मकवानपुर । नेपाली राजनीतिमा ३-४ महिनाकाे अन्तरालमा सत्ता समिकरण बदलिएपछि त्यसकाे असर सरकारकाे नेतृत्व गरिरहेकाे दल तथा सत्ता साझेदार दलमा समेत पर्ने गरेकाे छ ।
पछिल्लाे पटक २२ फागुन २०८० मा नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाली काँग्रेससँगकाे समिकरण ताेडी नेकपा एमालेसँग सत्ता समिकरण गरेका थिए । माओवादीसँगकाे सत्ता समिकरणबाट अलग भई एमाले र काँग्रेसकाे नयाँ समिकरण गत सोमबार मध्यरातमा भएपछि यसले राजनीतिमा नयाँ तरङ्ग पैदा गरेकाे छ । एमालेले सरकारलाई दिएकाे समर्थन फिर्ता र सरकारमा सहभागी मन्त्रीले राजिनामा बुझाएका छन् ।
सरकार समर्थित कुनै एक दलले समर्थन फिर्ता लिए स्वतः अल्पमतमा सरकार पर्ने भएकाेले उसले कि त संसदमा विश्वासकाे मत लिनु पर्छ कि राजिनामा दिनु पर्छ । तर प्रधानमन्त्री प्रचण्डले संसदकाे फेस गर्ने भएका छन् । असार २८ गते विश्वासकाे मतकाे प्रस्ताव संसदमा पेश गर्ने छन् । विश्वासकाे मत प्राप्त नभए उनी स्वतः पद मुक्त हुने छन् । सत्ता समिकरणकाे फेरबदलकाे असर प्रदेश सरकारमा समेत देखिएकाे छ । लुम्विनिमा नयाँ मुख्यमन्त्री चयनकाे प्रक्रियाकाे लागि प्रदेश प्रमुख समक्ष लेखि पठाइएकाे छ ।
जनता समाजवादी पार्टीले समेत प्रचण्ड सरकारलाई दिएकाे समर्थन फिर्ता लिदै सरकारमा सहभागी मन्त्रीले राजिनामा बुझाएका छन् । केन्द्रीय सत्ता समीकरण बदलिएसँगै बागमती प्रदेश सरकारमा पनि त्यसले असर पर्ने भएकाे छ । काँग्रेस र एमाले बीच गत सोमबार भएकाे सहमती अनुसार बागमतीमा काँग्रेसकाे नेतृत्वमा सरकार गठन हुने छ । हाल नेकपा माओवादी केन्द्रकाे नेतृत्वमा एमालेसहितका दलकाे सरकार छ । तर एमालेबाट बागमतीमा सहभागी मन्त्रीहरु राजिनामा बुझाउने तयारीमा छन् । बागमती प्रदेश सरकार ढल्ने निश्चित भएसँगै मुख्यमन्त्री शालिकराम जम्कट्टेल हेटौडा बाहिर गएकाे बुझिएकाे छ ।
नयाँ समीकरण अनुसार केन्द्रमा सरकार निर्माणको तयारी थालिएसँगै माओवादी केन्द्र नेतृत्वको बागमती प्रदेश सरकारकाे समेत आयु गणना सुरु भएकाे छ । ३ पटकसम्म विश्वासको मत लिएर १८ महिनासम्म सरकार टिकाएका मुख्यमन्त्री शालिकराम जम्कट्टेलले सत्ता समिकरण बदलिएसँगै सत्ता छाड्नुपर्ने परिस्थिति बनेको हो । प्रदेश सरकार निर्माणलगायतका विषयमा निर्णय गर्न बागमतीका सत्ता साझेदार दलहरू केन्द्र सरकार गठन लगत्तै प्रदेश सरकारका विषयमा अघि बढ्ने तयारीमा छन् ।
माओवादी केन्द्र नेतृत्वको बागमती प्रदेश सरकारमा एमालेबाट सहभागी मन्त्रीहरूले मुख्यमन्त्री जम्कट्टेललाई शुक्रबार भेटेरै राजीनामा बुझाउन खोजेपनि उनी हेटौँडा बाहिर रहेका कारण सम्भव नभएकाे बताइएकाे छ । तत्काल राजीनामा बुझाउने एमालेका मन्त्रीहरूको योजना मुख्यमन्त्री हेटौडा आएपछि हुने भएकाे छ ।
केन्द्रीय तहमा एमाले र कांग्रेसको साझेदारीको सरकार बन्ने भएपछि बागमतीमा कांग्रेसले सरकारको नेतृत्व गर्ने छ । सोही समीकरण अनुसार सरकार गठनका लागि जम्कट्टेल नेतृत्वको सरकारबाट एमालेले अलग हुँदै समर्थन फिर्ता लिनु पर्ने हुन्छ । एमालेले नयाँ समीकरण अनुसार सरकार गठनमा पहल गर्न राजीनामाको तयारी गरेपनि मुख्यमन्त्री जम्कट्टेल काठमाडौं भएकाे बुझिएकाेले राजीनामा बुझाउन भने बाँकी रहेकाे एमाले बागमती प्रदेश संसदीय दलका नेता एवम् आर्थिक मामिला तथा योजना मन्त्री जगन्नाथ थपलियाले जानकारी दिए । उनले भने, ‘मुख्यमन्त्री हेटौंडा आएलगत्तै राजीनामा बुझाउँछौँ ।’
एमालेका मन्त्रीहरू ३ महिनामा बाहिरिदै
एमालेबाट वर्तमान सरकारमा सहभागी भएकाे ३ महिनामा सरकारबाट बाहिरिने भएकाे छ । २० फागुन २०८० मा केन्द्रमा नेकपा माओवादी र नेकपा एमालेसहितकाे सत्ता समीकरण भएपछि प्रदेशमा १७ चैत २०८० मा एमाले बागमती प्रदेश सरकारमा सहभागी भएको थियो । यसअघि बागमतीमा एमाले करिब १ वर्ष प्रतिपक्षमा रहेको थियाे । माओवादी केन्द्रकाे नेतृत्वमा एकीकृत समाजवादी, हाम्रो नेपाली पार्टीको साझेदारीसहितकाे सरकारमा एमाले सहभागी भएको थियो । एमालेबाट गत चैत १७ मा एक र चैत २० मा ५ जना मन्त्री सरकारमा सहभागी भएका थिए ।
जम्कट्टेल नेतृत्वको सरकारमा एमालेबाट चैत १७ मा आर्थिक मामिला तथा योजना मन्त्री जगन्नाथ थपलिया र चैत २० मा खानेपानी ऊर्जा तथा सिँचाइ मन्त्री एकालाल श्रेष्ठ, स्वास्थ्य मन्त्री रामेश्वर श्रेष्ठ, वन तथा वातावरण मन्त्री केशव प्रसाद पोखरेल र उद्योग वाणिज्य भूमि तथा प्रशासन मन्त्री प्रकाश श्रेष्ठ सहभागी भएका थिए ।
आन्तरिक भेटघाटमा व्यस्त मुख्यमन्त्री
यसैबिच सत्ता समीकरण फेरिने सहमति बनेलगत्तै काठमाडौँ पुगेका मुख्यमन्त्री जम्कट्टेल आन्तरिक भेटघाटमा व्यस्त छन् । पार्टीका शीर्ष नेतासहित अन्य दलका नेताहरूसँग उनले भेटघाट गरिरहेको मुख्यमन्त्रीको सचिवालयले जनाएको छ ।
सत्ता समीकरण र सरकारको भविष्यका विषयमा मुख्यमन्त्री जम्कट्टेलले संसदीय दलका सदस्य र पार्टी कमिटीसँग छलफल गरिरहेको सचिवालयका एक सदस्यले बताए । मुख्यमन्त्री जम्कट्टेलले नयाँ समीकरण अनुसार सरकार निर्माणको प्रक्रिया अघि बढाइएपछि केन्द्रको निर्देशन अनुसार अघि बढ्ने रणनीति तय गरेका छन् । केन्द्रमा प्रधानमन्त्रीले विश्वासको मत लिने गरी तयारी गरेकाेले उनले प्रदेशमा पनि संसदमा प्रक्रियाकाे फेस गर्ने तयारी रहेको बताइएकाे छ ।
जम्कट्टेलको प्रदेश सरकारकाे यात्रा
२५ पुस २०७९ मा एमाले, राप्रपा, माओवादी केन्द्र, एकीकृत समाजवादीको सत्ता समीकरणबाट मुख्यमन्त्री बनेका जम्कट्टेल समीकरण परिवर्तनसँगै ३ पटक सरकार जोगाउन सफल भए । पहिलो पटक ३ माघ २०७९ मा सो गठबन्धनबाट विश्वासको मत लिएर सरकारलाई निरन्तरता दिएका थिए जम्कट्टेलले । ३ माघ २०७९ मा कुल ११० सांसद मध्ये १०५ सांसदको समर्थन पाएका उनले राप्रपा र एमालेसँगको सहयात्रा टुङ्गिएपछि १० चैत २०७९ मा दोस्रो पटक विश्वासको मत लिँदा ६७ सांसदको समर्थन पाएका थिए । त्यसयता जम्कट्टेलकाे लोकप्रियता निरन्तर खस्कदै गएको देखिन्छ ।
२० फागुन २०८० मा पुनः सत्ता समीकरण परिवर्तन भएकाेमा २३ फागुनमा सरकारबाट कांग्रेस अलग भयो । त्यस लगत्तै बाध्यकारी परिस्थितिका बिच १९ चैत २०८० मा मुख्यमन्त्री जम्कट्टेलले पुनः विश्वासको मत लिएका थिए । उनले एमाले, माओवादी केन्द्र, एकीकृत समाजवादी र हाम्रो नेपाली पार्टीसहितको गरी ५६ मत प्राप्त गरे ।
सत्ता गठबन्धन परिवर्तनसँगै पटक पटक सङ्कटको सामना गरेका मुख्यमन्त्री जम्कट्टेल यसपटक भने निकै अप्ठ्यारोमा परेका छन् । गत सोमबार राति बनेको कांग्रेस र एमालेको गठबन्धनका कारण मुख्यमन्त्री पदबाट अलग हुनु पर्ने भएकाे हाे ।
प्रदेशसभामा अंकगणित
बागमती प्रदेश सभा ११० सदस्यीय रहेकाे छ । बागमती प्रदेश सभामा सात राजनीतिक दलको प्रतिनिधित्व रहेको छ । बागमतीमा सरकार गठनका लागि ५६ सांसदको समर्थन आवश्यक रहन्छ ।
प्रदेशमा सबैभन्दा ठुलो दल कांग्रेसका ३७ र एमालेका २७ सांसद छन् । यस्तै, माओवादी केन्द्रका २१, राप्रपाका १३, एकीकृत समाजवादीका ७, नेमकिपाका ३ र हाम्रो नेपाली पार्टीका २ जना सांसद छन् । कांग्रेस र एमालेसँग गरेर ६४ सांसद रहेकाे छ । यो सरकार बनाउन पुग्ने भन्दा ८ ले बढी हाे । यसमा अन्य दलसमेत सहभागी हुने केन्द्रीय सरकार गठन हुँदा समर्थन गर्ने दलहरुकाे आधारमा तय हुने छ ।
मकवानपुर । नेकपा एमाले मकवानपुरले जिल्ला कमिटीमा ५ जना मनोनित गरेको छ । गत जेठमा भएकाे १२ औं जिल्ला अधिवेशनबाट निर्वाचित जिल्ला कमिटीको बुधबार बसेको दोस्रो बैठकले उनीहरुलाई जिल्ला कमिटी सदस्य मनोनित गरेकाे हाे ।
जिल्ला कमिटीमा मनोनित हुनेहरुमा नरहरि महत, बुद्धिराम डिम्डुङ, रामचन्द्र स्याङ्बो, प्रेमबहादुर पुलामी र नमूना पाण्डे रहेका छन् । ५ जना सदस्य मनोनित गरेसँगै नेकपा एमालेको जिल्ला कमिटी १ सय ११ सदस्यीय बनेको छ । जिल्ला अधिवेशनले अध्यक्षमा श्रीधर पोखरेलसहित १०६ सदस्यीय जिल्ला कमिटी निर्वाचित गरेकाे थियो ।
नेकपा एमाले मकवानपुरको बुधबारकाे बैठकले मकवानपुरका पालिकाहरुकाे इन्चार्ज र सहइन्चार्ज तोकेको छ । एमालेको हेटौंडा उपमहानगरपालिका इन्चार्जमा अनिल कुमार पाण्डे जिम्मेवारी दिदा सहइन्चार्जमा रमिला सापकोटा, शिवहरि दाहाल, मिलन पाठक र प्रतिमा श्रेष्ठलाई ताेकिएकाे छ । यसैगरी थाहा नगरको इन्चार्जमा बिमल ढकाल, सहइन्चार्जमा हरि गोपाली र डम्बर लामालाई जिम्मेवारी दिइएको छ । मनहरी गाउँपालिकाको इन्चार्जमा हेमलाल उप्रेती, सहइन्चार्जमा मनिला विष्ट र वीरेन्द्र डीसीलाई ताेकिएकाे एमाले मकवानपुरले जनाएकाे छ ।
यस्तै बागमती गाउँपालिकाको इन्चार्जमा राजकुमार तिमल्सिना, सहइन्चार्जमा उत्तम पौडेल र जयबहादुर वाईबा, बकैया गाउँपालिकाको इन्चार्जमा नारायण तिमल्सिना, सहइन्चार्जमा बेलप्रसाद दाहाल र सरला बोलखेलाई जिम्मेवारी दिइएको छ । मकवानपुरगढी गाउँपालिकाको इन्चार्जमा विदुर हुमागाई, सहइन्चार्जमा मेम्बर लो र खिलप्रसाद चौलागाई, भीमफेदी गाउँपालिकाको इन्चार्जमा जहारसिं लामा, सहइन्चार्जमा प्रकाश पौडेल र चेतकुमारी पुडासैनीलाई ताेकिएकाे छ ।
ईन्द्रसरोवर गाउँपालिकाको इन्चार्जमा ऋषि पुडासैनी, सहइन्चार्जमा धनवीर स्याङ्तान, बुद्धिराम डिम्डुङ र राजन ठकुरीलाई जिम्मेवारी दिइएको छ । यस्तै कैलाश गाउँपालिकाको इन्चार्जमा बच्चुराम ढुंगाना र सहइन्चार्जमा छेकु लामा, राक्सिराङ गाउँपालिकाको इन्चार्जमा बाबुलाल स्याङ्तान, सहइन्चार्जमा सुन्तलीमाया चेपाङ र सिंहलाल प्रजालाई जिम्मेवारी दिइएको नेकपा एमाले मकवानपुरका अध्यक्ष श्रीधर पोखरेलले जानकारी दिए ।
यस्तै बैठकले पार्टीको २१ वटा विभागमा प्रमुख र उपप्रमुख तथा २२ वटा मोर्चा संगठनको इन्चार्ज र सह–इन्चार्ज तोकेको छ । पार्टीले मकवानपुर जिल्लाका १ सय २ वटै वडामा जिल्ला कमिटी सदस्यहरुलाई पार्टी परिचालनको जिम्मेवारी दिइएको पोखरेलले बताए । बैठकले वार्षिक कार्ययोजना समेत पारित गरेको छ । पार्टी केन्द्रीय कमिटीको १२ बुँदे निर्देशनमा आधारित रहेर जिल्लाका १० वटै पालिकालाई केन्द्रित गरी पार्टीको संगठन, विचार, जनसंगठन, समृद्धि, विकास र निर्माणको क्षेत्रलाई समेटेर वार्षिक कार्ययोजना बनाइएको पार्टी मकवानपुरले जनाएकाे छ । जिल्ला सचिवालय अर्को बैठकले गठन भएकाे छ ।
पार्टीको केन्द्रीय निर्देशनअनुसार जिल्लाको कुल मतदाताको ६ प्रतिशत पार्टी सदस्य बनाउनुपर्ने सचिव सिता विष्टले बताइन् । ‘मकवानपुरमा अहिले नेकपा एमालेमा ११ हजार मतदाता छन्’ उनले भनिन् ‘पार्टीको निर्देशनअनुसार करिब १८ हजार सदस्य बनाउनुपर्ने हुन्छ ।’ पार्टीको केन्द्रीय निर्देशनअनुसार जिल्लाको कुल मतदाताको ६ प्रतिशत पार्टी सदस्य बनाउन एक बर्षभित्र मकवानपुर जिल्लामा एमालेको सदस्य संख्या ७ हजार थप्नुपर्ने देखिन्छ ।
भरतपुर, चितवन । असार १५ अर्थात धान दिवस मनाउन प्रधानमन्त्री पुष्पकमल दाहाल प्रचण्ड चितवन आएका छन् । शुक्रबारनै प्रधानमन्त्री प्रचण्ड गृह जिल्ला चितवन आइपुगेका हुन ।
नेकपा माओवादी केन्द्रका अध्यक्ष समेत रहेकाे प्रधानमन्त्री प्रचण्डले हतारमा पार्टी र वामपन्थी एकता गर्ने पक्षमा नरहेको बताए । अध्यक्ष प्रचण्डले हतारमा पार्टी एकता गरेर दुर्घटना निम्त्याउन नचाहेको भन्दै सतर्क भएर मात्रै काम व्यवहारमा देखिने बताए । चितवनमा पत्रकारकाे प्रश्नमा उनले उक्त कुरा बताएका हुन् ।
‘हामीले अहिले हतारमा पार्टी र वाम एकता गरे दुर्घटना निम्त्याउन चाहन्नौं। किनकी विगतमा एकताको नाममा पुरानै दुर्घटना निम्त्याउन चाहन्नौं’ उनले भने ‘हामी सतर्क छौं, सतर्कका साथ अगाडि बढेका छौं। यदि भएमा तपाईहरूले काम देखिने गरी व्यवहारमा देख्नु हुनेछ।’ अहिले राजनीतिक स्थायित्व र लोकतन्त्रको सुदृढीकरणलाई जोड दिँदै उनले काम गर्दै जाँदा परिणामले नै देख्ने गरी वाम एकता हुने सक्ने भन्दै तत्काल पुरानै दुर्घटना तर्फ जान नचाहेको बताए ।
प्रधानमन्त्री प्रचण्डले गत वर्ष मलको अभाव नभएको बताउदै यस वर्ष पनि नहुने बताए । पत्रकारले सोधेको प्रश्नको जवाफमा प्रचण्डले भने,‘पोहोर साल मलको अभाव कहीँ पनि भएको होइन्। भएकोलाई त भएको भन्दिनुपर्यो नि, अहिले पनि मलको राम्रो तयारीमा छौँ, मलको अभाव हुन दिइदैन्।’
मकवानपुर । मकवानपुर जिल्लाका १० वटा राजनीतिक दल मदन भण्डारी स्वास्थ्य विज्ञान प्रतिष्ठानको वार्षिकोत्सव कार्यक्रममा सहभागी नहुने भएका छन् । प्रतिष्ठानले शुक्रबार हेटौंडामा चौथो वार्षिकोत्सव मनाउने तयारी गरिरहँदा जिल्लामा क्रियाशील राजनीतिक दलले विरोधस्वरुप कार्यक्रममा सहभागी नहुने निर्णय बिहीबार गरेका हुन् ।
नेपाली कांग्रेस पार्टी मकवानपुरकाे हेटौंडा–२ स्थित कार्यालयमा बिहीबार बसेको बैठकले २०८१ असार १४ गतेकाे मदन भण्डारी स्वास्थ्य विज्ञान प्रतिष्ठान हेटौंडाको चौथो वार्षिक उत्सव कार्यक्रममा मकवानपुर जिल्लाका १२ वटा राजनीतिक दलहरु सहभागी नहुने निर्णय संयुक्त विज्ञप्ती मार्फत गरेकाे हुन् ।
नेकपा एमालेका बाहेकका दलहरुले जिल्लामा रहेको संगठितरुपमा हेटौंडा प्रादेशिक अस्पताललाई मदन भण्डारी स्वास्थ्य विज्ञान प्रतिष्ठानमा संघीय कानून विपरित प्रदेश ऐन २०७६ जारी गरी गाभ्ने निर्णयको विरोधमा चरणबद्ध आन्दोलनका कार्यक्रमहरु घोषणा गर्दै आइरहेका छन् । संयुक्त बैठक चरणबद्ध आन्दोलनका कार्यक्रमहरु निरन्तररुपमा अगाडी बढिरहने जनाइएको छ । जिल्लामा रहेका दलहरुले हेटौंडा अस्पताललाई प्रतिष्ठानमा गाभिएको विषयमा लामो समयदेखि आन्दोलन गरिरहेको छ ।
वैठकमा नेपाली कांग्रेस मकवानपुर सभापति बुद्ध लामा, नेकपा माओवादी केन्द्र जिल्ला अध्यक्ष भीम पाख्रिन, राष्ट्रिय स्वतन्त्र पार्टीका किशोर अर्याल, नेकपा एकीकृत समाजवादीका विष्णुप्रसाद दाहाल, राप्रपा नेपालका गुरुप्रसाद सापकोटा, राप्रपाका अर्जुनप्रसाद गौतम, नेकपाका राम सि, जनता समाजवादीका दीपक सिन्तान, नेकपा मालेका हरि अधिकारी, क्रान्तिकारी कम्युनिष्ट पार्टीका सद्धाम हुसेनलगायत सहभागी थिए ।
‘जिल्लाका दलहरु चरणबद्धरुपमा आन्दोलित भएको अवस्थामा सम्बद्ध पक्षबाट बेवास्ता गर्दागर्दै पनि मदन भण्डारी स्वास्थ्य विज्ञान प्रतिष्ठानको छुट्टै अस्थित्व रहनेगरी समृद्धि र प्रगतिको शुभकामना दिन चाहान्छौं’ १० दलद्वारा जारी विज्ञप्तिमा भनिएकाे छ । दलहरुले बिहीबार साँझ हेटौंडामा पत्रकार सम्मेलन गर्दै हेटौंडा अस्पताललाई प्रतिष्ठानमा गाभ्ने त्रुटीपूर्ण ऐनका दफाहरु खारेज नगरेसम्म प्रतिष्ठानले आयोजना गर्ने कुनैपनि कार्यक्रममा सहभागी नहुने जनाएको छ ।
मदन भण्डारी स्वास्थ्य विज्ञान प्रतिष्ठानको वार्षिकोत्सव कार्यक्रम बागमती प्रदेशका मुख्यमन्त्री शालिकराम जम्मकट्टेलकाे प्रमुख आतिथ्यतामा शुक्रबार बिहान हेटौडामा हुने भएकाे छ ।
मकवानपुर । बागमती प्रदेश सभाकाे बैठक सरकार, सत्तापक्ष दल र प्रमुख प्रतिपक्ष दलबिच ५ बुँदे सहमति भए पछि संचालन भएकाे छ । प्रतिपक्ष दल नेपाली कांग्रेसले बजेटप्रति असन्तुष्टि जनाउँदै प्रदेशसभा बैठक अवरोध गरेकाे थियाे । शुक्रबारकाे पाँच बुँदे सहमतिसँगै बागमती प्रदेशसभाको अवरोध हटेको छ ।
प्रतिपक्ष दलले बजेटप्रति उठाएका असहमतिका सवालमा आर्थिक मामिला तथा योजना मन्त्रीले बजेट छलफलका लागि टेबल गर्नुअघि वक्तव्यमार्फत बजेटकाे विवरण सच्चाएर किताब प्रकाशन गरी ल्याएको जानकारी गराउने पहिलो सहमति भएकाे थियाे । त्यसैगरी प्राविधिक र कानूनी कार्यविधि मिलाई बजेट सन्तुलित बनाउने पनि सहमति भएको छ ।
त्यस्तै प्रतिपक्ष दलहरूको मागअनुसार कार्यक्रम विवरणमा समावेश भएका कार्यक्रम शीर्षकमा सिलिङभित्रको अपुग रकम थप गर्न सरकार पक्ष सहमति भएको छ । सहमति पत्रमा मुख्यमन्त्री शालिकराम जम्मकटटेल, आर्थिक मन्त्री जगन्नाथ थपलिया, सांसद कृष्ण खनाल तथा प्रतिपक्षका तर्फबाट बहादुरसिंह लामा र उद्धव थापाले हस्ताक्षर गरेका छन् ।
प्रदेश सरकारकाे तर्फबाट गत असार १ गते आर्थिक मामिला तथा योजना मन्त्री जगन्नाथ थपलियाले प्रदेश सभमा प्रस्तुत गरेकाे बजेटकाे विरोध गर्दै प्रतिपक्ष दल नेपाली कांग्रेस र राप्रपाले प्रदेश सभाकाे बिहीबारकाे बैठक अवरोध गरेकाे थियाे । तीन पक्षिय सममतिपछि प्रदेश सभाकाे बैठकमा बजेटमाथिकाे दफावार छलफल शुक्रबारकाे बैठकमा भइरहेकाे छ ।
सहमतीका बुँदाहरु
१) प्रतिपक्ष दलले उठान गरेको सवालमा आर्थिक मामिला तथा योजना मन्त्रीले बजेट छलफलको लागी टेबल गर्नु अघि बक्तब्य मार्फात पेनड्राइभमा भएको विवरण प्राविधिक त्रुटि भएको र सच्याई किताब प्रकाशन गरी ल्याएको जानकारी गराउने ।
२) प्राबिधिक, कानूनी, कार्यबिधि मिलाई बजेट सन्तुलित बनाउने बारे सहमती भयो ।
३) प्रतिपक्ष दलहरूले माग गरे बमोजिम कार्यक्रम बिवरणमा समावेश भएको कार्यक्रम शिर्षकमा शिलिङ भित्रको अपुग रकम थप गर्ने सहमति भयो । थप रकम रकमान्तर गरी सुनिश्चितको लागि आझै मन्त्री स्तरीय निर्णय गरी प्रतिपक्ष दलहरूलाई आश्वस्त पार्ने ।
४) विषयगत मन्त्रालयमा रहेको अवन्डामा रहेको रकम प्रतिपक्ष दलहरूले प्रास्तव गरे बमोजिमको प्रकृति मिल्ने खालको शिर्षकमा बजेट व्यवस्था गर्ने सहमत भयो । सुनिश्चितको लागि आझै मन्त्री स्तरीय निर्णय गरी प्रतिपक्ष दलहरूलाई आश्वस्त पार्ने ।
५) सहमती बमोजिम सदन सुचारू गर्ने ।