वडा कार्यालयद्वारा महिनावारी प्याड वितरण
Tags: No Comments
मकवानपुर । हेटौंडा उपमहानगरपालिका वडा ५ कार्यालयले छात्राहरूको लागि महिनावारी प्याड वितरण गरेको छ ।
वडा कार्यालयले १ लाख २५ हजार लगानीमा खरिद गरेको महिनावारी प्याड वडा भित्र रहेको बालज्योती मावि र लक्ष्मी माविलाई वितरण गरेको हो ।
कार्यालयले जम्मा २१ कार्टुन ( प्रती कार्टुन ९६ प्याकेज) महिनावारी प्याड खरिद गरेको थियो । जसमध्ये छात्रा संङ्ख्याको आधारमा बालज्योति माविलाई १० कार्टुन र लक्ष्मी माविलाई ६ कार्टुन वितरण गरिएको वडा सदस्य रन्जिता सिलवालले बताइन् ।
विद्यालयबाट वितरण गर्दै आएको महिनावारी प्याडले छात्राहरूलाई नियमित कक्षामा उपस्थित हुन धेरै मद्दत गरेको बालज्योती मावि पिप्लेका विद्यालय व्यवस्थापन समिती अध्यक्ष रबिन्द्र पोखरेलले बताए ।
वडा कार्यालयले पिप्ले शहरी स्वास्थ केन्द्रमा कर्मचारी तथा सेवाग्राहीहरूलाई समेत सहयोग हुनेगरी हाललाई १ कार्टुन प्याड उपलब्ध गराएको छ ।
यसैगरी ५ नम्बर कार्यालयमा पनि कर्मचारी तथा सेवाग्राहीलाई समेत प्रदान गर्ने गरि ४ कार्टुन प्याड राखिएको सिलवालले बताइन् । “सेवाग्राहीहरू कहिले काहीँ धेरै समस्यामा पर्ने गरेको थाहा पाएको छु”सिलवालले भनिन् “उहाँहरूलाई समेत सहायता होस् भनेर हामी अब यस्तो सेवा पनि दिने योजना बनाएका हौं । “
प्याड वितरण कार्यक्रममा वडा सदस्यहरू ज्ञानबहादुर थापा, रामबहादुर राई, रन्जिता सिलवाल, भगवती बि.क, वडा सचिव अनिता भट्टराई, बिद्यालयका प्रतिनिधिहरूको उपस्थिति रहेको थियो ।
मकवानपुर । बागमती प्रदेश सरकारका प्रबक्ता एवम् आन्तरिक मामिला तथा कानुन मन्त्री गंगानारायण श्रेष्ठले जिल्ला कारागार सिन्धुलीलाई राइस स्टीमर मेसिन प्रदान गरेका छन् ।
आज मन्त्री श्रेष्ठले गृह जिल्ला पुगेर जिल्ला कारागार, सिन्धुलीलाई ४ थान राइस स्टीमर मेसिन हस्तनातरण गरेका हुन् ।
कारागारमा रहेका १ हजार कैदीबन्दिलाई दाउरा बालेर खाना बनाउनको असहज तथा स्वास्थ्यमा समेत समस्या हुने गरेको गुनासो आएकोले गुनासोको सम्बोधन गर्दै मन्त्रि श्रेष्ठले खाना पकाउनको लागि राइस स्टीमर मेसिनको ब्यबस्था गरिदिएको जेलर कुसल न्यौपानेले बताए ।
केहि समय अगाडि जिल्ला कारागार सिन्धुलीको अनुगमनको क्रममा १ हजार जनाभन्दा धेरै कैदिबन्दीलाई खाना बनाएर खानको लागि समस्या भएको गुनासो आएको थ्यो ।
“दाउरामा बिहान बेलुका खाना बनाएर खानको लागि कैदीबन्दीले भोगेको समस्या मैले आफैले देखे, कैदिबन्दिको चाप देखेर अस्वभाविक महशुस गरे, अनि यस्तो व्यवस्थापन गरिएको हो” श्रेष्ठले भने ।
राइस स्टीमर नेपालमा भएका थुप्रै कारागार मध्य पहिलो पटक सिन्धुलीलाई उपलब्ध गराइएको हो । यो उपरकरण नेपालमा सेना तथा प्रहरीले मात्रै प्रयोग गर्ने गरेका थिए । सिन्धुलीमा प्रभावकारी भएमा अन्य जिल्लामा पनि प्रदान गर्न प्रयास गर्ने उनले बताए ।
आन्तरिक मामिला तथा कानुन मन्त्रालयले कारागारलाई यसरी खाना पकाउन राइस स्टिमर प्रदान गरेको नेपालमा नै पहिलो पटक हुन सक्छ जेलर न्यौपानेले बताए। यसरी प्राप्त भएको उपकरणले कैदिबन्दीलाई खाना पकाउन सहज हुने र धुवाँबाट हुने स्वास्थ्य सम्बन्धि समस्य पनि हट्ने जेलर न्यौपानेले बताए ।
२४ ट्रे को २ थान र १२ ट्रे २ थान गरी चार थान राइस स्टीमर कारागारलाई प्रदान गरिएको हो । जसमा एक पटकमा २४ ट्रे मा ७५ किलो र १२ ट्रे मा ३५ किलो चामल पकाउन मिल्छ ।
स्टिमर हस्तान्तरण कार्यक्रममा मन्त्रालयका सचिब ध्रुव गैँडा, सिन्धुलीका प्रमुख जिल्ला अधिकारी सुनिता नेपाल, प्रहरी प्रमुख राजकुमार सिलवाललगायतको उपस्थिति रहेको थियो ।
मकवानपुर । जिल्ला प्रहरी कार्यालय मकवानपुरले डेढ करोडको अबैध सामग्रीहरु बरामद गरेको छ ।
भारतिय ट्रकमा प्याजका बोराहरुले छोपी प्याजकै भन्सार बिल बनाई भन्सार छलेर ल्याइएको सामान प्रहरीले बरामद गरेको हो । जसमा विभिन्न किसिमका ९० बोरा अबैध कपडाहरु छन् । कपडासँगै २ जनालाई प्रहरीले नियन्त्रणमा लिएको छ ।
बागमती प्रदेश प्रहरी कार्यालय हेटौडा, जिल्ला प्रहरी कार्यालय मकवानपुर तथा मातहत कार्यालय समेतको निगरानीमा खटिएको संयुक्त प्रहरी टोलीले विशेष सुचनाको आधारमा उक्त सामग्री बरामद गरेको जिल्ला प्रहरी कार्यालय मकवानपुरका प्रवक्ता प्रहरी निरीक्षक टेबबहादुर कार्कीले बताए ।
हेटौंडा१५ स्थित रातोमाटे चेकपोष्ट अगाडी पुर्व पश्चिम सडकखण्डमा सिराहाबाट हेटौडा तर्फ आउदै गरेको 06 GE 5053 नं को भारतिय ट्रकलाई रोकी चेकजांच गर्ने क्रममा सो ट्रकको पछाडीको भागमा चारैतिरबाट प्रति बोरा ५० किलोको १६८ बोरा प्याजको भन्सार काटी प्याजकै बोराहरुले छोपी विच भागमा कपडा राखिएको थियो ।
कपडासँगै ट्रक चालक भारत पन्जाब राज्य जिल्ला लोदियाना ग्राम रसलपुर वडा नं ७ बस्ने बर्ष ३३ को रन्जौद सिंह र सह चालक भारत बिहार राज्य जिल्ला मोजफरपुर ग्राम माहामाद बस्ने बर्ष २६ को सुधिर कुमार सहनीलाई नियन्त्रणमा लिईएको छ ।
बरामद गरिएको सामग्री थप अनुसन्धानको लागी आन्तरिक राजश्व कार्यालय हरिहर भवन ललितपुर पठाईने कार्कीले बताए ।
जसमा पाईन्टको कपडा १ करोड २८ लाख ९६ हजार मुल्यको रहेको छ । यसैगरी सुटको कपडा ३ लाख, सर्टको कपडा १६ लाख ७६ हजार २५० रुपैयाको रहेको प्रहरीले अनुमान गरेको छ ।
यसैगरी कुर्था १ लाख ३ हजार रुपैयाँको, कोरा कपडा ५ लाख २५ हजार ४४७ रुपैयाको रहेको अनुमान प्रहरीले गरेको छ ।
ढुवानीमा प्रयोग भएको ट्रकको अन्दाजी मुल्य २० करोड रहेको कार्कीले बताए । यसैगरी सोही ट्रकमा ढुवानी गरिरहेको अन्दाजी ८४ कुन्टल प्याज पनि बरामद गरिएको छ ।
मकवानपुर । बागमती प्रदेशकाे राजधानी हेटाैडामा दाेस्राे विजय युथ गाेल्डकप हुने भएकाे छ । शनिबार विजय युथ क्लबले पत्रकार सम्मेलन गरी प्रतियाेगिता असार ५ गतेबाट १५ गतेसम्म हुने जानकारी दिएकाे हाे ।
खेलाडीहरुको बीचमा भातृत्व सम्बन्ध स्थापना गर्दै फुटबलको विकासका निम्ति क्लवले दोस्रो विजय यूथ गोल्डकपको आयोजना गर्न लागेको क्लब अध्यक्ष सुदिप राजवाहकले जानकारी दिए । हेटौंडा ५ पिप्ले क्याम्पा रंगशालामा हुने प्रतियाेगितामा १६ टिमकाे सहभागिता रहने छ ।
प्रतियाेगितामा हेटौंडा फुटबल एकेडेमी, विजय यूथ क्लव, हटिया भेट्रान्स क्लव, ढल्केजोवान एफसी, रिगल हेटौंडा रिसोर्ट मकवानपुर, नागस्वती एफसी, पदमपोखरी युनाइटेड, हर्नामाडी यूथ क्लव, एफसी विजय यूथ, अग्रसर यूथ क्लव, समाजकल्याण एफसी, बागमती प्रदेश प्रहरी गण, चाइना पब्लिक यूथ क्लव, चौकीटोल यूथ क्लव, पशुपति युवा क्लव, हेटौंडा फुटबल एकेडेमी ए काे सहभागिता रहने राजवाहकले बताए ।
गाेल्डकपकाे विजेताले २ लाख नगदसहित ट्रफी, मेडल र प्रमाणपत्र प्राप्त गर्ने छन् भने उपविजेताले १ लाख नगदसहित ट्रफी, मेडल र प्रमाणपत्र प्राप्त गर्ने छन् । यसैगरी सर्वोत्कृष्ट खेलाडीलाई ५ लाख बराबरको बीमा, नगद १० हजार रुपैया प्रदान गरिने राजवाहकले बताए । प्रतियोगिताकाे विधागत उत्कृष्ट खेलाडी र प्रशिक्षकलाई जनही नगद ५ हजार रुपैयाँसहित ट्रफी / प्रत्येक खेलको म्यान अफ द म्याचलाई पुरस्कारकाे व्यवस्था रहेकाे उनले जानकारी दिए ।
असार ५ गते बेलुका ४ बजे हुने उद्घाटन खेल एफसी विजय युथ र अग्रसर यूथ क्लव बीच हुने तालिका छ । प्रतियाेगितामा अनुमानित १३ लाख खर्च आयाेजकले जनाएकाे छ ।
यसअघि प्रतियोगिताको पहिलो संस्करण माघ २०७७ मा भएकोमा उपाधि आयोजक टिम एफसी विजय युथ क्लबले हात पारेको थियो । आयोजकले सेन्ट्रल कलेज विएसी भरतपुरलाई २-१ गोल अन्तरले पराजित गर्दै पहिलो सस्करणको उपाधि जितेको थियो ।
मकवानपुर । मकवानपुरको हेटौंडा उपमहानगरपालिकाका वडा अध्यक्षहरूले प्रदेश सरकारको बजेट बहिष्कार गरेका छन् ।
बागमती प्रदेशका मुख्यमन्त्री शालिकराम जम्मकट्टेलले बजेट बिनियोजनमा विभेद गरेको भन्दै वडाअध्य्क्षहरूले मुख्यमन्त्री र उनका मन्त्रीहरुलाई बहिष्कार गर्ने भएका हुन् ।
शनिबार पत्रकार सम्मेलन गर्दै वडाध्यक्षहरुले प्रदेश सरकारले राजधानी हेटौंडाको विकास निर्माणको लागि कुनै बजेट विनियोजन नगरेको भन्दै घोर आपत्ती जनाए । वडाध्यक्षहरुले हेटौंडामा हुने सार्वजनिक कार्यक्रममा मुख्यमन्त्री र मन्त्रीहरु सहभागि भए उनीहरुलाई कालो झण्डा देखाउँदै बहिष्कार गर्ने बताए ।
पत्रकार सम्मेलनमा बोल्दै हेटौंडा-१४ का वडाध्यक्ष दीपक खड्काले राजधानीको विकासका लागि बजेट विनियोजन नगरेको भन्दै आफूहरुले प्रदेशका मन्त्रीहरुलाई सार्वजनिक कार्यक्रममा कालो झण्डा देखाउने र बहिष्कार गर्ने तयारीका साथ अघि बढ्ने तयारीमा रहेको बताए । उनले प्रदेश सरकारको बजेट पूर्वाग्राही ढंगले आएको भन्दै बजेट नसच्चिए कडा रुपमा प्रस्तुत हुन बाध्य हुने समेत उल्लेख गरे ।
पत्रकार सम्मेलनमा बोल्दै हेटौंडा-१० का वडाध्यक्ष फुर्वा दोर्जे लामाले प्रदेशको राजधानी हेटौंडा भएको र त्यसमा पनि १० नम्बर वडामा प्रदेशका मन्त्रालयहरु देखि प्रदेश सभा भवन लगाएत धेरै सरकारी भवनहरु भएको तर यहाँकै पूर्वाधार विकास निर्माणमा बजेट शून्य पार्नुले राजधानीलाई पछि पार्न खोजेको टिप्पणी गरे । उनले प्रदेशको राजधानी हेटौंडालाई नियोजित ढंगले बजेट नहाल्नुले राजधानी सार्न खाजेको भान भएको बताए ।
यसैगरी, हेटौंडा-१९ को वडाध्यक्ष नरनाथ सुवेदीले प्रदेश सरकारको बजेट पूवाग्राही ढंगले आएको बताउँदै बजेट संशोधन हुनुपर्ने बताए । उनले प्रदेशको बजेट पूवार्धार, रोजगारसँग नजोडिएको टिप्पणी गरे । उनले प्रदेश सरकारले आफ्नो दलका कार्यकर्ता पाल्ने ढंगले मात्रै बजेट ल्याएको दाबी गर्दै प्रदेश सरकारले बजेट सच्याउनुपर्ने बताए ।
पत्रकार सम्मेलनमा बोल्दै हेटौंडा-५ का वडाध्यक्ष शुशिल घिमिरे, हेटौंडा-११ की वडाध्यक्ष जुना दाहाल, हेटौंडा-१५ का वडाध्यक्ष सुनिल मोक्तानले प्रदेशको बजेट हचुवाका भरमा पहुँचवालाले पाउने गरी बनेको बताउँदै बजेट संशोधन हुनुपर्नेमा जोड दिए ।