मकवानपुर । बागमती प्रदेश सुरक्षा समितिको बैठकले एकीकृत सुरक्षा समन्वय केन्द्र निर्माण गर्ने निर्णय गरेको छ । आन्तरिक मामिला तथा कानुनमन्त्रालयमा बसेकाे समितिको बैठकले १६ मंसिरमा हुने उपनिर्वाचनका लागि सुरक्षा समन्वय केन्द्र निर्माण गर्ने निर्णय गरेको हाे ।
उपनिर्वाचन हुने प्रदेशका मकवानपुर काठमाडौं दोलखा र नुवाकाेट जिल्लालाई समेटेर एकीकृत सुरक्षा समन्वय केन्द्र बनाउने निर्णय गरेको मन्त्री सुरजचन्द्र लामिछानेले जानकारी दिए । प्रदेशका मकवानपुरकाे हेटौडा उपमहानगरपालिका वडा नम्बर १२ मा वडा अध्यक्ष सहित किर्तिपुर नगरपालिकाको नगर प्रमुख तथा १ र ४ नम्बर वडाको वडा अध्यक्ष, काठमाडौं उपमहानगरपालिका–१६ मा वडा अध्यक्ष, नुवाकोटको ककनी गाउँपालिकाको २ नम्बर वडाको वडा अध्यक्ष र दोलखाको गौरीशंकर गाउँपालिका उपाध्यक्ष चयनका लागि १६ मंसिरमा उपनिर्वाचन हुँदैछ ।
उपनिर्वाचन हुने चार जिल्लाको शान्ति सुरक्षाको रिपोर्टिङलाई एकद्वार प्रणालीबाट व्यवस्थित गर्दै चुस्तदुरुस्त सुरक्षा व्यवस्थापनका लागि एकीकृत सुरक्षा केन्द्रबाट काम गरिने बताइएकाे छ । सम्पर्क कार्यालय आन्तरिक मामिला तथा कानुन मन्त्रालय हेटौडामा रहने केन्द्रको संयोजन मन्त्री लामिछानेले गर्नेछन् ।
मकवानपुर । मकवानपुरकाे हेटौंडामा खुला कविता प्रतियाेगिता हुने भएकाे छ । साहित्य सङ्गम मकवानपुरकाे आयोजना तथा प्रदेश युवा परिषद्, बागमती प्रदेशको व्यवस्थापनमा कविता प्रतियोगिता हुने भएको हाे ।
प्रतियाेगिता सम्बन्धी आइतबार संगमले सूचना प्रकाशित गरी जानकारी गराएकाे छ । प्रतियोगिता २८ मंसिर २०८१ मा आयोजना गरिने साहित्य संगम मकवानपुरले जनाएकाे छ । प्रतियोगितामा प्रथम,द्वितीय, तृतीय र सान्त्वना पुरस्कारकाे व्यवस्था गरिएकाे संगम अध्यक्ष बर्तौलाले जानकारी दिए । उनका अनुसार प्रथम पुरस्कार ४० हजार रुपैयाँ द्वितीय पुरस्कार ३० हजार रुपैयाँ तृतीय पुरस्कार २० हजार रुपैया र सान्त्वना पुरस्कार १० हजार रुपैयाँ रहेकाे छ ।
जुनसुकै विषयका मौलिक कविताले स्थान पाउने प्रतियाेगितामा ४० वर्ष उमेर पुरा नभएका युवाले मात्र भाग लिन पाउने अध्यक्ष बर्तौलाले जानकारी दिए । प्रतियाेगितामा भाग लिने कविता बढीमा १५० शब्दकाे हुनु पर्ने छ भने कुनै पनि सञ्चार माध्यम वा सामाजिक सञ्जालमा प्रकाशित/प्रसारित नभएको हुनुपर्ने बताइएकाे छ । कविता पठाउँदा उमेर खुल्ने आधिकारिक प्रमाणपत्र र वैयक्तिक विवरण (बायोडाटा) समेत पठाउनु पर्ने नियम रहेकाे संगम सचिव मनोज पोखरेलले बताए ।
प्रतियोगिताकाे लागि कविता २० मंसिर अपरान्ह ४ बजेसम्म प्राप्त हुने गरी पठाउनु पर्ने सूचनामा उल्लेख छ । निर्धारित समयमा प्राप्त कवितामध्ये उत्कृष्ट २० कविता छनोट गरी अन्तिम प्रतियोगितामा सहभागी गराइने पोखरेलले बताए । उनका अनुसार अन्तिम प्रतियोगितामा कवि स्वयम् उपस्थित भई कविता वाचन गर्नु पर्नेछ । उत्कृष्ट २० कविता छनोटको सूचना २४ मंसिरमा प्रकाशित गरिने छ भने कविता sangam.htd@gmail.com मा पठाउनु पर्ने पोखरेलले जनकारी दिए ।
मकवानपुर । १६ मंसिरमा हुने स्थानीय तहको उपनिर्वाचन अन्तरगत आइतबार उम्मेदवाहरुले उम्मेदवारी दर्ता गराएका छन् । हेटौंडा उपमहानगरपालिका वडा नम्बर १२ मा अध्यक्ष पदका लागि उम्मेदवारी दर्ता भएको छ ।
हेटौंडा-१२ मा नेपाली कांग्रेस, नेकपा एमाले,नेकपा माओवादीसहित अन्य दल तथा स्वतन्त्र समेत गरी १४ जना उम्मेदवारले उम्मेदवारी दिएकाे मुख्य निर्वाचन अधिकृतकाे कार्यालयले जनाएकाे छ । कार्यालयका अनुसार ९ जना दलका उम्मेदवार र ५ जना स्वतन्त्र उम्मेदवारले उम्मेदवारी दर्ता गराएका हुन् । १४ जना मध्ये ११ जना पुरुष र ३ जना महिला उम्मेदवार छन् ।
२०७९ सालकाे स्थानीय तहकाे निर्वाचनमा हेटौंडा १२ काे वडाध्यक्ष पदमा विजयी ललित बहादुर घलान जिल्ला समन्वय समिति मकवानपुरकाे प्रमुख निर्वाचित भएपछि रिक्त रहेकाे पदमा उप निर्वाचन हुन लागेकाे हाे । हेटौंडा-१२ मा उम्मेदवारी दिने उम्मेदवारहरुमा नेपाली कांग्रेसका अर्जुनप्रसाद तिवारी, नेकपा एमालेबाट राजेश नगरकोटी, नेकपा माओवादीका रविनकुमार प्रधानले उम्मेदवारी दिएका छन् ।
यसैगरी राप्रपाबाट प्रेमबहादुर भ्लोन, रास्वपाका आशाबिर बल, जसपाका छविलाल वाईबा,मंगोल नेशनल अर्गनाइजेशनका दिपा लामा, नेमकिपाका फुलमाया तितुङ, नेकपा एसबाट बलराम बलले उम्मेदवारी दिएका छन् । यस्तै स्वतन्त्र तर्फ अर्जुन घलान, कुमार पोखरेल,गिताकुमारी नेवार, छत्रप्रकाश अधिकारी, युनेश लामा सिन्तानले उम्मेदवारी दिएकाे कार्यालयले जनाएकाे छ ।
निर्वाचन कार्यतालिका अनुसार मङ्सिर ३ गते बिहान १० देखि अपराह्न ३ बजेसम्म आइतबार उम्मेदवारी दर्ता गरेका उम्मेदवारको विरोधमा उजुरी दिने, सोही दिन अपराह्न ३ बजेपछि मनोनयपत्र र उजुरीमाथि जाँचबुझ एवं निर्णय गरी मङ्सिर ४ गते साँझ ५ देखि ६ बजेसम्म उम्मेदवारको नामावली प्रकाशन गरिनेछ ।
उम्मेदवारले मङ्सिर ५ गते बिहान ९ देखि अपराह्न १ बजेसम्म उम्मेदवारीकाे नाम फिर्ता लिन सक्ने छ भने् भने सोही दिन दिउँसो १ देखि ३ बजेसम्म अन्तिम नामावली प्रकाशन गरी दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिने कार्यतालिका रहेकाे छ ।
मकवानपुर । मकवानपुरको मनहरी गाउँपालिकामा जारी चैनपुर जेसीज कप फुटबल प्रतियोगिताको फाइनल समिकरण पुरा भएको छ । जेसीज कप फुटबल प्रतियोगिताको सोमबारको सेमीफाइनलबाट एफसी परेली क्लब प्रवेश गरेसँगै फाइनल समिकरण पुरा भएकाे हाे ।
यसैगरी प्रतियोगिता अन्तरगत शुक्रबार भएकाे पहिलाे सेमिफाइनलबाट मकवानपुरगढी गाँउपालिकाकाे जेसीआई टिमले फाइनलमा स्थान बनाएकाे थियाे । सोमबार हुने फाइनलमा उपाधी रक्षाका लागि मकवानपुर गढीले परेलीकाे सामना गर्ने छ ।
शनिबार मनहरी गाउँपालिकाको गोलघर खेलमैदानमा भएको दोस्रो सेमीफाइनल खेलमा मनहरी–५ लाई टाइब्रेकरमा ५–४ गोलअन्तरले हराउँदै एफसी परेली फाइनलमा प्रवेश गरेको हो । निर्धारित समय २–२ गोलको बराबरीमा सकिएपछि खेल टाइब्रेकर धकेलिएकाे थियाे । यसैगरी मकवानपुरगढी जेसीआई शुक्रबार भएको सेमीफाइनल खेलमा एफसी नमोबुद्धलाई २–१ गोलअन्तरले हराउँदै फाइनल प्रवेश गरेकाे हाे ।
मनहरी–४, मसिनेस्थित गोलघर खेल मैदानमा प्रतियोगिताको विजेताले एक लाख एक हजार १११ रुपैयाँ र उपविजेताले ५१ हजार १५१ रुपैयाँसहित ट्रफी, मेडल र प्रमाणपत्र प्राप्त गर्नेछन् । प्रतियोगिताको सर्वोत्कृष्ट खेलाडीले ७ हजार ५ सय रुपैयाँ तथा अन्य विधागत उत्कृष्टले जनही नगद ३ हजार ५ सय रुपैयाँसहित ट्रफी र प्रमाणपत्र प्राप्त गर्ने आयोजकले जनाएको छ ।
प्रतियोगितामा मनहरी–४, एफसी नमोबुद्ध, सक्षम युवा क्लब, एफसी ढिँडो, कमाने फुटबल एकेडेमी, जेसीआई मकवानपुरगढी, पदमपोखरी युनाइटेड एफसी, आरआर एफसी, हाँडीखोला युथ क्लब, जनसिद्ध युवा क्लब, एफसी परेली क्लब, टिएनटी मनहरी, हेटौंडाको नारायणी कलेज, मनहरी २ नम्बर वडा, मनहरी ५ नम्बर वडा र ऋषेश्वर युवा क्लबको टिमसहित १६ टिमको सहभागिता रहेकाे थियाे ।
मकवानपुर । १६ मङ्सिरमा हुने स्थानीय तह निर्वाचनकाे लागि भाेली आइतबार उम्मेदवारहरुले मनोनयन दर्ता गर्ने भएका छन् । निर्वाचन आयोगकाे उपनिर्वाचन कार्यतालिका अनुसार देश भरका स्थानीय तहका ४४ रिक्त पद मा प्रतिस्पर्धा गर्न उम्मेदवारी दर्ता गर्ने छन् ।
मकवानपुर जिल्लाकाे १ पदकाे लागि उपनिर्वाचन हुने भएकाे छ । जिल्लाकाे हेटौंडा उपमहानगरपालिका वडा नम्बर १२ काे वडाध्यक्ष पदकाे लागि उपनिर्वाचन हुदैंछ । जिल्लामा क्रियाशील राजनीतिक दलहरुले उक्त पदकाे लागि उम्मेदवारहरुकाेको टुङ्गो लगाएका छन् । गत २०७९ वैशाखमा सम्पन्न स्थानीय तह निर्वाचनबाट सो वडाको वडाध्यक्षमा निर्वाचित ललितबहादुर घलान जिल्ला समन्वय समिति मकवानपुरको प्रमुखमा निर्वाचित भएपछि वडाध्यक्ष पद रिक्त भएको थियाे ।
नेपाली कांग्रेसले अर्जुन तिवारीलाई उम्मेदवार बनाउने निर्णय गरेको नेपाली कांग्रेस मकवानपुरले जनाएकाे छ । नेपाल कम्युनिष्ट पार्टी (एमाले) ले राजेश नगरकोटीलाई उम्मेदवारका रुपमा प्रस्तुत गरेको छ भने नेपाल कम्युनिष्ट पार्टी (माओवादी केन्द्र) ले रविन प्रधानलाई उम्मेदवार बनाउने भएकाे छ ।
तीनदलसँगै नेपाल कम्युनिष्ट पार्टी (एकीकृत समाजवादी) राष्ट्रिय स्वतन्त्र पार्टी र राष्ट्रिय प्रजातन्त्र पार्टीले पनि उम्मेदवार टुङ्गो लगाएका छन् ।रास्वपाले आशा वीरबललाई उम्मेदवार बनाउने निर्णय गरेको हेटौँडा नगर सभापति ध्रुवबहादुर विष्टले बताए । एकीकृत समाजवादीले बलराम बल र राप्रपाले प्रेम लामालाई उम्मेदवार बनाउने निर्णय उक्त पार्टीले जनाएकाे छ ।
दलहरुले उम्मेदवार चयन गरेसँगै चुनावी अभियानलाई तीव्रता दिएका छन् । उपनिर्वाचनकाे मिति नजिकिएसँगै उक्त वडामा चुनावी सरगर्मी बढेको छ ।
त्रिपक्षिय प्रतिष्पर्धा
२०७९ सालकाे स्थानीय तह निर्वाचनमा प्रमुख तीन दलबीच नै प्रतिस्पर्धा भएको हेटौडा १२काे वडाअध्यक्ष पदमा उपनिर्वाचनमा समेत तीनै दलबीच कडा प्रतिस्पर्धा हुने आकँलन गरिएको छ ।
गत निर्वाचनमा माओवादी केन्द्रका ललितबहादुर घलानले १ हजार ३ सय ७१ मत प्राप्त गरी वडाध्यक्ष पदमा विजयी भएका थिए । उनका प्रतिस्पर्धी कांग्रेसका अर्जुनप्रसाद तिवारीले १ हजार ३ सय ४० मत प्राप्त गरेका थिए । यस्तै एमालेका राजेश नगरकोटीले १ हजार ३ सय २५ मत प्राप्त गरे ।
गतनिर्वाचनमा उम्मेदवारबीचको मतान्तरमा खासै फरक छैन् । विजय भएका माओवादीका घलान र निकटतम प्रतिद्वन्दी काँग्रेसका तिवारी बीच ३१ मतको मात्र फरक थियो । यस्तै विजयी घलान र तेस्राे स्थानमा रहेका एमालेका नगरकोटी ४६ मतको अन्तर थियो । तिवारी र नगरकोटीबीच भने १५ मतको मात्र फरक थियो ।
गतनिर्वाचनमा तीनै दलका उम्मेदवारले पाएको मतलाई हेर्दा चुनावमा कसले बाजी मार्छ अनुमान लगाउन सक्ने अवस्था भने देखिदैन् । अन्य दलहरुले समेत उम्मेदवारकाे टुङ्गो लगाएकाेले उपचुनाव निकै प्रतिष्पर्धी हुने देखिन्छ ।
थपिए १५ सय मतदाता
उपनिर्वाचनमा हेटौंडा–१२ मा १ हजार ५ सय ८८ मतदाता थपिएका छन् । निर्वाचन आयोगले आगामी उपनिर्वाचनमा हेटौंडा–१२ को वडा अध्यक्ष पदका लागि ८ हजार ५३ मतदाता कायम गरेको छ । जसमा पुरुष ३ हजार ८ सय ७८, महिला ४ हजार १ सय ७४ र अन्य १ जना मतदाता कायम गरिएको छ ।
२०७९ सालको स्थानीय तह निर्वाचनमा उक्त वडामा ६ हजार ४ सय ६५ मतदाता कायम गरिएको थियो । आयोगले हेटौंडा–१२ मा आगामी उपनिर्वाचनका लागि २ वटा मतदानस्थल कायम गरेको छ भने ९ वटा मतदान केन्द्र कायम गरेकाे छ ।
मुख्य निर्वाचन अधिकृतकाे कार्यालय स्थापना
स्थानीय तहको उपनिर्वाचनकाे लागि हेटौंडा उपमहानगरपालिकाको वडा नम्बर १२ मा मुख्य निर्वाचन अधिकृतको कार्यालय स्थापना गरिएको छ । शुक्रबार उपनिर्वाचनकाे लागि १२ नम्बर वडा कार्यालय भवनमा मुख्य निर्वाचन अधिकृतको कार्यालय स्थापना गरिएको हो । मुख्य निर्वाचन अधिकृत अवानी मैनाली भट्टराईले वडा कार्यालय भवनमा कार्यालय स्थापना गरिन् ।
यस्तो छ निर्वाचन कार्यतालिका
निर्वाचनका लागि ३० कात्तिकमा मुख्य निर्वाचन अधिकृतको कार्यालय स्थापना गरिएकाे छ । मंसिर २ बाट निर्वाचनका कार्यक्रम संचालन गरिने छ । मंसिंर १६ मा मतदान हुने निर्वाचन आयोगको कार्यक्रम तालिका रहेको छ । मङ्सिर ३ गते बिहान १० देखि अपराह्न ३ बजेसम्म उम्मेदवारको विरोधमा उजुरी दिने, सोही दिन अपराह्न ३ बजेपछि मनोनयपत्र र उजुरीमाथि जाँचबुझ एवं निर्णय गरी मङ्सिर ४ गते साँझ ५ देखि ६ बजेसम्म उम्मेदवारको नामावली प्रकाशन हुनेछ ।
मङ्सिर ५ गते बिहान ९ देखि अपराह्न १ बजेसम्म उम्मेदवारले नाम फिर्ता लिन सक्ने छभने सोही दिन दिउँसो १ देखि ३ बजेसम्म अन्तिम नामावली प्रकाशन गरी दिउँसो ३ देखि ५ बजेसम्म उम्मेदवारलाई निर्वाचन चिह्न प्रदान गरिने छ । मङ्सिर १६ गते बिहान ७ देखि अपराह्न ५ बजेसम्म मतदान हुनेछ । त्यसपछि मतगणनालगायतकाे प्रक्रिया हुनेछ ।
विभिन्न कारणले रिक्त रहेका जिल्ला समन्वय समिति प्रमुख दुई, गाउँपालिका अध्यक्ष दुई, उपाध्यक्ष चार, नगरपालिका प्रमुख एक, उपप्रमुख एक र वडाध्यक्ष ३४ गरी जम्मा ४४ रिक्त पदका लागि उपनिर्वाचन हुदैंछ ।
आइतबारबाट निर्वाचन आचार संहिता लागु हुने
स्थानीय तहको उपनिर्वाचनका लागि २ मङ्सिर आइतबारदेखि निर्वाचन आचारसंहिता लागु हुने भएको छ । आचारसंहिता निर्वाचन सम्पन्न नभएसम्मका लागि लागु हुने निर्वाचन आयोगले जनाएकाे छ ।
आयोगको शनिबारको बैठकले निर्वाचन आयोग ऐन, २०७३ को दफा २२ तथा निर्वाचन आचारसंहिता, २०७९ को दफा १ को उपदफा (२) बमोजिम उपनिर्वाचन हुने जिल्ला भित्र निर्वाचन आचारसंहिता, २०७९ को सम्पूर्ण व्यवस्था लागू गर्ने निर्णय गरेको हो ।
निर्वाचन आचारसंहिता लागू भएको जिल्लाको निर्वाचन हुने स्थानीय तह बाहेक अन्य क्षेत्रमा निर्वाचन आचारसंहिताले निषेध गरेका कार्य गर्नु गराउनु परेमा निर्वाचन आयोगलाई पूर्व जानकारी दिई निकास भएबमोजिम गर्न सकिने आयोगले प्रकाशित गरेकाे विज्ञप्तिमा उल्लेछ ।