मकवानपुर । सरकारले आर्थिक वर्ष २०७९।०८० काे लागि नीति तथा कार्यक्रम सार्वजनिक गरेकाे छ । सरकारकातर्फबाट राष्ट्रपति विद्यादेवी भण्डारीले सङ्घीय संसद्को दुवै सदनको संयुक्त बैठकमा राष्ट्रपति भण्डारीले नीति तथा कार्यक्रम प्रस्तुत गरेकी हुन् ।
नीति तथा कार्यक्रममा सरकारले बजेटमार्फत स्वदेशी उद्योग र उत्पादन विशेष प्राथमिकता दिँदै आयात प्रतिस्थापन गर्ने नीति लिएको छ । सामुदायिक विद्यालयको शिक्षक दरबन्दी पुनरावलोकन गर्ने नीति तथा कार्यक्रमामा उल्लेख गरिएकाे छ । राष्ट्रपति भण्डारीले विद्यार्थी अनुपातका आधारमा शिक्षक दरबन्दी मिलाउन गरिने बताइन् । त्यस्तै सरकारले हाल सामुदायिक विद्यालयमा कक्षा ५ सम्म दिइदै आएको विद्यार्थी दिवा खाजा कार्यक्रमलाई कक्षा ८ सम्म विस्तार गर्ने भएको छ ।
आगामी वर्षको नीति तथा कार्यक्रममा स्वास्थ्य क्षेत्रका महत्त्वपूर्ण १७ कार्यक्रम परेका छन् । कृषि उत्पादनका क्षेत्रमा सरकारले विषेश जोड दिएको छ । ऊर्जा, पर्यटन, रोजगारी र पूर्वाधार विकासका क्षेत्र पनि सरकारको नीति तथ कार्यक्रमको प्राथमिकतामा छन् ।
यसैबीच प्रधानमन्त्री शेरबहादुर देउवाले सङ्घीय संसद्को दुवै सदनको संयुक्त बैठकलाई राष्ट्रपति विद्यादेवी भण्डारीले गरेको सम्बोधन प्रति टेबुल गरेका छन् । प्रतिनिधिसभाको आजको बैठकमा उनले सम्बोधनको सो प्रति टेबुल गरेका हुन् ।
यसै गरी बैठकले राष्ट्रपतिबाट सङ्घीय संसद्को दुवै सदनको संयुक्त बैठकलाई आज गरेको सम्बोधनको लागि धन्यवाद ज्ञापन गरेको छ ।
सभामुख अग्निप्रसाद सापकोटाले प्रस्तुत गरेको, ‘सम्माननीय राष्ट्रपतिबाट सङ्घीय संसद्को दुवै सदनको संयुक्त बैठकलाई सम्वत् २०७९ साल जेठ १० गते मङ्गलवारका दिन गर्नुभएको सम्बोधनको लागि प्रतिनिधि सभाको यो बैठक सम्माननीय राष्ट्रपति महोदयमा धन्यवाद ज्ञापन गर्दछ’, भन्ने प्रस्ताव बैठकले सर्वसम्मतिले पारित गरेको हो ।
हेर्नुहाेस सरकारका नीति तथा कार्यक्रमकाे पूर्णपाठ
मकवानपुर । मकवानपुर जिल्लाको बागमती गाउँपालिकाका जनप्रतिनिधिले आज पद तथा गोपनीयताको सपथ लिएका छन् ।
बागमती गाउँपालिकाको कार्यालय झुरझरेमा जनप्रतिनिधिहरुले पद तथा गोपनीयताको सपथ लिएका हुन् । गाउँपालिका अध्यक्ष सर्केश घलानलाई जिल्ला न्यायाधिश डिल्लिरत्न श्रेष्ठले पद तथा गोपनीयताको सपथ खुवाएका थिए । उनी दोस्रो कार्यकाल अध्यक्षमा निर्वाचित भएका हुन् ।
लगत्तै अध्यक्ष घलानले उपाध्यक्ष फणिन्द्र तिमल्सिना, वडा अध्यक्षहरु तथा वडा सदस्यहरुलाई पद तथा गोपनीयताको सपथ खुवाएका थिए । सपथसँगै पालिका अध्यक्ष घलान र उपाध्यक्ष तिमल्सिनाले पदभार ग्रहण गरेका छन् ।

पद तथा गोपनीयताको सपथ लिँदै अध्यक्ष घलानले बागमती गाउँपालिकाको नागरिक भएकोमा गर्व अनुभूति हुने पालिका बनाइने प्रतिबद्धता ब्यक्त गरे । ‘उज्यालो पालिका निर्माण, लालपूर्जा बितरण, गाउँमै गुणस्तीय क्याम्पस र अस्पताल सञ्चालन गरिनेछ’, उनले भने, ‘युवा जनशक्ति विदेशिन रोक्न कृषि र पशुपालनलाई ब्यवसायिकरण गर्न अभियान सञ्चालन गरिनेछ ।’
सपथ ग्रहण कार्यक्रमका प्रमुख अतिथि बागमती प्रदेशका सामाजिक विकास मन्त्री कुमारी मोक्तानले चुनावमा जनताको बीचमा गरेका प्रतिबद्धताहरु पुरा गर्दै बागमतीलाई नमुना पालिका बनाउन नवनिर्वाचित जनप्रतिनिधिहरुलाई आग्रह गरे । बागमती प्रदेशसभा सदस्य प्रेम बहादुर पुलामीले सडक र पूर्वाधारसँगै विकासका बिविध पक्षलाई समेटेर अब पालिकाले आर्थिक उत्पादन र रोजगारी सिर्जनमा जोड दिनुपर्ने बताए ।
जिल्ला न्यायाधिश डिल्लिरत्न श्रेष्ठले अन्य पालिका भन्दा बागमतीको काम गर्ने शैली फरक रहेको भन्दै जनताको मन जितेका जनप्रतिनिधिहरुलाई अब काम गरेर देखाउने पालो आएको बताए । प्रमुख जिल्ला अधिकारी भरतमणि पाण्डेले शान्तिपूर्ण रुपमा निर्वाचन सम्पन्न गराउन सहयोग गरेकोमा बसैपक्षलाई आभार ब्यक्त गरे । कार्यक्रममा जिल्लास्थित सुरक्षा निकायका प्रमुखहरु, राजनीतिक दलका प्रतिनिधिहरु र बागमती पालिकाबासीको उपस्थिती रहेको थियो ।
मकवानपुर । पछिल्लो समय सरकारले छोटो छोटो समय अवधिमै पेट्रोलियम पदार्थको मूल्यवृद्धि गरेको भन्दै प्रदेश राजधानी हेटौंडामा दिनहु मुल्य वृद्धिको बिरोध प्रदर्शन भइरहेको छ ।
आज हेटौंडा बजारको मुख्य चोकमा विरोध कार्यक्रम गरिएको छ । नेकपा एमाले निकट राष्ट्रिय युवा संघ नेपाल, अखिल नेपाल महिला संघ, अनेरास्ववियु मकवानपुर, नेपाल खेलकुद महासंघ, नेपाल मुस्लिम ईतेहाद संगठनको सयुक्त आयोजनामा हेटौंडामा विरोध प्रदशन गरिएको हो ।
विरोध प्रदर्शनीमा मुल्यवृद्धि फिर्ता गर, सडक हामी तताउंछौ मुल्य वृद्धि घटाउँंछौ, परमादेशी सरकार राजिनामा दे, लगायतको प्ले कार्ड सहित प्रदर्शनी गरिएको थियो । प्रदर्शनका क्रममा सडकमै आगो बालेर ग्यांस खरिद गर्न नसकेको संकेत गराईएको थियो भने मोटरसाइकल डोर्याएर बिरोध जनाईएको थियो ।
सर्व साधारणको पहुँच नै पुग्न नसक्ने गरी भएको मुल्य वृद्धिको तिव्र विरोध आइरहेको छ । आजै मकवानपुरको भिमफेदीमा पनि विद्यार्थीहरुले मुल्य वृद्धिको विरोधनमा प्रदर्शन गरेका छन् ।



मकवानपुर । पछिल्लो समय सरकारले हप्तैपिच्छे मूल्यवृद्धि गरेपछि प्रदेश राजधानी हेटौंडा र मकवानपुर जिल्लाको विभिन्न गाउँपालिकामा समेत मुल्य वृद्धिको बिरोधमा प्रदर्शन भइरहेको छ ।
आज जिल्लाको भिमफेदी गाउँपालिकामा अनेरास्ववियु भिमफेदी गाउँ कमिटीले पेट्रोलियम पदार्थ, ग्याँसमा गरिएको मुल्यवृद्धि विरुद्धको विरोधमा प्रदर्शन गरेको छ। विद्यार्थीहरुले भिमफेदी बजारमा विरोध प्रदर्शन गरेका हुन् ।
विद्यार्थीहरुले मुल्यवृद्धि फिर्ता गर, पेट्रोल हो कि सुन हो, करले किन्न सक्छ ? परमादेशी सरकार राजिनामा दे, लगायतको प्ले कार्ड सहित प्रदर्शनीमा उत्रिका थिए ।
सोमबा हेटौंडाको वडा नम्बर ९ मा विरोध प्रदर्शन गरिएको थियो भने आज मंगलबार साझ हेटौंडा बजारको मुख्य चोकमा विरोध कार्यक्रम राखिएको छ । नेकपा एमाले निकट राष्ट्रिय युवा संघ नेपाल, अखिल नेपाल महिला संघ, अनेरास्ववियु मकवानपुर, नेपाल खेलकुद महासंघ, नेपाल मुस्लिम ईतेहाद संगठनको सयुक्त आयोजनामा हेटौंडामा विरोध प्रदशन गर्न लागिएको हो ।
सोमबार नेकपा एमाले निकट भातृसंगठन राष्ट्रिय युवा संघ नेपाल हेटौंडा ९ वडा कमिटीले बिरोध प्रदर्शन गरेको थियो । प्रदर्शनको क्रममा ग्यास, पेट्रोल, डिजेल, खानेतेललगायतका बस्तुमा भएको मूल्यवृद्धि तत्काल खारेज गर्नुपर्ने, हरप्रकारले असफल रहेको परमादेशी सरकारले तुरुन्त राजिनामा दिनुपर्ने, जनताको ढाड सेक्ने काम बन्द गर्नुपर्ने तथा लिपुलेक, लिम्पियाधुरासहितको चुच्छे नक्सा जारी गर्नुपर्ने लगायतका माग गरिएको थियो ।
मकवानपुर । नेकपा एकीकृत समाजवादीका केन्द्रीय अध्यक्ष माधबकुमार नेपालले चुनाव लक्ष्यित गठबन्धनको उदेश्य पुरा भएपछि पार्टीका कार्यकर्तालाई अब संगठन बलियो बनाउन निर्देशन दिएका छन् ।
गठबन्धनसँगको जितलाई हेरेर मख्ख नपार्न आग्रह गर्दै उनले भने “आफ्नो संगठन निर्माण गर्न लाग्नु होस्” । उनले भने “गठबन्धन हैन, संगठन बनाऔ, शक्ति निर्माण गर्नुस्, एक औलाले केही गर्दैन मुठ्ठी बनाउनु होस् ।”
चुनावमा जहा जहाँ गठबन्धन भाँडियो त्यहाँ आफ्ना पार्टीको उम्मेदवारहरुले टिकट फिर्ता गर्न चाहेको प्रसंग कोट्याउँदै उनले भने “हामीले आफैं जित्ने छौ, हामी बलियो भए सबै हाम्रा हुन्छौ, हामीले संगठन बलियो बनाउन सक्नेछौं ।” गठबन्धनमा सहभागी दलको हैसियत मतपरिणाममा देखिएको भन्दै उनले आफूहरु बलियो शक्ति बनेको दाबि गरे ।
हेटौंडा उपमहानगरपालिकालगायत मकवानपुर जिल्लाको ८ वटा स्थानीय तहमा जित प्राप्त भएपछि विजयीहरुलाई बधाइ दिन हेटौंडा आइपुगेका नेपालले नेकपा एकीकृत समाजवादीले आफ्नो आधार तय गरेको भन्दै अब तल्लो तहसम्म पुगेर संगठन बलियो बनाउन ध्यान दिनुपर्ने बताए ।
जनतामाथिको विश्वास जित्न सकेकोमा आफूहरु उत्साही रहेको उनले बताउँदै उनले भने “जनताको बिचमा भिजेकै कारण, जनताको पिर र मर्कामा साथ भएकै कारण हामीले जित हासिल गर्न सफल भयौ ।”
जितेको कारण आफूमा अभिमान नराख्न निर्देशन दिंदै उनले भने “जितिसकेपछि नमात्तिनु होला, हारेपछि पनि नआत्तिनु होला ।” कार्यकर्तालाई सेवाको भावनाबाट प्रेरित हुन उनले आग्रह गरे । कार्यकर्तालाई चुनावमा जितेको ठाउँ र हारेको ठाउँमा मुल्याङ्क गर्न उनले निर्देशन दिए । “जितेको ठाउँमा भन्दा हारेको ठाउँमा मसिनो गरी मुल्याङ्क गर्नुहोस्” उनले भने “यसले अब कसरी अघि बढ्ने भन्ने बाटो देखाउँछ ।”

धरानको मेयरमा विजयी भएका हर्क सम्पाङको उदाहरण दिंदै उनले भने “निरन्तर जनताको साथमा हुने मान्छेलाई पार्टी नै नचाहिने रहेछ, हामी भन्दा पनि उनी अघि आए, हामीले उहाँबाट सिक्नु पर्छ ।”
नेकपा एकीकृत समाजवादी यस्तै राम्रा राम्रा व्यक्तिको खोजिमा रहेको बताउँदै उनले भने “हामी यस्तालाई खोजि खोजि पार्टीमा ल्याउने छौ, आठ महिनामा हामीले पार्टीलाई जुन स्थानमा ल्याएका छौ, यो सानो उपलब्धि हैन ।”
गठबन्धनको कारण यो सफलता प्राप्त नभएको दाबि गर्दै उनले भने “गठबन्धनमा सहभागी दलहरुको आ आफ्नै गुनासाहरु छन्, हामी आफैं यहा आएका हो, हामी एक्लै जित्छौ एकदिन भनेर उच्चमनोबलसहित लाग्नु पर्छ ।”
आगामी मंसिरमा हुने निर्वाचनको तयारीमा आजैबाट लाग्न उनले आग्रह गरे । “आजैबाट जनताको बिचमा जानुस्, चुनावमा टिकट पाउने नपाउने कुरामा ध्यान नदिनुहोस्, जो कोही आएपनि पार्टीको मान्छे भनेर लाग्नु होस्” उनले भने “टिकट नपाएको झोंकमा पार्टी छोड्नेलाई हामी पनि हिसाब राख्नुपर्छ ।”
