भरतपुर, चितवन । चितवनको भरतपुरमा एक फरक लयमा साहित्यिक कार्यक्रमकाे तयारी गरिएकाे छ । साहित्यिक भूमि चितवनमा दशकअघि गजलका शब्दहरूमा झन्झनाइरहेको लय गुन्जिने तयारी गरिएकाे हाे ।
गजल मञ्च चितवनको आयोजनामा २१ असार शनिबार भरतपुरमा रहेकाे चितवन माध्यमिक विद्यालयमा हुने ‘गजल उत्सव’ कार्यक्रममा ‘अग्रजका गजल’ सुनिने भएकाे हाे । समयको दौडमा मौन बनेका तर मेटिन नसक्ने ती स्वरहरूलाई फेरि एकपटक मञ्चमा ल्याउने उद्देश्यसहित गजल मञ्च चितवनले अग्रजका गजल कार्यक्रम आयोजना गर्न लागिएकाे मञ्च अध्यक्ष रामकृष्ण अनायास बताउँछन् ।
कार्यक्रममार्फत चितवनमा बसेर दुई दशकअघिदेखि गजल सिर्जनामा जीवन अर्पिएका अग्रज स्रष्टाहरूलाई फेरि साहित्यिक यात्रातर्फ फर्काउने भावनात्मक प्रयत्न गरिने आयोजकले जनाएकाे छ । ‘गजल सिर्जनामा कहिल्यै पनि नथाक्ने तर जीवनका परिस्थितिले केही समय मौन बस्नुपरेका अनुभवी गजलकारलाई मञ्चमा सम्मानका साथ प्रस्तुत गरिनेछ’ अध्यक्ष रामकृष्ण अनायासले भने, ‘जसले चितवनको गजल साहित्यको सुरुवाती स्वरलाई फेरि सजीव तुल्याउने अपेक्षा गरिएको छ ।’
‘कार्यक्रमको मूल सन्देश साहित्यको स्मृतिलाई वर्तमानमा झिकेर भविष्यसँग गाँस्ने र त्यसकाे माध्यम गजल बनेको छ जुन भावना, चेतना र कलाको संयोजन स्वरूप हाे’ अनायसले भने । गजल मञ्च चितवनका अध्यक्ष अनायास भन्छन् ‘गजल केवल लयात्मक रचना होइन, यो समय, समाज र आत्माको अभिव्यक्ति हो । जुन पुस्ता–पुस्ताबीच साहित्यिक सेतु निर्माण गर्न सक्छ ।’ अनायासका अनुसार अग्रज स्रष्टाको अनुभूति, दृष्टिकोण र शिल्पलाई पुनः प्रस्तुत गर्नु भनेको आजको पुस्तामा मूल आत्माको पुनर्संयोजन गर्नु हो ।
‘कतिपय स्रष्टाहरूको आवाज हराएको जस्तो लाग्छ, तर त्यो हराएको होइन, केवल हामी सुन्न छाडेका हौँ । अग्रजका गजल भनेको ती स्वरहरूलाई फेरि सुन्ने संवेदनशीलता हो, जसले हामीलाई आफ्नै साहित्यिक आत्मासँग पुनर्मिलन गराउँछ’संस्थाका सल्लाहकार एवं निवर्तमान अध्यक्ष लेखराम सापकोटाले भने ।
कार्यक्रममा रमेश प्रभातको सम्पादन तथा गजल मञ्च चितवनद्वारा प्रकाशित गजलकार किसान प्रेमीको ‘अन्जानमा गयौ कि !’, मञ्चका अध्यक्षसमेत रहेका गजलकार रामकृष्ण अनायासको ‘अनायास’ र गजलकार सरस्वती पौडेल को ‘प्रत्यूष’ गजलसंग्रह विमोचन हुने छ ।
कार्यक्रमलाई सेन्ट्रल कलेजले मुख्य प्रायोजन गरेको छ । प्रसिश मोडुलर किचनले सहप्रायोजन गर्ने कार्यक्रम सम्पूर्ण किताब नारायणगढको सहयोग रहने छ । कायाकैरन दैनिक, विप्स मिडिया, पारदर्शी अनलाइनलगायत मिडिया पार्टनरको रुपमा रहेका छन् । अन्य केही संस्थाले कार्यक्रमलाई आफ्नो उत्पादन सौजन्य समेत गरेका छन् ।
प्रवेश निःशुल्क रहेको यस कार्यक्रम शनिबार दिउँसो २:०० बजेदेखि सुरु हुने जनाइएको छ। आयोजकले यस अवसरमा चितवन तथा नजिकका गजल अनुरागी, पाठक, स्रोता र स्रष्टाहरूको उपस्थितिलाई ऐतिहासिक बनाइदिन आह्वान गरेका छन् ।
चितवन। बागमती प्रदेश सरकारका कृषि तथा पशुपन्छी विकास मन्त्री प्रकाश श्रेष्ठले ‘कृषि ज्ञानरत्न’ कार्यक्रमले युवामा उत्साह थपेको बताएका छन् । चितवनको कृषि तथा वन विज्ञान विश्वविद्यालयमा बागमती प्रदेशको आर्थिक सहयोगमा निर्मित ‘बीएसएल टु प्लस प्रयोगशाला भवन’को सोमबार उद्घाटन गर्दै मन्त्री श्रेष्ठले उक्त कुरा बताएका हुन् ।
‘प्रदेश सरकारले सुरु गरेकाे कृषि ज्ञानरत्न कार्यक्रम अन्तर्गत विभिन्न शैक्षिक तह पार गरेका युवालाई लक्षित गरी कृषि अनुदान कार्यक्रम सञ्चालनमा ल्याएको छ’ उनले भने । उक्त कार्यक्रमबाट स्नातक तह पार गरेका युवाहरूलाई ८ लाख रुपैयाँ, स्नातकोत्तर तहका लागि १० लाख रुपैयाँ, र एमफिल गर्दै पीएचडी अध्ययन तयारी गरिरहेकाे युवाका लागि २२ लाख रुपैयाँसम्मको कृषि अनुदान प्रदान गरिदै आएकाे मन्त्री श्रेष्ठले जानकारी दिए ।
‘प्रदेशभित्र जुनसुकै विषय अध्ययन गरेका युवाले कृषि क्षेत्रमा लाग्ने इच्छा राखेमा उक्त कार्यक्रम मार्फत अनुदान लिन सक्ने व्यवस्था गरिएको छ’ उनले भने ‘हामीले ०८१/०८२ सालमा सुरु गरेको कृषि ज्ञानरत्न कार्यक्रमलाई आर्थिक वर्ष ०८२/०८३ मा वृद्धि गर्दै थप विस्तार गर्न गइरहेका छौं।’ उनले विदेश पलायन रोक्दै स्वदेशमै उद्यमशिलता र कृषि कर्ममा लाग्न युवाहरूलाई आग्रह समेत गरेका छन् ।
यसैगरी बागमती प्रदेशका वन तथा वातावरण मन्त्री कृष्णप्रसाद सिलवालले विश्वविद्यालयलाई गुणस्तरीय र परिणाममुखी अध्ययन–अध्यापनमा जोड दिन सुझाव दिएका छन् । ‘नयाँ भवन मात्र पर्याप्त होइन’ मन्त्री सिलवालले भने ‘अब यो भवनमार्फत अध्ययन अनुसन्धानलाई बलियो बनाउँदै चितवनलाई कृषि क्षेत्रमै अग्रणी बनाउनु पर्छ।’
अन्तर्राष्ट्रिय विश्वविद्यालयहरूको उदाहरण दिँदै उनले भने ‘चितवनको कृषि तथा वन विज्ञान विश्वविद्यालयले पनि अनुसन्धानलाई प्राथमिकता दिनुपर्छ ।’ प्रदेश सरकार पनि अनुसन्धानमुखी कार्यका लागि अनुदान दिन तयार रहेको उनले बताए ।
मन्त्री श्रेष्ठद्वारा चैनपुरकाे फोहोर प्रशोधन उद्योगको अवलोकन
कृषि तथा पशुपन्छी विकास मन्त्री श्रेष्ठले सोमबार नै चितवनको खैरहनी नगरपालिका वडा नं ४ स्थित चैनपुरमा रहेको सफा ऊर्जा उत्पादन प्रालि द्वारा सञ्चालित फोहोर प्रशोधन उद्योगको अवलोकन गरेका छन् ।
सफा उर्जाका प्रतिनिधि योगेन्द्र सिंह केसीले फोहोर संकलन, प्रशोधन, प्राङ्गारिक मल उत्पादन तथा वातावरण संरक्षणमा कम्पनीले गरिरहेका कामहरूको विस्तृत जानकारी दिएका थिए । केसीका अनुसार सफा उर्जाले स्थानीय क्षेत्रबाट फोहोर संकलन गरी त्यसलाई आधुनिक प्रविधिबाट प्रशोधन गर्ने काम गरिरहेको छ।
उद्योगको निरीक्षणपछि मन्त्री श्रेष्ठले वातावरणमैत्री प्रविधिको प्रयोग गर्दै उद्योगले स्थानीय समस्या समाधानतर्फ देखाएको पहल सराहनीय भएको बताए । ‘यस्ता परियोजनाहरूले प्रदेशको वातावरण संरक्षण र कृषि उत्पादनमा सकारात्मक प्रभाव पार्छ’ उनले भने ।उद्योग परिसरमा मन्त्री तथा प्रतिनिधिलाई सफा उर्जाका निर्देशक निर्णय पौडेलले स्वागत गरेका थिए।
उद्योग बाणिज्य संघ मकवानपुरका अध्यक्ष प्रमोद सिंह रानाभाट, उपाध्यक्ष उज्वल चौलागाईं तथा प्रतिनिधिहरुकाे साथमा मन्त्री श्रेष्ठले उद्योगको निरीक्षण गरेका हुन् ।
मातृभूमि साहित्य महाेत्सवमा ७ वटा सम्मान प्रदान गरिने
Tags: No Comments
मकवानपुर । मातृभूमि साहित्य समाज मकवानपुरले एकै मञ्चमा ७ वटा सम्मान प्रदान गर्ने भएकाे छ । मातृभूमिले हेटौंडामा १५ र १६ जेठमा आयोजना गर्ने मातृभूमि साहित्य महाेत्सव २०८२ मा ७ वटा सम्मानबाट विभिन्न व्यक्ति सम्मानित हुने भएका हुन् ।
मातृभूमि पत्रकारिता दीर्घ सेवा सम्मान, २०८२ बाट पत्रकार प्रताप विष्ट सम्मानित हुने भएका छन् । दीर्घ सेवा सम्मानकाे संस्थापक मातृभूमि साहित्य समाज रहेको छ । यसैगरी मायादेवी मातृभूमि पुरस्कार, २०८० बाट साहित्यकार गीता रेग्मी सम्मानित हुने भएका छन् । काठमाडौं निवासी साहित्यकार रेग्मीलाई रुकु कार्कीले स्थापना गरेकाे २१ हजार रुपैंया राशिकाे उक्त पुरस्कार प्रदान गरिने समाजका सचिव किशन पौडेलले जानकारी दिए ।
यसैगरी राजकुमार स्मृति मातृभूमि सम्मान, २०८० बाट कवि चन्द्र गुरुङ सम्मानित हुने छन् । सुनसरी धरानका कवि गुरुङलाई इन्द्र बहादुर बानियाँले दाईकाे स्मृतिमा स्थापना गरेकाे १५ हजार रुपैंया राशिकाे उक्त सम्मान प्रदान गरिने पौडेलले बताए । क्षेत्रबहादुर स्मृति मातृभूमि सम्मान, २०८० बाट माधव काफ्ले सम्मानित हुने छन् । रौतहटका साहित्यकार काफ्लेलाई १५ हजार रुपैंया राशिकाे उक्त सम्मान प्रदान गरिने भएकाे हाे । बानियाँले नै हजुरबुबाकाे नाममा उक्त सम्मान स्थापन गरेकाे उनले बताए ।
यस्तै होमनाथ बलदेवी मातृभूमि छन्द साहित्य सम्मान, २०८१ बाट सुदेश सत्याल सम्मानित हुने भएका छन् । मातृभूमिका संरक्षक हयग्रीव आचार्यले स्थापना गरेकाे १५ हजार रुपैंया राशिकाे छन्द साहित्य सम्मान छन्द कवि सत्याललाई प्रादन गरिने छ । मञ्जु सुवेदी स्मृति मातृभूमि सम्मान, २०८१
रजनी ज्ञवालीलाई प्रदान गरिने भएकाे छ । नर्सिङ सेवाका ज्ञवालीलाई वनमाली सुवेदी तथा कृष्णप्रसाद दाहालले स्थापना गरेकाे १५ हजार रुपैंया राशिकाे उक्त सम्मानबाट सम्मानित गरिने भएकाे हाे ।
झलकबहादुर बानियाँ स्मृति मातृभूमि जीवन सङ्घर्ष प्रोत्साहन वृत्ति, २०८० हेटौंडा – १८ हर्नामाडी स्थित कमला आधारभूत विद्यालयका कक्षा ८ मा अध्ययनरत विद्यार्थीलाई प्रदान गरिने सचिव पौडेलले जानकारी दिए । मातृभूमिका पूर्व अध्यक्ष राजबाबु पहाडी बुबाकाे स्मृतिमा स्थापना गरेकाे उक्त प्रोत्साहन वृत्ती ७ हजार ५०० काे रहेकाे छ ।
साहित्य महाेत्सवमा परिचर्चा एवम् बहस कार्यक्रमका साथै सम्मानित हुने स्रष्टा र अन्य स्रष्टाका रचना वाचन समेत हुनेछ । हाम्रो नगर पर्या पर्यटन र संस्कृतिमा समृद्ध सहर, साहित्य, सिर्जना संवाद र सञ्चार, साझा सरोकार प्रतिलिपि अधिकार र कविता , जीवन र समाजमा परिचर्चा एवम् बहस कार्यक्रम हुने समाजका अध्यक्ष कृष्णप्रसाद दाहालले जानकारी दिए । हाम्रो नगर पर्या पर्यटन र संस्कृतिमा समृद्ध सहर परिचर्चा एवम् बहसमा हेटौंडाका नगर प्रमुख मिनाकुमारी लामा उपमहानगरपालिकाका उपनिर्देशक भीमप्रसाद तिमल्सिना र १० नम्बर वडाध्यक्ष फुर्वादोर्जे तमाङले सहभागिता जनाउने छन् ।
साहित्य, सिर्जना संवाद र सञ्चार परिचर्चा बहसमा पत्रकारद्वय प्रताप विष्ट र रामकुमार एलन तथा कवि शान्ति प्रिय बन्दनाले बहस गर्ने छन् । साझा सरोकार प्रतिलिपि अधिकारमाथि अधिवक्ताहरु मदन कुमार दाहाल, अप्सरा बस्नेत र विशभ अधिकारीले चर्चा र बहस गर्नेछन् । कविता ,जीवन र समाज परिचर्चा र बहस कार्यक्रम कविहरु निमेष निखिल, भूपिन खड्का, चन्द्र गुरुङ र सुदेश सत्यालकाे सहभागितामा हुनेछ ।
नेपाली भाषा, साहित्य र कलाको संरक्षण र संवर्द्धन गर्ने उद्देश्यले २०५६ सालमा विधिवत् रूपमा मातृभूमि साहित्य समाजको स्थापना भएको हो । समाजले विविध साहित्यिक कार्यक्रमहरूलाई निरन्तरता दिंदै स्थापित एवम् नव प्रतिभाहरू सम्मान गर्दै आएकाे समाजका अध्यक्ष कृष्णप्रसाद दाहालले बताए । समाजले विभिन्न विधामा सत्र वटा पुरस्कार एवम् सम्मान प्रादन गर्दै आएकाे बताइएकाे छ ।
चितवन । गजल मञ्च चितवन १९ औं वसन्तमा प्रवेश गरेकाे छ । १९ वर्षे जवानीमा प्रवेश गरेकाे मञ्चले गत मंगलबार गजल साँझ कार्यक्रम आयोजना गर्यो । मञ्चका संस्थापककाे घर भरतपुर–१२ मा ‘गजल साँझ’ गरेर वार्षिकोत्सव मनाइएकाे हाे ।
गजल साँझमा १८ जना स्रष्टाहरुले गजल वाचन गरेका थिए । केही स्रष्टाहरुले वहरमा गजल प्रस्तुत गरेका थिए । नेपाली गजल लेखनमा कलम चलाउनेहरुका लागि चितवनमा खोलिएको मञ्चले स्थापनाकालदेखि हालसम्म विभिन्न कालखण्ड पार गर्दै गजल विधालाई थप सशक्त बनाउने प्रयास गर्दै आएको छ ।
‘गजल लेख्नेहरुलाई सम्बोधन गर्न स्थापना भएको गजल मञ्च चितवन यहाँसम्म आइपुग्नुमा संस्थाका अग्रजहरुकै देन हो’, मञ्च अध्यक्ष रामकृष्ण अनायासले भने ‘त्यसकारण संस्थाले विगत र इतिहास बिर्संदैन ।’ झोलामा बसेको संस्थालाई छानोको आवश्यकता महसुस भएको उनले बताए ।
मञ्चका संस्थापक अध्यक्ष किसान प्रेमीले गजल मञ्च चितवन अब परिपक्व संस्थाको रुपमा विकास भइसकेको बताए । ‘गजल मञ्च चितवनको स्थापना हुनुपूर्व नै चितवनमा गजलको माहोल थियो’ उनले भने, त्यसलाई संस्थागतरुपमै व्यवस्थित बनाउन गजलकारहरुलाई एउटै छानोमुनि समेट्ने उद्देश्यले संस्था स्थापना गरेका हौँ ।’
उनका अनुसार २०६१ सालमै संस्था स्थापनाका लागि गजलकारहरुको भेलाले धनराज गिरीको संयोजकत्वमा तदर्थ समिति गठन गरेको थियो । तर, उक्त समिति पूर्णरुपमा निष्क्रिय भएपछि पुनः २०६३ सालको माघ ९ गते पुनः चितवनका गजलकारको अर्को भेलाले उक्त समितिलाई विघटन गरी किसान प्रेमीको संयोजकत्वमा अर्को तदर्थ समिति गठन भएको थियो ।
सोही वर्ष चैत २६ गतेका दिन जिल्ला प्रशासन कार्यालय चितवनमा संस्था आधिकारिक दर्ता भएपछि गजल मञ्च चितवनले वैधानिकता प्राप्त गरेको हाे । संस्थाको विधानअनुसार दुवै तदर्थ समितिमा रहेकाहरुलाई संस्थाको संस्थापक मानिने भएकोले संस्थापकको विषयमा प्रस्ट हुन नयाँ तथा पुराना स्रष्टाहरुलाई उनले आग्रह गरे ।
संस्थापकको विषयमा कुरा बाझिएको प्रसंगमा उनले भने, ‘कानुनतः संस्था सरकारी निकायमा दर्ता भएकै मितिलाई स्थापना भएको मानिन्छ । तर, त्यसभन्दाअघिका तदर्थ समितिमा रहेका सबैलाई संस्थापक मानिने भनेर विधानमै उल्लेख भएको हुँदा त्यतिबेला संस्था जन्माउनका लागि योगदान दिनुहुने सबैजना संस्थापक हुनुहुन्छ ।’
गजल मञ्च चितवनले स्थापनाकालदेखि नै भाषणलाई निषेध गरेकोसमेत उनले जानकारी गराए । ‘ढोकाबाहिर जुत्ता, चप्पल खोलेर भित्र आएपछि दुई लाइन भए पनि गजलका शेर सुनाउने र भाषण गर्दै नगर्ने भनेर पहिलो कार्यक्रमबाटै अभ्यास थालेका हौँ’, उनले भने, ‘त्यसैले गजल मञ्च चितवन भाषणका लागि होइन गजलकै लागि हो भनेर सबैले बुझिदिनुहुन अनुरोध छ ।’
मञ्चका निवर्तमान अध्यक्ष लेखराम सापकोटाले गजल लेखनमा सक्रिय रहेका स्रष्टाहरुको सामूहिक एकताले नै यो संस्था जवान उमेरमा आइपुगेको बताए । अग्रज साहित्यकार एलबी क्षेत्रीले संस्था स्थापना गर्नुभन्दा त्यसलाई जोगाउन बडो कठिन हुने बताउँदै भने ‘संस्थालाई जोगाउनका लागि ‘धूर्त’हरुबाट बचाउन आवश्यक छ ।’
मञ्चका संस्थापक बालकृष्ण थपलियाले गजल मञ्च चितवनका पछिल्ला गतिविधिले चितवनको गजल क्षेत्रलाई चलायमान बनाएको बताए । संस्थाले प्रकाशन गर्दै आएको ‘गजल सारथी’को प्रकाशनलाई निरन्तरता दिन उनले सुझाव दिए । ‘इतिहासलाई नबिर्सौं र गजल सारथीलाई प्रकाशन गर्न नछाडौँ’ उनले भने ।
मकवानपुर । हेटौंडा उपमहानगरपालिकामा गठित परियोजना परामर्श समितिले माइती नेपाल मकवानपुरबाट सञ्चालित मावन बेचविखन रोकथाम परियोजना २०२४ को समिक्षा गरिएको छ ।
बेचविखनमा परेका वा बेचविखनको जोखिममा रहेका, विद्यालय छाडेर बसेका वा छाड्ने अवस्थाका जवरजस्ती श्रम गर्न बाध्य तथा यौन हिंसा तथा दुर्व्यवहारमा परेका महिला, किशोरीहरुलाई उद्धार गरी आवधिक आवासको सहयोग, सिपमुलक कार्यक्रम/ तालिम प्रदान गर्ने उद्दश्यका साथ सञ्चालित परियोजनाबाट एक वर्षमा अपेक्षित उपलब्धि हासिल समिक्षा गरिएको थियो ।
परामर्श समितिका संयोजक नगर प्रमुख मिना कुमारी लामाको अध्यक्षतामा बसेको बैठकले माइती नेपालको कार्यप्रगती प्रशंसनीय भएको निश्कर्ष निकालेको छ । लक्ष्यित वर्गका महिला, किशोरीहरुलाई उनीहरुको बौद्धिक क्षमतामा सबै खाले हिंसाको विरुद्धमा महिला अभियानकर्ताको रुपमा स्थापित हुन सहयोग गरेको, सरकारी तथा गैर सरसरकारी संस्था, महिला तथा बालबालिकाहरुसंग सम्बन्धित संस्थाहरु र संजालसँग सहकार्य र समन्वय गरी मानव बेचविखन र सबैखाले हिंसा विरुद्ध लड्न एक्वद्धता जाहेर गरेको माइती नेपाल मकवानपुर कार्यक्रम संयोजक माया तामाङले बताइन् ।
माइती नेपालले परियोजना सञ्चालनको क्रममा यसबीचमा १० किशोरी तथा महिलाहरुले सिलाई कटाइ सम्बन्धी एडभान्स तालिम प्रदान गरेको, १० जनाले नै सिलाई व्यवसाय संचालन सुरु गरेको बताइएको छ । यसैगरी माइती नेपालमा ४८ औं समुहमा तालिम प्राप्त गरेकी १ जना किशोरी एसईई पास भएपछि घरको आर्थिक अवस्था कमजोर भएर पढ्न नपाकोमा गृहको समन्वयमा इस्थर बेन्जामिन स्मृति संस्थासँग समन्वय गरेपछि निजलाई हाल कक्षा ११ मा भर्ना गरिदिएको छ ।
यसैगरी ९ हजार ४३५ जना विधार्थीहरु, समुदायले मानव बेचविखन तथा ओसारपसार विरुद्ध जानकारी पाएको, एडभान्स तालिम लिएको १ जना र बेशिक तालिम लिएको १ जना बहिनीहरुलाई यस गृहको समन्वयमा ओसीएमसीबाट जनही १ लाख बराबरको सिलाई सामाग्री प्रदान भएको थियो ।समिक्षामा माइती नेपाल मकवानपुर कार्यक्रम संयोजक तामाङले विभिन्न चुनौती समेत सामना गर्न परेको बताइन् । यौन हिंसा,घरेलु हिंसाको मुद्दाहरुमा बृद्धि, आन्तरिक मानव बेचविखनका क्रियाकलापमा बृद्धि, मुद्दाहरु होस्टायल हुने चुनौती, पिडक पक्षको धम्की, भारतीय तथा अन्य मुलुकबाट वैदेशिक रोजगारको लागि खाडी मुलुक तथा अन्य मुलुकमा गएर अलपत्र परेका महिलाहरुलाई उद्धार गर्न समस्या, साइबर अपराधको मुद्दाहरुमा बृद्धि, सामाजिक संजालको दुरुपयोग जस्ता चुनौती रहेको उनले बताइन् ।
हेटौंडा नगर प्रमुख लामाले माइती नेपालको कार्यशैली पारदर्शी भएकोले आगामी वर्षको लागि पनि परियोजना सञ्चालनको लागि स्वीकृत प्रदान गरेको बताइन् । यसैगरी उपमहानगरपालिका कार्यकारी अधिकृत भरत गौतमले गैससको सहकार्यले स्थानीय सरकारलाई होस्टेमा हैंसे गराउने बताए । बैठकमा उपमहानगरपालिकाका विभिन्न महाशाख प्रमुखहरु, जिल्लाका विभिन्न गैससका प्रमुख तथा प्रतिनिधिहरुको उपस्थिति रहेको थियो ।
गत आर्थिक वर्षमा बोनो र चान्स स्वीसको आर्थिक सहयोगमा मावन बेचविखन रोकथाम परियोजना २०२४ परियोजना सञ्चालनमा थियो । माइती नेपालबाट आगामी वर्षको लागि Consolidated Actions Against Human Trafficking 2025 सञ्चालनको लागि उपमहानगरपालिकाले अनुमती प्रदान गरेको छ ।