मकवानपुर । सरकारले विद्यालय शिक्षा विधेयक २०८० संसदमा दर्ता गरेपछि विधेयकमा समेटिएका प्रावधानमा असन्तुष्टी जनाउँदै आन्दोलनरत शिक्षकसँग वार्ता सुरु भएकाे छ । शिक्षा विधेयक विरुद्ध बुधबारबाट राजधानी केन्द्रित आन्दाेलन गरेका शिक्षक संघ संघटनका प्रतिनिधिसँग सरकारले बिहीबार साँझ गृह मन्त्रालयमा वार्ता सुरु गरेकाे हाे ।
वार्तामा सरकारका तर्फबाट उपप्रधानमन्त्री तथा गृहमन्त्री नारायणकाजी श्रेष्ठ, शिक्षा, विज्ञान तथा प्रविधिमन्त्री अशोक राई, अर्थमन्त्री डा. प्रकाशशरण महत र कानुन, न्याय तथा संसदीय मामिलामन्त्री धनराज गुरुङ तथा मन्त्रालयका सचिवहरु र शिक्षकहरुको तर्फबाट शिक्षक महासंघका पदाधिकारीहरु रहेकाे बताइएकाे छ ।
शिक्षकको सरुवा, बढुवा र कारबाहीको व्यवस्था स्थानीय तहलाई दिन नहुने, निजामती कर्मचारी सरहकाे सेवा सुविधा हुनु पर्ने, शिक्षकलाई ट्रेड युनियन अधिकार दिनुपर्ने, विद्यालयका कर्मचारीकाे तलब बढाउनु राहतलाई दरबन्दीमा समावेश गरिनु पर्ने लगायतका १७ बुँदे माग राखेर शिक्षक महासंघले बुधबारदेखि काठमाडौं केन्द्रित आन्दोलन गरिरहेको छ ।
उनीहरुले शिक्षासँग सम्बन्धित काननून बनाउँदा शिक्षा क्षेत्रका विज्ञ तथा शिक्षक महासंघसँग छलफल नै नगरी एकलौटी रुपमा विधेयक ल्याएकाे प्रति समेत असतुष्टी रहेकाेले आफूहरुको माग शिक्षा मन्त्रालयले मात्र पूरा गर्न नसक्ने भन्दै अर्थ, शिक्षा र कानुन मन्त्रीको उपस्थितिमा मात्र वार्ता गर्ने अडान गर्दै आएका थिए ।
यसैबीच नेकपा एमालेका सचेतक महेश वर्तौला सहित संसदको शिक्षा समितीमा एमालेका तर्फका सदस्यहरुले विहीबारनै शिक्षा, विज्ञान तथा प्रविधि मन्त्री अशोक कुमार राईलाई आन्दोलनरत शिक्षकहरु सँग तत्काल वार्ता गरेर समाधानकाे लागि आग्रह गरेका थिए ।
शिक्षा मन्त्रीसँगकाे भेटमा बन्द भएका विद्यालयहरु खुलाउने वातावरण बनाउनकासाथै शिक्षकहरुले गरिरहेको शान्तीपुर्ण आन्दोलन माथि प्रहरीद्वार भईरहेको धरपकड, अवरोध र हस्तक्षप प्रति एमालेको तर्फबाट चिन्ता व्यक्त गर्दै त्यस्तो व्यवहार नगर्न समेत सरकारको ध्यानाकर्षण गराएको थियाे ।
छलफलका क्रममा एमाले सचेतक वर्तौलाले शिक्षण पेशा सम्मानीत र मर्यादित पेशा भएकोले शिक्षक महासंघले उठाएका माग पुरा गर्न सरकार गम्भीर हुनुपर्ने बताएका थिए । शिक्षा मन्त्री राईले समितिका सदस्यले राखेका सुझाबलाई सम्बाेधन हुने गरी अविलम्व विद्यालय खोल्ने वातावरण बनाउने बताएका थिए ।
मकवानपुर । मकवानपुरको हेटौंडा उपमहानगरपालिकामा शुक्रबारबाट डिलक्स शैलुन तथा पार्लर सञ्चालनमा आउने भएकाे छ ।
हेटौडा –४ अजरअमररोड स्थित नबिल बैक भएकाे घरमा सुबिधा सम्पन्न डिलक्स युनिसेक्स शैलुन तथा पार्लरले सेवा दिने भएकाे हाे । उक्त पार्लर शुक्रबारबाट सञ्चालनमा आउने विहीबार पत्रकार भेटघाट गर्दै जानकारी दिइएकाे हाे ।
डिलक्स शैलुन तथा पार्लरका सञ्चालकद्वय हरि चौलागाईं र सुभद्रा हुमागाईंले पत्रकार भेटघाटमा पार्लर सञ्चालनकाे जानकारी दिनुहुदै एकै स्थानमा कपाल, दारी काट्ने, कपाल कलर गर्ने, ब्युटी पार्लललगायतका सेवा उपलब्ध हुने बताएका छन् । पार्लरमा प्रयोग गरिने कैँची लगायतको सामग्रीलाई इलेक्ट्रोनिक मेसिनमा राखेर निर्मुलिकरण गरेर मात्रै अर्को व्यक्तिलाई प्रयोग गरिन्छ ।
नेपालमै फरक किसिमको नमुना शैलुन तथा पार्लर सञ्चालनमा ल्याइएकाे चौलागाईले बताए । झण्डै ६० लाख रुपैयाँ लगानीमा सञ्चालन गर्न लागिएकाे पार्लरमा १२ जनाले प्रत्यक्ष रोजगारी पाउने अर्का सञ्चालक हुमागाईंले जानकारी दिइन । शैलुनमा एकपटक ८ जनाले सेवा प्राप्त गर्न सकिने बताइएकाे छ । त्यसैगरी ब्युटीपार्ललमा एकै पटक ३ जनालाई सेवा दिन सकिने सिनियर हेयर स्टाइलिस राजेश ठाकुरले बताए ।

पार्लरमा युरेपीयन मुल स्पेन तथा फ्रान्सका सामानहरु प्रयोग गरेर फरक तरिकाले कपाल काट्ने, दारी काट्ने, कपालमा कलर गरिने ठाकुरले जानकारी दिए । कपाल काट्ने क्षेत्रमा २० वर्षदेखि काम गर्दै आएका ठाकुरको नेतृत्वमा अन्यले सेवा प्रदान गर्नेछन् ।
‘व्युटीपार्लरमा भारतको नयाँ दिल्लीबाट आएकी बन्दना सिंहले व्युटीसियनको काम गर्ने छन्’ सञ्चालक हुमागाईले भनिन् ‘एड्भान्स मेसिनको प्रयोग गरेर छालाको गुणस्तर र सुन्दरतामा ध्यान दिइने छ ।’ शैलुन तथा पार्लरले सेवाग्राहीहरुलाई फरक र गुणस्तरीय सेवा दिने व्यवसायकाे रुपमा स्थानीयस्तरमा सञ्चालनमा ल्याइएकाे सञ्चालकद्वयले बताएका छन् ।
मकवानपुर । बागमती प्रदेशकाे राजधानी हेटौंडामा संबिधान दिवस मनाइएको छ । संबिधान दिवस मुल समारोह समिति, बागमती प्रदेशको आयोजनामा संविधान दिवस असाेज ३ गते मनाइएको हो ।
मुख्यमन्त्री तथा मन्त्रिपरिषद्काे कार्यालयमा भएकाे संविधान दिवसकाे मुल समारोहमा बागमती प्रदेश प्रमुख यादवचन्द्र शर्माले जनताद्वारा निर्वाचित प्रतिनिधीहरूले संविधान निर्माण भएकाे यसमा समावेश गरिएकाे विशेषताको वर्णन गरिरहनु नपर्ने बताए । शर्माले संविधानका मर्म र भावनाहरुको पालना गर्न प्रतिबद्धता व्यक्त गर्नु नै हामी सबै नेपालीकाेको मूल दायित्व भएकाे बताए । संविधानप्रतिको ओठेभक्ति र संघीयताप्रतिको विष वमन विरोधाभाषपूर्ण विषय हुन् भन्दै उनले अन्तरवेदनाको असह्य पीडामा उत्सर्जित उच्छवास जनताको आँखाबाट बलिन्द्र धारा आँसु बनेर बहन्छ । ति आँसु पुछिदिने, अन्तरनादलाई मत्थर पार्न राहत दिने र आश्वस्त पार्ने शासकीय प्रणाली सुशासन हो ।’
‘यस्तै सुशासनकाे संविधानले परिकल्पना गरेको छ’ उनले भने ‘सबैले संविधानको पालना, रक्षा र कार्यान्वयनमा अटल एवम् अविचल रहने दिनको रूपमा अङ्गीकार गर्न सके लोकतान्त्रिक आन्दोलनप्रति सम्मान र वीर शहीदहरुप्रति श्रद्घाञ्जली हुनेछ ।’ संविधानले समाजवादको सुखद् परिकल्पना गरेको उनले बताए ।
‘संविधानले न्याय, समानता र जनजीविकाको हक स्थापित भएको छ’ उनले भने ‘लोकतान्त्रिक गणतन्त्रात्मक प्रणाली निर्देशित शासन व्यवस्थामार्फत दिगो शान्ति, सुशासन र विकासको मार्गचित्र काेर्न सक्नु पर्छ ।’ शर्माले भने ‘यही संविधानले जातीय, भाषिक, धार्मिक, सांस्कृतिक एवम् भौगोलिक विविधतायुक्त नेपाली समाजलाई बृहद् राष्ट्रिय एकताको सुत्रमा हजारौं फूलहरुको एउटै मालाको रुपमा गुथेर राखेको छ ।’ संघीयता, गणतन्त्र तथा धर्मनिरपेक्षता यो संविधानले उपलब्ध गराएका नेपाली जनताका नीधि हुन् र भावी पुस्ताका धरोहर भएकाे उनले बताए ।
यसैगरी मुल समारोहकाे अध्यक्ष रहेका बागमती प्रदेशका मुख्यमन्त्री शालिकराम जम्मकट्टेलले संविधानमा व्यवस्था भए अनुसारकाे प्रदेशले पाउनुपर्ने सबै अधिकारी प्राप्त हुनु पर्ने बताएका छन् । ‘संविधानलाई कार्यान्वयन गरेर मात्र समृद्धी र समाजवाद आउने छ’ उनले भने ‘नेपालको संघियतामा आफ्नै बिशेषता रहेको छ ।’
संविधान दिवस २०८० को अवसरमा बागमती प्रदेश सरकारद्वारा प्रभातफेरी गरिएको छ । प्रदेशका मुख्यमन्त्री शालिकराम जम्कट्टेलसहितको उपस्थितमा हेटौँडाको बुद्ध चोकबाट प्रभातफेरी गरिएकाे हाे । बुद्ध चोकबाट सुरु भएको प्रभातफेरी पिपल बोट, चौकिटोल ओरालो, मानसचोक हुँदै मुख्यमन्त्री तथा मन्त्रीपरिषद् कार्यालय पुगेर औपचारिक समाराेह गरिएकाे थियाे । प्रभातफेरीमा प्रदेशका मन्त्री तथा सचिव, कर्मचारी विभिन्न सङ्घ संस्था लगायतको उपस्थिति रहेको थियो ।
प्रभातफेरीमा सुरक्षा निकायले व्याण्डबाज प्रस्तुत गरेका थिए भने सामाजिक सङ्घ संस्थाले पञ्चेबाजा संस्कृतिका झाकीहरु प्रस्तुत गरेका थिए ।
बागमती प्रदेश सरकारले भदाै २ गतेदेखि ३ दिन संविधान दिवस मनाउने निर्णय गरेकाे थियाे । साेही अनुसार संविधान दिवस २०८० लाई भब्य रुपमा मनाउन सोमबार देखिनै विभिन्न कार्यक्रमहरु गरेकाे छ । जिल्ला वन कार्यलय मकवानपुरद्वारा असाेज २ गते हेटौडा ६ मा वृक्षारोपण गरेर गाँउ शहर हराभरा बनाउने अभियान सुरु गरेकाे थियाे ।
यस्तै संविधान दिवसका अवसरमा सोमबार बिहानै हेटौडामा खुल्ला ५ किमी दौड प्रतियोगीता सम्पन्न भएको छ । खेलको उदघाटन गर्दै मुख्यमन्त्री जम्कट्टेलले स्वास्थ्यका लागि खेलकुद महत्वपुर्ण रहेको बताए ।
हेटौंडामा मंगलबार ३८ जनाले रक्तदान गरेका छन् । संविधान दिवसको अवसरमा प्रदेशको स्वास्थ्य मन्त्रालयले रक्तदान कार्यक्रम गरेकामा ३८ जनाले रक्तदान गरेकाे रक्तसंचार केन्द्र हेटौंडाका प्राविधिक किशोर सापकोटाले जानकारी दिए। बुधबार हेटौंडा–९ र १ नम्बर वडामा रक्तदान कार्यक्रम हुने भएकाे उनले बताए ।
संविधान दिवस २०८० मा प्रदेश प्रमुखको मन्तव्य
- हामी सबैको मानसपटलमा ताजै छ–नेपाली जनताको लामो संघर्षको पृष्ठभूमिमा अदम्य साहस, अविस्मरणीय बलिदान र अकल्पनीय त्यागको राप र तापमा संविधानसभा निर्वाचनको आधारभूमि तयार भएको हो । त्यही संविधानसभाबाट जनताद्वारा निर्वाचित प्रतिनिधीहरूले विद्यमान संविधान निर्माण गरेका हुन् । यसरी निर्मित संविधान जारी भएको आजको ऐतिहासिक दिन, अर्था्त असोज ३ गतेलाई हामी हर्षोल्लासपूर्ण वातावरणमा संविधान दिवस मनाई रहेका छौं ।
- सर्वप्रथम नेपालीहरूको त्याग र बलिदानको अमरगाथा बोकेको यो गौरवपूर्ण दिनको सुखद् अवसरमा समस्त देशबासी दाजु–भाई, दिदिबहिनीहरुमा हार्दिक बधाई तथा शुभकामना व्यक्त गर्न चाहन्छु । र साथै, अविस्मरणीय योद्घाहरुका स्वर्णिम सपनाको भावभूमिमा उठेका आन्दोलनहरुमा आफ्नो अमूल्य जीवन उत्सर्ग गर्नुहुने सम्पूर्ण वीर शहीदहरूप्रति अन्तरहृदयको गहिराइबाट उच्च सम्मान प्रकट गर्दै भावपूर्ण श्रद्धाञ्जली अर्पण गर्दछु ।
- हाम्रा सामु संविधान नै भएपछि यसमा सन्निहित विशेषताको वर्णन गरिरहनु सान्दर्भिक नहोला । यसर्थ, संविधानका मर्म र भावनाहरुको पालना गर्न प्रतिबद्धता व्यक्त गर्नु नै हामी सबैको मूल दायित्व हो । संविधानप्रतिको ओठेभक्ति र संघीयताप्रतिको विष वमन विरोधाभाषपूर्ण विषय हुन् । अन्तरवेदनाको असह्य पीडामा उत्सर्जित उच्छवास जनताको आँखाबाट बलिन्द्र धारा आँसु बनेर बहन्छ । ति आँसु पुछिदिने, अन्तरनादलाई मत्थर पार्न राहत दिने र आश्वस्त पार्ने शासकीय प्रणाली सुशासन हो । यस्तो सुशासनमा करप्सनको कोरले विभत्स अनुहारलाई करेन्सीको कस्मेटिक सर्जरीद्वारा दिइएको आकर्षणप्रति विकर्षणको तीब्र वेग हुनुपर्छ । हाम्रो संविधानले परिकल्पना गरेको यस्तै सुशासन हो । आजको दिन हामी सबैले संविधानको पालना, रक्षा र कार्यान्वयनमा अटल एवम् अविचल रहने दिनको रूपमा अङ्गीकार गर्नसके लोकतान्त्रिक आन्दोलनप्रति सम्मान र वीर शहीदहरुप्रति श्रद्घाञ्जली हुनेछ । हाम्रो संविधानले समाजवादको सुखद् परिकल्पना गरेको छ र यसबाट समृद्ध नेपाल निर्माण गर्दै सुखी नेपालीको हसिलो मुहार हेर्ने अपेक्षा गरेको छ ।
- यो संविधानले न्याय, समानता र जनजीविकाको हक स्थापित भएको छ र लोकतान्त्रिक गणतन्त्रात्मक प्रणाली निर्देशित शासन व्यवस्थामार्फत दिगो शान्ति, सुशासन र विकासको मार्गचित्र कोरेको छ । यही संविधानले केन्द्रीकृत एकात्मक राज्य व्यवस्थाले सिर्जना गरेका सबै प्रकारका विभेद र उत्पीडनको अन्त्य गरिदिएको छ । जातीय, भाषिक, धार्मिक, सांस्कृतिक एवम् भौगोलिक विविधतायुक्तनेपाली समाजलाई बृहद् राष्ट्रिय एकताको सुत्रमा हजारौं फूलहरुको एउटै मालाको रुपमा गुथेर राखेको छ । यस सन्दर्भमा संघीयता, गणतन्त्र तथा धर्मनिरपेक्षता यो संविधानले उपलब्ध गराएका नेपाली जनताका नीधि हुन् र भावी पुस्ताका धरोहर पनि
- यो संविधानको लचकताको प्राङ्गणमा उभिएर यसैमाथि प्रहार हुने जमर्को हुन लागेको आभाष हुन थालेको छ । हाम्रो समाजका बोधविक्रम अधिकारीको दन्त्य कथाका पाठकहरु स्मसानको नलिहाडलाई तान्त्रिक विधिद्धारा प्राण प्रतिष्ठा गर्ने कसरतमा लागेका छन् भन्ने झिनो स्वरमा चर्चा सुनिन थालेका छन् । तर हाम्रो समाज र हामी नेपाली विधिले व्यवस्थित गरेको सिद्धान्त र विचारको जगमा उभिएर सहभागितामूलक विकासका लागि उपलब्ध श्रोत साधनहरुको समुचित उपयोग गर्दैै वान्छित उदेश्य प्राप्तिका लागि अनवरण प्रयत्नरत छौ । न्याय र समानताको आधारमा प्राप्त उपलब्धिको संरक्षण–प्रर्वद्घन गर्दै थप उपलब्धिका लागि कृयाशील रहने र ती उपलव्धीहरुको न्यायोचित वितरण गर्दै समतामुलक समाजको आधारमा शोषणरहित समाजको निर्माण गर्ने, राष्ट्रिय अर्थतन्त्रलाई स्वतन्त्र, आत्मनिर्भर एवम् समुन्नत पार्दै समाजवादतर्फ लक्षित गर्ने उद्देश्य यो संविधानले निर्देशक शिद्धान्तको रुपमा अङ्गीकार गरेको छ ।
- त्यसैगरी सहिष्णुतामा आधारित सामाजिक, सांस्कृतिक मूल्यहरुको विकास गर्ने तथा सांस्कृतिक विविधताको सम्मान गर्दै सामाजिक सद्भाव, ऐक्यबद्धता र सामञ्जस्य कायम गरी राष्ट्रिय एकता सुदृढ गर्ने राज्यको सामाजिक र सांस्कृतिक उद्देश्य रहने विषयलाई समेत संविधानमा समेटिएको छ ।
- सविधानको उद्देश्य अनुरुप यस प्रदेशभित्र रहेका स्रोत र साधनहरुको अधिकतम् उपयोग गरी जनताको जीवनस्तरमा परिवर्तनको अनुभुती हुने काम गर्न प्रदेश सरकार सक्षम हुनेछ भन्ने मैले विश्वास लिएको छु ।
- यस मन्तव्यको अन्त्यमा, संविधानले परिकल्पना गरेको विकास र समृद्धिको शिखरमा पुग्ने अभियानमा निरन्तर अघि बढ्न यो दिवसले हामी सबैलाई प्रेरित गरोस् भन्ने कामना गर्दै पुनः एकपटक संविधान दिवस २०८० को उपलक्ष्यमा सबैमा हार्दिक शुभकामना व्यक्त गर्दछु ।
- धन्यवाद ।
मिति २०८० आश्विन ३ गते बुधवार
मकवानपुर । मकवानपुरको भीमफेदी गाउँपालिकास्थित भीमफेदी कारागारका १४ जना कैदी थुनामुक्त भएका छन् । बुधबार संविधान दिवसको अवसरमा सरकारले कैद मिनाह गर्दा भीमफेदी कारागारका १४ जना कैदी थुनामुक्त भएको कारागार प्रशासनले जनाएकाे छ ।
भीमफेदी कारागारमा कैदी जीवन बिताइरहेका तथा मंगलबारसम्ममा तोकिएको कैदको ५० र ४० प्रतिशत भुक्तान गरेका, असल आचरण भएका १४ जना कैदी थुनामुक्त भएका हुन् । थुनामुक्त हुनेमा मकवानपुरका ६ जना, ७ जना अन्य जिल्लाका र १ जना भारतका रहेका प्रशासक तिर्थराज पौडेलले जानकारी दिए ।
देशभरका ६ सय ७० जनाको कैद मिनाहा हुँदा भीमफेदी कारागारमा कैद भुक्तान गरिरहेका मकवानपुरका ६ सहित १४ जनाकाे कैद मिनाहा भएकाे हाे । ठगी मुद्दामा कारागारमा रहेका हेटौंडा–११ का पुर्णभक्त लामा, डाँका मुद्दाका मकवानपुरगढी– ८ का प्रेम बहादुर स्याङ्तान, चोरी मुद्दाका इन्द्रसरोवर गाउँपालिका–३ का अष्ट वाईबा, हेटौंडा–११ का राजकुमार तामाङ, राक्सिराङ गाउँपालिका–८ का कृष्णलाल थिङ र इन्द्रसरोवर गाउँपालिका–३ का बुद्धिमान सिंह भोलन रहेकाे कैदा मिनाहा भएकाे छ ।
यस्तै कर्तव्य ज्यान मुद्दामा सजाय पाइ कारागारमा रहेका तनहुँको भानु नगरपालिका–६ का सुक बहादुर नेपाली, खुन–डाँका मुद्दाका नवलपरासीको रामग्राम नगरपालिका–१६ का बृजनन्दन राजभर, कर्तव्य ज्यान मुद्दाका धनुषाको नगराइन नगरपालिका–८ का ललन पासवान र लमजुङको राइनास नगरपालिका–८ का प्रकाश नेपालीकाे पनि कैदा मिनाह भएकाे पौडेलले जानकारी दिए ।
यस्तै कैदा माफी मिनाह हुनेमा कर्तव्य ज्यान मुद्दामा कारागारमा रहेका सिन्धुपाल्चोकको हेलम्बु गाउँपालिका–३ का बसन्त खड्का, नकवजनी चोरी मुद्दामा सजाय काटिरहेका नवलपरासीको देवचुली नगरपालिका–१५ का अर्जुन थापा मगर, चोरी मुद्दामा सजाय काटिरहेका काठमाडौंको चन्द्रगिरी नगरपालिका–७ का संजित बहादुर बाग्दास र चोरी मुद्दामा सजाय काटिरहेका भारतका जाफिर खान रहेकाे पौडेलले बताए ।
मकवानपुर। नेकपा एमालेका सचेतक महेश बर्तौलाले शिक्षक महासंघको उठाएका माग विधेयकमा नै समावेश गरी सम्बाेधन गरिनु पर्ने बताएका छन् । शिक्षकहरूको आन्दोलनप्रति समर्थन र ऐक्यबद्धता जनाउँदै सांसद बर्तौलाले विधेयक भित्र बसेर उपयुक्त कानून निर्माणको प्रक्रियामा आफू सक्रिय सहभागी हुने बताए ।
’नेपाल शिक्षक महासंघले उठाएका मागहरूलाई विधेयकको अंग बनाएर अगाडि बढ्न सरकार तयार हुनुपर्छ’ उनले भने ‘त्यसको लागी सरकारले आजै प्रतिबद्धता व्यक्त गर्नुपर्दछ ।’ बर्ताैलाले संविधानसँग जोडिएका कतिपय विषयवस्तुमा भने थप छलफल र बहसको आवश्यकता महशुस गरेको बताए।’
संसदमा दर्ता भएको विद्यालय शिक्षा विधेयक २०८० का सन्दर्भमा नेपाल शिक्षक महासंघले आन्दोलन मार्फत उठाएका अधिकांश मागहरू समग्र सार्वजनिक शिक्षाप्रति नागरिकको भरोसा, विश्वसनीयता र गुणस्तरीयता वृद्धि गर्न तथा शिक्षण पेशालाई मर्यादित र सम्मानित बनाउन उपयुक्त रहेको एमालेका सचेकत समेत रहेका बर्तौलाले बताएका छन् ।
बर्तौलाले सामाजिक संजाल मार्फत ऐक्यबद्धता जनाउँदै भनेका छन् ‘सरकारले शिक्षा ऐन मार्फत निजामती सेवामा जस्तै शिक्षक सेवामा पनि समान सेवा सुविधाको व्यवस्था गर्नु पर्छ, शिक्षकले पाउने उपचार खर्चलाई निरन्तरता दिनुपर्ने, शिक्षकलाई वर्षमा कम्तीमा एक पटक शैक्षिक अवलोकन भ्रमणको व्यवस्था हुनुपर्ने, योग्यता बढाउन शिक्षकहरूलाई अध्ययन बिदाको सुविधा हुनुपर्ने, शिक्षकहरूलाई सरकारी मर्यादाक्रममा समावेश गरिनुपर्छ ।’
यस्तै, शिक्षकहरूको लागि अलग्गै शिक्षक अस्पतालको स्थापना हुनुपर्ने, शिक्षकको योग्यता आधारभूत र माध्यमिकका लागि क्रमशः स्नातक र स्नातकोत्तर तोक्ने हो भने आधारभूत तृतीय लाई अधिकृत र माध्यमिक तृतीयलाई उपसचिव समान सेवा सुविधा हुनुपर्ने, स्थायी शिक्षकलाई नियमित रूपमा तह/श्रेणी बढुवाको सुनिश्चितता गरिनुपर्ने, आन्तरिक प्रतियोगिताद्वारा हुने बढुवाको लागि प्रत्येक तह र श्रेणीमा ५ वर्षे सेवा अवधि तोक्नु पर्ने, विद्यालयमा कार्यरत अस्थायी प्रकृतिका सम्पूर्ण शिक्षक तथा कर्मचारीहरूलाई कम्तीमा १ पटकको लागि खुल्ला तथा आन्तरिक प्रतिस्पर्धाका माध्यमबाट स्थायी हुने अवसर प्रदान गर्नुपर्ने उल्लेख गरेका छन् ।
यसैगरी उपदानको व्यवस्था हुनुपर्ने लगायतका नेपाल शिक्षक महासंघको मागहरू उपयुक्त, जायज र न्याय संगत रहेको बताएका छन्। यी मागहरूले शिक्षकहरूको मात्रै हितमात्रै नगरेर समग्र सार्वजनिक शिक्षा कै उज्यालो भविष्यका लागि नयाँ आयाम निर्माण गर्ने बर्तौलाको उल्लेख गरेका छन् ।
