मकवानपुर । बागमती प्रदेश सरकारले प्रदेश सभाकाे हिउँदे अधिवेशन अन्त्यका लागि सिफारिस गर्ने निर्णय गरेको छ । बुधबार बिहान बसेको प्रदेश सरकारको मन्त्रिपरिषद् बैठकले प्रदेश सभाकाे हिउँदे अधिवेशन अन्त्य गर्न प्रदेश प्रमुख समक्ष सिफारिस गर्ने निर्णय गरेको हो ।
सरकारका प्रवक्ता एवम् आन्तरिक मामिला तथा कानून मन्त्री सुरजचन्द्र लामिछानेका अनुसार चैत २० गते राती १२ बजेबाट संसद्को अधिवेशन अन्त्य गर्नेगरी प्रदेश प्रमुख समक्ष सिफारिस गर्ने निर्णय गरेकाे हाे । नेपालको संविधानको धारा १८३ को उपधारा २ बमोजिम प्रदेश सभाकाे चालु हिउँदे अधिवेशन अन्त्यका लागि सिफारिस गरिएको हाे । प्रदेशसभाको बैठक चल्न सक्ने अवस्था नरहेकाले अधिवेशन अन्त्यको निर्णयमा सरकार पुगेको उनले जानकारी दिए ।
संसद् बैठक सञ्चालनका लागि मंगलबार बसेको सर्वदलीय बैठकले निष्कर्ष दिन नसकेपछि संसद प्रभावित भएको थियो । प्रदेश सभाकाे हिउँदे अधिवेशन गत १८ माघमा आव्हान गरिएकाे थियाे । २६ माघमा बसेर अनिश्चित कालकाे लागि स्थगित भएकाे बैठक २ महिना पछि मंगलबारकाे लागि आव्हान गरिएकाे भए पनि दलहरु बीच सहमति जुट्न नसक्दा संचालन हुन सकेन । आज बुधबार दिउँसो १ बजेकाे लागि बैठक बाेलाइएकाे भए पनि आजकाे बैठक समेत प्रभावित हुन सक्ने एक नेताले बताए ।
मकवानपुर । नेकपा एमालेका केन्द्रीय सदस्य एवम् मकवानपुर इन्चार्ज रामेश्वर रानाले राजतन्त्रको समयमा जनतालाई रैती बनाएको भन्दै जनतालाई रैती बनाउने सामन्ती इतिहास अब मुलुकमा फेरि फर्कन सम्भव नभएको बताएका छन् ।
लोकतान्त्रिक गणतन्त्रको संरक्षण र संवर्द्धनका लागि एमाले मकवानपुरले हेटौंडामा जागरणसभामा उनले यस्तो बताएका हुन् । जनताकाे बलिदानकाे रगतसँग साटेर संघीय लोकतान्त्रिक गणतन्त्र स्थापना भएको रानाले बताए । नेपाललाई समृद्ध नेपाल र सुखी नेपाली बनाउने अभियानमा संविधानको रक्षा र संघीय लोकतान्त्रिक गणतन्त्रको जगेर्नाको निम्ति एकजुट भएर अगाडि बढ्नका निम्ति उनले सबैलाई आग्रह समेत गरे।
‘लोकतन्त्रले हाम्रो सार्वभौमिक हक अधिकारलाई सुरक्षित गरेको छ। हामीले सामन्ती पुस्ताको अन्त्य गरेर जनताको सार्वभौम अधिकार जनताको पक्षमा ल्याएका छौं’ उनले भने, ‘आज जनता सार्वभौम भईरहेको अवस्थामा फेरि पनि नागरिकमाथि षड्यन्त्र गरिरहेको छ। त्यसैले म सबैलाई खबरदारीका निम्ति एकजुट भएर अगाडि बढ्न आग्रह गर्दछु।’
यसैगरी बागमती प्रदेशका पूर्वमुख्यमन्त्री डोरमणि पौडेलले ४६ सालको आन्दोलनदेखि ६२/६३ को आन्दोलनमा पुग्दा विपक्षीहरुलाई परास्त गरेको बताए। उनले मसानमा पुर्याईसकेको लास उठेर टाउको ठड्याउँदै गरेको भन्दै खबरदारी गरे। हजारौँ जनताको योगदान र शहीदहरुको बलिदानबाट प्राप्त गरेको लोकतान्त्रिक गणतन्त्र समाप्त गरेर फेरि निरकुंश राजतन्त्र ल्याउने सपना नदेख्न उनले चेतावनी दिए। पौडेलले संविधानले राजा नचिन्ने भन्दै राजा यो मुलुकमा नभएको बताउँदै तत्कालीन राजा ज्ञानेन्द्र अब राजा नरहेको बताए।
‘लोकतान्त्रिक गणतन्त्रमा नेपालमा सामाजिक र आर्थिक परिवर्तन भएको छ, गणतन्त्रकाे विकल्प राजतन्त्र कुनै हालतमा हुदैन्’ उनले भने । नेकपा एमालेका अध्यक्ष केपी शर्मा ओलीको शरणमा परेर दुई हात खुट्टा टेक्दै चार पाउ टेकेर सूर्य चिह्नबाट निर्वाचनमा उठ्दा समेत पराजित भएको भोलिपल्टै कमल थापाले राजतन्त्रको वकालत गर्न थालेको आरोप उनले लगाए।
नेकपा एमाले जिल्ला अध्यक्ष श्रीधर पोखरेलले गणतन्त्रको संरक्षण र सम्वर्द्धन तथा राष्ट्रिय स्वाधीनताको संरक्षणका लागि एमाले मकवानपुरले जागरणसभा आयोजना गरेको बताए। जागरणसभा प्रतिगामी षड्यन्त्रकाविरुद्ध, पुनरुत्थानवादी र अराजक तत्वहरुलाई सन्देशको रुपमा रहने उनले बताए। पोखरेलले देशबाट घुँडा टेकाएको राजतन्त्र अब आवश्यक नभएको भन्दै अराजक गतिविधि गरे एमाले जुनसुकै मूल्य चुकाउन पनि तयार रहेको बताए।
एमालेले सोमवार जिल्लाका १० वटै पालिकाबाट नेता, कार्यकर्ता हेटौंडामा उतार्दै लोकतान्त्रिक गणतन्त्रको संरक्षण र संवर्द्धनका लागि हेटौंडामा जागरण सभा गरेको हो। हेटौंडाका मुख्य सडकहरु सानो पोखरा चोक, फरेष्ट्री चोक, राप्ती रोड र चौकीटोलको चारवटा नाकाहरुबाट जम्मा भएको नेता तथा कार्यकर्ताकोहरुको र्याली सीमाचोकमा पुगेर सभामा परिणत भएको थियो।
सभामा नेकपा एमालेका केन्द्रीय सदस्य भारती पाठक, प्रदेश कमिटी सदस्य एवं प्रदेशसभा सदस्य एकलाल श्रेष्ठलगायत नेता कार्यकर्ताको उपस्थिति रहेको थियो।
मकवानपुर । बागमती प्रदेश सरकारले २०८२ सालमा थप ४ दिन सार्वजनिक बिदा दिने निर्णय गरेकाे छ । सोमबारकाे प्रदेश मन्त्रिपरिषद् बैठकले थप ४ दिन बिदा दिने निर्णय गरेकाे हाे ।
विगतमा प्रदेश सरकारले दिँदै आएको सार्वजनिक बिदालाई क्यालेण्डरमा नै जनाउने गरी ४ दिनको बिदा थप गर्ने निर्णय गरिएको छ’प्रदेश सरकारका प्रवक्ता एवम् आन्तरिक मामिला तथा कानून मन्त्री सुरज लामिछानेले भने ‘उक्त निर्णयसँगै विगतमा पर्व र दिवस विशेषमा बिदा दिन मन्त्रिपरिषद बैठक बस्नुपर्ने अवस्था रहने छैन।’
नेपाल सरकारले निर्णय गरेका बाहेक प्रदेश सरकारले प्रदेश कामकाजी भाषा ऐन कार्यान्वयन भएको दिन बैशाख २४ गते, गाइजात्राको दिन साउन २५ गते, चेपाङ समुदायको न्वागी भदौ २२ गते र माझी समुदायको लदी पर्व फागुन १९ गतेका दिन बिदा दिने निर्णय गरेकाे उनले जानकारी दिए । सरकारले मन्त्रिपरिषदले गरेको उक्त निर्णय प्रदेश राजपत्रमा प्रकाशित भएपछि कार्यान्वयनमा आउने छ ।
यसैगरी सोमबारकाे मन्त्रिपरिषद् बैठकले बागमती प्रदेश सरकारले संघीय सरकारबिरुद्ध मुद्दा दायर गर्ने निर्णय गरेकाे छ । संविधानकाे प्रदत्त एकल अधिकारको यातायातसम्बन्धी व्यवस्थाका विषयमा संघीय सरकारविरुद्ध संविधानको धारा २३७ को उपधारा २ (क) बमोजिम संवैधानिक इजलाशमा मुद्दा दायर गर्ने निर्णय गरेको सरकारका प्रवक्ता लामिछानेले जानकारी दिए ।
प्रदेशको एकल अधिकारको सूचिका रहेको ट्याक्सी व्यवस्थापन तथा मापदण्डबारे सम्बन्धी मुद्दामा अदालतले मापदण्ड बनाउने आदेश भएकाेमा संघीय सरकारले तयारी गरेकाले सो विरुद्धमा सर्वोच्चको संवैधानिक इजलाशमा मुद्दा दायर गर्ने निर्णय गरिएकाे उनले बताए ।
यसअघी संघीय सरकारविरुद्ध प्रदेश सरकार शहरी क्षेत्र सार्वजनिक यातायात (व्यवस्थापन) प्राधिकरण ऐन, २०७९ को विरुद्धमा सर्वोच्च अदालत पुगेको थियो । उक्त मुद्दा सर्वोच्चको संवैधानिक इजलाशमा विचाराधीन छ ।
मकवानपुर । बागमती प्रदेशसभा अन्तरगतकाे उद्योग, पर्यटन तथा वातावरण समितिले उद्योग तथा वाणिज्य कार्यलयकाे नाम परिवर्तन गर्न सिफारिस गरेको छ । समितिकाे आइतबारकाे बैठकले उद्योग तथा वाणिज्य कार्यलयको नाम परिवर्तन गर्दै “घरेलु उद्योग तथा वाणिज्य कार्यलय” राख्न सिफारिस गरेको छ।
समितिले प्रदेश औद्योगिक व्यवसाय ऐन २०७६ अनुसार उक्त नाम परिवर्तन गर्न सिफारिस गरेकाे समिति सदस्य भारती पाठकले जनाकारी दिइन् । पाठकका अनुसार उद्यमीहरूलाई उत्पादन र बजारीकरणमा सहजता दिन, साना र मझौला उद्योगलाई वृहत्तर बनाउँदै रोजगार सृजनामा योगदान पुर्याउनका लागि घरेलु उद्योग तथा वाणिज्य कार्यलय’को नाम सिफारिस गरिएको हो।
‘मन्त्रालयको विभाजनपछि उद्योग व्यवसायीलाई विभिन्न चुनौतीहरूको सामना गर्नुपरेको छ’ उनले भनिन् ‘प्रदेशभित्रको शक्ति र स्रोतहरूको उचित परिचालन गर्दै समृद्ध बागमती प्रदेश निर्माणमा सहजीकरण गर्नका लागि नाम परिवर्तनकाे सिफारिस गरेका छौं ।’ उद्योग दर्ता र बन्द प्रक्रियामा सरलता ल्याउन कानूनी दृष्टिकोणबाट पनि नाममा सुधार आवश्यक रहेकाे उनले बताइन् ।
मकवानपुर । नेकपा एमाले मकवानपुरले १८ चैत सोमबार हेटौंडामा बृहत जागरणसभा आयोजना गर्ने भएकाे छ । लोकतान्त्रिक गणतन्त्रको संरक्षण र सम्वर्द्धनका लागि एमाले मकवानपुरले जागरणसभा आयोजना गर्न लागेको हाे ।
जिल्लाका १० वटै पालिकाबाट नेता, कार्यकर्ता हेटौंडामा उतार्दै गणतन्त्रको पक्षमा जागरण गराउने योजनामा एमाले रहेको छ । जागरणसभा हेटौंडाको बुद्धचोकमा हुने बताइएकाे छ । गणतन्त्रको संरक्षण र सम्बर्द्धन तथा राष्ट्रिय स्वाधिनताको संरक्षणका लागि एमाले मकवानपुरले जागरणसभा गर्न लागेको एमाले मकवानपुर अध्यक्ष श्रीधर पोख्रेलले बताए । जागरणसभा प्रतिगामी षड्यन्त्रकाविरुद्ध, पुनरुत्थानवादी र अराजक तत्वहरुलाई सन्देशको रुपमा रहने उनले जानकारी दिए ।
‘जागरणसभाको तयारी तीव्र रुपमा भइरहेको छ’ अध्यक्ष पोख्रेलले भने ‘जागरणसभा अगाडि हेटौंडाको चार स्थानबाट र्याली निकालिने छ ।’ आगामी सोमबार बिहान १० बजे पूर्वमा सानोपोखरा, पश्चिममा हेटौंडा हस्पिटल, उत्तरमा चौकीटोल ओरालो र दक्षिणमा फरेष्ट्रीबाट र्याली निस्किने उनले बताए ।
मनहरीबाट हेटौंडासम्म मोटरसाइकल र्याली
१८ चैतमा नेकपा एमाले मकवानपुरले हेटौंडामा गर्न लागेको जागरणसभाकाे लागि जिल्लाकाे पश्चिम क्षेत्र मनहरीबाट हेटौंडासम्म मोटरसाइकल र्याली गरिने भएको छ । नेकपा एमाले मनहरी गाउँ कमिटीले व्यवस्थापन गर्न लागेको मोटरसाइकल र्याली हेटौंडाको बुद्धचोक पुगी जागरण सभामा सामेल हुनेछ ।
२ सय भन्दा बढीको सहभागितामा मोटरसाइकल र्याली आयोजना गर्न लागिएको एमाले मनहरी गाउँ कमिटी अध्यक्ष नवीन सुवेदीले जानकारी दिए । ‘मनहरी गाउँपालिकासहित राक्सिराङ, कैलाश गाउँपालिका र हेटौंडा उपमहानगरपालिकाको ३ र १९ नम्बर वडाबाट समेत मोटरसाइकल र्यालीमा युवाहरु थपिँदै जाने गरी व्यवस्था मिलाइएको छ’ अध्यक्ष सुवेदीले भने । उनका अनुसार उक्त पालिका तथा वडाहरुका नेताहरुसँग पनि एमाले मनहरी गाउँ कमिटीले समन्वय गरिरहेको छ ।
मोटरसाइकल र्यालीमा सहभागी नहुने अन्य नेता कार्यकर्ताहरु बस, ट्रक, बोलेरो भ्यान, निजी गाडीहरु प्रयोग गरेर सभामा सहभागी हुनेछन् । मोटरसाइकल र्यालीलाई व्यवस्थित, अनुशासित र संयम बनाएर सहज रुपमा जागरणसभा परिसरमा पुर्याउनका लागि तयारी भइरहेको गाउँ कमिटी उपसचिव अमृत बर्ताैला जानकारी दिए ।