मकवानपु्र । मकवानपुरकाे बागमती गाउँपालिकामा जारी बागमती गोल्डकप प्रतियोगितामा चर्च व्वाइज सेमिफाइनलमा प्रवेश गरेको छ ।
सातौं संस्करणको बागमती गोल्डकप राष्ट्रिय फुटबल प्रतियोगिता अन्तर्गत सोमबार भएको खेलमा त्रिभुवन आर्मी क्लबलाई हराउँदै चर्च व्वाइज युनाइटेड सेमिफाइनल प्रवेश गरेको हो ।
बागमती गाउँपालिकाले निर्माण गरेकाे सहिद स्मृति रंगशालामा भएको पहिलो क्वार्टरफाइनल खेलमा विभागीय टोली आर्मीलाई टाइब्रेकरमा ५–४ गोल अन्तरले हराउँदै चर्च व्वाइज प्रतियोगिताको सेमिफाइनलमा प्रवेश गरेको हो । निर्धारित समय गोलरहित बराबरीमा सकिएपछि खेल टाइब्रेकरमा धकेलिएको थियो ।
चर्च व्वाइजका लागि टाइब्रेकरमा विदेशी खेलाडी अर्मान विडम र अनयोमीसहित सुमित श्रेष्ठ, दिपेश गुरुङ, सुजल डंगोलले गोल गरे । आर्मीका लागि विमल पाण्डे, फत्तेमान घले, जर्ज प्रिन्स कार्की र जिलेस्पी जंग कार्कीले गोल गरे । नरेश खत्रीको प्रहार चर्च व्वाइजका गोलरक्षक टेकेन्द्र सिं थापाले बचाएका थिए । खेलको म्यान अफ द म्याच चर्च व्वाइजका गोलरक्षक थापा घोषित हुँदै १० हजार रुपैयाँ हात पारे । चर्च व्वाइज प्रतियोगितामा नयाँ टोली हो ।
बागमती खेलकुद विकास समितिकाे आयोजनामा ३ फागुनमा सुरु भएकाे प्रतियाेगिताकाे फाइनल खेल १२ फागुनमा हुने छ । प्रतियोगिता उपाधि विजेताले १० लाख रुपैयाँ र उपविजेताले ५ लाख रुपैयाँ प्राप्त गर्ने छन् । प्रतियोगिताको सर्वोत्कृट खेलाडीलाई १ लाख १ हजार रुपैयाँ तथा विधागत उत्कृष्ट खेलाडीलाई जनही २५ हजार रुपैयाँसहित शिल्ड प्रदान गरिने आयोजकले जनाएको छ ।
प्रतियोगितामा ७ वटा ‘ए’ डिभिजन क्लब र ३ वटा मोफसलका क्लबसहित १० टिमको सहभागिता रहेकाे छ । गत वर्षकाे छैठौं संस्करणको प्रतियोगिता फापरबारीस्थित जनता माध्यमिक विद्यालयको खेलमैदानमा भएको थियो । छैटौं संस्करणकाे उपाधी काठमाडौंको मछिन्द्र क्लबले हात पारेकाे थियो भने सशस्त्र प्रहरी बलको एपीएफले उपविजेतामा चित्त बुझाएकाे थियो ।
मकवानपुर । साहित्यकार श्रीराम पाण्डेको कथा सङ्ग्रह ‘दुर्घटित जन्म’को हेटौँडामा विमोचन तथा विमर्श गरिएको छ ।
शनिबार हेटौंडास्थित किताबघरमा कृति विमोचन तथा विमर्श गरिएको हो । पाँच दशकदेखि साहित्य क्षेत्रमा क्रियाशील पाण्डेको ‘दुर्घटित जन्म’ पुस्तकका रुपमा चौथो तथा आख्यानका रुपमा पहिलो कृति हो ।
नेपाल प्रज्ञा प्रतिष्ठान काव्य विभाग सदस्य शान्ति प्रियवन्दनाले कृतिभित्रका कथाहरू रचनाकालका दृष्टिले पुराना भएपनि पछिल्लो समयका पाठकलाई कथाले आकर्षित गर्ने क्षमता राख्ने बताइन् । सङ्ग्रहभित्रका ३६ वटा कथाहरूमध्ये कतिपयमा विषयवस्तुको पुनरावृत्ति भए पनि त्यसले पाठकमा सकारात्मक प्रभाव छाड्ने उनले बताइन् ।
यसैगरी कवि साम्ब ढकालले कविता, निबन्ध तथा आख्यानमा उत्तिकै सशक्त ढङ्गले कलम चलाउने पाण्डेका कृति प्रकाशनको हिसाबले भने पछि परेकोमा दुःख व्यक्त गरे । पछिल्लो समय कृतिका रुपमा पाण्डेका रचनाहरू बाहिर आउनुलाई नेपाली साहित्यमा ‘असल धातुको उत्खनन्’ भएको आफूले महसुस गरेको ढकालले बताए ।
सर्जक सन्जाल मकवानपुर संयोजक तथा समीक्षक निमेष निखिलले तीसको दशकदेखि नै कथा लेखनमा सक्रिय पाण्डेको कथा लेखनको शैली उत्कृष्ट रहेको बताए । साहित्यकार रमेशमोहन अधिकारीले पनि नेपाली साहित्यका स्थापित कथाकारहरू जत्तिकै सशक्त लेखन भैकन पनि पछि परिरहेको अवस्थामा पाण्डेका अन्य कृतिहरू पनि प्रकाशित हुँदै जाने विश्वास व्यक्त गरे ।
झुरझरे, बागमती । पूर्वप्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्डले भ्रष्टाचारको अन्त्य नभएसम्म सामाजिक न्याय स्थापित गर्न नसकिने बताएका छन्। मकवानपुरको बागमती गाउँपालिका–४ झुरझुरेमा शनिबार शहीद स्मृति रङ्गशालामा सुरु भएको ‘बागमती गोल्डकप’ फुटबल प्रतियोगिताको उद्घाटन कार्यक्रममा बोल्दै प्रचण्डले यस्तो बताएका हुन् ।
अहिले नागरिक जनस्तरमा भ्रष्टाचारको विरुद्धमा, सुशासनको पक्षमा, सामाजिक न्यायको पक्षमा र आर्थिक समृद्धिको पक्षमा देशव्यापी जनचेतनाको लहर भित्रिएको उनले बताए । देशभरि नयाँ राष्ट्रिय एकता निर्माणको अभियान थालेको बताउँदै उनले भने ‘हाम्रो अभियान सफल बन्दै गएको छ।’
सुशासन, राष्ट्रिय स्वाधीनता, सामाजिक न्याय र आर्थिक समृद्धिको पक्षमा आफूहरुले अभियानको थालनी गरेकोमा सोही दिशामा मुलुक अघि बढेको उनले बताए । ‘सुशासन, सामाजिक न्याय र आर्थिक समृद्धिको एजेण्डालाई बलियो बनाउँदै आवश्यकता अनुसार सडक, सदन र सरकारका सबै मोर्चाबाट राष्ट्रिय एकताका लागि अगुवाइ गर्नु पर्छ’ उनले भने । देशभरी नै नयाँ एकता निर्माणको अभियान सुरु भएको उनले बताए ।
बागमती गाउँपालिका कार्यकर्ता लक्षित गर्दै उनले देशव्यापी रुपमा पार्टीप्रति आकर्षण लहर सुरु भएको बताउँदै यसलाई संस्थागत तरिकाले लैजान आग्रह गरे । नागरिकलाई स्वस्थ बनाउन र देशको प्रतिष्ठा विश्वव्यापी रुपमा स्थापित गर्न खेलकुदको विकास महत्वपूर्ण भएको उल्लेख गर्दै उनले भने ‘स्थानीय सरकारले यसमा ध्यान दिएकाे छ । खेलका कारण देशको प्रतिष्ठा उच्च बनाउन सकिन्छ ।’
बागमती गाउँपालिकाका अध्यक्ष सर्केश घलानको अध्यक्षतामा भएको प्रतियोगिता उद्घाटन बागमती प्रदेशसभा सदस्यहरु प्रेमप्रसाद पुलामी, कुमारी मोक्तान, जिल्ला समन्वय समिति मकवानपुरका प्रमुख ललितकुमार घलान लगायतको उपस्थितति रहेको थियो । बागमती गाउँपालिकाको सहयोगमा आयोजित प्रतियोगितामा ए डिभिजन क्लबका ७ र मोफसलका ३ टोलीले भाग लिएका छन् ।
बागमती गाउँपालिकाले वडा नम्बर ४ झुरझुरेमा ३ करोड ६० लाख ८८ हजारको लगानी गरी प्यारापिटसहित सुविधासम्पन्न रंगशाला निर्माण गरेकाे छ । सातौं संस्करणकाे बागमती गोल्डकप पालिकाकाे आफ्नै रंगशालामा आयोजना गरेकाे हाे ।
मकवानपुर । प्राकृतिक स्रोत तथा वित्त आयोगले प्रदेश र स्थानीय सरकारहरुको कार्यसम्पादन मूल्यांकन गरी नतिजा सार्वजनिक गरेको छ ।आयोगले गरेको कार्यसम्पादन मूल्यांकन अनुसार मकवानपुरकाे थाहा नगरपालिका जिल्लाकै उत्कृष्ट भएको छ ।
आयोगको मुल्याङ्कनमा थाहाले ७१.३ अंक प्राप्त गरी जिल्लामै उत्कृष्ट भएकाे हाे । आयोगले ३० माघमा सार्वजनिक गरेकाे कार्य सम्पादन मूल्याङ्कनमा मकवानपुरकाे बकैया गाउँपालिकाको सबैभन्दा कम अंक प्राप्त गरेकाे छ । बकैयाले ४५.९ अंक पाएको छ । जिल्लामै मनहरी गाउँपालिकाले दोस्रो स्थान हासिल गरेकाे । मनहरीले ६७.३ अंक पाएको छ । मकवानपुरगढी गाउँपालिकाले ६७, कैलाशले ६६.३, राक्सिराङले ६३.९, हेटौंडाले ६२.५, बागमती गाउँपालिकाले ६०, इन्द्रसरोवरले ५७.२ र भीमफेदी गाउँपालिकाले ५०.७ अंक प्राप्त गरेकाे प्रतिवेदनमा उल्लेख छ ।
प्रकाशित तथ्याङ्क र प्राप्ताङ्कमा परिमार्जन गर्न परे ठोस प्रमाण सहित ७ दिन भित्र कार्यविधि बमोजिम पुनरावलोकनका लागि पत्र पठाउन स्थानीय तहहरुलाई वित्त आयोगले परिपत्र समेत गरेको छ ।आगामी आर्थिक वर्ष २०८२/०८३ मा संघीय सरकारबाट तल्लो सरकारलाई प्रदान गर्ने वित्तीय समानीकरण अनुदानको प्रयोजनका लागि प्राकृतिक स्रोत तथा वित्त आयोगले प्रदेश र स्थानीय सरकारहरुको कार्यसम्पादन मूल्यांकन गरेको हाे ।
महानगरमा भरतपुर उत्कृष्ट
राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन मूल्यांकनमा महानगरतर्फ भरतपुर महानगरपालिका उत्कृष्ट भएको छ ।देश भरका ६ वटा महानगरपालिकामध्ये भरतपुरले ७६.२ प्रतिशत अंक प्राप्त गर्दै उत्कृष्ट भएको हो । योसहित भरतपुर महानगर लगातार तेस्रो वर्षसम्म पहिलो भएको हो ।
आयोगका अनुसार विराटनगर महानगरले ७३ दशमलव ५ प्रतिशत, ललितपुर महानगरले ६६ दशमलव ७ प्रतिशत, काठमाडौँ महानगरले ५४ दशमलव ३ प्रतिशत, पोखरा महानगरले ५१ दशमलव ५ प्रतिशत र वीरगञ्ज महानगरले ४३ दशमलव १ प्रतिशत अंक प्राप्त गरेका छन् ।
आयोगले राष्ट्रिय प्राकृतिक स्रोत तथा वित्त आयोग ऐन, २०७४ बमोजिम वार्षिक रुपमा मुल्याङ्कन गर्ने गर्दछ । आयोगको मूल्यांकन रिर्पोट अनुसार अधिकांश स्थानीय सरकारबाट तथ्याङ्क उपलब्ध हुनै मुस्किल देखिएको छ । जसका कारण कार्य सम्पादन मूल्यांकनमै असर परेको छ । आयोगले प्रदेश सरकारको कार्य सम्पादनका लागि कुल ११ वटा सूचकमा मूल्यांकन गरेको छ । स्थानीय तहको प्रयोजनका लागि भने १७ वटा सूचकमा आधारित भएर मूल्यांकन गरिएको हो ।
संघीय सरकारले विना शर्त प्रदेश र स्थानीय तहमा पठाउने अनुदान नै वित्तीय समानीकरण अनुदान हो । यस्तो अनुदानको सिफारिस गर्ने जिम्मेबारी राष्ट्रिय प्राकृतिक स्रोत तथा वित्त आयोगले पाएको छ । अनुदानकाे सिफारिस गर्दा आयोगले सुत्र बनाउँछ । आयोगले बनाउने सुत्रमा एक मापक कार्य सम्पादन मूल्यांकन रहेकाे छ ।
देशभरकाे नतिजा यहाँ क्लिक गरेर हेर्न सक्नुहुनेछ
मकवानपुर । मदन भण्डारी स्वास्थ्य विज्ञान प्रतिष्ठान हेटौंडाकाे लागि स्नातकोत्तर तह (पीजी) मा ८ सिट थप भएकाे छ । प्रतिष्ठानकाे लागि चिकित्सा शिक्षा आयोगले स्नातकोत्तर तहमा ८ सिट थप गर्ने निर्णय गरेकाे हाे ।
सरकारी स्वामित्वमा रहेका प्रतिष्ठान तथा कलेजहरुमा गरेर विभिन्न विषयमा गत वर्षको तुलनामा थप २३१ सिट संख्या थप गर्ने निर्णय गरेकाे आयोगले प्रतिष्ठान हेटौंडाका लागि ८ सिट थपेकाे हाे । प्रतिष्ठानका उपप्राध्यापक सुपेन्द्र कार्कीका अनुसार गत वर्ष पीजीमा एक सिट पनि नपाएकाे प्रतिष्ठानले सन् २०२५ काे लागि ८ सिट प्राप्त गरेकाे बताए ।
प्रधानमन्त्री एवं चिकित्सा शिक्षा आयोगका अध्यक्ष केपी शर्मा ओलीको अध्यक्षतामा बसेको आयोगको १७ औं बैठकले १४ वटा संस्थामा सिट संख्या थप गर्ने र चार वटामा घटाउने निर्णय गर्दा मदन भण्डारी प्रतिष्ठानका लागि सिट संख्या थप भएकाे छ। बैठकले प्रदेशका दुई प्रतिष्ठानमा २२ सहित १४ वटा संस्थामा २३१ सिट थप गर्ने निर्णय गरेको हो। मधेश स्वास्थ्य विज्ञान प्रतिष्ठान र मदन भण्डारी स्वास्थ्य विज्ञान प्रतिष्ठानको सहित १७ औं बैठकले २३१ सिट थप गर्ने निर्णय गरेको आयोगले जानकारी दिएकाे हाे ।
यो वर्ष सरकारी स्वामित्वमा रहेका प्रतिष्ठान र संस्थाहरुमा गरेर पीजीमा सबै विषय गरेर एक हजार २६ सिट पुगेको छ। गत वर्ष यी संस्थाहरुमा ७९५ सिट थियो।
गत साता प्रतिष्ठानलाई पीजीमा १ सिट प्राप्त भएकाे बताइएकाे थियाे । पीजीमा अध्यापन हुने भए संगै हेटौंडा अस्पतालमा बिशेषज्ञ सेवाको सुरुवात हुनेछ ।