मकवानपुर । मकवानपुरको राक्सिराङ गाउँपालिकामा पुजारीको गोली हानी हत्या भएको छ । शुक्रबार बिहान राक्सिराङ–१, कोलगैरी ठकुरीडाँडास्थित कुलदेवी मन्दिरकाे ६४ वर्षीय पुजारी ठूले गोलेको गोली हानी हत्या भएको जिल्ला प्रहरी कार्यालय मकवानपुरले जनाएकाे छ ।
गोली प्रहारबाट पुजारी गोलेको घटनास्थलमै मृत्यु भएको प्रहरीले जनाएको छ । पुजारीको हत्या गरेको अभियोगमा प्रहरीले ७५ वर्षीय इमान सिंह थोकरलाई नियन्त्रणमा लिएको छ । थोकरको साथबाट कटुवा पेस्तोल १ थान, पेस्तोलमा लाग्ने २ राउण्ड गोली, खोका १ थान र १९० ग्राम गन पाउडर बरामद गरेको मकवानपुर प्रहरीले जनाएकाे छ ।
घटना पश्चात इलाका प्रहरी कार्यालय मनहरी र जिल्ला प्रहरी कार्यालय मकवानपुर सादा पोशाकका प्रहरी समेत खटिएर थोकरलाई पक्राउ गरिएको जिल्ला प्रहरी कार्यालय मकवानपुरका निमित्त प्रवक्ता प्रहरी निरीक्षक राजु प्रसाद कुर्मीले जानकारी दिए । प्रारम्भिक अनुसन्धानको क्रममा पुरानो सिरइवीका कारण थोकरले गोलेलाई गोली प्रहार गरेको देखिएकाे प्रहरीले जनाएकाे छ ।
मकवानपुर । मकवानपुर प्रहरीले हेटौंडाबाट ८ हजार क्याप्सुल ट्रामाडोलसहित ५ जना पक्राउ गरेकाे छ । बिहीबार हेटौंडा उपमहानगरपालिका वडा नम्बर–५ स्थित सानो पोखराबाट ८ हजार ३ सय क्याप्सुल ट्रामाडोलसहित कारोबारमा संलग्न ५ जनालाई पक्राउ गरिएकाे जिल्ला प्रहरी कार्यालय मकवानपुरले जनाएकाे छ ।
पक्राउ पर्नेमा हेटौंडा उपमहानगरपालिका–२ बस्ने ३५ वर्षीय राजीव लामा, बकैया गाउँपालिका–१२ घर भएका १९ वर्षीय अशोक स्याङतान, हेटौंडा–१७ बस्ने २० वर्षीय प्रवेश बरैली, हेटौंडा–४ बस्ने २० वर्षीय निशान कोइराला र मकवानपुरगढी गाउँपालिका–२ बस्ने २३ वर्षीय दीपेश सञ्जेल रहेकाे प्रहरीले जनाएकाे छ ।
खाल्डो खनेर ट्रामाडोल लुकाउन लागेको अवस्थामा विशेष सुराकको आधारमा उनीहरूलाई पक्राउ गरिएको प्रहरीले जनाएकाे छ । उनीहरुले प्रयोग गरेकाे ना.३२ प ३२४४ र बा. प्रदेश ००५ प १८५ नं. को मोटरसाइकल समेत बरामद गरी प्रहरीले अदालतबाट ५ दिनको म्याद लिएर लागुऔषध मुद्दामा अनुसन्धान गरिरहेको जनाएकाे छ ।
जेनजी आन्दोलनका नाममा भएको अपराधिक गतिविधिमा संगल्नलाई कारवाहीको दायरामा ल्याउन प्रहरी प्रशासनलाई धेरै सकस छ । ति दिनहरुमा देशभर घटेका गतिविधिहरूले केवल राजनीतिक असन्तोषको रुप मात्र देखाएका छैनन्, यसले कानून र सुरक्षाको आधारभूत मूल्यमा नै प्रश्न उठाएको छ। आन्दोलन लोकतान्त्रिक अधिकार हो, तर जब त्यो अधिकार तोडफोड, आगजनी, जनधनको क्षति र आम नागरिकमा त्रास उत्पन्न गर्ने दिशातर्फ मोडिन्छ ।
त्यो स्वतन्त्र अभिव्यक्तिको अभ्यास होइन स्पष्ट रूपमा अपराधको स्वरूप लिन्छ। तर विडम्बना, यस्ता आपराधिक गतिविधिमा संलग्न व्यक्तिहरू अझैसम्म नियन्त्रणमा आएका छैनन्। प्रहरी प्रशासनको ढिलासुस्ती, अनिर्णायकता र मौनताले नागरिकमा गम्भीर आशंका उत्पन्न गरेको छ। आखिर किन प्रहरी निष्क्रिय छ ? के राजनीतिक दबाबका कारण कानुनी प्रक्रिया अवरुद्ध भइरहेको हो ? कि प्रहरीभित्रकै समन्वयहीनता र इच्छाशक्तिको कमीले कारबाही सम्भव हुन सकेको छैन ?
कानूनको शासनमा बस्ने समाजमा कुनै पनि व्यक्ति वा समूह कानूनभन्दा माथि हुन सक्दैन। आन्दोलनका नाममा जथाभावी हिंसा फैलाउने र सार्वजनिक सम्पत्ति नष्ट गर्नेहरूलाई उन्मुक्त राख्नु भनेको कानुनी शासनको धज्जी उडाउनु हो। प्रहरी प्रशासनले यस्ता घटनापछि तुरुन्तै अपराधी पहिचान, प्रमाण सङ्कलन र पक्राउ प्रक्रिया अघि बढाउनुपर्ने थियो।
प्रहरी संस्थामाथि जनताको विश्वास तब मात्र रहन्छ जब त्यसले निष्पक्षता र जवाफदेहिताको परिचय दिन्छ। अपराधको स्वरूप जुनसुकै होस्, अपराधी जोसुकै होस् कारबाही समान हुनुपर्छ। कुनै राजनीतिक वा प्रशासनिक दबाबका कारण प्रहरी कमजोर देखियो भने त्यसले केवल आजको होइन, भोलिको कानुनी व्यवस्था पनि कमजोर बनाउँछ। राज्यको स्थायित्व, जनविश्वास र कानूनी शासनको प्रतिष्ठा प्रहरीको हातमा छ।अपराधी उन्मुक्त रहे भने जनतामा असुरक्षा र प्रणालीप्रतिको विश्वासको संकट गहिरिंदै जानेछ। मकवानपुर प्रहरीले बुधबार ५ जनालाई नियन्त्रणमा लिएको छ, अब यो कामले निरन्तरता पाओस्, प्रहरीमाथि गौरव गर्न सकियोस् । दबाब र प्रभावमा कारवाही प्रकृया फितलो नहोस् ।
मकवानपुर । गत भदौ २४ गते भएकाे जेनजी आन्दोलनमा हेटौंडामा आपराधिक उपद्र तथा आगजनी गर्ने ५ जनालाई मकवानपुर प्रहरीले पक्राउ गरेकाे छ । व्यक्ति तथा सरकारी भवनमा आगजनी तथा तोडफोड गरेकाे कसुरमा उनीहरुलाई पक्राउ गरिएकाे प्रहरीले जनाएकाे छ ।
आन्दोलनकाे क्रममा हेटौडा उपमहानगरपालिका वडा नं. ११ नवलपुर बस्ने ४५ वर्षीय सुशिल पौडेलको घरमा आगजनी तथा तोडफोड गरेको आरोपमा हेटौंडा ११ का ३६ वर्षीय सुजन अधिकारी र ३५ वर्षीय सुरेन्द्र राना मगरलाई प्रहरीले पक्राउ गरेकाे जनाएकाे छ । अधिकारी र मगरलाई मकवानपुर जिल्ला अदालत हेटौंडाबाट आपराधिक उपद्र तथा लुटपाटको अपराध कसुरमा म्याद अनुमति लिई थप अनुसन्धान कार्य भईरहेको जिल्ला प्रहरी कार्यालय मकवानपुरले जनाएकाे छ ।
यसैगरी आन्दोलनकै क्रममा मकवानपुर जिल्ला स्थित बागमती प्रदेश सभा सचिवालय तथा जिल्ला ट्राफिक प्रहरी कार्यालयको भवनमा तोडफोड र आगजनी गरेकाे आरोपमा जिल्ला सर्लाही बरथवा नगरपालिका वडा नं. १ बस्ने २७ वर्षीय पुनम ठाकुर तथा २७ वर्षीय प्रमोद महतो र हेटौंडा ८ बस्ने ४३ वर्षीय सागर घताने भन्ने रोम बहादुर घतानेलाई पक्राउ गरिएकाे हाे । उनीहरूमाथि आवश्यक कारबाहीका लागि थप अनुसन्धान भइरहेको प्रहरीले जनाएको छ ।
मकवानपुर । मदन भण्डारी लोकमार्गअन्तर्गत हेटौंडा–सिन्धुली सडकखण्डको हात्तिसुडेमा मंगलबार साँझ मोटरसाइकलको ठक्करबाट पैदलयात्री वृद्धको मृत्यु भएको छ ।
मंगलबार हेटौंडाबाट फापरबारीतर्फ जाँदै गरेको बा ५८ प ३३१८ नम्बरको मोटरसाइकलले पैदलयात्री ७१ वर्षीय खडक बहादुर घलानलाई ठक्कर दिएको प्रहरीले जनाएको छ । मोटरसाइकलको ठक्करबाट घाइते घलानको उपचारको क्रममा राती ७ बजेर ४५ मिनेटको समयमा हेटौंडास्थित चुरेहिल हस्पिटलमा मृत्यु भएको प्रहरीले जानकारी दिएको छ ।
दुर्घटनामा मोटरसाइकल चालक देवराज विक र मोटरसाइकलमा सवार २० वर्षीय देवराज धानुकी सामान्य घाइते भएका थिए । प्रहरीले मोटरसाइकल चालक बकैया गाउँपालिका–७ का २५ वर्षीय विकलाई नियन्त्रणमा लिएको छ ।