मकवानपुर । हेटौडा उपमहानगरपालिका वडा नम्बर २ मा रहेकाे एकता टाेल विकास संस्थाकाे अध्यक्षमा यशाेदा लामिछाने चयन भएकी छिन् ।
संस्थाकाे शनिवार भएकाे २४ औं साधारण भेलाबाट लामिछाने सर्वसम्मत अध्यक्षमा चुनिएकी हुन् । त्यसैगरी संस्थाकाे उपाध्यक्ष गिता पाण्डे, सचिव इन्दिरा न्याैपाने, सहसचिव लक्ष्मी सुवेदी र काेषाध्यक्ष प्रतिज्ञा अर्याल चयन भएका छन् । यस्तै सदस्यहरुमा निर्मला पाण्डे, लक्ष्मी देवकाेटा, कल्याणी बस्नेत, ताेत्र कुमारी बस्नेत, सिता प्याकुरेल र शान्ति अर्याल चयन भएका छन् ।
करिब २ सय घरधुरी रहेकाे संस्थाकाे सभामा कल्याणी बस्नेतले सचिवकाे प्रतिवेदन, काेषाध्यक्ष ताेत्रकुमारी बस्नेतले आर्थिक प्रतिवेदन र अध्यक्ष अन्जु अधिकारीले समग्र संस्थाकाे प्रतिवेदन प्रस्तुत गरेका थिए । संस्थाकी अध्यक्ष अन्जु अधिकारीकाे सभाध्यक्षतामा भएकाे कार्यक्रममा हेटाैंडा उपमहानगरपालिका वार्ड २ का अध्यक्ष विष्णुगाेपाल महर्जनकाे प्रमुख आतिथ्यता रहेकाे थियाे ।
वडा अध्यक्ष महर्जनले टाेल विकास वडाकाे सबै भन्दा नजिकाे सहकार्य गर्ने मन्च भएकाेले यसलाई थप सक्रिय र समाजमा उदाहरणीय कार्य गर्ने संस्थाकाे रुपमा विकास गर्नेतिर अगाडी बढ्न पर्ने बताए । ‘टाेल विकासकाे गतिविधिले नै सिङ्गाे वडाकाे मुहार फेर्न मद्दत पुग्छ’ अध्यक्ष महर्जनले भने । कार्यक्रममा संस्थाका क्षेत्रभित्र रहेका उत्कृष्ट विद्यार्थीसहित जेष्ठ नागरिकलाई प्रमुख अतिथि महर्जनले सम्मान गरेका थिए ।
कार्यक्रममा हेटाेँडा उपमहानगर सामाजिका विकास शाखाकी अधिकृत गोपीनी गाैतम, टाेल विकास नगर समन्वय समितिका उपमहासचिव देवकुमार श्रेष्ठ, माया पौडेल, ध्रुब पाैडेल, निवर्तमान अध्यक्ष मिना चालिसे लगायतकाकाे उपस्थिति रहेकाे थियाे ।
मकवानपुर । मकवानपुरकाे हेटौंडा उपमहानगरपालिका वडा नम्बर १३ बनस्पतिमा श्रीमदभागवत सप्ताह ज्ञान महायज्ञ सुरु भएको छ महायज्ञको प्रदेश सभा सदस्य एकालाल श्रेष्ठले शनिबार शुभारम्भ गरेका छन् ।
असोज ५ गतेसम्म हुने महायज्ञ हेटौंडा १३ मा अवस्थित कालेश्वर महादेव मन्दिरको पूर्ण संरचना र अक्षयकोष स्थापनाका एवम् बुद्ध मूर्ति निर्माणलागि आयोजना गरिएकाे आयोजकले जानकारी दिएकाे छ ।
महायज्ञ शुभारम्भ गर्दै श्रेष्ठले नेपालमा बहुधार्मिक, बहुजातीय र बहुसांस्कृतिक समाजको महत्त्व र यसको समग्र विकासको आवश्यकता रहेकाे बताए । “हाम्रो समाज इन्द्रेणी जस्तै विविध रङ्गले भरिएको छ। यहाँ विभिन्न जाति, धर्म र आस्था भएका मानिसहरू छन्। हामीले सबै धर्मको विचारलाई समान रूपमा सम्मान गर्नुपर्छ” उनले भने “सनातन धर्मलाई धार्मिक, सांस्कृतिक, सामाजिक र पर्यटकीय क्षेत्रमा विकास गर्न सकिन्छ’ उनले भने ’यसबाट आर्थिक उपार्जन र पर्यटन प्रवर्द्धन समेत सकिन्छ ।”
यस्ता कार्यक्रमले विविधतालाई सम्मान गर्दै, सबै समुदायको सहभागितामा आधारित समावेशी विकासको आवश्यकतालाई रेखाङ्कित गरेकाे उनले बताए । धार्मिक सहिष्णुता, सांस्कृतिक संरक्षण र आर्थिक विकासबीच सन्तुलन कायम गर्ने कार्यमा हामी सबैले प्रयास गरीरहनुपर्ने उनले जानकारी दिए ।
श्रीमदभागवत कथा बाचन पण्डित कपिलदेव भट्टले गर्नु हुनेछ भने उप-वाचक पण्डित डेगनाथ ढकाल रहेका छन् । कार्यक्रमा सम्पूर्ण दिवंगत आत्माहरुको बैकुण्ठ बासहोस् तथा पितृ उद्धार गर्ने उद्देश्यले कथा वाचन, पाठपरायण तथा राष्ट्रिय स्तरका कलाकारहरुबाट भजन कीर्तन, संगीतमय देवलिला झाँकी नाटक सहितको कार्यक्रम हुने भएको मुल आयोजक समारोका संयोजक सन्तबहादुर तितुङले जानकारी दिए ।
श्रीमदभागवत उद्घाटन कार्यक्रममा जिल्ला समन्वय समिति प्रमुख ललित बहादुर घलान, टोल विकास वडा समन्वय समितिका संयोजक बालकुमार श्रेष्ठ, कृष्ण प्रसाद दाहाल, वसन्त लामा, बिन्दबासिनी टोलबिकास संस्थाका अध्यक्ष रत्नबहादुर केसी, सहारा टोलबिकास सस्थाका अध्यक्ष अशोककुमार डिमडुङ, मन्दीर ब्यबस्थापन समितिका अध्यक्ष शेर बहादुर भ्लोन लगायतकाकाे सहभागी थियाे ।
मकवानपुर । उपभाेक्ताकाे व्यापक गुनासाे आउँदा समेत प्रायः चासाे नदेखाउने प्रशासनले चाडपर्व नजिकिदै गर्दा हेटाैडा बजार अनुगमन गरेकाे छ । करकाे दर बढाएकाे निहुँमा हेटौंडा उपमहानगरपालिकासँग आक्राेशित व्यवसायीहरुलाई ‘तह’ लगाउने भन्दै गरिएकाे बजार अनुगमनपछि केही व्यापारीलाई जरीवान गरिएकाे छ ।
हेटौंडा उपमहानगरपालिकाकाे नेतृत्वमा चाडपर्व लक्षित बजार अनुगमन सुरु गरिएको हाे । हेटौंडा उपमहानगरपालिका कार्यालय, जिल्ला प्रशासन कार्यालय, खाद्य प्रविधि तथा गुण नियन्त्रण कार्यालय, घरेलु उद्योग वाणिज्य कार्यालय र उपभोक्ता हितसंरक्षण मञ्चको संयुक्त बजार अनुगमन गर्दा गैर कानूनि भेटिएपछि केहीलाई कारवाहीकाे दायरामा ल्याउन लागिएकाे उपमहानगरपालिकाले जनाएकाे छ ।
यसपालीकाे बजार अनुगमन विगतमाभन्दा प्रभावकारी बनाइएको पाइएकाे छ । सरोकारवाला निकायले बजार अनुगमनलाई ‘आक्रामक’ बनाउँदै कमजोरी देखिए ठाउँकोठाउँ कारबाही गरेर जरिवाना तिराइने भएको छ ।
विगतमा बजार अनुगमनबाट फर्किएर कार्यालयमा कमजोरीका दृष्टिले कस्तो कारबाही गर्ने भन्ने निर्णय हुने गरेको थियो । यसो हुँदा कमजोर कारबाही र बजार अनुगमनको प्रभावकारितामाथि प्रश्न उठ्ने गरेको थियो । जहाँ चिनजानकाे आधारमा कम कारवाही ताेक्नेदेखि आर्थिक लेनदेन समेत हुने गरेकाे गुनासाहरु आउने गरेका थिए ।
यसअघि विभिन्न निकायसँग समन्वय गरेर गर्ने बजार अनुगमन नाम मात्रैको अनुगमन हुने गरेको पाइएको उपभोक्ताहरुले नै गुनासो गर्ने गरेका थिए । अनुगमनका क्रममा व्यापारी तथा व्यवसायीलाई दिएको निर्देशन कार्यान्वयन नभएपछि नाम मात्रैको बजार अनुगमनमा सीमित हुने गरेको उपभोक्ताहरुको भनाई थियो ।
यसपटककाे बजार अनुगमनले कमजोरी देखिएमा साेही ठाउँमै कारबाही गर्दै जरिवाना तिराएको हो । हेटौंडामा वर्षौदेखि सञ्चालनमा आएको हेटौंडा–४, पारिजातपथ स्थित दाजुभाइ फाष्टफुडलाई संयुक्त बजार अनुगमनको क्रममा उपमहानगरपालिकाले २५ हजार जरिवाना गराएको छ । चितवनको शाखाको रुपमा रहेको पारिजातपथकै वैष्णव होटललाई पनि २५ हजार नै जरिवाना गराइएको छ । यी दुई होटललाई सात दिनभित्र उपमहानगरपालिका कार्यालयमा जरिवाना तिर्न पत्र काटिएको छ ।
दाजुभाइ फाष्टफुडमा भान्सा फोहोर भएको, मःम बनाउन ल्याइएको बन्दा कुहिएको अवस्थामा अव्यवस्थितसँग राखिएकोलगायतको कमजोरी फेला परेको थियो । दाजुभाइ फाष्टफुडका सञ्चालक राजकुमार गौतमलाई उमनपाकाे कार्यालयमा अनिवार्य उपस्थित हुन अनुगमन समितिले निर्देशन दिएको छ । दाजुभाइको खोपेगल्लीमा रहेको मिठाईको भान्सामा फोहोरको ढल निकास नगरी नजिकै मिठाई बनाइरहेको अनुगमन टोलीले फेला पारेको थियो । भान्सा सुधार गर्न निर्देशन दिइएको उपमहानगरको उद्योग, पर्यटन, सहकारी शाखाप्रमुख हिमप्रसाद पौडेलले जानकारी दिए ।
यसैगरी, वैष्णव होटलले कालो ढुसी परेको पाउरोटी बिक्रीका लागि राखेको अनुगमन टोलीले फेला पारेको थियो । वैष्णवमा भान्सा सरसफाई नगरिएको, उद्योग वाणिज्य कार्यालयमा दर्ता नगरी व्यवसाय सञ्चालन गरेको, बिक्रीका लागि राखिएका खाद्यवस्तुको लेबलिङ उपयुक्त तरिकाले नराखेको भेटिएको थियो ।
वैष्णव होटलले चितवनबाटै मःमलगायतका तयारी खाद्यवस्तु हेटौंडा ल्याएर बिक्री गर्ने खुलेको छ । पारिजातपथमै अनमोल होटलको भर्खरै सञ्चालनमा आएको भनिएको नयाँ होटललाई सचेत गराइएको छ ।
बजार अनुगमनको नेतृत्व उपमहानगरको आर्थिक विकास महाशाखाअन्तर्गतको उद्योग, पर्यटन, सहकारी शाखा प्रमुख पौडेलले गरेका थिए । अनुगमनमा जिल्ला प्रशासन कार्यालय मकवानपुरका दीपक पौडेल, खाद्यप्रविधि तथा गुण नियन्त्रण कार्यालयका खाद्यनिरीक्षक दीपक घिमिरे, घरेलु उद्योग वाणिज्य कार्यालयप्रमुख रामप्रसाद भुषाल, उद्योग वाणिज्य संघ, उपभोक्ता हितसंरक्षण मञ्चका केन्द्रीय उपाध्यक्ष बासु खतिवडा, मकवानपुर उद्योग वाणिज्य संघका पवन कार्की लगायतको उपस्थिति रहेको थियो ।
‘अब हामीले अनुगमनकै क्रममा जरिवाना तिराउँछौं यसले हुँदा अनुगमनको प्रभावकारिता बढाउँछ’ पाैडेलले भने । यसअघि धेरै पटक सचेत गराउँदा पनि होटल सञ्चालकहरु अटेरी बनिरहेका उनले बताए । उपमहानगरपालिकाले कारबाहीलाई पनि झन बलियो बनाएर जाने याेजना रहेकाे पौडेलले बताए । उपभोक्तालाई ढुक्कसँग खाद्यवस्तु उपभोग गर्न सक्ने वातावरण निर्माणको लागि उपमहानगरपालिका लागिपरेको पौडेलले बताए । उनले बजार अनुगमनलाई तीव्रता दिइने बताए । चाडपर्व नजिकिएसँगै बजारमा बढ्न सक्ने कालाेबजारीलाई नियन्त्रण गर्न उपभाेक्ताहरु प्रशासनकाे सहकायर्य जरुरी रहेकाे उपभोक्ता हितसंरक्षण मञ्चका केन्द्रीय उपाध्यक्ष बासु खतिवडाले बताए ।
मकवानपुर । मकवानपुरकाे हेटौडामा जारी जिल्ला लिग फुटबल प्रतियोगिता अन्तर्गत बिहीबारकाे खेलमा परेली युवा क्लब, ईन्टरनेट सिटि, राप्तीरिभर युवा क्लव, पिप्ले युवा क्लव विजयी भएकाे छ ।
बिहीबार हेटौडा ११ सिमलटार खेल मैदानमा एफसी इन्टरनेटलाई २–० ले हराउँदै परेली समूह क को शीर्षस्थानमा उक्लिएको छ । हेटौंडा १९ बस्तीपुरको परेलीले ५ खेलबाट ११ अंक जोड्दै शीर्षस्थानमा उक्लिएको हो । लिगमा परेलीले ५ खेल खेल्दा अपराजिता यात्रामा रहेको छ । परेलीले ५ मध्ये ३ जित र २ खेल बराबरी खेलेको हो ।
परेलीका लागि कप्तान राम लामा र होमराज स्याङ्तानले गोल गरेका हुन् । खेलको म्यान अफ द म्याच परेलीका होमराज स्याङ्तान घोषित भए । यसैगरी बिहीबारकाे खेलमा पिप्लेले महाबीर क्लवलाई ७–० ले गाेल अन्तरले हराएको हो । पिप्लेका लागि निरब घलानले ४ तथा सुसन वाइबा र आर्यन थापा मगरले समान एक/एक गोल गरेका हुन् । एक गोल भने उपहार स्वरुप पाएको थियो । यो खेलसंगै पिप्ले युवा क्लबले लिगको सुरुवाती जित निकालेको हो । ४ गोल गरेका घलान नै खेलको म्यान अफ द म्याच घोषित भए ।
हेटौडा ६ स्थित गौरिटार रंगशालामा भएको खेलमा आरआरवाइसीले विजय यूथ क्लवलाई १–० ले हराउदा सन्देश राईले गरेको गोल नै निर्णायक बन्यो । राई खेलको म्यान अफ द म्याच घोषित भए । बिहीबारै भएको खेलमा इन्टरनेट सिटीले हेटौंडा फुटबल एकेडेमीलाई ४–२ काे गोलले पराजीत गरेकाे छ ।
जारी प्रतियोगितामा शुक्रबार पनि ४ वटा खेल सञ्चालन हुनेछ । गौरीटार रंगशालामा पहिलाे खेल न्यु डाँफे र रियल स्टार क्लब बिच हुनेछ भने एफसी मल्टिभिजन र एफसी नामटार बिच दाेस्राे खेल हुनेछ । यस्तै सिमलटार खेल मैदानमा सानाेपाोखरा क्लब र ७ नम्बर फुटबल क्लब बिच पहिलाे खेल र हटिया स्पाेर्टस् र पदमपाेखरी बिच खेल हुने आयोजकले जनाएकाे छ ।
आयोजकका अनुसार प्रत्येक समूहबाट उत्कृष्ट तीन क्लवले ए डिभिजनस्तरको मान्यता प्राप्त गर्नेछन् भने समूहको पहिलो र दोस्रो हुने क्लवले मात्र नकाउट चरणका खेल खेल्नछन् ।
१४ भदौबाट सुरु लिगको प्रतियोगिताको फाइनल खेल ९ असोजमा हुनेछ । लिग विजेताले नगद १ लाख रुपैयाँ प्राप्त गर्ने छन् भने प्रदेशस्तरीय लिगमा सहभागिता जनाउने छन् । उपविजेता टिमले ५० हजार रुपैयाँ र विधागत उत्कृष्ट खेलाडीहरुले नगद पुरस्कार प्राप्त गर्नेछन् । जिल्लामा रहेका २८ वटा क्लवलाई वर्गीकरण गर्ने गरी जिल्ला लिग सुरु गरिएको हो । फुटबल संघमा आबद्ध रही अघिल्लो पटकको लिग खेलेका २८ क्लवलाई ४ समूहमा विभाजन गरि प्रतियाेगिता संचालन भइरहेकाे छ ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्पोटर्स एकेडेमीले उपविजेतामा चित्त बुझाएकाे थियो।
मकवानपुर । कर्मचारी संचयकाेषकाे वार्षिकोत्सवमा शाखा कार्यालय हेटौंडाले बिहीबार निःशुल्क स्वास्थ्य शिविर गरेकाे छ । काेषकाे ६३औँ वार्षिकोत्सवकाे उपलक्ष्यमा काेषका सञ्चयकर्ता लगायतकाे लागि स्वास्थ्य शिविर आयोजना गरिएकाे ।
कर्मचारी मिलन केन्द्र मकवानपुरकाे समन्वय र सीएमसी चुरेहिल हस्पिटलकाे प्राविधिक सहयाेगमा भएकाे शिविरकाे मकवानपुरका सहायक प्रमुख जिल्ला अधिकारी लोकमान श्रेष्ठले उद्घाटन गरे । शिविरको उदघाटन गर्दै श्रेष्ठले निःशुल्क स्वास्थ्य शिविरले स्वास्थ्य अवस्थालाई परोक्ष रूपमा जाँच गरी स्वस्थ राख्न मद्दत पुर्याउने बताए । ‘कोषको यस प्रकारको पहलले कर्मचारीहरूको सामाजिक सुरक्षामा महत्वपूर्ण योगदान पुर्याएको छ’ उनले भने ‘स्वास्थ्य जाँच कार्यक्रमले कर्मचारीहरूको शारीरिक र मानसिक स्वास्थ्यको महत्त्वलाई उजागर गरेको छ, जसले स्वस्थ्य कमर्चारीले, स्वस्थ्य बाताबरणमा सेवा प्रवाह गर्न सक्षम हुनेछन् ।’
संचय कोष हेटौंडा शाखा प्रमुख डा. दिलिपराज पौडेलले कर्मचारी सञ्चय कोषले विगत ६२ वर्षदेखि देशको समृद्धिका लागि महत्त्वपूर्ण भूमिका निर्वाह गर्दै आएको बताए । संस्था आजसम्म आइपुग्दा लाखौँ कर्मचारीहरूको भविष्य सुरक्षित गर्न सफल भएको भन्दै सञ्चयकर्ताहरूलाई आर्थिक सुरक्षा र सामाजिक सुरक्षामा पनि काम गरेका जानकारी दिए । ‘एक स्वस्थ कर्मचारी नै सक्षम कर्मचारी हो, र सक्षम कर्मचारीले नै आफ्नो काममा उत्कृष्टता देखाउन सक्छ ’ उनले भने ‘निःशुल्क स्वास्थ्य शिविरले कोषको सञ्चयकर्ताहरूलाई अझ स्वस्थ र सक्षम बनाउने उद्देश्य पूरा गरेको छ ।’

शाखा कायर्लय हेटैडाकी उप प्रबन्धक निमा डोमा शेर्पाले स्वास्थ्य शिविरमा सञ्चयकर्ताहरूले आफ्नो स्वास्थ्य जाँच गराउँदै निःशुल्क परामर्श, र अन्य स्वास्थ्यसम्बन्धी सेवाहरू प्राप्त गरेकाकाे बताए । कर्मचारी मिलन केन्द्रकी कार्यबाहक आध्यक्ष शान्ति बिकले निःशुल्क स्वस्थ्य शिविरले कर्मचारीलाई आफ्नो स्वास्थ्यमा सम्बेदनशिल हुन् र आफ्नो स्वास्थ्य प्रति सदैब सचेत रहन प्रेरित गर्ने बताइन् ।
स्वास्थ्य शिविरमा जनरल फिजिसियन सेवा, प्रेशर, सुगर, दम, रुघा, खाेकी, पेट, छाति, मुटु, उपचार तथा परामर्श सेवा निःशुल्क जाँच गरिएकाे कर्मचारी संचयकाेष हेटौडा शाखा प्रमुख डा. दिलिपराज पौडेलले जानकारी दिए । शाखा कार्यालय परिसरमा भएकाे स्वास्थ्य जाँच सीएमसी चुरे हस्पिटलका डाक्टर तथा नर्सलगायतकाे प्राविधिक टोलीले सेवा दिएका हुन् । शिविरमा सामान्य किसिमका रोगकाे औषधी दिइएकाे थियाे भने जटिल रोगकाे लागि हस्पिटल रिफर गरिएकाे छ । शिविरबाट रिफर भएका विरामीकाे लागि अस्पतालले छुट सहितकाे सेवा उपलब्ध गराउने बताइएकाे छ ।
चितवन मेडिकल कलेज (सीएमसी) सञ्चयकाेषकाे स्वास्थ्य उपचार योजना अन्तर्गत सुचिकृत अस्पताल समेत हाे । काेषकाे कार्यालयले ‘सुरक्षित भविश्यकाे लागि निवृत्तभरण तथा सञ्चय काेष’ भन्ने नाराका साथ ३१ भदौमा वार्षिकोत्सव मनाउँदै छ । हेटौंडा शाखाले उक्त दिन प्रभातफेरी कार्यक्रम गरी दिउँसो वार्षिकोत्सव मनाउने शाखा प्रमुख पौडेलले बताए । काेषकाे हेटौंडा कार्यालयले मधेस प्रदेशका धनुषा, महाेत्तरी, बारा र पर्सा तथा बागमती प्रदेशका मकवानपुर, चितवन र सिन्धुलीका सञ्चयकर्तालाई सेवा उपलब्ध गराउँदै आएकाे छ ।