मकवानपुर । सामाजिक विकासलाई पनि भौतिक पुर्वाधार विकास जत्तिकै महत्व दिनुपर्ने दबाबका बीच आगामी आर्थिक वर्षको लागि पनि उपमहानगरपालिकाले पूर्वाधार विकास तर्फ नै सबैभन्द बढी बजेट विनियोजन गरेको छ ।
सामाजिक अभियन्ताहरुले यसको आलोचना गरेको छन् । सामाजिक क्षेत्रमा गर्नुपर्ने कामहरु धेरै छन्, आँखै अगाडि आवश्यक सामाजिक विकासको सवाल छाडेर खोजि खोजि भौतिक पूर्वाधारको विकासलाई बजेट विनियोजन गरिएको अभियन्ताहरुको आरोप छ ।
असार २ गते सार्वजनिक गरिएको हेटौंडा उपमहानगरपालिकाले पूर्वाधार विकास क्षेत्रभित्र पर्ने सडक, खेल मैदान उर्जा, सडक बत्ति, आवास व्यवस्था, जलश्रोत, पर्यटन, भवन तथा आवास, सिंचाईलगायत नगर स्तरीय पूर्वाधार तर्फ ६२ करोड ३ लाख र वडा तथा वस्ति स्तरीय योजना तथा कार्यक्रमका लागि ३८ करोड ४० लाख बजेट विनियोजन गरिएको उपमेयर राजेश बानियाँले बताए ।
उपमहानगरपालिका क्षेत्रमा एकिकृत वसपार्क तथा टर्मिनल भवन निर्माणका लागि क्रमागत योजना अन्तर्गत आगामी आर्थिक वर्षको लागि ८ करोड बजेट विनियोजन गरिएको छ । हेटौंडा ४ मा निर्माणाधिन बहुबर्षिय योजना अन्तर्गत बासुदेव बहुउद्देश्यीय व्यापारिक भवन निर्माणको लागि २ करोड विनियोजन गरिएको छ ।
चालु आर्थिक वर्षमा सम्झौता भई आगामी आर्थिक वर्षमा जिम्मेवारी सर्ने योजनाहरुको भुक्तानीको लागि २१ करोड २२ लाख विनियोजन गरिएको छ । संघीय सरकार समपुरक कोष अन्तर्गत पदमपोखरी मुख्य सडक विस्तार कार्यका लागि ३ करोड ५० लाख विनियोजन गरिएको उपमेयर बानियाँले बातए ।
साथै संघीय सरकार र प्रदेश सरकार तर्फको समपुरक कोष अन्य योजनाका लागि ३ करोड ७५ लाख, नगरवासीलाई स्वच्छ खानेपानी व्यवस्थापन गर्न हेटौडा खानेपानी व्यवस्थापन बोर्डसंग साझेदारी कार्यक्रमका लागि १ करोड ५० लाख र न्यूनतम महशुल रकम भुक्तानीको लागि १ करोड विनियोजन गरेको छ ।
उपमहानगरले आफ्नै कार्यालय भवन नभएका वडाको प्रशासनिक भवन निर्माण तथा स्तरोन्नतीका लागि निर्माण कार्य प्रारम्भ गर्न, अधुरा कार्य सम्पन्न गर्न र मर्मत संभार कार्यको लागि १ करोड १५ लाख विनियोजन गरिएको छ ।
नगरको बृहत्तर विकासमा महत्व राख्ने ठुला आयोजनाहरुको सम्भाव्यता अध्ययन, डिजाइन, ड्रइड, अनुसन्धान तथा परामर्श एवम् आवधिक योजना निर्माण गरी परियोजना बैंकका लागि ५० लाख विनियोजन गरेको छ ।
नेपाल विद्युत प्राधिकरणसँगको सहकार्यमा सडकमा उज्यालो शहर कार्यक्रम अन्तर्गत हाइमास्ट लाईट जडानका लागि ७० लाख, विभिन्न पूर्वाधारहरुको आकस्मिक मर्मत सम्भारका लागि मर्मत सम्भार कोषमा २ करोड, पर्यटकीय स्थल पूर्वाधार निर्माणका लागि १ करोड, संस्कृति प्रवद्धन अन्तर्गत पूर्वाधार निर्माण मर्मत तथा जिर्णोद्वारका लागि २ करोड ४७ लाख विनियोजन गरिएको छ । हेटौडा अस्पतालको स्तरोन्नती र पूँजिगत सुधारका लागि र अटोभिलेज निर्माण र स्तरोन्नतीका लागि ८०।८० लाख विनियोजन गरिएको छ ।
हेटौंडाको कर्रा करिडोर निर्माणको निरन्तरताका लागि १ करोड, र राप्ती करिडोर निर्माण प्रारम्भ गर्न ५० लाख विनियोजन गरेका छ । बसपार्क क्षेत्रमा रहेको हङकङ बजारलाई व्यवस्थित पूर्वाधार सहित हेटौडा कम्प्लेक्समा रूपान्तरण गर्न निर्माण कार्य प्रारम्भ गर्न ५० लाख विनियोजन गरिएको छ ।
यसैगरी पिप्ले क्याम्पा रंगशाला स्तरोन्नती कार्याका लागि ५० लाख, तामाङ्ग संग्रहालय निर्माणका लागि ५० लाख विनियोजन गरिएको छ । वडा कार्यालयको लागत सहकार्यमा संचालन हुने वडा गौरवका योजनाका लागि ३ करोड ४० लाख, वडा नं. ७ र ८ को सिमाना सडकलाई नमुना सडक निर्माण कार्यको निरन्तरताका लागि १ करोड, वडा नं. २ को वासुदेव मार्गलाई नमुना सडक निर्माणका लागि ५० लाख, हेटौंडा ४ नगर विकास चोक पूर्व भैरव रोड सडक फुटपाथमा इन्टरलक बिच्छ्याउने कार्यका लागि ४०, हेटौडा ५ गोई खोला रंगपथ सडक र लक्ष्मी आधारभुत विद्यालय नजिक २ स्थानमा कलभर्ट लागि ४५ लाख,हेटौडा १९ शेरशेर कुवापानी सडक स्तरोन्नती कार्यका लागि ५० लाख हेटौंडा १ बनदेवी शिखरकोट सडक स्तरोन्नती कार्यका लागि ५० लाख, विपद व्यवस्थापन कोष तर्फ २ करोड बजेट विनियोजन गरिएको छ ।
यसैगरी हेटौडा १० बसपार्क बासुदेव मार्ग सडक स्तरोन्नती कार्यका लागि ४० लाख तथा हेटौडा १९ वस्तिपुर कुवापानी सडक स्तरोन्नती कार्यका लागि ४० लाख विनियोजन गरिएको छ । उपमहानगरले आर्थिक विकास क्षेत्रभित्रका चालु कार्यक्रम र पूँजिगत योजना तथा कार्यक्रमका लागि ११ करोड ७६ लाख विनियोजन गरिएको छ ।
कृषि विकास तर्फका विविध कार्यक्रम तथा योजना संचालन गर्न शशर्त समेत गरि ५ करोड ४ लाख बजेट विनियोजन गरिएको छ । पशु विकास तर्फका विविध कार्यक्रम तथा योजना संचालन गर्न शशर्त समेत गरि २ करोड ३६ लाख, उद्योग, वाणिज्य, सहकारी तथा लघु उद्यम तर्फका कार्यक्रम तथा योजना संचालन गर्न ८५ लाख तथ पर्यटन तर्फका कार्यक्रम तथा योजना संचालन गर्न १ करोड २० लाख बजेट विनियोजन गरिएको छ । वित्तिय क्षेत्र तर्फका कार्यक्रम तथा योजना संचालन गर्न ५२ लाख बजेट विनियोजन गरिएको छ ।
युवाहरुलाई स्वरोगारमा आकर्षण गरेर स्वदेशमै टीकाउ र विकाउको लागि खास कार्यक्रम अहिले पनि उपमहानगरपालिकाले ल्याउन सकेन । रोजगार प्रवद्र्धन तर्फका कार्यक्रम तथा योजना संचालन गर्न जम्मा ६९ लाख बजेट बिनियोजन गरिएको छ । प्रधानमन्त्री रोजगार कार्यक्रम र युवा रोजगारीको लागि रुपान्तरण पहल परियोजनाका लागि सशर्त तर्फ ८५ लाख, अव्यवस्थित बसोवास तथा भूमि समस्या समाधान आयोजना सम्बन्धी कार्यका लागि २५ लाख विनियोजन गरिएको छ ।
सामाजिक विकास अन्तर्गत शिक्षा तर्फको सर्त र आन्तरिक बजेट तर्फको चालु कार्यक्रम र पूँजिगत योजना तथा कार्यक्रमका लागि ९२ करोड ९२ लाख विनियोजन गरिएको छ ।
शिक्षा तर्फका कार्यक्रम तथा योजना संचालन गर्न शशर्त समेत गरि ७६ करोड ५५ लाख,स्वास्थ्य तर्फका कार्यक्रम तथा योजना संचालन गर्न सशर्त समेत गरि ६ करोड ९० लाख बजेट विनियोजन गरिएको छ । युवा तथा खेलकुद तर्फका कार्यक्रम तथा योजना संचालन गर्न २ करोड ९७ लाख, लैंगिक समानता तथा सामाजिक समावेशीकरण तर्फका कार्यक्रम तथा योजना संचालन गर्न १ करोड ४२ लाख, महिला तथा बालबालिका, अपाङ्ग र जेष्ठ नागरिक तर्फका कार्यक्रम तथा योजना संचालन गर्न १ करोड ५१ लाख,संस्कृति प्रवद्र्धधन तर्फका कार्यक्रम तथा योजना संचालन गर्न २ करोड ४७ लाख, न्यायिक समिति संचालन तथा व्यवस्थापनका लागि १ करोड विनियोजन गरिएको छ ।
वातावरण तथा विपद व्यवस्थापान एवं सरसफाई र फोहर व्यवस्थापनका लागि ७ करोड १५ लाख बजेट विनियोजन गरिएको छ । वन तथा भूसंरक्षण,वातावरण संरक्षण, विपद जोखिम न्यूनिकरण र जल उत्पन्न प्रकोप नियन्त्रण तर्फका कार्यक्रम तथा योजना संचालन गर्न ६७ लाख,फोहर मैला व्यवस्थापन र डल तथा नाला पूर्वाधारका लागि ५ करोड ६८ लाख,वारुण यन्त्र संचालन र व्यवस्थापनका लागि ७९ लाख छुट्याइएको छ ।
संस्थागत विकास, सेवा प्रवाह र सुशासनतर्फ ४ करोड २२ लाख बजेट विनियोजन गरिएको बानियाँले बताए । यस अन्तरगत संस्थागत क्षमता विकास, सुशासन प्रबर्द्धन, सेवा प्रवाह व्यवस्थापन, सूचना व्यवस्थापन, सूचना प्रविधिको प्रयोग र व्यवस्थापन, अन्तर निकाय समन्वय, स्थानीय योजना तथा तथ्याङ्, सामाजिक सुरक्षा र पञ्जिकरण व्यवस्थापन, सुरक्षा व्यवस्थापन, सुशासन पूर्वाधार लगायतका क्षेत्रसँग सम्बन्धित चालु कार्यक्रम र पूँजिगत योजना तथा कार्यक्रमका लागि सुशासन तथा संस्थागत विकास छन् ।
अन्य विविध कोषहरु भनेर ४ करोड १० लाख विनियोजन गरिएको छ । यसमा महिला तथा बाल विकास कोष, वातावरण विकास कोष, मर्मत सम्भार कोष, विपद व्यवस्थापन कोष, गरीबी न्यूनीकरण तथा सामाजिक परिचालन कोष, मानव संसाधन विकास कोष खर्च समेतका समावेश गरिएको छ । हेटौंडा उपमहानगरपालिकाले आगामी आर्थिक वर्षका लागि २ अर्व ६० करोड ६५ लाख ४० हजार ८ सय रुपैयाँ बजेट विनियोजन गरेको छ ।
नगर विकासको लागि सार्वजनिक गरिएको नीति तथा कार्यक्रमहरु कार्यान्वयन गर्न अनुमान गरिएको खर्च व्यहोर्ने स्रोतमध्ये आन्तरिक स्रोतबाट ८३ करोड ६६ लाख ६२ हजार ७० रूपैयाँ, राजस्व बाँडफाँटबाट ५९ करोड १४ लाख १० हजार ७३० बेहोर्ने छ ।
यसैगरी प्रदेश सरकारको विभिन्न अनुदानबाट ३ करोड ३४ लाख ६८ हजार, सङ्घीय सरकारको अनुदानबाट १ अर्व १४ करोड ५० लाख बाट व्यहोरिने छ ।
वडा कार्यालयद्वारा महिनावारी प्याड वितरण
Tags: No Comments
मकवानपुर । हेटौंडा उपमहानगरपालिका वडा ५ कार्यालयले छात्राहरूको लागि महिनावारी प्याड वितरण गरेको छ ।
वडा कार्यालयले १ लाख २५ हजार लगानीमा खरिद गरेको महिनावारी प्याड वडा भित्र रहेको बालज्योती मावि र लक्ष्मी माविलाई वितरण गरेको हो ।
कार्यालयले जम्मा २१ कार्टुन ( प्रती कार्टुन ९६ प्याकेज) महिनावारी प्याड खरिद गरेको थियो । जसमध्ये छात्रा संङ्ख्याको आधारमा बालज्योति माविलाई १० कार्टुन र लक्ष्मी माविलाई ६ कार्टुन वितरण गरिएको वडा सदस्य रन्जिता सिलवालले बताइन् ।
विद्यालयबाट वितरण गर्दै आएको महिनावारी प्याडले छात्राहरूलाई नियमित कक्षामा उपस्थित हुन धेरै मद्दत गरेको बालज्योती मावि पिप्लेका विद्यालय व्यवस्थापन समिती अध्यक्ष रबिन्द्र पोखरेलले बताए ।
वडा कार्यालयले पिप्ले शहरी स्वास्थ केन्द्रमा कर्मचारी तथा सेवाग्राहीहरूलाई समेत सहयोग हुनेगरी हाललाई १ कार्टुन प्याड उपलब्ध गराएको छ ।
यसैगरी ५ नम्बर कार्यालयमा पनि कर्मचारी तथा सेवाग्राहीलाई समेत प्रदान गर्ने गरि ४ कार्टुन प्याड राखिएको सिलवालले बताइन् । “सेवाग्राहीहरू कहिले काहीँ धेरै समस्यामा पर्ने गरेको थाहा पाएको छु”सिलवालले भनिन् “उहाँहरूलाई समेत सहायता होस् भनेर हामी अब यस्तो सेवा पनि दिने योजना बनाएका हौं । “
प्याड वितरण कार्यक्रममा वडा सदस्यहरू ज्ञानबहादुर थापा, रामबहादुर राई, रन्जिता सिलवाल, भगवती बि.क, वडा सचिव अनिता भट्टराई, बिद्यालयका प्रतिनिधिहरूको उपस्थिति रहेको थियो ।
मकवानपुर । जिल्ला प्रहरी कार्यालय मकवानपुरले डेढ करोडको अबैध सामग्रीहरु बरामद गरेको छ ।
भारतिय ट्रकमा प्याजका बोराहरुले छोपी प्याजकै भन्सार बिल बनाई भन्सार छलेर ल्याइएको सामान प्रहरीले बरामद गरेको हो । जसमा विभिन्न किसिमका ९० बोरा अबैध कपडाहरु छन् । कपडासँगै २ जनालाई प्रहरीले नियन्त्रणमा लिएको छ ।
बागमती प्रदेश प्रहरी कार्यालय हेटौडा, जिल्ला प्रहरी कार्यालय मकवानपुर तथा मातहत कार्यालय समेतको निगरानीमा खटिएको संयुक्त प्रहरी टोलीले विशेष सुचनाको आधारमा उक्त सामग्री बरामद गरेको जिल्ला प्रहरी कार्यालय मकवानपुरका प्रवक्ता प्रहरी निरीक्षक टेबबहादुर कार्कीले बताए ।
हेटौंडा१५ स्थित रातोमाटे चेकपोष्ट अगाडी पुर्व पश्चिम सडकखण्डमा सिराहाबाट हेटौडा तर्फ आउदै गरेको 06 GE 5053 नं को भारतिय ट्रकलाई रोकी चेकजांच गर्ने क्रममा सो ट्रकको पछाडीको भागमा चारैतिरबाट प्रति बोरा ५० किलोको १६८ बोरा प्याजको भन्सार काटी प्याजकै बोराहरुले छोपी विच भागमा कपडा राखिएको थियो ।
कपडासँगै ट्रक चालक भारत पन्जाब राज्य जिल्ला लोदियाना ग्राम रसलपुर वडा नं ७ बस्ने बर्ष ३३ को रन्जौद सिंह र सह चालक भारत बिहार राज्य जिल्ला मोजफरपुर ग्राम माहामाद बस्ने बर्ष २६ को सुधिर कुमार सहनीलाई नियन्त्रणमा लिईएको छ ।
बरामद गरिएको सामग्री थप अनुसन्धानको लागी आन्तरिक राजश्व कार्यालय हरिहर भवन ललितपुर पठाईने कार्कीले बताए ।
जसमा पाईन्टको कपडा १ करोड २८ लाख ९६ हजार मुल्यको रहेको छ । यसैगरी सुटको कपडा ३ लाख, सर्टको कपडा १६ लाख ७६ हजार २५० रुपैयाको रहेको प्रहरीले अनुमान गरेको छ ।
यसैगरी कुर्था १ लाख ३ हजार रुपैयाँको, कोरा कपडा ५ लाख २५ हजार ४४७ रुपैयाको रहेको अनुमान प्रहरीले गरेको छ ।
ढुवानीमा प्रयोग भएको ट्रकको अन्दाजी मुल्य २० करोड रहेको कार्कीले बताए । यसैगरी सोही ट्रकमा ढुवानी गरिरहेको अन्दाजी ८४ कुन्टल प्याज पनि बरामद गरिएको छ ।
मकवानपुर । हेटाैँडा उपमहानगरपालिका वडा नम्बर ४ मा नि:शुल्क स्वास्थ्य शिविर भएको छ । ४ नम्बर वडा कार्यालयको आयाेजना तथा माेहन बज्राचार्य सहरी स्वास्थ्य केन्द्रकाे व्यवस्थापन तथा मदन भण्डारी प्रतिष्ठानकाे सहकार्यमा बृहत् निःशुल्क स्वास्थ्य शिविर भएकाे छ ।
स्वास्थ्य शिविरकाे उद्घाटन गर्दै वडा अध्यक्ष नवीन सिग्देलले स्वास्थ्य मानिसकाे पहिलाे र महत्वपूर्ण धन भएकाेले वडा कार्यालयले प्राथमिकताका साथ निःशुल्क स्वास्थ्य शिविर सञ्चालन गरेकाे बताए ।
शिविरमा नाक, कान र घाँटीका विशेषज्ञ ईन्क्लाव ढुङ्गाना, स्त्री राेग विशेषज्ञ प्रशान्तराज शर्मा, बालराेग विशेषज्ञ विनाेमराज शर्मा र फेमली फिजिसियन अमर यासिरसहितका स्वास्थ्यकर्मीले विरामीलाई सेवा प्रदान गरी आबश्यक चेकजाँच गरि औषधी प्रदान गरिएकाे थियाे ।
शिविरमा ५ सय ८८ जना सेवाग्रहीहरूले स्वास्थ्य सुविधा लिएको ४ नं. वडा सदस्य जनरल श्रेष्ठले जानकारी दिए ।
वडा सदस्य तथा कार्यक्रम संयाेजक जनरल श्रेष्ठकाे अध्यक्षतामा भएकाे कार्यक्रममा वडा सदस्य गीता त्रिपाठी, नेपाल रेडक्रम साेसाईटी, मकवानपुर शाखाका उपमन्त्री, वडा सचिव टिका कंडेल, टाेल विकास संस्था वडा समन्वय समितिका अध्यक्ष राजेन्द्र बस्ताकाेटी, काेषाध्यक्ष सुन्दर न्याैपाने, माेहन बज्राचार्य सहरी स्वास्थ्य केन्द्र, हेटाैँडा ४ का प्रमुख निर्मला ब्लाेन, हेटाैँडा क्याम्पस स्ववियु सभापती अभि मैनाली, नेपाल रेडक्रस साेसाईटी, ४ वडाका सभापती किसन घिसिङ्गलगायतकाे उपस्थिति रहेकाे थियाे ।
कार्यक्रमका प्रमुख अतिथि नवीन सिग्देलसहितका अतिथिहरूले ४ नम्बर निवासी शान्ति ढुङ्गानाद्वारा लिखित नारी सन्देश पुस्तक विमाेचन समेत गरेका थिए ।
मकवानपुर । बागमती प्रदेशकाे राजधानी हेटाैडामा दाेस्राे विजय युथ गाेल्डकप हुने भएकाे छ । शनिबार विजय युथ क्लबले पत्रकार सम्मेलन गरी प्रतियाेगिता असार ५ गतेबाट १५ गतेसम्म हुने जानकारी दिएकाे हाे ।
खेलाडीहरुको बीचमा भातृत्व सम्बन्ध स्थापना गर्दै फुटबलको विकासका निम्ति क्लवले दोस्रो विजय यूथ गोल्डकपको आयोजना गर्न लागेको क्लब अध्यक्ष सुदिप राजवाहकले जानकारी दिए । हेटौंडा ५ पिप्ले क्याम्पा रंगशालामा हुने प्रतियाेगितामा १६ टिमकाे सहभागिता रहने छ ।
प्रतियाेगितामा हेटौंडा फुटबल एकेडेमी, विजय यूथ क्लव, हटिया भेट्रान्स क्लव, ढल्केजोवान एफसी, रिगल हेटौंडा रिसोर्ट मकवानपुर, नागस्वती एफसी, पदमपोखरी युनाइटेड, हर्नामाडी यूथ क्लव, एफसी विजय यूथ, अग्रसर यूथ क्लव, समाजकल्याण एफसी, बागमती प्रदेश प्रहरी गण, चाइना पब्लिक यूथ क्लव, चौकीटोल यूथ क्लव, पशुपति युवा क्लव, हेटौंडा फुटबल एकेडेमी ए काे सहभागिता रहने राजवाहकले बताए ।
गाेल्डकपकाे विजेताले २ लाख नगदसहित ट्रफी, मेडल र प्रमाणपत्र प्राप्त गर्ने छन् भने उपविजेताले १ लाख नगदसहित ट्रफी, मेडल र प्रमाणपत्र प्राप्त गर्ने छन् । यसैगरी सर्वोत्कृष्ट खेलाडीलाई ५ लाख बराबरको बीमा, नगद १० हजार रुपैया प्रदान गरिने राजवाहकले बताए । प्रतियोगिताकाे विधागत उत्कृष्ट खेलाडी र प्रशिक्षकलाई जनही नगद ५ हजार रुपैयाँसहित ट्रफी / प्रत्येक खेलको म्यान अफ द म्याचलाई पुरस्कारकाे व्यवस्था रहेकाे उनले जानकारी दिए ।
असार ५ गते बेलुका ४ बजे हुने उद्घाटन खेल एफसी विजय युथ र अग्रसर यूथ क्लव बीच हुने तालिका छ । प्रतियाेगितामा अनुमानित १३ लाख खर्च आयाेजकले जनाएकाे छ ।
यसअघि प्रतियोगिताको पहिलो संस्करण माघ २०७७ मा भएकोमा उपाधि आयोजक टिम एफसी विजय युथ क्लबले हात पारेको थियो । आयोजकले सेन्ट्रल कलेज विएसी भरतपुरलाई २-१ गोल अन्तरले पराजित गर्दै पहिलो सस्करणको उपाधि जितेको थियो ।