मकवानपुर । नेपाली कांग्रेसका बागमती प्रदेश सभापति ईन्द्रबहादुर बानियाँले संविधान र व्यवस्थाको रक्षाका लागि सत्ता गठबन्धनले जित्नुपर्ने बताएका छन् ।
कांग्रेस मनहरी गाउँपालिका ६ सुनाचुरीमा आयोजित वडास्तरीय भेला तथा चुनावी छलफल कार्यक्रममा सत्तारुढ गठबन्धनको तर्फबाट मकवानपुर क्षेत्र नम्बर २ को ख का प्रदेशसभा सदस्य पदका उम्मेदवार बानियाँले कांग्रेस सँधैं दिनदुःखीको सेवामा लागिरहेको बताए । यस क्षेत्रमा कांग्रेसले अघिल्लो प्रदेशसभामा जितेपछि धेरै विकास निर्माणका कार्य गरिएको उनले बताए ।बानियाँले प्रदेश सरकारमा साँढे ३ वर्ष केपी ओली निकट कम्युनिष्ट शासनकालमा केही गर्न नसकेको बताउँदै विगत डेढ वर्षदेखि कांग्रेस मन्त्री मण्डलमा प्रवेश गरेपछि करोडौंको विकास बजेट यस क्षेत्रमा पार्न सफल भएकाले बताए ।
कांग्रेस मनहरी ६ का वडा सभापति बाबुराम तितुङको सभाध्यक्षतामा भएको कार्यक्रममा कांग्रेस मकवानपुर जिल्ला सचिव भीमसेन महत, कांग्रेस मकवानपुर क्षेत्र नं। २ ख का प्रदेश सभापति एवम् मनहरी गाउँपालिका अध्यक्ष रञ्जन कालाखेती, कांग्रेस मनहरी गाउँपालिका सभापति प्रकाश बर्तौला, महाधिवेशन प्रतिनिधि शंकर न्यौपाने, मनहरी ६ का वडा अध्यक्ष युवराज थपलिया, पुराना तथा अग्रज नेता कुलबहादुर नगरकोटीले सत्ता गठबन्धनको आगामी चुनावकेन्द्रित धारणा राखेका थिए ।
मकवानपुरकाे प्रतिनिधि सभा क्षेत्र नं २ मा क्षेत्रमा कैलाश गाउँपालिका, राक्सिराङ्ग गाउँपालिका, मनहरी गाउँपालिका, तथा हेटौडा उपमहनागरपालिकाकाे १, ३, ११ र १९ वडा पर्दछ । यस्तै प्रदेश सभा २ खमा हेटौडा उपमहनागरपालिकाका ३ र १९ नम्बर वडा सहित कैलाश राक्सिराङ्ग र मनहरी गाउँपालिका पर्छ ।
मकवानपुर । मकवानपुरमा गठबन्धनकाे चुनावी कार्यक्रम शुरु भएकाे छ । आइतबार मकवानपुरगढी गाउँपालिका शिखरकटेरीमा लोकतान्त्रिक वामगठबन्धनको निर्वाचन प्रचार प्रसार संयुक्त कार्यालय उद्घाटन गर्दै चुनावी कार्यक्रम गरेकाे छ ।
गठबन्धनकाे तर्फबाट प्रतिनिधि सभा निर्वाचन क्षेत्र १ का उम्मेदवार नेपाली कांग्रेस सहमहामन्त्री महालक्ष्मी उपाध्याय डिना र निर्वाचन क्षेत्र २ का उम्मेदवार नेकपा (एकीकृत समाजवादी) स्थायी कमिटी सदस्य विरोध खतिवडाले संयुक्त कार्यालयकाे उद्घाटन गरेका छन् । निर्वाचन कार्यालय उद्घाटनपछि तिहार, नेपाल सम्बत्, छठ, लोसारको शुभकामना कार्यक्रममा गठबन्धनका ५ जना उम्मेदवारले सम्बोधन गरेका थिए । कार्यक्रमका प्रमुख अतिथि महालक्ष्मी उपाध्याय डिनाले संविधान, संसद र लोकतन्त्रको हरण हुनबाट जोगाउन लोकतान्त्रिक वाम गठबन्धन कायम रहने बताइन् । ‘जसले यो संविधान अपनत्व गर्दै हस्ताक्षर गरेको छैन, त्यस्ता शक्तिहरुले लोकतन्त्र बचाउँछ भन्नु भ्रम हो । डिनाले भनिन्– ’एमालेले गरेको गठबन्धन अपवित्र रहेकाे छ ।’
उपाध्यायले आफू पहिलो पटक पूर्वी मकवानपुरको भूगोलमा उम्मेदवार भए पनि पूर्वी मकवानपुरको विकासमा उल्लेख्य बजेटहरु पहिलादेखि नै व्यवस्था गर्दै आएको बताइन् । कतै माओवादीको, कतै समाजवादीको र कतै कांग्रेसको उम्मेदवार छैन भन्दै उक्साउन आउनेहरुलाई कमल थापा बोकेर कस्तो लोकतन्त्र र गणतन्त्रको अनुभूति गराउन खोजेको हुन् भन्ने प्रश्न गर्न सबैलाई आग्रह गरिन् । यसैगरी निर्वाचन क्षेत्र नम्बर २ का उम्मेदवार विरोध खतिवडाले पश्चिम मकवानपुरको विकासमा आफ्नो दशकौँ लगानी रहेको बताए । ‘बिजुली, खानेपानी, स्वास्थ्य, शिक्षा, विकास, भौतिक पूर्वाधार सबै क्षेत्रमा कायापलट गराउने काममा आफ्नो भूमिका रहेको छ’ खतिवडाले भने–‘तीन वर्ष मुख्यमन्त्री भएका कसैले कुनै एउटा योजना १० करोड माथि पारेको भेटिनँ, मेरो कुरा काटेरै दिन बिताएछन् ।’
खतिवडाले केपी ओलीले दुई दुई पटक संसद विघटन गरेर लोकतन्त्र मास्न खोजेको र अहिले पनि कमल थापा, राजेन्द्र लिङ्देनहरु बोकेर संविधानको मर्ममा प्रहार गर्दै अराजकता मच्चाउन खोजेको बताए । ‘२०३६, ४६, ६३ को आन्दोलन दबाउन खोज्ने कमल थापा यतिखेर सूर्य चिन्ह बोकेर जनताको बहुदलीय जनवादको व्याख्याता भएका छन् ।’ कार्यक्रममा सामाजिक विकास मन्त्री एवम् माओवादी पोलिटब्युरो सदस्य कुमारी मुक्तानले ५ वर्षमा आफ्नो भूगोलमा विकासको कार्यक्रमहरु पारेको बताउँदै गठबन्धन विजय नजिक पुगिसकेको बताइन् । मकवानपुर निर्वाचन क्षेत्र नम्बर २ प्रदेश सभा क मा उम्मेदवार रहेका उनले बागमती केन्द्र सरकार, प्रदेश सरकारमार्फत हुने विकास निर्माणका कामका लागि पनि गठबन्धनलाई मत दिन आग्रह गरिन् ।
यस्तै मकवानपुर निर्वाचन क्षेत्र नम्बर १ को क उम्मेदवार माओवादी केन्द्रका बागमती प्रदेश उपाध्यक्ष प्रेमबहादुर पुलामी छिन्तुले नेकपा एमाले र राजावादी शक्तिहरुको बदमासीविरुद्ध गठबन्धन उभिएको बताए । ‘आश्वासन दिने, भ्रम फैलाउने बाहेक एमालेको खास काम देखिएको छैन्’ पुलामीले भने । यता नेपाली कांग्रेस मकवानपुरका नेता एवम् मकवानपुर निर्वाचन क्षेत्र नम्बर १ को ख का उम्मेदवार आनन्दराम पराजुलीले एमालेले ‘तपाईंको पार्टीका उम्मेदवार नै छैनन्’ भन्दै मतदाता भड्काउने बाहेक कुनै नयाँ एजेण्डा जनतामा लान नसकेकाे बताए । गठबन्धनले सबैलाई समेट्ने र मकवानपुरको विकासमा लागि पर्ने भएकाले मकवानपुरका ६ जना नै उम्मेदवारलाई मत दिन उनले आग्रह गरे ।
मकवानपुरमा गठबन्धनले निर्वाचन क्षेत्र नम्बर १ को प्रदेश क, निर्वाचन क्षेत्र नम्बर २, २ को क र ख मा पुरानै अनुहार प्रेमबहादुर पुलामी, विरोध खतिवडा, कुमारी मोक्तान र ईन्द्रबहादुर बानियाँलाई उम्मेदवार बनाएको छ । निर्वाचन क्षेत्र नम्बर १ मा महालक्ष्मी उपाध्याय डिना र १ काे प्रदेश ख मा आनन्दराम पराजुली भने नयाँ अनुहार हुन् ।
मकवानपुर गढी गाउँपालिका यस्तो भूगोल हो, जहाँको ८ वटा वडामध्ये ४ वटा वडा निर्वाचन क्षेत्र नम्बर १ र ४ वटा वडा निर्वाचन क्षेत्र नम्बर २ मा पर्छ । ती वडामध्ये ४ वडा निर्वाचन क्षेत्र नम्बर १ को क मा पर्छ। ४ वटा वडा निर्वाचन क्षेत्र नम्बर २ को पनि क मा पर्छ ।
मकवानपुर। मकवानपुरमा आगामी मंसिर ४ गते हुने निर्वाचनकाे लागि समानुपातिक तर्फकाे मतपत्र आइपुगेकाे छ । प्रतिनिधि सभा र प्रदेश सभातर्फको समानुपातिक निर्वाचन प्रमाणीतर्फको मतपत्र आइतबार आइपुगेको हाे ।
मकवानपुरमा समानुपातिक निर्वाचनतर्फ जिल्लाको क्षेत्र नं. १ मा प्रतिनिधि सभातर्फ १ लाख ६६ हजार र प्रदेश सभातर्फ १ लाख ६८ हजार मतपत्रको ठेली आइपुगेको मुख्य निर्वाचन अधिकृतको कार्यालय मकवानपुरले जनाएकाे छ । यस्तै, क्षेत्र नं. २ तर्फ समानुपातिक निर्वाचन प्रणाली अन्तरगत प्रतिनिधि सभातर्फ १ लाख ६६ हजार र प्रदेश सभातर्फ १ लाख ६९ हजार मतपत्र ल्याइएको २ नं. क्षेत्रका निर्वाचन अधिकृतकाे कार्यालयले जनाएकाे छ ।
मकवानपुरमा ३ लाख ७३७ मतदाता रहेका छन् । जिल्लामा क्षेत्र नं. १ र २ मा गरी जम्मा ३ सय ६४ वटा मतदान केन्द्रहरु तोकिएको प्रदेश निर्वाचन कार्यालय बागमतीले जनाएको छ ।
मकवानपुर । संघीयता अभ्यासको ५ वर्ष पुरा हुँदै गर्दा यो संरचनाको बारेमा सकारात्मकभन्दा नकारात्मक टिप्पणीहरु नै बढी आउने गरेको छ । तर सरकारी तहबाट भने अन्य कार्यक्रममा भाषणको शैलीमा बाहेक यसको समिक्षा भएको छैन ।
बागमती प्रदेशको राजधानी हेटौंडामा एक सञ्चारगृहले आयोजना गरेको कार्यक्रममा सहभागी नागरिक समाजका अगुवाहरुले प्रदेश सरकार विकास निर्माणमा बेकम्मा भएको टिप्पणी गरेका छन् । “दलका नेताहरु कुर्सीमोहमा डुब्ने, जनताको करले मन्त्री पाल्नु पर्ने, यो बेकम्मा प्रदेश तह किन चाहियो” कार्यक्रममा सहभागीहरुले यस्तै आक्रोश पोखेका छन् ।
न्युज २४ टेलिभिजनले हेटौंडामा आयोजना गरेको सिधा कुरा मुख्यमन्त्रीसँग कार्यक्रममा सहभागीहरुले प्रदेश सरकार, स्थानीय सरकार र संघीय सरकार बीचको बिचौलिया जस्तो भएको बताए । संघले देला भनेर प्रदेश आशा गरिने, तर संघले सधैं साघुरो मन गर्ने गरेको कारण पनि प्रदेशको औचित्य नभएको टिप्पणी सहभागीहरुले गरेका हुन् ।
कार्यक्रमा बागमती प्रदेशका मुख्यमन्त्री राजेन्द्र पाण्डेले प्रदेश सरकारलाई बलियो बनाउने जिम्मेवारी केन्द्रले आफ्नो हो भनेर नसोच्दा समस्या भएको बताए । “केन्द्रिकृत मानसिकताले विकास गर्न दिएन” मुख्यमन्त्री पाण्डले भने “केन्द्रिय राजनीति छिन्नभिन्न भएपछि प्रदेशमा कुर्सी मोह बढेजस्तो देखिएको हो, राजनीतिक स्थिरता नभएपछि कसरी विकास हुन्छ ।”
मन्त्रालय फुटाएर मन्त्री थप्ने, जनतालाई पाल्नै गाह्रो भएको सवाललाई सम्बोधन गर्दै मुख्यमन्त्री पाण्डले भने “एउटै मन्त्रीको जिम्मेवारीमा धेरै मन्त्रालयहरु गाभिएको कारण मन्त्रीले सबै तिर ध्यान दिनदिन सक्नु भएन, सोचे अनुसारको विकास भएन, अनि मन्त्रालय फुटाएको हो ।”
कार्यक्रममा पूर्व मुख्यमन्त्री डोरमणी पौडेलले प्रदेश सरकारको संरचनालाइ केन्द्रिय कर्मचारी तन्त्रले नस्वीकारेको बताए । केन्द्रीकृत अभ्यास लामो समयको अभ्यास भएकोले यो संघीयताको बानि पार्न पनि केही लामै समय लाग्ने पौडेलले बताए ।
आफू मख्यमन्त्री भएर आएपछि संरचना निर्माणमा समय लागेको बताउँदै पौडेलले भने “यहासम्म आईपुग्न धेरै संघर्ष गर्न पर्यो, अब खाका बनेको छ, प्रदेश सरकार देखिने भएको छ ।”
कार्यक्रममा नागरिक समाजका अगुवा पत्रकार प्रताप बिष्टले नयाँ संरचनाको कारण केही सकस रहे पनि, जनताको अपेक्ष अधुरो रहेको बताए । “प्रदेश सरकार आफै पनि सेतु बनेर बस्यो, केन्द्रले दिएन भनेर पन्छिएर प्रदेश सरकारले पार पाउने अवस्था हैन ।”
कार्यान्वय तहमा संघीयता आएपनि संघीय आचरण सोचेजस्तो नबनेको उनले बताए । “ केन्द्रीय नेतृत्व सामन्तीवादी प्रवृत्ति छ, यता प्रदेशमा चुनाव उठ्दा दलले धेरै आशा देखायो, तर पूरा गर्न सकेन अनि जनतामा निराशा बढेको छ ।”
कार्यक्रममा हेटौंडाका व्यवसायी राजकुमार न्यौपानेले व्यवस्था परिवर्तन भएपनि अवस्था परिवर्तन नभएपछि जनताको दुख झनै बढेको बताए । दलहरूबिच खिचातानी भयो, कुर्सी मोह अति भयो, प्रदेशमा काम गर्ने नेताले पनि केन्द्रको दोष दिएर कुर्सीमा बस्न मिल्दैन” न्यौपानेले भने “आफूले गर्न नसके कुर्सी छाडे भैगोनि, केन्द्रले दिएन भन्न पाइन्छ” उनले प्रश्न गरे ।
दशकौ देखि हेटौंडाको बजारको संरचना अस्तव्यस्त रहेको, अस्पतालको अवस्था नाजुक भएको, खेल मैदान, शिक्षा, स्वास्थ्य, रोजगारबारे युवाहरुले मुख्यमन्त्रीलाई प्रश्न गरेका थिए ।
मकवानपुर । संस्कृतिविद् एवम् शताब्दी पुरुष सत्यमोहन जोशीको निधन भएको छ । जोशीमा मुटु र प्रोष्टेटको समस्या थियो । उनमा कमजोरी बढेपछि असोज ७ गते किष्ट मेडिकल कलेज भर्ना गरिएको थियो ।
उपचारत अबस्थामा क्रममा डेंगु संक्रमण पुष्टि भएको उनको स्वास्थ अस्पताल बसाइको सुरुका दिनमा केही सुधार भएको थियो । पछि उनको स्वास्थ्य अवस्था गम्भीर बन्दै गएको थियो ।
उपचारकै सिलसिलामा असोज ३० गते आइतबार बिहान ७ बजेर ९ मिनेटमा जोशीको १ सय ३ वर्षको उमेरमा निधन भएको अस्पतालका निर्देशक डा सुरज बज्राचार्यले पुष्टि गरे ।
जोशीको जन्म्स वि.सं. १९७७ वैशाख ३० गते भएको हो । संस्कृतिविद् जोशी २०१२ सालमा स्थापित मदन पुरस्कारबाट २०१३ सालमा पहिलोपटक पुरस्कृत भएका थिए । उनी तीनपटकसम्म मदन पुरस्कार पाउने एक मात्र व्यक्तित्व हुन् । उनका कृतिहरू ‘हाम्रो लोक संस्कृति’ ले २०१३ सालमा, ‘नेपाली राष्ट्रिय मुद्रा’ ले २०१७ सालमा र ‘कर्णाली लोक संस्कृति’ ले २०२८ सालमा मदन पुरस्कार प्राप्त गरेका थिए ।
उनको जन्म शताब्दीको अवसरमा नेपाल सरकारले एक हजार रुपैयाँको चाँदीको सिक्का र १० रुपैयाँको हुलाक टिकटसमेत प्रकाशित गरेको थियो । जोशी १०० वर्ष पुग्दा ललितपुर महानगरपालिकाले सार्वजनिक विदासमेत दिएको थियो । ललितपुर महानगरपालिकाको नगर सभाले जोशीलाई निःशुल्क गाडी र सुरक्षा उपलब्ध गराउने निर्णय गरेको थियो ।
२०७१ सालमा त्रिमूर्ति निकेतनले उनलाई ‘शताब्दी पुरुष’ सम्मान दिएको थियो । तत्कालीन उपप्रधानमन्त्री वामदेव गौतम र कानुनमन्त्री नरहरि आचार्यले संयुक्त रुपमा जोशीकै उचाइ बराबर पाँच फिट अग्लो सप्तनागजडित ताम्रपत्र र पाँच लाख नगदसहित शताब्दी पुरुष उपाधि प्रदान गरेका थिए ।
२०७० सालमा उनी पद्मश्री साधनाबाट सम्मानित भएका थिए । नेपाल सरकारले उनलाई २०७९ को संविधान दिवसको अवसरमा ‘राष्ट्र गौरव’ मानपदवी प्रदान गर्ने निर्णय समेत गरेको थियो ।
