मकवानपुर । मुख्यबजारभन्दा पर रहेका पसलहरूमा म्याद गुज्रिएको सामान बिक्री हुने संभावनालाई मध्यनजर गर्दै पूर्वी मकवानपुरको फापरबारीमा प्रशासनले बजार अनुगमन गरेको छ ।
बागमती गाउँपालिका वडा नं ६ स्थित फापरबारी बजारमा शुक्रबार अनुगमन गरिएको हो । जिल्ला अनुमगन समितिका संयोजक समेत रहेका सहायक प्रमुख जिल्ला अधिकारी हरिदत्त कँडेलको संयोजकत्वमा बजार अनुगमन गरिएको हो ।
बजारमा सञ्चालित विभिन्न ९ वटा व्यवसायमा अनुगमन गरिएको हो ।
अनुगमनका क्रममा मापदण्ड विपरीत सञ्चालनमा रहेका र म्याद गुज्रेका सामाग्री विक्री वितरणका लागि राखेका विभिन्न ४ वटा पसल,व्यवसायलाई जरिवाना गराइएको छ
फापरबारीमा सञ्चालित कञ्चन मेडिकल हल, बिएन एग्रोभेट, सेवा एग्रोभेट र घलान किराना पसललाई नगद जरिवाना गराइएको हो ।
अनुगमनका क्रममा अनुमति नलिई क्लिनिक सञ्चालन गरेको, म्याद गुज्रेको औषधि विक्रीका लागि राखेको, अनाधिकृत व्यक्तिले औषधि बेचिरहेको पाइएकाले कञ्चन मेडिकल हललाई १ लाख रुपैयाँ जरिवाना गराइएको प्रशासनले जनाएको छ ।
त्यस्तै औषधि व्यवस्था विभागमा दर्ता नभई व्यवसाय सञ्चालन गरेको बिएन एग्रोभेट र सेवा एग्रोभेटलाई क्रमशः २५ हजार र १५ हजार रुपैयाँ जरिवाना गराइएको छ । दुबै पसलबाट म्याद सकिएका विषादी फेला पारी जफत गरिएको छ ।
म्याद गुज्रिएका खाद्यान्न सामाग्री भेटिएको घलान किराना पसललाई १० हजार रुपैयाँ जरीवाना गरिएको हो । अन्य ५ वटा पसल, तथा व्यवसायलाई सचेत गराइएको छ ।
अनुगमन टोलीमा घरेलु तथा साना उद्योग कार्यालय हेटौंडाकी निमित्त प्रमुख टीका शर्मा, उपभोक्ता हकहित संरक्षण मञ्च बागमती प्रदेशका अध्यक्ष वासु खतिवडा, जिल्ला प्रशासन कार्यालय मकवानपुरका नायब सुब्बा महेश कुमार अर्याल, घरेलु तथा साना उद्योग कार्यालय हेटौंडामा कार्यरत लेखमान रावत, खाद्य प्रविधि तथा गुण नियन्त्रण कार्यालय हेटौंडाका सहायक प्राविधिक दीपक घिमिरे लगायतको सहभागी थिए ।
मकवानपुरका सबै क्षेत्रमा बजार अनुगमनलाई निरन्तरता दिइने सहायक प्रजिअ कँडेलले बताए ।
मकवानपुर । गत साउन १२ गते संघीय सरकारको उद्योग वाणिज्य तथा आपूर्तिमन्त्री दिलेन्द्रप्रसाद बडू लाई ज्ञापन पत्र बुझाएपछि बनेको समितिले आधिकारीक निर्णय नगर्दै उद्योगिहरुलाई बक्यौता सहितको बिल पठाएपछि उद्योगीहरु आजबाट पुन आन्दोलित भएका छन् ।
देशमा उद्योगहरु स्थापना गरी आयतलाई प्रतिस्थापन गर्ने, स्वदेशमा रोजगारीका अवसरहरु श्रृजना गर्न साथै मुलकलाई आर्थिक रुपले सवल बनाउने उद्दश्यका साथ अमेरिकी सरकारको सहयोगमा हेटौडा औद्योगिक क्षेत्रको स्थापना भएको थियो ।
हेटौंडा औद्योगिक क्षेत्रमा स्थापित उद्योगहरुलाई संचालनमा आएपछि उद्योगले भाडामा लिएको जमिन सम्बन्धित उद्योगलाई कमश हस्तान्तरण गर्दै जाने उद्येश्यको विपरीत औद्योगिक क्षेत्रहरु संचालन र व्यवस्थापनको जिम्मा पाएको औद्योगिक क्षेत्र व्यवस्थापन लिमिटेडले उद्योग स्थापना तथा संचालनमा बाधक सिर्जना गरेको भन्दै उद्योगिहरु आन्दोलीत भएका हुन् ।
औद्योगिक क्षेत्र व्यवस्थापन लिमिटेडले औद्योगिक क्षेत्र संचालन तथा व्यवस्थापन नियमावली २०७१ विपरीत २०७५ सालमा ७०० प्रतिशतसम्म भाडा बृद्धि गर्ने निर्णय गरेको र सोही मितिदेखि लागु हुने भन्दै २०७९ साउन २ मा उक्त भाडा वृद्धिको विल उद्योगहरुमा पठाएको छ । औद्योगिक क्षेत्र उद्योग महासंघ, उद्योग संघ मकवानपुर तथा उद्योगीहरुको उक्त निर्णयको विरुद्धमा आन्दोलत गरेका हुन् । उद्योगिहरुले उक्त निर्णयको घोर आपत्ति जनाएका छन् ।
औद्योगिक क्षेत्र व्यवस्थापन लिमिटेडबाट एकतर्फि रुपले २०७५ सालदेखि लागुहुने गरी ७ सय प्रतिशतसम्मको जमिन बहाल वृद्धि नियम संगत नभएको र सोको व्यापक विरोध र असहमति जनाइए पश्चात मिति २०७२ साउन १५ मा उद्योग वणिज्य तथा आर्पूति मन्त्री तथा तत्कालीन उद्योग सचिवसमेतको उपस्थितिमा औद्योगिक क्षेत्रको भाडा लगायत तात्कालीन तथा दीर्घकालीन समस्या समाधान गर्न उद्योग मन्त्रालयका सचिवको संयोजकत्वमा अध्ययन समिति गठन गरिएको थियो ।
तर हालसम्म उक्त समितिले कुनै निर्णय गरेको छैन । समितिले कुनै प्रतिवेदन नै नआएकन पुनः रकम भुक्तानी गर्न ताकेता पत्र पठाइएपछि उद्योगीहरु आन्दोलित हुनु परेको उद्योग संघ हेटौंडाका अध्यक्ष स्वागतराज प्याकुरेलले बताए । उद्योगीहरु ७ दिने अल्टीमेटम सहित साउन १५ गतेपछि स्थागित गरेको आन्दोलनमा पुन सुरु गरेको अध्यक्ष प्याकुरेलले बताए ।
२०७२ सालमा भूकम्प, २०७४ सालमा नाकावन्दी, २०७७ सालमा कोभिड, २०७९ सालमा रुस यूकेन द्वन्दका कारण उत्पन्न आर्थिक मन्दीको कारण उद्योगहरुमा अत्यन्तै नकारात्मक प्रभाव परेको उनले बताए ।
“उद्योगहरुको उत्पादन घटेको छ । वैकंको व्याजदर बढेको छ, यो अवस्थामा उद्योगलाई बचाइराख्न छुट सुविधा र सहुलियत दिनु पर्नेमा राज्यबाट संचालित औद्योगिक क्षेत्र व्यवस्थापन लिमिटेडले जमिनको ७०० प्रतिशतसम्म भाडा वृद्धि गर्ने र त्यो पनि २०७५ सालको निर्णय अहिले असुल्न खोज्नु निन्दनीय छ” प्याकुरेलले भने ।
आफूहरुको आन्दोलनलाई बेवास्ता गरिएमा हेटौडा औद्योगिक क्षेत्रको सम्र्पण आर्थिक गतिविधिहरुलाई ठप्प पार्दै सम्पूर्ण उद्योगीहरु आन्दोलनमा उत्रन बाध्य हुने आन्दोलनकारीहरुको चेतावनी छ । उद्योगीहरुले गत साउन १२ गते उद्योग वाणिज्य तथा आपूर्तिमन्त्री दिलेन्द्रप्रसाद बडूलाई ज्ञापन पत्र बुझाएका थिए । त्यस लगतै ३ दिनपछि साउन १५ गते अध्ययन समिति गठन भएको थियो । तर हालसम्म उक्त समितिले कुनै निर्णय सार्वजनिक गरेको छै ।

आन्दोलनरत उद्योगीहरुको मागलाई आफूले केन्द्रमा पठाउने र जिल्ला तहमा आवश्यक समन्वयकारी भूमिका निर्वाह गर्ने हेटौंडा औद्योगित क्षेत्र व्यवस्थापक भोजराज बिनाडीले बताए । बिनाडीका अनुसार हाल हेटौंडा औद्योगित क्षेत्रबाट बिलिङ भएको रकम १४ करोड बढी छ ।
क्षेत्रफलको दृष्टिकोणले देशकै ठूलो हेटौँडा आद्योगिक क्षेत्रका उद्योगीहरूलाई अहिले प्रोत्साहनभन्दा उद्योग बन्द गर्न बाध्य पार्न लागिएको आरोप लगाइरहेका छन् ।
लिमिटेडले हेटौँडा औद्योगिक क्षेत्रको प्रति रोपनी १९ हजार ६ सय ९१ रुपैयाँको दरले भाडा भुक्तानी गर्न औद्योगिक क्षेत्रका १ सय ४९ वटा उद्योगहरूलाई पत्रसहित बिल पठाएको छ ।
कार्यालयले २०७५ को निर्णय अनुसारको बढेको जग्गा भाडा भुक्तानीका लागि उद्योगीहरूलाई पत्र काटेको हो । लिमिटेडले हेटौँडा औद्योगिक क्षेत्रको हाल कायम भाडादरमा १ सय ३३ प्रतिशत वृद्धि गरेर सोही अनुसारको भाडा भुक्तानीका लागि पठाएको हो ।
२०७५ मंसिर ५ को निर्णयानुसारको भाडा तिर्नुपर्ने भन्दै ४ वर्षपछि उद्योग प्रतिष्ठानहरूलाई पत्र काटेको जनाइएको छ । औद्योगिक क्षेत्र व्यवस्थापन कार्यालय हेटौँडाका प्रमुख भोजराज विनाडीका अनुसार २०७५ सालमै भाडा बढाउने निर्णय कार्यान्वयन गर्न भनिएको थियो ।
बल्ल उठ्न थालेको र हाल तरलता अभाव र महँगीका कारण धरासयी अवस्थामा भाडा वृद्धिको निर्णयले हतोत्साहित बनाएको प्याकुरेलको भनाइ छ । हेटौँडा औद्योगिक क्षेत्रमा रहेका १ सय ४९ वटा उद्योगमध्ये १ सय ३३ वटा सञ्चालनमा छन् । ५ वटा पूर्ण रूपमा बन्द अवस्थामा छन् । ११ वटा उद्योग निर्माणाधीन अवस्थामा रहेको छ ।
मकवानपुर । जिल्ला बचत तथा ऋण सहकारी संघको शेयर पुँजी ४ करोड ४० लाख १५ हजार पुगेको छ ।
अघिल्लो आर्थिक बर्षमा ४ करोड ६ लाख ५५ हजार रहेकोमा यस बर्ष उक्त पुँजी बढेको प्रतिवेदन मार्फत सार्वजनिक गरिएको हो । संघमा ७६ करोड ११ लाख ३६ हजार ६७८ बचत रहेको प्रतिवेदनमा सार्वजनिक गरिएको छ ।
जिल्ला बचत तथा ऋण सहकारी संघको सनिवार १७ औ बार्षिक साधारण सभामा यस्तो प्रतिवेदन सार्वजनिक गरिएको हो । कार्यक्रममा जिल्ला सहकारी संघका अध्यक्ष नारायणप्रसाद देवकोटाले सहकारी क्षेत्रमा देखिएका समस्या र चुनौतीभित्र अवसर खोजेर अघिबढ्नु पर्ने बताए ।
सहकारीहरूले संवेदनशील समयमा शेयर लगानीकर्ताहरूसंग सहकारीको सहकार्य उत्कृष्ट रहेको देवकोटाले बताए । सहकारीको एकीकरणलाई प्राथमिकता दिनुपर्ने देवकोटाले बताए । सहकारी भित्रको विकृति बढेकोले यसतर्फ ध्यान दिन सहकारीकर्मीहरूलाई उनले आग्रह गरे ।

संघले विभिन्न बिधामा सहकारीहरुलाई सम्मान तथा पुरस्कृत गरेको छ । संघले उत्कृष्ट सहकारीको रुपमा महिला सहकारी अन्तरगत महिला मिलन साकोस, मिश्रत सहकारी अन्तरगत नमुना मकवानपुर साकोस उत्कृष्ट भएको उपाध्यक्ष मिना चौरेलले बताइन् ।
यसैगरी उत्कृष्ट सहकारी महिला कर्मचारी अन्तरगत महिला कल्याण साकोसको मेनुका हुमगाई, सहकारी अभियानकर्मीको रूपमा इन्द्र सरोवर गाउपालिका उमा लामा र जयप्रकाश घिमिरे, उत्कृष्ट दैनिक बचकर्ता सहकारीको रुपमा गणपति बाबा साकोस, एकीकरण भएका साकोसहरूमा श्रमिक सुरक्षित साकोस र दर्पण मनहरी साकोस, धेरै बचत जम्मा गर्न सफल साकोस हेटौंडा साकोस, सर्वाधिक ऋण परिचालन गर्ने सहकारीको रुपमा महिलासेवा साकोसलगायतलाई सम्मान गरेको हो । संघमा १३९ साकोसहरू सदस्य रहेका छन् । अध्यक्ष कल्पना श्रेष्ठको अध्यक्षतामा कार्यक्रम भएको थियो ।
मकवानपुर । कर दिवसको अवसरमा १४ उत्कृष्ट करदाता तथा संघ संस्थालाई सम्मानित भएका छन् । आन्तरिक राजश्व विभागले कर दिवसमा उत्कृष्ट व्यावसायिक संघ–संस्था करदातालाई सम्मान गरेको हो । सरकारलाई धेरै आयकर तिर्नेमा नेपाल दूरसञ्चार कम्पनीकाे नेपाल टेलिकम सबैभन्दा धेरै आयकर बुझाउने कम्पनी बनेको हाे ।
आन्तरिक राजस्व विभागले सूर्य नेपाल प्रालिलाई सबैभन्दा धेरै कर बुझाउने कम्पनीका रुपमा सम्मान गरेको छ । सबैभन्दा धेरै भ्याट बुझाउनेमा गोर्खा ब्रुअरी सम्मानित भएका छन् भने जावलाखेल डिस्टिलरीका अध्यक्ष विजयकुमार शाह व्यक्तिगत आयतर्फ सबैभन्दा धेरै आयकर तिर्ने करदाताका रुपमा सम्मानीत भएका छन् ।
यस्तै शिवशक्ति निर्यातमा र विशेष विधाअन्तर्गत राजेश मेटल क्राफ्ट सम्मानित भएका छन्। कृषि क्षेत्रमा ओसिबी फिड्स एन्ड फुड उत्कृष्ट भएका छन्। बीमा क्षेत्रबाट नेपाल पुनर्बीमा कम्पनीले सबैभन्दा धेरै कर तिरेको छ भने लघुवित्ततर्फ छिमेक लघुबित्त र बैंकहरुमा नबिल बैँकले सबैभन्दा बढी कर तिरेको छ ।
ऊर्जामूलक उद्योगतर्फ चिलिमे जलविद्युत लिमिटेडले सबैभन्दा बढी कर तिरेर सम्मानित भएको छ । स्वास्थ्यतर्फ नोबेल मेडिकल कलेज टिचिङ हस्पिटलले सबैभन्दा बढी कर तिरेको छ भने पर्यटनतर्फ मनकामना केबुल कारले सबैभन्दा धेरै कर तिरेको छ । स्वास्थ्य क्षेत्रमा नोबेल टिचिङ हस्पिटल र पर्यटनतर्फ मनकामना केबुलकार प्रालि सम्मानित भएका छन्। वस्तु व्यापार हंशराज हुलास प्रालि, ऊर्जामा चिलिमे जलविद्युत् कम्पनी सम्मानित गरिएको छ । मध्यम स्तरीय करदातामा नेपाल धितोपत्र विनिमय बजार र रेमिट्यान्स कम्पनीमा आईएमई रहेका छन्।
गत वर्ष सर्वाधिक कर बुझाउनेमा सरकार स्वामित्वको नेपाल टेलिकम भएको थियो। निर्यात उद्योगतर्फ भारतीय लगानीको डाबर नेपाल, व्यक्तिगतततर्फ सर्वाधिक आय कर तिर्नेमा तारा म्यानेजम्यान्टका अध्यक्ष सिद्धार्थ राणा भएका थिए।
उनी हरेक वर्ष सबैभन्दा बढी आय कर तिरेर सम्मानित हुँदै आएका थिए। गत वर्ष राणा दोस्रोमा थिए भने जावलाखेल डिस्ट्रिलरीका विजयबहादुर साह सर्वाधिक आयकर बुझाउनेको सूचीमा परेका थिए।
आन्तरिक राजश्व विभागले मूल्य अभिवृद्धि कर (भ्याट) लागू भएको दिन १ मंसिरलाई राष्ट्रिय कर दिवसका रूपमा मनाउँदै आएको छ। २०५४ मंसिर १ गतेदेखि सरकारले भ्याट लागू गरेको हो।‘स्वेच्छिक सहभागितासहितको फराकिलो करधारः दिगो र उत्पादनमुखी अर्थतन्त्रको आधार’ यस वर्षको नारा तय गरिएको थियो।
मकवानपुर । हेटौंडा सिमेन्ट उद्योग तीन महिनापछि पुनः संचालनमा आएको छ । कोइलाको आपूर्ति नहुँदा तीन महिनादेखि बन्द रहेको बागमती प्रदेशको राजधानी हेटौंडास्थित सरकारी स्वामित्वमा रहेको उक्त उद्योग मंगलबारबाट पुनः संचालनमा आएको हो ।
उद्योगमा केही महिनादेखि आर्थिक अभावको कारणबाट समयभित्रै कोइला आपूर्ति गर्न कठिनाइ भएको थियो । बोलपत्र आह्वान गरी उद्योगका लागि आवश्यक कोइला भारत, भुटान, इन्डोनेसियालगायतका देशबाट आपूर्ति गरी उत्पादन सुरु गरेको उद्योगका महाप्रबन्धक वसन्तकुमार पाण्डेले जानकारी दिए ।
उद्योगका उपकरणको मर्मतसम्भारको लागि दुई हप्ता उत्पादन बन्द गरिएको भए पनि कोइलाको अभावले गर्दा साउनको दोस्रो साताबाट सिमेन्ट उत्पादन कार्य बन्द गर्न बाध्यता भएको उद्योग व्यवस्थापनले जनाएको छ । पाण्डेका अनुसार उद्योगमा दैनिक १ सय १० टन कोइला खपत हुने गरेको छ । उद्योगबाट दैनिक १० देखि १४ हजार बोरा गुणस्तरीय सिमेन्ट उत्पादन हुँदै आएको छ । उद्योगमा पर्याप्त चुनढुंगाको भण्डारण रहेको उद्योग ब्यबस्थापनले जनाएको छ ।