मकवानपुर । महिला हिंसामुक्त पालिका घोषणा गर्न माग गर्दै ज्ञापन पत्र बुझाइएकाे छ । अखिल नेपाल महिला संघ (क्रान्तिकारी) बकैया गाउँ कमिटीले महिला हिंसामुक्त पालिका घोषणा लगायत महिलासँग सम्बन्धित १२ बुँदे माग राख्दै बकैया गाउँपालिकामा असाेज ५ गते मैगलबार ज्ञापनपत्र बुझाएका छन् ।
गाउँ कमिटीले बकैया गाउँपालिकाका अध्यक्ष दामोदर खनाल, उपाध्यक्ष सरला बोलखे र प्रमुख प्रशासकीय अधिकृत लक्ष्मण पुडासैनीलाई संयुक्त रुपमा ज्ञापन पत्र बुझाएकाे हाे । माध्यमिक तहसम्म विद्यालयलाई किशोरी मैत्री बनाउनुपर्ने, सेफ हाउस व्यवस्था हुनुपर्ने, शिक्षण संस्था, स्वास्थ्य संस्था वरपर धुम्रपान, मद्यपान र जुवातास निषेध क्षेत्र घोषणा गरिनुपर्ने, लैंगिक उत्तरदायी बजेट १० प्रतिशतको व्यवस्था गरी महिलाहरुको क्षमता तथा सीप विकास गर्नुपर्ने, सबै महिलाहरुलाई अस्पतालमै सुत्केरी गराउने व्यवस्था हुनुपर्ने, समान कामको समान ज्याला कार्यान्वयन गर्नुपर्ने लगायतका माग ज्ञापन पत्रमा समेटिएको छ ।
अखिल नेपाल महिला संघ (क्रान्तिकारी) बकैया गाउँ कमिटी अध्यक्ष लक्ष्मी सिलवालले केन्द्रीय योजना अनुसार देशैभरका पालिकामा ज्ञापन पत्र बुझाउने कार्यक्रम अन्तर्गत बकैयामा पनि ज्ञापन पत्र बुझाईएको जानकारी दिइन् । ज्ञापन पत्र बुझ्दै बकैया गाउँपालिका अध्यक्ष दामोदर खनालले गाउँपालिकाले सम्बन्धित विषयहरुमा ध्यान दिने बताए । यस्ता संवेदनशील विषयहरु उठाइदिएकोमा महिलाहरुलाई धन्यवाद दिँदै अध्यक्ष खनालले कतिपय विषयहरु सम्बाेधन भइसकेकाे र बाँकी विषयमा पनि सम्बन्धित क्षेत्रको ध्यानाकर्षण गराइ मागहरु सम्बाेधन गरिने उनले बताए ।
कार्यक्रममा अखिल नेपाल महिला संघ (क्रान्तिकारी)को मकवानपुर जिल्ला अध्यक्ष लक्ष्मी पाख्रिन, केन्द्रीय सदस्य लक्ष्मी माझी लगायत संगठनका नेतृहरुको उपस्थिती रहेको छ ।
मकवानपुर । सरकारले यस अघी नियुक्त गरिएका सबै देशका राजदुतहरुलाई फिर्ता बोलाउने निर्णय गरेको छ । मंगलबारकाे मन्त्रिपरिषद् बैठकले अघिल्लाे सरकारले राजनीतिक रूपमा नियुक्त गरेका सबै राजदूतलाई फिर्ता बोलाउने निर्णय गरेको हाे ।
मंगलबार सिंहदरवारमा बसेको मन्त्रिपरिषद् बैठकले राजनीतिक भागबन्डाका आधारमा नियुक्त सबै राजदूतलाई फिर्ता बोलाउने निर्णय गरेको छ । सरकारको यो निर्णयसँगै अमेरिकाका लागि नेपाली राजदूत युवराज खतिवडा, बेलायतका लागि पूर्वमुख्यसचिवसमेत रहेका लोक दर्शन रेग्मी लगायत अन्य देशहरूमा नियुक्त भएका सबै राजदूतहरु फिर्ता हुनेछन् ।
ओली सरकारले राजनीतिक कोटामा पठाएका राजदूतलाई फिर्ता बोलाउने निर्णय भएसँगै १० मुलुकमा पठाइएका राजदूतहरु फिर्ता हुने भएका छन् ।
ओमानकी राजदूत शर्मिला ढकाल पराजुली र जापानी नियोगकी राजदूत प्रतिभा राणालाई ओली नेतृत्वको सरकारले अर्को नियुक्ति नभएसम्म म्याद थप गर्दै राजदूत पदमा निरन्तरता दिएको थियो ।
तर, आज बसेको मन्त्रिपरिषद् बैठकले यी दुई राजदूतबारे केही बोलेको छैन । जापानी राजदूत राणा प्रधानमन्त्री शेरबहादुर देउवाकै सासु भएकीले उनीबारे के हुने भन्ने टुंगो पनि लागेको छैन ।
फिर्ता बाेलाउने निर्णय भएका राजदुतहरू
१) महेन्द्रबहादुर पाण्डेय -चीन
२) डा. वंशीधर मिश्र -बंगलादेश
३) नारदमुनि भारद्धाज -कतार
४) युवराज खतिवडा -अमेरिका
५) अञ्जान शाक्य -इजरायल
६) उदयराज पाण्डे -मलेसिया
७) दावाफूटी शेर्पा -स्पेन
८) डा. निर्मलकुमार विश्वकर्मा -दक्षिण अफ्रिका
९) नीलाम्बर आचार्य -भारत
१०) लोकदर्शन रेग्मी -बेलायत
यसैबीच मन्त्रिपरिषदको असाेज ५ गते मंगलबारकाे बैठकले विभिन्न ५ निर्णय गरेको छ । बैठकले केपी शर्मा ओलीका पालामा राजनीतिक रुपमा नियुक्त गरिएका सबै राजदूतलाई फिर्ता बोलाउने निर्णय गरेको छ । यस्तै, सरकारले कोभिड १९ संकट व्यवस्थापन विधेयकलाई संसदमा लैजान स्वीकृति प्रदान गरेको छ ।
यसैगरी कोभिड १९ व्यवस्थापन आदेश २०७८ स्वीकृत गरेको छ । बैठकले कर्णाली करिडोर अन्तर्गत करिब साढे १८ किलोमिटर ट्रयाकको काम शुरु गर्न नेपाली सेनालाई स्वीकृति प्रदान गरेको छ ।
यी हुन् मन्त्रिपरिषद्का ५ निर्णय
१) राजनीतिक नियुक्तिका सबै राजदूतहरू फिर्ता बोलाउने ।
२) कर्णाली करिडोर अन्तर्गत सलिसल्ला, सिमिकोट खण्डको बुल्दिकुनादेखि लालीबगरसम्म सडकखण्डको सात किलोमिटर र लैखुबद्री गाउँदेखि हुकाखोलासम्म १३ दशमलब ५ किलोमिटर सडक निर्माणको ट्रयाक निर्माणण कार्य नेपाली सेनालाई थाल्न स्वीकृति प्रदान ।
३) कोभिड १९ संकट व्यवस्थापन गर्न बनेको विधेयक संसद्मा पेश गर्न स्वीकृत प्रदान । औषधि ऐन २०३५ लाई संशोधन गर्न बनेको विधेयक संघीय संसद्मा पेस गर्न स्वीकृति प्रदान र
४) कोभिड १९ व्यवस्थापन आदेश २०७८ स्वीकृत गर्ने ।
५) संयुक्त राष्ट्रसंघको ७६ औं महासभामा भाग लिने प्रतिनिधिमण्डलको गठन गर्ने ।
मकवानपुर । आजदेखि सोह्र श्राद्ध सुरु हुने भएकाे छ । प्रत्येक वर्ष आश्विन कृष्ण प्रतिपदादेखि सोह्र श्राद्ध सुरु हुन्छ । आश्विन कृष्ण प्रतिपदादेखि आश्विन शुक्ल प्रतिपदासम्मका सोह्रवटा तिथिमा दिवङ्गत पितृलाई सम्मानका साथ तर्पण, सिदादान र पिण्डदान गरिने भएकाले यो पक्षलाई पितृ पक्ष एवं सोह्रश्राद्ध समेत भन्ने गरिएको हो ।
सोह्र श्राद्ध अर्थात् पितृ पक्षमा आज अपराह्नकालमा दिवङ्गत पितृका नाममा तर्पण, सिदादान र पिण्डदान गरी सुरु गरिँदैछ। कतै यो पक्षलाई प्रेत पक्ष पनि भनिएको छ। पितृ पक्षको पहिलो दिन आज प्रतिपदा तिथि श्राद्ध गरिन्छ। सोह्रश्राद्ध अपराह्नकालमा गर्नुपर्छ भन्ने शास्त्रीय वचन रहेको छ ।
चाडपर्व यज्ञयज्ञादि तथा ठूला कार्य गर्नुअघि पितृलाई श्रद्धा भक्तिका साथ सम्झिने हिन्दू शास्त्रीय परम्पराअनुसार सोह्रश्राद्ध गर्ने गरिएको हो। पितृपक्षका बेलामा पितृलोकबाट दिवङ्गत पितृहरु पिण्ड, पानीको आशले मत्र्यलोकमा झर्छन् भनी धर्मशास्त्र, ग्रन्थमा उल्लेख गरिएको छ। यस समयमा पितृले आश गरी बसेका हुन्छन् भन्ने शास्त्रीय मान्यता छ। यस अवसरमा शास्त्रीय रुपमा दिइएका विकल्प अनुसारका कर्म नगरे पितृ सुस्केरा निकाली सन्तानलाई श्राप दिई फर्कन्छन् भन्ने वाक्य ती ग्रन्थमा उल्लेख गरिएको धर्मशास्त्रविद्हरूको भनाइ छ।
यसरी सोह्रश्राद्ध गर्नाले पितृप्रतिको आफ्नो दायित्वबोध पूरा हुनाका साथै पितृऋणबाट पनि मुक्त भइन्छ भन्ने धार्मिक विश्वास छ। वैदिक सनातन हिन्दू धर्मावलम्बीले ठूला माङ्गलिक कार्य गर्नु अगाडि नान्दीमुखी श्राद्ध, पितृको मृत तिथिमा गर्ने एकोद्दिष्ट श्राद्ध, सोह्र श्राद्धमा गर्ने पार्वण श्राद्ध, सोह्र श्राद्धमा मृत्यु भएकाको सम्झनामा गरिने एक पार्वण श्राद्ध, तीर्थमा गरिने तीर्थ श्राद्ध र बद्रीको ब्रह्मकपाल तीर्थमा गरिने ब्रह्म कपाली जस्ता श्राद्धहरु प्रचलित रहेका छन्।
नेपालीले बडा दशैँ मनाउनुअघि पितृलाई तृप्ति गर्ने परम्पराअनुसार सोह्र श्राद्ध गर्ने गरिएको मान्यता छ। पितृ पक्षको समाप्तिसँगै दुर्गा पक्ष अर्थात् नेपालीको महान् पर्व बडा दशैँ शुरु हुन्छ।
यस अवसरमा उपत्यकाको उत्तरपूर्वी भेगस्थित गोकर्णेश्वर उत्तरगया, नुवाकोट र रसुवाको सङ्गमस्थल बेत्रावती, देवघाट, त्रिवेणीलगायत तीर्थस्थलमा पनि पितृप्रति श्रद्धासाथ श्राद्ध गर्नेको भीड लाग्ने गर्छ । यस वर्ष पनि नयाँ भेरियन्टसहितको कोरोना भाइरसको सङ्क्रमणबाट बच्न जारी निषेधाज्ञाका कारण स्वास्थ्य मापदण्ड अपनाएर कर्म गर्न धर्मशास्त्रविद्ले आह्वान गरेका छन्। विशेष गरी अरुको घरमा डेरा गरी बसेकाले तीर्थमा गई श्राद्ध गर्नुपर्छ भन्ने शास्त्रीय मान्यता छ । अरुको घरमा श्राद्ध गर्नुहुँदैन भन्ने शास्त्रीय मान्यताका आधारमा तीर्थमा गई श्राद्ध गर्ने गरिएको हो।
श्राद्धका लागि कर्ता (गर्ने मानिस), ब्राह्मण (गराउन जान्ने मानिस) र श्राद्ध सामग्रीको आवश्यकता पर्दछ। कारणवश श्राद्ध रोकिँदा शास्त्रमा अनेक विकल्प दिइएका छन्। सोह्र श्राद्ध कर्ताले आफ्ना पिताको तिथिमा गर्नुपर्ने विधान छ। आपत् धर्मअनुसार कुनै कारणवश अड्किएमा आश्विन कृष्ण औँसीदेखि आश्विन शुक्ल पञ्चमीसम्म गर्न हुने शास्त्रीय वचन धर्मशास्त्रविद् बताउँछन्।
यो समयमा पनि कारणवश सोह्र श्राद्ध गर्न नसकिएमा कार्तिककृष्ण औँसी अर्थात् लक्ष्मीपूजाका दिन गर्न सकिन्छ। कार्तिककृष्ण औँसीमा पनि गर्न नसकिने भएमा वृश्चिक सङ्क्रान्ति लाग्नुअघिसम्म अर्थात् मङ्सिर अघिसम्म जुराएर गर्न सकिने शास्त्रीय मत छ।
आश्विन शुक्ल पञ्चमीपछिका अष्टमी, द्वादशी र औँसी, भरणी नक्षत्र र व्यतीपात योग परेका दिन जुनसुकै तिथि परेपनि रोकिएको सोह्रश्राद्ध गर्न सकिने शास्त्रीय विकल्प समेत निर्णयसिन्धु, धर्मसिन्धुलगायत धर्मशास्त्रका ग्रन्थमा दिइएको छ।
त्यसपछि पनि सोह्रश्राद्ध गर्न नसकिएमा सक्नेले आफैँ नसक्नेले ब्राह्मणमार्फत् दैनिक १ सय ८ मन्त्र जप गर्न सकिने शास्त्रीय विकल्प रहेको छ। विधिपूर्वक यस्तो जप १० महिनासम्म गर्नुपर्छ। यो विधिबाट पनि पितृले तृप्ति प्राप्त गर्ने धार्मिक विश्वास छ।
‘श्रद्धया यद्दियते तद् श्राद्धम्’ अर्थात् श्रद्धाले जे दिइन्छ, त्यो नै श्राद्ध हो। यसैले यो पक्षमा पितृलाई खुसी बनाएर आनन्द लिने गरिन्छ । सोह्र श्राद्ध चार किसिमले गरिन्छ। तीन पुस्तालाई मात्र पिण्ड दिएर गरिने एकापार्वण श्राद्ध हो। यही पक्षमा निधनका भएकाका नाममा यो श्राद्ध गरिन्छ।
घर मामाघर तिरका तीन पुस्तासम्मलाई पिण्ड दिएर गरिने श्राद्धलाई द्वि पार्वण भनिन्छ। घर तर्फकालाई दुई पिण्ड र मामाघरतर्फ एक पिण्ड दिएर गरिने सोह्रश्राद्धलाई त्रिपार्वण भनिन्छ। घरतर्फका पितृलाई दुई र मामाघरतर्फका पितृलाई दुई गरी चार पिण्ड दिएर गरिने सोह्र श्राद्धलाई चतुर्पावण भनिन्छ।
मकवानपुर । मकवानपुर प्रहरीले २ जना फरार प्रतिवादी पक्राउ गरेकाे छ । प्रहरीले लागुऔषध मुद्दामा फरार प्रतिवादी हेटाैडा १२ का सुनिल कुमार सिं तामाङ भन्ने सुनिल थिङ्ग र हेटाैडा ९ का राज कुमार काेइरालालाई पक्राउ गरेकाे हाे ।
मकवानपुर जिल्ला अदालतको २०७६ मंशिर १० गतेको फैसलाले लागुऔषध गाँजा चरेस मुद्दामा १२ दिन कैद भुक्तान गर्न बाँकी फरार प्रतिवादी थिङ्गलाई जिल्ला प्रहरी कार्यालय मकवानपुरबाट खटिएको प्रहरी टोलीले असाेज १ गते शुक्रबार हेटाैडा १२ बाट पक्राउ गरिएकाे हाे ।
यसैगरी मकवानपुर जिल्ला अदालतको २०७४ साल चैत २६ गतेको फैसलाले लागुऔषध मुद्दामा १ महिना १० दिन कैद र ३ हजार ५ सय जरिवाना भुक्तान गर्न बाँकी फरार प्रतिवादी कोईरालालाई जिल्ला प्रहरी कार्यालय मकवानपुरबाट खटिएको प्रहरी टोलीले असाेज ४ गते साेमबार हेटाैडा ९ बाट पक्राउ गरिएकाे जिल्ला प्रहरी कार्यालय मकवानपुरका प्रहरी निरीक्षक देवेन्द्र दासले जानकारी दिए ।
पक्राउ परेका दुवै जनालाई आवश्यक कारवाहीको लागि जिल्ला अदालत मकवानपुर उपस्थित गराईएको प्रहरीले जनाएकाे छ ।
मकवानपुर /मासुको प्रयोजनको लागि राष्ट्रिय जनावर गाई काटेको आरोपमा मकवानपुरका १० जनालाई जिल्ला प्रहरी कार्यालय मकवानपुरले नियन्त्रणमा लिएको छ ।
मकवानपुर बकैया गाउँपालिका वडा–११ मा गाई काटेको गोप्य सूचनाको आधारमा स्थलगत अनुगमन गर्दा गाईको मासु फोला परेको प्रहरीले जनाएको छ । जिल्ला प्रहरी कार्यालय मकवानपुरका निमिक्त प्रवक्ता प्रहरी निरीक्षक देवेन्द्र दासका अनुसार गाईको मासु सहित १० जनालाई प्रहरीले नियन्त्रणमा लिएको बताइएको छ ।
‘हात्तिसुँडे प्रहरी चौकीबाट खटिएको टोलीले उक्त स्थानमा गाई काटी मासु भाग लगाईरहेको भेटेको थियो’ प्रनि दासले भने । उनका अनुसार मकवानपुर बकैया गाउँपालिका वडा नं. ९ बस्ने ५० वर्षीया सञ्चमाया ब्लोन, १९ बर्षीय सोमार ब्लोन, ४२ वर्षीया फुलमाया थिङ, १८ वर्षीय सन्देस बि.क., बकैया गाउँपालिका वडा नं. ११ का ३९ वर्षीय जनक बहादुर लो, वडा नम्बर ४ का ४८ वर्षीय प्रल्हाद भक्त न्यासुर रहेका छन्।
यसैगरी बकैया गाउँपालिका कै वडा नं. ९ का ४० वर्षीय सोम बहादुर तमाङ, वडा नं. ११ का ४३ वर्षीय राज कुमार घलान,४० वर्षीय रबिन्द्र लो र ३३ वर्षीय पम्पराज लो रहेका छन् । उनीहरुको बारेमा थप अनुसन्धान भैरहेको जिल्ला प्रहरी कार्यालय मकवानपुरले जनाएको छ ।