मकवानपुर । हेटौंडामा जारी मकवानपुर जिल्लास्तरीय महिला भलिबलको उपाधिमा मकवानपुरगढी गाउँपालिकाले जित हात पारेको छ ।
बुधबार हेटौंडाको हुप्रचौरमा भएको फाइनल खेलमा बकैया गाउँपालिकालाई पराजित गर्दै उपाधी जितेको हो । मकवानपुरगढीले बकैयालाई २५–१५, २५–१९ र २५–१३ को सोझो सेटमा पराजित गरेको हो । उपाधिसँगै मकवानपुरगढीले नगद ५० हजार सहित शिल्ड, मेडल हात पार्दा उपविजेता बकैयाले ३० हजार रुपैयाँ सहित शिल्ड, मेडल हातपार्न सफल बन्यो ।
प्रतियोगितामा मकवानपुरगढीकी सुस्मिता योञ्जन उत्कृष्ट खेलाडी घोषित भईन् । मकवानपुरगढीकै सञ्चमाया स्याङ्तान उत्कृष्ट स्पाइकर, रञ्जन अमात्य उत्कृष्ट प्रशिक्षक घोषित भए । प्रतियोगिताको उत्कृष्ट सेटर बकैयाकी कुसुम भोम्जन, उदीयमान खेलाडी मकवानपुरगढीकी श्रृषा लोप्चन, थाहा नगरपालिकाकी रोजिना स्याङ्तान र बकैया गाउँपालिकाकी दिपिका कार्की भए ।
प्रतियोगिताको विजेता, उपविजेता तथा उत्कृष्ट खेलाडीलाई हेटौँडा उपमहानगरपालिकाकी मेयर मिना लामाले पुरस्कार प्रदान गरेकी थिईन् ।
यसअघि सोमबार सम्पन्न उपेमयर कप महिला तथा पुरुष भलिबल प्रतियोगिताको विजेता तथा उपविजेतालाई पनि बुधबार नै सिल्ड, मेडल तथा प्रमाणपत्र र नगद पुरस्कार हस्तान्तरण गरिएको छ । उपमेयर कप महिला तथा पुरुष भलिबल प्रतियोगिताको दुबै उपाधि हेटौंडा–१७ ले जितेको थियो । पुरुषतर्फ हेटौंडा–१९ उपविजेता बनेको हो । महिलातर्फ हेटौंडा–५ उपविजेता बनेको थियोे ।
मकवानपुर । मकवानपुरमा मंगलबार १ सय ८५ जनामा डेंगु संक्रमण पुष्टि भएको छ । जिल्ला स्वास्थ्य कार्यालय मकवानपुरले सार्वजनिक गरेको तथ्याङ्क अनुसार जिल्लामा १ सय ८५ जनामा डेंगु संक्रमण पुष्टि भएको हो । योसँगै जिल्लामा डेंगु पुष्टि हुनेको संख्या २ हजार ६ सय ९१ जना पुगेको छ ।
मंगलबार डेंगु संक्रमण पुष्टि हुनेमा १ सय ५३ जना हेटौंडा उपमहानगरपालिकाका रहेका छन् । याे सँगै हेटौडामा डेंगुका २ हजार ४ सय १६ जनामा डेंगु संक्रमण पुष्टी भएकाे छ । यस्तै मकवानपुरगढी गाउँपालिकाका मंगलबार ५ जना डेंगु संक्रमण थपिएसँगै हालसम्म ४२ जनामा पुष्टि भएकाे छ । मंगलबार बागमती गाउँपालिकाका ५ जना थपिएसँगै हालसम्म ६ जनामा डेंगु संक्रमित भएका छन् ।
यसैगरि मंगलबार १ जना संक्रमित थपिएसँगै हालसम्म कैलाश गाउँपालिकाका ५ जनामा, १२ जना संक्रमित थपिएसँगै हालसम्म मनहरी गाउँपालिकाका ११५ जनामा, ७ जना संक्रमित थपिएसँगै हालसम्म भीमफेदी गाउँपालिकाका २६ जनामा, २ जना संक्रमित थपिएसँगै बकैया गाउँपालिकाका हालसम्म ५ जनामा र १ जना संक्रमित थपिएसँगै राक्सिराङ गाउँपालिकाका हालसम्म ३ जनामा संक्रमण पुष्टि भएको स्वास्थ्य कार्यालयले जनाएको छ ।
कार्यालयकाे तथ्याङ्क अनुसार मंगलबार ठेगाना नखुलेकाे १ जना तथा अन्य जिल्लाकाे २ जनामा समेत डेंगु संक्रमित पुष्टि भएकाे छ । यस्तै मकवानपुरकाे थाहा नगरपालिकामा हालसम्म ५६ जनामा संक्रमण पुष्टि भएकाे छ भने इन्द्र सराेवर गाउँपालिकामा हालसम्म डेंगु संक्रमित पुष्टि भएकाे छैन । जिल्लामा डेंगु संक्रमणका कारण जनाकाे मृत्यु भएकाे छ ।
स्वास्थ्य तथा जनसंख्या मन्त्रालयका अनुसार हालसम्म देशभर २५ हजार ५ सय ४३ जना डेंगु संक्रमणका बिरामी भेटिएका छन् । सातै प्रदेश अन्तर्गत ७६ जिल्लामा डेंगु संक्रमण फैलिएकाे मन्त्रालयकाे तथ्याङ्कमा उल्लेख छ । नेपालमा हालसम्म डेंगुका कारण ३२ जनाको मृत्यु भएको छ ।
नेपालमा २०६१ सालमा पहिलो पटक डेंगुको बिरामी देखिएका थिए । त्यसपछि वर्षेनी डेंगुका बिरामी नेपालमा देखिएका छन् ।
मन्त्रालयका अनुसार हालसम्म प्रदेश १ मा ७ सय ७५, मधेश प्रदेशमा ३ सय ८०, बागमतीमा १९ हजार ९ सय १०, गण्डकीमा ५ सय ५६, लुम्बिनीमा २ हजार ८ सय ८७, कर्णालीमा २ सय ३१ र सुदुरपश्चिम प्रदेशमा ८ सय ४ जनामा डेंगु देखिएको छ ।
स्वास्थ्य कार्यालयकाे तथ्याङ्क

स्वास्थ्य मन्त्रालयकाे तथ्याङ्क

मकवानपुर । मकवानपुरको हेटौंडा उपमहानगरपालिकामा भएको उपमेयर कप भलिबल प्रतियोगिताअन्तर्गत पुरुषतर्फको उपाधि १७ नम्बर वडाले जितेको छ ।
केशवलाल श्रेष्ठ स्मृति केन्द्रीय प्रतिष्ठान मकवानपुरको आयोजनामा सोमबार हुप्रचौरमा भएकाे खेलमा १९ नम्बर वडालाई ३–१ को सेटमा पराजित गर्दै १७ नम्बर वडाले उपाधि जितेको हो ।
पहिलो सेट २५–२१ ले अग्रता लिँदै १७ नम्बर वडाले दोस्रो सेटमा १६–२५ ले पछि परेको थियो । पछिल्लो दुई सेट २५–२१ र २८–२६ ले आफ्नो पक्षमा पार्दै उपाधि जितेको हो । उपाधिसँगै १७ नम्बर वडाले ५० हजार रुपैयाँ हात पारेकाे छ । उपविजेता १९ नम्बर वडाले २५ हजार रुपैयाँ जितेकाे छ ।
उपमेयर कप भलिबल प्रतियोगिताअन्तर्गत महिला तर्फको हिजो आइतबार भएको फाइनल प्रतियोगितामा पनि १७ नम्बर वडा विजयी भएको थियो । ५ नम्बर वडालाई ३–१ को सेटमा पराजित गर्दै १७ नम्बर वडाले उपाधि जितेको थियाे ।
मकवानपुर । हेटौंडा उपमहानगरपालिका खानेपानी र ढल निर्माण योजनाकाे तयारीमा रहेकाे छ । बढ्दाे शहरीकरणसँगै व्यवस्थित खानेपानी र ढल निर्माणको योजना बनाउने तयारीमा हेटौंडा उपमहानगरपालिका जुटेको हाे ।
हेटौंडाको शहरी ढल व्यवस्थापन, भूमिगत ढल र शहरी लेदोजन्य फोहर व्यवस्थापन सम्बन्धी सोमबार उपमहानगरपालिकामा भएकाे छलफलमा व्यवस्थित खानेपानी र ढल निर्माणको योजना बनाउने तयारीमा रहेकाे बताइएकाे हाे । एसियाली बिकास बैंकको सहयोग तथा नेपाल सरकार खानेपानी बिकास मन्त्रालयमार्फत् उपमहानगरपालिकाले खानेपानी तथा ढल व्यवस्थापन आयोजना मार्फत हेटौंडामा व्यवस्थित खानेपानी बितरण र ढल व्यवस्थापनको तयारी गरेको जनाएकाे छ ।
आयोजनाअन्तर्गत सन् २०५५ सम्मको डिपिआर योजनासहित शहरी क्षेत्रमा बिस्तारै बढ्दै गएको ढलजन्य लेदो तथा अन्य फोहोर व्यवस्थापन र व्यवस्थापनको बिषयमा छलफल भएको हो । कार्यक्रममा हेटौंडा उपमहानगरपालिकाका प्रमुख मीनाकुमारी लामाले उपमहानगरपालिकाले जमिन वर्गीकारणको कामलाई रोक्दै एकीकृत व्यवस्थित शहरको निर्माण र विकासमा अघि बढ्ने बताइन् ।
उनले सरकारी क्षेत्रबाट हुने गुरुयोजना र आवधिक योजनाको काम कहिले सकिन्छ भन्ने टुङ्गो नभएका कारण कार्यान्वयनमा जान समस्या हुने गरेको बताइन् । उनले भनिन् ‘अब हुने बिकासको काममा यस अघी लगानी भएका पूर्वाधारको प्रयोग गरेर अघि बढ्दा सहज हुन्छ ।’ उनले उपमहानगरपालिका आवधिक र गुरुयोजना बनाएरै बिकासको काममा अघि बढ्ने तयारीमा रहेको बताइन् ।
कार्यक्रममा हेटौंडा खानेपानी व्यवस्थापन बोर्डका अध्यक्ष प्रताप बिष्टले अहिलेसम्म उपमहानगर क्षेत्रमा खानेपानीको बितरण, आवश्यक पूर्वाधार र व्यवस्थापन सम्बन्धमा बताएका थिए । बिष्टले अहिलेसम्म बोर्डले २२ वटा डीप बोरीङ, ७ वटा समवेलवाट उत्पादन भएको पानी २२ हजार २ सय ५० धारामार्फत् खानेपानीको बितरण भैरहेको बताए । बोर्डले अहिले दैनिक १ लाख ८२ हजार लिटर पानी दैनिक बितरण गर्दै आएको उनले जानकारी दिए ।
व्यवस्थित ढल र खानेपनीको व्यवस्थापनमा परामर्शदातासहितको टोलीले हेटौडा उपमहानगरपालिकाकाे बिकसित हुँदै गरेका वडामा निर्माण हुने भवन र पूर्वाधारलाई सहयोग पुग्ने गरी काम गर्न अनुगमन गरेका छन् । छलफल कार्यक्रममा हेटौंडा उपमहानगरपालिकाका उपप्रमुख राजेश बानियाँ, प्रमुख प्रशासकिय अधिकृत शिबराज चौलागाईं खानेपानी तथा ढल व्यवस्थान आयोजनाका प्रमुख बालमुकुन्द श्रेष्ठलगायतको सहभागिता रहेको थियो ।
मकवानपुर । राज्य संयन्त्र कमजोर हुँदा नागरिक समाजको भूमिका नदेखिएकाे बताइएकाे छ । काेक्यापले आयाेजना गरेकाे शान्ति न्याय र सवल संस्थाका नागरिक समाज बिषय प्रदेश स्तरीय अन्तरक्रिया कार्यक्रम हेटौंडामा यस्ताे बताइएकाे हाे ।
कार्यक्रममा मानव अधिकार आयोग बागमती प्रदेशका प्रमुख यज्ञ अधिकारीले नागरिक समाज सक्षम हुदा न्यायको पाटो बलियो हुने बताए । नागरिक समाजले विभिन्न सवालमा महत्वपूर्ण भूमिका निर्वाह गर्दै आएको तर, राज्य तहबाट नागरिका समाजको कामलाई अपनत्व ग्रहण नगरीएको कारण समस्या भएको इन्सेक बागमती प्रदेश प्रमुख गणेश भण्डारीले ।
कार्यक्रममा कोक्यापका कार्यक्रम संयोजक सरोज नेपालले कार्यपत्र प्रस्तुत गरेका थिए । सहभागीहरुले शान्ति र न्यायको लागि नागरिक समाजको भूमिका सशक्त बनाउन राज्य संयन्त्रको दरीलो साथ चाहिने बताए । बाल अधिकार समिति बागमती प्रदेश सदस्य झविन्द्र ज्ञवली, माइत नेपाल मकवानपुर प्रमुख माया लामा, तेस्रो लिङ्गि सामुदायिकी किरण थापा, पत्रकार प्रताप विष्टलगायतले ले सामाजिक समूहको भूमिका उच्च रहेको तर राज्यले अवसर नदिएको बताए ।
कार्यक्रममा पत्रकार बिष्टले राजनीतिक बुझाई राखेर सामाजिक काम हुनुपर्नेमा सामाजिक काममा नै राजनीतिकरण हुन थालेको बताए ।
व्यक्तिले सत्तामा जानको लागि सामाजिक समूह भर्याङ बन्ने गरेको बताए । “एक व्यक्तिलाई सामजले स्वीकार गर्दैन, त्यो राम्रो हैन, राजनीति आस्था र पुर्वाग्रहबाट जन्मेका संस्थाले सामाजिक समूहको काम गर्दैनन्” विष्टले भने ।
अधिकारकर्मी दिपेन्द्र पाठकले उही कसुरमा फरक सजाय हुने प्रवृत्ति बढेको बताए । कानुनको सही कार्यान्वयन नहुदा राज्यको उपस्थित नदेखिएको उनले बताए । कानुन नियम र संविधानले मात्रै राज्यको उपस्तिथि नदेखिने पाठकले बताए ।
“नागरिक समाजले बोलेको सुनुवाइ हुनै छाड्यो” कार्यक्रममा माइती नेपाल प्रमुख लामाले भनिन् ।सार्वजनिक रूपममै सम्बोधन गर्नुपर्ने कुराको समेत सम्बोधन नभएको उनले बताइन् । फौजदारी केशमा पनि मेलमिलापको लागि दवाब आउने गरेकोले काम गर्नै समस्या भएको उनले बताइन् ।
यसैगरी हिमराईट्स मकवानपुर प्रमुख कुमारी वाइबाले सामाजिक अभियन्ताहरूलाई राज्यले संरक्षण नगरेको बताइन् । कार्यक्रममा कोक्याप बागमती प्रदेश प्रमुख बिरबहादुर नेपालीले सहजिकरण गरेका थिए ।
कार्यक्रम कोक्यापको केन्द्रिय कोषाध्यक्ष अर्जुन ढकालको अध्यक्षता रहेको थियो ।
