हेटौंडा २ नम्बर वडा बालमैत्री घोषणा हुने
Tags: No Comments
मकवानपुर । मकवानपुरकाे हेटौंडा उपमहानगरपालिका वडा–२ बालमैत्री स्थानीय शासन युक्त वडा घोषणा हुने भएकाे छ । वडा कार्यालयले बिहिबार पत्रकार भेटघाट गर्दै साउन १२ गते शनिबार वडालाई बालमैत्री शासनयुक्त वडा घोषणा हुने जनाकारी दिएकाे हाे ।
वडाले बालमैत्री स्थानीय शासन घोषणाका लागि आवश्यक सूचक पुरा गरेपछि घोषण गर्न लागिएकाे पत्रकार भेटघाटमा बताइएकाे छ । बालमैत्री स्थानीय शासनकाे लागि तोकिएकाे आवश्यक ५१ वटा सूचकमध्ये ४५ वटा सूचक सतप्रतिशत, ३ वटा ९६ प्रतिशत १ वटा ९५ प्रतिशत र १ वटा ९० प्रतिशत पूरा भएकाेले घोषणाकाे तयारी गरिएकाे वडा अध्यक्ष विष्णुगोपाल महर्जनले बताए ।
बालमैत्री घोषणा सम्बन्धमा वडा अध्यक्ष महर्जनले वडामा १८ वर्षमुनिका १ हजार ८ सय ११ बालबालिका रहेकाेमा ५२.१३ प्रतिशत् (९ सय ४४) बालक र ४७.८७ प्रतिशत (८सय ६७) बालिका रहेकाे जानकारी दिए ।बालबालिकाको सक्रिय सहभागिताका लागि १९ वटा बालसमूह र १ वटा वडा बालसञ्जाल गठन गरिएकोमा ४ सय ६० बालबालिका आबद्ध रहेका छन् । विभिन्न संरचनागत् समितिमा थप २५ जनासहित कुल ४ सय ८५ बालबालिकाको प्रत्यक्ष सहभागिता रहेका उनले बताए ।
वडामा १ सामुदायिक र २ संस्थागत गरी ३ विद्यालय र २ वटा बालविकास केन्द्र सञ्चालनमा छन् जसले बालबालिकालाई शिक्षाको पहुँचमा ल्याएको छ । विद्यालयहरुमा छात्र र छात्राका लागि अलग शौचालय व्यवस्था, छात्राहरुकाे लागि सेनिटरी प्याड वितरण र बालमैत्री आचारसंहिता लागू गरिएको छ । ३ वटै विद्यालय बालमैत्री स्थानीय शासन युक्त घोषणा भइ सकेकाे छ ।
वडाले बालबालिकाको स्वास्थ्य र पोषण सुधारका लागि पूर्ण स्तनपान प्रवद्र्धन र स्तनपानकक्ष स्थापना गरेको छ । पोषण शिक्षा र ५० सुत्केरी तथा बालबालिकालाई पोषण सामग्री वितरण गरेको अध्यक्ष महर्जनले बताए । बालसंरक्षणका लागि वडाले बालविवाह, बालश्रम र बाल दुव्र्यवहारविरुद्ध सचेतना कार्यक्रमहरु गरेको छ । बालअधिकार समितिको सक्रिय काम भइरहेको र बालश्रममा भेटिएका बालबालिका उद्धार, मनोसामाजिक परामर्श र पारिवारिक पुनस्र्थापना गरिएको अध्यक्ष महर्जनले बताए ।
अध्यक्ष महर्जनका अनुसार विद्यालय र समुदायमा लागुपदार्थ दुर्व्यसन र साइबर अपराध सम्बन्धी सचेतना कार्यक्रम, बालमैत्री सम्पर्क व्यक्ति नियुक्ति, जन्मदर्ता अभियान र विद्यालय भर्नामा जन्मदर्ता अनिवार्य जस्ता कार्य गरिएका छन् । “बालबालिकामा लगानी सुनिश्चित भविष्यको थालनी हो । शनिबारको घोषणासँगै हामी बालबालिकाको सर्वांगीण विकासका लागि थप प्रतिबद्ध र जवाफदेही हुनेछौं’ उनले भने
‘बालबालिकाको सुन्दर भविष्य निर्माणमा घरपरिवारको साथै यस वडाको ठूलो जिम्मेवारी र दायित्व हुन्छ । भविष्यमा वडा सञ्चालनको महत्वपुर्ण हिस्सा ओगटेको आजको बालबालिकाको क्षेत्रमा वडाले लगानी गर्नु पर्दछ। यसमा परिवारको पनि अहम् भूमिका रहन्छ। बालवालिकाको बाच्न पाउने अधिकार, संरक्षणको अधिकार, बिकासको अधिकार र सहभागिताको अधिकारको बिषयमा सबै सरोकारवाला निकाय जिम्मेवार बन्नै पर्ने हुन्छ । बालबालिकाले अधिकारको मागसंगै उनीहरुले पनि कर्तब्यबोध पनि गर्नुपर्ने हुन्छ ।’ प्रेस विज्ञप्तिमा भनिएकाे छ ।
कार्यक्रममा स्थानीय जनप्रतिनिधि, सरकारी अधिकारी, नागरिक समाजका प्रतिनिधि र विशेषगरी बालबालिकाको उपस्थिति रहने जनाइएको छ । घोषणाकाे अवसरमा वडाको बालमैत्री यात्रा,उपलब्धीहरु र भावी योजनाको प्रतिवेदनकाे प्रस्तुति रहने बताइएको छ । यस अघि हेटौडाकाे ८ नम्बर वडा बालमैत्री स्थानीय शासन युक्त घोषणा भइ सकेकाे छ ।
पत्रकार सम्मेलनमा बालमैत्री सम्पर्क व्यक्ति तथा वडा २ काे सदस्य सुरज बर्ताैला, वडा सचिव रामप्रसाद गुरागाईं,बाल जागृति बाेर्डिङ स्कुलमा प्रिन्सिपल बिनाेद सुवेदी, बालमैत्री नगर सहजकर्ता सपना ढुङ्गानालगायतकाे सहभागीता रहेकाे थियाे ।
मकवानपुर ।निजगढ-काठमाडौ फास्टट्र्याक सुरुङ भित्र काम गर्ने क्रममा ढुङ्गाले लाग्दा मकवानपुरमा एक जनाको ज्यान गएको छ, घटनामा अर्को एक जना घाइते भएका छन् ।
मकवानपुर जिल्ला बकैया गांउपालिका १२ चालिसे डाँडा स्थित फास्ट्याकको सुरुङमार्ग भित्र काम गर्ने क्रममा ढुङ्गाले लाग्दा बारा जिल्ला निजगढ घर भई हाल बकैया १२ सुरुङमार्गमा काम गर्दै आएका अन्दाजी २८ बर्षिय बिमल थिङको घटनास्थलमा मृत्यु भएको मकवानपुर प्रहरीले जनाएको छ ।
यसैगरी तनहुँ जिल्ला घर बकैया १२ मै बसेर सुरुङमा काम गर्ने अर्का २८ को राजु बि.क घाइते भएका छन् ।
उनको ढाडँ र कम्मरमा चोट अबस्था गम्भिर रहेको मकवानपुर प्रहरीले जनाएको छ ।
उनको चुरेहिल सिएमसी अस्पताल हेटौंडामा उपचार भैरहेको छ ।
मकवानपुर । मकवानपुरकाे हेटाैंडामा तेक्वान्दो खेलका ६ जना खेलाडी सम्मानित गरिएकाे ५ । तेक्वान्दोका विभिन्न प्रतियोगितामा उत्कृष्ट प्रदर्शन गर्ने खेलाडीलाई आइतबार हेटौंडा–१७, हटियामा सम्मान गरिएको हाे ।
४ जना छात्रा र २ जना छात्र गरी ६ जनालाई सम्मान गरिएकाे क्रियटिभ तेक्वान्दो डोजाङले जनाएको छ । सम्मानित हुनेमा चौथो संस्करणको नेपाल अन्तर्राष्ट्रिय तेक्वान्दोमा ३९ केजी तौल समूहमा प्रथम, पुम्से विधामा प्रथम र चन्द्रागिरी राष्ट्रिय प्रतियोगितामा तेस्रो स्थान हासिल गरेका आदित्य पराजुली, खुला राष्ट्रिय तेक्वान्दोमा २० केजी तौल समूहमा प्रथम र चन्द्रागिरी तेक्वान्दोमा २० केजी तौल समूहमा दोस्रो र पुम्से विधामा प्रथम आरुषी पराजुली रहेका छन् ।
यसैगरी ४१ केजी तौल समूहमा तृतीय, ३८ केजीतौल समूहमा तृतीय र पुम्से विधाम द्वितीय आदित्य ढकाल, पुम्से विधामा तृतीय रिवानी अधिकारी र महिलातर्फ ३२ केजी तौल समूहमा प्रथम इच्छा विष्ट सम्मानित गरिएकाे क्रियटिभ तेक्वान्दो डोजाङले जानकारी दिएकाे हाे । चन्द्रागिरी तेक्वान्दोमा तृतीय प्रिन्स ढकाललाई पनि सम्मान गरिएको छ । प्रतियोगिता आयोजनाकाे लागि सहयोग गर्ने सहयोगी दाताहरुलाई मायाको चिनो प्रदान गरिएको छ । उनीहरूलाइ नगर प्रमुख मिना कुमारी लामाले सम्मना प्रदान गरेकी थिइन् ।
नगर प्रमुख लामाले बंगलादेशको राजधानी ढाकामा हुने अन्तर्राष्ट्रिय तेक्वान्दोमा सहभागिताकाे लागि १ लाख रुपैयाँ सहयोग गर्ने घोषणा समेत गरिन् । २०७७ साल असोज ४ गते हरिबहादुर महतले हेटौंडा १७ मा जग्गा उपलब्ध गराएर २०७८ सालमा वडाको ४ लाख र जनश्रमदानबाट १ लाख २६ हजार गरी ५ लाख २६ हजारको पिलरमात्र उठाउने काम भएकाले नगरपालिकामार्फत् बजेट लगानी गर्ने उनले बताइन् ।
राष्ट्रिय तेक्वान्दो प्रतियोगिताको आय–व्यय सार्वजनिक
हेटौंडा–१७, हटियामा भएको पहिलो संस्करणको राष्ट्रिय तेक्वान्दो प्रतियोगिताको आय–व्यय सार्वजनिक गरिएको छ । क्रियटिभ तेक्वान्दो डोजाङको आयोजनामा गत वर्षको कार्तिक १७ र १८ गते भएको राष्ट्रिय तेक्वान्दो प्रतियोगिताको आय–व्यय विवरण करिब ९ महिनापछि सार्वजनिक गरिएको हो ।
आइतबार हटियामा भएकाे कार्यक्रममा दुई दिन सञ्चालन भएको प्रतियोगितामा करिब १० लाख रुपैयाँ खर्च भएको डोजाङ प्रमुख भोजराम पराजुलीले सार्वजनिक गरे । डोजाङ प्रमुख पराजुलीले प्रतियोगितामा ९ लाख ९४ हजार ४ सय ७५ रुपैयाँ खर्च भएको विवरण प्रस्तुत गरेका थिए । यस्तै, प्रतियोगिता संचालनकाे लागि विभिन्न क्षेत्रबाट ९ लाख २१ हजार ५ सय रुपैयाँ सहयाेग प्राप्त भएकाे उनले जानकारी दिए ।
प्रतियोगितामा मकवानपुर र बाहिरी जिल्लाका खेलाडीहरुको दर्ता शुल्कबाट २ लाख ७२ हजार ५ सय रुपैयाँ, बागमती प्रदेश खेलकुद विकास परिषद्बाट २ लाख रुपैयाँ, हेटौंडा उपमहानगरपालिकाबाट १ लाख रुपैयाँ, खेलकुद विकास समिति हेटौंडा–१७ तथा वडा कार्यालयबाट ८५ हजार रुपैयाँ प्राप्त भएको आय–व्यय विवरणमा उल्लेख छ ।
यस्तै, नारायण सिंह थिङबाट ५० हजार रुपैयाँ, १६ नम्बर वडा कार्यालय र कृष्णप्रसाद पराजुलीबाट २०–२० हजार रुपैयाँ, शिवम् सिमेन्ट र पोषक ब्रिडरबाट १५–१५ हजार रुपैयाँ प्राप्त भएको छ । प्रेमबहादुर गुरुङबाट १० हजार ५ सय रुपैयाँ, केशवबहादुर कार्की, सागर कटुवाल, प्रदीप अर्याल र डिस मिडिया नेटवर्कबाट १०–१० हजार रुपैयाँ प्राप्त भएको जनाइएको छ ।
प्रतियोगिता आयोजना गर्दा खेलाडीको आवासका लागि १ लाख ६१ हजार रुपैयाँ, टिमकोच र टिम म्यानेजरका लागि १६ हजार १ सय रुपैयाँ, खानामा २ लाख २५ हजार २ सय रुपैयाँ, खेल सामग्रीमा ५२ हजार रुपैयाँ खर्च भएको उल्लेख छ । छपाइमा १० हजार रुपैयाँ, मायाको चिनो र फ्रेममा ३४ हजार रुपैयाँ, स्पिकरमा १२ हजार रुपैयाँ, चौर मर्मतमा ३३ हजार ७ सय ५० रुपैयाँ खर्च भएको जनाइएको छ ।
यसैगरी मेडलमा ३० हजार रुपैयाँ, प्रमाणपत्रमा २१ हजार ३ सय ५० रुपैयाँ, खेलाडीको पुरस्कारमा ३८ हजार रुपैयाँ, शिल्डमा ३२ हजार ८ सय रुपैयाँ, पानीमा १२ हजार ६ सय रुपैयाँ, रेफ्री भत्तामा ९३ हजार रुपैयाँ, यातायातमा १६ हजार ५ सय रुपैयाँ खर्च भएको आय–व्यय विवरणमा उल्लेख छ । बत्ती व्यवस्थापनमा १७ हजार ५ सय रुपैयाँ, इन्धनमा १६ हजार ५ सय रुपैयाँ, खाजामा ४५ हजार २ सय ४० रुपैयाँ खर्च भएको छ ।
काठमाडौ । जुनू घिमिरेको कवितासङ्ग्रह प्रदीप्त मन सार्वजनिक भएको छ । शनिबार काठमाडौंमा कवि तथा नाटककार अशेष मल्ल, कवि डा.नवराज लम्साल, कवि समालोचक शैलेन्दुप्रकाश नेपाल र छन्द कवि डा.देवी नेपालले संयुक्त रुपमा कवितासङ्ग्रहको लोकार्पण गरेका हुन् ।
अशेष मल्लले घिमिरेको कवितामा समयको स्वर रहेको बताए । उनका कविता सरल छन् तर वोधगम्य छन् । डा.नवराज लम्सालले घिमिरेको कविता राम्रो बनाउने नाममा अस्पस्टता र क्लिष्टता नभएको बताए । शैलेन्दुप्रकाश नेपालले इमानदारीपूर्वक कविता कोरेकी जुनूको शब्द समायोजनको पक्ष सुन्दर रहेको बताए । डा.देवी नेपालले सकारात्मक सोच नै कविताको विशेषता रहेको बताउँदै उठान र अन्त्य अझै सशक्त भएको बताए ।
कार्यक्रम कविहरू निर्जाला लम्साल, रचना दहाल र सुशील शर्माले प्रदीप्त मन भित्रबाट केही कविताहरू वाचन गरेका थिए । ४३ वटा कविता समेटिएको प्रदीप्त मन घिमिरेको दोस्रो कविता संग्रह हो । उनको यसअघि पसिनाको घर २०८० प्रकाशित छ ।
कवितासङ्ग्रह प्रदीप्त मनलाई जुपिटर पब्लिकेसन्सले प्रकाशित गरेको हो ।
मानव बेचविखनको रुप फेरियो, चुनौती उस्तै
Tags: No Comments
मकवानपुर । नेपालको संबिधान २०७२ मा मौलिक हक अन्तर्गत धारा २९ मा शोषण विरुद्धको हकको व्यवस्था गरिएको छ । जसमा “(१) प्रत्येक व्यक्तिलाई शोषण विरुद्धको हक हुनेछ, (२) धर्म, प्रथा, परम्परा, संस्कार, प्रचलन वा अन्य कुनै आधारमा कुनै पनि व्यक्तिलाई कुनै किसिमले शोषण गर्न पाइने छैन, (३) कसैलाई पनि बेचबिखन गर्न, दास वा बाँधा बनाउन पाइने छैन, (४) कसैलाई पनि निजको इच्छा विरुद्ध काममा लगाउन पाइने छैन” भनिएको छ ।
तर मानव बेचविखनको स्वरुपमात्रै परिवर्तन भएको छ, अझै पनि चुनौती उस्तै छन् । मानव बेचबिखन तथा ओसारपसारलाई अनियमित बसाँइसराई, मानव तस्करी आदिबाट पृथक राख्ने गरेको पाइन्छ । बेचबिखन तथा ओसारपसारमा परेकाहरूलाई बल प्रयोग गरी वा त्रासमा पारी मानव बेचबिखन तथा ओसारपसारमा संलग्नहरूको माग पूरा गर्न बाध्य पारेको पाइन्छ ।
यस्तै चुनौतीहरु मुकाविला गर्दै मानव बेचविखन विरुद्ध सामूहिक ऐक्यवद्धता जनाएका छन् । माइती नेपाल मकवानपुरले ‘हाम्रो आवाजःमानव वेचविखनबाट मुक्त समाज’ भन्ने नाराका साथ मानव वेचविखन तथा ओसारपसार विरुद्ध यातायात व्यवसायी र होटेल व्यवसायीसंग अन्तरक्रिया कार्यक्रममा सहभागीहरुले यस्तो ऐक्यवद्धता जनाएका हुन् ।
शुक्रबार हेटौंडामा आयोजना गरिएको कार्यक्रममा पीडितलाई सांस्कृतिक, भाषिक रूपमा एक्ल्याई शारीरिक चुनौतिपूर्ण वातावरणमा राखिने, कानुनी पहिचान र न्यायमाथिको पहुँचबाट टाढा पु-याइने जस्ता चुनौतीबारे छलफल गरिएको थियो ।
पछिल्लो समय विदेशमा कामका प्रलोभनहरुमा पारेर बेचविखन हुने गरेको माइती नेपाल मकवानपुर प्रमुख माया तामाङ्ले बताइन् । फ्रि भिसा, फ्रि टिकेट, निःशुल्क बसोबासको व्यवस्था, निःशुल्क खानपानको व्यवस्थाको प्रलोभनमा पारेर डक्टर, नर्स, इन्जिनियर, टेक्निसियन, विद्यार्थी, कलाकार, व्यापारी, जो कोही पनि बेचिन सक्ने तामाङले बताइन् ।
देहव्यापार, मनोरञ्जनको क्षेत्रमा प्रयोग, अश्लिल सामाग्री निर्माणमा प्रयोग, दास जस्तै बनाएर काममा लगाउने, बालबालिकाको किनबेच, गैर कानूनी रुपमा धर्म सन्तानको रुपमा किनबेच, अनघिकृत रुपमा बालगृहमा ओसारपसार गर्ने र राख्ने, बालबालिकालाई उँट चालकको रुपमा प्रयोग, कानून बमोजिम बाहेक मानव अंग झिक्ने, बेच्ने, माग्ने बनाएर जस्ता रुपमा मानव बेचबिखन हुने गरेको उनले बताइन् ।
कार्यक्रममा आफ्नो टोलमा हुने घटना न्यूनीकरणको लागि आफूआफै पनि लागिपर्नु पर्ने हेटौंडा उपहानगरपालिका वडा नं. १० को वडा सदस्य गोमा सुनारले बताइन् । संस्थाले गर्ने जनचेतनामुलक काममा सहकार्य गर्नुपर्ने सुनारले बताइन् । विकाससंगै चेतनाको स्तर बढाउन जनप्रतिनिधिले ध्यान दिनुपर्ने उनले बताइन् ।
कार्यक्रममा सामुदायिक प्रहरी सेवा उपकेन्द्रको अध्यक्ष प्रदिप कडेलले प्रहरीसंगको सहकार्यमा बेचबिखन विरुद्ध अनरवत लागिरहेको बताए । कार्यक्रममा होटेल एशोसिशनको महासचिव हरिगोपाल सापकोटा, प्रहरी सहायक निरीक्षक अरुणकुमार सिंह, मानव बेचविखन तथा ओसारपसार विरुद्धको प्रदेश स्तरीय समितिको सदस्य प्रकाश खतिवडा, मानव अधिकार संगठनको अध्यक्ष सर्मिला श्रेष्ठ, हिमराइट्स मकवानपुरको कार्यक्रम संयोजक कुमारी वाइवा, साना हातहरु नेपालको स्टेशन म्यानेजर डिकम्बर रुपाचा, कोशिशको पैरवी अधिकृत सुनिरा लामा, अस्मिता नेपालको कार्यक्रम संयोजक शान्ती कार्की, नारी संरक्षण केन्द्रको अस्मिता प्रजा, मकवानपुर महिला समुहको कार्यक्रम अधिकृत निशा लामालगायतको उपस्थिति थियो ।