हेटाैंडामा ३ कविका २१ कविता
Tags: No Comments
मकवानपुर । हेटाैडामा ३ कविका २१ कविता सुनिएका छन् । साहित्य सङ्गम मकवानपुरकाे आयाेजनामा भएकाे कार्यक्रममा ३ कविले कविता वाचन गरेका हुन् ।
मकवानपुरे कवि जेनन नेपाल हाल अष्ट्रेलियाले प्रायाेजन गरेकाे कविता वाचन कार्यक्रम शनिबार हेटाैडाकाे माेटल एभाेकाडाेमा भएकाे हाे । मकवानपुरसहित माेरङ र बाग्लुङ जिल्लाका ३ जना समकक्षी कविले २१ कविता कार्यक्रममा वाचन गरेका थिए । मकवानपुरका कवि निमेष निखिल, माेरङका कवि ज्याेति जङ्गल र बाग्लुङका कवि भूपिन खड्काले आआफ्ना ७/७ कविता कार्यक्रममा वाचन गरेका हुन ।
कविता वाचन कार्यक्रमकाे पहिलाे चरणमा कवि भूपिनले चोरी एक तुलनात्मक अध्ययन, कुरुप कविता, चवालिस, तेइसौ सताब्दी शिर्षकका ४ वटा कविता वाचन गरेका थिए । कवि ज्योतिले बादशाहको चुम्बन, प्रेमी देश, आमाहरु, म कसैलाई सम्झिरहेको किन छु शिर्षकमा ४ वटा कविता सुनाएकी थिइन् । यस्तै कवि निमेषले ऐना अगाडी, शोक गीतको पोष्टमार्टम, समय र कवि, सम्बोधनमा मित्र राम विलास गरी ४ वटा कविता सुनाएका थिए ।
कार्यक्रमकाे दाेस्राे चरणमा कवि भूपिनले नोटको जिबनि, ढुङ्गा, बसुन्धरा शिर्षकका कवि ज्याेतिले लैजानु, काग अवतार, सिकाइ शिर्षकका र कवि निमेषले कविताका नाममा, क्रान्ति, स्वीकाराेक्ती शिर्षकका ३/३ कविता वाचन गरेका थिए ।
साहित्य संगम मकवानपुरका अध्यक्ष अनिता न्याैपानेकाे सभाध्यक्षतामा भएकाे कार्यक्रमा समाजिक विकास मन्त्रालय बागमती प्रदेशका मन्त्री कुमारी माेक्तानकाे प्रमुख आतिथ्यता संगम मकवानपुरका संस्थापक अध्यक्ष नवराज शर्मा विशिष्ट आतिथ्यता रहेकाे थियाे ।
मकवानपुरका कवित सुवास खनालले कार्यक्रममा सुनिएका कविताका कविहरुकाे बारेमा संक्षेपमा परिचय गराएका थिए । संगम उपाध्यक्ष सानु खनालले स्वागत मतव्य राखेर शुरु भएकाे कार्यक्रम संगमका सचिव डीवी बर्ताैलाले संचालन गरेका थिए ।
मकवानपुर । आज फागुन ७ गते ७२औं राष्ट्रिय प्रजातन्त्र दिवस विविध कार्यक्रम गरी मनाइँदैछ । १ सय ४ वर्षको जहाँनियाँ राणाशासन अन्त्य भई देशमा प्रजातन्त्र बहाली भएको दिन फागुन ७ को स्मरणमा शनिबार ७२औँ राष्ट्रिय प्रजातन्त्र दिवस देशभर सरकारी निकाय र विभिन्न संघसंगठनले फरक–फरक कार्यक्रम गरी यो दिवस मनाउँदै छन् ।
प्रजातन्त्रकै जगमा लोकतन्त्र हुँदै मुलुकमा अहिले सङ्घीय लोकतान्त्रिक गणतन्त्रात्मक शासन व्यवस्था छ । वि.सं. १९०३ मा सुरु भएकाे राणाशासन जनक्रान्तिका २००७ साल फागुन ७ गते अन्त्य भई प्रजातन्त्र स्थापना भएकाे थियाे । प्रजातन्त्र घोषणा भएको गौरवकाे सम्मान गर्दै सरकारले फागुन ७ गते औपचारिक समारोहका साथ दिवस मनाउँदै आएको छ ।
फागुन ७ मा प्रजातन्त्र स्थापना भएको सम्झनामा सरकारले केन्द्रमा प्रत्येक वर्ष राजधानीको टुँडिखेलमा औपचारिक कार्यक्रमको आयोजना गरी विशेषरूपमा यो दिवस मनाउँदै आएको छ । यसका साथै प्रदेश सरकारले समेत याे दिवसलाई औपचारिक रुपमा ३ दिन मनाउँदै आएकाे छ । देशका सबै जिल्लामा पनि प्रजातन्त दिवस मनाइँदै आएको छ ।
प्रजातन्त्र स्थापनाका लागि भएको सङ्घर्षमा शुक्रराज शास्त्री, दशरथ चन्द, धर्मभक्त माथेमा र गङ्गालाल श्रेष्ठले विक्रम संवत १९९७ माघमा बलिदानी दिए । प्रजापरिषद् नामक राजनीतिक दल भूमिगत रूपमा स्थापना गरी प्रजातन्त्र स्थापनाका लागि जनतामा जागरण ल्याएको अभियोगमा उनीहरूलाई तत्कालीन राणा शासकले मृत्युदण्ड दिए । राज्य शक्तिको स्रोत जनता मात्र हुन् र मुलुकको सार्वभौमसत्ता जनतामा निहित हुनुपर्छ भन्ने मान्यतालाई जनताको सङ्घर्ष तथा वीरवीरांगना शहीदको बलिदानबाट स्थापित गरेको हुनाले आजको दिन नेपालको इतिहासमा गौरवपूर्ण र अविस्मरणीय मानिन्छ ।
नेपाली राष्ट्रिय कांग्रेस र नेपाल प्रजातन्त्र कांग्रेसको २००६ सालमा एकीकरणपछि बनेको नेपाली कांग्रेसका संस्थापक नेता बिपी कोइरालाको नेतृत्वमा भएको सशस्त्र र निर्णायक आन्दोलनले नेपालमा २००७ साल फागुन ७ गते प्रजातन्त्र स्थापना गरेको थियो । तत्कालीन राजा त्रिभुवनको घोषणापछि राणा र कांग्रेस सम्मिलित सरकार गठन भई नेपालमा प्रजातान्त्रिक शासनकालको सुरुवात भएकाे थियाे ।
राष्ट्रपति विद्यादेवी भण्डारीद्वारा प्रजातन्त्र दिवसकाे शुभकामना
राष्ट्रिय प्रजातन्त्र दिवसका अवसरमा राष्ट्रपति विद्यादेवी भण्डारीले स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरूमा हार्दिक शुभकामना दिएकी छिन् । शुभकामना दिदै राष्ट्रपति भण्डारीले लोकतान्त्रिक प्रणालीले मात्र नागरिकलाई एकताको मालामा गाँसेर बलियो राष्ट्र निर्माण गर्ने बताइन् । शुभकामना सँगै प्रजातन्त्र स्थापनाका लागि भएका अनेकौं सङ्घर्षमा आफ्नो अमूल्य जीवन उत्सर्ग गर्ने सहिदहरूप्रति भावपूर्ण श्रद्धाञ्जली अर्पण गरेकी छन् ।
राष्ट्रिय प्रजातन्त्र दिवसका अवसरमा आज दिएको शुभकामना सन्देशमा राष्ट्रपतिले जहानियाँ निरङ्कुश शासनविरुद्ध बलिदानीपूर्ण सङ्घर्षको परिणामस्वरूप २००७ सालको आन्दोलन सफल भएर आधारभूत मानवअधिकारको बहाली गराई नेपाली जनताले राजनीतिक स्वतन्त्रता हासिल गरेको ऐतिहासिक उपलब्धिको सम्झना र सम्मानस्वरूप प्रत्येक वर्ष फागुन ७ गते हामी प्रजातन्त्र दिवस मनाउँछौँ भन्दै त्यसपछिको सात दशकभन्दा लामो उतारचढावपूर्ण यात्रामा नेपाली जनताको निरन्तर सङ्घर्षकै प्रतिफलस्वरूप आज हामी लोकतान्त्रिक गणतन्त्र स्थापना गर्न सफल भएको उल्लेख गरेकी छन् ।
‘लोकतन्त्रलाई सार्थक बनाउन तदनुकूलको राजनीतिक व्यवस्था केवल साधन मात्र हो, साध्य होइन । राजनीतिक प्रणालीले तयार गरेको जगमा उभिएर राष्ट्रिय जीवनका हरेक पक्षले उच्च लोकतान्त्रिक आचरण, पारस्परिक विश्वास र सहयोगी भावना अभिवृद्धि गर्नु अत्यन्त आवश्यक छ । जनताको जागरुकताले मात्र लोकतन्त्र निरन्तर विकसित हुँदै जान्छ । र, अन्ततोगत्वा लोकतन्त्र हाम्रो जीवन पद्धति बन्न सक्दछ’, सन्देशमा भनिएको छ ।
प्रजातन्त्र दिवसको यस अवसरले ‘समृद्ध नेपाल, सुखी नेपाली’ को साझा राष्ट्रिय आकाङ्क्षा पूरा गर्न सबै जनप्रतिनिधिमूलक संस्था, राजनीतिक दल तथा राज्यका सबै अङ्गलाई संवैधानिक मूल्य एवं मान्यताहरू कार्यान्वयन गर्न अभिप्रेरित गर्ने अपेक्षा राष्ट्रपतिले गरेकी छन् । नेपालको सार्वभौमसत्ता, भौगोलिक अखण्डता, राष्ट्रिय हित, स्वाभिमान र लोकतन्त्रको रक्षार्थ भएका विभिन्न आन्दोलनहरूमा योगदान गर्नुहुने सबैप्रति सम्मान प्रकट गर्दै प्रजातन्त्र दिवसले दिगो शान्ति, सुशासन, विकास र समृद्धि हासिल गर्न सबैमा नयाँ उत्साह प्रदान गर्न सकोस् भन्ने कामना पनि राष्ट्रपतिले सन्देशमा गरेकी छन् ।
मकवानपुर । बागमती प्रदेशमा हेटौंडाबाट बालबालिकाहरुलाई कोरोना विरुद्धको खोप अभियानको सुरु भएपछि पहिलो मात्राको खोप ४८ प्रतिशतले लगाइएकाे छ । कोरोना रोकथाममा स्वास्थ्यकर्मी तथा सरोकारवालाहरुको भूमिका विषयक अन्तरक्रियामा १२ वर्ष देखी १७ वर्षका बालबालिकाहरुलाई कोरोना विरुद्धको खोप ४८ प्रतिशतलाई लगाइएको प्रदेश स्वास्थ्य मन्त्री निमा लामाले बताए ।
हेटौंडामा रेडियो थाहा सञ्चारको १४ औं वार्षिकोत्सवको छैटाै दिन आयोजित अन्तरक्रियामा बोल्दै मन्त्री लामाले प्रदेशभरमा ९६ प्रतिशतले पहिलो मात्राको खोप र ९५ प्रतिशतले दोस्रो मात्राको खोप लगाइसकेको बताए । खोप अभियान तीव्ररुपमा सञ्चालन गरिएको, समूदायमा नै पुगी अभियान सञ्चालन गरिएकाले पनि खोप लगाउनेको संख्या वृद्धि भइरहेको उनले बताए ।
प्रमुख जिल्ला अधिकारी भरतमणी पाण्डेले कोरोना कहरका बीच हामीले खोप अभियान, राहत वितरण, खाद्यान्न वितरण, व्यवस्थापन तर्फ ध्यान, लकडाउन, अक्सिजन व्यवस्थापन, सुरक्षा निकाय परिचालन, माक्स अभियान जस्ता विभिन्न कार्यक्रमहरु गरि कोरोना नियन्त्रणमा प्रभावकारी भूमिका खेलेकाे बताए ।
विन्दवासिनी मिडिया प्रा।लिका अध्यक्ष अस्मिता सुमार्गीको अध्यक्षतामा भएको कार्यक्रममा रेडियोका संरक्षक अजयराज सुमार्गी, स्वास्थ्य कार्यालय मकवानपुरका निमित्त प्रमुख भीमसागर गुरागाई, हेटौंडा अस्पतालका मेसु डा. रामचन्द्र सापकोटा, नारायणी संघका प्रवन्धक सरोज खनाल, उद्योग संघ मकवानपुरका अध्यक्ष स्वागतराज प्याकुरेल, राष्ट्रिय बाल संरक्षण संजालका केन्द्रीय अध्यक्ष प्रकाश खतिवडा, गैसस महासंघ मकवानपुरका उपाध्यक्ष रमिला सापकोटा लगायतले कोरोना रोकथामका विषयमा आफ्ना विचार राखेका थिए ।
कार्यक्रममा प्रहरी उपरिक्षक सुरेन्द्र बहादुर गुरुङ, रेडियोका प्रवन्धक अरुणराज सुमार्गी, सहकारी अस्पतालका अध्यक्ष बिष्णुगोपाल महर्जन, उप अनुसन्धान निर्देशक पप्पु शर्मा, सशस्त्र प्रहरी नायव उपरिक्षक अमर खत्री, पुरानो गोरख गणका सेनानी दिपेन्द्र प्रसाद सिंह, सार्वजानिक मकवानपुर यातायात प्रालिका अध्यक्ष ज्ञानेन्द्र बहादुर कार्की, होटल एशोसिएसन अफ मकवानपुरका अध्यक्ष शंकरलाल श्रेष्ठ, नेपाल पत्रकार महासंघ बागमती प्रदेशका उपाध्यक्ष रुपेश दुलाल लगायतको आतिथ्यता रहेको थियो ।
रेडियाेकाे बार्षिकोत्सव सप्ताहव्यापी कार्यक्रमको साताैं दिन फागुन ७ गते थाहा सम्मान तथा १४ औ वार्षिकोत्सव समापन समारोह र साहित्य सम्मेलन हुने रेडियोका स्टेसन म्यानेजर मणीराज गौतमले जानकारी दिए । सप्ताहव्यापी कार्यक्रमको पहिलो दिन फागुन १ गते आईतबार पर्यावरण प्रवर्द्धनकाे लागि रेडियोले साइकल र्याली गरेको थियो । दोस्रो दिन फागुन २ गते सोमबार रेडियोले बृहत रक्तदान कार्यक्रम आयाेजना गरिएकाे थियाे ।
यस्तै तेस्रो दिन फागुन ३ गते मंगलबार रुपचन्द्र विष्ट र अहिलेको राजनीतिक परिवेश विषयक अन्तरक्रिया कार्यक्रम र चौथो दिन ४ गते बुधबार दुग्ध उत्पादन क्षेत्रको अवसर र चुनौती विषयक सरोकारवाला बिचमा अन्तरक्रिया कार्यक्रम गरिएको थियो । पाचाैं दिन ५ गते विहीबार सडक दुर्घटना न्युनिकरण नहुनुमा जिम्मेवारी कसको ? विषयक माविस्तरीय वक्तृत्वकला गरिएकाे गाैतमले बताए ।
मकवानपुर । सडक दुर्घटना न्युनिकरण नहुनुमा जिम्मेवारी कसको ? भन्ने विषयकाे वक्तृत्वकलामा कुसुम खड्का प्रथम भएकी छिन् । मकवानपुर बाल विद्यासदनकी खड्का रेडियो थाहासञ्चार ९९.६ मेघाहर्ज हेटौंडाको वार्षिकोत्सवको अवसरमा आयोजित माध्यामिक विद्यालयस्तरीय वक्तृत्वकला प्रतियोगितामा प्रथम भएकी हुन् ।
बिन्दाबासिनी मिडिया प्रालिद्वारा सञ्चालित रेडियो थाहासञ्चार सप्ताहव्यापी कार्यक्रमको पाचौं दिन विहीबार माविस्तरीय वक्तृत्वकला प्रतियोगिता भएको हाे । प्रतियोगितामा बालजागृति इंङ्गगलिस स्कुलकी ऋषिका श्रेष्ठ द्वितीय र आधुनिक राष्ट्रिय माविका कर्ण यादव तृतीय भएका छन । निबन्ध प्रतियाेगितामा प्रथम, द्वितीय र तृतीय हुनेलाई क्रमश ५ हजार , ३ हजार र २ हजार नगद पुरस्कार र प्रमाण पत्र प्रदान गरिएको छ ।
प्रतियाेगिताकाे निर्णायक प्राध्यापक ह्याग्रिव आचार्य, प्रहरी सहायक निरीक्षक श्री प्रसाद थापा, नाराणी संघ हेटौंडाका कार्यालय प्रमुख समुन्द्रराज खड्का रहेका थिए । कार्यक्रममा मकवानपुर प्रहरी प्रमुख सुरेन्द्र ब. गुरुङको प्रमुख आतिथ्यता रहेको थियो भने नारायणी संघका प्रवन्धक सरोज खनाल ,गैरसरकारी संस्था महासंघ मकवानपुरका उपाध्यक्ष रमिला सापकोटा ,जिल्ला अविभावक संघ मकवानपुरका अध्यक्ष ध्रुव चौलागाई लगायतको आतिथ्यता रहेको थियो ।

रेडियोले हरेक वर्ष आफ्नो बार्षिकोत्सबमा वक्तृत्वकला प्रतियोगिता आयोजना गर्दै आएको छ । रेडियाेकाे बार्षिकोत्सव सप्ताहव्यापी कार्यक्रमको छैटौं दिन फागुन ६ गते कोरोना रोकथाम तथा नियन्त्रणमा सरोकारवालाहरुको भूमिका विषयक अन्तरक्रिया हुनेछ । अन्तिम दिन ७ गते थाहा सम्मान तथा १४ औ वार्षिकोत्सव समापन समारोह र साहित्य सम्मेलन हुने रेडियोका स्टेसन म्यानेजर मणीराज गौतमले जानकारी दिए ।
बार्षिकोत्सव सप्ताहव्यापी कार्यक्रमको पहिलो दिन फागुन १ गते आईतबार पर्यावरण प्रवर्द्धनकाे लागि रेडियोले साइकल र्याली गरेको थियो । दोस्रो दिन फागुन २ गते सोमबार रेडियोले बृहत रक्तदान कार्यक्रम आयाेजना गरेकाे छ । यस्तै तेस्रो दिन मंगलबार रुपचन्द्र विष्ट र अहिलेको राजनीतिक परिवेश विषयक अन्तरक्रिया कार्यक्रम र चौथो दिन हिजो बुधबार दुग्ध उत्पादन क्षेत्रको अवसर र चुनौती विषयक सरोकारवाला बिचमा अन्तरक्रिया कार्यक्रम गरिएको थियो ।
मकवानपुर । अनलाइनमा यौनशोषण बालअधिकार, साईबर अपराध लगायत बालसंरक्षणका विषयमा प्रहरीसँग अन्तरक्रिया गरिएकाे छ । सिविन नेपालको आयोजना तथा जिल्ला प्रहरी कार्यालय मकवानपुरको समन्वयमा मकवानपुर जिल्लाका अधिकृत स्तरका प्रहरीहरुसँग छलफल कार्यक्रम भएको हाे ।
बालबालिकाहरुलाई डर देखाउने र धम्क्याउन, यौन आशयका सन्देश पठाउने , बाल अश्लिनता, छलकपट, अनलाइन खेल तथा सञ्जालको लत, हाल घटिरहेको घटनाहरुको प्रकारहरु, बालसंरक्षण, विद्युदिय कारोवार ऐन २०६३, बालमैत्री सेवा प्रवाहमा नेपाल प्रहरी एवं बालहेल्पलाइन १०९८ को भूमिका विषयमा १ दिने अभिमुखिकरण कार्यक्रम गरिएकाे सिविन बालहेल्पलाइन मकवानपुरका मेनेजर झबिन्द्र ज्ञवालीले जानकारी दिए ।
कार्यक्रममा साईबर अपराध ब्यरो काठमाण्डौका डीएसपी दिपेश जोशीले सहजीकरण गरेका थिए । प्रमुख अतिथि जिल्ला प्रहरी कार्यालय मकवानपुर प्रमुख एसपी सुरेन्द्र बहादुर गुरुङले साईबर अपराध र बालबालिका सम्बन्धी विषयमा प्रहरीहरुको लागि प्रशिक्षण हुनु राम्राे भएकाे बताए । मकवानपुर प्रहरी प्रवक्ता डीएसपी जयश्वर रिमालले कार्यक्रमबाट सिकेका विषयहरुलाई बालबालिकासम्म पुर्याउने पर्ने विषय भएकाे बताए ।
कार्यक्रममा सिविन बालहेल्पलाइन मकवानपुरका मेनेजर ज्ञवालीले कार्यक्रममा बालबालिकाहरुलाई बालअधिकार, बाल संरक्षण, बालबालिकाहरुको उद्धार, परामर्श, बालबालिकाहरुको सन्र्दभमा कसरी बालहेल्पलाइन १०९८ र नेपाल प्रहरीसँग समन्वय गरि कार्य गर्दा प्रभावकारी हुन्छ भन्ने सन्दर्भमा सहजीकरण गरेका थिए ।
सिविन नेपालका अध्यक्ष माधव प्रधानको अध्यक्षता, जिल्ला प्रहरी कार्यालयका एसपी सुरेन्द्र बहादुर गुरुङको प्रमुख आतिथ्यतामा कार्यक्रम भएको हो । कार्यक्रममा डीएसपी जयश्वर रिमाल, जिल्ला प्रहरी कार्यालय मकवानपुर, जिल्लाका सबै इलाका प्रहरी कार्यालयका, वडा प्रहरी कार्यालयका, प्रहरी चौकीका इन्चार्ज लगायतकाे सहभागीता रहेको थियाे ।
