मकवानपुर । मकवानपुरको मनहरी मसिनेमा रहेको पशुपतिनाथ माविका बालबालिका र अभिभावकको कान परीक्षण शिविर भएको छ । मनहरी ४ मसिनेस्थित पशुपति माविले अन्तराष्ट्रिय संस्था किवानिज क्लब मकवानपुरको संगको सहकार्यमा विद्यालयमा अध्ययन गर्ने बालबालिका र अभिभावकको कान परीक्षण शिबिर संचालन गरेको हो ।
किवानिज क्लब मकवानपुरका संस्थापक अध्यक्ष तीर्थराज पराजुलीको सभाध्यक्षतामा भएको कार्यक्रमको उद्घाटन गर्दै मनहरी गाउँपालिका अध्यक्ष रञ्जन कालाखेतीले बालबालिकाको क्षेत्रमा काम गर्ने संस्थाहरुलाई पालिकाले सघाउने बताए । ‘मानिसको शरीरका महत्वपूर्ण अंग आँखा, कान, मुटुलगायतको अवस्थाबारे समयमै जानकारी लिन सके भबिश्यमा ठूलो नोक्सानी हुनबाट जोगाउछ’ अध्यक्ष कालाखेतीले भने–‘स्वास्थ्य परीक्षण शिविर मनहरी गाउँपालिकामा रहेका ३२ वटै विद्यालयमा गर्नु जरुरी छ ।’
गाउँपालिकाले शिक्षा र स्वाथ्यलाई बिशेष प्राथमिकताका साथ काम गरिरहेको बताउदै अध्यक्ष कालाखेतीले विद्यालयमा पठनपाठनका साथै स्वास्थ्य शिविरले बालबालिकालाई स्वस्थ्य रहन सहयोग पु¥याउने बताए । विद्यालय ब्यवस्थापन समितिका अध्यक्ष माधब गौतमले बालबालिकालाई आफ्नो कान कमजोर छ भन्ने कुरा थाहा नहुने भएकोले शिबिर संचालन गरिएको बताए । शिबिरमा नेपालगंजस्थित आइडियल फर्मासिटिकल्स प्रालिले औषधि सौजन्य गरेको किवानिज क्लबका मकवानपुरका संस्थापक अध्यक्ष पराजुलीले जानकारी दिए ।
कार्यक्रममा वडाअध्यक्ष प्रकाश थापा, साहित्यकार तथा सेवानिबृत्त शिक्षक हयग्रीव आचार्य, किवानिज क्लब मकवानपुरका सचिव भीमप्रसाद फुँयाल (दिनेश)लगायतले बालबालिकाको आँखा, कान जस्ता अंगको परीक्षण गर्ने शिविरको आयोजना गरी विद्यालयले पुण्यको काम गरेको बताए । गाउँपालिका अध्यक्ष कालाखेतीको कान परीक्षण गरी सुरुवात गरिएको शिविरमा करिब दुई सय ५० जना बालबालिका तथा अभिभावकको कानको परीक्षण गरिनुको साथै नि:शुल्क औषधि बितरण गरिएको थियो । शिविररमा हेटौंडा अस्पतालका नाक, कान, घाँटी बिशेषज्ञ डा. अनुप सञ्जेलले कानको परीक्षण गरेका थिए ।
यसैबीच पशुपतिनाथ माविबाट २०७९ को एसईई परीक्षामा उत्कृष्ठ नतिजा ल्याउन सफल २ जना विद्यार्थीलाई छात्रवृत्ति प्रदान गरिएको छ ।
२०७९ सालको एसईईमा छात्र रितेश बिष्ट र छात्रा पार्वती तितुङले उत्कृष्ठ नतिजा ल्याएकोले जनही ११ हजार पाँच सय रुपैयाँका दरले छात्रबृत्ति रकम पनि प्रदान गरिएको हो ।
पशुपतिनाथ माविका पूर्वप्रधानाध्यापक तीर्थराज पराजुलीले आफ्नो मातापीता शिबकुमारी, रामजीप्रसाद पराजुलीको स्मृतिमा स्थापना गरेको कोषबाट दुई जना उत्कृष्ठ छात्रछात्रालाई रकम प्रदान गरिएको हो । बिगत ३ वर्षदेखि पराजुलीले विद्यालयमा छात्रबृत्ति प्रदान गर्दै आएका छन् ।
कार्यक्रममा किवानिज क्लब मकवानपुरका कोषाध्यक्ष शम्भु घर्ती, लायन्स क्लब अफ गुल्मोहर काठमाडौंकी सकुन्तला बस्नेत, किवानिज क्लब मकवानपुरका सदस्य शारदा भुजेल, दिपेश अधिकारी, मनहरी गाउँ कार्यपालिका सदस्य मीरा खत्री, विद्यालय ब्यवस्थापन समितिका सदस्य सीता नेपाली, कल्पना कार्की, मुकुन्द सुबेदी, विद्यालयका शिक्षकहरुलगायतको सहभागिता रहेको थियो ।
मकवानपुर । जिल्ला समन्वय समिति मकवानपुरका सभापति लालित घलानले टोल विकास संस्थाहरु विकासका साझेदार भएको बताएका छन् । विकासको संयन्त्रलाई बलियो बनाउने आधार नै टोल विकास संस्थाहरु भएको उनले बताएका हुन् ।
हेटौंडा उपमहानगरपालिका ७ र ८ मा स्थापित किरण चोक टोल विकास संस्थाको १२ औं वार्षिक साधारण सभा तथा अधिवेशनमा उनले यस्तो बताएका हुन् । शनिबार सम्पन्न बार्षिक साधारणमा हेटौंडा उपमहानगरपालिका सामाविक विकास महाशाखा अधिकृत स्तर सातौ गंगा चौलागाईले टोल विकास संस्थाको जिम्मेवारी र कर्तव्य गहिरो भएको बताइन् । नगरभित्र रहेको ३७० वटा टोल विकास संस्थाहरुले सामाजिक विकासमा गरेको समन्वयकारी भूमिका उल्लेख्य रहेको उनले बताइन् ।
यसैगरी टोलविकास संस्था नगर समन्वय समितिका अध्यक्ष ध्रुब अधिकारीले टोल विकास संस्थाहरुले विकासमा सहकार्यसँगै लागु औषध विरुद्ध खवरदारीलाई निरन्तरता दिन आग्रह गरे ।
कार्यक्रममा संस्था अध्यक्ष राजु अधिकारी (यात्री) ले संस्थागत प्रतिवेदन प्रस्तुत गर्दै आगामी कार्यक्रमहरु प्रस्ताव गरेका थिए । कोषाध्यक्ष गणेशप्रसाद पराजुलीले आर्थिक प्रतिवेदन, सचिव रोजिता रिमालले कार्यक्रम प्रतिवेदन प्रस्तुत गरेका थिए । यसैगरी किरण चोक आमा समूहका अध्यक्ष सावित्रि अधिकारीले आमा समूह तर्फको प्रतिवेदन प्रस्तुत गरेकी थिइन् ।
आमा समूहकी अध्यक्ष सावित्री अधिकारीले समुदायमा असल अभ्यास गर्नका लागि टोल विकास संस्था र आमा समूहले मिलेर काम गरेको बताइन् । टोवि विकास संस्थाको नेतृत्वमा आफूहरुले काम गर्ने मौका पाएको उनले संस्थाप्रति आभार व्यक्त गरिन् ।
कार्यक्रममा हेटौडा ८ नम्बर वडा सदस्य गोरखबहादुर राया, ७ नम्बर वडा सदस्य श्यामसुन्दर परियार, दिनेश राना मगर समेतको उपस्थिति रहेको थियो ।
दर्जनबढी व्यक्ति सम्मानित
किरणचोक टोल विकास संस्था तथा आमा समूहले संस्था र समूहको कार्यक्षेत्रभित्र रहेर विभिन्न क्षेत्रमा योगदान गरेका व्यक्तिहरुलाई सम्मान गरेको छ । आफ्नो बार्षिक उत्सवमा विभिन्न विधामा गरी दर्जना बढी व्यक्तिलाई सम्मान गरेको हो ।
संस्थामा सदस्य रहेरका ज्येष्ठ नागरिकहरु, संस्थाका संस्थापक अध्यक्ष, पूर्व अध्यक्षहरु, आमा समूहको संस्थापक अध्यक्ष, पूर्व अध्यक्षहरु, खेलाडीहरु, टोल सरसफाइमा उत्कृष्ट व्यक्ति, उत्कृष्ट बचतकर्ता, उत्कृष्ट बुहारी, उत्कृष्ट उपभोक्ता समिति, तथा संस्थाको प्रगतीमा सहकार्य गर्ने पत्रकारहरुलगायतलाई सम्मान तथा पुरस्कृत गरेको पूर्व अध्यक्ष हेम अधिकारीले बताए ।
टोल विकास संस्थाको संस्थापक अध्यक्ष शंकरप्रसाद अर्याल, पूर्व अध्यक्षहरु नारायण सिं थिङ, हेम अधिकारी, आमा समूहको संस्थापक अध्यक्ष इश्वरी अर्याल, पूर्व अध्यक्ष मुरारी पौडेल, पशुपति जमकट्टेल, सुनिता कुमारी थिङलगायतलाई सम्मान गरिएको हो ।
यसैगरी संस्थाले ज्येष्ठ नागरिकहरु मुक्तिप्रसाद पराजुली, अजुर्न भेटवाल, बासु थापा, रामबहादुर गुम्बी, कान्छिमाया डिम्डुङ, बालकुमारी थिङलगायतलाई सम्मान गरिएको हो ।
यसैगरी एससीसी परिक्षामा उत्कृष्ट हुने छात्राहरु रोनिशा अधिकारी र समिक्षा थापा, पत्रकारहरु सरिता दाहाल र सुरेश श्रेष्ठलाई पनि सम्मान गरिएको थियो । यसै यस टोल विकासमा रहेर विभिन्न खेलमा उत्कृष्ट भएका खेलाडीहरुलाई पनि सम्मान गरिएको आमा समूहको निवर्तमान अध्यक्ष सावित्री अधिकारीले बताइन् ।
अधिकारीलाई पुन नेतृत्वको जिम्मेवारी, आमा समूहमा दाहाल
शनिबार भएको साधारण सभा तथा अधिवेशनले टोल विकास संस्थाको अध्यक्षको जिम्मेवारी पुनः राजु अधिकारी (यात्री) लाइ नै दिएको छ ।
अधिकारी चौथो कार्यकालका लागि अध्यक्षमा सर्वसम्मत भएका हुन् । संस्थाको उपाध्यक्षमा अर्जुन अर्याल, सचिवमा रोजिता रिमाल, कोषाध्यक्षमा गणेश पराजुली, सहसचिवमा रामप्रसाद देवकोटा चयन भएका छन् । । यस्तै सदस्यमा बालकुमारी थापा, रामप्रसाद पौडेल, हुमप्रसाद अधिकारी, सपना स्याङ्बो र लेखनाथ पौडेल चयन भएका छन् ।
यसैगरी किरणचोक आमा समूहको नयाँ नेतृत्वमा उर्मिला दाहाल अर्याल चयन भएकी छिन् । आमा समूहको उपाध्यक्षमा सिर्जना कार्की पौडेल, सचिवमा लक्ष्मी न्यौपाने, कोषाध्यक्षमा सीता चापागाई र सहसचिवमा सावित्री सापकोटा चयन भएका छन् ।
आमा समूहको सदस्यमा सन्तु सिग्देल, मुना रिमाल, सुदिरा पौडेल, सीता खड्का, पार्वती रिमाल र सुकुमाय थोकर चयन भएका छन् । टोल विकास संस्था र आमा समूहको पदाधिकारीहरुको कार्यकाल आगामी २ वर्ष रहने छ ।
मकवानपुर । मदन भण्डारी स्वास्थ्य विज्ञान प्रतिष्ठानका प्राध्यापक शैक्षिक हडतालमा उत्रिएका छन् । प्रतिष्ठानमा कार्यरत प्राध्यापकले तलब र भत्ताबापतको रकम नपाएको जनाउँदै हडतालमा उत्रिएपछि १५ दिनदेखि पठनपाठन प्रभावित भएको हो ।
प्रतिष्ठानमा गत कात्तिक २२ गतेदेखि पठनपाठन ठप्प रहेकाे प्राध्यापक कल्याणकारी समिति मदन भण्डारी स्वास्थ्य विज्ञान प्रतिष्ठान हेटौँडाका अध्यक्ष विश्वास सापकोटाले बताए । प्राध्यापकहरूले ‘पेनडाउन’ गरेसँगै पठनपाठन पूर्णरूपमा ठप्प भएको छ । पठनपाठन बन्द हुँदा विद्यार्थी मर्कामा परेका छन् ।
प्राध्यापक कल्याणकारी समिति अध्यक्ष सापकोटाले प्रतिष्ठानमा सेवारत २४ जना प्राध्यापकले विगत चार महिनादेखि तलब र भत्तालगायतका अन्य सुविधाबापतको रकम नपाए पछि हडतालमा उत्रिएकाे बताए । ।
चालु आर्थिक वर्षको पहिलो महिना (साउन)को तलब सुविधाबापतको रकम पनि सङ्घर्षपूर्ण तवरबाट प्राप्त गरेको र त्यसयताको रकम भुक्तानीमा प्रतिष्ठानले कुनै चासो नदिएको उनले बताए । तलब भत्तालगायतका सुविधाबापतको रकम माग गर्दा प्रतिष्ठानबाट मन्त्रालयले पैसा नपठाएको भन्ने जवाफ दिँदै आएको जनाइएको छ ।
प्राध्यापक कल्याणकारी समितिले बिहीबार सात बुँदे विज्ञप्ति जारी गरी नियम अनुसार पाउनुपर्ने तलब भत्ता तथा सेवा सुविधा समयमै उपलब्ध गराउनुपर्ने प्रतिष्ठान तथा शिक्षकहरुको स्थायित्वका लागि सेवा आयोग गठन गर्नुपर्ने लगायतका माग गरेका छन् ।
बिहीबार आन्दोलनरत प्राध्यापक र प्रतिष्ठानका कुलपति तथा बागमती प्रदेशका मुख्यमन्त्री शालिकराम जम्कट्टेलबीच भएको छलफल विना निश्कर्ष सकिएको छ । प्रतिष्ठानका शिक्षाध्यक्ष डा. सुरेन्द्र शेरचनले भने बार्ता सहमति नजिक पुगेको बताए । ‘प्रतिष्ठानले समस्या समाधानको लागि सम्बन्धित निकायहरुसँग निरन्तर प्रयत्न गरिरहेको छ । टुंगिने अवस्थामा पुगेको छ’, उनले भने । चिकित्सा शिक्षा आयोगको नियमानुसार स्वास्थ्य मन्त्रालयबाट भर्ना भएका विद्यार्थीको छात्रवृत्तिवापतको ७५ प्रतिशत रकम नपाउँदा प्राध्यापकलाई तलब भत्ता दिन नसकेको उनले जानकारी दिए ।
प्रतिष्ठानले स्नातक तहको नर्सिङ, फार्मेसी, पब्लिक हेल्थ र ल्यावरोटरी विषयमा चिकित्सा शिक्षा आयोगले तोकेको कोटामा विद्यार्थी सहभागी गराएर अध्यापन गराइरहेको छ । प्राध्यापक कल्याणकारी समिति विभिन्न ७ बुदे माग राखेर हडतालमा उत्रिए पछि पठनपाठन प्रभावित भएकाे हाे ।
