मकवानपुर । नेपाली कांग्रेसको १४ औं महाधिवेशन गर्ने गरी तय भएकाे मिति सरेको छ। कांग्रेसको १४ औं महाधिवेशन आगामी भदौ १६ गतेदेखि १९ गतेसम्म हुने भएकाे छ । शनिबार बसेको कांग्रेस पदाधिकारी बैठकले १४ औं महाविधेशनको मिति सार्दै आगामी भदौ १६ गतेदेखि १९ गतेसम्म काठमाडौँमा गर्ने निर्णय गरेको हो।
पार्टी सभापति शेरबहादुर देउवाले आगामी भदौमा पार्टीको महाविधेशन हुने बताउँदै अाएका थिए। महाधिवेशन यस अघी भदौको ७ देखि १० गतेसम्म गर्ने गरी तय भएकाे थियाे । पदाधिकारी बैठकले महाधिवेशन कार्यतालिका संशोधन गर्दै महाधिवेशनको मिति ९ दिन पर सारेको हो।
कांग्रेसले स्थानीय अधिवेशनहरुको मिति पनि संशोधन गरेको छ। यसअघि असार ६ गते हुने भनिएको गाउँ र नगर वडा अधिवेशन अब साउन ६ गते हुने छ। गाउँ र नगरपालिका अधिवेशन साउन ११ गते, प्रदेशसभा क्षेत्रीय अधिवेशन साउन १६ गते, प्रतिनिधिसभा क्षेत्रीय अधिवेशन तथा एक प्रतिनिधिसभा क्षेत्र भएका जिल्लाको अधिवेशन साउन २० गते हुनेछ।
त्यस्तै एकभन्दा बढी प्रतिनिधिसभा निर्वाचन क्षेत्र भएका जिल्लामा साउन २४ गते जिल्ला अधिवेशन हुनेछ। संशोधित तालिका अनुसार प्रदेश अधिवेशन २०७८ भाद्र १ र २ गते हुनेछ।
मकवानपुर । गण्डकी प्रदेशको मुख्यमन्त्रीमा कृष्णचन्द्र नेपाली पोखरेल नियुक्त भएका छन् ।
नेपालकाे संविधानको धारा १६८ (५) अनुसार गण्डकी प्रदेश प्रमुख सीताकुमारी पौडेलले पोखरेललाई मुख्यमन्त्री नियुक्त गरेकाे प्रदेश प्रमुखको कार्यालय गण्डकीले जनाएकाे छ ।
मुख्यमन्त्री नियुक्तका लागि आधार पेश गर्न आहृवान गरेपछि विपक्षी गठबन्धनको तर्फबाट पोखरेलले ३१ प्रदेशसभा सदस्यको हस्ताक्षरसहित दाबी पेश गरेका थिए । नेकपा एमाले संसदीय दलका नेता एवं कामचलाउ सरकारका मुख्यमन्त्री पृथ्वी सुब्बा गुरुङले पनि दाबी पेश गरेका थिए ।
गुरुङले जनता समाजवादी पार्टी (जसपा)को प्रदेश कमिटी र प्रदेशसभा सदस्यबाट पदमुक्त भइसकेका राष्ट्रिय जनेमार्चाका कृष्ण थापाको समर्थनमा दाबी पेश गरेपछि विपक्षी गठबन्धनका सांसदहरुले प्रदेश प्रमुखको कार्यालयमा धर्ना दिएका थिए ।
त्यसलगतै प्रदेश प्रमुख पौडेलले पोखरेललाई मुख्यमन्त्री नियुक्त गरेका हुन् । संविधान अनुसार नव नियुक्त मुख्यमन्त्री पाखरेलले ३० दिनभित्र प्रदेशसभाबाट विश्वासको मत लिनुपर्छ ।
सबैभन्दा ठूलो दलको नेताको हैसियतमा मुख्यमन्त्री नियुक्त पृथ्वीसुब्बा गुरुङले जेठ २७ गते प्रदेश सभामा विश्वासको मतकाे लागि राखेको प्रस्ताव अस्वीकृत भएको थियो। ६० सांसद रहेकाे प्रदेश सभामा २७ सांसदले गुरूङलाई मत दिएका थिए भने ३० जना विपक्षी उभिएका थिए। १ जना सांसद तटस्थ बसेकाेमा १ जना उपस्थितै भएनन्।
नवनियुक्त मुख्यमन्त्रीकाे पृष्ठभूमि
पोखरेल बुबा गोवर्द्धन शर्मा र आमा द्रौपदा शर्मा बाट २००६ साल मंसिर १३ गते तनहुँको तनहुँसुरमा जन्मेका हुन् । नेपाली कांग्रेस संसदीय दलका ७१ वर्षीय नेता पोखरेल नवलपरासी पूर्व १ (क) बाट प्रत्यक्ष निर्वाचित सांसद हुन् । उनका बुबा गोवर्द्धन शर्मा नेपाली कांग्रेसको केन्द्रीय सदस्य पनि थिए ।
उनले भारतको दरभंगाबाट मानविकी र त्रिभुवन विश्वविद्यालयबाट कानूनमा स्नातक गरेका छन् । २०४८ सालपछि उनी लगातार चार कार्यकाल कांग्रेस नवलपरासीको सभापति भएका थिए । कांग्रेसको १२ औं महाधिवेशनबाट उनी केन्द्रीय सदस्य बने । थर पोखरेल भए पनि उनी नामपछाडि ‘नेपाली’ लेख्ने गर्छन् । पोखरेल २०२८ सालबाट कांग्रेस राजनीतिमा प्रवेश गरेका हुन् । उनी विभिन्न आन्दोलनमा ५–६ पटक जेल परेका छन् ।
देशमा बहुदलीय व्यवस्था माग्दै २०४२ सालमा नेपाली कांग्रेसले सत्याग्रह घोषणा गर्यो । नवलपुरबाट सत्याग्रहमा सक्रिय भएका पोखरेल परासी–कपिलवस्तुमा गरेर एक वर्ष जेल चलान भए । २०४६ सालको जनआन्दोलनमा परासी कमान्डर रहेका पोखरेल नजरबन्दमा पनि परे । नौ महिना पाल्पा जेल बसे । २०४८ को अधिवेशनपछि उनी लगातार चार कार्यकाल कांग्रेस नवलपरासीको सभापति भएका थिए ।
२०४८ सालको आमनिर्वाचनमा उनी नवलपरासी क्षेत्र नम्बर ३ बाट उम्मेदवार थिए । २०६२–६३ सालको जनआन्दोलनमा उनले नवलपुरको नेतृत्व गरे । त्यो बेला पनि परासी कारागार चलान भएका थिए ।
२०७० सालको संविधानसभा चुनावमा नवलपरासी क्षेत्र नम्बर ३ बाट चुनाव लडेका पाेखरेल ३ सय २५ मतले पराजित भएका थिए । २०७४ सालको प्रदेशसभा निर्वाचनमा एमाले माओवादी गठबन्धनबाट उम्मेद्वार रहेका सूर्यप्रसाद न्यौपानेलाई ३ सय ८२ मतले पराजित गरी पोखरेल गण्डकी प्रदेश सभा सदस्य बन्न सफल भएका हुन् ।
- जुनु खड्का
आमा राम्री र सुन्दरी शब्द
मन पर्दैन आजकल
भो मलाई राम्रो लुगा नकिन्नु अब
लागाउनु छैन टिकी र गाजल पनि
बनाउनु छैन सौर्न्दर्य मुहार पनि
यो सहरको झुण्डमा जताततै
तीखा डम्बरुका
काँडैकाँडा छन्
कोमल शरीरमा रक्ताम्मे
बनाएर चिथोर्न सक्छन्
मुटुको शूल बनी बिझ्न सक्छन्
कहीँ छैन सुरक्षा मेरो
न जन्मघर न कर्मघर
न स्कुल न गाउँ न सहर
वस्त्र र शृङ्गार माथि नै
धावा बोल्नेहरु छन्
छल कपटी दुनियाँमा
मनवरुपी दानवहरु मात्रै छन्
यस्तो समय छ आमा
म कसरी हाँस्न सक्छु
सृष्टिकी रानी र सौन्दर्यकी खानी
बन्नु छैन आमा मलाई
वचनका भालाले रोपिएको
घाइते मन मुटुलाई कुन औषधीले
निको पार्छ र खै यहाँ
उड्ने पङ्ख काटने समाज छ
गुड्ने पाङ्ग्रा निकाल्ने जमात छ
लालचमा डुबेको इतिहास छ
संस्कार र परम्पराले रङ् भरेको
मेरो रङ्गहीन जीवन छ
यस्तो बेला आमा
म कसरी हाँस्न सक्छु
भो अब मेरालागि
बलियो घर चाहिँदैन
फालमे गेट र फलामकै
चावी चाहिँदैन
आमा खै किन हो मेरै
घर पनि सुरक्षीत लाग्दैन मलाई
न्यायलयको चावी पनि
मात्रै पानाको छ आमा
त्यसले पनि मलाई सुरक्षा
दिन नसक्ने रहेछ
बाटोघाटो स्कुल कलेज त
कंस र रावणहरुको
अखडा बन्दै छ
जहाँबाट हजारौं सीता हरण हुन्छन्
छोरीका क्यौं गर्भ पतन गरिन्छन्
धाँजा झै चिरिनु पर्छ कहीँ
भत्काउने र च्यात्याने नङ्ग्रा
धेरै भएपछि
जलेर खरानी बन्नु पर्छ
कहीँ जीवनको अमूल्य
सन्दुक रित्यादिएपछि
यस्तो बेला आमा
म कसरी हाँस्न सक्छु
म कसरी हाँस्न सक्छु
शुक्लागण्डकी नगरपालिका तनहुँ
मकवानपुर । नेपालमा थप ६ हजार २ सय ९५ जना कोरोना संक्रमणमुक्त भएका छन् । योसँगै कोरोना संक्रमण भइ निको हुनेको संख्या ५ लाख २७ हजार १ सय ११ पुगेको स्वास्थ्य तथा जनसंख्या मन्त्रालयले जनाएकाे छ।
मन्त्रालयका अनुसार पछिल्लाे २४ घण्टामा विभिन्न जिल्लामा गरिएको ८ हजार ५ सय ६ पीसीआर परीक्षणमा २ हजार ३ सय ८२ जनामा र ५ हजार ९ सय ८८ एन्टिजेन परीक्षणमा १ हजार २ जना गरी थप ३ हजार ३ सय ८४ जनामा संक्रमण पुष्टि भएको छ। योसँगै नेपालमा कोरोना संक्रमण पुष्टि हुनेकाे संख्या ६ लाख ६ हजार ७ सय ७८ पुगेको छ। हालसम्म ३२ लाख ७ हजार २०८ पीसीआर परीक्षण गरिएको मन्रत्रालयले जनाएकाे छ
मन्त्रालयले दिएको जानकारी अनुसार गत २४ घण्टामा देशभर गरी थप ६१ जनाको मृत्यु भएको छ। योसँगै नेपालमा कोरोनाबाट मृत्यु हुनेको संख्या ८ हजार ३ सय ६६ पुगेको छ। हाल काेराेना संक्रमण भइ सक्रिय संक्रमितको संख्या ७१ हजार ३ सय १ र क्वारेन्टाइनमा ५ सय ५२ रहेको मन्त्रालयको तथ्यांकमा उल्लेख छ।
मकवानपुर । प्रदेश सभा बैठकमा संसदीय मर्यादा विपरीत बोलेको बारेमा सामाजिक सञ्जालमा व्यापक बिरोध आएपछि अन्ततः बागमती प्रदेशका प्रदेश सांसद नरोत्तम बैद्यले आत्मा आलोचना गरेका छन् ।
बागमती प्रदेश सरकारद्वारा प्रस्तुत आर्थिक वर्ष २०७८÷०७९ को नीति तथा कार्यक्रमको छलफलमा भागलिने क्रममामा २८ जेठमा आफूले दिएको मन्तव्यका बारेमा प्रदेश सभामा स्पष्ट पार्न समय माग गरेका बैद्यले आफूबाट आवेशमा यस्तो शब्द बोलिएको भन्दै आत्मालोचना गरेका हुन् ।
सभामा संसद बैद्यले प्रधामन्त्री केपी शर्मा ओलीप्रति आफ्नो कुनै पनि व्यक्तिगत ‘इगो’ नभएको भन्दै आफ्नो भनाई प्रति आत्मा आलोचना गर्दै रेकर्डबाट हटाइदिन समेत आग्रह गरेका थिए ।“नीति तथा कार्यक्रमको छलफलको क्रममा मबाट प्रयोग भएको केही शब्दहरु आपत्तीजनक र संसदीय मर्यादा विपरित भएको मैले महसुश गरेको छु”सांसद बैद्यले भने ।
उनको अभिव्यक्तिप्रति संसदीय दल नेपाली काँग्रेसले उक्त अभिव्यक्ति फिर्ता लिन निर्देशन गरेको थियो । शान्तिपूर्ण राजनीतिको शालिनता भनेको सडकमा समेत संयमको अभिव्यक्ति जरुरी हुन्छ भन्ने कुरालाई आत्मसात गर्दै हिंसाबाट शान्तिपूर्ण रुपान्तरणका लागि अरु राजनीतिक दलहरुलाई समेत लोकतान्त्रिक अभ्यासमा प्रेरित गर्दै संयोजन गरेको दलको एक सिपाहीको नाताले आफूले बोलेको उक्त अभिव्यक्ति फिर्ता लिदै रेकर्डबाट हटाउन माननीय सभामुख समक्ष अनुरोध गरेको जानकारी गराउँदछु” उनले संसद सभामा भने ।
शुक्रबारको संसद बैठकमा बैद्येले प्रधानमन्त्री केपी शर्मा ओलीको एकलौटी शासनबाट आफू आजित भएको भन्दै आफू नाथुराम गोड्से बन्न तयार रहेको बताएका थिए । नाथुराम गोड्सेले भारतका महात्मा गान्धीको हत्या गरेका थिए ।
नेपाल कम्युनिष्ट पार्टी (एमाले)को ध्यानाकर्षण
नेपाल कम्युनिष्ट पार्टी (एमाले)ले संसदीय दलले बागमती प्रदेश सभामा नेपाली काँगे्रसका प्रदेश सभा सदस्य नरोत्तम बैद्यले दिएको अभिब्यक्ती प्रति गम्भिर ध्यानाकर्षण भएको जनाएको छ ।
प्रदेश सभा सदस्यले प्रदेश सभाको बैठकमा रोष्टममा उभिएर प्रधानमन्त्रीको हत्या गर्न तयार रहेको छु भन्ने जस्ता अभिब्यक्तिले प्रदेश सभाको मर्यादा र प्रतिष्ठामा धक्का पुगेको भन्दै नेपाल कम्युनिष्ट पार्टी (एमाले)ले ध्यानाकर्षण गरेको हो । उक्त अभिब्यक्ति ज्यादै अमर्यादित, असंसदीय र मुलुकको संबिधान र कानुन बिपरित रहेको संसदीय दलको ठहर छ ।
संसदीय दलले बैद्यलाई प्रदेश सभा नियमावली २०७४ को नियम ३१ र ३२ बमोजिम कारबाही अगाडि बढाउन माग माग गरिएको संसदीय दलका मुख्य सचेतक दीपक निरौलाले बताए ।
प्रदेश सभा परिसरमा बैद्य विरुद्व नारा
सत्तारुढ नेकपा एमाले निकट विद्यार्थी संगठन (अनेरास्ववियु)ले बागमती प्रदेश सांसद नरोत्तम वैद्यविरुद्ध नारा लगाएका थिए । शनिबार बिहान उनीहरूले हेटौँडाको बुद्धचोकमा सांसदको फोटो जलाएर बिरोध जनाएका थिए । उनीहरूले बागमती प्रदेश सभा परिसरसम्म पुगेर नाराबाजि गरेका थिए ।
