मकवानपुर । राष्ट्रिय दुग्ध विकास बोर्डको संयोजकत्वमा गठित मूल्य निर्धारण समितिले लागतको आधारमा प्रशोधित दूधको विक्रि मूल्य वृद्धी गर्न गरेकाे सिफारिस कार्यान्वयन नभएकाे भन्दै डेरी उद्योग संघ र नेपाल डेरी एशोसिएसनले ध्यानाकर्षण गराएकाे छ । संघ र एशाेसिएसनले पत्रकार सम्मेलन गरी वृद्धि गरिएकाे प्रशाेधित दूधको मूल्य वृद्धी परिमार्जन गर्न भनेकाे छ ।
बोर्डको संयोजकत्वमा गठित मूल्य निर्धारण समितिले प्रशाेधित दुधकाे मूल्य प्रति लिटर १० रुपैयाँ वृद्धि गर्न सिफारिस गरेकाेमा साेही अनुसार विक्रि मूल्य कायम गर्न कृषि तथा पशुपंक्षी विकास मन्त्रालयले दुग्ध विकास संस्थानलाई (डिडिसी) निर्देशन दिएको थियो । ‘दुग्ध विकास संस्थानबाट मूल्य निर्धारण समिति र मन्त्रालायको निर्देशनको अवज्ञा गरी नीजि क्षेत्रका डेरी उद्योगहरु धरासायी बनाउने मनसायले ९ रुपैया प्रति लिटर वृद्धि गरी शुक्रबारबाट प्रशोधित दूध प्रति प्याकेटको ४२ रुपैया पचास पैसा कायम गरिएको प्रति हामी सम्पूर्ण नीजि क्षेत्रको असहमति प्रकट गर्दछौं संघ र एशाेसिएसनले पत्रकार सम्मेलनमा जारी विज्ञप्तीमा भनिएकाे छ ।
पछिल्लो पटक २०७६ भाद्र २१ गते दूधको मूल्य परिमार्जन पश्चात दुग्ध उत्पादन, संकलन, ढुवानी, प्रशोधन र बजारीकरणमा पशु आहार, इन्धन, विद्युत, ज्याला, ढुवानी खर्च लगायतकाे पटक पटक मूल्य वृद्धि हुन गई कृषक तथा उद्यमीहरु मारमा परेकाेले नेपाल सरकारका विभिन्न निकायमा किसान लगायत उद्यमीहरुले समय सापेक्ष रुपमा दूधको खरिद तथा विक्रि मूल्य परिमार्जन गर्न अनुरोध गरेकाे थियो ।
नेपाल सरकार मन्त्रिपरिषदको निर्णय अनुसार कच्चा दूधको मूल्य प्रति लिटर ६ रुपैया ५२ पैसा वृद्धि गरि कच्चा दूधको न्युनतम् मूल्य ५६ रुपैयाँ ४ पैसा (४ प्रतिशत फ्याट, ८ प्रतिशत एसएनएफ) निर्धारण भएकाे थियाे । यसरी नीजि क्षेत्रले किसानबाट दूध खरिद गर्दा दुग्ध विकास संस्थानकाे भन्दा बढि नै रहेको र फाल्गुण १ गते देखि लागू हुने गरी किसानहरुबाट खरिद गरिने कच्चा दूधको न्यनतम् मूल्य सहकारी संस्थाहरु समेतको गरि ५३ रुपैया ४५ पैसाबाट (४ प्रतिशत फ्याट, ८ प्रतिशत एसएनएफ) वृद्धि गरि ६२ रुपैया चितवन जिल्लाको हकमा कायम गरिएको नेपाल डेरी एसाेसियसनका अध्यक्ष राधाकृष्ण सापकाेटाले जनाकारी दिए ।
हालै वृद्धि गरिएको दुधकाे मूल्य ६२ रुपैयामा समायोजन गरिने छ । त्यसैगरि दुरीको आधारमा अन्य क्षेत्र वा जिल्लाको मूल्य निर्धारण गरिने छ । ३ प्रतिशत फ्याट, ८ प्रतिशत एसएनएफ वृद्धि पश्चात उपभोक्ता विक्रि मुल्य ८६ रुपैया प्रति लिटर कायम गरिएको छ । याे खरिद तथा विक्रि मुल्य फाल्गुन १ गते देखि लागु गरिने भएकाे हाे ।
डेरी उद्योग संघ र नेपाल डेरी एशोसिएसनले विज्ञप्ती मार्फत भनेकाे छ ‘दुधकाे मूल्य वृद्धिबाट आम उपभोक्ता वर्गमा पर्न गएको असर प्रति क्षमा प्रकट गर्दछाैं । नेपालको दुग्ध उत्पादन, संकलन प्रशोधन व्यवसाय एक विशुद्ध व्यवसाय भएको र यसमा कुनै पनि प्रकारको विचौलिया नभएकोले हालको मूल्य वृद्धिको रकम ७० प्रतिशत भन्दा बढि किसानको हातमा पुग्ने प्रतिवद्धता समेत विज्ञप्तीमा गरिएकाे छ ।
नेपालमा दुग्ध क्षेत्रको अवस्था
हाल दुग्धजन्य क्षेत्रमा ५ लाख कृषक परिवार रोजगारीमा आवद्ध रहेका छन । ३० हजार भन्दा बढी मानिसले उद्योगस्तरमा प्रत्यक्ष रोजगारी पाएका छन् । यसैगरी वार्षिक २ अर्व भन्दा बढी राजश्व डेरी क्षेत्रले सरकारलाई बुझाउँदै आएकाे समेत पत्रकार सम्मेलनमा बताइएकाे छ ।
यसैगरी डेरी क्षेत्रकाे कारण दैनिक ६ करोड भन्दा बढी रकम शहरबाट गाउँ प्रवाह भैरहेको बताइएकाे छ। ३० अर्व भन्दा बढी लगानी दुग्धजन्य उद्योगस्तरमा भएको छ । दुग्ध क्षेत्रको जीडीपीमा ९ प्रतिशत योगदान रहेकाे छ भने दैनिक दुध उत्पादन ६२ लाख लिटर रहेकाे छ । यस मध्ये कृषक स्वयंले ५० प्रतिशत उपभाेग गर्ने छन भने औपचारिक क्षेत्रमा १७ प्रतिशत र अनौपचारिक क्षेत्रमा ३३ प्रतिशत उपभाेग हुने गरेकाे अध्यक्ष सापकाेटाले बताए ।
मकवानपुर । मकवानपुरको राक्सीराङ्ग र मनहरी गाउँपालिकाका अति विपन्न ६ सय १० परिवारलाई न्यानाे कपडा वितरण गरिएकाे छ । विकट क्षेत्रका चेपाङ वनकरिया तामाङ तथा दलित समुदायकाे परिवारलाई विहीबार नेपाली कांग्रेस बागमती प्रदेशले न्यानो कपडा वितरण गरेको हाे ।
कांग्रेस बागमती प्रदेशले राक्सीराङ गाउँपालिका वडा नम्बर १, ३ र ५ को टंगरंङ्ग, साझाबंगीम, निगुरेटार, चुरेडाँडा, ईन्द्रुङ, राम्चे, मैनटार डोटेलगायतका टोलका ३ सय चेपाङ तथा तामाङ घरपरिवारलाई न्यानो कपडा कम्वल वितरण गरेको हो ।त्यसैगरी मनहरी वडा नम्बर ४ नयाँवस्तीका बनकरिया, प्रजा, तामाङ, दलित समुदायका २ सय घरपरिवार र मनहरी ३ लामिटारका १ सय १० घरपरिवारलाई न्यानो कपडा कम्वल वितरण गरिएको हो ।
कांग्रेस बागमती प्रदेश सभापति एवं प्रदेश संसदीय दलका नेता ईन्द्रबहादुर बानियाँको प्रमुख आतिथ्यतामा भएको न्यानो कपडा वितरण कार्यक्रममा प्रतिनिधिसभा २ ख का प्रदेश सभापति रञ्जन कालाखेती, राक्सीराङ गाउँपालिका अध्यक्ष राजकुमार मल्ल, मनहरी गाउँपालिका सभापति प्रकाश बर्तौला, राक्सीराङ गाउँपालिका सभापति बीरेन्द्र जिम्बा, मनहरी ३ का वडा सभापति रमेश पुरी, मनहरी ४ का वडा सभापति आईतसिं तितुङलगायतले मन्तव्य व्यक्त गरेका थिए ।
कार्यक्रममा नेपाली कांग्रेस बागमती प्रदेश उपसभापतिद्वय मोहनबहादुर बस्नेत, चन्द्र महर्जन, महामन्त्री कन्चनचन्द्र वादे, सहमहामन्त्रीहरु ऋषिराम घिमिरे, हरिशरण श्रेष्ठ, जीवन डंगोल, सदस्यहरु देवकी गौतम, कल्पना खड्का, जानुकी लामा, समाजसेवी होमनाथ चौलागाई, राक्सीराङ गाउँपालिका उपाध्यक्ष निर्मला हिमडुङलगायत नेता कार्यकर्ताहरुको उपस्थिति रहेको थियो ।

मकवानपुर । युवा तथा खेलकुद मन्त्रालयले बागमती प्रदेश युवा परिषदका कार्यकारी उपाध्यक्ष हटाउन चलखेल सुरु गरेकाे छ । मन्त्रालयले कार्यकारी उपाध्यक्ष सन्तोष चौलागाईलाई माघ २५ गते स्पष्टीकरण सोधेपछि उनले आफूलाई हटाउने तयारी गरिएकाे प्रतिक्रिया दिएका हुन् ।
डोरमणि पौडेल नेतृत्वको सरकारले नियुक्ती गरेका उपाध्यक्ष चौलगाईलाई हटाउन राजेन्द्र पाण्डे नेतृत्वको सरकारका युवा तथा खेलकुद मन्त्री रत्न ढकालले मन्त्रालयका कर्मचारीलाई निर्देशन नै दिएको बुझिएको छ । लामो समयसम्म परिषद बैठकले कार्ययोजना नै स्वीकृत नगर्दा परिषदले सोचे अनरुप काम गर्न नसकेको चौलागाईले बताए । २०७८ असोज ६ गते परिषद बैठकबाट योजना स्विकृत भएपछि परिषदले त्यही स्वीकृत योजना कार्यान्वयन गरेको उपाध्यक्ष सन्तोष चौलागाईले बताए ।
मन्त्रालयले राजनीतिक पूर्वाग्रह नराखी कार्यक्रम प्रभावकारी बनाउन खोजे सहकार्यको लागि आफू तयार रहेको उनको भनाई छ । मन्त्रालय र मन्त्रीस्तरको सुझाव कार्यान्वयन गर्न कुनै समस्या छैन, तर राजनीतिक पूर्वाग्रह राखेर स्पष्टीकरण सोध्नु अन्याय भएको उनको तर्क छ । सामाजिक विकास मन्त्रीको अध्यक्षतामा बसेको परिषद बैठकको निर्णय कार्यान्वयन गरिएको हो । मन्त्रालयसंग समन्वय नभएको आरोप मिथ्या हो । मन्त्रालयले मागेको प्रगति विवरण समयमै बुझाईएको उनले बताए । अहिले युवा तथा खेलकुद मन्त्रालय मातहतमा रहेको प्रदेश युवा परिषदले मन्त्रालयसंग समन्वय गरिरहेको छ । परिषदले बनाएका भावी योजनाका सन्दर्भमा मन्त्रालयले सुझाब दिने हो भने पनि ती सुझाब समेट्न सकिने उनले बताए ।
मन्त्रालय योजना फेर्नु भन्दा कार्यकारी उपाध्यक्ष फेर्ने दाउमा अघि बढेको छ । चार वर्षे कार्यकालका लागि २०७८ असार १ गते नियुक्त गरिएको कार्यकारी उपाध्यक्ष हटाएर आफू अनुकुलको कार्यकारी उपाध्यक्ष नियुक्ती गर्ने योजनाका साथ मन्त्रालय र मन्त्री अघि बढेका छन् । युवा तथा खेलकुद मन्त्री रत्नप्रसाद ढकालले प्रदेश युवा परिषदलाई काम गर्ने वातावरण नदिएको उपाध्यक्ष चौलागाईले आरोप लगाए । एकातर्फ काम गर्ने वातावरण नदिने अर्कोतर्फ काम भएन भनेर मन्त्री नै राजनितीक प्रतिशोध साध्न उद्यत देखिएको उनले बताए ।
परिषदले कार्यक्रम स्विकृत गरेको २ महिना भित्रै प्रदेशको लोगो र स्लोगन सार्वजनिक गरेको छ । युवा परिषदको वेभ साइट निर्माण भएको छ । दुई महिनाभित्र परिषदबाट थुप्रै काम भएको उपाध्यक्ष चौलागाईको दावी छ । बागमती प्रदेश सरकारका आन्तरिक मामीला तथा कानून मन्त्री कृष्णप्रसाद शर्मा खनालले एक हप्ता भित्रै अघिल्लो सरकारले गरेका नियुक्ती खारेज गर्ने बताए ।
मकवानपुर । हेटाैंडा स्थित नवोदय शिशु सदन अङ्ग्रेजी माध्यमिक विद्यालयमा कफी हाउस कार्यक्रम सञ्चालन भएको छ । गत वर्षझैँ यस वर्ष पनि कफी हाउस कार्यक्रम सञ्चालन गरिएकाे हो । बुधबार कक्षा ७, ८ र ९ काे सेक्सन ‘ए’ समूहमा अध्ययनरत विद्यार्थीहरुले निर्माण गरेका पुस्तक कफी हाउस कार्यक्रममार्फत विमोचन गरी त्यस पुस्तकबाट एउटा सिर्जना आफ्नो अभिभावकमाझ प्रस्तुत गरेका थिए ।
विद्यालयले फरक–फरक समयमा कार्यक्रम आयोजना गरिएको छ । विद्यार्थीको सिर्जनशील क्षमता, तार्किक क्षमता, कल्पनाशक्ति, नेतृत्व विकास तथा व्यक्तित्व विकास पुर्याउने विश्वासका साथ विद्यालयले विगत ५ वर्षदेखि कफी हाउस कार्यक्रम गर्दै आइरहेको छ । कार्यक्रममा कक्षा ७ सेक्सन ए को कफी हाउस कार्यक्रममा प्रमुख अतिथि रहेका सर्जक सञ्जाल मकवानपुरका अध्यक्ष निमेष निखिलले साहित्य क्षेत्रमा कलम चलाएर दाम नकमाए पनि नाम भने पक्कै कमाइने बताएका छन् । ‘लेख्नु पनि वृद्धि विकासको पाटो हो ।’ उनले भने –‘लेखेर नै महाकवि लक्ष्मीप्रसाद देवकोटा, लेखनाथ पौडेलले साहित्य जगतमा आफ्नो प्रभुत्व जमाउन सफल हुनुभएको हो । लेख्ने बानीको जति विकास हुन्छ त्यति नै लेखाइमा निखारता आउने गर्दछ ।’

किताब पढ्दा धेरै कुरा सिक्ने भएकाले गर्दा विद्यार्थीलाई विद्यालयको कोर्षसँगै बाहिरी किताब किनिदिन उनले अभिभावकसँग आग्रह गरे । भाषा, साहित्यलाई अभिन्न पाटोको रुपमा अगाडि बढाइरहेको नवोदय विद्यालयले कफी हाउस कार्यक्रममार्फत विद्यार्थीहरुलाई आफ्नो पेरिफेरिमा रही रचना तयार पारी प्रस्तुत गर्ने अवसर प्रदान गरेकोमा उनले विद्यालयको प्रशंसा व्यक्त गरे ।
विद्यार्थीहरुको पठन संस्कृतिको विकास गर्ने तथा भाषिक सिपको विकास गराउने मूल उद्देश्यले कार्यक्रमको आयोजना गरिएको नवोदय शिशु सदन विद्यालयका नेपाली विषयका सुपरिवेक्षक सिएम रिमालले जानकारी दिए । यसैगरी, कक्षा ८ कको कफी हाउस कार्यक्रमका प्रमुख अतिथि हेटौंडा क्याम्पसका प्राध्यापक तथा साहित्यकार मनोज पोखरेलले कफी हाउस कार्यक्रममा विद्यार्थीले प्रस्तुत गरेको रचना तारिफयोग्य रहेको बताए । उनले विद्यार्थीले किताबी ज्ञानलाई मात्र नभई सिर्जनात्मक र व्यवहारिक शिक्षालाई पनि जोड दिनुपर्ने बताए ।
मकवानपुर । इमर्जिङ्ग नेपाल लिमिटेडको प्रारम्भिक सार्वजनिक निष्काशन (आईपीओ) माघ २६ गते बुधबारबाट निष्काशन तथा बिक्री खुलेकाे छ।
कम्पनीले ५ करोड ५५ लाख ६० हजार रूपैयाँ बराबरको ५ लाख ५५ हजार ६ सय कित्ता आईपीओ निष्काशन जारी गरेको हो। कुल ५ लाख ५५ हजार ६ सय कित्ता शेयरमध्ये २ प्रतिशत अर्थात ११ हजार ११२ कित्ता कर्मचारीलाई र ५ प्रतिशत अर्थात २७ हजार ७८० कित्ता सामूहिक लगानी कोषलाई सुरक्षित गरेको छ। सर्वसाधारणले बाँकी रहेको ५ लाख १६ हजार ७ सय ८ कित्ता शेयरका लागि आवेदन दिन सक्नेछन्।
सो आईपीओमा छिटोमा फागुन १ गते र ढिलोमा फागुन ११ गतेसम्म आवेदन दिन सकिनेछ। कम्पनीको आईपीओमा इच्छुक लगानीकर्ताले प्रतिकित्ता सय रूपैयाँका दरले न्यूनतम १० कित्ता तथा सोभन्दा बढीका लागि १० अंकले भाग जाने संख्यामा अधिकतम एक हजार कित्तासम्मका लागि आवेदन दिन सक्नेछन्।
आईपीओ निष्काशन तथा बिक्री प्रवन्धक एनआईसी एसिया क्यापिटल लिमिटेड रहेको छ। इच्छुक आवेदकले सि–आस्वा सदस्य बैंक तथा वित्तीय संस्था र मेरोशेयर वेबसाइट तथा एप मार्फत आवेदन दिन सक्नेछन्।
आईपीओ निष्काशनका लागि गराएको क्रेडिट रेटिङ्गमा इक्रा रेटिङ्ग नेपालले कम्पनीलाई इक्रा एनपी आईआर डबल बि प्लस रेटिङ्ग प्रदान गरेको छ। यसले समयमै वित्तीय दायित्व पुरा गर्न सक्ने सम्बन्धमा मध्यम जोखिम रहेको संकेत गर्दछ। हाल कम्पनीको चुक्ता पूँजी ५० करोड ४० हजार रुपैयाँ छ। आईपीओ बाँडफाँटपश्चात कम्पनीको चुक्ता पूँजी ५५ करोड ५६ लाख रुपैयाँ पुग्नेछ।