मकवानपुर । मकवानपुर प्रहरीले कौडा खेलिरहेको अवस्थामा आइतबार ८ जनालाई पक्राउ गरेको छ । जिल्लाको बकैया गाउँपालिका–९ बैरुङ्दमारस्थित खुल्ला चौरमा कौडा खेलिरहेको अवस्थामा उनीहरुलाई पक्राउ गरिएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार पक्राउ पर्नेहरुमा बकैया ९ हर्कपुर बस्ने ३६ वर्षीय दावा लामा बम्जन, ४ ठुलोथली बस्ने ४० वर्षीय दिपलाल थोकर,सेतोभिर बस्ने ४९ वर्षीय सुन्दर घिसिङ,५५ वर्षीय राम बहादुर थिङ, ५ पाङ्रेखोला मगरटोल बस्ने ३२ वर्षीय शुसिल लामा, ३८ वर्षीय कमल थिङ, वडा नंबर ११ गमलटार बस्ने ४५ वर्षीय बिजय वाईबा र २६ वर्षीय आकाश न्यासुर रहेका छन् । प्रहरीले उनीहरुको साथबाट नगद ६७ हजार ६ सय ३५ रुपैयाँ र कौडा बरामद गरेको छ ।
बैरुङ्दमारस्थित चौरमा कौडा खेलिरहेको भन्ने खबर प्राप्त हुनासाथ ईलाका प्रहरी कार्यालय फापरबारी, वडा प्रहरी कार्यालय हेटौंडा र प्रहरी चौकी हात्तिसुँडेबाट खटिएको प्रहरीले आइतबार दिउँसो उनीहरुलाई पक्राउ गरेको जिल्ला प्रहरी कार्यालय मकवानपुरले जानकारी दिएकाे छ ।
मकवानपुर प्रहरीले कौडा खेलिरहेको अवस्थामा पक्राउ परेका ८ जनालाई नगद ६७ हजार ६ सय ३५ रुपैयाँ सहित सार्वजनिक गरेको छ । पक्राउ परेकाहरुलाई आइतबार नै जिल्ला प्रशासन कार्यालय मकवानपुरबाट ७ दिनको म्याद अनुमती लिई आवश्यक अनुसन्धान तथा कारवाही भईरहेको जिल्ला प्रहरी कार्यलय मकवानपुरले जनाएको छ ।
मकवानपुर । मकवानपुरको भीमफेदीबाट शनिबार राति चोरी भएको शालिक भेटिएकाे छ । लोककवि गणेशलाल श्रेष्ठको शालिक आइतबार अनावरण गर्ने गरी राखिएकाेमा शनिबार चाेरी भएकाे थियाे ।
भीमफेदी–६ स्थित चिसापानी पुल मुनी सोमबार अपरान्न ४ बजेर ४५ मिनेटको समयमा शालिक भेटिएको जिल्ला प्रहरी कार्यालय मकवानपुरले जानकारी दिएको छ । प्रहरीले फेला पारेकाे शालिक इलाका प्रहरी कार्यालय भीमफेदीमा राखिएको छ ।
भीमफेदीमै जन्मेर लोककविको उपाधि पाउनुभएका गणेशलाल श्रेष्ठको सम्मानमा नागरिकस्तरबाटै भीमफेदी–६, भीमफेदी बजारस्थित ज्योति पुस्तकालय परिसरमा शालिक स्थापना गर्न लागिएको हो । लोककवि श्रेष्ठको शालिक आइतबार अनावरण गर्ने कार्यक्रम तय गरिएको थियो ।
शालिक बरामद भए पनि प्रहरीले शालिक चोरीमा संलग्नलाई पहिचान गर्न सकेको छैन । शालिक चाेरी भएकाे घटनाकाे अनुसन्धान जारी रहेकोले घटनामा संलग्नलाई कारवाहीको दायरामा ल्याउने मकवानपुर प्रहरीले जनाएकाे छ ।
मकवानपुर / स्वास्थ तथा जनसंख्या मन्त्री बिरोध खतिवडाले लैङ्गिकताको आधारमा हुने हिंसा उन्मुलनको लागि सूचना प्रणाली व्यवस्थापन, गोपनियता व्यवस्थापन जस्ता सवालमा नेपाल सरकारले आफ्नो जिम्मेवारी पूरा गर्ने प्रतिबद्धता गरेका छन् ।
पीडितको सुरक्षा र संरक्षणमा सरकारी दायित्व अपुग भएको आभास भएमा खबरदारी गर्न सरोकारवालालाई मन्त्री खतिवडाले आग्रह गरे । क्षेत्रीय स्तरको सम्बन्धित सरोकारवाला कार्यशाला महिला किशोरीहरू विरुद्ध हुने हिंसा अन्त्य गर्न प्रेषण प्रणाली तथा मार्ग सुदृढीकरण सम्बन्धि कार्यशालामा खतिवडाले यस्तो बताएका हुन् ।
कार्यक्रममा प्रदेश सभा सदस्य प्रेमबहादुर पुलामीले घरैभित्रबाट अभिभावकले गर्ने विभेदित व्यवहारले महिला उत्पीडनमा पर्ने गरेको बताए । गरिब र कमजोर वर्गमा बढी हिंसा हुनेगरेको उनले बताए ।
यसैगरी प्रदेश सभा सदस्य मुनु सिग्देलले सामाजिक संस्कारको कारण किशोरीको स्वास्थ तथा मानसिक रूपमा असर पुग्ने गरेको बताइन् । मर्यादित महिनावारीको चलन नभएकोले समस्या भएको सिग्देलले बताइन् । धार्मिक रूपमा कतै पनि महिनावारीमा छुवाछूत बार्ने बारे उल्लेख नभएको तर सामाजिक संस्कारले किशोरील तथा महिलालाई समस्यामा पार्ने गरेको उनले बताइन् । महिनावारी बार्ने, यो बेलामा छुवाछूत गर्ने गर्नाले पनि हिंसा भएको उनले बताइन् । हिंसामा परेको व्यक्तिलाई हिंसाबाट उन्मुक्ति गराउनु तिनै तहको जिम्मेवारी सिग्देलले बताइन् ।

कार्यक्रममा जिल्ला समन्वय समिति मकवानपुर उपप्रमुख भगवती पुडासैनीले हिंसा प्रभावित तथा पीडितलाई उद्वार तथा राहतका लागि एकद्वार संकट व्यवस्थापन प्रणाली धेरै प्रभावकारी भएको बताइन् । सबै स्थानीय तहमा यस्तो व्यवस्था हुनुपर्ने उनले बताइन् । पीडितहरू बिच पुनर्मिलनको कार्यक्रम पनि संगसंगै अगाडि बढाउन स्थानीय न्यायीक समितिले गर्नुपर्ने पुडासैनीले बताइन् ।
कार्यक्रममा हेउमपना सामाजिक विकास महाशाखा प्रमुख बिष्णुकुमारी लामिछानेले लैङ्गिक समुदायमा आधारित घटना व्यवस्थापन तथा प्रेषण प्रमाणी बारे कार्यपत्र प्रस्तुत गरेका थिए । कार्यक्रममा माडी नगरपालिका चितवन,
पर्सा जिल्ला पटेवा सुनौली गाउंपालिकालगायतका सरोकारवाला निकायहरूको उपस्थिति रहेको थियो ।
कार्यक्रममा मकवानपुर, चितवन, पर्सालगायत ५ जिल्लाका सरोकारवालाहरूको उपस्थिति रहेको नगर स्तरीय महिला जागरण समूहको अध्यक्ष तारा ढुङ्गानाले बताइन् । हेटौंडा उपमहानगरपालिकाको समन्वय, एक्सन एड नेपालको आर्थिक सहयोग तथा नगर स्तरीय महिला जागरण समूहको आयोजना कार्यक्रम भएको नगर स्तरीय महिला जागरण सचिब निशा लामाले बताइन् । कार्यक्रममा मकवानपुर महिला समूह अध्यक्ष कमला सुबेदीले स्वागत गरेकी थिइन् ।
मकवानपुर । मकवानपुर प्रहरीले अवैध काठसहित २ जनालाई पक्राउ गरेको छ । प्रहरीले जिल्लाको हेटौंडा उपमहानगरपालिका वडा नम्वर ३ स्थित सडकखण्डबाट ८८.६० क्युफिट सालको काठसहित २ जनालाई पक्राउ गरेको जिल्ला प्रहरी कार्यालय मकवानपुरले जनाएको छ ।
पक्राउ पर्नेहरुमा हेटौंडा उपमहानगरपालिका वडा नम्वर १२ बस्ने २४ वर्षीय सुशान लोप्चन र १८ वर्षीय सुदिप लोप्चन रहेको जिल्ला प्रहरी कार्यालय मकवानपुरका प्रहरी निरीक्षक देवेन्द्र दासले जानकारी दिए । उनका अनुसार, उनीहरुलाई ईलाका प्रहरी कार्यालय नेवारपानीबाट खटिएको प्रहरी टोलीले आज (शनिबार) दिउँसो पक्राउ गरेको हो ।
हाडीखोला तर्फबाट बस्तीपुर चोकतर्फ आउँदै गरेको बागमती प्रदेश ०३–००१– च १२६०नं. को पिकअप गाडीलाई रोकी चेकजाँच गर्दा लुकाईछिपाई ल्याएको उक्त परिणामको काठ बरामद भएपछि निज गाडी चालक सुशान र गाडीमा सवारी सुदिपलाई पक्राउ गरेको प्रहरी निरीक्षक दासले बताए ।
उनीहरुलाई उक्त परिणामको काठ, पिकअप गाडीसहित नियन्त्रणमा लिई आवश्याक कारवाहीको लागि डिभिजन वन कार्यालय राप्ती, मनहरी मकवानपुर पठाउने पहल भईरहेको मकवानपुर प्रहरीले जनाएको छ ।
वैदेशिक रोजगारबाट सिर्जित समस्या न्यूनीकरण गर्ने सामूहिक प्रतिबद्धता र पहल आवश्यक
Tags: No Comments
मकवानपुर / वैदेशिक रोजगारको कारण समाजमा विभिन्न समस्या सिर्जना भएकोले यस्ता समस्या न्यूनीकरण गर्ने सामूहिक प्रतिबद्धता र पहल आवश्यक भएको बताईएको छ ।
वैदेशिक रोजगारमा संलग्न भएकाहरू बिचको भौतिक दुरिले उब्जने शंका उपशंका, समाजले लगाउने भेदभाव, लान्छना र सामाजिक लागतको दुरुपयोग भएको बताइएको हो ।
अन्तर्राष्ट्रिय आप्रवासन कामदार दिवस २०२१ को सन्दर्भमा एकीकृत ग्रामीण विकास सेवा संस्थाले आयोजना गरेको वैदेशिक रोजगारले निम्त्याएको सामाजिक असर न्यूनीकरण सम्बन्धि अन्तरक्रिया कार्यक्रम यस्तो चर्चा गरिएको हो । वैदेशिक रोजगारको कारण धेरै सकारात्मक काम भए पनि यसको केही नकारात्मक कामकै बढी चर्चा हुने गरेको र सकारात्मक प्रयास बारे परियोजना अधिकृत उमा पौडेलले कार्यपत्र प्रस्तुत गरेकी थिइन् । वैदेशिक रोजगारको कारण बिप्रेषण, सीप, अनुभव, आत्मनिर्भरता, सामाजिक प्रतिष्ठा, उद्यमशीलता, जीवनस्तर सुधार जस्ता पाटामा फाईदा पुगेको पौडेलले बताइन्।
नेपालबाट ५६ प्रतिशत घरधुरी वैदेशिक रोजगारमा आवद्ध रहेको र जसमा ५ प्रतिशत महिला रहेको अधिकृत पौडेलले बताइन् । कार्यक्रममा हेटौंडा १७ का वडा अध्यक्ष भैरव राईले सचेतनामुलक कार्यक्रमले सामाजिक लान्छना कम गर्न सक्ने बताउंदै सचेतना र सही सन्दर्भहरूको प्रचारप्रसार अभियान जारी राख्नुपर्ने बताए । वैदेशिक रोजगारले सम्बन्ध बिच्छेद जस्ता घटनाले परिवार बिखण्डित भएको अध्यक्ष राईले बताए ।
कार्यक्रममा सामाजिक विकास महाशाखा प्रमुख बिष्णुकुमारी लामिछानेले, शाखा अधिकृत भैरव कमाललगायतले सामाजिक विकासको पाटोमा धेरै काम गर्न बांकी रहेको बताए । युवाको शक्ति र सिपलाई बुझेर स्थानीय सरकारले ध्यान दिनुपर्ने उनीहरूले बताए ।

श्रीमान वैदेशिक रोजगार रहेकै कारण आफूहरूमाथी अनावश्यक लान्छना लाग्ने गरेकोले संस्थाले सामाजिक परामर्श तथा स्वरोजगारको लागि सहयोग गरिदिन कार्यक्रममा सहभागी महिलाहरूले आग्रह गरेका थिए ।
कार्यक्रममा सुरक्षित आप्रवासन परियोजना (सामी) संयोजक अन्जिता थापा मगर, एकीकृत ग्रामीण विकास सेवाका सचिब मिनप्रसाद पौडेल, माइती नेपाल मकवानपुर प्रमुख माया लामा, नारी संरक्षण केन्द्र संयोजक राम मिजारलगायतले समसामयिक समस्या बारे जानकारी गराएका थिए ।
वैदेशिक रोजगारबाट २०७० सालयता रेमिटेन्समात्रै ७० खर्ब भित्रिएको र गत आर्थिक बर्षमा मात्रै ९ खरब रेमिटेन्स भित्रिएको तथ्यांक सार्वजनिक गरिएको थियो । तथ्यांकअनुसार यसबाट कुल ग्राहस्थमा २५ प्रतिशत योगदान छ ।
कार्यक्रम सहभागीहरूले वैदेशिक रोजगारलाई सुरक्षित र सम्मानित बनाउन सही सूचना प्रवाह गर्ने, नकारात्मक सन्देश प्रचारप्रसार नगर्नेलगायतको सवालमा प्रतिबद्धता पत्रमा हस्ताक्षर समेत गरिएका थिए । कार्यक्रम संस्थाका प्रशासन तथा लेखा अधिकृत शुभराज लामाले सन्चालन गरेका थिए ।