मकवानपुर । नेपाल आयल निगमले पेट्रोलमा १५ र डिजेल मट्टितेलमा १० रुपैयाँ मूल्य वृद्धि गरेको छ । वृद्धि भएको मूल्य आजै राति १२ बजेबाट लागू हुने निगमले जनाएको छ ।
निगमका अनुसार अब तेस्रो वर्ग अन्तर्गत पेट्रोलको मूल्य १७२ रुपैयाँ कायम भएको छ भने डिजेल र मट्टितेलको मूल्य १५२ रुपैयाँ पुगेको छ ।दोस्रो वर्ग अन्तर्गत अन्तरगत पेट्रोलको मूल्य १७१, डिजेल र मट्टितेलको मूल्य १५१ पुगेको छ ।
निगमले पहिलो वर्ग अन्तरगत पेट्रोलको मूल्य १६९ रुपैयाँ ५० पैसा र डिजेल–मट्टितेलको मूल्य १४९ रुपैयाँ ५० पैसा कायम गरेको छ ।
तेस्रो वर्ग अन्तर्गत काठमाडौं, पोखरा र दिपायल र आसपासका क्षेत्र पर्छन् । यस्तै दोस्रो वर्ग अन्तर्गत दाङ,सुर्खेत र आसपासका क्षेत्र पर्छ भने पहिलो वर्ग अन्तर्गत चारआली, विराटनगर, जनकपुर, अमलेखगञ्ज, भलवारि, नेपालगञ्ज, धनगढी, वीरगञ्ज र आसपासका क्षेत्र पर्छन् ।
निगमतले अमेरिका–इजरायल–इरान तनावबीच देखिएको अन्तर्राष्ट्रिय परिस्थितिका कारण मूल्य वृद्धि गर्नुपरेको जनाएको छ ।
‘यस विषम परिस्थितिबीच नेपाल आयल निगम लिमिटेडले बाध्यतावश पेट्रोलियम पदार्थको मूल्य अपेक्षाभन्दा बढाउनुपरेको छ । यसबाट आम उपभोक्ता लगायत सरोकारवालामा पर्ने असरप्रति निगम सचेत र संवदेनशील छ’ निगमले जारी गरेको विज्ञप्तिमा उल्लेख छ ।
निगमलाई इन्डियन आयल कर्पोरेसन (आइओसी) बाट प्राप्त नयाँ खरिद मूल्यसूचीमा पेट्रोल प्रतिलिटर ३१ रुपैयाँ र डिजेल प्रतिलिटर ५४ रुपैयाँले बढेर आएको थियो । निगमले उपभोक्तालाई प्रत्यक्ष मार नपरोस् भनेर मूल्य स्थिरीकरण कोषको रकम प्रयोग गरी कम मात्र मूल्य बढाएको बताएको छ ।
निगमका अनुसार खाना पकाउने एलपी ग्यासमा समेत प्रतिसिलिन्डर २१६ रुपैयाँले मूल्य बढेर आएको छ, तर उपभोक्ताको सहजतालाई ध्यानमा राख्दै यसको खुद्रा बिक्री मूल्य यथावत् राखिएको छ ।
मकवानपुर । हेटौंडा–१० स्थित टिसीएन चौरमा मकवानपुर जिल्ला खेलकुद विकास समितिको आयोजनामा जारी दोस्रो वृहत् खेलकुद,कृषि तथा पर्यटन महोत्सवमा मकवानपुर जिल्लास्तरीय पुरुष भलिबल प्रतियोगिता सुरु भएको छ ।
मकवानपुर जिल्ला भलिबल संघको सहकार्यमा सुरु भएको प्रतियोगिताको पहिलो खेलमा थाहा नगरपालिकाको मंगलेश्वर युवा क्लब र हेटौंडा–१५, स्थित सफल केयर क्लबीच प्रतिस्पर्धा भइरहेको छ ।
प्रतियोगितामा मकवानपुर जिल्लाभरबाट ८ वटा टिमको सहभागिता रहेको आयोजक समितिका नरेन्द्र मोक्तानले बताए ।
क्वार्टरफाइनल सम्मको खेल बेष्ट अफ ३ मा हुने र सेमीफाइनको खेल बेष्ट अफ ५ मा हुने उनले बताए ।
प्रतियोगितामा थाहा-२,स्थित मङ्गलेश्वर युवा, हेटौडा-११,स्थित छहारी युवा क्लब,मनहरी गाउँपालिका, हेटौंडा-९,स्थित पशुपति युवा क्लब, बागमती गाउँपालिका थाहा-६,स्थित नव प्रतिभा सांस्कृतिक युवा क्लब बज्रबाराही, हेटौँडा-१५,स्थित सफल केयर क्लब, हेटौंडा-३,स्थित मिलन युवा क्लब र थाहा-२,स्थित मङ्गलेश्वर युवा क्लबको सहभागिता रहेको छ ।
प्रतियोगिताको उपाधि विजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।
सेमीफाइनलमा पराजित हुने दुई टिमले १५/१५ हजार रुपैयाँसहित मेडल तथा प्रमाणपत्र प्राप्त गर्नेछन् ।
यस्तै, प्रतियोगितामा ७ वटा विधाका खेलाडीहरुलाई नगदसहित मेडल तथा प्रमाणपत्र प्रदान गरिने छ ।
प्रतियोगिताको सर्वोत्कृष्ट खेलाडीलाई ५ हजार रुपैयाँ प्रदान गरिने छ भने अन्य उत्कृष्ट लिब्रो, उत्कृष्ट स्पाइकर, उत्कृष्ट ब्लकर, उत्कृष्ट सर्भर, उत्कृष्ट प्रशिक्षक र उद्यान खेलाडीलाई २/२ हजार रुपैयाँको नगद पुरस्कार प्रदान गरिने छ ।
राष्ट्रिय महिला भलिबल प्रतियोगिता भने चैत ४ गतेबाट सुरु हुनेछ ।
मकवानपुर । नवसर्जक साहित्य चौतारी नेपालकी बागमती प्रदेश सदस्य सुमि थिङकाे मुक्तक सङ्ग्रह ‘जीवनको गोरेटो’ को विमोचन गरिएको छ ।
शनिबार चौतारीको ४२ ओैँ शृङ्खलाकाे अवसरमा थिङको कृति विमोचन एवम् विमर्श हेटौंडामा गरिएको हो । हेटौंडा १ स्थित अमर माविमा कक्षा ९ मा अध्ययनरत सुमिले पहिलाे कृति मुक्तक सङ्ग्रह प्रकाशन गरेकी हुन् ।कृतिमाथि साहित्यकार सानु खनाल तथा विविशा रुम्बाले समीक्षात्मक टिप्पणी गरेका थिए । यस्तै नवसर्जक राेज कार्की, नम्रता पराजुलीले कृतिमा समेटिएका मध्ये प्रतिनिधि रचना वाचन गरेका थिए ।
नवसर्जक साहित्य चौतारी नेपालका सल्लाहकार डीबी बर्ताैलाकाे सम्पादन रहेको मुक्तक सङ्ग्रह नवसर्जक साहित्य चाैतारी नेपाल केन्द्रीय समितिले प्रकाशन गरेकाे हाे । कार्यक्रममा अग्रज साहित्यकारहरू डा. निमेष निखिल, देवराज खरेल, अमर माविकी प्रअ मालती उप्रेती, चाैतारीका संरक्षक एवम् परिकल्पनाकार दीपक गाैतम, मुक्तक मञ्च मकवानपुरका अध्यक्ष सागर तिमल्सिना लगायतले बधाई तथा शुभकामना दिएका थिए ।
नवसर्जक चाैतारीले देशभरका २५ वर्षमुनिका नवसर्जककाे नेतृत्वमा पठन तथा लेखन संस्कृतिकाे विकास गर्दै आएकाे छ । नवसर्जकका कृति प्रकाशन गर्दै आएकाे चौतारीले आगामी दिनमा यसलाई निरन्तरता दिइने संस्थाकी महासचिव स्वस्तिका दाहालले जानकारी दिइन् ।
चौतारीकी उपमहासचिव रचना भण्डारीकाे सहजीकरण गरेको कार्यक्रम चौतारीकी केन्द्रीय महासचिव स्वस्तिका दाहालकाे अध्यक्षता एवम् हेटौंडा उपमहानगरपालिका वडा नं. १ का वडाध्यक्ष सविन न्यौपानेकाे प्रमुख आतिथ्यमा भएको थियो ।
मकवानपुर । मकवानपुरकाे हेटौंडामा शुक्रबारबाट सञ्चालन भएकाे बृहत खेलकुद, कृषि तथा पर्यटन महोत्सव अन्तर्गत पहिलो दिन आज जिल्लास्तरीय महिला तथा पुरुष १० किलोमिटर खुला दौड प्रतियोगिता भएको छ ।
हेटौंडामा भएकाे १० किलोमिटर दौड प्रतियोगितामा पुरुषतर्फ राक्सिराङ १ का सुवास हेमजन प्रथम भएका छन् भने महिलातर्फ हेटौंडा १३ की साधना लोप्चन प्रथम भइन् । हेमजनले अन्य २२ प्रतिस्पर्धीलाई उछिन्दै प्रथम स्थान हाँसिल गरेका हुन् । दौडमा मनहरी ८ का सन्दिप विक द्वितीय र बकैया ८ का राजकुमार गोले तृतीय भए ।
यस्तै महिलातर्फ लोप्चनले अन्य ६ प्रतिस्पर्धीलाई पछि पार्दै दौडको उपाधि जितेकी हुन् । महिलातर्फ हेटौंडा १३ कै अमृता मोक्तान द्वितीय, हेटौंडा ४ की सुविना गोले तृतीय र राक्सिराङ १ की निलिमा थिङ सान्त्वना भइन् । दुवैतर्फको प्रथम, द्वितीय, तृतीय र सान्त्वना हुनेलाई क्रमशः २० हजार, १० हजार, ५ हजार र एकहजार रुपैयाँसहित ट्रफी, मेडल र प्रमाणपत्रको व्यवस्था गरिएको आयोजकले जानकारी दिएको छ ।
मकवानपुर जिल्ला खेलकुद विकास समितिको आयोजनामा खेलकुद महोत्सव सुरु भएको हो । महोत्सव अन्तर्गत विभिन्न ६ वटा विधामा खेलकुद प्रतियोगिता हुनेछ । दौडमा इच्छा भएका खेलाडीहरुको पहिचानसहित खेल क्षेत्रको विकासका निम्ति जिल्लास्तरीय महिला तथा पुरुष दौडको आयोजना गरिएको खेलकुद विकास समिति मकवानपुरका अध्यक्ष राजकुमार मोक्तानले जानकारी दिए ।
शुक्रबारबाट नै जिल्लास्तरीय डबल्स ब्याड्मिन्टन प्रतियोगिता समेत सुरु भएको छ । हेटौंडा ११ थानाभर्याङस्थित कभर्ड हलमा मकवानपुर उद्योग वाणिज्य संघका पूर्व अध्यक्ष अरुणराज सुमार्गीले ब्याड्मिन्टन प्रतियोगिताको उद्घाटन गरे । ब्याड्मिन्टन प्रतियोगिताको विजेताले २० हजार, उपविजेताले १० हजार तथा सान्त्वनाले ५÷५ हजार रुपैयाँसहित ट्रफी, मेडल र प्रमाणपत्र प्राप्त गर्ने आयोजक मकवानपुर खेलकुद विकास समितिका सदस्य मदन उप्रेतीले जानकारी दिए ।
खेलकुद महोत्सवकाे आज बागमती प्रदेशका मुख्यमन्त्री इन्द्र बहादुर बानियाले उद्घाटन गरेका छन् । उद्घाटन कार्यक्रममा बानियाँले गौरीटार रङ्गशालामा आगामी एक महिनाभित्र बागमती प्रदेशस्तरीय खेल महोत्सव आयोजन गर्न लागिएको जानकारी दिए । खेलाडीहरू समाज र राष्ट्रका पहिचान भएकाले अन्तरराष्ट्रियस्तरका खेलाडी उत्पादनका लागि प्रदेश सरकारले सङ्घीय सरकार र स्थानीय सरकारसँग समन्वय, सहकार्य गरेर अघि बढ्ने प्रतिबद्धता व्यक्त गरे
खेलकुद क्षेत्रको विकास प्रदेश सरकारको प्राथमिकतामा रहेको बताउँदै उनले भने ’कृषि, पर्यटन क्षेत्रको विकास गरी प्रदेशका जनताको आयस्रोत वृद्धि गर्ने विषयमा प्रदेश सरकार गम्भीर छ । प्रदेशभित्र रहेका पर्यटकीय क्षेत्रहरूको संरक्षण, संवर्द्धन गरी पर्यटक क्षेत्रको विकास गर्न प्रदेश सरकारले काम अघि बढाएको छ।’
कार्यक्रममा जिल्ला समन्वय समिति मकवानपुरका प्रमुख ललितबहादुर घलान, मकवानपुरका प्रमुख जिल्ला अधिकारी वसन्त अधिकारी, मकवानपुर उद्योग बाणिज्य सङ्घका अध्यक्ष प्रमोदराज रानाभाट, नेपाल पत्रकार महासंघ मकवानपुर अध्यक्ष बालकृष्ण अधिकारीलगायत उपस्थित थिए ।
मकवानपुर । मकवानपुरको हेटौंडा १९ नेवारपानीमा कन्टेनर र ट्रक ठोकिदा १ जनाको मृत्यु भएको छ ।
शुक्रबार बिहान ६ बजेको समयमा हेटौडा १९ नेवारपानी स्थित पुर्व पश्चिम सडकखण्डमा हेटौडाबाट चितवनतर्फ जादै गरेको ना ४ ख ९९२३ नम्बरको कन्टेनर (टेलर) गाडी र चितवनबाट बिरंगंजतर्फ जान आउदै गरेको बा.प्र. ०३-००१ ख ०३९८ नम्बरको ट्रक एकआपसमा ठोकिएको जिल्ला प्रहरी कार्यालय मकवानपुरले जनाएको छ ।
उक्त दुर्घटनामा मृत्यु हुनेमा कन्टेनर चालक सर्लाही बरहथवा १५ पिपराभिट्टा घर भई हाल पर्सा बिरंगज २ छपकैया बस्ने ३८ वर्षीय गोबिन्द चौधरी रहेका छन् । घाईते भएका चौधरीको सीएमसी चुरेहिल अस्पताल ल्याइएकोमा डाक्टरले उपचारको क्रममा मृत घोषणा गरेको प्रहरीले जनाएको छ ।
ट्रक चालक चितवन खैरेनी ९ बस्ने ४२ वर्षीय धनेश्वर चौधरी सकुशल रहेकोमा प्रहरीले उनलाई नियन्त्रणमा लिएको छ ।