‘हाम्रो देशमा धर्मलाई अतिक्रमण गरिरहेका बेला चलचित्रका दुई प्रमुख पात्र, नायक र नायिकाको मुख्य नाम राम र सीता राखिनु, चलचित्रका प्रायः सबै भाग जनकपुरमै छायाङ्कन गर्नुले हामीलाई बेलाबेलामा त्रेतायुगका राम र सीताबारे स्वतः सोचमग्न गराउँछ । कतै तिनै राम र सीताले पुनर्जन्म लिएर फिल्मी परिवेशमा जनकपुरमा आएर दर्शकलाई सम्मोहित गराएकोजस्तो भान पनि गराउनसक्छ’
हामीले विभिन्न खालका सूचनाहरू हेर्दै र पढ्दै आएका छौँ र मिलेसम्म सूचनालाई बुझ्न र जान्न सूचनास्थलमा पनि पुग्ने गर्छौं । त्यस्तै फरक धारमा बनेको सूचना हो ‘केटी हराएको सूचना’ । झट्ट हेर्दा र पढ्दा कसैलाई यो सूचनाले र पोस्टरले अल्मल्याउन सक्छ, कस्तो सूचना हो ? केटी हराएको भन्या छ केटा पनि छ पोस्टरमा ! प्रसन्न मुद्रामा तन्नेरी युवा युवतीको फोटो छ तर पनि केटी हराएको किन भनिएको छ भन्ने लाग्नसक्छ ! यो रहस्यपूर्ण चित्र/पोस्टर कुनै हराएको व्यक्तिको पोस्टर नभै एक चलचित्रको पोस्टर हो जसमा एक पहाडी मूलकी युवतीलाई मधेसी मूलका युवाले अपहरण गर्दा बनेको कुरालाई आधारित रहेर बनाइएको छ ।
फरक स्वाद र फरक भावको स्वदेशी माटोमा स्वदेशी भाषामा बनेको पवित्र मन र सोचले नेपालकाे ओझेलमा परेको मधेसलाई सबै नेपाली दर्शकसामु ल्याएर मधेसको पहिचानलाई बचाउन आफ्नो वर्षौंदेखिको कलाकौशल, खारिएको सीप र अनुभवका आधारमा आफ्नो मातृभूमिमा रुझ्दै, आफू पहाडी समुदायको भएर पनि मधेसी समुदायलाई अगाडि ल्याउन र चिनाउन आफ्नो चलचित्र “Missing केटी हराएको सूचना ” मार्फत सबैमाझ प्रस्तुत भएको छ, जसलाई ल्याउन सफल बन्नुभएको छ चलचित्र निर्देशक श्री दीपेन्द्र गौचन ।
आजको मितिसम्म आइपुग्दा, धेरै जनाले यो चलचित्र हेरेर चलचित्रको मौलिकतालाई आ—आफ्नो ढङ्गले बुझिसक्नुभएको होला । मलाई पनि चलचित्र हेरिसकेपछिका केही बुझाइहरूलाई नलेखी मेरो मनले मान्दै मानेन र मनको सुन्दै आफ्ना विचारहरूलाई यहाँ प्रस्तुत गर्ने जमर्को गदैछु ।अहिले जताततैबाट हाम्रो देशमा धर्मलाई अतिक्रमण गरिरहेका बेला चलचित्रका दुई प्रमुख पात्र, नायक र नायिकाको मुख्य नाम राम र सीता राखिनु, चलचित्रका प्रायः सबै भाग जनकपुरमै छायाङ्कन गर्नुले हामीलाई बेलाबेलामा त्रेतायुगका राम र सीताबारे स्वतः सोचमग्न गराउँछ । कतै तिनै राम र सीताले पुनर्जन्म लिएर फिल्मी परिवेशमा जनकपुरमा आएर दर्शकलाई सम्मोहित गराएकोजस्तो भान पनि गराउनसक्छ ।

अहिलेको आधुनिक जमानामा सबै मान्छेले आध्यात्मिक भाव नरुचाउन सक्छन् भनेर निर्देशक गौचनले नायक नायिकाको नामलाई आधुनिक नाम दिएर पौराणिक कुरालाई अद्यावधिक गर्न खोजेको हो कि भने जसरी पनि सोच्न बाध्य बनाउँदो रहेछ । कलाकार मार्फत समसामयिक परिवेशमा बुन्दै मिथिलाको कला र संस्कृतिको पहिचानलाई सबैसामु प्रष्ट्याउन, विभिन्न माध्यमबाट मिहीन ढङ्गले चित्रण गरिएको छ । चलचित्रमा नारी पात्रलाई पहाडिया र पुरुष पात्रलाई मधेसी पात्रका रूपमा र दुईबिचको वार्तालापका माध्यमबाट निर्देशक गौचनले नेपालभित्रै मधेस (तराई) र पहाड भए तापनि पहाडिया र मधेसीबिचको बुझाइको कमजोर कडीलाई सटीक रूपमा विभिन्न भाव, शब्द र उदाहरणका माध्यमबाट प्रस्तुत गर्न सफल बन्नु भएकाेछ ।
त्यस्तै, मधेसी पात्रका रूप, रङ्ग र विभेदलाई राम्ररी बुझाउन मधेसी आन्दोलनको कुरालाई चलचित्रको कथामा सम्वादमा प्रस्तुत गरेर तात्कालिक आन्दोलनले निम्त्याएको समस्या, मधेसी र पहाडीबिचको अटूट मित्रता र सम्झौतालाई प्रस्तुत गरेर चलचित्रको माध्यमले मधेस र पहाडबिचको विभेदको पर्खाललाई ढाल्न यो चलचित्र शक्तिशाली रूपमा उभिएको छ ।
चलचित्रमा पहिले नायिकाको अपहरण पछि फेरि उल्टै नायिकाले नायकलाई बन्दी बनाउनु अनि फेरि दुवै नायक नायिकामा सम्झौता हुनु र एकार्कामा प्रेम मौलाउनु, चलचित्रभित्रका भिन्न भिन्न स्वादका सम्वाद, सबै कुरालाई संस्कार र संस्कृति अनुसार मर्यादित ढङ्गले प्रस्तुत गर्दै मातृप्रेम, मातृभूमिप्रेम, मायाप्रीति, समर्पण, ग्रामीण परिवेश, कला आदि विविध कुरालाई रोचक तवरमा प्रस्तुत गरेर चलचित्रमा आफ्नै देशको स्वत्वपनलाई राम्ररी उजागर गर्न निर्देशक सफल बनेको चलचित्र हेरेका दर्शकहरूल स्वतः प्रष्टतया अनुमान लगाइसकेको हुनुपर्छ ।
चलचित्रमार्फ नेपाली कलाकाक्षेत्रमा फरक स्वाद र परिवेशमा जनकपुरका माध्यमबाट आफ्नो देश नेपालको मधेसलाई चिनाउन सफल बनेका छन् । प्रायः नेपालभन्दा धेरैजसोले काठमाडौं पोखरा, लुम्बिनी, सगरमाथा भनेर चिन्नेले जनकपुरलाई पनि राम्ररी चिन्ने भएका छन् साथै मधेसलाई पनि राम्ररी ध्यान दिन र बुझ्न थालेका छन् । मधेस बुझ्न र चिन्नकालागि एक अभियानकै रूपमा यो चलचित्र “Missing केटी हराएको सूचना ” ले यौटा नजीर स्थापित गरेको छ । साथसाथै साथीभाइको खिसीट्यूरीले पात्र राम कसरी अपहरण गर्न बाध्य हुन्छ र पात्र सीता पनि आफ्नै अभिभावकको जबर्जस्ती बिहे गर्नैपर्छ भन्ने दबावले बाध्य भएर घरबाट भाग्न हिँडेको कुरा र पछि गएर दुवैले साथी र घरमा देखाउनकै निम्ति सँगसँगै फोटो लिएको कुरालाई भावुक र मार्मिक रूपले पेश गरिएको छ । जसबाट निर्देशकले कसैको दबाव वा होच्याइले व्यक्तिको मानसिकतामा केकस्तो असर पर्छ भन्ने कुरालाई चलचित्रमा देखाएर वर्तमान परिप्रेक्ष्यका युवायुवतीहरू र अभिभावकहरूलाई सतर्क रहनकालागि चलचित्रकै माध्यमबाट सन्देश दिने प्रयत्न गर्नुभएको छ ।

चलचित्रका दुई पात्रबाट शुरू भएर दुई पात्रमै टुङ्गिने यस चलचित्रको कथावस्तुले जीवनमा विभिन्न आरोह अवरोहलाई सम्वादको रूपमा देखाउँदै आफ्नो मातृभाषा, राष्ट्र्भाषा दुवैमा पोख्त युवकलाई स्वाभिमानी मधेसी पात्रको रूपमा उभ्याएको छ । सरल जीवन र सादा पोशाकमा आफ्नै नेपालभित्रको जिल्लामै सुन्दर छवि र दृश्यको रसास्वादन गराउँदै भाइचाराको माध्यमबाट मधेस र पहाडलाई जोड्दै देशप्रेमको भावलाई “जननी जन्मभूमिश्च स्वर्गादपि गरीयसी” उक्तिले जस्तै देशप्रेम र जन्मभूमि प्रतिको मोहलाई कूटनैतिक ढङ्गमा दर्शाउन सफल निर्देशक गौचन बधाईका पात्र बन्नुभएको छ । दुई दशकजति विदेशी भूमिमा बसेर पनि स्वदेशी माटोमा भिजेर स्वदेशी भाव र भाषालाई जस्ताकोतस्तै उतारेर राष्ट्र्रप्रतिको प्रेम उजागर गरिएको यस स्तुत्य कार्यको जति प्रशंसा गरे पनि कमै हुन्छ ।
अहिले स्वदेशका मानिसहरूले विदेशमा गएर चलचित्र बनाइरहँदा स्वदेशमै बसेर स्वदेशी माटोमा स्वदेशी धारमा महत्वपूर्ण सन्देश बोकेको चलचित्र पस्केर एक उदाहरणीय व्यक्तित्व बन्न सफल बन्नुभएकोमा यस चलचित्रका निर्देशक दीपेन्द्र गौचन हार्दिक बधाई छ । साथै चलचित्रका नायक नायिकाका प्रत्यक्ष र परोक्ष रूपमा साथ दिने सबै चलचित्र टिम पनि बधाईका पात्र हुनुहुन्छ । आगामी दिनमा पनि यस्तैखालका उदाहरणीय काम गर्दै जानुहोला भनी यही मुक्तककासाथमा शुभेच्छा प्रकट गर्दै मेरो लेखनलाई यत्तिमै विश्राम दिन्छु ।
कतिपय कुराहरू त यहाँ मनन गर्ने खालका हुन्छन्
आस्था, सद्भाव र व्यवहार नमन गर्ने खालका हुन्छन्
म र मेरो व्यक्तिवादी सोचले हामी र हाम्रो भन्न सके,
आदर्श चिन्तनले नमूना प्रदर्शन गर्ने खालका हुन्छन् ।

मकवानपुर । मकवानपुरकाे हेटौंडामा ३ फागुनमा हेटौंडा आईडल गायन प्रतियोगिताको अडिसन हुने भएको छ । निर्माण व्यवसायी संघ मकवानपुरको आयोजनामा हुने दोस्रो राष्ट्रिय निर्माण तथा ब्यापार महोत्सव–२०८१ काे अवसरमा हेटौंडा आईडल गायन प्रतियोगिता हुने भएकाे हाे ।
३ फागुनमा निर्माण व्यवसायी संघ मकवानपुरको भवनमा हेटौंडा आइडल गायन प्रतियोगिताको अडिसन हुने प्रतियोगिता संयोजक दिपेश श्रेष्ठले जानकारी दिए । हेटौंडा आइडल गायन प्रतियोगितामा सहभागीको लागि २ फागुनसम्म फारम र एकप्रति फोटोसहित कार्यालयमा बुझाउनु संघले सूचना जारी गरेको छ ।
अडिसनमा छनौट भएकाले ६ फागुनदेखि १८ फागुनसम्म आयोजना हुने दोस्रो राष्ट्रिय निर्माण तथा ब्यापार महोत्सवमा प्रस्तुति दिनेछन् । उनीहरुकाे प्रस्तुति पछि निर्णायक र भोटिङको आधारमा हेटौंडा आइडल घोषणा गरिने श्रेष्ठले बताए । प्रतियोगितामा गायक कृष्णगोपाल सिंह, सुनिता बुर्लाकोटी र किशोर खड्काले निर्णायकको भूमिकामा रहने छन् । प्रतियोगितामा विजयी हुनेलाई पुरस्कार प्रदान गरिने आयोजकले जनाएको छ ।
हेटौंडा–१० स्थित टिसिएन चौरमा हुने दोस्रो राष्ट्रिय निर्माण तथा व्यापार महोत्सवमा निर्माण उपकरण तथा सामग्रीहरुको प्रदर्शनी एवम् बिक्री हुनेछन् । यस्तै बहुराष्ट्रिय कम्पनीहरुको उत्पादनको प्रदर्शनी एवम् बिक्री, सूचना प्रविधि प्रदर्शनी, कृषि उत्पादनको प्रदर्शनी तथा कृषि प्रतियोगिता, दैनिक राष्ट्रिय/स्थानीय कलाकारहरुको प्रस्तुती, शैक्षिक, घरजग्गा, अटो तथा खाना महोत्सव, मनोरञ्जनात्मक बाल उद्यान, नविनतम उपकरणहरुको प्रदर्शनी, नयाँ/नौलो प्रबिधिको प्रदर्शनी हुने आयोजकले जनाएकाे छ ।
महोत्सवका लागि २ सय ५१ सदस्यीय मूल समारोह समिति र ११ सदस्यीय स्टेरिङ कमिटी गठन गरिएको संघले जनाएकाे छ । यस अघि संघले २०७१ सालमा महोत्सव आयोजना गरेको थियो ।
मकवानपुर । मकवानपुरको हेटौंडामा २ जना मुक्तक सर्जक सम्मानित भएका छन् । मुक्तक मञ्च मकवानपुर शाखाको तेस्रो वार्षिकोत्सवको अवसरमा शनिबार मुक्तककारद्वय निलाञ्जला भारद्वाज र अस्मिता दाहाल सम्मानित भएका हुन् ।
नुवाकोटकी भारद्वाजलाई ‘बहादुरानन्द स्मृति मुक्तक सम्मान’ बाट सम्मानित गरिएकाे हाे । उक्त सम्मानकाे राशी नगर ७ हजार ७७७ रहेकाे छ । मुक्तक मञ्च मकवानपुरका संस्थापक अध्यक्ष तथा साहित्य संगम मकवानपुर अध्यक्ष डीबी बर्तौलाले आफ्नो पिता बहादुरानन्द बर्ताौलाकाे सम्झनामा उक्त सम्मानकाे स्थापना गरेका हुन् । मुक्तकालय नेपाल संस्थामार्फत मुक्तकको संस्थागत विकास, श्रीवृद्धि, उन्नयन र विस्तार साथै नेपाली साहित्यको मुक्तक विधामा निलाञ्जना मुक्तक सङ्ग्रह दिएर नेपाली मुक्तकको क्षेत्रमा योगदान पुर्याएकाेले उनलाई सम्मानित गरिएकाे हाे । यस अघि सो सम्मानबाट लोकेन्द्र डहरे(सिन्धुली) र दीपक समिप पोखरा सम्मानित भइसकेका छन् ।
यस्तै सिन्धुलीकी दाहाललाई ‘इन्दिरादेवी स्मृति मुक्तक सम्मान’ २०८१ बाट सम्मानित गरिएकाे हाे । उक्त सम्मानको राशि नगद ५ हजार ५५५ रहेकाे छ । स्थापनाकालमा ५ हजार १ रुपैया रहेकाे उक्त सम्मानकाे राशी २०८० सालबाट बढाएर ५ हजार ५५५ बनाइएकाे हाे । प्रगतिशील लेखक संघ अध्यक्ष श्रीराम अधिकारीले हजुरआमा इन्दिरादेवी अधिकारीकाे सम्झनामा उक्त सम्मान स्थापना गरेका हुन् । नेपाली साहित्यको मुक्तक विधामा प्रेमोपहार मुक्तक सङ्ग्रह दिएर नेपाली मुक्तकको क्षेत्रमा योगदान पुर्याएकाेले उनलाई सम्मानित गरिएकाे हाे । यस अघि सो सम्मानबाट समर्पण न्यौपाने (मकवानपुर) र विर्खे अन्जान (मकवानपुर) सम्मानित भएका छन् ।
पछिल्लो पुस्तासम्म मुक्तक विधालाई परिचित गराएर हौसला दिनका लागि र मुक्तक विधामै निरन्तर कलम चलाइरहेका अग्रज व्यक्ति व्यक्तित्वलाई सम्मानका लागि आफूहरुले उक्त सम्मानको स्थापना गरेकाे बर्तौला र अधिकारले जानकारी दिए ।
तेस्रो वार्षिकोत्सवमा नेपाल प्रज्ञा प्रतिष्ठान काव्य विभाग सदस्य शान्ति प्रिय वन्दना, गौडाकोट प्रज्ञा प्रतिष्ठान सचीव भिम प्रसाद शर्मा, सर्जक संजाल मकवानपुर संयोजक निमेष निखिल, वरिष्ठ मुक्तककार हरिकृष्ण काफ्लेले शुभकामना मन्तव्यसहित मुक्तक वाचन गरेका थिए । यसै गरि पुरस्कृत व्यक्तित्वद्वयले ५/५ मुक्तक वाचन गरेका थिए ।
मुक्तक मञ्च मकवानपुरले शनिबार सम्मानसहित आयोजनना गरेको २१ औ मुक्तक वाचन श्रृखलामा अनुश्रीया खनाल, मिथिला अधिकारी,
राजुराम राउत,शोभा थापा,समिता पौडेल,सबिता तिमल्सिना,चिरञ्जीवी लामिछाने,कमल नेपाल,समीर पाख्रिन,देव निर्दोष,सुन्दर कार्की
देवराज तिवारी, पुरुषोत्तम आचार्य,अजर फुँयाल,सानू खनाल लगायतले २/२ वटा मुक्तक वाचन गरे ।
मञ्चले अन्य दुई वटा सम्मान समेत स्थापना गरेकाे छ । ‘तारा स्मृति मुक्तक सम्मान’ मुक्तक मञ्च मकवानपुरको संस्थापक उपाध्यक्ष किसन पौडेलद्वारा आफ्ना स्वर्गीय पिता तारा प्रसाद पौडेलको सम्झनामा मुक्तकको विधामा प्रदान गरिने गरि स्थापना गरेका छन् । सो सम्मानकाे राशी स्थापना कालमा ५ हजार ५५५ रहेकाेमा २०८० सालबाट बढाएर ७ हजार ५०० बनाइएकाे छ । उक्त सम्मानबाट देवराज खरेल मकवानपुर २०७९ र हरिकृष्ण काफ्ले रौतहट २०८० मा सम्मानित भइसकेका छन् । यस वर्षकाे सम्मान प्रदान गर्न बाँकी रहेकाे मुक्तक मञ्चले जनाएकाे छ ।
यस्तैगरी मञ्चले ‘हरिकृष्ण काफ्ले मुक्तक सम्मान’ समेत स्थापना गरेकाे छ । हास्यव्यङ्ग्यकार आरसी रिजालद्वारा मुक्तककार हरिकृष्ण काफ्लेकाे सम्मान स्थापित सो सम्मान मुक्तकको विधामा प्रदान गरिने गरी स्थापना गरिएकाे हाे । उक्त सम्मानको राशी १० हजार नगद रहेकाे छ भने हालसम्म प्रादन गरिएकाे छैन् ।
मुक्तक मंच मकवानपुर अध्यक्ष सगर तिमल्सिनाको सभाध्यक्ष तथा मकवानपुरे अग्रज साहित्यका हयाग्रिव आचार्यको प्रमुख आतिथ्यतामा भएको कार्यक्रमकाे सहजिकरण मुक्तक मञ्च मकवानपुर सचिव सुवास सजलले गरेकाे थिए ।
भरतपुर, चितवन । चितवनको भरतपुरमा ‘गजलमा प्रणय’ कार्यक्रम हुने भएको छ । गजल मञ्च चितवनले प्रणय दिवसको अवसरमा उक्त कार्यक्रम गर्ने भएको हो।
हरेक वर्ष १४ फेब्रुअरीमा मनाइने प्रेम दिवस (भ्यालेन्टाइन डे) का दिन आगामी ३ फागुन शनिबार भरतपुर- ११ स्थित आरम्भ कलेजमा कार्यक्रम गर्न लागिएको गजल मञ्च चितवनका अध्यक्ष रामकृष्ण अनायासले जानकारी दिए ।
उनका अनुसार कार्यक्रममा चितवन, मकवानपुर, नवलपरासी, तनहुँ लगायतका जिल्लाका गजलकारहरुले गजलवाचन गर्ने छन् । ‘नयाँ तथा पुराना पुस्ताका गजलकारहरूको विशेष जमघट रहने कार्यक्रममा २० जना भन्दा धेरै गजलकारहरूले प्रणयरसमा लेखिएका गजलहरू सुनाउनु हुने उनले बताए । गजल श्रवण गर्न धेरै स्रोताको उपस्थिति रहने अपेक्षा समेत गरिएको अनायासले जानकारी दिए ।
कार्यक्रममा सरला जोशी, यमुना न्यौपाने, गिरिराज अधिकारी, तीर्थराज सुवेदी, रुबिन पौडेल, लीला दाहाल अधिकारी, रिवाज अर्याल, विकास बराल, सुरेन्द्र अस्तफल, विद्या भण्डारी चिराग, विष्णु तिवारी उषा, परिविक्रम, एसआर दुवाडी, रामलाल कुमाल, सुवास सजल, सगर तिमिल्सिना, सरगम पारु, मसान उपासक, गौरी कँडेल, भानु सापकोटा, सुमन कडरीया, प्रविण काफ्ले, ध्रुव सञ्ज्याल, प्रेमप्रसाद कँडेल र बालकृष्ण पौडेललगायतका स्रस्टाहरुको गजल वाचन रहने छ ।
कार्यक्रम आयोजना गर्न सम्पूर्ण किताब नारायणगढ, आरम्भ कलेज भरतपुर, कनेक्ट एजुकेसन एन्ड माइग्रेसन चितवन, इन्नोभेटिभ एसोसिएट्स, चितवन फ्लेक्स नारायणगढ, एक्सपर्ट एजुकेसन एन्ड भिजा सर्भिसेस चितवन र प्रकृति फर्निसिङ ग्यालरी भरतपुरले सहयोग गर्ने उनले बताए । यस्तै कार्यक्रमको मिडिया पार्टनर कायाकैरन मिडिया नेटवर्क प्रालि रहेको छ ।
काठमाडौँ । ‘नेपाल कल्चरल इन्टरनेशनल फिल्म फेस्टिभल’ (एनसिआईएफएफ)को छैटौँ संस्करणमा नेपाली चलचित्रले बुलाकीले उत्कृष्ट राष्ट्रिय चलचित्र पुरस्कार प्राप्त गरेकाे छ । लक्ष्मण सुनारको बुलाकीले राष्ट्रिय तर्फ उत्कृष्ट हुँदा अन्तराष्ट्रियतर्फ भारतको चलचित्र पुभुले सर्वोत्कृष्ट चलचित्र अवार्ड प्राप्त गर्याे ।
काठमाडौंको राइजिङ मलको क्युएस सिनेमामा मोहन अभिलाषीको लघुचलचित्र पाउलोको प्रदर्शनसँगै सुरु भएको चलचित्र महोत्सव चलचित्र विकास बोर्डमा उत्कृष्ट राष्ट्रिय तथा अन्तराष्ट्रिय चलचित्रलाई अवार्ड वितरणसँगै ३ दिनमा समापन भएकाे हाे । चलचित्र केन्द्रको आयोजना र चलचित्र विकास बोर्डको सहआयोजनामा आयोजित महोत्सवमा ४७ देशका ९८ वटा चलचित्रहरू अन्तिम प्रतिस्पर्धामा थिए । यि सबै चलचित्रलाई महोत्सवमा प्रदर्शन गरिएको थियो ।
राष्ट्रियतर्फ प्रतिष्पर्धामा बुलाकी, पुजार सार्की, डेसान, पखेटा र बिच्छेद चलचित्र सहभागी थिए । ती मध्ये ‘पुजार सार्की’ फिल्मबाट अभिनेता आर्यन सिग्देल र अभिनेत्री अन्जना बराइली उत्कृष्ट अभिनेता–अभिनेत्री घोषित भए । उत्कृष्ट निर्देशकको अवार्ड चलचित्र पुजार सार्कीबाट दिनेश राउत, उत्कृष्ट छायाँकारको अवार्ड चलचित्र बुलाकीबाट शिव ढकाल, इन्करेजमेन्ट अवार्ड बुलाकीबाट अभिनेता नरेन खड्काले र उत्कृष्ट स्कृप्टको अवार्ड चलचित्र पखेटाबाट सनोल दासले हासिल गरेका छन् ।
यस्तै राष्ट्रिय प्रतिस्पर्धामा उत्कृष्ट लघु चलचित्रको अवार्ड रित्तो गाउँबाट रामजी ज्ञवाली, बृत्तचित्रको अवार्ड नो मोनास्ट्री नो भिलेजबाट टासी ल्हाजोमले, महिला चलचित्रको अवार्ड पिरियडबाट रेवती गुरुङले, बाल चलचित्रको अवार्ड द स्कुल वालबाट मोहन श्रेष्ठले कल्चरल चलचित्रको अवार्ड चिपागु निलाबाट योवन शाक्यले, जुरी मेनसन अवार्ड चलचित्र छेसाङबाट रजिला श्रेष्ठले, स्पेशल मेनसन अवार्ड सर्ट फिल्म थ्रेसोल्डबाट सरिता शाहले र एभोन्टोज पपुलर अवार्ड चलचित्र लेट नाईटबाट ओविन उद्दिनले प्राप्त गरेका छन् ।
राष्ट्रिय प्रतिस्पर्धाको निर्णायकमा बरिष्ट संगीतकार तथा चलचित्र विकास बोर्डका पूर्व अध्यक्ष शम्भुजीत बास्कोटा, अभिनेत्री मिथिला शर्मा, अभिनेता प्रदीप खड्का, अभिनेत्री सुरक्षा पन्त, चलचित्र निर्देशक दीपेन्द्र के. खनाल, चलचित्र निर्माता एवम् निर्देशक रौनक विक्रम कँडेल, निर्देशक दिनेश लिङदेन र टेलिभिजनकर्मी टिकाराम यात्री थिए ।
सूचना सञ्चार तथा प्रविधिमन्त्री पृथ्वीसुब्बा गुरुङ, चलचित्र विकास बोर्डका अध्यक्ष दिनेश डिसी, अग्रज संगीतकार एवं महोत्सवका राष्ट्रियतर्फ निर्णायक प्रमुख शम्भुजीत बासकोटा, नेपाली र विदेशी निर्णायकहरू, अग्रज अभिनेत्रीहरु बसुन्धरा भुसाल, भुवन चन्द, चैतेदेवी सिंहले लगायतले विजेताहरूलाई अवार्ड प्रदान गरेका थिए ।
अन्तराष्ट्रिय प्रतिष्पर्धामा चलचित्र पुभुबाट उत्कृष्ट अन्तर्राष्ट्रिय अभिनेताको अवार्ड मन्जुलन केभीले हासिल गरे भने उत्कृष्ट अभिनेत्रीको अवार्ड जर्मनी चलचित्र इम्पियोरबाट अभिनेत्री युनिस कचीरुवाले हासिल गरिन् । उत्कृष्ट फिचर चलचित्र निर्देशकको अवार्ड अमेरिकाको चलचित्र ला फोर्सबाट जी ओभानी एम जेल्कोले हासिल गरे । अन्तर्राष्ट्रिय लघु चलचित्रको अवार्ड बँगलादेशको सर्ट फिल्म सौदा, उत्कृष्ट महिला चलचित्रको अवार्ड रसियाको चलचित्र द रि युनियनबाट लोलिता नारान ओभिचले, बाल चलचित्रको अवार्ड भियतनामको चलचित्र लस्ट फर फ्रिडमबाट जाकुभ जाजाकले हासिल गरे ।
अन्तर्राष्ट्रिय बृत्तचित्रको अवार्ड क्यानडाको चलचित्र नुरागा भूमिबाट डानियल खान डा लिल्भाले, इन्भारोमेन्टल चलचित्रको अवार्ड स्पेनको चलचित्र द सोल अफ ज्यास्मिनबाट मरिना गार्सिया एन्ड्युले, अन्तर्राष्ट्रिय मानव अधिकार चलचित्रको अवार्ड अमेरिकाको अमेरिकन फुल ब्रोडबाट क्रिस्टिना होडेलले हासिल गरे । यस्तै एनिमेसन चलचित्रको अवार्ड साउथ अफ्रिकाको चलचित्र फ्लावर अफ दि पार्टिसनबाट चार्लेस बाडेनहोस्टले, अन्तर्राष्ट्रिय छायांकारको अवार्ड स्पेनको चलचित्र स्पिक सन लाइटबाट जसी लुईस अल्कानीले, उत्कृष्ट चलचित्र स्कृप्टको अवार्ड इटालीको चलचित्र आउट डियरबाट ऐस्यान्डो लियोनीले, जुरी मेन्सन अवार्ड अर्जेन्टिनाको चलचित्र द टेम्पल अफ इन्टरनल साउन्डबाट जर्ज क्याराभोटाले, स्पेशन मेन्सन अवार्ड बेलायतको चलचित्र लकडाउन गर्डेन डायरीबाट एड्रिना उलिकले प्राप्त गरे । यस्तै पपुलर अवार्ड जर्मनीको चलचित्र सिड वीथ मीबाट अकिफा मियानले, इन्करेजमेन्ट अवार्ड नेपालको चलचित्र जाईन पपेट्स फर डिज्निफाईड मेन्सुरेसनबाट ओडिटी लारामीले हासिल गरे ।
महोत्सवमा अन्तराष्ट्रियतर्फ आठ जना विदेशी निर्णायक मध्ये भारतबाट निपोन धौला, जर्मनीबाट फाविन मात्थियस, इरानबाट तिमा टाघिजादेह, बहराइनबाट इभा दाउद र रुसबाट इरिना बेराजी महोत्सवमा उपस्थित रहेका थिए । अन्तर्राष्ट्रिय निर्णायकमा भारतबाट चलचित्र निर्देशक निपोन धौला, जर्मनी चलचित्रकर्मी फाविन मात्थियस र चलचित्रकर्मी इभिन बिराजी, बेलायतबाट चलचित्र लेखक तथा निर्देशक लुईसा प्रिटोलानी, क्यानडाबाट चलचित्र निर्देशक जुडी ग्लाड्स्टोन, इरानबाट अभिनेत्री, लेखक तथा निर्देशक तिमा टाघिजादेह, बहराइनबाट चलचित्र निर्माता निर्देशक एवम् लेखक इभा दाउद र रुसबाट चलचित्रकर्मी इरिना बेराजी रहेका थिए ।
कार्यक्रममा सञ्चारमन्त्री गुरुङले चलचित्रको विकास र विस्तारमा यस्तो महोत्सव निकै उपयोगी हुने बताए । उनले सबै विदेशी अतिथिहरुलाई भगवानको रुपमा आफूहरूले लिने गरेको भन्दै आउँदो वर्षहरुमा पनि महोत्सवमा सहभागी हुन विदेशीहरूलाई अनुरोध गरे । बोर्डका अध्यक्ष डिसीले चलचित्र विकास बोर्डको सहकार्यमा निकै राम्रो महोत्सव सम्पन्न भएको बताए । उनले नेपालमा हुने गरेका अन्तर्राष्ट्रिय महोत्सवले नेपाललाई विश्वमा चलचित्रमार्फत चिनाएको धारणा राखे ।
चलचित्र केन्द्रका अध्यक्ष एवम् निर्देशक सन्तोष सुवेदीले नेपालमा महोत्सव आयोजना गर्न निकै गाह्रो हुने गरेको बताए । मौलिक कला, संस्कृतिको संरक्षण, संवर्धन र चलचित्र विकास गर्नु हामी सबैको दायित्व हो । यूनेस्कोको कार्यक्रमअन्तर्गत काठमाडौं महानगरपालिका फिल्म सिटीमा घोषणा भएको तर महानगरमै यति ठूलो महोत्सव हुँदासमेत महानगरले बेवास्ता गरेको उनको गुनासो छ । नेपालको राजधानी काठमाडौंमा ४७ देशका चलचित्रहरु समावेश गरेर महोत्सव गर्न पाउँदा आफुलाई मात्र नभएर देशकै लागि गर्वको कुरा रहेको उनले बताए । यो महोत्सवमा चलचित्रका अन्य विधालाई पनि प्रोत्साहन गरेको कारण यो चलचित्र महोत्सव अझ बढी महत्वपुर्ण रहेको उनको भनाई छ । नेपालमा विधाअनुसारको विषयवस्तुमा कम फिल्म बन्छ, कि त बन्दै बन्दैन । बनेपनि त्यसलाई प्रदर्शन गर्ने स्थान र प्रोत्साहन गर्ने संस्था छैन । विषयगत चलचित्रहरु उत्कृष्ट बन्दा पनि तिनिहरुले स्थान पाउँदैनन्, पाईहालेपनि प्रतिस्पर्धामा पछाडी नै राखिन्छ । तर यो महोत्सवले सबैलाई समेट्न सकेको उनको दावी छ ।
महोत्सवमा कला प्रदर्शनीसँगै विभिन्न सांस्कृतिक प्रस्तुतीहरुपनि समावेश गरिएका थिए । समापनमा प्रस्तुत गरिएको अक्षरिका स्कुलबाट राउटे नृत्य तथा प्रितिमा स्कुलबाट छाउपडी सांगितिक नाटकले कार्यक्रमलाई अझ बढी रोमाञ्चक बनाएको थियो । महोत्सवमा विभिन्न देशका ४ दर्जन बढी विदेशी अतिथीहरुलाई नेपाली ढाका टोपी र ढाकाको खादा लगाएर स्वागत तथा बिदाई गरिएको थियो ।