थाहानगर/ उत्तरी क्षेत्रको एकमात्रै उच्च शिक्षा प्रदान गर्ने पालुङ बहुमुखी क्याम्पसलाई प्रदेश सरकारबाट निरन्तर सहयोग हुने बागमति प्रदेश सामाजिक बिकास मन्त्री कुमारी मोक्तानले बताएकी छिन् ।
पालुङ बहुमुखी क्याम्पसको २० औं वार्षिकोत्सव तथा परिषद भेलाको उद्घाटन गर्दै पालुङ क्याम्पसको लागि यो बर्ष पनि सामाजिक विकास मन्त्रालयले २५ लाख रुपैयाँ बिनियोजन गरेको बताइन ।
मन्त्री मोक्तानले थाहा नगरबाट सामाजिक बिकास मन्त्रालयमा शैक्षिक व्यवस्थापन, सुधार, बिकासकालागि प्राप्त भएको सबै योजनालाई संबोधन गरिएको बताइन ।
परिषद् भेलामा क्याम्पस ब्यवस्थापन समितिका अध्यक्ष तथा थाहा नगरपालिकाका प्रमुख बिष्णु बहादुर बिष्टले क्याम्पसको बार्षिक नीति र कार्यक्रम प्रस्तुत गर्दै पालुङ क्याम्पसलाई मकवानपुर उत्तरी क्षेत्रको महत्त्वपूर्ण शैक्षिक गन्तब्यको रुपमा बिकास गर्ने लक्ष्य रहेको बताए ।
परिषद् भेलामा क्याम्पस प्रमुख राजन मिश्रले क्याम्पसको वर्तमान अवस्था र भावी योजनाको सहितको प्रतिवेदन प्रस्तुत गरे । क्याम्पसका लेखापाल मधुसूदन रायमाझीले आर्थिक प्रतिवेदन प्रस्तुत गरेका थिए ।
भेलामा थाहा नगरपालिकाका उपप्रमुख भरत गोपाली, नारायणी यातायात ब्यवशायी संघका महासचिब सरोज कुमार खनाल, जनकल्याण माबिका प्रधानाध्यापक तथा क्याम्पस ब्यवस्थापन समितिका पूर्व अध्यक्ष सानोभाई कार्की, थाहा नगरपालिका वडा नम्बर ४ का वडा अध्यक्ष नारायण लामा, भूमि सम्बन्धि आयोग मकवानपुरका सदस्य अरुण रायमाझी, नेपाली काङ्ग्रेस थाहा नगर सभापति प्रमोदकृष्ण जोशी, नेकपा माओवादी केन्द्र थाहा नगर अध्यक्ष बिनोद कुमार लामा, नेकपा एमाले थाहा नगर अध्यक्ष अच्युत्तम प्रसाद ढकाल, राप्रपा थाहा नगर अध्यक्ष नवीन रायमाझी, थाहा नगर उद्योग वाणिज्य संघका अध्यक्ष कविराज खत्री, प्याब्सन थाहा नगर अध्यक्ष सुरेन्द्रमान प्रधान, फरक सोचका अध्यक्ष यादव रायमाझी लगायत परिषद सदस्यहरु, क्याम्पस संचालक समितिका पदाधिकारीहरु, विभिन्न विद्यालयका प्रधानाध्यापकहरु, प्राध्यापक, विद्यार्थीहरुको उपस्थिति रहेको थियो।
वार्षिकोत्सवको अवसरमा पालुङ क्याम्पसका प्रथम व्याचका विद्यार्थी नानुमैया प्रधानलाई विद्यावारिधी (पिएचडी) को तयारी गरिरहेको भन्दै सम्मान गरिएको थियो । सोहि अवसरमा उत्कृष्ट प्राध्यापक अंग्रेजी विषयका गोपाल उप्रेती, बिगत १३ बर्ष क्याम्पस प्रमुखको जिम्मेवारीमा रही क्याम्पसको प्रगतिको लागि खटिएकोमा पूर्व क्याम्पस प्रमुख रामहरि अधिकारीलाई सम्मान गरिएको थियो ।
त्यस्तै क्याम्पसको सुचना प्रवाहमा महत्त्वपूर्ण योगदान पुर्याएकोमा थाहापाटी अनलाइनका सम्पादक शम्भु अधिकारी र क्याम्पसको भौतिक निर्माण कार्यमा योगदान पुर्याएबापत श्रवण लामालाई सम्मानित गरिएको थियो।
यसैबिच शुक्रबार भएको परिषद् भेलाले पुनः बिष्णु बहादुर बिष्टको अध्यक्षतामा नयाँ ब्यवस्थापन समिति चयन गरेको छ । समितिको सदस्यहरुमा सहदेव ढकाल,सरोज कुमार खनाल, सगुन कुमार ढकाल, रिता प्रधान, जुजुभाइ प्रधान, केदार कार्की, सुरेन्द्रमान प्रधान, बिमल कुमार ढकाल, सुदर्शन कार्की र मनोज कुमार अधिकारी रहेको निर्वाचन अधिकृत उमेश श्रेष्ठले जानकारी दिए ।
निर्वाचित संचालक समितिको पहिलो बैठक फागुन ९ गते बस्ने र बैठकले पदाधिकारी र अन्य सदस्यहरुको मनोनित गर्ने नवनिर्वाचित अध्यक्ष बिष्टले बताए ।
मकवानपुर । बागमती प्रदेश सरकारले बिगत ५ वर्षको अवधिमा गरेका कामको विवरण सार्वजनिक गरेको छ ।
बागमती प्रदेश मुख्यमन्त्री तथा मन्त्रिपरिषद्को कार्यालयको आयोजनामा आज आयोजित पत्रकार सम्मेलनमा पुस्तक मार्फत प्रगति विवरण सार्बजनिक गरेको हो ।
प्रदेशका मुख्यमन्त्री शालिकराम जम्मकट्टेलले उक्त पुस्तक सार्वजनिक गरेका हुन् । प्रदेश सरकार स्थापना भएदेखि अहिलेसम्मका उपलब्धीहरु पुस्तकमा समेटिएको मुख्यमन्त्री जम्मकट्टेलले बताए ।
प्रदेश सरकारले पाँच वर्षको अवधिमा धेरै काम गरेको र पुस्तकमा छोटकरी रुपमा समेटिएको उनले बताए । पाँच वर्षे उपलब्धका बारेमा आम नागरिकलाई जानकारी गराइदिन पनि उनले आग्रह गरे ।
२०७४ साल माघ ३ गते प्रदेशको अस्थायी राजधानी तोकिएदेखि अहिलेसम्म प्रदेश सरकारले गरेका कामका विषयमा पुस्तकमा समेटिएको छ । प्रदेशका मन्त्रालयनै पिच्छे गरिएका कामको विवरण पुस्तकमा समेटिएको प्रदेशका प्रमुख सचिब मुकुन्द प्रसाद निरौलाले जानकारी गराए ।
यस्ता छन् सम्पादित कार्यहरूको संक्षिप्त विवरण
नेपाल सरकारले मिति २०७४ माघ ३ गते प्रदेश ३ को राजधानी हेटौडा तोकी प्रदेश प्रमुख नियुक्त गरेको र मिति २०७४ माघ २८ गते नेपालको संविधान बमोजिम प्रदेश प्रमुखबाट श्री डोरमणि पौडेललाई मुख्यमन्त्री नियुक्त गरी प्रदेश सरकारको गठन भएको ।
शुन्यताबाट शुरु भएको प्रदेश सरकार स्थापनाको समयमा ७ मन्त्रालय र निकायहरू रहेकोमा हाल ११ मन्त्रालय तथा प्रदेश सरकार अन्तरगत निकाय १९८ कायम रहेका ।
यस प्रदेश भित्र १३ जिल्ला, संघीय निर्वाचन क्षेत्र ३३, प्रादेशिक निर्वाचन क्षेत्र ६६ र तीन महानगरपालिका, एक उपमहानगरपालिका, ४१ नगरपालिका र ७४ गाउँपालिका गरी जम्मा ११९ वटा स्थानीय तहहरू रहेका
सम्वत् २०७८ को जनगणना अनुसार बागमती प्रदेशमा पुरूष ३०३३५७४ महिला ३०५०४६८ गरी कूल ६०८४०४२ जनसङ्ख्या रहेका छन् ।
प्रदेश सरकारबाट पाँच वर्षको अवधिमा ७० वटा ऐन संशोधन समेत, अध्यादेश ११, नियमावली ३३, निर्देशिका ५, कार्यविधि ४४, मापदण्ड ७ र आदेश १२ गरी जम्मा १८६ ओटा जारी भएको ।
प्रदेशको पहिलो पाँच वर्षे आवधिक योजना निर्माण, कार्यान्वयन र त्यसको अर्धवार्षिक समीक्षा सम्पन्न गरिएको साथै प्रदेशको वस्तुस्थिति विवरण २०७५ तयार गरी तथ्याङ्क उपयोग गरिएको ।
संघीय सरकारसंगको समन्वय र सहकार्यमा २० वटा समपुरक र विशेष अनुदानका आयोजनाहरू सञ्चालन र नवप्रवर्तन साझेदारी कोषमार्फत ११ वटा स्थानीय तहहरूमा नवप्रवर्तनात्मक परियोजनाहरू सञ्चालन गरी स्थानीय तहमा रोजगारी सिर्जना तथा आर्थिक विकासलाई प्रवर्द्धन गरिएको ।
यस अवधिमा प्रदेश सुशासन केन्द्रमार्फत बागमती प्रदेश अन्तर्गत प्रदेश र स्थानीय तहमा निर्वाचित, मनोनित तथा नियुक्त पदाधिकारी तथा कर्मचारीहरूका क्षमता विकासतर्फ हालसम्म ५,११२ जनप्रतिनिधिहरू तथा ८,१७४ जना कर्मचारीहरू गरी कूल १३,२८६ जना लाभान्वित भएका ।
प्रदेशमा आव २०७८र०७९ सम्ममा १५५१७९ उद्योग दर्ता भएको ।
९ वटा जिल्लामा १० शीत भण्डार निर्माणको कार्य सम्पन्न हुने अवस्थामा रहेको जसबाट १५८०० मेट्रिक टन फलफुल तथा तरकारी भण्डारणमा सहजता हुने ।
१०४१ सिंचाई योजना सम्पन्न भई १३१३४८ हेक्टर जमीनमा सिंचाई सुविधा उपलव्ध भएको र १६ वटा नदीहरूको नदी नियन्त्रणको गुरु योजना तयार गरी नदी नियन्त्रणका कार्य शुरु गरिएको ।
२७६ वटा खानेपानी योजनाहरू सम्पन्न भई थप ४६१९६ घरधुरीहरूमा आधारभूत स्तरको खानेपानी सेवा पुगेको
यस अवधिमा कच्ची सडक ७६१ किमि, ग्राभेल ७७९ किमि, कालोपत्रे ५३६ किमि, ढलान सडक १५४ किमि, सडक पुल ६९ वटा र झोलुङ्गे पुल ७ वटा सम्पन्न भएका ।
सहरी विकास तथा भवन पूर्वाधार तर्फ ३३० भवन, ४३४ पार्क निर्माण, १९५ सरकारी कार्यालय मर्मत र २०८९ जनता आवास निर्माण सम्पन्न ।
प्रदेशभित्र ५३८९७५ सवारी दर्ता भएका र १०४३६ जनाले व्यावसायिक तालिम प्राप्त गरेका ।
युवा उद्यमशीलता विकास अन्तरगत २६० स्वंयसेवक परिचालन, ४३ व्यवस्थित खेल मैदान, जिल्ला स्तरीय रङ्गशाला ७, कभर्ड हल ३० वटा सम्पन्न भएको ।
सामुदायिक वन तथा अन्यक्षेत्रमा गरी ३९६ हेक्टरमा कूल ६२२९८५ जडिबुटीको विरूवा रोपण गरिएको ।
वागमती प्रदेशलाई ९७। २२ प्रतिशत साक्षरता सहित नेपालकै पहिलो साक्षर प्रदेश घोषणा गरिएको ।
उच्च शिक्षामा महिलाको पहूँच बढाउन स्नातक र स्नातकोत्तर तहमा अध्ययनरत ५६७ छोरी बुहारीलाई छात्रवृति प्रदान गरिएको ।
प्रदेशभित्र विभिन्न सूचकका आधारमा २० नमूना विद्यालय स्थापना , २२१ वटा शैक्षिक परामर्श केन्द्र सञ्चालन अनुमति ७२ विद्यालयलाई वस सेवा उपलव्ध, ३३१ माविमा इ लाइब्रेरी, १९७ विद्यालयमा विज्ञान प्रयोगशाला स्थापना र २२१ वटा सामुदायिक क्याम्पसहरूलाई सवलीकरण गरिएको ।
आधारभूत तहदेखि माध्यमिक तहसम्मका ३७८८ जना शिक्षकहरूलाई पेशागत विकास तालिम र ९०२५ जनालाई पुनरताजगी तालिम प्रदान गरिएको ।
प्रदेशभित्रका पर्यटकीय पदमार्ग, मठमन्दिर, पार्क, पर्यटन सूचना केन्द्र, पिकनिक घर र होमस्टे गरी ११५५० स्थानको सवलीकरण र व्यवस्थापन गरिएको ।
बागमती प्रदेशको पर्यटन ब्रान्ड नाम स्वीकृति गरी लागु गरिएको साथै जुगल हिमश्रृंखला आरोहण खुला गरी पहिलो आरोहण सम्पन्न गरिएको ।
विद्यालय स्वास्थ्य, सरसफाई र छात्राहरूको स्वास्थ्य प्रवर्धनका लागि एक विद्यालय एक नर्स कार्यक्रम हालसम्म ११९ तहका ४५९ विद्यालयमा कार्यान्वयन गरिएको ।
मुख्यमन्त्री जनता स्वास्थ्य कार्यक्रम र प्रदेशका १३ प्रादेशिक अस्पतालमा विशिष्टिकृत सेवा सञ्चालनमा ल्याइएको
प्रदेश लोकसेवा आयोगबाट सार्वजनिक सेवा प्रवाहको लागि ८२५ विभिन्न पदको विज्ञापन मार्फत परीक्षा सञ्चालन गरी नियुक्तिको लागि सिफारिस भएको ।
बागमती प्रदेशको स्थानीय मानव विकास प्रतिवेदन र दिगो विकास लक्ष्यको आधार तथा मार्गचित्र तयार गरिएको
१३ जिल्लाका जिर्ण प्रहरी चौकी निर्माण गरी सुरक्षाकर्मीका लागि कार्य वातावरण उपयुक्त सिर्जना गरिएको ।
यस अवधिमा प्रदेश सरकार र मातहतका निकायहरूलाई विपक्षी बनाई दायर भएका २०८ मुद्दामध्ये ७४ मुद्दा किनारा लागिसकेको जसमा ८१ प्रतिशत मुद्दामा सफलता प्राप्त भएको ।
मकवानपुर । बागमती प्रदेशको प्रदेश नीति तथा योजना आयोगमा दुइ जना नियुक्त भएका छन् ।
आज बिहान बसेको मन्त्रिपरिषद्को बैठकले प्रदेश नीति तथा योजना आयोगको सदस्यमा दुइजनालाई नियुक्त गरेको हो । बैठकले आयोगको सदस्यहरुमा डाक्टर दिपेन्द्र श्रेष्ठ र डाक्टर जयन्त खनाललाई नियुक्त गरेको आर्थिक मामिला तथा योजना मन्त्री तथा प्रदेश सरकारका प्रवक्ता जगन्नाथ थपलियाले बताए।
यसैगरी मन्त्रिपरिषद्को बैठकले प्रदेशमा खर्च कटौतीको प्रस्ताव पारित गरेको छ । अब कार्यान्वयनमा जाने समेत उनले बताए। यसैगरी कर्मचारी सम्वन्धी कानूनका विषयमा संसदमा छलफलका लागि लैजाने निर्णय भएको मन्त्री थपलियाले बताए ।
हेटौँडा । मकवानपुरको बकैया गाउँपालिकामा भएको आखा शिविरमा ५१ जनाको शल्यक्रिया गरिएको छ । बकैया जेसिसको आयोजनामा बकैया ४ गरगरे स्थित बकैया आधारभूत अस्पतालमा तीन दिनेसम्म संचालन भएको निःशुल्क आँखा जाँच तथा मोतिविन्दुको शल्यक्रिया शिविरमा ५ सय ५६ जनाको आँखा परीक्षण गरिएको छ ।
बकैया जेसीजले बकैया गाउँपालिको आर्थिक सहयोग, नेपाल आँखा अस्पताल त्रिपुरेश्वर, काठमाडौं र बकैया आधारभूत अस्पतालको प्राविधिक सहयोगमा शिविर सञ्चालन गरेको हो ।
बकैया गाउँपालिकामा भएको शिविरबाट गाउँपालिकाका १२ वटै वडा तथा छिमेकी बागमती गाउँपालिकाका आँखामा समस्या भएकाहरुलाई समेत लाभ पुगेको जेसीजका कोषाध्यक्ष विवेक बोलखेले बताए ।
जेसिसका कार्यकारी उपाध्यक्ष सुशील घिमिरेको संयोजनमा भएको समापन कार्यक्रममा बकैया जेसिज वर्ष २०२३ का अध्यक्ष अमोद बस्नेतले आगामी दिनमा पनि बकैया जेसीजले सामजिक क्रियाकलापलाई निरन्तरता दिने बताए ।
शिविर समापनमा बकैया गाउँपाकिला उपाध्यक्ष भक्तबहादुर खत्री, वडा नंबर ४ का वडाध्यक्ष राजन दंगाल, नेपाल आँखा अस्पताल त्रिपुरेश्वरकी डाक्टर पुनम श्रेष्ठ, हेटौँडा जेसिजका पब्लीक रिलेशन अफिसर संग्राम बल लामा, बकैया जेसीजका संस्थापक अध्यक्ष रमेश फुँयाल लगाएतको उपस्थिति थियो ।
मकवानपुर । हेटौंडामा जारी सहिद स्मृति स्थानीय तह अन्तर्राष्ट्रिय फुटबल प्रतियोगिता–२०७९ मा सशस्त्र प्रहरीको एपीएफ क्लबले सेमिफाइनलमा स्थान बनाएको छ ।
पाचौं सस्करणको प्रतियोगिता अन्तर्गत विहीबार हेटौंडा–५ स्थित पिप्ले क्याम्पा रंगशालामा भएको खेलमा विभागीय टोली त्रिभुवन आर्मीलाई टाइब्रेकरमा ४–२ गोलअन्तरले पराजित गर्दै एपीएफले सेमिफाइनल प्रबेश पाएको हो । खेलको निर्धारित समय गोल रहित बराबरीमा टुंगिएपछि खेल टाइब्रेकरमा धकेलिएको थियो ।
टाइब्रेकरमा एपीएफका नवीन लामा, सुदिप सिखाकार, सनी श्रेष्ठ तथा दिपेश धिमालले गोल गरेका थिए । आर्मीका लागि टेकबहादुर बुढाथोकी र विकास खवासले मात्र गोल गरे । नवयुग श्रेष्ठ र दीपक गुरुङको प्रहार सशस्त्रका गोलरक्षक राजु नगरकोटीले बचाएका थिए ।
खेलको म्यान अफ दी म्याच सशस्त्रका गाोलरक्षक राजु नगरकोटी घोषित भए । उनले नगद दशहजार रुपैयाँ प्राप्त गरेका छन् । मकवानपुरको हेटौंडा-५ स्थित पिप्ले क्याम्पा रंगशालामा जारी खेलमा ७ वटा ए डिभिजन र एक अन्तराष्ट्रिय क्लबसहित १२ टिमको सहभागिता रहेको छ ।
प्रतियोगिताको उपाधि विजेता टोलीले नगद १५ लाख र उपविजेता टोलीले १० लाख रुपैयाँ प्राप्त गर्ने छन् । प्रतियोगितामा विद्यागत उत्कृष्ट खेलाडीले २५ हजार र म्यान आफ दि म्याच खेलाडीले १० हजार रुपैयाँ प्राप्त गर्नेछ ।
पहिलो संस्करणको उपाधि थ्रिस्टार क्लबले जितेको थियो भने २०७५ मा भएको दोस्रो संस्करणको उपाधि घरेलु टोली मकवानपुर–११ ले जितेको थियो । २०७७ मा भएको तेस्रो संस्करण र गत जेठमा सम्पन्न चौथो संस्करणको उपाधि त्रिभुवन आर्मी फुटबल क्लबले जितेको थियो ।
प्रतियोगिताको सर्वोकृष्ट खेलाडीले रोयल इन्फिल्ड (बुलेट) मोटरसाइकल पाउने छन् । त्यसका लागि अघिल्लो दुई संस्करणमा झैं यस वर्ष पनि हेटौंडा स्कूल अफ म्यानेजमेण्ट एण्ड सोसियल साइन्सेसले प्रायोजन गरेको छ ।
शुक्रबार आयोजक मकवानपुर ११ र मनाङ मर्स्याङ्दी क्लबवीच प्रतिस्पर्धा हुनेछ ।
