मकवानपुर । बागमती प्रदेश प्रमुख दीपक प्रसाद देवकोटाले बालबालिका राष्ट्रका उज्ज्वल भविष्य भएको बताउनु भएको छ । आइतबार ६१ औँ राष्ट्रिय बाल दिवसको अवसरमा शुभकामना सन्देश मार्फत प्रदेश प्रमुख देवकोटाले यस्तो बताउनु भएको हो ।
“उनीहरूको सुरक्षित र समृद्ध भविष्य सुनिश्चित गर्नु हामी सबैको साझा जिम्मेवारी हो” उहाँले सन्देशमा भन्नुभएको छ । यस वर्षको “बालबालिकामा लगानी: सुनिश्चित भविष्यको थालनी” भन्ने नाराको साथ आज आइतबार दिवस मनाइदै छ । स्वस्थ र गुणस्तरीय शिक्षा, पोषण र सुरक्षित वातावरणमा गरिने लगानीले मात्र बालबालिकाहरूको चौतर्फी विकास हुने उनीहरू जिम्मेवार तथा सक्षम नागरिक बन्न सक्ने उहाँले सन्देशमा उल्लेख गर्नुभएको छ ।

नेपालको संविधानले बालबालिकाका हक र अधिकारलाई सुनिश्चित गरेको छ। हरेक बालबालिकाले बालमैत्री समाजमा निर्धक्क भएर हाँस्न, खेल्न र आफ्नो सपना पूरा गर्न पाउनु उनीहरूको नैसर्गिक अधिकार हो, यो पूरा गर्न जिम्मेवार बनिदिनु हामी सबैको कर्तव्य पनि हो । बालबालिकामाथि हुने जुनसुकै प्रकारको हिंसा, शोषण, दुर्व्यवहार र बालश्रमको अन्त्य गर्न सबैको हातेमालो आवश्यक भएको उहाँले उल्लेख गर्नु भएको छ ।
“विशेष दिनमा हामी सबैले हरेक बालबालिकाको मुस्कानको संरक्षण गर्ने र उनीहरूको उज्ज्वल भविष्यका लागि सँगै काम गर्ने प्रण गरौं” उहाँले भन्नुभएको छ ।
मकवानपुर । मकवानपुर प्रहरीद्वारा जेन–जी आन्दोलनको समयमा चोरी र लुटपाट गर्नेहरुको फोटो र भिडियो पठाउन अनुरोध गरेको छ ।
जिल्ला प्रहरी कार्यालय मकवानपुरले राष्ट्रव्यापी आन्दोलनका क्रममा हेटौंडा तथा जिल्लाका अन्य स्थानहरूमा भएका चोरी, लुटपाट तथा डकैती गरिएका सामान फिर्ता गराउन सर्वसाधारणसँग सहयोगकाे आग्रह गरेकाे हाे । यसैगरी उक्त घटनामा संलग्न व्यक्तिहरूको पहिचान भए प्रहरीलाई सम्पर्क गर्न समेत भनिएकाे छ ।
मकवानपुर प्रहरीका अनुसार जेन-जी आन्दोलनको क्रममा जिल्ला प्रहरी कार्यालय, मातहतका प्रहरी चौकी, स्टेशन तथा विभिन्न सरकारी कार्यालय, प्रतिष्ठान, व्यापारीक भवन, भाटभटेनी र व्यक्तिगत घर तथा पसलबाट विभिन्न नगद तथा जिन्सी वस्तु, प्रहरी पोशाक, सवारी साधन तथा अन्य सरकारी र निजी सम्पत्ति हराएको वा चोरी गरी लगिएकाे सूचना प्राप्त भएकोले तत्काल फिर्ता गर्नका लागि अनुरोध गरिएको जिल्ला प्रहरी कार्यालय मकवापुरका प्रहरी नायब उपरिक्षक श्यामु अर्यालले बताए ।
चोरी गरिएका सामग्री जिल्ला प्रहरी कार्यालय मकवानपुर, मातहतका कार्यालय वा सम्वन्धित सरकार कार्यालय वा व्यक्तिलाई तुरुन्त फिर्ता गर्न प्रहरीकाे अनुरोध गरेकाे छ । प्रहरीका अनुसार फिर्ता नगर्ने व्यक्तिहरूविरुद्ध प्रचलित कानून अनुसार कारवाही प्रक्रिया अगाडी बढाइने छ । साथै, चोरी तथा लुटपाटको प्रमाण फोटो र भिडियोको लिङ्क राख्ने जो कोहीले ती प्रमाणहरू dpomakwanpurcdr@gmail.com मा पठाउन अनुरोध गरिएको छ ।
प्रहरीले फोटो र भिडियो पठाउने व्यक्तिहरूको नाम, ठेगाना र अन्य व्यक्तिगत विवरण गोप्य राखिने र ती सूचनाहरू मात्र अनुसन्धानमा उपयोग गरिने जानकारी दिएको छ। प्रहरीकाे सूचनामा शान्ति, सुरक्षा र अन्याय विरुद्धको कानुनी प्रक्रियालाई अघि बढाउन जनताको सहयोग अनिवार्य रहेको भनिएको छ।
मकवानपुर । मकवानपुरबाट १६६ जना कैदीबन्दी नियन्त्रणमा लिइएको छ । देशका विभिन्न कारागार तथा बाल सुधारगृहबाट भागेकाहरु मध्ये नेपाल प्रहरी, नेपाली सेना र सशस्त्र प्रहरी बलको संयुक्त प्रयासमा उनीहरूलाई मकवानपुरको विभिन्न स्थानबाट नियत्रणमा लिइएकाे हाे ।
भिमफेदी कारागारबाट भागेका ४४० कैदीबन्दी मध्ये ७८ जनालाई पक्राउ गरिएको जिल्ला प्रहरी कार्यालय मकवानपुरले जनाएकाे छ । प्रहरीका अनुसार भिमफेदी कारागारका ३६२ जना कैदीबन्दी अझै फरार रहेका छन् । भिमफेदी कारागारमा एक नाबालकसहित कुल १ हजार ६६ जना कैदीबन्दी रहेको जिल्ला प्रहरी कार्यालय मकवानपुरका प्रवक्ता श्यामु अर्यालले जनाकारी दिए ।
प्रवक्ता एवम् प्रहरी नायव उपरीक्षक अर्यालका अनुसार मकवानपुरस्थित बाल सुधार गृहबाट भागेका ७२ जना मध्ये ४१ जनालाई नियन्त्रणमा लिइएको छ भने ३१ जनाको खोजी कार्य जारी छ । उक्त बाल सुधार गृहमा कुल ९४ जना रहेका थिए । काठमाडौं उपत्यकाका विभिन्न कारागारबाट भागेका कैदी बन्दीहरुलाई पनि मकवानपुरबाट प्रहरीले पक्राउ गरेको छ । नख्खु कारागारबाट भागेका मध्ये ७ जना र जगन्नाथदेवलस्थित केन्द्रीय कारागारबाट भागेका २ जनालाई नियन्त्रणमा लिइएको छ ।
कास्की कारागारबाट भागेका १ जना र तनहुँ जिल्ला कारागारबाट भागेका २ जनालाई नियन्त्रणमा लिइएको सुरक्षा निकायले जनाएको छ । प्रहरीले नियन्त्रणमा लिइएका ३५ जना कैदीबन्दी कुन कारागारबाट भागेका हुन् भन्ने खुल्न बाँकी रहेको प्रवक्ता अर्यालले बताए । उनीहरूको पहिचान गर्ने कार्य भइरहेको छ ।
मकवानपुर । चेपाङ समुदायले आज न्वांगी (छोनाम) पर्व मनाउँदैछन् । सो समुदायले न्वांगी पर्व हरेक वर्ष भदौ २२ गते सामूहिक रूपमा मनाउँदै आएका छन् ।
न्वांगी पर्व सामूहिक रूपमा भेला भएर विभिन्न सांस्कृतिक कार्यक्रम गरी मनाउँदै आएका छन् । चेपाङ बाहुल्यता रहेको चितवन, मकवानपुर, धादिङ र गोरखामा हरेक वर्ष पालैपालो गरी भदौ २२ गते राष्ट्रिय पर्व न्वांगीलाई उत्सवका रूपमा मनाउने गरिएको छ । उक्त उत्सवमा सहभागी हुन नपाउनेले आआफ्नो घर र टोलटोलमा मनाउने गर्छन् ।
भदौ २२ गते सामूहिक रूपमा न्वांगी मनाउँदै आए पनि आफ्नो कूलअनुसार चेपाङ समुदायले भदौ महिनाभरि नै न्वांगी मनाउने परम्परा रहेको छ । यस वर्ष चितवनको इच्छाकामना गाउँपालिका–६ कालिखोलामा देशभरका चेपाङ एकै ठाउँमा भेला भएर न्वांगी मनाउन लागिएको छ । ‘हामीले भदौ २२ गते न्वांगीलाई राष्ट्रिय रूपमा सामूहिक मनाउँदै आएका छौं’ संविधान सभा सदस्य एवम् नेपाल चेपाङ संघ केन्द्रीय अध्यक्ष गोविन्दराम चेपाङले भने ‘ चेपाङ जातिका ६४ वटा थर हुने भएकाेले कूलअनुसार भदौको पूर्णिमादेखि भदौ महिनाभरि नै मनाउने गरिन्छ ।’
चेपाङ समुदायमा पितृलाई नचढाई र पूजा नगरी नयाँ फलफूल र अन्नपात खान हुँदैन भन्ने धार्मिक मान्यता छ । न्वांगी पर्वका दिन घैया धानको चामल, काउनो, पिँडालुलगायत अन्न र फलफूल भूमि र पितृलाई चढाउने गरिन्छ । यो पर्व चेपाङले नयाँ अन्न खाने दिन पनि हाे । न्वागी मनाउने क्रम घट्दै गएकाले यसलाई नयाँ पुस्तामाझ जोगाइराख्न प्रत्येक वर्ष यो पर्व बेग्ला-बेग्लै ठाउँमा मनाउने गरिएको छ । नयाँ उब्जिएको अन्नबाली मकै, केरा, पिँडालु, निबुवा, घैया धानलगायत प्रकृतिलाई चढाउने गरिन्छ ।
चेपाङ समुदायको यस प्रमुख पर्व न्वागीमा घरमा भित्र्याएको नयाँ अन्नबाली प्रकृतिलाई चढाएपछि मात्र खाने गरिन्छ । न्वागीपछि अनिकाल सकेर सहकाल आएको मानिन्छ । नयाँ अन्न र फलफूल पितृलाई नचढाई खाएमा देउता अनिकाल लाग्ने तथा रोगब्याध लाग्ने चेपाङ समुदायको धार्मिक विश्वास रहेको छ । न्वांगीमा चेपाङ झाँक्री (पान्दे)ले ढ्याङ्ग्रो ठोक्दै कुखुराको बलि चढाउँछन् । यस दिन चेपाङ समुदायले कुनै काम नगरी रमाइलो गर्छन् । नाता कुटुम्बलाई पनि निम्तो गरेर सामूहिक भोज खाने, नाचगान गर्ने र सुखदुःख साट्ने गर्छन् ।
चेपाङहरूले न्वागी पर्वलाई पान्देई घ्यासा पनि भन्छन् । भेला भएर उनीहरूले ढ्याङ्ग्रो बजाउने, टीका लगाएर आपसमा आशीर्वाद समेत थाप्ने गर्छन् । चेपाङहरू मुख्यगरी प्रकृति धर्म मान्ने गर्छन् । उनीहरू जङ्गलका गिठा-भ्याकुर खाएर जीवन धान्ने भएकाले वनजङ्गलसँग मिठो सम्बन्ध गाँसिएको हुन्छ ।न्वांगी चेपाङ जातिको जीवनशैली र संस्कृतिसँग जोडिएको पर्व हो ।
चेपाङ समुदायका मानिसहरूको २६ जिल्लामा बसोबास रहेको पाइन्छ । राष्ट्रिय जनगणना २०७८ का अनुसार नेपालमा चेपाङको सङ्ख्या ८४ हजार ३६४ जना छन् । चेपाङ समुदाय सबैभन्दा बढी चितवनमा रहेका छन् । जहाँ चेपाङको सङ्ख्या ३५ हजार ६३७ छ । यसैगरी मकवानपुरमा २३ हजार ६५०, धादिङमा १७ हजार १६० र गोरखामा ४ हजा २६८ जना रहेको जनगणना २०७८ को तथ्याङ्कले देखाएको छ ।
न्वांगीका अवसरमा बागमती प्रदेश सरकारले २०७९ सालदेखि चितवन, मकवानपुर र धादिङ गरी तीन जिल्लामा भदौ २२ गते सार्वजनिक बिदा दिँदै आाएको छ । यस वर्ष प्रदेश राजपत्रमै सूचना प्रकाशित गरी बिदा दिएकाे छ । यस अघीका वर्षमा प्रदेश मन्त्रिपरिषद्काे निर्णयबाट बिदा दिइएकाे थियाे । मकवानपुरकाे राक्सिराङ गाउँपालिकाले न्वांगीकाे अवसरमा भदौकाे २१,२२ र २३ गते गाउँपालिका भर बिदा दिएकाे छ । यस्तै गोरखाको गण्डकी गाउँपालिकाले पनि सार्वजनिक बिदा दिँदै आएको छ ।
चेपाङ समुदायले राष्ट्रिय पर्वका रूपमा आफ्नो घरघर र टोलमा मनाउँदै आएको न्वांगी पर्वलाई नेपाल चेपाङ संघ अगुवाइमा २०६८ साल भदौ २२ गते सामूहिक रूपमा मनाउँदै आएका छन् ।
मकवानपुर । मकवानपुरकाे हेटौंडा उपमहानगरपालिकामा चट्याङ लागेर १ जनाकाे मृत्यु भएकाे छ । शुक्रबार राती हेटौंडा –१५ कमेरोपानीमा चट्याङ लागेर हेटौंडा–१६ सानो आकाशधाराका ३७ वर्षीय बुद्ध बहादुर प्रजाकाे मृत्युकाे मकवानपुर प्रहरीले जनाएकाे छ ।
मकवानपुर जिल्ला प्रहरी कार्यालयका प्रवक्ता श्यामु अर्यालका अनुसार चट्याङ लागेर हाल बारा निजगढ नगरपालिका–१३, बस्ने प्रजाको घटनास्थलमा नै मृत्यु भएको हो । स्थानीय धनबहादुर स्याङतानले सञ्चालन गरेको किराना पसलमा दैनिक उपभोगका सामान खरिद गर्न गएका बेला चट्याङ लागेर उनकाे मृत्यु भएको हो । प्रहरीका अनुसार शव परीक्षणका लागि हेटौंडा अस्पताल ल्याइएकाे छ ।