मकवानपुर / नेपाली काँग्रेस बागमती प्रदेश सभापतिमा इन्द्रबहादुर बानियाँले उम्मेदवारी घोषणा गरेका छन् ।
बानियाँले पार्टी सभापति शेर बहादुर देउवा पक्षबाट आफ्नो प्यानल घोषणा गरेका हुन् । पत्रकार सम्मेलन गर्दै बानियाँले देउवा पक्षबाट आफ्नो नेतृत्वमा प्यानल घोषणा गरेका हुन् ।
उनको प्यानलमा उपसभापतिहरु मदन कृष्ण श्रेष्ठ र धर्मराज गौतम रहेका छन् । यसैगरी महामन्त्रीहरुमा राजु श्रेष्ठ र तिलक रुवाली,सह–महामन्त्रीहरुमा हरिशरण श्रेष्ठ, महेन्द्र थिङ र निरु खड्का रहेका छन् ।
यसअघि, हिजो साँझ सस्थापन इतरको समूहबाट जगदिश्वर नरसिंह केसीले बागमती प्रदेश सभापतिको लागि आफ्नो प्यानल सार्वजनिक गरेका थिए ।
उनले आफ्नो प्यानलमा उपसभापतिहरुमा मोहनबहादुर बस्नेत र राजेन्द्र बुर्लाकोटी, महामन्त्रीहरुमा कञ्चनबादे श्रेष्ठ र माईकल रामचन्द्र अर्याल छन् ।
मकवानपुर / नेपाली कांग्रेस बागमती प्रदेश अधिवेशन आज १६ मंसिरबाट हेटौँडामा सुरू भएको छ । प्रदेश सभापतिको लागी ३ जनाको उम्मेदवारी रहने पक्का भएको छ ।
पार्टीको केन्द्रिय अधिवेशन पुर्व हुँदै गरेको प्रदेश अधिवेशनलाई पनि उच्च महत्त्वका साथ हेरिएको छ । वर्तमान सभापति शेरबहादुर देउवा विरुद्ध सँस्थापन इतरका सबै प्रतिस्पर्धी एक भैरहेको सन्दर्भमा बागमती प्रदेशमा पनि सोहि तस्बिर देखिने भएको छ । आज सँस्थापन इतरको समूह अन्तरगतको रामचन्द्र पौडेल समूहले नुवाकोट कांग्रेसका पूर्व सभापति जगदिश्वर नरसिंह केसीलाई उम्मेद्वार बनाएको छ भने कृष्णप्रसाद सिटौला समूहले भिमसेनदास प्रधानलाई सभापतिमा अघि सारेको छ ।
यसैगरी शेरबहादुर देउवा प्यानलबाट कांग्रेस मकवानपुरका सभापति तथा पार्टीको बागमती प्रदेश संसदीय दलको नेता समेत रहेका इन्द्रबहादुर बानीयाँले उम्मेद्वारी घोषणा गरेका छन् ।
यो पटक हुने अधिवेशनमा देउवा इतरका समूह एकहुने देखिएको भएपनि तीनजनाको उम्मेद्वारी घोषणापछि भिडन्त भने त्रिपक्षीय देखिएको हो । तर अन्तिमसम्म सिटौला र पौडेल पक्षले एकजनामात्र उम्मेद्वार खडा गर्ने संभावना उच्च रहेको नेपाली कांग्रेसका एकजना नेताले बताए ।
हाल चर्चामा दुई जना देखिएता पनि अन्तसम्म दुई मध्ये एकको उम्मेदवारी हुने ती नेताले बताए । ‘मनोनयन दर्ता गर्दासम्मा त्यो एक मात्र हुने संभावना छ, नेताहरु आन्तरिक छलफलमै हुनुहुन्छ’ ती नेताले भने ।
यसैगरी प्रदेश महामन्त्रीका लागि माईकल रामचन्द्र अर्याल मैदानमा छन् । हेटौंडाको वन विज्ञान खेल मैदानमा अधिवेशनको उद्घाटन सत्र चलिरहेको छ ।
अधिवेशन बागमती प्रदेश संयोजक तथा पुर्व उप-सभापति प्रकाशमान सिंहको सभाध्यक्षतामा भएको उदघाटनलाई नेपाली कांग्रेसका सभापति तथा प्रधानमन्त्री शेरबहादुर देउवाले भर्चुअल माध्यमबाट उद्घाटन गरे ।
उदघाटन कार्यक्रममा कांग्रेस सह-महामन्त्री प्रकाश शरण महत, पुर्व मन्त्री एवम कांग्रेस नेता राजन केसी, केन्द्रीय सदस्य महालक्ष्मी उपाध्याय डिना,कांग्रेस बागमती प्रदेश संसदीय दलका नेता ईन्द्रबहादुर बानियाँ लगायतकाले मन्तव्य व्यक्त गरेका थिए। १८ मंसिरसम्म चल्ने अधिवेशनमा करिब १९ सय अधिवेशन प्रतिनिधि रहेका छन ।
बालमैत्री स्थानीय शासन लागू गर्न सामुहिक प्रतिवद्धता
Tags: No Comments
मकवानपुर । मकवानपुरगढी गाउँपालिकालाई बालमैत्री स्थानीय शासन लागु भएको स्थानीय तहको रुपमा घोषणा गर्न तथा यस अभियानमा सहभागी हुन सरोकारवालाहरुले सामूहिक प्रतिवद्धता व्यक्त गरेका छन् ।

मकवानपुरगढी गाउँपालिकाका संघसंस्था, सम्बन्धित सरोकारवालाहरूले बालमैत्री स्थानीय शासन अभियानको प्रक्रियागत कार्यान्वयन, घोषणा तथा दीगोपनका लागि आ–आफ्नो कार्य प्रक्रियामा समायोजन गरी बालमैत्री पद्वतीको माध्यमले समाज रूपान्तरणको महाअभियानलाई सफल बनाउँने प्रतिवद्धता पत्रका हस्ताक्षर गरेका हुन् ।
बुधबार पालिकामा आयोजना गरिएको अन्तरक्रिया एवम् प्रतिवद्धता कार्यक्रममा गाउँपालिका अध्यक्ष विदुर हुमागाई, वडा नम्बर ५ का अध्यक्ष जीतबहादुर घिमिरे, गाउँपालिकाका प्रमुख कार्यकारी अधिकृत रामकुमार पुडासैनीलगायत सरोकारवालाहरुले हस्ताक्षर गरेका हुन् ।

कार्यक्रममा गाउँपालिका अध्यक्ष बिदुर हुमागाईले भौतिक विकासको पाटोलाई मात्रै महत्व दिने परीपाटीको अन्त्य हुनुपर्ने बताए । ‘भौतिक विकासलाई मात्रै विकास मानिदैन, भौतिक विकासको पाटो एकातिर छ, तर सामाजिक विकास र आर्थिक विकासको पाटोमा नसोचे शुसासन युक्त विकास संभव छैन’ हुमगाईले भने ‘सामाजिक विकास अन्तरगत बालमैत्री शासन धेरै महत्वपूर्ण पाटो हो ।’

बालमैत्री शासन किन भन्ने बुझाउने काम लगभग सकिएको र बालबालिकामाथिको लगानी सयौं बर्षको लागि लगानी हुने उनले बताए । बालमैत्रीमा गरेको लगानीले विकासका अरू अभियानलाई समेत दीगो बनाउने उनले बताए । आगामी माघको अन्त्यसम्म मकवानपुरगढी गाउँपालिकालाई बालमैत्री स्थानीय शासन लागु भएको स्थानीय तहको रुपमा घोषणा गर्ने कार्यक्रम रहेको बताउँदै अध्यक्ष हुमगाईले भने ‘ थोरै समयमा धेरै काम गर्न बांकी छ, सबैको समूहिक साथ चाहिन्छ ।’

गाउँपालिकामा हुने गरेको बाल बिबाह,बाल श्रम जस्ता कुराहरु अझै चुनौतीपूर्ण रहेको उनले बताए । चाँडो बिहे गर्दा आउने गम्भीर समस्याबारे अभिभावकले जानकारी गराउन पर्ने उनले बताए । ‘बाल विवाह विरुद्धको कानून बनिसक्यो अब चर्चामात्रै हैन, गम्भीर हुनुपर्छ’ उनले भने ।
कार्यक्रममा गाउँपालिकाको प्रमुख कार्यकारी अधिकृत रामकुमार पुडासैनीले गत
२०७७ माघ १९ बाट सुरू भएको अभियान कोभिडको कारण केही समय रोकिए पनि निरन्तर काम भैरहेको बताए । बालमैत्री स्थानीय शासन घोषणा गर्नको लागि हाल ५१ वटा सूचक पुरा गरेको हुनुपर्ने पुडासैनीले बताए ।
कार्यक्रममा कार्य पत्र पस्तुत गर्दै पुडासैनीले भने ‘‘बालबालिका समस्या सामाधानको लागि चाहिने स्रोत हुन्, उनीहरु माथि खर्च गरेको हैन लगानी गरेको सम्झनु पर्दछ ।’ गाउँपालिकामा बाल विवाह, बाल प्रेम विवाह, बाल श्रम, जातीय तथा लैङ्गिक विभेद, घरेलु हिंसा, यौन शोषण, शारीरिक तथा मानसिक हिंसा, बेचबिखन तथा ओसारपसार जस्ता कुरीतिहरु चुनौतिको रुपमा रहेको पुडासैनीले बताए ।

कार्यक्रममा सिविन बाल हेल्प लाइन मकवानपुरका प्रमुख झबिन्द्र ज्ञवलीले चुनौतिहरुलाई चिर्दै बालअधिकारको सवाल प्रत्याभुत गराउनु पर्ने बताए । ‘जन्मदर्ता नहुदा आईपर्ने समस्या यावत् छन्, सबै बालबालिकाको जन्मदर्ता हुनुपर्छ’ उनले भने ।
मकवानपुरगढी गाउँपालिका वडा ५ अध्यक्ष जितबहादुर घिमिरेको अध्यक्षतामा कार्यक्रम आयोजना गरिएको थियो । ‘मोबाइलको कारण बाल बिबाह बढाएको छ, सहकारी र टोल बिकासले बालमैत्रीको लागि महत्वपूर्ण योगदान गर्न सक्छ र गर्नुहुने छ भन्ने अपेक्षा हामीले गरेका छौ’ अध्यक्ष घिमिरेले भने ।
कार्यक्रममा बालमित्री अभियानको फोकल पर्सन रामप्रसाद दाहाल, अधिकारकर्मी कविराज हुमगाई, स्थानीय सहकारी, बालक्लब, आमा समूह, टोल विकासलगायतको प्रमुख तथा प्रतिनिधिहरुको उपस्थिति रहेको थियो ।
मकवानपुर । मनहरी गाउँपालिकामा मनहरीमा बालश्रम सम्बन्धी अनुगमन गरिएकाे छ । गाँउपालिकामा रहेका होटल, ग्यारेज, गाडि सफा गर्ने स्थानमा बालश्रम प्रयोग भए नभएको सम्बन्धमा अनुगमन गरिएकाे हाे ।
बालअधिकार समिति, श्रम कार्यालय, नेपाल प्रहरी, बालहेल्पलाइन १०९८ ले संयुक्तरुपमा अनुगमन गरेका हुन् ।मनहरी क्षेत्रका विभिन्न ब्यवसाय, होटल आदिमा बालश्रमिक भएको जानकारी बालहेल्पलाइन १०९८ र गाउँपालिकामा आए पछि अनुगमन गरिएको मनहरी गाउँपालिका उपाध्यक्ष मनिला विष्टले जानकारी दिए ।
अनुगमनका क्रममा मनहरी ९ को चौधमाइलमा गाडि धुनेकाममा १२ र १३ वर्षका ४ जना बालक, मनहरी ८ मा रहेकाे गुरुङ् होटलमा १० वर्षिय १ जना बालक, सुप्रिय होटलमा काम गर्ने १ जना १२ वर्षिय बालिका, सिम्पानी स्थित मोटरबाइक ग्यारेजमा काम गर्ने १३ र १४ वर्षिय ४ जना बालक गरि जम्मा १० जना बालश्रमिक फेला परेको मनहरी गाउँपालिका महिला तथा बालबालिका शाखा प्रमुख शान्ति अधिकारीले बताइन् ।
विभिन्न स्थानहरुमा बालश्रमिक रहेका बालहेल्पलाइनमा सूचना आएको तर अनुगमनको क्रममा फेला नपरेको बालहेल्पलाइन जिल्ला संयोजक झबिन्द्र ज्ञवालीले बताए । अनुगमन टोली आएको सूचना प्राप्त भए पछि बालश्रमिकहरुलाई लुकाईको हुनसक्ने ज्ञवालीले जानकारी दिए । श्रममा संमलग्न बालबालिकाहरु ९ जना मनहरीका र १ जना कैलाश गाउँपालिकाका रहेका जनाइएको छ ।
अनुगमन गरिएका स्थानहरुका बालबालिकाको सम्बन्धमा एक हप्ता भित्रमा सबै बालबालिकालाई अभिभावकको जिम्मा लगाउने र बालबालिकालाइ दिनु पर्ने पारिश्रमिक भुक्तानी गरिसक्नु पर्ने र सो को जानकारी गाउँपालिकालाइ दिनु पर्ने गरी सचेत गराइएकाे छ । यसै गरी १४ वर्ष मुनिका बालबालिकाहरुलाइ निकृष्ट प्रकारको बालश्रममा प्रयोग नगर्न, १४ देखि १८ उमेर वर्षसम्मका बालबालिकाहरुलाइ जोखिमपूर्ण बाहेक अन्य काम लगाउनु परेमा श्रम कार्यालयकाको स्विकृति लिएर मात्र लगाउने गरि समेत सचेत बनाइएको श्रम कार्यालयका प्रतिनिधि भिम प्रसाद शर्माले बताए ।
मकवानपुर । बागमती प्रदेश निर्वाचन कार्यालय हेटौंडाले जिल्लाको १० वटै स्थानीय तहमा ‘मतदाता नामावली संकलन विशेष कार्यक्रम २०७८ सञ्चालन’ गर्ने भएकाे छ । मकवानपुरका १० वटै स्थानीय तहमा २ चरणमा मतदाता नामावली संकलन गरिने भएको हाे ।
मतदातामा नामवलीमा नाम नभएका १८ वर्ष पुरा भएकाकाे नामानली संकलन कार्य गर्न लागिएकाे हाे । साेमबार जिल्ला प्रशासन कार्यलयमा राजनीतिक दलहरु, सुरक्षा निकायका प्रमुखहरुसंग अन्तरक्रिया कार्यक्रम गर्दै कार्यलयले आगामी मंसिर १७ गते देखि पुष २ गते सम्म पहिलो चरण र पुष ५ गते देखि माघ ५ गतेसम्म दोस्रो चरणमा संकलन गरिने जानकारी दिएको छ ।
प्रदेश निर्वाचन कार्यालयका अनुसार पहिलो चरणमा मकवानपुरगढी, भीमफेदी, इन्द्रसरोबर, मनहरी र बकैया गाउँपालिकामा मतदाता नामावली संकलन कार्यक्रम गरिने छ । दोस्रो चरणमा भने जिल्लाको बागमती, राक्सिराङ, कैलाश गाउँपालिका, थाहा नगरपालिकामा कार्यक्रम संचालन गर्ने तय भएको कार्यालयले जनाएकाे छ ।
हेटौंडा उपमहानगरपलिकामा भने जिल्ला प्रशासन कार्यलय र प्रदेश निर्वाचन कार्यालय हेटौंडामा गएर नामावली दर्ता गर्न सकिने बताइएकाे छ ।
कार्यलयका अनुसार जिल्लामा २०७८ कात्तिकसम्म २ लाख ८० हजार १ सय ८१ जना मतदाता रहेका छन् । जसमा १ लाख ४२ हजार ७०३ जना पुरुष, १ लाख ३७ हजार ४ सय ७२ जना महिला र ६ जना तेस्रो लिङ्गी रहेका छन् ।