चितवन । दुई दशकअघि गैँडाकोट नगरपालिका–९, थुम्सीलाई पाते ढिँडोले चिनायो । ढिँडो खान थुम्सी जाने क्रम सुरु भयो । राजमार्गका यात्रुमात्र नभई गैँडाकोट, नारायणगढ, भरतपुर र आसपासका क्षेत्रबाट ढिँडो खान थुम्सी पुग्नेको लर्को लाग्न थाल्यो ।
पाते ढिँडो सुरु गरेका बृखलाल गुरुङ भन्छन्, ‘२०५६ सालको मंसिर १७ गते पाते ढिँडो सुरु भएको थियो । २४ वर्ष पूरा हुनै लाग्दा भरतपुर महानगरपालिका–१० मा पहिलो शाखा खोलेका छौँ । मंसिर १७ गते आइतबारदेखि भरतपुरबाट पाते ढिँडोको विशिष्ट सेवा उपलब्ध हुनेछ ।’ अढाई दशकअघि थुम्सीमा खुलेको पाते ढिँडो होटल एण्ड रेष्टुरेण्ट भरतपुर शाखासम्म आइपुग्दा पाते ढिँडो एण्ड बिच रिसोर्ट प्रा.लि. भएको छ ।
‘थुम्सीमा नारायणी किनारमा होटल रहेकोले पाते ढिँडो नामसँगै बिच रिसोर्ट थपेका हौँ’ भरतपुर शाखाबाट सेवा सुरु गर्नेबारे जानकारी दिन बुधबार आयोजित पत्रकार भेटघाटमा बोल्दै अध्यक्ष गुरुङले भने । उनले भरतपुर शाखा पहिलो आधिकारिक शाखा भएकोसमेत प्रष्ट पारे । पाते ढिँडो भरतपुर शाखा संचालक पर्यटन व्यवसायी मीनबहादुर गुरुङले गुरुङ भाषामा पातेको अर्थ माइली छोरी हुने जानकारी गराउँदै भने, ‘हामीले रिसोर्टको लुक्सलाई फरकपन दिने कोशिस गरेका छौँ ।
रिसोर्टमा प्रवेश गर्नेबित्तिकै काउण्टर अगाडि भुइँमा घरेलु रक्सी बनाइरहेकोजस्तो सांकेतिक दृश्य देख्न पाइन्छ । घरेलु रक्सीलाई ब्रान्डिङ गरी दर्ता गरेर विदेशी रक्सीको खपत कम गराउनु पर्छ भन्ने सन्देश पनि हो ।’ बजारमा पाते ढिँडोको नाममा धेरै होटल खुल्न थालेको विषयमा पनि ध्यानाकर्षण भएको बताउँदै गुरुङले भने, ‘हाल पाते ढिंडो होटल एण्ड रेष्टुरेण्टको शाखा भन्दै हामीसँग मिल्ने गरी उस्तै नाम राखेर विभिन्न स्थानमा होटल खोली आमग्राहक महानुभावहरूमा भ्रम सिर्जना गर्ने कार्य भइरहेको छ । त्यसप्रति हाम्रो ध्यानाकर्षण भएको छ। र, हामीले पहिलोपटक शाखा खोलेको जानकारी गराउँछौँ ।’
नाम अनुसार पाते ढिँडोमा मकै र फापरको ढिँडो त पाइन्छ नै, अन्य परिकार पनि पाइने बताइएको छ । कुखुरा, खसी, बंगुर, राँगाको मासुका सेकुवालगायत विविध परिकार पाइने रिसोर्टले प्रेस विज्ञप्तिमार्फत् जानकारी दिएको छ । करिब दुई करोड रुपैयाँ लगानीमा सुरु भएको पाते ढिँडोको भरतपुर शाखाले हाल २२ जनालाई प्रत्यक्ष रोजगारी दिएको छ । यसले मंसिर १७ गते सफ्ट ओपनिङ र जनवरी १ अर्थात् पुस १६ गते ग्रान्ड ओपनिङ गर्दैछ ।
देशका प्रमुख शहरहरुमा थप शाखा खोल्ने लक्ष्य लिइएको अध्यक्ष बृखलाल गुरुङले बताए । उपभोक्ताहरूको माग र चाहनाअनुसार अन्य स्थानमा पनि क्रमशः शाखा खोल्दै लैजाने योजनासहित काम गरिरहेको उनको भनाइ छ । ढिँडोसँगै धराने बङ्गुरको सेकुवा, चिकेन सेकुवा, मटन सेकुवा, बफ सेकुवा र स्वादिष्ट फास्टफुड पस्कने उनले बताए ।
साथै विभिन्न संघसंस्था, व्यावसायिक प्रतिष्ठानका लागि आवश्यक सभा, सेमिनार, गोष्ठी गर्न, बर्थ–डे, एनिभर्सरीको उत्सव मनाउनका लागि १ सयजना सम्मको क्षमता भएको सुविधा सम्पन्न वातानुकुलीत (एसी) सेमिनार हल र १५ जनासम्मका लागि ६ वटा प्राइभेट वातानुकुलीत (एसी) डाइनिङ हलकोसमेत सुविधा थप गरिएको उनको भनाइ छ ।
मकवानपुर । नेपाली कांग्रेस बागमती प्रदेश सम्मेलन पुस ७ गते हुने भएको छ । नेपाली कांग्रेस बागमती प्रदेश कार्य सम्पादन समितिको विहीबार काठमाडौँमा बसेको बैठकले पुस ७ गते प्रदेश सम्मेलन गर्ने निर्णय गरेको हो ।
प्रदेश कार्यसमिति गठनपछि पहिलोपटक बागमती प्रदेशको सम्मेलन गर्ने भएको हो । कांग्रेस बागमती प्रदेशको सम्पर्क कार्यालय काठमाडौंमा विहिबार बसेको कार्यसम्पादन समितिको बैठकले पुस ७ गते प्रदेशको पहिलो सम्मेलन गर्ने निर्णय गरेकाे कांग्रेस बागमती प्रदेश प्रवक्ता तिलक रुवालीले जानकारी दिए ।
कार्यसम्पादन समितिको बैठकले सम्मेलन तयारीका लागि विभिन्न समितिहरु गठन गरेकाे छ । प्रदेश सभापति ईन्द्रबहादुुर बानियाँको संयोजकत्व तथा सबै पदाधिकारी सदस्य रहेको मूल आयोजक समिति गठन गरेको छ । त्यस्तै राजनीतिक प्रस्ताव तयारी उपसमिति संयोजक उपसभापति चन्द्र महर्जन, आर्थिक व्यवस्थापन उपसमिति संयोजक उपसभापति मोहन बस्नेत, सांगठनिक प्रस्ताव तयारी उपसमिति संयोजक महामन्त्री कन्चनचन्द्र वादे तथा सहसंयोजक सहमहामन्त्री ऋषिराम घिमिरे र आगामी वर्षको कार्यक्रम (क्यालेण्डर) तयारी उपसमिति संयोजक महामन्त्री राजु श्रेष्ठ तथा सहमहामन्त्री जीवन डंगोललाई तोकिएको छ ।
त्यसैगरी कार्यसम्पादन बैठकले आर्थिक प्रतिवेदन तयारी उपसमितिमा कोषाध्यक्ष दीर्घमान श्रेष्ठ, सम्मान उपसमिति सहमहामन्त्री ऋषिराम घिमिरे, खाना ब्यवस्थापन उपसमिति सहमहामन्त्री हरिशरण श्रेष्ठ, स्वागत उपसमिति सहमहामन्त्री जीवन डंगोल, प्रचारप्रसार उपसमिति प्रवक्ता तिलक रुवाली, शुभकामना प्रायोजन तथा रजिष्ट्रेशन उपसमिति निमा लामा, निमन्त्रणा उपसमिति दीपेन्द्र आचार्य, कार्यपछिको प्रतिवेदन तयारी उपसमितिमा उज्जवलराम घिमिरे, हल, मञ्च, स्वागत गेट र व्यवस्थापन उपसमितिमा कोकी अस्तानी मगर, स्वास्थ्य शिविर डा. अमित सिं कार्की, सांस्कृतिक कार्यक्रम धनकुमारी थापा सरु, स्वयमसेवक परिचालन प्रज्वल दवाडी र रक्तदान कार्यक्रम संयोजकमा कुमार दुलाललाई तोकेको छ ।
संयोजकहरुले आवश्यक्ता अनुसार प्रदेश कार्यालयमा जानकारी दिई सदस्यहरु थप्न सक्ने प्रवक्ता रुवालीले जानकारी दिए । उनका अनुसार काठमाडौंमा हुने पहिलो सम्मेलनमा नेपाली कांग्रेसका केन्द्रीय सभापति शेरबहादुर देउवाको प्रमुख आतिथ्यता तथा केन्द्रीय पदाधिकारीहरु र सातै प्रदेशका प्रदेश सभापतिहरुको उपस्थिति रहेन छ ।
मकवानपुर । सरकारले आगामी माघ ११ गते राष्ट्रियसभाको निर्वाचन गर्ने निर्णय गरेको छ । राष्ट्रियसभाको रिक्त हुने पदमा माघ ११ गते निर्वाचन गर्ने निर्णय बुधबार बसेको मन्त्रिपरिषद् बैठकले गरेकाे हाे ।
सरकारका सूचना तथा सञ्चार प्रविधिमन्त्री रेखा शर्माले निर्वाचन आयोगसँगको परामर्शको आधारमा मिति निर्धारण गरिएको जानकारी दिइन् । आगामी फागुन २० गते राष्ट्रिय सभाका एक तिहाइ अर्थात १९ सांसदको पद रिक्त हुँदै छ । राष्ट्रियसभा सदस्यको पद रिक्त हुनु भन्दा एक महिना अगाडि नै निर्वाचन गराउनुपर्ने संवैधानिक व्यवस्था छ ।
आगामी फागुन २० मा एमालेका ९, कांग्रेसका ४ माओवादीका ३, एकीकृत समाजवादीका २, जसपाका १ र स्वतन्त्र सांसद १ जना गरी २० सांसदको पदावधि सकिन लागेको हो । पदावधि सकिनेमा राष्ट्रियसभाका अध्यक्ष, राज्यमन्त्री, विभिन्न पार्टीका संसदीय दलका पदाधिकारीको समेत रहेका छन् ।
निर्वाचन आयोगले राष्ट्रिय सभा सदस्यकाे निर्वाचन आगामी माघ ११ गते विहीबार गर्न सरकारलाई सुझाव दिएकाे थियाे । आगामी फागुन २० गते राष्ट्रिय सभाका एक तिहाइ सदस्यकाे म्याद समाप्त हुने भएकाेले उक्त पदमा निर्वाचन आगामी माघ ११ गते गर्ने गरी मिति तोक्न गत मंसिर ७ विहीबार सरकारलाई सुझाव दिएको हाे ।
आयोगका पदाधिकारीले प्रधानमन्त्री पुष्पकमल दाहाललाई भेटेर उक्त परामर्श दिइएकाे आयोगका प्रवक्ता शालिग्राम शर्मा पौडेलले जानकारी दिए । आयाेगका पदाधिकारीलाई प्रधानमन्त्री दाहालले आयोगले सिफारिस गरेकै मितिमा निर्वाचन हुने गरी तोकिने जानकारी दिएकाे थिए ।
नेपालको संविधानकाे धारा ८६ (३) बमोजिम राष्ट्रिय सभाका एक तिहाइ सदस्यको पदावधि २०८० फागुन २० गते समाप्त हुदैछ । राष्ट्रिय सभा सदस्य निर्वाचन ऐन, २०७५ बमोजिम पद रिक्त हुनुभन्दा ३५ दिन अगावै निर्वाचन गरिसक्नुपर्ने व्यवस्था छ । आगामी फागुन २० गते निर्वाचित १९ र सरकारबाट मनोनीत एक गरी २० सदस्यको पद रिक्त हुँदैछ । राष्ट्रिय सभामा प्रत्येक दुई वर्षमा रिक्त हुने एक तिहाइ सदस्य पदको निर्वाचन हुँदै आएको छ ।
निर्वाचनका लागि नयाँ मतभार कायम
निर्वाचन आयोगले राष्ट्रिय सभा सदस्य निर्वाचनका लागि कायम भएका मतदाताहरूको नयाँ मतभार कायम गरेको छ । मंसिर ६ गते बुधबारकाे आयोगको बैठकले प्रदेश सभा सदस्य र स्थानीय तहका प्रमुख उपप्रमुख तथा अध्यक्ष उपाध्यक्षको नयाँ मतभार कायम गरिएको आयोगका प्रवक्ता पौडैलले जानकारी दिए ।
बैठकले एक जना प्रदेश सभा सदस्य बराबर ५३ मतभार र गाउँपालिका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १९ मतभार कायम गरेको पाैडेलले बताए । यसअघि एक जना प्रदेश सभा सदस्यको मत ४८ र स्थानीय तहका मतदाता जनप्रतिनिधिकाे मतभार १८ कायम थियो ।
हाल राष्ट्रिय जनगणना २०७८ प्रतिवेदन सार्वजनिक भैसकेकोले सो प्रयोजनका लागि उक्त ऐन बमोजिम राष्ट्रिय तथ्याङ्क कार्यालयको सिफारिस समेतका आधारमा मतभार ताेकिएकाे आयाेगले जनाएकाे छ ।
हेटौंडा च्यालेन्ज कप फुटबल प्रतियोगिताः उपाधी रिगल हेटौँडा रिसोर्टको पोल्टामा
Tags: No Comments
मकवानपुर । बागमती प्रदेशको राजधानी हेटौडामा भएको सुदर्शन घिमिरे स्मृति यु–२१ हेटौँडा च्यालेन्ज कप फुटबल प्रतियोगिताको उपाधी रिगल हेटौँडा रिसोर्ट मकवानपुरको पोल्टामा परेको छ । बुधबार प्रतियोगिताको उपाधीका लागि भएकाे फाइनलमा रियल स्टार क्लबलाई हराउँदै रिगल हेटौंडा रिसोर्टले उपाधी हात पारेको हो ।
एफसी मुण्डियाल क्लबको आयोजनामा भएको प्रतियोगिताको उपाधी रक्षाकालागि रिगलले रियललाई ४–० गोल अन्तरको जीत निकालेको हो । उपाधी रक्षासँगै रियल हेटौडाले १ लाख ११ हजार १ सय ११ रुपैयाँ हात गर्याे भने उपविजेतामा चित्त बुझाएकाे रियल स्टारले नगद ५५ हजार ५ सय ५५ रुपैयाँ प्राप्त गरेको छ ।
रिगलकाे जीतमा पहिलो हाफकाे खेलमा मोहित गुरुङले १ गाेल गरे । त्यस्तै दोस्रो हाफको खेलमा सुजल श्रेष्ठले १ गोल तथा अनिष महर्जनले २ गोल गर्दै जीत पक्का गरेका थिए । फाइनलखेलकाे म्यान अफ द म्याच रिगलका अनिष महर्जन घोषित भए ।हेटौंडा–५ स्थित पिप्ले–क्याम्पा रंगशालामा सोमबार भएको पहिलो सेमिफाइनल खेलमा नवजनजागृति युवा क्लब सिमरालाई टाइब्रेकरमा ४–३ गोलअन्तरले हराउँदै रियल स्टारले फाइनलमा स्थान बनाएको थियो । यस्तै, सोमबार भएको दोस्रो सेमिफाइनल खेलमा रिगल हेटौंडा रिसोर्टले अखिल नेपाल खेलकुद महासंघ बागमतीलाई टाइब्रेकरमा ५–३ गोलले हराउँदै फाइनल प्रवेश गरेको थियो ।
रिगलका मोहित गुरुङ प्रतियोगिताको उत्कृष्ट खेलाडी घोषित हुँदा नगद १५ हजार रुपैयाँ र ट्रफी प्राप्त गरे । प्रतियोगिताको उत्कृष्ट गोलरक्षक रिगलकै क्रिशल मोक्तान भए । उत्कृष्ट रक्षक रियल स्टारका उर्गेन रुम्बा, उत्कृष्ट मिडफिल्डर रिगलका रितिक श्रेष्ठ, उत्कृष्ट फरवार्ड रिगलकै कप्तान प्रितम स्याङ्बो, उत्कृष्ट प्रशिक्षक पनि रिगलकै विजयलाल श्रेष्ठ घोषित भए ।
एफसी मुण्डियाल क्लब अध्यक्ष सुविन घिमिरे अध्यक्षता तथा हेटौँडा उपमहानगरपालिकाकी प्रमुख मीना कुमारी लामाको प्रमुख आतिथ्यमा प्रतियाेगिताकाे समापन तथा पुरस्कार वितरण कार्यक्रम भएको हाे । प्रतियाेगिता विजेता तथा उपविजेतालाई नगर उपप्रमुख राजेश बानियाँले पुरस्कार वितरण गरेका थिए ।
हेटौंडा स्पोर्टस् एफसी मुण्डियाल क्लबको आयोजनामा सञ्चालित प्रतियोगितामा १४ वटा टिमको सहभागिता रहेको थियो । “राष्ट्रिय खेलाडी बन्ने होड, उत्पादनमा जोड” भन्ने नाराका साथ युवा खेलाडीलाई प्रोत्साहन गर्न उमेर समूहको प्रतियोगिता आयोजना गरिएको प्रतियोगिताका संयोजक सुदीप सिंह ठकुरीले बताए । प्रतियोगिता संचालनबाट बचत भएको रकम जाजरकोट भूकम्प पीडितहरुका लागि सहयोग गरिने अध्यक्ष घिमिरेले जानकारी दिए ।
मकवानपुर । बागमती प्रदेशको उद्योग, वाणिज्य, भूमि तथा प्रशासन मन्त्रालयले भवन प्राप्त गरेकाे छ । मन्त्रालय स्थापनाको सय दिन पूरा भएको अवसरमा मन्त्रालयले बुधबार सरकारी भवनबाट सेवा सुरु गरेकाे हाे । मुख्यमन्त्री तथा मन्त्रिपरिषद्को कार्यालय परिसरमा रहेको तत्कालीन जिल्ला विकास समितिको भवनमा उक्त मन्त्रालय सरेको हो।
उद्योग, वाणिज्य, भूमि तथा प्रशासन मन्त्री रामकृष्ण चित्रकारले राज्यलाई आर्थिक भार बढ्ने भन्दै भाडाकाे घरमा मन्त्रालय संचालन गरेनन् । विभागीय जिम्मेवारी पाएको दिनमा नै मन्त्री चित्रकारले भाडाको घरमा मन्त्रालय सञ्चालन नगर्ने घोषणा नै गरेका थिए।
तत्कालिन जिविसकाे जीर्ण अवस्थामा रहेको भवनलाई मर्मतसम्भार गरेर मन्त्रालय सारिएको हाे । मन्त्रालयको भवनमा प्रवेश गर्दै मन्त्री चित्रकारले भने, ‘भाडा लिएकाे घर नयाँ थियाे तर मासिक एक लाखभन्दा बढी भाडा राज्यकाे काेषबाट खर्च हुने हुँदा आर्थिक भार कम गर्न पुरानै भाडा नपर्ने सरकारी भवनमा मन्त्रालय सारिएको हो।’
प्रदेश संरचान निर्माणकाे जग्गा प्राप्ती अन्तिम चरणमा
बागमती प्रदेशका मुख्यमन्त्री शालिकराम जमरकट्टेलसहितकाे उपस्थितिमा बुधबार उद्योग, वाणिज्य, भूमि तथा प्रशासन मन्त्रालयकाे भवन प्रवेश कार्यक्रम भएकाे हाे । भवन प्रवेश कार्यक्रममा मुख्यमन्त्री जमरकट्टेलले मन्त्रालयले पुरानै भएपनि सरकारी कार्यालयमा भवन प्राप्त गरेर सरेकोमा खुसी व्यक्त गरे । हेटौंडा–१७ मा प्रदेश सरकारका कार्यालयहरु निर्माण गर्नका निम्ति जग्गा प्राप्तिको प्रक्रिया अन्तिम चरणमा पुगेको समेत उनले बताए ।
‘सार्वजनिक क्षेत्रमा खर्च कटौती गर्ने र उत्पादनको क्षेत्रमा बजेट लगानी गर्ने कुरामा प्रयत्नरत छाै’ उनले भने । त्यस्तै प्रदेश नीति तथा योजना आयोग र मुख्य न्यायधिवक्ताको कार्यालय केहिदिन भित्रै अर्काे सरकारी कार्यालयमा सर्न लागेको समेत उनले जानकारी दिए । कृषि क्षेत्रमा जोड दिने र यहि महिना भित्र लगभग ८० वटा पालिकालाई पकेट क्षेत्र घोषणा गर्न लागेको उनले जनाए । हेटौंडामा रहेको मकवानपुर बहुमूखी क्यामपसलाई प्रदेशको सार्वजनिक विद्यालय बनाउने निर्णय भएको उनले बताए ।
मन्त्री रामकृष्ण चित्रकारले गरे १०० दिनको प्रगति विवरण
बागमती प्रदेशका उद्योग, वाणिज्य, भूमि तथा प्रशासन मन्त्री रामकृष्ण चित्रकारले आफूले कार्यभार सम्हालेको एक सय दिनको अवधिमा भएका प्रगति विवरण सार्वजनिक गरेका छन् । गत श्रावण २१ गते मन्त्री नियुक्ति भई कार्यभारसम्हालेका चित्रकारले सय दिनको अवधिमा राम्रो कामको थालनी गरेकाे दाबी गरे ।
आफ्नाे सय दिनकाे अवधीमा मेला, महोत्सव, प्रदर्शनी सञ्चालन तथा व्यवस्थापन कार्यविधि २०८० मन्त्रीपरिषदबाट स्वीकृत, प्रदेश औद्योगिक व्यवसाय ऐन तथा प्रादेशिक व्यापार तथा व्यवसाय सम्बन्धी ऐनको संशोधन गर्न आवश्यक प्रक्रिया सूरु भएको, संविधान दिवसको अवसरमा हेटौंडामा प्रदेश हस्तकला प्रर्दशनी भएको उनले बताए ।
यसैगरी ‘प्रदेश स्तरीय संयुक्त बजार अनुगमन निर्देशिका, २०७५’ लाई विस्थापन गरी ‘प्रदेश स्तरीय संयुक्त बजार व्यवस्थापन अनुगमन निर्देशिका, २०८०’ मन्त्रीपरिषदबाट स्वीकृतिको अन्तिम चरणमा रहेको जानकारी दिए । विद्यमान नीतिगत एवम् कानूनी व्यवस्थाहरुका सम्बन्धमा सरोकारवालाहरुको राय ,परामर्श सुझाव ग्रहण गर्ने कार्यलाइ प्राथमिकता दिइएको, तल्लाे तह देखि उद्योगी व्यवसायीहरुका पीरमर्का तथा गुनासो सुनुवाई, उपभोक्ता हकहित संरक्षण सम्बन्धी कानूनको मस्यौदा तयार गर्ने प्रक्रिया अघि बढाइएको, बर्हिगमन सेवा सहज बनाउन मन्त्रालयबाट निर्मित उद्योग व्यवसाय तथा व्यापार व्यवसाय सम्बन्धी अनलाइन सफ्टवेयरहरुलाई समय सापेक्ष अपग्रेड गरी सेवाग्राहीलाई घरबाटै सेवा दिने सम्बन्धी छलफल भैरहेको उनले बताए ।
त्यस्तै बजार अनुगमनको कार्यलाई नियमित र प्रभावकारी बनाइएको मन्त्री चित्रकारले बताए । उनका अनुसार चाडपर्वको समयमा आकस्मिक तथा अन्य समयमा नियमित रुपमा गरी १ हजार ५ सय १३ वटा व्यवसायिक फर्महरुको अनुगमन गरिएकाे छ । व्यावसायिक फर्मकाे अनजुगमनबाट करिब ६ लाख रुपैँया जरिवाना गराई ४ लाख रुपैँया बराबरका म्याद नाघेका सामग्रीहरु बरामद गरी नष्ट गर्ने कार्य भएको उनले सार्वजनिक गरेको प्रगति विवरणमा उल्लेख छ ।
यसैगरी चालु आ.व २०८०/८१ मा १३ वटा जिल्लाका घरेलु तथा साना उद्योग कार्यालयहरुबाट करिब २ हजार ३ सय ४० औद्योगिक तथा व्यवसायिक फर्महरु दर्ता भएको, उद्योग स्थापनाका लागि कोरिया, चीन, तथा जापानका व्यवसायीहरुसँग भेटघाट र लगानीतर्फ प्रेरित, हेटौंडाका उद्योगहरुको स्थलगत भ्रमण लगायतका कामहरु भएको उनले जनाए ।
