मकवानपुर । हेटौंडामा रहेको सिद्धार्थ शिशु सदन माविमा पठन संस्कृति विकासका लागि अभिमूखीकरण भएको छ । बिहीबार किताबघर, हेटौंडाको संयोजनमा विद्यार्थीहरूको पठन संस्कृति विकासका लागि १ दिने अभिमूखीकरण भएको छ ।
विद्यालयका कक्षा ७, ८ र ९ का विद्यार्थीहरूका लागि किताब पढ्ने बानीको विकासका सन्दर्भमा अभिमूखिकरण कार्यक्रम आयोजना भएको किताबघरका संचालक छवि अनित्यले बताए । अभिमूखीकरणमा बालबालिकाहरूलाई पाठ्यक्रमभन्दा बाहिरका किताबको आवश्यकता र महत्त्वका विषयमा जानकारी गराइएको थियो । किताब पढ्ने बानीको विकासले शैक्षिक उपलब्धीमा पुग्ने सहयोग सम्बन्धमा बालबालिकाहरूलाई जानकारी गराइएको अनित्यले जानकारी दिए ।
यसैगरी शुक्रबार विद्यालयमा किताबघरको संयोजनमा बालबालिकाहरूका लागि पुस्तक प्रदर्शनी समेत आयोजना हुने भएको छ । किताबघर पुस्तक प्रदर्शनी यात्रा २०८० अन्तरगत प्रदर्शनी हुन लागेको हो । कार्यक्रमले बालबालिकाहरूमा पठन संस्कृतिबारे अभिरुची बढाउन सहयोग पुग्ने विद्यालयका अतिरिक्त कृयाकलाप संयोजक केदार न्यौपानेले बताए ।
यसअघि किताबघरले हेटौंडा उपमहानगरपालिकाका विभिन्न सरकारी तथा सस्थगत विद्यालयमा पुस्तक प्रदर्शनी गरिसकेको छ ।
मकवानपुर । मकवानपुर जिल्लाको मकवानपुरगढी गाउँपालिकामा मोटरसाइकल दुर्घटना हुँदा घाइते भएका चालकको मृत्यु भएको छ । यो संगै उक्त दुर्घटनामा मृत्यु हुनेको संख्या ३ पुगेको छ ।
बिहीबार दिउँसो मकवानपुरगढी २ धवाडीपुल स्थित भित्रिसडक खण्डमा सुकौराबाट कान्तिलोकपथ तर्फ आउदै गरेको प्रदेश ३-०२-०१२ प ६९११ नं.को मोटरसाइकल आफै अनियन्त्रित भई पुल छेउबाट करिब १२ मिटर तल खसी दुर्घटना भएको थियो ।
उक्त दुर्घटनामा चालक मकवानपुरगढी २ कुर्ले पाखा बस्ने अन्दाजी ३५ वर्षीय भिम बहादुर स्याङ्तान गम्भीर घाइते भइ उपचारको लागि हेटौंडा अस्पताल ल्याइएकोमा थप उपचारको लागि भरतपुर रिफर गरिएको थियो । उनको भरतपुर लैजादै गर्दा बाटैमा मृत्यु भएको प्रहरीले जनाएको छ ।
प्रहरीका अनुसार मोटरसाइकल दुर्घटनामा चालकको श्रीमती अन्दाजी ३४ वर्षी रुपा स्याङतान र छोरी अन्दाजी ५ महिनाको बालिकाको घटनास्थलमा मृत्यु भएको थियो । मृतक ३ नै जनाको शव आवश्यक प्रक्रियाको लागि हेटौंडा अस्पतालमा राखिएको प्रहरीले जनाएको छ ।
मकवानपुर । मकवानपुरको हेटौडामा उपमेयर कप महिला तथा पुरुष भलिबल प्रतियोगिता आजबाट हुदैछ । आज मंसिर १४ गतेदेखि १७ गतेसम्म छैठौं संस्करणको उपमेयर कप नगरस्तरीय महिला तथा पुरुष भलिबल प्रतियोगिता हुने भएको हो ।
केशवलाल श्रेष्ठ स्मृति केन्द्रिय प्रतिष्ठान र मकवानपुर जिल्ला भलिबल संघको आयोजना, मकवानपुर जिल्ला खेलकुद विकास समितिको सहकार्य तथा हेटौंडा उपमहानगरपालिकाको सहयोगमा हेटौंडा–१९ नेवारपानीमा प्रतियोगिता हुने मकवानपुर जिल्ला भलिबल संघ अध्यक्ष बसन्तकुमार सिटौला जानकारी दिए ।
आज हुने पुरुष भलिबल प्रतियोगिताको उद्घाटन खेल वडा नम्वर १७ विरुद्ध वडा नम्वर १९ बीच हुनेछ भने महिला भलिबल प्रतियोगिता वडा नम्वर १४ विरुद्ध वडा नम्वर १२ बीच हुनेछ । प्रतियोगितामा प्रथम हुने टिमले ५० हजार रुपैयाँ, द्वितीय हुनेले ३० हजार रुपैयाँ र सान्त्वनाले १० हजार रुपैयाँसहित सिल्ड, मेडल तथा प्रमाणपत्र प्राप्त गर्नेछन् । यस्तै विधागत उत्कृष्ट खेलाडीहरुका लागि पुरस्कारको व्यवस्था गरिएको अध्यक्ष सिटौलाले बताए ।
पुरुष भलिवल तर्फ १२ वटा वडाले सहभागिता जनाएका छन् भने महिला भलिवल तर्फ ७ वटा वडाले सहभागिता जनाएकाे संयोजक पुष्प मैनालीले जानकारी दिए । उनका अनुसार पुरुष भलिवल तर्फ वडा नं ३, ४, ५, ६, ९, १०, ११, १२, १३, १६, १७ र १९ ले सहभागिता जनाएका छन् भने महिला भलिवल तर्फ ६, ९, १०, १२, १४, १७ र १९ वडाले मात्र सहभागिता जनाएका छन् ।
गत वर्ष भएको उपमेयरकपको पाँचौ सस्करणको उपाधि महिला तर्फ १९ नम्बर वडा र पुरुष तर्फ ११ नम्बर वडाले हात पारेको थियो ।
मकवानपुर । सरकारले आगामी माघ ११ गते राष्ट्रियसभाको निर्वाचन गर्ने निर्णय गरेको छ । राष्ट्रियसभाको रिक्त हुने पदमा माघ ११ गते निर्वाचन गर्ने निर्णय बुधबार बसेको मन्त्रिपरिषद् बैठकले गरेकाे हाे ।
सरकारका सूचना तथा सञ्चार प्रविधिमन्त्री रेखा शर्माले निर्वाचन आयोगसँगको परामर्शको आधारमा मिति निर्धारण गरिएको जानकारी दिइन् । आगामी फागुन २० गते राष्ट्रिय सभाका एक तिहाइ अर्थात १९ सांसदको पद रिक्त हुँदै छ । राष्ट्रियसभा सदस्यको पद रिक्त हुनु भन्दा एक महिना अगाडि नै निर्वाचन गराउनुपर्ने संवैधानिक व्यवस्था छ ।
आगामी फागुन २० मा एमालेका ९, कांग्रेसका ४ माओवादीका ३, एकीकृत समाजवादीका २, जसपाका १ र स्वतन्त्र सांसद १ जना गरी २० सांसदको पदावधि सकिन लागेको हो । पदावधि सकिनेमा राष्ट्रियसभाका अध्यक्ष, राज्यमन्त्री, विभिन्न पार्टीका संसदीय दलका पदाधिकारीको समेत रहेका छन् ।
निर्वाचन आयोगले राष्ट्रिय सभा सदस्यकाे निर्वाचन आगामी माघ ११ गते विहीबार गर्न सरकारलाई सुझाव दिएकाे थियाे । आगामी फागुन २० गते राष्ट्रिय सभाका एक तिहाइ सदस्यकाे म्याद समाप्त हुने भएकाेले उक्त पदमा निर्वाचन आगामी माघ ११ गते गर्ने गरी मिति तोक्न गत मंसिर ७ विहीबार सरकारलाई सुझाव दिएको हाे ।
आयोगका पदाधिकारीले प्रधानमन्त्री पुष्पकमल दाहाललाई भेटेर उक्त परामर्श दिइएकाे आयोगका प्रवक्ता शालिग्राम शर्मा पौडेलले जानकारी दिए । आयाेगका पदाधिकारीलाई प्रधानमन्त्री दाहालले आयोगले सिफारिस गरेकै मितिमा निर्वाचन हुने गरी तोकिने जानकारी दिएकाे थिए ।
नेपालको संविधानकाे धारा ८६ (३) बमोजिम राष्ट्रिय सभाका एक तिहाइ सदस्यको पदावधि २०८० फागुन २० गते समाप्त हुदैछ । राष्ट्रिय सभा सदस्य निर्वाचन ऐन, २०७५ बमोजिम पद रिक्त हुनुभन्दा ३५ दिन अगावै निर्वाचन गरिसक्नुपर्ने व्यवस्था छ । आगामी फागुन २० गते निर्वाचित १९ र सरकारबाट मनोनीत एक गरी २० सदस्यको पद रिक्त हुँदैछ । राष्ट्रिय सभामा प्रत्येक दुई वर्षमा रिक्त हुने एक तिहाइ सदस्य पदको निर्वाचन हुँदै आएको छ ।
निर्वाचनका लागि नयाँ मतभार कायम
निर्वाचन आयोगले राष्ट्रिय सभा सदस्य निर्वाचनका लागि कायम भएका मतदाताहरूको नयाँ मतभार कायम गरेको छ । मंसिर ६ गते बुधबारकाे आयोगको बैठकले प्रदेश सभा सदस्य र स्थानीय तहका प्रमुख उपप्रमुख तथा अध्यक्ष उपाध्यक्षको नयाँ मतभार कायम गरिएको आयोगका प्रवक्ता पौडैलले जानकारी दिए ।
बैठकले एक जना प्रदेश सभा सदस्य बराबर ५३ मतभार र गाउँपालिका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १९ मतभार कायम गरेको पाैडेलले बताए । यसअघि एक जना प्रदेश सभा सदस्यको मत ४८ र स्थानीय तहका मतदाता जनप्रतिनिधिकाे मतभार १८ कायम थियो ।
हाल राष्ट्रिय जनगणना २०७८ प्रतिवेदन सार्वजनिक भैसकेकोले सो प्रयोजनका लागि उक्त ऐन बमोजिम राष्ट्रिय तथ्याङ्क कार्यालयको सिफारिस समेतका आधारमा मतभार ताेकिएकाे आयाेगले जनाएकाे छ ।
मकवानपुर । मकवानपुरगढी जेसीज प्रस्तावितले बुधबारबाट जेसीज सप्ताह कार्यक्रम सञ्चालन गरेकाे छ । जेसीजले आजबाट ४ दिनसम्म ७ वटा कार्यक्रम गरी जेसीज सप्ताह मनाउँदैछ ।
जेसीज सप्ताहको सुरुवात बुधबार बिहान मकवानपुरगढीको जीतपुर भञ्ज्याङमा स्वागत बोर्ड स्थापना गरिएकाे छ । यसैगरी बुधबार दिउँसो ज्वालादेवी आधारभूत विद्यालयमा खेलकुद सामग्री वितरण गरिने कार्यक्रम रहेकाे मूल कार्यक्रम संयोजक कार्यकारिणी उपाध्यक्ष विजय पुडासैनी जानकारी दिए ।
यस्तै विहीबार बिहान जाल्पादेवी मावि गढी ६ मा साइबर सुरक्षासम्बन्धी सचेतनामूलक कार्यक्रम, हेमकर्ण मावि गढी २ मा शैक्षिक सामग्री वितरण तथा जनता मावि गढी ६ मा लागूऔषध दुर्व्यसनसम्बन्धी सचेतना कार्यक्रम आयोजना गरिने पुडासैनीले बताए ।
जेसीज सप्ताह अन्तरगत शुक्रबार रानीशेरा मावि गढी १ मा साइबर सुरक्षासम्बन्धी सचेतनामूलक कार्यक्रम गरिने भएको छ । अन्तिम दिन शनिबार मकवानपुरगढी क्षेत्रमा वनभोज कार्यक्रमसहित जेसीज सप्ताहको समापन हुने जेसीज अध्यक्ष पुष्पराज पुडासैनीले बताए । आगामी दिनमा पनि युवाहरुको नेतृत्व र व्यक्तित्व विकाससँगै सामाजिक कार्यलाई निरन्तरता दिने उनले बताए ।