मकवानपुर । प्रतिनिधि सभाको लागि फागुन २१ गते निर्वाचन तोकिएको छ । देशै भर चुनावी चहलपहल बढी रहेको छ ।
उम्मेदवारहरु चुनावी अभियानमा आफ्नो क्षेत्रमा व्यस्त रहेका छन् । मकवानपुरको दुबै क्षेत्रमा चुनावी अभियानमा उम्मेदवारहरु स्थानीयस्तरमा भेटघाटमा व्यस्त छन् ।
निर्वाचन २०८२ अन्तरगत रहेर केही दिन मकवानपुरको दुबै क्षेत्रका उम्मेदवारहरुको परिचय प्रस्तुत गर्दैछौ ।
महेश बर्तौला (नेकपा एमाले)
नेकपा एमालेका केन्द्रीय सदस्य महेश बर्तौला प्रतिनिधि सभा सदस्य निर्वाचनमा मकवानपुरकाे क्षेत्र नम्बर २ बाट उम्मेदवार छन् । उनकाे यो दोस्राे पटककाे उम्मेदवारी हाे । यस अघी २०७९ सालमा भएकाे निर्वाचनमा बर्तौलाले राजनीतिक गुरु समेत रहेका विरोध खतिवडालाई पराजीत गरेका थिए ।
बर्तौलाको राजनीतिक जीवन २०५३ सालबाट सुरु भएको हो । मकवानपुरको नामटारस्थित कालिका माविमा कक्षा ७ मा अध्ययन गर्दै गर्दा उनी अनेरास्ववियुको प्रारम्भीक कमिटिको अध्यक्ष भइसकेका थिए । अखिलको ईलाका, क्षेत्रीय कमिटि हुँदै उनी २०६० र २०६३ मा दुई कार्यकाल अनेरास्ववियु मकवानपुर अध्यक्ष भए । उच्च शिक्षाका लागि मकवानपुर बहुमुखी क्याम्पसमा अध्ययनरत रहँदा २०६० सालमा स्ववियु सदस्य बने । २०६२ र २०६५ सालमा मकवानपुर बहुमुखी क्याम्पसका स्ववियु सभापति भए ।
२०६५ सालमा अनेरास्ववीयुको केन्द्रीय सदस्य हुँदै अनेरास्ववियुको केन्द्रीय सचिव, उपाध्यक्ष र कार्यबाहक अध्यक्षको जिम्मेवारी सम्हाल्ने अवसर समेत उनले पाए । उनी स्वतन्त्र विद्यार्थी युनियन काउन्सिल नेपालको राष्ट्रिय अध्यक्ष समेत भए । २०६३ सालबाट महेश बर्तौलाले विद्यार्थी राजनीतिका अलवा पार्टीको भूगोलमा रहेर समेत काम गरे । २०६३ मा उनी नेकपा एमालेको जिल्ला कमिटि सदस्य निर्वाचित भए ।
माओवादी सशस्त्र युद्धका बेला उनले मकवानपुरको विकट भुगोल नामटार कालिकाटार र भार्ताको ईन्चार्जको जिम्मेवारी बहन गरेका थिए । २०७६ /०७७ मा नेकपा एमालेको बागमती प्रदेश कमिटि सदस्य हुँदै उपमहासचिवको जम्मेवारीमा उनी सक्रिय रहेका थिए । एमाले र माओवादी एकता हुँदा उनी नेकपाको केन्द्रीय सदस्य भए । २०८० मा एमालेको मनोनित केन्द्रीय सदस्य र २०८२ को ११ औँ महाधिबेशनबाट उनी केन्द्रीय सदस्यमा निर्वाचित भए ।
४२ बर्षको युवा उमेरमा राजनीतिक सफलतासंगै उनकाे अध्ययनले समेत निरन्तरता पाएकाे छ । शैक्षिक हिसाबले उनी अब्बल छन् । व्यवस्थापन संकाय र राजनीतीशास्त्रमा स्नातकोत्तर (एमए) सम्मको अध्ययन गरेका बर्तौला विधीशास्त्रका समेत बिद्यार्थी हुन् । उनले एलएलवी उतीर्ण गरेका छन् ।
क्षेत्र नम्बर २ बाट पहिलोपटक प्रतिनिधी सभा सदस्य भएका बर्तौलाले एमालेको सचेतक, मुख्य सचेतक हुँदै सरकारको प्रमुख सचेतकको जिम्मेवारी बहन गर्ने अवसर पाइसकेका छन् । संसदमा कानून न्याय तथा मानव अधिकार समिति सदस्य, प्रतिनिधिसभा र राष्ट्रियसभाको संयुक्त समितिको सदस्य र संसदीय समितिमा सदस्यका रुपमा उनको भूमिका रह्यो ।
संयुक्त राष्ट्रसंघको सभामा भाग लिन अमेरिका समेत पुगेका उनी संसदीय मामिला अध्ययनका लागि बेलायत गएर राजनीतिमा आफूलाई अनुभवले समेत अब्बल बनाएका छन् । स्विजरल्याण्डको जेनेभामा (ईन्टर पार्लियामेन्ट युनियन आई पि यु) को सभामा समेत उनले सहभागीता जनाएका छन् । चीन, भारत लगायतका देश पुगेर उनले विकास र राजनीतीको अन्तर्राष्ट्रिय ज्ञान हासिल गरेका छन् ।
गत भदौमा भएकाे नवयुवा (जेनजी) आन्दोलनका कारण प्रतिनिधिसभा विघटन भएपछि बर्तौलाले पुरा कार्यअवधी संसदीय भूमिकामा रहन पाएनन् । उनी भन्छन् ‘पुरा अवधी काम गर्न पाइएन थालेका काम अपुरा छन् ती काम पुरा गर्न समेत चुनावमा उठेकाे छु ।’ आफूले जिल्ला र जिल्लावासीकाे लागि धेरै काम गर्न बाँकी रहेकाेले उम्मेदवारी दिएकाे उनकाे भनाई छ ।
२०७९ सालकाे मत परिणामः
नेकपा एमालेका बर्तौलाले २०७९ सालकाे प्रतिनिधि सभा चुनावमा ३४ हजार ९१६ मत प्राप्त गरी विजयी भएका थिए । उनका निकटतम प्रतिद्वन्द्वी नेकपा एसका विरोध खतिवडाले ३० हजार ३९६ मत प्राप्त गरेका थिए । यस्तै रास्वपाका भरत पराजुलीले १२०३९ मत प्राप्त गर्दा राप्रपाका राजन मैनालीले २१९४ मत ल्याएका थिए ।
मकवानपुर । कुमार नेगी ‘पालुङ्गे चरो’ लाई यस वर्षको श्रीकृष्ण–तालुमाया नमुना स्मृति गजल सम्मान–२०८२ प्रदान गरिने भएको छ ।
गजल मञ्च मकवानपुरले फागुन २ गते काे २३३ औं गजल यात्रामा नेगीलाई ५ हजार रुपैयाँ राशिकाे उक्त सम्मानबाट सम्मानित गरिने भएकाे हाे । साहित्यकार तथा गजल मञ्च मकवानपुरका पूर्व कार्यसमिति सदस्य भोला सिलवालले माता–पिता तथा छोरीको स्मृतिमा पुरस्कार स्थापना गरेका हुन् ।
२०५८ सालमा प्रकाशित कुमार नेगीको ‘श्रीजनाका हातहरू’ गजल संग्रह मकवानपुर जिल्लाबाट प्रकाशित पहिलो गजल कृति हो। जिल्लाको गजल इतिहासमा पहिलो गजल कृति प्रकाशन गरी गजल विधाको विकास, श्रीवृद्धि र प्रवद्र्धनमा पुर्याएको योगदानको कदरस्वरूप नेगीलाई सम्मान प्रदान गर्न लागिएको गजल मञ्च मकवानपुर अध्यक्ष संजित श्रेष्ठले जानकारी दिए ।
उक्त सम्मानबाट यसअघि गजलकार अनिश न्यौपाने ‘भावना’ तथा गजल मञ्च मकवानपुरका संस्थापक एवं पूर्व अध्यक्ष दुर्गा लामिछाने ‘नमूना’ सम्मानित भइसकेका छन्।
प्रतियोगितामा उत्कृष्टलाई ‘मनमाया स्मृति गजल पुरस्कार’
गजल प्रतियोगितामा उत्कृष्टलाई ‘मनमाया स्मृति गजल पुरस्कार’ २३३औं गजल यात्रामा प्रदान गरिने भएकाे छ । गजल मञ्च मकवानपुरले हरेक वर्ष प्रदान गर्दै आएकाे ‘मनमाया स्मृति गजल पुरस्कार’ माध्यमिक तह (कक्षा ९ देखि १२) सम्मका विद्याथीहरूबीच गजल प्रतियोगिता गराई उत्कृष्ट एक जनालाई प्रदान गरिदै आएकाे अध्यक्ष श्रेष्ठले जानकारी दिए ।
संस्थाका पूर्व अध्यक्ष एवम् सल्लाहकार दीपक गौतमले हजुरआमाको स्मृतिमा स्थापना गरेकाे ‘मनमाया स्मृति गजल पुरस्कार’ पुरस्कारकाे लागि माघ २५ गतेसम्म गजल पठाउनु पर्ने गरी सूचना प्रकाशित गरिएकाे उनले बताए ।

फागुन २ गते शनिबार गजल प्रतियोगिताका साथै पुरस्कार वितरण समेत गरिने कार्यक्रम रहेकाे बताइएकाे छ । उक्त प्रतियोगितामा मकवानपुर जिल्लाका विद्यालयहरुमामा माध्यामिक तह (कक्षा ८ देखि १२ कक्षासम्म ) मा अध्ययनरत विद्यार्थीहरू सहभागी हुन पाउने छन् ।
प्राप्त गजलहरु मध्ये सर्ट लिस्टमा परेका गजलहरु अन्तिम प्रतियोगितामा वाचन गरिने छ भने गजल बाचनका लागि सर्ट लिस्टमा परेका गजलकारहरु स्वयम् उपस्थित हुनुपर्ने बताइएकाे छ ।
मकवानपुर जिल्लामा गजलको उत्थान, विकास र लेखनमा उत्प्रेरणा दिने उदेश्यले गजल मञ्च मकवानपुरकाे स्थापना भएकाे हाे । मञ्चले गजल सम्बन्धी विविध कार्यक्रमहरू गर्दै आइरहेको अध्यक्ष श्रेष्ठ बताउँछन् ।
मकवानपुर । मकवानपुरमा प्रतिनिधिसभा निर्वाचनका लागि ३ हजार कर्मचारी खटिने भएका छन् । २ वटा निर्वाचन क्षेत्र रहेको जिल्लामा स्वयं सेवकसहित ३ हजार ३ सय ६६ कर्मचारी निर्वाचनमा खटिने भएका हुन् ।
३ सय ७४ मतदान केन्द्रमध्ये एउटा मतदान केन्द्रमा आयोगबाट ६ जना कर्मचारी र ३ जना स्वयं सेवक नियुक्त गरिने बागमती प्रदेश निर्वाचन कार्यालय हेटौंडाले जनाएकाे छ । निर्वाचन केन्द्रित जनशक्ति व्यवस्थापन कार्य अन्तिम चरणमा पुगेको बताइएकाे छ ।
प्रदेश निर्वाचन अधिकारी हरिप्रसाद ढकालका अनुसार निर्वाचन कार्यालयबाट २ हजार २४४ जना र मतदान केन्द्रमै नियुक्त हुने स्वयम् सेवक १ हजार १ सय २२ जना कर्मचारी मतदान अवधिभर परिचालन हुने छन् । यसबाहेक निर्वाचनमा निर्वाचन स्थलको संवेदनशीलता र आवश्यकताका आधारमा निर्वाचन प्रहरी परिचालन हुने बताइएकाे छ ।
४० वटा वडा रहेको मकवानपुरको प्रतिनिधिसभा क्षेत्र नम्बर १ मा ६२ वटा मतदान स्थल र १७८ वटा मतदान केन्द्र रहेका छन् । ६२ वटा वडा रहेको क्षेत्र नम्बर २ मा १०५ वटा मतदान स्थल र १९६ वटा मतदान केन्द्र छन् । जिल्लाको भीमफेदी कारागार र कर्मचारीका लागि हेटौंडामा अस्थायी मतदान केन्द्र रहने कार्यालयले जनाएकाे छ ।
मकवानपुर । प्रतिनिधि सभाको लागि फागुन २१ गते निर्वाचन तोकिएको छ । देशै भर चुनावी चहलपहल बढी रहेको छ ।
उम्मेदवारहरु चुनावी अभियानमा आफ्नो क्षेत्रमा व्यस्त रहेका छन् । मकवानपुरको दुबै क्षेत्रमा चुनावी अभियानमा उम्मेदवारहरु स्थानीयस्तरमा भेटघाटमा व्यस्त छन् ।
निर्वाचन २०८२ अन्तरगत रहेर केही दिन मकवानपुरको दुबै क्षेत्रका उम्मेदवारहरुको परिचय प्रस्तुत गर्दैछौ ।
महालक्ष्मी उपाध्याय ‘डिना’ (नेपाली काग्रेस पार्टी)
२०२१ सालमा चितवनमा जन्मिएकी हुन । नेपाली काग्रेसबाट मकवानपुर क्षेत्र नम्बर १ मा प्रतिनिधि सभा सदस्यमा उम्मेदवारी दिएकी महालक्ष्मी उपाध्याय ‘डिना’।
• उनी जन्मिदा हजुरबुवा उदयनाथ अधिकारी देशद्रोहको मुद्दामा जेलमा रहेको उनी बताउछिन् । प्रजातन्त्रको लागि संघर्ष गर्दा १२ वर्ष जेल बसेका अधिकारी नेपाली कांग्रेसको चितवन जिल्ला सभापति थिए ।
• २०३९ मा काठमाडौं, बागबजारको पद्मकन्या क्याम्पसमा भर्ना भएपछि डिना खुलेरै नेविसंघको राजनीतिमा लागिन् । २०४२ को सत्याग्रह आन्दोलनका क्रममा शैलजा आचार्यसँगै ७ महिना जेल परिन् ।
• २०४३ सालमा पद्मकन्या क्याम्पसको स्ववियु सभापतिमा निर्वाचित भएकी डिना त्यसपछि २०४७ देखि २०५७ सालसम्म नेपाल महिला संघ, मकवानपुर सभापति रहिन् ।
• २०५९ सालमा पार्टी विभाजनपछि उनी नेपाली कांग्रेस (प्रजातान्त्रिक) को केन्द्रीय सदस्य भइन् । कांग्रेसको चौधौं महाधिवेशनबाट डिना सहमहामन्त्रीमा विजयी भएकी थिइन् ।
• यस अघि मकवानपुर १ बाट ४ पटक हार बेहोरेकी ‘डिना’ जनताबाट अनुमोदन हुनको लागि पुनः चुनावमा होमिएकी छिन् । कम्युनिष्ट गढ मानिने मकवानपुरमा डिनाले २०४८ को आमनिर्वाचन र २०५१ को मध्यावधि हारिन् । त्यसपछि २०६४ र २०७० मा समानुपातिकबाट संविधानसभा प्रवेश गरेकी थिइन उनी । २०७४ र २०७९ को निर्वाचन पनि सुखद रहेनन् उनको लागि ।
• डिनाले २०४८, २०५१ र २०७४ को निर्वाचनमा मकवानपुर–२ बाट नेकपा एमालेका तत्कालीन उम्मेदवार विरोध खतिवडासँग पराजित भइन् ।
• २०७९ मा निर्वाचन क्षेत्र परिवर्तन गर्दै १ नम्बरबाट प्रत्यक्षमा उठेकी उनी गठबन्धनका कारण राप्रपाका दीपक सिंहसँग पराजीत भइन् ।
• अघिल्लो निर्वाचनमा बलिया उम्मेदवारसँग त्रीपक्षीय भिडेकी डिनाले अबको निर्वाचनमा ४ जनासंग प्रतिस्पर्धा गर्नुपर्नेछ ।
• आगामी निर्वाचनमा डिनासँगै राप्रपाका सिंह, एमालेबाट रामेश्वर राना र नेकपाबाट विजय गौतम लगायतका उम्मेदवार मैदानमा छन् ।
• आफू चुनाव नलड्ने भनिसकेको अवस्थामा पनि पार्टीको नेतृत्वले चुनाव लड्नुपर्छ जितेर आउनुहुन्छ भनेर ढाडस दिएपछि उम्मेदवारी दिएको डिनाले बताइन् ।
२०७९ को मतको अबस्था:
डिनालाई २ हजार ३८२ मतान्तरले हराउँदै सिंहले २०७९ को प्रतिनिधिसभा चुनाव जितेका थिए । सिंहले २७ हजार ८१६ मत प्राप्त गरि विजयी हुँदा डिनाले २५ हजार ४३४ मतमा चित्त बुझाइन् ।
एमालेको सूर्य चिह्न लिएर उठेका राप्रपा नेपालका कमल थापाले २५ हजार ४२० मत पाएका थिए ।
मकवानपुर । राष्ट्रिय प्रजातन्त्र पार्टी (राप्रपा) मकवानपुरले फागुन २१ गतेको चुनाव लक्षित भेटघाट तथा जनसम्पर्क अभियानलाई गरेको छ।
भेटघाटको क्रममा राप्रपाबाट प्रतिनिधि सभा निर्वाचन क्षेत्र नम्बर १ का उम्मेदवार दिपक बहादुर सिंहले भ्रष्टाचारसँग कुनै हालतमा सम्झौता नहुने बताएका छन् । हेटौंडा -४ र हेटौंडा -१३ मा आयोजित भेटघाट कार्यक्रममा बोल्दै सिंहले देशको विकास अवरुद्ध हुनुको मुख्य कारण भ्रष्टाचार भएको उल्लेख गर्दै यसको अन्त्य बिना सुशासन सम्भव नहुने बताए।
‘जनताले परिवर्तन चाहेका छन् , भाषण होइन, इमानदार नेतृत्व र काम चाहिन्छ’ उनले भने ‘अघिल्लो चुनावमा निर्वाचित भएपछि गरेका कामहरुको सार्वजनिक समेत गरेका छौ । राप्रपा पारदर्शिता बिश्वास राख्छ ।’ हामी राजनीतिमा धन कमाउन होइन मानिस कमाउन आएको कार्यशैलीले देखाएको उनले बताए ।
राप्रपाले राष्ट्र, राष्ट्रियता, सुशासन र भ्रष्टाचार अन्त्यलाई मुख्य एजेन्डा बनाएको स्पष्ट पार्दै जनताको विश्वास नै आफ्नो सबैभन्दा ठूलो शक्ति भएको उनले बताए । राप्रपा मकवानपुरका अनुसार पार्टीले प्रत्यक्ष नागरिक संवाद र स्थानीय भेटघाटलाई प्राथमिकता दिँदै मतदातासँग सम्बन्ध बलियो बनाउदै जाने बताएको छ ।
स्थानीय स्तरबाट प्राप्त सकारात्मक प्रतिक्रिया र जनसमर्थनले पार्टी थप उत्साहित भएको राप्रपा मकवानपुरले जनाएको छ।