सूर्य आकाशका जस्तै अर्का भानु तिमी धरा
नेपाली दिलमा चुम्दै दौडिएका गरा गरा
नभमा झुल्किदै हाँस्दै उषा किरणका छरी
धरा भानु!तिमी सारा अन्धकार सबै हरी ।
तेस्रो भानु गरा जोड्ने एकीकरण तीरमा
अक्सिजन तिमी हाम्रो भाषासूत्र समीरमा!
तोतेमा छौ तिमी भाका थोतेमा लय तानका
गीत सङ्गीतका केन्द्री नेपाली शान मानका ।
अन्यायीमा तिमी राम न्यायीमा छौ विभीषण
व्यङ्ग्यनायक हे,स्रष्टा!श्रध्दाभाव छ अर्पण!
देशमा,भेषमा,भाषा, संस्कृतिमा रमाउँछ
भाषा,भेष,कला भित्रै सौन्दर्य मुस्कुराउँछ ।
शिष्टताका लिई शब्द मित्रमा भई भिन्नका
छिन्नभिन्न भए जम्मै तिमी एक अभिन्नका
व्यङ्ग्यका वाँणले हान्दा उडुस उपियाँनिर
पुगी बेजोडले ठोक्दा झुके अन्यायका शिर।
जनजीवनका भाषा एकीकरणका छत
अजरामर छौ साँच्चै नहुने दाग लत्पत
समद्रष्टा छ यो चन्द्र रातमा हुन्छ शीतल
नेपाली समका द्रष्टा भानु!झल्मल झल्मल।
धनकुटा
छन्द अनुष्टुप
निर्माण व्यवसायीले डिभिजन सडकमा लगाए ताला
Tags: No Comments
मकवानपुर । निर्माण व्यवसायी संघ मकवानपुरले सडक डिभिजन कार्यालय हेटौंडामा ताला लगाएका छन् । निर्माण व्यवसायी सरकारको विकास निर्माणको काम गरेबापतको भुक्तानी नपाएपछि आन्दोलित हुदै डिभिजन सडकमा ताला लगाएका हुन् ।
विभिन्न क्षेत्रमा निर्माणको कार्य सम्पन्न हुँदा समेत भुक्तानी नपाएकाे विराेधमा निर्माण व्यवसायीले भुक्तानी निकासा माग गर्दै डिभिजन सडक कार्यालय हेटौंडामा शुक्रबार तालाबन्दी गरी धर्ना दिएका छन् । निर्माण व्यवसायी संघ मकवानपुरले डिभिजन सडकमार्फत भएका कामको भुक्तानीको निकासाका लागि माग गर्दै धर्ना र तालाबन्दी गरिएको हो ।
कार्यालयकाे मुख्यद्वारमा संघ मकवानपुर अध्यक्ष बालगोपाल कँडेललगायतका निर्माण व्यवसायीले तालाबन्दी गरी विरोध जनाएका थिए । संघले सडक र पुल निर्माण गरिएको २५ करोड भन्दा बढी रकम भुक्तानी नपाएको जनाएको छ । गत फागुनदेखि नै निर्माणको कामको बिलसहित भुक्तानी माग गर्दासमेत भुक्तानी पाएका छैनन् । सडक डिभिजन कार्यालय, हेटौंडा मातहतका मकवानपुर, बारा र पर्सा जिल्लामा भएका कामको भुक्तानी नपाएपछि तीन जिल्लाका निर्माण व्यवसायी संयुक्त रूपमा धर्नामा बसेका थिए ।
निर्माण व्यवसायीले लगाएको ताला प्रहरीले खोलेको थियो । सडक डिभिजन कार्यालय, हेटौंडाका प्रतिनिधि र धर्नामा बसेका निर्माण व्यवसायी संघ मकवानपुरका पदाधिकारीबिच छलफल भएको थियो । छलफलमा निर्माण व्यवसायीले तत्काल भुक्तानीको व्यवस्था गर्न माग गरेपछि सडक डिभिजनका कर्मचारीले भुक्तानीका लागि पहल गर्ने प्रतिबद्धता जनाएका थिए ।
संघ मकवानपुरका अध्यक्ष कँडेलले व्यवसायीले काम सम्पन्न गरेर भुक्तानी माग गरेकाे लामाे समय हुँदा समेत भुक्तानी नपाएपछि धर्ना र तालाबन्दी गरिएको जानकारी दिए । निर्माण व्यवसायीको माग तत्काल सम्बोधन नभएमा थप आन्दोलनका कार्यक्रम गर्न संघ बाध्य हुने समेत उनले बताए । ‘कार्यालयमा ताला लगाउनु रहर हाेइन बाध्यता हाे’ कँडेलले भने आफ्नाे सम्पत्ति वैंकमा राखेर लगानि गरि निर्माण गरेका काम सम्पन्न भईसकेपछि पनि भुक्तानी नहुँदा यस्ताे कदम चाल्न बाध्य भएका हाैं ।’ ‘निर्माण व्यवसायीलाई राज्यले पिडामा पारेकाे छ हाम्राे माग तत्काल सम्बाेधन नभए शसक्त रुपमा सडकमै आन्दाेलनमा उत्रने छौं’ उनले भने ।
संघका अनुसार डिभिजन सडकलगायतका कार्यालय र स्थानीय तहका ५० करोड रुपियाँभन्दा बढी रकम निर्माण व्यवसायीले भुक्तानी पाउन बाँकी रहेको छ । काम गरेको बिलसहित भुक्तानीलाई अनुरोध गर्दा समेत विभिन्न बहानामा भुक्तानी नपाएको संघले जनाएकाे छ ।
संघले डिभिजन सडक मार्फत निर्माण व्यवसायीले करिब १७ करोड रुपियाँ निर्माणको कामबापत भुक्तानी पाउन बाँकी रहेको भन्दै तत्काल भुक्तानीको व्यवस्था मिलाउन माग गरेको छ । स्थानिय तहहरुबाट १५ कराेड भुक्तानी हुन बाँकी रहेकाे छ भने पुल निर्माणकाे १२ कराेड, सडक निर्माणकाे १५ कराेडसम्म भुक्तानी रहेकाे संघले जनाएकाे छ । जिल्लाभर करिव ५० कराेड रकम भुक्तानी बाँकी रहेकाे बताइएकाे छ ।
चितवन । अविरल वर्षाको कारण पहिरो जादा नारायणगढ–मुग्लिङ सडकखण्डमा दुई वटा बस त्रिशुली नदीमा खसेको छ ।
नारायणगढ–मुग्लिङ सडकको सिमलतालमा लेदोसहितको पहिरोले बगाउँदा दुईवटा बस त्रिशूली नदीमा बेपत्ता भएका हुन । ती बसमा चालकसहित ६५ यात्रु रहेका बताइएको छ ।
चितवनका प्रमुख जिल्ला अधिकारी इन्द्रदेव यादवका अनुसार आज बिहान ३:३० बजे दुई बस त्रिशूलीमा खसेका हुन् । काठमाडौँबाट रौतहटको गौर जाँदै गरेको गणपति डिलक्स र वीरगञ्जबाट काठमाडौँ जाँदै गरेको एञ्जल बस त्रिशूलीमा खसेको यादवले जानकारी दिए ।
उनका अनुसार गौर जाँदै गरेको बसमा ४१ र काठमाडौँ जाँदै गरेको बसमा २४ जना रहेका प्रारम्भिक जानकारी दिए। उनले भने, ‘हामी घटनास्थलमा छौँ । पानी परिरहेकाले छ । उद्धारको काम थालिएको छ । पहिरो पन्छाउन सुरु गरिएको छ ।’
बसमा रहेका यात्रुको यकिन विवरण भने प्राप्त भइ नसकेको बताइएको छ ।
- पुष्प अधिकारी अन्जलि
जीवनको सहज बाटो त जसले पनि हिँडछन् तर गजलकार हरि चालिसे एबिसीले गजलको एउटा अप्ठ्यारो बाटो हिँडदैछन्। गजलको राजमार्गलाई अनन्तसम्म पुर्याउन चाहन्छन् यही अप्ठ्यारो बाटो हिँडेर। समयका थुप्रै थुप्रै भिन्नभिन्न बादबिबादहरुलाई छिचोलेर एउटा सग्लो र उज्यालो जीवनको गन्तव्य खोज्दै छन् गजलको राजमार्ग बनाएर।
साठीको दशकमा चितवनमा सँगै यात्रा गरेर हिँडेका यी युवा साहित्यिक पत्रकारका रुपमा पनि सुपरिचित छन् । उनका कलमबाट जन्मिएका थुप्रै भोगाईहरु अनुभूतिहरूको एउटा लामो जुलुस छ । जसलाई हरेक राजमार्गले छोएर गएका छन्। करिब डेढ दशक लामो अवधि नेपाली गजलको संघर्षमा नेपाली गजलको क्षेत्रमा बिताएका एक जुझारु संघर्षशील गजलकार हरि चालिसे यतिखेर नेपाली गजलको क्षेत्रमा एउटा साधकका रुपमा स्थापित भैसकेका छन्। उनीसँगको धैर्यता र संयमता ले नै आज एउटा असल गजलकारको परिचय दिएको छ ।
उनी चितवनमा रहँदा गजलको क्षेत्रलाई फराकिलो बनाउन गजल सन्ध्या चितवनको अध्यक्ष भएर यो पँक्तिकारसँगै सहयात्रा गर्दै गजलमा थुप्रै ऐतिहासिक संगोष्ठी काव्य परिक्रमा र थुप्रै गजल श्रृंखलाहरु गरिसकेका छन्। यतिखेर उनको नवीनतम गजलकृति “ज्यूने रहर” बजारमा आइसकेको छ। नेपाली गजलको विकास र संरक्षणमा निरन्तर समर्पित रहिरहने यो क्रियाशीलतालाई मैले नजिकबाट नियालेको छु।
उनको गजलमा नविन चेतना र क्षमता प्रचुर मात्रामा छ। गजलमा आफ्नो सिंगो जीवन व्यतित गरी रहने संघर्षशिल स्रष्टा हरि चालिसे एबिसी निकै शसक्त गजल हस्ताक्षर हुन। उनको प्रकाशित गजल संग्रह ज्यूने रहरमा एक सय एक गजलहरू समाविष्ट छन्। सबै गजलहरु उत्तिकै प्रभावशाली छन्। देश समाज र जीवनलाई नजिकबाट नियाल्न सक्ने काव्यिक क्षमता भएका जुझारु युवा गजलकार आफ्ना गजल शेरहरुमा सामाजिक विषयवस्तुहरूलाई महत्वपूर्ण रुपमा उठान गरिरहेका छन्। उनले आफ्ना गजलमा मनोवैज्ञानिक ढङ्गले विचारहरु प्रस्तुत गरेका छन् र उनका गजलहरूमा राजनीतिक सामाजिक आर्थिक लैङ्गिक समानताको आग्रह र हार्दिकताको नवीकरण गरिएको छ।
समयको एउटा सुकिलो बिहान बोकेर झोलाभरि शब्दका बीऊहरू राखेर प्रत्येक गाँऊ बस्तीहरूमा काव्यिक चेतनाको टुकी बालेर निरन्तर हिडिरहेका स्रष्टा हुन् यी गजलकार। यतिखेर यिनको प्रभावशाली गजल सङूग्रह “ज्यूने रहर” मेरो हातमा छ । उनका गजल सङ्ग्रहमा समसामायिक आवाजहरूसंगै जीवनका सुक्ष्म सुक्ष्म बिषयबस्तुहरूलाई उठान गरिएको छ । करिव दुई दशक अगाडि शब्दयात्राको जुलुशमा भेटिएका यी प्रभावशाली गजलकार धेरै समय चितवन बसेर निरन्तर गजल साधना र सङ्घर्षमा बिताएका छन्।
गजलकारले जीवन बांच्ने र अरूलाई सहज जीवन दिने क्रममा लामो समय चितवनमा बसेरपनि आफ्नो नेपाली गजल र शब्द साहित्यका निम्ति निरन्तर आगो जस्ता सिर्जनाहरू लेखिरहे ।एउटा कुशल लेखक शालीन गजलकार हुन हरि चालिसे एबिसी। कति धैर्यता कति प्रतिबद्धता कति सङघर्ष कति साधना चाहिन्छ भन्ने कुरा गजलकार हरि चालिसेलाई अनुभूत छ। नेपाली गजलमा उनले धेरै सिके र धेरैलाई सिकाएका छन। नेपाली गजल र गजलको लय संरचना शब्द संयोजनमा निकै अब्बल देखिएका छन ।
उनका हरेक गजलका शेरहरू अर्थपूर्ण र सामाजिक रूपान्तरणको यथार्थ चित्रण छ। चितवनको लामो बसाईमा उनले सिर्जना गरेको गजलहरू कतिपय देश माटो र बा आमा अनि आफ्नी पत्निको सम्झनामा लेखेका छन।समसामायिक स्वर राजनैतिक अस्थिरता सामाजिक सांस्कृतिक र मानवीय संवेदनाका बिषयमा उठाइएको छ प्रायः गजलहरू । उनि एऊटा सचेत गजलकार हुन।
गजलकारले आफ्ना नाङगा पैतालाहरूमा देश खोजिरहेका छन। कयौं जिन्दगीका सुदूर सपनाहरू खोजिरहेका छन् । मैले उनका थुप्रै गजलहरू पढेको छु र उनको जिन्दगी पढेको छु। उनी धेरै लेख्दैनन् तर जति लेख्छन अत्यन्त गहन र भावपूर्ण र मान्छेका थुप्रै निर्जीव सपनाहरू लेख्छन् ।बिचारको पहाड अग्लो बनाएर लेख्छन्। युद्धबाट थाकेको देश, निर्दोष मान्छेहरूको रगतले पोतिएको माटो, आमाको स्नेहले निथ्रुक्कै भिजेको ममताको आंचलमा लागेको कालो दाग कहांनिर दुखेको छैन मन ? यस्तै यथार्थ चित्रण छ गजल सङ्ग्रहभित्र । गजलकारले देश छातीभित्र राखेर मानवीय संवेदना खोजिरहेको असङ्ख्य दस्तावेजहरू छन्।
उनको गजलमा गजलको शिल्प शैली र संरचनागत हिसावले मजवुत छन ।उनले कतिपय आफ्ना प्रायः गजलहरूमा प्रेमील रङहरु भरेका छन् । नयाँ घामको आगमन खोजिरहेका छन्। बाटो बिराएकाहरूलाई गजल मार्फत बाटो देखाएका छन्। यस्तै जीवनका थुप्रै आयामहरू निर्माण गरेका छन। “ज्यूने रहर” गजल कृति सबैको निम्ति एउटा दस्तावेज बनेको छ।
उनले कयौं मनहरूलाई गजल सिकाए र बने आफू गजलको अभियन्ता साधुवाद छ एबिसीलाई। यतिखेर उनी गल्कोट बाग्लुङ काँडेबासमा एउटा उच्च माध्यमिक विद्यालयको प्राचार्य भएर शैक्षिक सफलता खोजिरहेका छन्। भर्खरमात्रै उनले गल्कोट बहुमुखी क्याम्पसमा एउटा भव्य सभ्य साहित्यिक कार्यक्रम सम्पन्न गरेका छन्। अन्तमा उनको यो लामो गजलकारिता गजलको यो सुन्दर राजमार्ग अझै फराकिलो हुन सकोस। “ज्यूने रहर”गजल कृति गजल इतिहासमा एउटा उपलब्धिमूलक शोधपत्र बन्न सकोस् । सबैले सिक्नेछन उनको यो कृतिबाट।
म उनको गजलकरितालाई सलाम गर्छु। म उनको यस कृतिको पूर्ण सफलताको कामना गर्छु। हार्दिक बधाई शुभकामना हरि चालिसे एबिसी भाइलाई। साहित्यिक क्षेत्रमा थप उर्जा मिलोस्। राम्रा राम्रा कृतिहरु जन्मियोस् हृदयदेखि शुभकामना।
गजलगृह, भरतपुर, चितवन
मकवानपुर । बागमती प्रदेश खेलकुद विकास परिषद्ले प्रदेशका ६ जिल्लामा खेलकुद विकास समितिको अध्यक्ष नियुक्त गरेकाे छ । परिषद्ले मकवानपुरसहित ६ जिल्लामा अध्यक्ष नियुक्त गरेको हो ।
परिषद्ले खेलकुद विकास समिति मकवानपुरको अध्यक्षमा राजकुमार मोक्तानलाई नियुक्त गरेकाे छ । समिति मकवानपुरमा दुई जना सदस्यहरु पनि नियुक्त गरेको छ । सदस्यमा मदन उप्रेती र कृष्ण रुम्बालाई नियुक्त गरिएकाे छ ।
विगत साढे ३ महिनादेखि खेलकुद विकास समिति अध्यक्षबिहीन रहेका थिए । बागमती प्रदेशको १३ जिल्लामध्ये मकवानपुर, धादिङ, काभ्रे, सिन्धुली, काठमाडौं र सिन्धुपाल्चोक जिल्लामा अध्यक्ष नियुक्त गरिएको प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए ।
बागमती प्रदेश खेलकुद विकास परिषद्को शुक्रबारको बैठकले मकवानपुरसहित, धादिङको अध्यक्षमा प्रताप तामाङ, काभ्रेको अध्यक्षमा मानवीर वाइवा, सिन्धुलीको अध्यक्षमा वीरबहादुर थिङ, काठमाडौंको अध्यक्षमा सानुभाई बलामी र सिन्धुपाल्चोकको अध्यक्षमा रामकृष्ण दंगाललाई नियुक्त गरिएको भण्डारीले बताए ।
समितिकाे कार्यकाल यसअघि दुई वर्ष रहेकोमा त्यसलाई बढाएर परिषद्ले चार वर्ष बनाएको छ । अहिलेकाे समितिको कार्यकाल चार वर्षको हुनेछ । खेलकुद विकास समिति अध्यक्ष रिक्त रहेकाे प्रदेशका चितवन, रसुवा, दोलखा, नुवाकोट, रामेछाप ललितपुर र भक्तपुर गरी ७ जिल्लामा भने अध्यक्ष नियुक्त गरिएकाे छैन् ।