मकवानपुर । बागमती प्रदेशको सभामुख पदमा भुवन पाठक विजयी भएका छन् ।
सत्तापक्षका साझा उम्मेदवार पाठक राप्रपाका महामन्त्री हुन् । एक पद सभामुखमा तीन जनाको उम्मेदवारी दर्ता भएपछी आज निर्वाचन भएको थियो । पाठक ६२ मत प्राप्त गर्दै सभामुखमा विजयी भएका हुन् ।
सत्ता गठबन्धन, नेपाली कांग्रेस र नेपाल मजदुर किसान पार्टीले पनि सभामुखका लागि उम्मेदवारी दर्ता गरेकोमा राप्रपामा पाठक विजयी भएका हुन् ।
सत्ता गठबन्धनका तर्फबाट राप्रपाका पाठक, नेपाली कांग्रेसका समानुपातिक सांसद शिवराज अधिकारी र नेमकिपाकी सांसद सृजना सायजुले सभामुखमा उम्मेदवारी दर्ता गराएका थिए ।
सभामुखमा विजयी भएका थापा काठमाणडौंबाट समानुपातिकमा निर्वाचित भएका हुन् ।
कांग्रेसका उम्मेदवार शिवराज अधिकारीले ३६ मत प्राप्त गरेका छन् भने नेमकिपाकी उम्मेदवार सृजना सायजुले ३ मत प्राप्त गरेकी हुन् ।
११० सदस्य रहेको बागमती प्रदेश सभामा एमालेको २७, कांग्रेसको ३७, माओवादीको २१, राप्रपाको १३, नेमकिपाको ३, एकीकृत समाजवादीको ७ र हाम्रो नेपाली पार्टीको २ सिट छ ।
जसमध्ये विजयी भएका पाठकलाई एमाले, राप्रपा, माओवादी, हाम्रो नेपाली पार्टीको समर्थन थियो।
विशेष अदालत काठमाडौंले ७८ लाख घुस प्रकरणमा मुछिएका अख्तियारका पूर्वआयुक्त राजनारायण पाठकलाई दोषी ठहर गर्दै तीन वर्ष कैद सजाय फैसला सुनाएको छ ।
विशेष अदालत अध्यक्ष श्रीकान्त पौडेल, न्यायाधीशहरू यमुना भट्टराई र बलभद्र बास्तोलाको इजलासले अख्तियारका पूर्वआयुक्त पाठक र नेपाल इन्जिनियरिङ कलेजका लम्बोदर न्यौपानेलाई तीन वर्ष कैद र जनही ३९ लाख जरिमाना हुने फैसला सुनाएको हो ।
साथै, भ्रष्टाचार निवारण ऐनअनुसार तीन वर्ष र अख्तियारको बहालवाला आयुक्त भएकाले थप तीन महिना कैद गर्ने फैसला सुनाएको छ ।
पाठकले नेपाल इन्जिनियरिङ कलेजको जग्गा विवादमा ७० लाखभन्दा धेरै घुस लिएको खुलासा भएपछि उनी विवादमा तानिएका थिए । सो प्रकरण बाहिरिएपछि पाठकले पदबाट राजीनामा दिएका थिए ।
पाठकले राजीनामा दिएपछि अख्तियारले उनीविरुद्ध घुस रिसवतमा अनुसन्धान गरी ७८ लाख रुपैयाँ बिगो दावीसहित भ्रष्टाचार मुद्दा दायर गरेको थियो । साथै, आयोगले पाठकको हकमा ‘पदमा बहाल रहेकै अवस्थामा भ्रष्टाचार गरेको’ भन्दै थप सजाय मागसमेत गरेको थियो ।
यी अपराध लुकाउन ७८ लाख घुस
२०५१ सालमा स्थापित नेपाल इन्जिनियरिङ कलेजमा लामो समयदेखि आर्थिक अनियमितता हुँदै आएको थियो । कलेज सञ्चालक समितिको मिलेमतोमा कर छली गर्ने र ठूलो रकम अपचलन भएपछि उजुरीकर्ताले अख्तियार दुरुपयोग अनुसन्धान आयोगमा उजुरी दर्ता गरेका थिए ।
उजुरीकर्ताले संस्थापकहरू लम्बोदरकुमार न्यौपाने, रामरत्न उपाध्याय, उपेन्द्र गौतम, लवराज भट्टराई, सूर्यबहादुर केसी र तत्कालीन प्रिन्सिपल शोभाकान्त देव तथा भाइस प्रिन्सिपल तीर्थ निरौलालगायतले सामाजिक संस्थाका रूपमा दर्ता भएको कलेज निजीकरण गरेर बेच्न लागेको थाहा पाएपछि अख्तियारमा उजुरी दिएका थिए । सो विषय लामो समयसम्म आयोगमा थाँती रह्यो । उजुरी परेसँगै संस्थापकमध्येका लम्बोदरकुमार न्यौपानेलाई टाउको दुखाइ बनेको थियो ।
योजना मुताबिक नै न्यौपानेलगायत टोलीले संस्था हत्याउन २५ वैशाख २०७४ मा कम्पनी रजिष्ट्रारको कार्यालय, काठमाडौंमा ‘नेपाल इन्जिनियरिङ कलेज प्रालि’ दर्ता गरेका थिए ।
प्रालिमा दर्तासँगै न्यौपानेले २ अर्ब रुपैयाँमा कम्पनी बेच्न खोजेका थिए । गैरनाफामुलक सामाजिक संस्थालाई कम्पनीमा दर्ता गर्ने र ४० रोपनी जग्गामा फैलिएको कलेजलाई प्रालिमा लगेर नाफा हत्याउने र बेच्ने उद्देश्य राखेपछि सोविरुद्ध आयोगमा उजुरी दर्ता भएको थियो ।
त्यस्तै, सामाजिक संस्थाका नाममा खुलेको कलेजमा ३१ करोड ८६ लाख ४९ हजार १ सय ६८ रुपैयाँ नखुलेको स्रोतबाट आएको जी पौडेल एन्ड एसोसियट्स, चार्टर्ड एकाउन्टेन्ट्सको रिपोर्टले देखाएको थियो । त्यसमध्ये २१ करोड ४९ लाख २९ हजार ४४ रुपैयाँ अदृश्य तरीकाले नै बाहिरिएको छ ।
उजुरी पर्नेबित्तिकै आयोगले कागजात नियन्त्रण गर्दा झन्डै ५२ करोडभन्दा बढी ‘कालोधन’ विषयमा प्रश्न उठ्ने भएपछि लम्बोधर न्यौपाने आयोगका आयुक्त पाठकले भने जति रकम दिन राजी भएका थिए ।
व्यक्तिगत बेरुजु नै करोडौं
लम्बोदर न्यौपानेको चारवर्षे कार्यकालमा व्यक्तिगत बेरुजु मात्रै २३ करोडभन्दा बढी छ । जी पौडेल एन्ड एसोसियट्स, चार्टर्ड एकाउन्टेन्टस्को १३ भदौ २०७५ को अडिट रिपोर्टअनुसार २३ करोड १० लाख रुपैयाँ बेरुजु देखिन्छ । त्यसमध्ये सबभन्दा बढी न्यौपानेको नाममा १३ करोड ३२ लाख ३६ हजार ३ सय ९५ रुपैयाँ बेरुजु छ ।
त्यस्तै, अदुअआमा परेको उजुरीमा उल्लेख भएका रामरत्न उपाध्यायको नाममा ७९ लाख, लवराज भट्टराईको नाममा २ करोड ४३ लाख, उपेन्द्र गौतमको नाममा १ करोड ७८ लाख र सूर्यबहादुर केसीको नाममा २ करोड ७८ लाख बेरुजु छ ।
तत्कालीन प्रिन्सिपल शोभाकान्त देव र भाइस–प्रिन्सिपल तीर्थ निरौलाको नाममा पनि बेरुजु देखिन्छ । राजधानी दैनिकबाट
मकवानपुर । मकवानपुरको बागमती गाउँपालिकामा जारी पाँचौ बागमती गोल्डकपमा विहीबारको खेलबाट भुटनीज युथ स्पोर्टस् क्लब सेमिफाइनल प्रवेश गरेको छ । विहीबार भएको क्वार्टरफाईनलमा हिमालयन शेर्पालाई २–० गोल अन्तरले पराजित गर्दै भुटनीज सेमिफाइनलमा प्रवेश गरेको हो ।
खेलको पहिलो हाफको सुरुवाती २ मिनेटमै भुटनीजका जर्सी नम्बर ४७ का दिरज थजालले हेडबाट गोल गर्दै अग्रता दिलाएका थिए । त्यसैगरी दोस्रो हाफको ३८ औं मिनेटमा जर्सी नम्बर ७ का हेक्टर ओर्टेगले शेर्पाको पोष्टमा गोल गर्दै जीत सुनिश्चित गरेका थिए ।
भुटनीज क्लबका हेक्टर ओर्टेग आजको खेलमा म्यान अफ दि म्याच बन्दै नगद पाँच हजार पुरस्कार प्राप्त गरेका छन् ।
यसअघि आर्मीलाई हराउँदै हिमालयन शेर्पा क्वाटरफाइनलमा प्रवेश गरेको थियो । अब भुटनीज र जावलाखेल युथ क्लब बिच पुष ३० गते शनिबार सेमिफाइनलमा भेट हुनेछ । उद्धघाटन खेलमा जावलाखेलले आयोजक बागमतीलाई ५–० गोल अन्तरले पराजित गरेको थियो ।
यसैगरी भोली शुक्रबार संकटा क्लब र नेपाल एपिएफ क्लबबीच खेल हुनेछ । बुधबार भएको खेलबाट मच्छिन्द्रको आत्मघाती गोलको मद्दतले एपिएफले क्वाटरफाइनल यात्रा तय गरेको हो ।
बागमती खेलकुद विकास समितिको आयोजनामा माघ ३ गतेसम्म हुने प्रतियोगिता विजेताले ८ लाख र उपविजेताले ४ लाख नगद पुरस्कार प्राप्त गर्नेछन् । प्रतियोगितामा ७ विभागिय, १ अन्तर्राष्ट्रियर २ स्थानीय टिम सहित १० टिमको सहभागीता रहेको छ । चौथो सस्करणको बागमती गोल्डकपको बिजेता थ्रीस्टार क्लबले यो पटक सहभागिता जनाएन ।
मकवानपुर । बागमती प्रदेशको सभामुखमा ३ जनाको मनोनयन दर्ता भएको छ ।
सभामुखमा नेपाली कांग्रेस, नेमकिपाबाट मनोनयन दर्ता भएको हो । यसैगरी सत्तपक्षबाट पनि उम्मेदवारी दर्ता भएको छ ।
नेपाली काँग्रेसका शिवराज अधिकारीको मनोनयन दर्ता गरेका छन् । अधिकारीको प्रस्तावकको रूपमा कुन्दनराज काफ्ले र समर्थकमा रामकृष्ण चित्रकार रहेका छन् ।
यसैगरी नेमकिपाबाट सृजना सायजुको उम्मेदवारी दर्ता भएको छ । सायजु प्रस्तावक सुरेन्द्रराज गोसाइ र समर्थक गिता काफ्ले रहेका छन् ।
यसैगरी सत्तापक्षबाट राप्रपाका भुवन पाठकको पनि उम्मेदवारी दर्ता भएको छ । पाठकको लागी एमालेका जगन्नाथ थपलिया र माओवादी केन्द्रका युवराज दुलाल समर्थक रहेका छन् ।
मकवानपुर । बागमती प्रदेशमा सभामुखको निर्वाचनका लागि आज (२८ पुसमा) मनोनयन दर्ताको गरिदै छ । बिहान १०:३० देखि दिउँसो २ बजेसम्म मनोनयन दर्ताको समय तोकिएको छ । यसैगरी आजै दिउँसो २:३० देखि ३:३० बजेसम्म मनोनय फिर्ताको लागि समय तोकिएको छ ।
प्रदेश सभा सचिवालयले आजै दिउँसो ४ बजे अन्तिम नामावली प्रकाशन गर्ने छ ।
भोली २९ पुस शुक्रबार बिहान ११ बजे निर्वाचन गर्ने कार्यतालिका रहेको छ । जसअनुसार ११ बजे बस्ने प्रदेश सभाको बैठकमा हुनेछ सभामुखको निर्वाचन हुने छ ।
नेपालको संबिधानको धारा १८२ को उपधारा १ मा प्रदेश सभाको पहिलो बैठक प्रारम्भ्स भएको मितिले १५ दिन भित्र प्रदेश सभा सदस्यहरुले आफू मध्येबाट सभामुख गर्नु पर्ने प्राबधान छ । बागमती प्रदेश सभाको दोस्रो कार्यकालको गत १८ गते बसेको पहिलो बैठकले सभामुखको निर्वाचन मिति तय गरेको थियो ।
बागमती प्रदेशमा भएको सत्ता समिकरण अनुसार सभामुख राप्रपाको भागमा परेको छ । राप्रपा बाट दलका महसचिव भुवनबहादुर पाठकलाई सत्तापक्षले सभामुखमा उम्मेदवार बनाउने भएको छ ।
केन्द्रको सात दलीय गठबन्धनको सत्ता भागबण्डामा बागमती प्रदेशको सभामुख राप्रपाको भागमा परेपछि राप्रपाका पाठकले सभामुख बन्ने लगभग पक्का भएका छ ।
पाठकले आफूलाई पार्टी र गठबन्धनले विश्वास गरेर सभामुखको जिम्मेवारी दिएको बताउँदै पार्टी र गठबन्धनको विश्वासलाई कायम गर्ने बताए ।
सत्तारुढ गठबन्धनले बागमती प्रदेशको मुख्यमन्त्री माओवादी केन्द्र र नेकपा एमालेलाई आलोपालो, सभामुख राप्रपा तथा उपसभामुख एमालेलाई भाग लगाएको थियो । एमालेले भने उपसभामुख को बनाउने अझै निर्णय गरेको छैन । एमालेले भने आज दलको बैठक बसेर उपसभामुखको उम्मेदवार चयन गर्ने एमाले संसदीय दलको कार्यालयले जनाएको छ ।
यसैबीच आफूहरुले सभामुख पाएमा मुख्यमन्त्रीलाई विश्वासको मत दिन नेपाली कांग्रेस तयार रहेको बताइएको छ । संघिय सांसदमा सत्तारुढ दललाई विश्वासको मत दिएको कांग्रेसले प्रदेशमा कम्तिमा सभामुख आफूहरुले पाएमा विपक्षी गठवन्धनको सरकारलाई विश्वासको मत दिने संकेत गरिएको हो ।
नेपाली कांग्रेसका संसदीय दलका नेता बहादुरसिंह लामाले बागमतीमा रहेको शालिकराम जम्कट्टेलको नेतृत्वको सरकारलाई विश्वासको मत दिन सकिने तर त्यसमा सर्तहरु रहेको बताए । राजनीतिमा केहि पाउँदा केहि गुमाउनुपनि पर्ने भन्दै उनले सत्तारुढ दललाई सभामुख दिएको अवस्थामा विश्वासको मत दिने शंकेत गरे ।
लामाले भने ‘हामीलाई सत्तारुढ दलबाट अहिलेसम्म विश्वासको मतको लागि कुनैपनि प्रस्ताव आएको छैन, यदि आएको अवस्थामा हामीले हाम्रो सर्तहरु भन्नेछौँ, अहिलेलाई सभामुख र पछि अन्य विषयहरु पनि हुनेछन्, यदि त्यस्तो वातावरण मिलेको अवस्थामा विश्वासको मत दिन सकिन्छ ।’
कांग्रेसले सभामुख पाएमात्र विश्वासको मत दिने भनेपनि यहाँ रहेका १ सय १० सांसद मध्य ७० सांसदको समर्थन सरकारलाई रहेको कारण सरकारले विश्वासको मत प्राप्त गर्ने देखिन्छ । सरकारले माग ३ गते विश्वासको मत लिने कार्यक्रम रहेको छ ।
