमती प्रदेशका कार्यक्रम संयोजक गणेश भण्डारीले इन्सेकले मानव अधिकारका घटनाहरूको अभिलेख राख्ने कार्यसँगै मकवानपुरको दुईओटा स्थानीय पालिकामा शिक्षा, स्वास्थ्य, खाद्य र आवासको अधिकारको क्षेत्रमा काम गर्दै आएको बताए ।
मकवानपुर । मकवानपुर जिल्ला कैलाश गाउँपालिकाले स्थानीय कृषक समुहका किसानहरुलाई विभिन्न कृषि सामग्रि वितरण गरेको छ ।
किसानलाई कृषि आधुनिकीकरणतर्फ आकर्षित गर्न र उत्पादन लागत घटाइ उत्पादन बढाउन किसान समूहलाई मिनी ट्रिलर १३ वटा, अदुवा पिस्ने मिल ६ वटा, विषादी छर्कने इलेक्ट्रिक पम्प २० वटा र डिजिटल तराजु २ वटा हस्तान्तरण गरिएको हो ।
गाउँपालिकाका अध्यक्ष लोकबहादुर मुक्तान र उपाध्यक्ष वालकुमार मल्ल ठकुरीले आज किसानहरुलाई उक्त कृषि सामग्रीहरु हस्तान्तरण गरेका हुन् ।
अदुवा पकेट क्षेत्र कार्यक्रम अन्तर्गत प्रधानमन्त्री कृषि आधुनिकीकरण परियोजना मार्फत कृषि ज्ञान केन्द्र चितवनले कृषि सामग्रीहरु वितरण गर्न १५ लाख रुपैंया बजेट उपलब्ध गराएको थियो ।
गाउँपालिकाको ५० प्रतिशत अनुदान र बाँकी किसानले व्यहोर्नेगरी उक्त कृषि सामग्रीहरु वितरण गरिएको गाउँपालिका अध्यक्ष मुक्तानले जानकारी दिए ।