मकवानपुर । नेपालमा १ हजार ५ सय ५८ जना काेराेना संक्रमित थपिएका छन् । पछिल्लो २४ घण्टामा उक्त सख्यामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएकाे छ ।
मन्त्रालयका अनुसार देशभरमा ८ जार ६ सय ५४ नमुनाको पीसीआर परिक्षण गर्दा १ हजार ८६ र ३ हजार ७ सय २० जनाको एन्टीजिन परिक्षण गर्दा ४ सय ७२ जनामा संक्रमण देखिएको हो ।
यसैगरी बितेको २४ घण्टामा थप १ हजार ३ सय ५१ जना काेराेना संक्रमणमुक्त भएका छन् भने काेराेना निको हुनेको संख्या हाल ७ लाख ४६ हजार ५ सय ६६ रहेको छ ।
यस्तै नेपालमा कोरोना संक्रमणबाट थप १० जनाको मृत्यु भएको छ । याे समेत हालसम्म कोरोनाबाट मृत्यु हुनेको संख्या ११ हजार १२ जना पुगेको छ ।
यसैबीच हालसम्म देशभर ४० लाख ७७ हजार २ सय ५६ नमुनाको पीसीआर परीक्षण भएको स्वास्थ्य मन्त्रालयकाे तथ्याङ्कमा उल्लेख छ । हाल देशभरका क्वारेन्टाइनमा २ सय ३६ जना र २५ हजार ४ सय ९७ जना संक्रमित आइसोलेसनमा रहेका छन् ।
मकवानपुर । सरकारले दसैं, तिहार र छठवर्पलाई लक्षित गरि असोज १ गते शुक्रबारदेखि खाद्यन्न सुपथ मूल्य पसल सञ्चालन गरेकाे छ । विगत वर्षदेखि नै दसैं, तिहार र छठ पर्वमा उपभोक्तालाई राहत दिने उद्देश्यले खाद्यन्नका सुपथ मुल्य पसल सञ्चालन गर्दै आएको छ ।
यो वर्षमा पनि सोही प्राणालीलाई निरन्तरता दिएको हो । उद्योग वाणिज्य तथा आपूर्ति मन्त्रालयलका अनुसार देशका विभिन्न ३९ वटा जिल्लाको ४३ स्थानमा खाद्यन्न सुपत मुल्य पसल सञ्चालन भएका छन् । सुपथ मुल्य पसल १ असोज देखि २४ कार्तिक गत सम्म सञ्चालन हुने छन् । सुपथ मूल्य पसलमा चामल, सीमी, फापर, नुन, चिनीका साथै खसीबोका र दुग्धजन्य पदार्थ पनि बिक्री गरिनेछ । खाद्य व्यवस्था तथा व्यापार कम्पनी र साल्ट ट्रेडिङ कर्पाेरेसन मार्फत सुपथ मुल्य पसल सञ्चालन भएका छन् ।
तर हेटौंडामा भने सुपथ मूल्य पसल खोल्ने कुनै तयारी रहेको छैन । साल्ट ट्रेडिङ कर्पोरेशन मकवानपुरले हेटौंडामा सुपथ मूल्य पसल खोल्ने कुनै सम्भावना अहिलेसम्म नदेखिएको जनाएकाे छ । कर्पाे रेशन मकवानपुरले अहिले नुन मात्र रहेको जनाएकाे छ । सरकारसंग चिनी समेतको माग गरिएकाेमा चिनी उपलब्ध हालसम्म उपलब्ध भएकाे छ । प्रर्याप्त खाद्य बस्तु नभएकाले हेटौंडामा सुपथ मूल्य पसल सञ्चालन गर्न नसकिने साल्ड ट्रेडिङ मकवानपुरले जनाकारी दिएकाे छ । तर केन्द्रले सुपथ पसल सञ्चालन गर्न पत्राचार गरेमा जे भएकाे खाद्यवस्तुकाे पलस सञ्चालन गरिने भएकाे छ ।
चाडपर्वमा उपभोक्तालाई राहत दिन सरकारले खाद्यन्नका सुपथ मूल्य पसल सञ्चालन गर्ने गरेकाे छ । सुपथ पसलमार्फत उपभोक्तालाई चिनी, नुन, चामल, फापर, घिउ र खसीबोकामा छुट हुने छन् । सरकारले सञ्चालन गरेकाे सुपथ पसलबाट चिनीमा प्रतिकेजी ५ रुपैयाँ, नुनमा प्रतिकेजी २ रुपैयाँ, चामलमा प्रतिकेजी ५ रुपैयाँ, फापर, सिमी र खसीबोकामा प्रतिकेजी १० रुपैयाँ छुट हुने छ ।
खाद्य व्यापार कम्पनीले दाल, चामल, पिठो, चिउरा, तेल, नुन, फापर, सिमी, खसीबोकामा तथा साल्ट ट्रेडिङले नुन र चिनीलगायतका खाद्यवस्तु र दुग्ध विकास संस्थानले घिउ र पनिरमा छुट दिएको छ ।
खाद्य व्यापार कम्पनीले फापर, सिमी भटमासको तेल, चामल र खसीबोकामा प्रतिकिलो १० रुपैयाँ तथा पिठो, चिउरा, तोरीको तेल, सनफ्लावरको तेल, दालमा प्रतिकिलो ५ रुपैयाँ छुट दिएको छ । दुग्ध विकास संस्थानले घिउमा प्रतिकिलो ५० रुपैयाँ र पनिरमा प्रतिकिलो २० रुपैयाँ छुट दिएको छ । साल्ट ट्रेडिङले चिनीमा ५ रुपैयाँ र नुनमा २ रुपैयाँ छुट दिएको छ । साल्ट ट्रेडिङका अनुसार चिनी प्रतिव्यक्ति २ किलो र नुन ६ किलोसम्म किन्न पाइनेछ ।
खाद्य व्यवस्था तथा व्यापार कम्पनीले भने उपभोक्ताले खाद्य कम्पनीको अनलाइन मार्फत माग गरे पनि छुट मुल्यमा नै उपभोक्ताको घरमा पुर्याउने व्यवस्था गरेकाे जनाएकाे छ । दसैंमा खसीबोकाको खपत धेरै हुने हुनाले निजी क्षेत्रका व्यवसायीले मनपरी मूल्य लिई उपभोक्ता ठगिने भएकाेले बजार मूल्य नियन्त्रण गर्नका लागि कम्पनीले प्रत्येक वर्ष खसीबोका खरिद गरेर सुपथ मूल्यमा बिक्री गर्ने गरेको छ ।
मन्त्रालयका अनुसार दशै तिहार र छठपर्वमा अत्यावश्यक वस्तुमा छुट दिनका खाद्य कम्पनीलाई एक करोड ७५ लाख र कर्पाेरेसनलाई एक करोड ५० लाख रुपैयाँ छुट्याएको छ । कम्पनी र कर्पाेरेसनका उपत्यकासँगै मुलुकभर रहेका आफ्ना बिक्री केन्द्रमार्फत छुट मूल्यमा खाद्यान्न बिक्री गरिनेछ ।
मकवानपुर । महिला मिलन बचत तथा ऋण सहकारी संस्थाले विहीबार २१ औं वार्षिक साधारणसभा गरेको छ । हेटाैडा १३ मा रहेकाे सहकारी संस्थाकाे साधारणसभा हेटाैडा उपमहनागरपालिकाकी उप प्रमुख मिना कुमारी लामाले गरेकी थिइन् ।
साधारसभा उद्घाटन गर्दै उनले सहकारीले महिलाहरुलाई उत्पादनसँग जोडेर काम गर्नुपर्ने बताईन्। महिलाहरुको ठुलो नेतृत्व गरेको सहकारी भोलिका दिनमा राष्ट्रिय स्तरको सहकारी बन्न सक्ने समेत उनले शुभेच्छा व्यक्त गरिन् ।
हाल सहकारीको ५२ सय ७८ शेयर सदस्य रहेका छन् । सहकारीले गत वर्ष ५६ करोड कुल कारोबार गर्दे १ करोड १७ लाख नाफा गर्न सफल भएको छ । यस्तै आगामी आर्थिक वर्षमा ६२ करोड कारोबार गर्ने र १ करोड ४० लाख नाफा गर्ने लक्ष्य राखेको महिला मिलन सहकारीकी अध्यक्ष विष्णुमाया लामाले बताईन् ।
‘२ दशक अघि विरुवा रोपेको सहकारी अहिले धेरै फैलिएको छ’ सहकारीको संस्थापक अध्यक्ष सुकुमाया थिङले भनिन् ‘अहिले महिला मिलनको सदस्य भनेर देश विदेशसमा समेत चिनिएकोले पुस्तौपुस्तासम्म सहकारी यसरी नै अघि बढ्नु पर्छ।’ महिला मिलनले अहिले ४० लाखसम्म शेयरसदस्यलाई ऋण लगानी गर्दै आएको छ । १५ दिनअघि देखि समूहतगत रुपमा गएर छलफल गरेको सहकारीले विहीबार कार्यालयमा कोभिडको कारण न्यून सदस्यहरुको उपस्थितिमा साधारणसभा गरेको हो । सहकारीले आफ्नो सदस्यहरुलाई जुम मार्फत जोडेको थियो ।

सहकारीले आफ्नो २१ औं वार्षिक साधारणसभामा कर्मचारी दिपेश अधिकारी र पत्रकारिता क्षेत्रमा क्रियाशील पत्रकार निशा गुरुङलाई सम्मान गरेको छ । यस्तै शेयर सदस्यहरु तिर्थ कुमारी नेपाल, शान्ति माया हिडडुङ र हिरामाया वाइबालाई सम्मान गरेको छ ।
कार्यक्रममा हेटौंडा–१२ का वडाअध्यक्ष ललित घलान, हेटौंडा–१३ को वडाअध्यक्ष मनोक वाइबा लगायतको उपस्थिति रहेको थियो ।
मकवानपुर । ग्रामीण महिला सेवा केन्द्र मकवानपुरको २० औं वार्षिक साधारणसभा हेटौंडामा भएको छ । साधारणसभा केन्द्रका अध्यक्ष उर्मिला कार्कीको सभाध्यक्षता तथा हेटौंडा उपमहानगरपालिकाका मेयर हरिबहादुरमहतको प्रमुख आतिथ्यतामा विहीबार सम्पन्न भएको हो ।
कार्यक्रमको उद्घाटन गर्दै मेयर महतले यस संस्थासँग सहकार्य गरेर विकट क्षेत्रमा काम गर्न तयार रहेको बताए ।
कार्यक्रममा अध्यक्ष कार्कीले ग्रामिण महिला सेवा केन्द्र मकवानपुरले हालसम्म २३ हजार महिलाहरुलाई सेवा प्रदान गरेको बताईन् । जिल्लामा ४१ वटा महिला सहकारीका २ हजार ३ सय महिला समुहमा आबद्ध रहेका २३ हजार महिलाहरुसँग प्रत्यक्ष रुपमा काम गरी महिलाहरुको सामाजिक, आर्थिक, शैक्षिक, राजनैतिक सशक्तिकरणको क्षेत्रमा भूमिका निर्वाह गरेको उनले जानकारी दिइन् ।
संस्थाले तत्कालिन ३८ वटा गाविसहरुमा महिला सहकारीको माध्यमबाट महिला, बालबालिका, दलित, जनजाति, तथा पछाडी पारिएका जानजातिहरुको सामाजिक, आर्थिक, राजनैतिक तथा वातावरणीय सशक्तिकरणको क्षेत्रमा काम गर्दै आएको अध्यक्ष कार्कीले जानकारी दिइन् । हाल केन्द्रले जिल्लाका बागमती, मनहरी र मकवानपुरगढी गरी ३ वटा गाउँपालिका तथा हेटौंडा उपमहानगरपालिकामा प्लान इन्टरनेशनल नेपालसँगको साझेदारीमा ‘नेतृत्व र निर्णय’ कार्यक्रम गरिरहेको छ ।
कार्यक्रममा सचिव अचला शर्माले संस्थाको वार्षिक प्रतिवेदन तथा कोषाध्यक्ष सुलोचना स्याङतानले संस्थाको आर्थिक प्रतिवेदन प्रस्तुत गरेका थिए । यस्तै साधारण सभामा लेखा सुपरिवेक्षणको प्रतिवेदन, लेखा परिक्षकको नियुक्ति तथा पारिश्रमिकको अधिकार प्रत्यायोजन, आवश्यक नीति नियम संशोधन लगायतका प्रस्तावहरु पेश गरिएको थियो ।
३६ जना सदस्यहरु रहेको ग्रामिण महिला सेवा केन्द्रमा कार्यक्रम संयोजक देखि कार्यालय सहयोगीसम्म गरेर ११ जना कर्मचारी रहेको संस्थाले जनाएको छ । संस्थाले गत आ.व. २०७७/०७८ मा सदस्यता शुल्क, घरभाडा, अनुदानलगायतका शिर्षकहरुबाट कुल १ करोड २१ लख ५१ हजार ५ सय ८५ रुपैयाँ आम्दानी गरेको कोषाध्यक्ष स्याङतानले जानकारी दिईन् । जसमा विभिन्न कार्यक्रमका शिर्षकमा १ करोड २३ लाख ६३ हजार ६ सय ५४ रुपैयाँ ७० पैसा खर्च भएको कार्यक्रममा जानकारी गराइएकाे थियाे ।
कार्यक्रममा भीमफेदी गाउँपालिकाकी उपाध्यक्ष तथा संस्थाको सल्लाहकार सदस्य पार्वती राना, संस्थापक सदस्य सरिता सापकोटा, सल्लाहकार सदस्य शर्मिला श्रेष्ठ, लेखा समिति संयोजक जुना दंगाल लगायतकाको आतिथ्यता रहेको थियो ।
मकवानपुर । हेटौंडा-१६ की साेममाया रुम्बालाई ह्वील चियर प्रदान गरिएकाे छ । सहयोगी मन नेपाल मकवापुरले विहीबार अशक्त रहेकी रुम्बालाई सहयाेग स्वरुप ह्वील चियर प्रदान गरेको हाे ।
लामो समयदेखि हिडडुल गर्न नसक्ने अवस्थामा रहेकी ४८ वर्षीया रुम्बालाई एक थान ह्वील चियर सहयोग गरिएको सहयोगी मन नेपालका अध्यक्ष केदार प्रसाद चौलागाईले बताए । उनलाई हिडडुल गर्न सहज हाेस भनेर ह्वील चियर सहयोग गरिएको चाैलागाईले बताए ।
श्री कृष्ण प्रणामि सेवा समिति मकवानपुरका अध्यक्ष समेत रहेका चौलागाईले आफुहरुले समाजमा मानवीय सेवामूलक कार्यको साथै विभिन्न सहयोगको कामलाई पनि निरन्तरता दिईरहेको बताए ।
हेटौंडा-१६ का वडा अध्यक्ष रामकृष्ण कोइरालाको सहजीकरणमा उक्त ह्वील चियर हस्तान्तरण गरिएको हो । यसअघि पनि सहयोगी मनले एक सय वर्ष उमेर नाघेकी वृद्धालाई ह्वील चियर सहयोग गरेको थियो ।