मकवानपुर । मकवानपुरकाे हेटौडा उपमहानगरपालिकाकाे अर्काे एक विद्यालय बालमैत्री स्थानीय शासनयुक्त विद्यालय घोषणा भएको छ । शुक्रबार हेटौंडा–१, चाइनाक्वाटरस्थित अमर माध्यामिक विद्यालय बालमैत्री स्थानीय शासनयुक्त विद्यालय घाेषणा गरिएकाे हाे ।
हेटौंडा उपमहानगरपालिकाकी प्रमुख मिना कुमारी लामाले विद्यालयलाई बालमैत्री घोषणा गरेकी हुन् । यसअघि हेटौंडा उपमहानगरपालिकाका दुई वटा सामुदायिक र १ संस्थागत विद्यालय बालमैत्री घोषणा भएका थिए । सामुदायिक तर्फ हेटौंडा १६ मा रहेकाे जनप्रिय मावि, हेटौंडा–८ मा रहेकाे चन्द्रोदय मावि र संस्थागत तर्फ हेटौडा २ मा रहेकाे बालजागृति इङ्गलिस सेकेन्डरी स्कुल बालमैत्री विद्यालय घोषणा भएका थिए ।
बालमैत्री विद्यालय घाेषणा कार्यक्रममा विद्यालयले वडा कार्यालय, बालमैत्री वडा सम्पर्क व्यक्ति, वडा सहजकर्ता, वडाका टोल विकास संस्था, आमा समूह, बाजा समूह, बाल समूहलाई कदरपत्र प्रदान गरेको छ । यस्तै विद्यालयका समाचार सम्प्रेण गरी बालमैत्री अभियानमा सहयाेग गरेकाे भन्दै पत्रकार सुरेश श्रेष्ठलाई सम्मान गरिएकाे थियाे ।
बालमैत्री विद्यालय घोषणा सभामा विद्यार्थीले नृत्यकला प्रस्तुत गरेका थिए । विद्यार्थीले विभिन्न शैक्षिक क्रियाकलाप, विज्ञान विषयको प्रदर्शनी समेत गरेका थिए । घोषणा अघि विद्यार्थी, शिक्षक,अभिभावकलगायतकाे सहभागितामा पञ्चेबाजासहित प्रभातफेरी आयोजना गरिएको थियो । कार्यक्रममा विद्यालयमा अध्यनरत १ देखि ८ कक्षा सम्मका बिद्यार्थीहरुलाई छात्रवृत्ती प्रदान गरिएको थियो ।
अमर बाल समुह अध्यक्ष विकल्प अर्यालको सभाध्यक्षतामा भएको कार्यक्रममा हेटौंडा उपमहानगरपालिकाका उपप्रमुख राजेश बानियाँ, १ नम्बर वडाध्यक्ष सविन न्यौपाने, १० नम्बर वडाध्यक्ष फुर्वा दोर्जे लामा, कार्यपालिका सदस्य इश्वरी रसाईली, वडा सदस्य मनु दाहाल, महिला तथा बालबालिका महाशाखा प्रमुख बिष्णुकुमारी लामिछाने विद्यालय व्यवस्थापन समितिका अध्यक्ष उमाकान्त गौतम र प्रधानाध्यापक मालती उप्रेती लगायतको उपस्थिति रहेको थियो ।
चितवन । अत्यधिक गर्मीले जनजीवन समेत प्रभावित हुन थालेपछि भरतपुर महानगरपालिकाका सबै विद्यालय जेठ ३२ गतेसम्म विदा हुने भएकाे छ । गर्मीका कारण महानगरपालिकाले जेठ २९ गते मंगलबारबाट विद्यालय विदा दिने भएकाे हाे ।
भरतपुर महानगरले सोमबार सूचना सार्वजनिक गर्दै बर्खे विदाबाट कट्टी हुनेगरी मंगलबारदेखि शुक्रबारसम्म शैक्षिक संस्थामा पठनपाठन नगराउन अनुरोध गरेको हो । गर्मीका कारण बालवालिकाको विद्यालय आवागमन तथा पठनपाठनमा समेत समस्या भएकाले जनगुनासो समेतलाई मध्यनजर गर्दै स्थानीय जनप्रतिनिधिहरू, अभिभावक, विद्यालय र सरोकारवालाहरूको सुझावका आधारमा महानगरका विद्यालय ४ दिन बन्द गरिएकाे बताइएकाे छ ।
शैक्षिक प्रशासन महाशाखा प्रमुख सुवासचन्द्र आचार्यद्वारा हस्ताक्षर गरिएको पत्रमा भनिएकाे छ – ‘केही दिनदेखिको अत्यधिक गर्मीका कारण जनजीवन प्रभावित भैरहेको र बालवालिकाहरूको विद्यालय आवागमन तथा पठनपाठनमा समेत समस्या भएकाले विद्यालय सञ्चालनका लागि कठिन भएको भन्ने जनगुनासो समेतलाई मध्यनजर गर्दै स्थानीय जनप्रतिनिधिहरू, अभिभावक, विद्यालय र सरोकारवालाहरूको सुझावका आधारमा साउनको अन्तिम साता (साउन २९ देखि ३२ गतेसम्म) को वर्षे विदाबाट कट्टा हुनेगरी यही मिति २०८१/०२/२९ गते देखि २०८१/०२/३२ गते (मंगलबारदेखि शुक्रबार) सम्म जम्मा ४ दिन महानगरपालिकाबाट विदा गर्ने निर्णय भएको व्यहोरा जानकारी गराइन्छ ।
साथै विदाको अवधिमा आफ्ना बालबालिकालाई दिउँसो घाममा हिँडडुल गर्न नदिन र नदी-पोखरीहरूमा पौडी खेल्ने, माछा मार्ने जस्ता कार्यमा संलग्न हुन नदिन आवश्यक सावधानी अपनाउन सबै अभिभावकहरूलाई अनुरोध गर्दै सोही बमोजिम आफ्ना विद्यार्थीहरूलाई निर्देशन दिनुहुन सबै विद्यालयहरूलाई अनुरोध छ ।´ अब महानगरका विद्यालय असार २ गतेबाट खुल्ने छन् ।
मकवानपुर । मकवानपुरकाे हेटौडा उपमहानगरपालिका १ मा रहेकाे अमर माध्यामिक विद्यालयले क्याप्टेन, भाइस क्याप्टेन तथा कक्षा मनिटरहरुको निर्वाचन गराएर चुनावी प्रकृयाबारे विद्यार्थीलाई प्रयाेगात्मक रुपमा बुझाएकाे छ ।
शुक्रबार विद्यालयमा भएकाे निर्वाचनबाट ४९ मत प्राप्त गरी कक्षा ९ मा अध्ययनरत छात्रा विमला दाहाल विद्यालय क्याप्टेनमा चुनिएकी छिन् । यसैगरी विद्यालयको भाइस क्याप्टेनमा कक्षा ८ मा अध्ययनरत छात्रा नम्रता पराजुली निर्वाचित भएकी छिन् ।
मतदानमा दाहाल ४९ मत प्राप्त गरी क्याप्टेनमा विजयी हुँदा उनका निकटतम प्रतिस्पर्धी सक्षम गिरीले ४७ मत प्राप्त प्राप्त गरेको बिद्यालय प्रध्यनाध्यापक मालती उप्रेतीले बताइन् । यस्तै भाइस क्याप्टेनमा पराजुली ८३ मत प्राप्त गरी विजयी हुँदा उनकाे निकटतम् प्रतिस्पर्धी युरोज थिङले ८२ मत प्राप्त गरे ।
बिद्यालय सहायक प्रअ तथा अतिरिक्त क्रियाकलाप संयोजक डीबी बर्तौलाका अनुसार क्याप्टेनकाे प्रतिस्पर्धामा ६ जना र भाइस क्याप्टेनकाे प्रतिस्पर्धामा ४ जना रहेका थिए । यसैगरी विद्यालयकाे कक्षा ४ देखि कक्षा १० सम्म एक छात्रा र एक छात्र गरी दुई जना मनिटरका लागि समेत निर्वाचन गरिएकाे थियाे । कक्षागत मनिटरहरुमा कक्षा ४ मा सुनिदा बानियाँ, २६ मत र अर्पण थिङ मत प्राप्त गरी विजयी भएका छन् भने कक्षा ५ मा खुसी आले १४ मत र राज गाेले १५ मत प्राप्त गरी कक्षागत मनिटरमा विजयी भएका छन् । यस्तै कक्षा ६ काे मनिटरमा रिचा आले २४ मत र शनि वाइबा २१ मत प्राप्त गरी चयन भएकाे उनले बताए ।
कक्षा ७ मा जितु शाह २० मत र स्वस्तिका गोले १८ मत प्राप्त गरी कक्षा मनिटरमा विजयी हुँदा विपिसा बिक २४ मत र रञ्जिता गजुरेल २६ मतका साथ कक्षा ८ काे मनिटरमा चुनिएका छन् । यस्तै कक्षा ९ काे मनिटरमा निशा लामा १५ मत र विनायक अर्याल २९ मतका साथ मनिटर चुनिदा कक्षा १० ‘ए’ काे मनिटरमा स्नेहा शाह ४ मत र ईशा जिम्मा १३ मत (गोलाप्रथाबाट विजयी) का साथ चुनिए । विद्यालयकाे कक्षा १०’बी’ काे मनिटरमा सबिना थिङ २१ मत र नारायण अधिकरी १३ मत प्राप्त गरी विजयी भएकाे बर्तौलाले जानकारी दिए ।
क्याप्टेन भाइस क्याप्टेन र मनिटरकाे लागि जेठ १ गते ११ बजे उम्मेदवारी दर्ता र २ बजे उम्मेदवारी फिर्ताकाे कार्यक्रम भएकाे थियाे भने जेठ २ गते चुनाव चिह्न प्रदान गर्दै मतदान शिक्षासमेत दिइएकाे उनले बताए । त्यस्तै जेठ २ र ३ गते उम्मेदवारले प्रचारप्रसार गरेका थिए ।जेठ ३ गते २ बजेदेखि जेठ ४ गते ११ बजेसम्म मौन अवधिसमेत ताेकिएकाे उनले जानकारी दिए । सवै पदमा गरी ४६ जनाको उम्मेदवारी कायम भएकाे थियाे । मतगणना जेठ ४ गते भएकाे हाे ।
मकवानपुर । सामुदायिक विद्यालयको गुणस्तर सुधार पहिलाे प्राथमिकतामा रहेकाे हेटाैडा ४ नम्बर वडाकाे अध्यक्ष नवीन सिग्देलले बताएका छन् । भुटनदेवी माविमा आन्तरिक श्राेतबाट नियुक्त शिक्षकलाई स्वागत कार्यक्रममा उनले यस्तो बताएका हुन् ।
नवनियुक्त ९ जना शिक्षक स्वागत संगै भुटनदेवी माविमा अध्यापन गराइ आफ्ना छाेराछाेरीलाई सोही विद्यालयमा अध्ययन गराउने शिक्षकलाई सम्मान समेत गरिएको थियो । शिक्षक स्वागत तथा सम्मान गर्दै अध्यक्ष सिग्देलले हाम्राे पहिलाे अभियान भनेकाे शैक्षिक गुणस्तर सुधार भएकाे बताए । उनले जबसम्म आफूले पढाउने विद्यालयका शिक्षकले आफ्ना छाेराछाेरी सोही विद्यालयमा अध्ययन गराउदैनन तबसम्म सामुदायिक विद्यालयप्रति जनविश्वास नहुने बताए ।
शिक्षाकाे गुणस्तर सुधार्न शिक्षककाे भूमिका सबैभन्दा महत्वपूर्ण हुने बताउँदै भुटनदेवी माविकाे व्यवस्थापन समितिकाे अध्यक्ष समेत रहेका सिग्देलले अन्यकाे भूमिका सहायक हुने दावि गरे । ४ नम्बर वडाले शैक्षिक गुणस्तर सुधारमा विभिन्न क्रियाकलाप सञ्चालन गर्दै आएकाेले सामुदायिक विद्यालयका शिक्षकले आफ्ना छाेराछाेरी भर्ना गर्ने क्रम बढेकाे उनले बताए । यसअघि श्रमिक माविले पनि आफ्ना छाेराछाेरी आफूले अध्यापन गराउने विद्यालयमा भर्ना गर्ने शिक्षकलाई सम्मान गरेकाे थियाे ।
विद्यालयका प्रधानाध्यापक माधव दाहालले सार्वजनिक विज्ञापन गरेर प्रतिस्पर्धाद्वारा उत्कृष्ट भएकालाई शिक्षक नियुक्त गरिएकाे बताउँदै कर्तव्यनिष्ट भएर कार्य गर्नुपर्ने बताए ।
कार्यक्रममा विद्यालय व्यवस्थापन समितिका सदस्यहरू राजेन्द्रकुमार बस्ताकाेटी, कृष्णप्रसाद कंडेल, सहप्रअहरू वेदराज काेईराला, भरत पाेख्रेल, शिक्षक प्रतिनिधि सूर्यप्रसाद घिमिरेलगायतकाे उपस्थिति रहेकाे थियाे ।