नुवाकोटको निर्वाचन क्षेत्र नं २ मा नेपाली कांग्रेसका उम्मेदवार अजुर्ननरसिंह केसी निर्वाचित भएका छन् । २०७४ को निर्वाचनमा एमालेका उम्मेदवार नारायणप्रसाद खतिवडासँग दश हजार मतान्तरले पराजित भएका केसी यो पटक तेस्राे स्थानमा रहेका खतिवडाभन्दा १२ हजार पाँच सय ६४ मतान्तरले निर्वाचित भएका हुन् ।
सत्तारुढ पाँच दलीय लोकतान्त्रिक–वाम गठबन्धनको साझा उम्मेदवारको रुपमा रहेका कांग्रेसका उम्मेदवार केसीले २८ हजार १ सय सात मत ल्याएर विजयी भएका हुन् । निकटतम प्रतिस्पर्धी राष्ट्रिय स्वतन्त्र पार्टीका सुमनविक्रम पाण्डेले १६ हजार ४ सय ७७ र नेकपा (एमाले)का उम्मेदवार खतिवडाले १५ हजार पाँच सय ६१ मत ल्याए ।
मङ्सिर ४ मा भएको निर्वाचनमा कूल ७७ हजार चार मत खसेकाे थियाे । शनिबार बिहान सकिएकाे मतगणनाको अन्तिम नतिजाअनुसार राष्ट्रिय प्रजातन्त्र पार्टीका उम्मेदवार झनक प्याकुरेलले १ हजार ५ सय ७१ मत ल्याए । चुनावी प्रतिस्पर्धामा तीन स्वतन्त्रसहित ११ मध्ये अन्य उम्मेदवारको मत एक हजारभन्दा कम रहेको मुख्य निर्वाचन अधिकृतकाे कार्यालयले जनाएकाे छ ।
मकवानपुर । मकवानपुरमा प्रतिनिधिसभा समानुपातिकतर्फको मतगणनामा नेकपा एमालेले बढी मत प्राप्त गरेकाे छ । जिल्लामा २ वटै प्रतिनिधि सभा क्षेत्रमा एमालेले समानुपातिक मत बढी प्राप्त गरेकाे हाे ।
गणना भएको १ लाख ७७ हजार ८५८ मतमा नेकपा एमाले पहिलो दल बनेको हाे । एमालेले क्षेत्र नं.१ बाट २२ हजार ६११ र २ बाट २८ हजार १९६ गरी कुल ५० हजार ८०७ मत प्राप्त गरेको छ ।
नेपाली कांग्रेस ३६ हजार २६४ मत सहित दोस्रो दल बनेको छ । काँग्रेसले क्षेत्र नं. १ बाट १४ हजार ७५३ र क्षेत्र नं. २ बाट २१ हजार ५११ मत प्राप्त गरेकाे हाे । रबि लामिछाने नेतृत्व राष्ट्रिय स्वतन्त्र पार्टी(रास्वपा) २९ हजार ८८९ मत सहित तेस्रो भएको छ । उसले क्षेत्र १ बाट १८ हजार ६०७ मत प्राप्त गरेकाे छ भने क्षेत्र २ बाट ११ हजार २८२ मत प्राप्त गरेकाे छ ।
त्यस्तै नेकपा माओवादी केन्द्रले क्षेत्र १ बाट १३ हजार १३८ र क्षेत्र २ बाट १२ हजार ९९५ मत गरी २६ हजार १३३ मत सहित चौथो बन्दा राष्ट्रिय प्रजातन्त्र पार्टी १६ हजार ७७१ मत सहित पाँचौ स्थानमा रहेको छ । उसले क्षेत्र १ बाट १३ हजार ७४२ मत र क्षेत्र २ बाट ३ हजार २९ मत प्राप्त गरेकाे हाे । माधव कुमार नेपाल नेतृत्वको नेकपा एकिकृत समाजवादीले क्षेत्र १ बाट १ हजार २४७ र क्षेत्र २ बाट २ हजार ५८० सहित ३ हजार ८२७ मत मात्रै प्राप्त गरेको छ ।
१ लाख ७७ हजार ८५८ मतमध्ये १ लाख ७० हजार १६६ सदर हुँदा ७ हजार ६९९ मत बदर भएको मुख्य निर्वाचन अधिकृत कार्यालयले जनाएको छ । प्रत्यक्षतर्फ दुई प्रतिनिधिसभा रहेको जिल्लामा एमाले र राप्रपाले एक/एक स्थानमा जितेको छ । प्रदेशसभामा माओवादी केन्द्रले दुई स्थानमा बाजी मार्दा एमाले र कांग्रेस एक–एक स्थानमा जितेको छ ।
प्रदेश सभा तर्फकाे सममानुपातिक मत गणना भइरहेकाे छ । शनिबार आज साझसम्म प्रदेश सभानुपातिककाे समेत मत नतिजा सार्वजनिक भइसक्ने बताइएकाे छ ।
मकवानपुर । गत बैशाख ३० मा सम्पन्न स्थानीय तह सदस्य निर्वाचनकाे मतका आधारमा पहिलो भएको मकवानपुर काँग्रेस आम निर्वाचनसम्म आईपुग्दा उस्ले प्राप्त गरेकाे मत संख्याकाे आधारमा चौथो भएको छ ।
६ महिनाको अन्तरालमा मकवानपुर कांग्रेस कसरी यतिधेरै खुम्चियो ? यसमा कारण दुई कारण छन्, पहिलो मकवानपुर कांग्रेस पार्टी भित्र नै रहेको अन्तरद्वन्द्व, दोस्रो गठबन्धनभित्रको असन्तुष्टि । गत स्थानीय तहको निर्वाचनमा जस्तै गत मंसिर ४ मा भएको आम निर्वाचन २०७९ मा बाम लोकतान्त्रिक गठबन्धन थियो तर, उबेला पहिलो शक्ति बनेको कांग्रेस अहिले चौथो बन्यो ।
नेपाली कांग्रेस मकवानपुरको राजनीतिमा आम निर्वाचनले उथलपुथल ल्याईदियो । पार्टीलाई अन्तरघात गर्नेहरूलाई कुनै पनि हालमा ‘नछोड्न’ कार्यकर्ताहरू दबाब दिइरहेका छन् । गत बैशाखमा सम्पन्न स्थानीय तहको निर्वाचनमा सबैभन्दा धेरै जनप्रतिनिधि जितेर पहिलो स्थानमा पुगेको कांग्रेस ६ महिनाको अन्तरालमा एक मात्र सिट जितेर चौथो स्थानमा पुगेको हो । मकवानपुरमा रहेको १० स्थानीय तहमध्ये ५ वटा स्थानीय तहमा अध्यक्ष, जितेर जिल्लामा प्रथम भएको मकवानपुर कांग्रेस प्रतिनिधि तथा प्रदेशसभा निर्वाचनसम्म आईपुग्दा चौथो बरियतामा पुगेपछि यतिबेला नेतृत्वलाई कार्यकर्ताले धोका दिनेलाई कारवाही गर्न दबाब दिइरहेका छन् ।
आम निर्वाचनमा नेकपा एमाले एक प्रतिनिधिसभा तथा एक प्रदेशसभा सहित प्रथम स्थानमा रहँदा नेकपा माओवादी केन्द्र दुईवटा प्रदेशसभा सहित दोस्रो, राष्ट्रिय प्रजातन्त्र पार्टी (राप्रपा) एक प्रतिनिधिसभा सहित तेस्रो हुँदा नेपाली कांग्रेस एउटा प्रदेशसभामा मात्र खुम्चियो ।
गठवन्धनबाट नेपाली कांग्रेसले एक प्रतिनिधिसभा सहित दुईवटा प्रदेशसभामा उम्मेदवारी दिएको थियो । तर कांग्रेसबाट प्रतिनिधिसभा क्षेत्र नंबर १ की उम्मेदवार महालक्ष्मी उपाध्यय डिना र १ को ‘१’ बाट प्रदेशसभा सदस्यको उम्मदवार बनेका आनन्दराम पराजुली पराजित बने । कांग्रेसको तर्फबाट क्षेत्र नंबर २ को ‘२’बाट इन्द्रबहादुर बानीयाँमात्र विजयी बने ।
एमालेबाट प्रतिनिधिसभा क्षेत्र नंबर २ मा महेश बर्तौला विजयी बन्दा क्षेत्र नंबर १ को ‘१’मा एकालाल श्रेष्ठ विजयी बने । माओवादी केन्द्रबाट मकवानपुरको क्षेत्र नंबर १ को ‘१’ र २ को ‘१’ मा क्रमशः प्रेमबहादुर पुलामी तथा कुमारी मोक्तान विजयी बने ।
गठबन्धनको बलमा गत स्थानीय तहको निर्वाचनमा पहिलो भएको मकवानपुर कांग्रेसले हार्नुको कारण खोजि गर्ने बताएको छ । नेपाली कांग्रेसकी सह–महामन्त्री महालक्ष्मी उपाध्यय ‘डिना’ गठवन्धनको पक्षमा जनलहर रहेको अवस्थामा पनि अप्रत्यासित हार भएको भन्दै हारको बारे समिक्षा गरिने डिना बताउँछिन् । चुनावी नतिजा सार्वजनिक भए लगत्तै मकवानपुर कांग्रेसले हार्ने समूह र जित्ने समूहले छुट्टाछुट्टै पत्रकार सम्मेलन गरे । यसले पनि मकवानपुर कांग्रेस भित्रको अन्तरद्वन्द्व छर्लङ्ग पारेको छ । अहिले कांग्रेसको एउटा पक्ष हारको समिक्षा गरिरहेको छ भने, अर्को पक्ष जितको उल्लास मनाइरहेको छ ।
नेता मिनेन्द्र रिजाल प्यानल निकट डिना र पराजुलीलाई हराउन कांग्रेसकै अर्को धारको कार्यकर्ता परिचालन गरिएको आरोप लगाईएको छ । जसमा कांग्रेस जिल्ला सभापति बुद्ध लामाको समेत नाम मुछिएको छ । जिल्ला सभापति लामा, प्रदेश सभा सदस्यमा नवनिर्वाचित इन्द्रबहादुर बानियाँ, शेरबहादुर देउबा प्यानलका हुन् । कांग्रेस बागमती प्रदेश सभापति समेत रहेका बानियाँले चुनावअघि गठबन्धनको समर्थन गर्ने निर्देशन गर्दै यो चुनावमा धोका दिनेलाई कुनैपनी हालतमा ‘नछाड्ने’ बताउंदै आएका थिए । तर जब आफूलाई जनमत प्राप्त भयो,र आफ्नो पार्टीको अर्को समूह पराजित भयो,अहिले उनको बक्तब्य फेरिएको छ ।
जितपछी आयोजित पत्रकार सम्मेलनमा नेपाली कांग्रेसका बागमती प्रदेश सभापति तथा मकवानपुर क्षेत्र नंबर २ को प्रदेशसभा ‘२’ का नवनिर्वाचित प्रदेशसभा सदस्य इन्द्रबहादुर बानीयाँले कांग्रेसले मकवानपुरको प्रतिनिधिसभा तथा प्रदेशसभा गुमाउनुको कारण गएको स्थानीय तहमा राप्रपाका दिपक बहादुर सिंहलाई दिईएको अनावश्यक राजनीतिक ‘स्पेस’ रेहेको बताए ।
बानीयाँले हिजो (स्थानीय तह निर्वाचनमा) कांग्रेस, माओवादी सहितका पार्टीका नेताहरुले सिंहलाई हेटौँडामा स्थान दिएको र सोहि स्थानको जगमा रहेर सिंहले अहिले जित हाँसिल गरेको बताए । “चुनावमा पराजय भोगेपछि आरोप प्रत्यारोपमा लाग्नु भन्दा आफूले गरेको कमजोरी सम्झेर ‘मम’ भन्दै बस्नुपर्छ” उनले भने । “चुनाव जितेपछि आफ्नो मेहनतको कारण भन्ने अनि हारेपछि अरुलाई आरोप प्रत्यारोप लगाईने काम गलत हो” बानियाँले भने “मकवानपुरमा गठवन्धनको मत सुरक्षित छ ।”
यता हार्ने समूहले हेटौंडामा छुट्टै पत्रकार सम्मेलन गरेर हारको समिक्षा गर्ने बताएको छ । पत्रकार सम्मेलनमा कांग्रेस सहमहामन्त्री समेत रहेकी डिनाले पार्टी भित्र भएका आन्तरिक त्रुटी र असन्तुष्टिको कारण हार भएको बताइन् । “कारबाहीको लागि कार्यकर्ताको दबाब स्वाभाविक हो, हामी समिक्षा गर्छौ र प्रमाण भेटिएपछि बोल्छौ” उनले भनिन् । यो तरिकाले कांग्रेस नरहने उनले प्रतिक्रिया दिइन ।
मकवानपुर–१ मा गठवन्धनको मतान्तर प्रतिस्पर्धीहरुको भन्दा १० औँ हजार बढि रहेको अवस्थामा हार बेहोरेपछि पत्रकार सम्मेलनको आयोजना गरि डिनाले हारको गम्भिर समिक्षा गरिने बताईन् । पार्टीको हारबारे समिक्षा सहित प्रमाण फेला परेको अवस्थामा कारबाही पनि गरिने उनले बताईन् ।
प्रदेशमा पहिलो हुंदा पनि कांग्रेसलाई तनाव
यता आम निर्वाचन २०७९ को हालसम्म सार्वजनिक अन्तिम नतिजामा नेपाली कांग्रेस बागमती प्रदेशमा पहिलो स्थानमा छ। सत्ता गठबन्धनमा कांग्रेस पहिलो स्थान हुंदा,अन्य दल भने पछि परेका छ । यो नतिजाले गठबन्धनमा सहभागी दलहरू कांग्रेसको भूमिकाप्रती असन्तुष्ट बनेका छन् । कांग्रेसमाथी गठबन्धनका दलहरूले शंका गर्न थालेका छन् । यसले हालको सत्ता गठबन्धनलाई धक्का दिनसक्ने विश्लेषण गर्न थालिएको छ ।
बागमती प्रद्रेशमा हालसम्मको नतिजा अनुसार कांग्रेस २३ सिट सहित पहिलो स्थानमा छ । माओवादी केन्द्र १३ सिट सहित दोस्रो र नेकपा एमाले १० सिट सहित तेस्रोमा छ भने गठबन्धनको साझेदार अर्को पार्टी एकीकृत समाजवादी ४ सिट सिट सहित पांचौ स्थानमा छ । ५ सिट सहित चौथो स्थानमा रहेको राष्ट्रिय प्रजातन्त्र पार्टीलाई कांग्रेसको समर्थन रहेको आशंका गरिएको छ ।
मकवानपुर । नेपाली काँग्रेस सहमहामन्त्री महालक्ष्मी उपाध्याय डिनाले मतदाताकाे मन जितेर पनि मतले हारेकाे बताएकी छिन् । चुनावी परिणाम पछि हेटौडामा पत्रकार सम्मेलन गरेर मकवानपुर क्षेत्र नम्बर १ बाट प्रतिनिधिसभा सदस्य पदमा पराजित डीनाले निर्वाचनमा मतले हारेकाे भए पनि जनताको साथमै रहने बताएकी छिन् ।
शुक्रबार हेटौंडामा गरिएकाे पत्रकार सम्मेलन उनले प्राविधिक त्रुटिका कारण चुनाव हार्नुपरेको समेत बताइन् । डिनाले प्राविधिक त्रुटिका कारण निर्वाचनमा हार व्यहोर्नु परेकाे बताएकी हुन् । उनले प्राविधिक त्रुटिहरुको बारेमा समिक्षा गरिने बताइन् । चुनावमा सहभागी हुँदा जीत सुनिश्चित भएकै अवस्थामा होमिएको र केही त्रुटिका कारण चुनावमा पराजित हुन बाध्य भएको बताएकी हुन् ।
मतदाताहरुको उत्साह र मायालाई निर्वाचन पराजित भएपनि निराशामा परिणत हुन नदिने डिनाको भनाई थियो । घरदैलोमा जाँदा मतदाताहरुले भनेको कुराहरु र जनताहरुको आशा र भरोसा पराजित हुँदा पनि कानमा गुञ्जिरहेका स्मरण गर्दै उनले मतदाताको आवाजलाई गठबन्धनको सरकारमा पार्टीको तर्फबाट पुर्याउने प्रतिबद्धता जनाइन् । आम मतदाताले उत्साहका रुपमा मतदान गरेकोमा उनले धन्यवाद व्यक्त गरिन् ।
हरेक पार्टीमा घात–अन्तरघात र सन्तुष्ट–असन्तुष्ट भइरहने बताउँदै उनले यस बारेमा पनि समिक्षा गर्ने डिनाले बताइन् । चुनावी अभियानका क्रममा मतदाताहरुले भनेका कुरा, मतदाताहरुको सपना र जिल्लाको विकासका लागि निरन्तर लागिपर्ने उनले प्रतिबद्धता जनाइन् ।
गठबन्धनकै तर्फबाट प्रदेश सभा सदस्यको उम्मेदवार बनेर पराजित भएका कांग्रेसका नेता आनन्दराम पराजुलीले जनताको मतको सदैव सम्मान गर्ने बताए । ‘निर्वाचित हुने सबैजनालाई बधाई छ,’ उनेल भने, ‘प्राविधिक कारण हामीले हार व्यहोरेका छौं ।’ हारेपनि हामी आम मतदाताबाट कहिल्यै टाढा हुनेछैनौं’, उनले भने, ‘मतदातालाई धन्यवाद व्यक्त गर्न सबैको घरदैलोमा आउनेछौं ।’ माननीय भएर कलम चलाउन नपाएपनि सेवा गर्ने हातहरु नरोकिने पराजुलीको भनाई थियो ।
‘होला जनप्रतिनिधि हुँदा धेरै काम गर्न सकिन्थ्यो होला । जनप्रतिनिधि नहुँदा पनि सकेको काम गर्नेछौं । तपाईको मतको कहिल्यै अपमान गर्ने छैनौं । तपाईको शिर झुक्ने काम कहिल्यै गर्नेछैनौं’, उनले भने । जनताको मतको सदैव सम्मान गर्ने पराजुलीले बताए ।
मकवानपुर । मकवानपुर जिल्लाम प्रतिनिधि सभा तर्फ क्षेत्र न १ मा राष्ट्रिय प्रजातन्त्र पार्टीले लामो समयपछि जनमत पाएको छ ।
राप्रपाका दिपक बहादुर सिंह विजयीले मकवानपुरमा खाता खोलेका छन् । राप्रपाको केन्दीय सदस्य रहेका सिंहले २७ हजार ८१६ मत प्राप्त गरी विजयी भएका हुन् । सिंहलेले सत्ता गठबन्धनका महालक्ष्मी उपाध्याय डिना र राप्रपा नेपालका अध्यक्ष समेत रहेका एमालेका उम्मेदवार कमल थापालाइ पराजित गरेका हुन् । नेपाली कांग्रेसका उपाध्यायले २५ हजार ४३४ मत प्राप्त गरे भने थापाले २५ हजार ४२० मत प्राप्त गरे ।
को हो दीपकबहादुर सिंह
गत चैतमा सम्पन्न स्थानीय तहको निर्वाचनमा निकै चर्चामा रहेका दीपक बहादुर सिंहले हेटौंडा उपमहानगरपालिकाको मेयरमा अन्तिम समयमा हारको सामना गरे । उपमहानगरको मेयरमा हारको सामना गरेपछि निरन्तर ग्रामिण भेगमा जनमतको लागि गृहकार्यमा जुटेका सिंह यसपटक प्रतिनिधि सभाको लागि विजयी भएका छन् ।
बहुदल स्थापनापछि राजनीतिबाट छायाँमा परेको लामो समयपछि राप्रपालाई मकवानपुरमा ब्युताउँने योद्धा बनेर आएका छन् सिंह ।
२४ वर्षको उमेरदेखि नेपाल राष्ट्रिय युवा संघको केन्द्रीय अध्यक्षबाट राजनीतिक यात्रा सुरु गरेका सिंहले २०५६ र ०६४ सालको निर्वाचनमा उठेर पनि पराजय भोगेका थिए ।
बुबा मोहनबहादुर सिंह र आमा नन्दादेवी सिंहको कोखबाट विंस २०१५ सालमा धनकुटामा जन्मिएका उनी ८ वर्षको हुँदा आमाबाबुका साथ हेटौंडा आएका थिए । त्यसयता सिंह परिवारको स्थायी बसोबास हेटौंडा बन्यो ।
माध्यमिक शिक्षा भुटनदेवी विद्यालयबाट लिएका सिंहले विरगञ्जको ठाकुरराम क्याम्पसबाट स्नातक गरेका हुन् । दीपकका बुवा मोहनबहादुर सरकारी कर्मचारी रहेका कारण राजनीतिक यात्रामा थिएनन् । तर दीपकको राजनीतिक यात्रा २४ वर्षको उमेरदेखि नै सुरु भयो ।
२४ वर्षको उमेरमा नेपाल राष्ट्रिय युवा संघका केन्द्रीय अध्यक्षबाट सुरुवात भएको उनको राजनीतिक यात्रा अनवरत चलिरहेको छ । यस क्रममा विभिन्न संघसंस्थामा आबद्ध उनी सुरुवात देखि नै राप्रपामा आबद्ध छन् । उनी हेटौंडाका सफल उद्योगी व्यवसायी समेत हुन् ।
बहुदलपछि कम्युनिस्टहरूको प्रभाव बढ्दै जाँदा राप्रपाको संसदीय निर्वाचनमा लगातार पराजित हुँदै आएको थियो । दीपकबहादुर सिंहले राप्रपालाई २८ वर्ष अर्थात् २०५१ सालपछि जित दिलाएका छन् ।
सिंहले दुई संसदीय निर्वाचन र दुई मेयर निर्वाचन लडेर पराजित भएपछिन हार मानेर पछि हटेनन् र पाँचौँ पटकको प्रयासमा सफल भएका छन् ।
यसअघि २०५१ सालमा राप्रपाबाट कमल थापा विजयी भएका थिए । त्यसयता विजयको स्वाद चाख्न पाएको थिएन राप्रपाले । त्यसयता राप्रपाबाट प्रत्यक्ष निर्वाचन जित्न नसकेका उनै थापालाई आज त्रिपक्षीय प्रतिस्पर्धामा तेस्रो स्थानमा पुर्याएर सिंह विजयी बनेका छन् ।
देशभर वैकल्पिक शक्तिका खोजिरहेको बेला उदाएको स्वतन्त्र र राप्रपाको रोजाइमा परेका हुन् उनी । यसअघिको निर्वाचनहरुमा उनी २०५६ मा विरोध खतिवडासँग प्रतिष्पर्धामा थिए । गत स्थानीय तह निर्वाचनमा मेयर पदमा अप्रत्याशित मत ल्याएका थिए । हेटौँडामा राप्रपाको संस्थागत मत करिब ६ हजार रहेको अवस्थामा उनले लोकप्रिय मत २० हजार कटाए । यसपटक त्यसमा पनि थप्न सफल भए ।
उनको प्रतिस्पर्धा पनि जिल्लामा यसअघि पटक–पटक निर्वाचन हारेकाहरूबीच थियो । डिनाले हालसम्म प्रत्यक्ष निर्वाचन जितेकी छैनन् । उनी दुई पटक समानुपातिक कोटाबाट संसद पुगेकी हुन् । थापाले मकवानपुरमा पटकपटक नेकपा एमालेका उम्मेदवारसँग पराजय भोग्दै आएका थिए । एमालेका कृष्णप्रसाद दाहालसँग मात्रै उनी तीन पटक पराजित भएका हुन् ।
सिंह २०५४ सालमै मेयर उठेका थिए । त्यतिबेला पनि उनी बागमती प्रदेशका पूर्वमुख्यमन्त्रीसमेत रहेका डोरमणि पौडेलसँग १ हजार २ सय मतले हार व्यहोरेका थिए । कम्युनिस्टको गढ मानिने मकवानपुरमा राजनीतिक सफलता हासिल गर्न उनलाई मुस्किल भोग्दै आएका थिए