मकवानपुर/ आसन्न स्थानीय तहको निर्वाचनका लागि मनोनयन दर्ता गराउने दिन अब २ दिन मात्रै बाँकी छ । ११ र १२ वैशाखमा दलहरुले आफ्नो उम्मेदवारहरुको मनोनयन दर्ता गराउनै पर्दछ ।
तर, मकवानपुरमा सत्ताधारी ५ दलीय गठबन्धनभित्र भएको सहमतिले पार्टीभित्र विवाद जन्माएको छ। गठबन्धनमा भएको सहमतिका कारण पार्टीभित्रको अन्तरद्वन्द्व यतिबेला छरपष्ट भएको छ । सत्तासाझेदार दलहरूलाई स्थानीय तहको निर्वाचनमा भागबण्डा मिलाउन निकै सकस खेप्नु परेको छ भने गठबन्धनमा सहभागी दलहरुले नै एकापसमा पार्टीको सांगठनिक अवस्थालाई कमजोर आँक्न थालेका छन् । यसले गर्दा फरक पार्टीबीचमासमेत दुस्मनी सुरु भएको छ।
उम्मेदवारी दर्ता गर्ने दिन नजिकिएपनि दलहरुका बीचमा कुरा मिल्न सकेको छैन । केन्द्रमा सत्ता गठबन्धन दलहरुका बीचमा हेटौंडा उपमहानगरपालिकाको मेयर एकिकृत समाजवादीले प्राप्त गर्ने निर्णय भए पनि जिल्लामा उक्त निर्णय नमान्ने भन्दै गठबन्धनको सबैभन्दा ठूलो पार्टी काँग्रेसले दिनमै २÷३ वटा पत्रकार सम्मेलन गर्दै आएको छ ।
निर्णय सच्याउन माग गर्दै नेपाली काँग्रेस मकवानपुर जिल्ला उपसभापति आनन्द कठायतसहित बहुमत पदाधिकारीले माग गरेका छन् । पार्टीको सांगठनिक हैसियतलाई भुल्दै सानो दलसँग झुकेर हेटौंडाको मेयर पद छोडेको कार्यकर्ताको आरोप छ ।
यता नेकपा एकीकृत समाजवादीले पनि आफ्नो हैसियत अनुसारको सम्मानजनक भाग नआएको भन्दै गाउँपालिकाहरुमा एकल चुनाव लड्ने तयारी गरेको छ। नेकपा माओवादी र एकिकृत समाजवादीले पनि कांग्रेसले मकवानपुर जिल्लाका अरु स्थानीय तहमा प्राप्त गर्ने भनिएको अध्यक्ष पद नदिने र आफै चुनाव लड्ने चेतावनी दिएका छन् । मकवानपुरको पश्चिमी क्षेत्र मनहरी, राक्सिराङ, कैलासलगायतका क्षेत्रमा पनि माओवादी र समाजवादीले आफ्ना उमेदवार उठाउने र काँग्रेससँग प्रतिस्पर्धा गर्ने एकिकृत समाजवादीले तयारी गरेको छ ।
समाजवादीले जिल्लाको २ वटा पालिकामा आफ्नो एकल उम्मेदवारी सिफारिस समेत गरिसकेको छ ।
यसअघि दिनहुँ बैठक बसिरहेको भएपनि २ दिन यता गठबन्धन दलहरुका बीचमा औपचारिक बैठक समेत बस्न सकेको छैन । कांग्रेस मकवानपुरका नेताहरु केन्द्रमा गएर हेटौंडाको मेयर कुनैपनि हालतमा कांग्रेसले पाउनुपर्ने भन्दै दबाब दिईरहेका छन् ।
गठबन्धन दलहरुका बीचमा पटक–पटक सहमतिका लागि बैठक बसेपनि कुनै प्रगति नभएका कारण कांग्रेसको आवश्यकतामा बैठक नबस्ने र सत्तासाझेदार अन्य दलको समन्वयमा भने बैठक बस्ने बताइरहेको छ । भागबण्डा मिलाउन यसअघि बसेको गठबन्धनको बैठकमा माओवादी केन्द्रले वडा तहमै करिब ५० प्रतिशत भाग माग्दा सहमति जुट्न नसकेको हो।
यता एकिकृत समाजवादीले पनि आफ्ना मागहरुमा अडिग रहेको छ । जिल्लामा ठूलो दलको हैसियतले गठबन्धनको नेतृत्व गरिरहेको काँग्रेस र एकीकृत समाजवादीले लचकता अपनाएर बैठकमा आ–आफ्नो दाबी प्रस्तुत गर्दासमेत माओवादी केन्द्रले वडा तहमा एक्लै करिब ५० प्रतिशत पाउनुपर्ने माग गरेको एकीकृत समाजवादी प्रचार विभागका एक नेताले भने ।
माओवादी केन्द्रले गठबन्धनको केन्द्रीय स्तरबाट बनाइएको मापदण्ड अनुसार आफूले पाउने पालिकाबाहेक मकवानपुरमा थप ३ वटा पालिका दाबी गरेको उनले बताए । केन्द्रीय तहले निर्धारण गरेको आधार र मापदण्ड अनुसार मकवानपुरको २ वटा पालिकामा माओवादी केन्द्रले स्वतः नेतृत्व पाउनुपर्ने र अघिल्लो निर्वाचनमा नेकपा एमालेले जितेको पालिकामा पनि आफूले नै नेतृत्व पाउनुपर्ने माओवादीको दावी छ ।
पार्टीभित्र कार्यकर्ताको असन्तुष्टिलाई सम्बोधन गर्दा गठबन्धनमा सहमति नहुने र गठबन्धनको सहमतिले कार्यकर्ता रुष्ट हुने क्रम बढेपछि मकवानपुरमा गठबन्धनको प्रभावकारिता खासै नदेखिने भएको छ । “जबरजस्त लादिएको निर्णयले निर्वाचन नतिजामा अपेक्षित सफलता हात लाग्दैन” नेकपा मओवादीका एक नेताले भने “आज पार्टीको निर्णय चित्त नबुझेकाहरुबाटै भोलि गठबन्धनलाई घात नहोला भन्न सकिन्न ।”
मकवानपुर । पशु पन्छि तथा मत्य विकास निर्देशनालयका निर्देशक डाक्टर मोगल प्रसाद शाहले स्थानीय तहमा कार्ययोजना बनाउंदा लक्ष्यित बर्गको आवश्यकता हेरेर योजना बनाउन आग्रह गरेका छन् ।
स्थानीय तहसंगको सहकार्यमा गरिने कार्यक्रमहरूबाट स्थानीयवासीले बढि लाभ लिन सक्ने भएकोले शाहले भेटेरेनरी अस्पताल तथा पशु बिज्ञ केन्द्रलाई यस्तो आग्रह गरेका हुन् ।
भेटेरेनरी अस्पताल तथा पशु बिज्ञ केन्द्र हेटौंडाले आगामी आर्थिक वर्षको बार्षिक योजना तर्जुमाको लागि स्थानीय तह तथा जिल्ला स्थित संचालित आयोजना परियोजनाहरूसंग एक दिने कार्यशाला गोष्ठी तथा छलफल कार्यक्रम उनले यस्तो बताएका हुन् ।
मकवानपुर जिल्लाको सबै स्थानीय तहको पशु शाखाका प्रमुखहरूसंग आयोजना गरिएको कार्यक्रममा सहभागीहरूलाई केन्द्र आगामी आ.व.मा आयोजना हुने कार्यक्रम बारे जानकारी गराईएको थियो ।
आगामे आ.व.मा केन्द्रले कृषि मिटरमा अनुदान, कृषि कर्जाको ब्याजमा अनुदान, बिमा सम्बन्धि घुम्ती शिविर, प्राकृतिक जलाशयमा माछाको भुरा छोड्ने, कुखुराको दानाको चेकजाँच घुम्ती शिविर, गुणस्तरीयताको आधारमा मासु पसलमा स्टिकर राख्ने कार्यक्रम जस्ता कार्यक्रमको योजना ल्याईएको केन्द्रका प्रमुख डाक्टर ब्रजकिशोर ठाकुरले बताए ।
यस्ता कार्यक्रममा किसानलाई पेशा प्रति लगाब बढाउनका साथै किसानलाई हुनसक्ने नोक्सानी कम गर्न सकिने ठाकुरले बताए । यि कार्यक्रम गर्दा अनिवार्य रूपमा स्थानीय तहसंग सहकार्य गरिने ठाकुरले बताए ।
किसानले गरेको उत्पादन खतप सुनिश्चित हुंदा व्यावसायिकता बढ्ने भएकोले त्यसतर्फ लक्ष्यित कार्यक्रम ल्याईएको ठाकुरले बताए ।
कार्यक्रममा सहभागी हेटौंडा उपमहानगरपालिकाका पशुसेवा शाखाका भिमसेन खड्का केन्द्रले समयमा आवश्यक सामग्री उपलब्ध नगराउदा समस्या भएको बताए । यसैगरी मकवानपुरगढी गाउँपालिकाका पशुशाखा प्रमुख सत्यनारायण शाखाले रोग पहिचान बारे पनि स्थानीय तहका प्राबिधिकलाई जानकारी/ तालिम आवश्यक भएको बताए । प्राविधिक ज्ञान भएका व्यक्ति हुंदा मात्रै स्थानीय कृषकलाई राहत दिन सकिने उनले बताए ।
यसैगरी बागमती गाउँपालिका पशु शाखाका राजेन्द्र गोले गोठ सुधार बारेको कार्यक्रम पनि आवश्यक रहेको बताए । किसानहरूको जीवनस्तर उकास्न निर्वाहमुखी योजनाहरू पनि आवश्यक भएकोले बकैया गाउँपालिकाले एक घर एक बाख्रा कार्यक्रम ल्याएकोले केन्द्रले यस्तो कार्यक्रममा पनि सहयोग गर्न गाउँपालिका पशुशाखा प्रमुख अशोक कुमार सिहले बताए ।
कार्यक्रममा सहभागीहरूले अनुदानमा आधारित कार्यक्रममा लक्ष्यित समूह चाहि लाभग्राही हुन नसकेको, स्थानीय स्तरमा नै दाना बनाउने मिसिन, च्यापकटर उपलब्ध हुनुपर्ने, बंगुर र बाख्रामा पनि बीमाको कार्यक्रम लागु हुनुपर्ने, साना किसानलाई प्रोत्साहन हुने कार्यक्रम ल्याइनु पर्ने प्रतिक्रिया दिएको केन्द्रका सहायत स्तर पाँचौ प्रदीप सापकोटालगायत बताए ।
कृषि तथा पशुपन्छी मन्त्रालयको पशु विकास मन्त्रालयको पशु विकास अधिकृत डाक्टर सबिना मिश्रले किसानको समस्या बारे मन्त्रालयमा जानकारी गराउने बताइन् । कार्यक्रममा राक्सिराङ शुभेच्छा ढकाल,केन्द्रको पशु विकास अधिकृत डाक्टर आभाष कोइरालालगायतको उपस्थिति रहेको थियो ।
मकवानपुर । मकवानपुरकाे हेटौंडा उपमहानगरपालिका-९ मा निर्माण हुँदै गरेको दिब्य बाल उद्यानमा तोडफोड भएको छ ।
गए राती अज्ञात ब्यक्तिहरुले पार्कमा रहेको मदन भण्डारी र जीवराज आश्रितको प्रतिमा तोडफोड गरेका हुन् ।
आज बिहान पार्कमा मर्निङ वाल्क गर्न आएका स्थानीयले शालिक तोडिएको देखेपछी पार्क ब्यवस्थापन समितिलाई जानकारी गराएका थिए । समितिले प्रहरीलाई जानकारी गराउँदै अहिले ईलाका प्रहरी कार्यालय पशुपतिनगरका प्रमुख प्रहरी निरीक्षक अबिनाश अधिकारीसहितको टोलीको घटनाको अनुगमन सुरु गरिसकेको छ ।
आसन्न स्थानिय निर्वाचन नजिकिँदै गर्दा यस किसिमको घटनाले नियोजित रुपमा राजनीतिक पुर्वाग्रह राखेर नै तोडफोड गरिएको हेटौंडा-९ का वडा अध्यक्ष लक्ष्मण प्रसाद भण्डारीले आरोप लगाए । पार्कमा अन्य कुनै संरचनालाई क्षती नगरी मदन-आश्रित को मात्र प्रतिम तोडिनुले वडाको गौरवको योजनाको रुपमा रहेको पार्क निर्माणको लक्ष्यमा ठेस पुगेको उनको भनाई छ ।

जीवराज आश्रितको प्रतिमा पुरै उखेलेर फालिएको छ भने मदन भण्डारीको शिर भाचेर लगभग ५० मिटरको दुरीमा लगेर फालिएको अवस्थामा भेटिएको छ । गत असार १४ गते बागमती प्रदेशका मुख्यमन्त्री डोरमणी पौडेलबाट मदन-आश्रितको अर्धकदको प्रतिमा अनावरण गरिएको थियो । दीव्य बाल उद्यानमा बागमती प्रदेश सरकार, तथा स्थानीय सरकारको लगानीमा पर्यटनकीय गन्तव्यको रूपमा विकास गरिदै छ । यहाँ मदन-आश्रीत, गौतम बुद्धलगायतको प्रतिमा स्थापन गरिसकिएको छ भने विभिन्न आकर्षक संरचनाहरू निर्माणकार्य जारी रहेकाेछ ।
लागूऔषध कारोबारीको अखडाको रुपमा रहेको झाडीलाई पर्यटकीय गन्तव्य बनाउन विगत २१ महिनामा ज्ञ कराेड ५५ लाख खर्चेर विभिन्न संरचना निर्माण गरिएकाे थियाे । १८ बिगाह क्षेत्रमा फैलिएको निर्माणधिन पार्कमा बागमती प्रदेश सरकार,हेटौंडा उपमहानगरपालिका र वडा कार्यलयले लगानी गरिरहेकाे वडा अध्यक्ष भण्डारीले बताए ।
मकवानपुर । देशै भर माध्यमिक शिक्षा परीक्षा (एसईई) आज बाट सुरु हुदैछ । मकवानपुरमा एसईई परीक्षा सबै पूरा भएको छ ।
परीक्षालाई सभ्य र सहज वातावरणमा सम्पन्न गराउन सम्पूर्ण तयारी पूरा भइसकेको शिक्षा विकास तथा समन्वय इकाई मकवानपुरका सूचना अधिकारी कृष्णप्रसाद पौडेलले जानकारी दिए। मकवानपुर जिल्लाबाट यस वर्ष १ सय ३६ विद्यालयका ७ हजार १ सय ३८ जना परीक्षार्थी एसईई परीक्षामा सहभागी हुने सूचना अधिकारी पौडेलले बताए ।
जिल्लाका विभिन्न पालिकाका विद्यालयमा अध्यनरत विद्यार्थीलाई सकेसम्म पायक पर्ने गरी परीक्षा केन्द्र तोकिएको उनले जानकारी दिए । मकवानपुरका १० वटा पालिकामध्ये ८ वटा पालिकामा परीक्षा केन्द्र तोकिएको छ । थाहा नगरपालिकाका विद्यार्थीले थाहानगरमै तोकिएको ३ वटा परीक्षा केन्द्रबाट परीक्षा दिनेछन् । यसैगरी बागमती गाउँपालिकाका विद्यार्थीले बागमतीमै तोकिएको परीक्षा केन्द्रबाट परीक्षा दिनेछन् भने बकैया गाउँपालिकाका विद्यार्थीले बकैयामै रहेको परीक्षा केन्द्रबाट परीक्षा दिनेछन् । राक्सिराङ र मनहरी गाउँपालिका विद्यार्थीले मनहरीको परीक्षा केन्द्रबाट परीक्षा दिने भएका छन ।
हेटौंडा उपमहानगरभित्रका विद्यालयमा अध्ययनरत विद्यार्थीले हेटौंडा उपमहानगरमा तोकिएका परीक्षा केन्द्रबाट परीक्षा दिनेछन् । मकवानपुरगढी, भीमफेदी तथा ईन्द्रसरोबर गाउँपालिकाका विद्यार्थीले पनि सम्बन्धित पालिकामै तोकिएको परीक्षा केन्द्रबाट परीक्षा दिनेछन् ।
बागमती गाउँपालिकामा तोकिएको परीक्षा केन्द्र जनता माविमा १ सय ८८ जना परीक्षार्थी परीक्षामा सामेल हुनेछन् । बकैयाको बुद्ध माविमा ३ सय ८० र महेन्द्र माविमा २ सय ३२ जना परीक्षार्थीले परीक्षा दिनेछन् । हेटौंडाको हटियामा रहेको जनप्रिय माविमा २ सय ९९, भीमफेदीमा रहेका महेन्द्र माविमा १ सय ८१, थाहानगरको पालुङमा रहेको जनकल्याण माविमा २ सय ८२, पालुङकै मच्छेनारायण माविमा १ सय ८८ जनाले परीक्षा दिँदैछन् । यसैगरी मार्खुमा रहेको सरस्वती बालबोधिनी माविमा १ सय ४३ जना, मनहरीको राष्ट्रिय रोटरी माविमा ४ सय ४८ जना, मनहरीकै महेन्द्र किरण माविमा ३ सय ९१ जनाले परीक्षा दिनेछन् । हेटौंडाको बसामाडीमा रहेको महेन्द्र किरण माविमा २ सय ९२ जना, बस्तीपुरमा रहेको निर्मल माविमा ३ सय ४५ जना, चौघडामा रहेको वंशगोपाल माविमा ३ सय ८ जनाले परीक्षा दिनेछन् ।
हेटौंडाको आधुनिक राष्ट्रिय माविमा ३ सय ९८ जना, हेटौंडाकै बालज्योति माविमा ३ सय ११ जना, ज्ञानदा माविमा १ सय ९८ जना, भूटनदेवी माविमा ३ सय ५६ जना, सिद्धार्थ माविमा ३ सय ६६ जना, जीएस निकेतनमा ३ सय ५१ जना, सोलड्यारिटी बोर्डिङ स्कूलमा ४ सय २५ जना, प्रगति माविमा ३ सय ५३ जनाले परीक्षा दिनेछन् । थाहा नगरको बज्रबाराही माविमा २ सय ५६ जना, हेटौंडाको अमर माविमा २ सय ६५ जना र मकवानपुरगढीको भानु माविमा १ सय ८२ जना विद्यार्थी परीक्षामा सहभागी हुने जनाएको छ ।
सूचना अधिकारी पौडेलका अनुसार परीक्षा केन्द्र तोकिएको विद्यालयका प्रधानाध्यापकहरुलाई नै केन्द्राध्यक्ष तोकिएकाले सम्बन्धित विषयको परीक्षा भएको दिनको केही समयअघि केन्द्राध्यक्षहरुले जिल्ला प्रहरी कार्यालय मकवानपुर र मातहतका प्रहरी कार्यालयबाट प्रश्नपत्र लगेर परीक्षा सञ्चालन गरिने । परीक्षामा अमर्यादित क्रियाकलाप हुन नदिन पर्याप्त सुरक्षा ब्यबस्था गरिएको बताईएको छ ।
पहिलो दिन आज अनिर्वाय अंग्रेजी विषयको परीक्षा हुँदैछ । परीक्षा २० वैशाखसम्म सञ्चालन हुनेछ । राष्ट्रिय परीक्षा बोर्डका अनुसार एसईईमा ५ लाख १४ हजार ९ सय ७७ परीक्षार्थी सहभागी हुँदैछन् । जसमध्ये छात्र २ लाख ५७ हजार ९ सय २७ र छात्रा २ लाख ५७ हजार ५३ छन् । बोर्डले एसईईका लागि देशभर २ हजार ७ परीक्षा केन्द्र तोकेको छ । विद्यार्थीहरुले ती परीक्षा केन्द्रमार्फत परीक्षा दिनेछन् ।
गत दुई वर्षदेखि कोभिड महामारीका कारण विद्यालयको आन्तरिक मूल्यांकनको आधारमा परीक्षा बोर्डले नतिजा सार्वजनिक गरेको एसईई परीक्षा यसवर्ष परीक्षा केन्द्र तोकेर भौतिक उपस्थितिमा सञ्चालन हुन लागेको हो ।
मकवानपुर । आसन्न स्थानीय तहको निर्वाचन -२०७९ को लागि मकवानपुरमा स्थापना गरिएको मुख्य निर्वाचन अधिकृत कार्यालय आज उद्घाटन गरिएको छ ।
मुख्य न्यायाधीश डिल्लीरत्न श्रेष्ठ र प्रमुख जिल्ला अधिकारी भरतमणी पाण्डेले कार्यालयको उद्घाटन गरेका हुन । कार्यालयको उद्घाटन गर्दै मुख्य न्यायाधीश श्रेष्ठले निर्वाचन भनेको समाजमा सुरक्षा र भयरहित बाताबरण सिर्जना गर्ने सकारात्मक अभ्यास भएको बताए ।
मकवानपुर जिल्लाको १० वटै स्थानीय तहमा आजैबाट कार्यालय खोलिएको प्रमुख जिल्ला अधिकारी भरतमणी पाण्डेले बताए ।
मकवानपुर जिल्लाको १९ वटा अति संवेदनशील मतदान स्थलमा जिल्लाका सबै सुरक्षा निकायका प्रमुखहरूले स्थलगत अनुगमन गरेको पाण्डेले बताए । हाम्रो नजरले केहि सुरक्षा चुनौती छन्, यद्यपि ति मतदान स्थलमा ढुक्क भएर मतदान गर्ने अवस्था भएकोले मतदातालाई सशंकित नहुन उनले आग्रह गरे ।
निर्वाचनलाई सफल पार्न राजनीतिक दलको भूमिका महत्त्वपूर्ण हुने भएकोले सकारात्मक समन्वय र भूमिका निर्वाह गर्न पाण्डेले अपिल गरे । यस अघि निर्वाचन सम्बन्धी आचारसंहिताको सवाल प्रजिअले हेर्ने भएकोमा आजको मितिबाट सम्बन्धित निर्वाचन अधिकृतले सम्बन्धित स्थलको आचारसंहिता अनुगमन गर्नेछन्
आज खोलिएका कार्यालयको सुरक्षाको लागि आजै बाट ५/५ जना शसस्त्र प्रहरी खटाएको प्रजिअ पाण्डेले बताए । चुनावी थप सुरक्षाको लागि मकवानपुर जिल्लामा १ हजार ४५१ म्यादी प्रहरी पनि खटाइने तयारी भएको पाण्डेले बताए ।
निर्वाचन अवधिको लागि ३ हजार कर्मचारी परिचालन गर्ने तयारी गरिएको छ । मतदानपछि मतपेटिकाहरू संकलनको लागि कार्ययोजना बनाएको पाण्डेले बताए ।
मकवानपुर जिल्लाको १० वटै मतगणना स्थलमा सिसि क्यामरा जडान गरेर केन्द्रीय तहबाट निगरानी राख्ने समेतको तयारी भएको छ । चुनाव एउटा उत्सव र अभियान जस्तै भएकोले उत्सवमा संयमित भएर सहभागी हुन मुख्य निर्वाचन अधिकृत डिल्लिरत्न श्रेष्ठले अनुरोध गरे । आचारसंहितामा बांधेर कसैको स्वतन्त्रता कुण्ठित गर्ने नभै लोकतान्त्रिक प्रक्रियालाई स्थापित गर्न लागेको श्रेष्ठले बताए।
कार्यालय उद्घाटन कार्यक्रम नेकपा एमालेका मदन दाहाल, माओवादीका प्रेमबहादुर पुलामी, नेकपा एकीकृत समाजवादीको मिना लामा, नेपाली कांग्रेसका बुद्ध लामालगायत पार्टी प्रतिनिधिहरूको पनि उपस्थिति रहेको थियो ।
