मकवानपुर । बागमती प्रदेश सरकारले एक सय दिनकाे उपलब्धी सार्वजनिक गरेको छ । बुधबार मुख्यमन्त्री बहादुर सिंह लामा सहित प्रदेश सरकारका मन्त्रीहरु र सचिवहरु सहितले पत्रकार सम्मेलन मार्फत एक सय दिनमा गरेका कामको विवरण सार्वजनिक गरेको हो ।
मुख्यमन्त्री लामाले सरकारकाे नेतृत्व लिएकाे प्रदेश सरकारकाे एक सय दिनको अवधि गरेकाे केही कामलाई नै उपलब्धी भन्दै सार्वजनिक गरेकाे हाे । सय दिनमा देखिनेगरी उपलब्धी मुलक कामहरु भएको छैन । आफ्नो नेतृत्वमा सरकारको गठन भएदेखि हालसम्मको कार्य तथा निर्णय सार्वजनिक गर्दै मुख्यमन्त्री लामाले यसअवधिमा आफूले सरकारको जग बसाल्ने काम गरेको दाबी गरेका छन् । तर प्रदेश सरकारले नियमित कामलाई उपलब्धीका रुपमा सार्वजनिक गरेकाे पाइएकाे छ ।
‘कुनै पनि सरकार गठन भएको सय दिनमै उथलपुथल हुने गरी काम गर्न सक्दैन मुख्यमन्त्री लामाले भने ‘विपद्को समयमा सरकारले धेरै काम गरेको छ ।’ प्रदेश सरकारले गत असोज महिनामा आएको बाढी पहिरोका कारण भएको क्षति न्यूनिकरणमा काम गरेपनि अन्य कार्य भने नियमित प्रकृतिका नियुक्ती लगायतका कामलाई उपलब्धीका रुपमा सार्वजनिक गरेको हाे । मुख्यमन्त्री लामाले अघिल्लो सरकारले ल्याएको बजेटका कारण आफ्नो भिजनअनुसार काम गर्न नसकिएको बताए ।
‘बजेट एउटा सरकारले ल्यायो । अहिले कार्यान्वयन हामीले गर्नुपर्ने अवस्था छ । त्यसकारण जनभावनाअनुसार काम गर्न नसकिएको हो,’ उनले भने । मुख्यमन्त्री लामो प्रदेश सरकार नीतिगत सुधारको काम गरिरहेको दाबी गरे । उनले सय दिनको अवधिमा सुशासन र विकासका लागि आधारहरु तयार गर्ने काम भएको बताए । ‘कर्मचारी अभावमा कार्यसम्पादनमा समस्या भएको छ’ उनले भने । विपत् व्यवस्थापनमा प्रदेश सरकारले काम गर्न चाहेरपनि ऐन कानूनका कारण समस्या रहेको उनले बताए । चालु आर्थिक वर्षको बजेट कार्यान्वयनका लागि कार्यविधि निर्माणलगायतका कार्यहरु गरिएको उनले जानकारी दिए ।
सय दिनकाे अवधिमा प्रदेश सरकारलाई संस्थागत रुपमा सुदृढ गर्न तीन वटा ऐन जारी भएको, बागमती प्रदेश सरकारको दोस्रो आवधिक योजना कार्यान्वयनमा ल्याइएको, भौतिक पूर्वाधार विकास कार्यलाई प्रभावकारी बनाइएको लगायतका प्रगति सार्वजनिक गरिएको छ । प्रदेश सरकारको सय दिनको मुख्य मुख्य उपलब्धिमा नीतिगत तथा कानुनी सुधार, संवैधानिक नियुक्ति तथा अन्य पदपूर्ति गरिएको, रुग्ण आयोजनाहरुको पहिचान गरिएको, खानेपानी कार्यालय स्थापना, विद्युतीय चालक अनुमतिपत्र प्रणाली विकास गरी सञ्चालनको अन्तिम चरणमा पुगेको, कार्यविधिहरु स्वीकृत गरिएकोलगायतका छन् ।
मकवानपुर । मकवानपुरकाे हेटौंडामा श्रवण मुकारुङका एकल कविता वाचनसहित सांगीतिक साँझ कार्यक्रम हुने भएको छ । साहित्य संगम मकवानपुरको आयोजनामा मुकारुङकाे कविता वाचनसहित सांगीतिक साँझ हुने भएकाे छ ।
साहित्य संगम मकवानपुरको अक्षयकोष सहयोगार्थ आगामी मंसीर ७ गते कवि मुकारुङका एकल कविता एवम् सांगीतिक साँझ हुने भएको हो । यसअघि भदौ १ गते कार्यक्रम हुनेगरी मिति तय भएकाेमा मुकारुङको स्वास्थ्य अवस्थाका कारण स्थगित गरिएको संगम अध्यक्ष डीबी बर्तौलाले जानकारी दिए । सांगीतिक साँझ कार्यक्रममा श्यामकुमार बानियाँ, अन्जन दहाल, सुनिता बुर्लाकोटी, रमेश गहतराज, लालकाजी परियार र बाल प्रतिभा प्रसिद्धि लामिछाने प्रस्तुती रहने उनले बताए ।
कविता वाचन तथा सांगीतिक साँझ हेटौंडा उपमहानगरपालिका ४ स्थित हेटौंडा पार्टी प्यालेसमा हुने संगम सचिव मनोज पोखरेलले बताए । पोखरेलका अनुसार कार्यक्रममा सहभागिताकाे लागि प्रतिव्यक्ति ५ सय रुपैयाँको टिकटको व्यवस्था गरिएको छ । संगमकाे अक्षयकोषको लागि टिकटकाे व्यवस्था गरिएकाे उनले बताए ।
नेपाली साहित्य जगतमा लोकप्रिय कवि तथा गीतकारकाे छवी बनाएका मुकारुङको देश खोज्दै जाँदा र जीवनको लय कवितासङ्ग्रह, फूलको आवाज, बिसे नगर्चीको बयानलगायतका कविता भीसीडी, हिउँको दरबार गीतसङ्ग्रह, यलम्बर नाटक लगायत प्रकाशित छन् । यसैगरी उनकाे हजुर हजुर ए हजुर, सुनकोशीको सुनको पानी, तिमी तारे भिर, बाटो हेरे हुन्छ आमा, माथी माथी सैलुङगेमा गीतहरु प्रकाशित रहेका छन् ।
मुकारुङ सर्वश्रेष्ठ गीतकार, राष्ट्रिय कविता महोत्सवमा प्रथम, युवा स्रष्टा सम्मान, रवीन्द्र गीत सम्मान, मोहन रेग्मी स्मृति पुरस्कार, युवा वर्ष मोती पुरस्कार, समय सम्मान, लोकेन्द्र साहित्य पुरस्कार, जीवन स्मृति पुरस्कार, शुभप्रभात काव्य सम्मान, स्रष्टा सम्मान, विशिष्ट सम्मान लगायतका पुरस्कारबाट सम्मानित भएका छन् ।
मुकारुङको पछिल्लो समयमा राई माइलाले गाउँ छाड्यो रे (गाउँ आएकाे बाटो चलचित्रमा समावेश) बोलको गीत लोकप्रीय छ ।
मकवानपुर । बागमती प्रदेश सरकारले मन्त्रालयको सङ्ख्या बढाएकाे छ । मंगलबार बसेको मन्त्रिपरिषद् बैठकले प्रदेशमा रहेकाे १३ मन्त्रालयबाट बढाएर १४ मन्त्रालय बनाएको हो ।
मन्त्रिपरिषद् बैठकले मन्त्रालयको सङ्ख्या थप गर्ने निर्णय गरेकाे सरकारका प्रवक्ता एवम् आन्तरिक मामिला तथा कानुन मन्त्री सुरजचन्द्र लामिछाने जानकारी दिए । प्रदेशमा सहकारी तथा गरिबी निवारण मन्त्रालय गठन गर्ने निर्णय भएकाे छ’ उनले भने ‘बैठकले कार्यविभाजन समेत स्वीकृत गरेकोमा मन्त्रीको जिम्मेवारी भने तोकिएको छैन ।’
प्रदेश मुख्यमन्त्री बहादुर सिंह लामाले मन्त्रिपरिषद्काे कार्यविभाजन अनुसार बढाइएकाे मन्त्रालयमा मन्त्रीको जिम्मेवारी तोक्ने बताइएकाे छ । गत साउन ९ मा मुख्यमन्त्री लामाले नियुक्त गरेका कांग्रेसका मदुकुमार श्रेष्ठले जिम्मेवारी पाउन सकेका छैनन् । साढे तीन महिना भन्दा बढी मन्त्री काम विहिन भएका थिए । अन्य विकल्पबाट समस्या टुंग्याउन नसकेपछि प्रदेश सरकार मन्त्रालय बढाउन बाध्य भएकाे हाे । ११ कात्तिक २०७८ मा तत्कालिन गठबन्धनका मुख्यमन्त्री राजेन्द्र पाण्डेकाे कार्यकालमा गठबन्धन जोगाउन मन्त्रालय फुटाएर १४ बनाएका थिए ।
१२ साउन २०८१ मा सरकारलाई पूर्णता दिएका साउन १५ मा विश्वासको मत लिदैं सरकार सुरक्षित गरेका मुख्यमन्त्री लामाले मुख्यमन्त्री तथा मन्त्रिपरिषद्काे कार्यालयसहित प्रदेशका १३ मन्त्रालयमा नेपाली कांग्रेसका ७ र नेकपा एमालेका ६ जानलाई मन्त्री नियुक्त गरेका थिए । यसअघि १४ मन्त्रालय रहेकाे बागमतीमा मन्त्रालयकाे संख्या बढि भएकाे भन्दै सत्तापक्ष र प्रतिपक्षसमेतबाट आलाेचन भएकाेले कार्यदल गठन गरी मन्त्रालयकाे संख्या १२ कायम गरिएकाे थियाे । नेकपा एमालेसहितको कार्यादलले मन्त्रालय संख्या घटाउन सिफारिस गरेको थियो ।
२०७४ माघ २८ मा गठित बागमती प्रदेश सरकारकाे पहिलाे मुख्यमन्त्रीकाे नेतृत्व गरेका एमालेका डोरमणि पौडेलले प्रदेशमा ७ मन्त्रालय कायम गरेरका थिए । उनकाे कार्यकालमा उनले एमालेका ५ र माओवादी केन्द्रका २ जना मन्त्री भएका थिए । नेकपाको खारेजीसँगै एमाले र माओवादी केन्द्र बिउँतिएपछि २०७८ वैशाख १५ मा पौडेलले फेरि मन्त्रिपरिषद् पुनर्गठन गरेका थिए । पौडेलको कार्यकालमा राज्यमन्त्रीसहित १० जना मन्त्री बने ।
राजनीतिक कोर्स परिवर्तनपछि पौडेलले २०७८ भदौ २ मा मुख्यमन्त्री पदबाट राजीनामा दिएर एमालेकै अष्टलक्ष्मी शाक्यले केही समय प्रदेश सरकारको नेतृत्व गरिन् । २०७८ भदौ २ मा एमाले विभाजन भएकै दिन पौडेलले एमालेकी उपाध्यक्ष अष्टलक्ष्मी शाक्यलाई सत्ता हस्तान्तरण गरे । शाक्यको कार्यकालमा राज्यमन्त्रीसहित ११ जनाले मन्त्री बन्ने मौका पाए । २०७८ भदौ २३ गते मुख्यमन्त्री शाक्यले मन्त्रिपरिषद् विस्तार गरे पछि ७ मन्त्री र ४ राज्यमन्त्री बने ।
अष्टलक्ष्मी शाक्य नेतृत्वको सरकार ढलेपछि बनेको गठबन्धनका तर्फबाट नेकपा एकीकृत समाजवादीका राजेन्द्र पाण्डे मुख्यमन्त्री बने । २०७८ कात्तिक १० मा कांग्रेस, माओवादी केन्द्र र एकीकृत समाजवादीको समर्थनमा सरकारमा दाबी गरेका पाण्डे कात्तिक ११ गते ५९ सांसदको समर्थनसहित मुख्यमन्त्री बनेका थिए । उनको १४ महिने कार्यकालमा १४ मन्त्रालय कायम भएको थियो भने १८ मन्त्री नियुक्त भएका थिए ।
सङ्घीयता कार्यान्वयनपछिको दोस्रो आम निर्वाचन पश्चात पुस २५ २०७९ मा गठित माओवादी केन्द्रका शालिकराम जम्कट्टेल नेतृत्वको सरकारले ३ पटक विश्वासको मत लिनु परेको थियो । राजनीतिक घटनाक्रम परिवर्तनसँगै ३ वटा समीकरणबाट उनले सरकार सञ्चालन गरे । प्रदेशमा मन्त्रालय संख्या बढी भएकाे भन्दै चौतर्फी आलोचना भएपछि उनको कार्यकालमा मन्त्रालय संख्या घटाएर १२ वटा कायम गरिएकाे थियाे । जम्कट्टेलकाे कार्यकालमा बनेकाे कार्यदलले प्रदेशमा मन्त्रालयकाे संख्या ९ देखि ११ वटा कायम गर्न सिफारिस गरेकाे थियाे ।
जम्कट्टेल नेतृत्वकाे प्रदेश सरकार ढलेसँगै सरकारको नेतृत्व लिएका कांग्रेसका बहादुर सिंह लामाको मन्त्रिपरिषदमा १४ मन्त्री रहेका छन् । एमाले काँग्रेसकाे बहुमतकाे सरकार हुँदा समेत पार्टीकाे आन्तरिक समस्याले उनले १४ वटा मन्त्रालय कायम गर्न बाध्य भए । मन्त्रालय बढाउनु उचित नहुने भन्दै आएकाे सत्ता साझेदार दल एमाले भने गठबन्धनका कारण चुप लागेकाे छ ।
मकवानपुर । मकवानपुरकाे हेटौंडा उपमहानगरपालिकामा ट्याङ्करको टायर पड्किएर १ जनाकाे मृत्यु भएकाे छ भने ५ जना घाइते भएका छन् ।
हेटौडा–११,थानाभर्याङस्थित टायर मर्मत पसलमा मधेश प्रदेश ०३–००२ ख ०३०० नम्बरको ट्याङ्करको टायर पड्किएर भारतका महमद ऐजाजकाे भएको बागमती प्रदेश प्रहरी कार्यालय हेटौंडाले जानकारी दिएको छ । सोमबार राती १ बजेको समयमा पेट्रोल लोड भएको उक्त ट्याङ्करको टायर पन्चर भएकाेमा टायर खोलेर मर्मतपछि हावा भर्ने क्रममा टायर पड्किएकाे हाे ।
घटनामा टायर पसलका संचालक भारतको भोजपुरका ३४ वर्षीय महमद मृत्यु भएको प्रहरीले जनाएकाे छ । टायर पड्किएर गम्भीर घाइते भएका महमदलाई उपचारको लागि चितवन मेडिकल कलेजमा लगिएकाे थियाे । डाक्टरले मंगलबार बिहान ४ बजेर १६ मिनेटको समयमा महमदलाई मृत घोषणा गरेको प्रहरीले जनाएको छ ।
यस्तै टायर पड्किएर अन्य पाँच जना घाइते भएका छन् । घाइते हुनेमा टायर मर्मत पसलका कामदार पर्सा धोबिनी गाउँपालिका–२ का १८ वर्षीय जाबिर हवारे, ट्याङ्कर चालक हेटौंडा–११, स्मारकका ३९ वर्षीय देवान लामा, हेटौ्डा–११ नवलपुरका ४७ वर्षीय मोहनलाल दुलाल, सहचालक धादिङ जिल्लाको धुनिबेशी नगरपालिका–२, भञ्ज्याङपोखरीका २३ वर्षीय उत्तम बस्नेत, धादिङ जिल्लाकै थाक्रे गाउँपालिका–८ का ३८ वर्षीय लक्ष्मण थापा घाइते भएका छन् ।
घाइते सबैलाई उपचारका लागि चुरेहिल अस्पताल लगिएको थियो । प्रहरीका अनुसार ट्याङ्कर चालक लामाको चुरेहिल अस्पतालमा उपचार भइरहेको छ भने अन्य घाइते डिस्चार्ज भएको मकवानपुर प्रहरीले जनाएको छ ।
तिमीमा चित्त लाएर बसेकी आज मै सुन ।
जागा भयौ तिमी आज शब्दले गर्छु पूजन ॥१॥
कसरी शब्द नै छानूँ फूलझैँ टिप्न सक्दिन ।
काँढा परेर घोच्ला कि चाहन्छु म त तर्किन ॥२॥
पवित्र मनका साथ वस्त्र शुद्ध धरीकन ।
पूजा पाठ म ता गर्छु शुद्ध मन्त्र पढीकन ॥३॥
हरि कीर्तन मै गर्दै सिँगार्छु तुलसी मठ ।
लेख्छु स्तुति म आफैँले अङ्गुली-पीत-चन्दन ॥४॥
दीप कलश विघ्नेश पहिले गर्छु पूजन ।
पूजेर हरि नै फेरि तुलसी गर्छु वन्दन ॥५॥
पहेँलो फूल हो राम्रो पीताम्बर सुहाउने ।
विष्णुको प्रिय हो भन्दै तिमीलाई चढाउने ॥६॥
पारेकी छु उनी ठिक्क माला यो पहिराउन ।
तरुलादि फलाहार नैवेद्य भाग लाउन ॥७॥
तुलसीप्रिय हो तिम्रो साथ गर्छु म वन्दन ।
तुलसीदल राखेर फलमा गर्छु अर्पण ॥८॥
शालिग्राम सँगै राखी तुलसी छेउमा अनि ।
विष्णुरूप भनी मानी विवाह तुलसी गरी ॥९॥
जे जे छन् ठिक्क पारेका सामग्री धूप चन्दन ।
अक्षता आज ता हुन्न द्रव्य पुष्पादि लीकन ॥१०॥
हे हरि ! तुलसी माता ! प्रीतिले गर्छु है स्तुति ।
प्रीतिकै भावले मैलै चढाएँ शब्दसङ्गति ॥११॥
सकेको पूजनै गर्छु मनले गर्छु अर्पण ।
भएमा विघ्नता केही गर माफ म दुर्जन ॥१२॥