मकवानपुर । साहित्य सङ्गम मकवानपुरको ३५७ औं सन्ध्या अप्सरा तिम्सिना स्मृति बिशेष आयोजना गरिएको छ । साहित्य सङ्गम र आँचल साहित्य कला पुञ्ज मकवानपुरले संयुक्त रुपमा शनिबार ३५७ औं नियमित सन्ध्या तिम्सिना बिशेष आयोजना गरेको हो ।
स्रष्टा तिम्सिनाको तस्बिरमा माल्यार्पण तथा पुष्पगुच्छा अर्पण गर्ने कार्य संगै प्रगतिशील लेखक संघ बागमती प्रदेश अध्यक्ष शान्तिप्रिय वन्दनाले दिवङ्गत साहित्यकार अप्सरा तिम्सिनाको कृतित्व र व्यक्तित्वमाथि प्रकाश पारेकी थिइन् । नियमित सन्ध्यामा विजनेश सिग्देल, स्वस्तिका बानियाँ, मनोज मधुर, सानुभाइ विक, राजकुमार चौधरी, देवराज खरेल, यश लामा, गोकर्ण लामा, जनार्दन खनाल, राजकुमार लामिछाने, निरा शर्मा, सावित्री ढुङ्गाना, सानु खनाल र तुलसी घिमिरेलगायतले रचना वाचन गरेका थिए ।
त्यसैगरी नियमित सन्ध्यामा सङ्गमको अक्षयकोष निर्माणार्थ सहयोगीहरूलाई कदरपत्रसहित सम्मान समेत गरिएको छ । सङ्गमको अक्षयकोष निर्माण अभियानमा सहयोग गरी सम्मानित हुनेहरुमा रमेशमोहन अधिकारी, भरत लौडारी, दीपक दाहाल, सीताराम दाहाल, मधु ढुङ्गाना, रिदम घिमिरे, रिना आचार्य, गोविन्द चौलागाईं, राजकुमार बिक, पुरुषोत्तम लामिछाने,वकेशव श्रेष्ठ ‘ज्योति’ र देवीराम लामा रहेका छन् ।
अक्षयकोष निर्माण अभियानमा सहयोग गर्ने महानुभावलाई अन्य कार्यक्रममा सम्मान गरिने सङ्गम अध्यक्ष डीबी बर्तौलाले जानकारी दिए । उनका अनुसार ३५७ औं सन्ध्याकै अवसरमा साहित्यकार राजकुमार लामिछाने सङ्गमको अक्षयकोष निर्माणका लागि १७ हजार ७ सय १७ सहयोग गरेका छन् । २८ भदौ २०८० देखि सङ्गमले सञ्चालन गरेकाे अक्षयकोष निर्माण अभियानमा हालसम्म ८ लाख २३ हजार ७० रुपियाँ सङ्कलन भएको उनले बताए ।
कार्यक्रममा हेटौंडा उपमहानगरपालिका ४ नम्बर वडाध्यक्ष नवीन सिग्देलले भाषा साहित्यको उन्नयनमा निरन्तर लागिपरेकाे बताउँदै अप्सरा तिम्सिनाको स्मृति ग्रन्थ प्रकाशनमा सहयोग गर्ने बताए । ‘सङ्गमको अक्षयकोष निर्माणमा समेत वडाकाे साथ रहन्छ’ उनले भने । साहित्यकार तुलसी घिमिरेले सङ्गमले गुणात्मक कार्यक्रम गर्ने गरेकाे बताउँदै संस्थाको निरन्तर प्रगति भएकोकाे खुसी व्यक्त गरे । अक्षयकोष निर्माणमा सहयोग गर्ने तर्फबाट साहित्यसेवी मधु ढुङ्गानाले आफ्नो भनाइ राखेका थिए ।
सङ्गमका अध्यक्ष डीबी बर्तौलाको अध्यक्षता तथा ४ नम्बर वडाध्यक्ष नवीन सिग्देलकाे प्रमुख आतिथ्यता तथा साहित्यकार तुलसी घिमिरेकाे विशेष आतिथ्यतामा भएकाे विशेष सन्ध्याकाे सहजिकरण सङ्गमका उपाध्यक्ष सानु खनालले गरेका थिए ।
अविश्वास
Tags: No Comments
नेपाली समाजमा महिलालाई हेर्ने दृष्टिकोण फरक भएकाले महिलाहरूले विभिन्न विभेद र पीडा भोग्न विवश छन् । पुरुषको अहंकारका कारण पढेलेखेको घरमा त महिलाहरू घरेलु हिंसाको शिकार भएका छन् भने अनपढ परिवार तथा समाजमा यस्ता समस्या झन् बिकराल रूपमा देखिन्छ । समाजमा रहेका यस्ता अवस्थालाई अवलोकन गरिरहँदा अर्धविकसित एउटा पहाडी गाउँमा भएको घटनाले मेरो मनमा स्पर्श गरायो ।
लक्ष्मीको एक कथित दलित परिवारमा पन्ध्र वर्ष अगाडि विवाह भएको थियो । के कारणले हो उनको विवाह भएको सात वर्षसम्म कुनै पनि बच्चा जन्मिएनन्। जसका कारण उनलाई घरपरिवार तथा समाजले बाँझी जस्तो उपनाम दिएर श्रीमानलाई यसबाट घरवार हुँदैन भन्दै अर्को विवाह गर्ने सल्लाह दिन्छन् । लक्ष्मी भने यस्ता हरेक कुरालाई बेवास्ता गर्दै मैले सहनु पर्छ भन्दै पीडालाई शक्तिमा बदल्दै दिनचर्या अगाडि बढाउँदै गएकी हुन्छिन् । सात वर्षपछि लक्ष्मीले एक छोरीको जन्म दिइन् । त्यसपछि लगातार एक वर्षको फरकमा अर्का दुई छोरी गरी तीन छोरीको जन्म दिइन् । बाँझीको उपनाम पाएकी लक्ष्मी तीनवटा बच्चाको धनी भइन् ।
दिनहरू बित्दै जाँदा पारिवारिक बोझले गर्दा एक दिन लक्ष्मीका श्रीमान् कामको खोजीमा शहर पसे । घरमा लक्ष्मीका तीन छोरीका साथमा बुबाआमा स्याहारमा तल्लिन रहिन् । केही समयपछि लक्ष्मीका श्रीमान् शहरबाट घर आउँछन्। छिमेकीका अनेक कुरा सुनेर परपुरुषसँग लागेको आरोप लगाउँदै लक्ष्मीलाई गाली गर्ने, पिट्ने गर्दै लगातार यातना दिन थाल्छन् । लक्ष्मीले अनेक तबरले सम्झाउँदा पनि अबुझकी श्रीमान् उनी प्रति नकरात्मक कुरा मात्र गरेर घरबाट निस्केर जा भन्दै हरेक दिन किचकिच गर्न थाल्छन् । लक्ष्मी भन्छिन्, ‘म निस्केर कहाँ जाउँ, छोरीहरू लिएर जाउँ कसरी पाल्ने, छोड्यौँ कसरी छोड्ने, छोरीहरू हामीलाई छोडेर नजानु बाबासँग बस्दैनौ भन्दै रुन्छन् । कहिलेकाहीँ त अनेकौँ कुविचार पनि नआएको होइन ।’
लक्ष्मी छिमेकीहरूसँग मेरो श्रीमान् यस्तो खालको होइन कसले बिगारिदिएको होला, कसरी सम्झाउने होला, कसले सम्झाइदेला भन्दै खुइए गर्दै लामो सास तान्छिन् ।
लक्ष्मी, श्रीमानलाई मेरो त माया लागेन छोरीहरूको समेत किन नलागेको होला, आमाबुबाको काखबाट छुट्याएको बच्चालाई कस्तो मानसिक असर पर्छ भन्ने कुरा किन थाहा नभएको होला, क्षणिक आवेगको निर्णयले देखिने असर आफैँलाई पर्छ भनेर पनि किन नबुझेको होला भन्दै चिन्तित हुन्छिन् । यस्तो निर्णय लिएर हामी छुट्टिनुले सिङ्गो परिवारलाई सुख हुँदैन ।
लक्ष्मीले श्रीमानलाई अनेक तबरले सम्झाउँदा पनि मानेनन् । घर छोड्न बाध्य बनाए । आखिरमा छोरीहरूलाई घरमै छोडेर उनी माइतीको शरणमा पुगिन् । माइतमा केही दिन बसेपछि आमाबुबाले पनिसम्झाउँदै भन्नुभयो, छोरी तिम्रो बिहेपछि पराइ घर नै तिम्रो घर हो, जे जस्तो भए पनि धैर्यताका साथ त्यही बस्नुपर्छ। साना बच्चाहरूलाई छोडेर तिमी यहाँ बस्न मिल्दैन भनेर घर पठाउने कुरा गर्नुहुन्छ । कसरी सम्झाउँ मैले पीडाको अन्तिम सीमा नागेर आएको भनेर रु आमाबुबाको इज्जत, घरपरिवारको मायाले कयौँ दिन, राती निन्द्रा न दिन भोक नभनी बसेको हो भनेर । सामाजमा आफ्नो र घर परिवारको इज्जतका लागि छोरीहरूले कहिलेसम्म यस्ता पीडा भोग्नुपर्ने र जहाँ गए पनि किन उनीहरूले कुराको सुनुवाइ हुँदैन ।
लक्ष्मीले असैह्य पीडापछि मात्र आफू आएको कुरा बताएपछि मात्र राख्न राजी हुनुभयो । लक्ष्मी माइतमा पनि आमाबुबालाई दुस्ख हुन्छ भनेर ज्यालादारी गरी गुजरा चलाउन थालिन् । उनी दिनभरी काममा व्यस्त भएपनि रातीमा घरीघरी बच्चाको यादले सताउँथ्यो, के गरेका होलान्, के खाएका होलान्, मलाई सम्झी कति रोएका होलान् । भेट्न जाउँ भने परिवारले भेट्न दिँदैनन् होला भन्ने चिन्ता लागिरहन्थ्यो।
उता लक्ष्मीका श्रीमानलाई श्रीमतीलाई पठाएपछि झन् जिम्मेवारी बढेको थियो । बुढा भएका आमाबुबा, साना केटाकेटी रुन्छन्, दुस्ख दिन्छन् । काम नगरी जहान पाल्न सक्ने अवस्था छैन । काम गरेर आउँदा घरमा अस्तव्यस्त अवस्था देखेर दिक्क लागेर आउँथ्यो। त्यसपछि श्रीमतीको अभाव खड्किन थाल्यो । उनले घर कति सहजै समालेकी थिइन् । उनले मलाई कहिल्यै दुखको गुनासो गर्थिनन् । मलाई बाहिरको एकसरो काम थियो, सजिलै भएको थियो ।
अनाहकमा अरूको कुरा सुनेर श्रीमतीको भावना नबुझि उसलाई घरबाट निकाले अहिले यो अवस्था भएको छ भन्दै पश्चताप गरेका छन् । अब अर्को विवाह गर्यौ भने यी छोरीहरूलाई माया गर्ने श्रीमती पर्ने हो कि होइन अब कसो गरौँ भन्दै आफ्नो अन्तर्मनलाई सोध्छन् । तिमीले गल्ती गरेका छौ, साना छोराछोरीको आमाको माया र काख छुटाएका छौ, सोझी कर्तव्यनिष्ट श्रीमतीलाई अरूका कुरा सुनेर अनेक यातना दिँदै घरबाट निकालेका छौ त्यसैले तिम्रा अब अझै दुखका दिन आउँदैछन् तिमीले पुनर्विचार गर भन्ने सन्देश उनको कानमा आउँछ, उनी झल्याँस्स हुन्छन्।
हो, आफ्नै अविश्वास र गल्तीले गर्दा छोराछोरी, श्रीमती र आफैँलाई पनि दुख भएको छ अब लक्ष्मीलाई घर फिर्ता ल्याउनुपर्छ भन्ने लाग्छ ।
उनी भोलिपल्ट ससुरालीमा लक्ष्मीलाई लिन जान्छन् । बेलुकीपख त्यहाँ पुग्दा लक्ष्मी मेलाबाट झुत्रे कपडामा निन्याउरो हुँदै घर आउँदै थिइन् । श्रीमानलाई आफ्नो घरमा देख्दा खुसी भइन् । उनलाई पनि श्रीमान् र छोराछोरीको याद नआएको होइन, खाली आफैँ जान सकेकी थिइनन् । अब मबाट यस्तो गल्ती कहिल्यै हुँदैन म तिमीलाई लिन आएको भन्दै श्रीमानले भन्दा लक्ष्मी झनै खुसी भइन् । भोलिपल्ट दुवैजना एक-अर्काको भावना बुझेर अघि बढ्ने संकल्पकासाथ घर फर्के । घर आइपुग्दा आमाको मायाबाट बञ्चित भएका छोरीहरू पनि धेरै खुसी भए । त्यसपछिका समय सबै परिवार खुशीयालीका साथ बित्यो ।
मकवानपुर । नेपाल कम्युनिष्ट पार्टीका संस्थापक महासचिव पुष्पलाल श्रेष्ठको ४७ औं स्मृति दिवसमा हेटौंडामा ‘स्वर समर्पण’ जनसांगीतिक कार्यक्रम हुने भएको छ ।
नेकपा एमाले मकवानपुर जनसंगठन समन्वय संयन्त्रको आयोजना एवम् राष्ट्रिय जनसांस्कृतिक महासङ्घ मकवानपुरको व्यवस्थापनमा आगामी साउन ७ गते स्वर समर्पण कार्यक्रम हुन भएकाे हाे । कार्यक्रममा राष्ट्रिय जनसाँस्कृतिक महासंघकाे १४ वटा जनवादी गीतहरुको प्रस्तुति रहने बताइएकाे छ । यस्तै अनेरास्ववियु लगायत अन्य जनसंगठनहरुको समेत विशेष प्रस्तुती रहने जनसंगठन समन्वय संयन्त्र प्रमुख सन्तोष पौडेलले जानकारी दिए ।
स्वर समर्पण (जनसाङ्गीतिक) साँझले नयाँ पुस्तालाई जनवादी गीत संगीत मार्फत नेपालको कम्युनिस्ट आन्दोलन, समाज र जीवनको बारेमा बुझाउने अपेक्षा आयोजकले दिएकाे छ । पौडेलले कार्यक्रमको तयारी पूरा भएकाे जानकारी दिए । जनसंगठन समन्यव संयन्त्र नेकपा एमालेको भातृ संगठनहरुको समन्वय र परिचालन गर्ने बैधानिक संरचना भएकाेले जनसंगठनहरुको प्रभावकारी परिचालन, बैचारिक राजनितिक प्रशिक्षण, जनतासँग जनसंगठन अभियान संचालन लगायत आधारभुत तहसम्म जनसंगठन बिस्तार र सुदृढीकरणको लागि महत्वपूर्ण भूमिका निर्वाह गर्दै आएको उनले जानकारी दिए ।
कार्यक्रममा स्वयमसेवक ब्यवस्थापन र परिचालनको जिम्मेवारी पार्टी स्वयंसेवक विभागले लिएकाे छ । स्वयमसेवक विभाग सचिव सुरेश बेरोजगारको संयोजकत्वमा २७ सदस्सिय स्वयमसेवक ब्यवस्थापन तथा परिचालन उपसमिति गठन गरिएकाे छ । जनसंगठन समन्वय संयन्त्र र पार्टी जिल्ला स्वयमसेवक विभागको संयुक्त बैठकले संयोजक सहित उपसमितिमा विभागबाट ७ जना र नेकपा एमाले सम्बद्ध १० वटा जनसंगठनबाट दुई/दुई जना गरी २७ जनालाई चयन गरिएको छ । यसैगरी कार्यक्रम स्थल, डिजिटल प्रचार सामाग्री डिजाईन लगाएत अन्य प्राविधिक तयारीको जिम्मेवारी प्रोग्रेसिभ ईन्जिनियरिङ एशोशियनलाई दिइएकाे छ ।
बैठकमा जनसाँस्कृतिक महासंघका अध्यक्ष राजुराम राउतले साँस्कृतिक कार्यक्रम, जनवादी गीतको तयारीकाे जानकारी गराएका थिए । नेपालको कम्युनिष्ट आन्दोलनको मुल प्रवाह नेकपा एमाले भएको र यसका संस्थापक महासचिव पुष्पलालको योगदानलाई स्मरण गर्दै स्मृति दिवस भव्यताका साथ मनाउन पार्टीले आवश्यक तयारी गरेको एमाले जिल्ला सचिव सिता विष्टले बताइन् ।
१५ असार १९८१ मा रामेछापको भँगेरीमा जन्मिएका श्रेष्ठको ७ साउन २०३५ मा भारतको गोविन्दबल्लभ पन्त अस्पतालमा उपचारका क्रममा निधन भएको थियो । पुष्पलालले जनताका पक्षमा अधिकार स्थापित गर्ने लक्ष्यका साथ १० वैशाख २००६ मा नेकपा स्थापना गरेका थिए । नेकपाको स्थापना कोलकाताको श्यामबजारमा पुष्पलाल, नरबहादुर कर्माचार्य, निरन्जनगोविन्द वैद्य, नारायणविलास जोशी, मोतीदेवी श्रेष्ठको सक्रियतामा भएको थियो । सरकारले पुष्पलालको सम्मानमा राष्ट्रिय पुरस्कार समेत स्थापना गरेको छ ।
समन्वय संयन्त्रका प्रमुख सन्तोष पौडेलको सभाध्यक्षता तथा नेकपा एमाले जिल्ला सचिव सिता विष्टको प्रमुख आतिथ्यतामा भएको बैठकमा पार्टी जिल्ला सदस्य तथा स्वयमसेवक विभाग प्रमुख शिवहरी दाहाल, जिल्ला सदस्यहरु दिलु घर्ती, आकाश अधिकारी, सुमित्रा चौलागाईं लगायत जनसंगठनका अध्यक्षहरुको उपस्थिति रहेको थियो ।
मकवानपुर । गजल मञ्च मकवानपुरले शनिबार आयोजना गरेकाे २ सय २६ औं गजल यात्रामा चितवनका गजलकार रामकृष्ण अनायसको गजल सङ्ग्रह ‘अनायस’ काे विमर्श गरिएकाे छ ।
गजल मञ्च चितवनका अध्यक्ष समेत रहेका अनायासकाे गजल संग्रहमाथि झरना साहित्यिक परिवार मकवानपुरका अध्यक्ष विश्वनाथ सञ्जेल र गजल मञ्च चितवनका पूर्वअध्यक्ष रमेश प्रभातले आफ्नो धारणा राखेका थिए । युवा गजलकार सञ्जेलले रामकृष्णका गजलमा युवावयका कथालाई समेटिएकाे बताए । गजलहरु समसामयिक विषयमा लेखेकाे बताउँदै सञ्जेलले भने अनायासका गजलले बेथितिमाथि प्रहार पनि गरेका छन् । प्रणय रसका साथै समसामयिक राजनीतिलाई कटाक्ष गरिएको छ ।
त्यसैगरी गजल मञ्च चितवनका पूर्व अध्यक्ष एवम् समालोचक रमेश प्रभातले अनायास गजलसङ्ग्रहको सफलताको कामना गर्दै नेपाली गजल लेखन परम्पराको चर्चा गरे । गजल मञ्च चितवनले प्रकाशन गरेको रामकृष्ण अनायसको गजल संग्रहमा ७० वटा गजलहरु समेटिएका छन् । अनायासका यसअघि ‘अनायसका पानाहरु’ इ–गजल संग्रह र ‘धमिलिएका डोबहरु’ सवाल जवाफ गजल संग्रह प्रकाशित भइसकेका छन् ।
गजल यात्रामा चितवनका रामकृष्ण अनायस तथा लेखराम सापकाेटासहित मकवानपुरका देवराज तिवारी, डिबी बर्तौला, सागर तिमल्सिना, अनुसुया खनाल, स्वस्तिका बानियाँ, स्वस्तिका दाहाल, राम कार्की, सागर तिमिल्सिना, मिथिला अधिकारी, मुना अर्याल, सानु खनाल, मनोज मधुरलगायतले गजल वाचन गरेका थिए ।
कार्यक्रममा गजल मञ्च चितवनका निवर्तमान अध्यक्ष लेखराम सापकोटा र साहित्य सङ्गम मकवानपुरका अध्यक्ष डी.बी. बर्ताैलाले चितवन र मकवानपुरबीचको साहित्यिक सम्बन्ध अझ सुदृढ बनाउन यस्ता कार्यक्रमकाे आवश्यकता रहेकाे बताए । मञ्चका अध्यक्ष सञ्जित श्रेष्ठको अध्यक्षतामा भएकाे गजल यात्राकाे सहजीकरण कमल नेपाल र गौरी कँडेलले गरेका थिए ।
मकवानपुर । बागमती प्रदेश प्रमुख दीपक प्रसाद देवकोटाले २१२ औँ भानु जयन्तीको अवसरमा शुभकामना व्यक्त गर्नु भएको छ । वि.सं. १८७१ साल असार २९ गते अर्थात् आजकै दिन तनहुँ जिल्लाको चुंदी रम्घामा जन्मनुभएका नेपाली साहित्यका आदिकवि भानुभक्त आचार्यले नेपाली भाषालाई साहित्यिक धरातलमा स्थापित गरि जनजिब्रोमा मिसाउनु भएको ऐतिहासिक योगदान सबैका लागि गर्वको विषय भएको प्रदेश प्रमुख देवकोटाले उल्लेख गर्नु भएको छ ।
वाल्मिकी रचित संस्कृतको रामायणलाई सरल र मिठासपूर्ण नेपाली भाषामा अनुवाद गरी गाउँघरसम्म पुर्याउनु भएको स्मरण गर्नुहुँदै नेपाली भाषाका साथसाथै साँस्कृतिक चेतना पनि उजागर भएको बताउनु भएको छ । ‘हाम्रा गाउँघरहरू रामायणका श्लोक वाचनले गुन्जायमान हुन्थे । प्रायः सबैजसोका लागि रामायण कर्णप्रिय ग्रन्थ थियो र आज पनि छ’ प्रदेश प्रमुख देवकोटाले सन्देशमार्फत भन्नु भएको छ ।
‘भानुभक्तले देखाएको साहित्यिक मार्गले हामीलाई आफ्नो पहिचानको संरक्षण र संवर्द्धन गर्ने प्रेरणा दिएको छ ’ उहाँले भन्नु भएको छ । काव्यमा रहेको सरलता र राष्ट्रिय आत्मसम्मान आज पनि उत्तिकै सान्दर्भिक छ । यस अवसरले आफ्नो गौरवपूर्ण भाषा, साहित्य र संस्कृति प्रतिको सम्मान र कर्तव्य स्मरण गराउँछ । त्यतिमात्र होइन भानुभक्त आचार्यको घाँसीसँगको जम्काभेट जीवनको खुसी र सत्मार्गको प्रेरक प्रसङ्गसँग जोडिएको छ । यसमा लोक कल्याणकारी मार्ग अपनाउने गहन सन्देश प्रवाह भएको छ ।
उहाँले सबैमा एकताको भावना थप प्रगाढ बनाई, नयाँ पुस्तामा साहित्यिक चेतना भरेर सिर्जनशीलताको नयाँ युगको प्रारम्भ गराओस् भन्ने कामना व्यक्त गर्नु भएको छ । ‘भानुभक्तले देखाएको मार्गमा हामी सबै अघि बढी नेपाली भाषा र साहित्यलाई माया र सम्मान गर्न सकौं, अन्तर्राष्ट्रिय जगतमा नेपाली साहित्यलाई अझ उजागर गर्न सकौं भन्ने आशा व्यक्त गर्दछु’ उहाँले सन्देशमा भन्नु भएको छ । साहित्यिक महानायक आदिकवि भानुभक्त आचार्यप्रति देवकोटाले भावपूर्ण श्रद्धाभाव समेत व्यक्त गर्नु भएको छ ।