मकवानपुर । मकवानपुरकाे मनहरी गाउँपालिकाले आंशिक अपाङ्गता भएका १ सय ३४ जनालाई परिचयपत्र र निर्बाह भत्ता रकम उपलब्ध गराएको छ ।
३२ औ अन्तर्राष्ट्रिय अपाङ्गता दिवसको अबसरमा मनहरी गाउँपालिकामा आयोजित कार्यक्रममा १ सय ३४ जना ग बर्ग (पहेँलो कार्ड ) का अपाङ्गता भएका ब्यक्तिलाई रकम प्रदान गरिएको हो । उनीहरुलाई प्रतिब्यक्ति ५ हजार ४ सय रुपियाँसहित ग बर्गको अपांगता परिचयपत्र गाउँपालिका अध्यक्ष रन्जन कालाखेतीले वितरण गरेका हुन् ।
राज्यले पूर्ण अपाङ्गता (क र ख वर्ग) भएका व्यक्तीलाई भत्ता वितरण गर्दै आएको तर आंशिक अपाङ्गता भएका व्यक्तीहरु कहिल्यै नसमेटिएकाेले स्थानीय सरकारले जिम्मेवारी वहन गरेकाे कालाखेतीले बताए । ‘उहाँहरुको पीडा पूर्ण अपाङ्गता भएकाहरुकाे तुलनामा कम भएपनि पीडा फरक छैन’ कालाखेतीले भने ‘त्यसैले उहाँहरुलाई पनि केहि निर्वाह होस् भन्ने अभिप्रायले गाउँपालिकाले भत्ता वितरण गरेकाे हाे ।’ अपाङ्गता भएका ब्यक्तिको सहज जीवन यापनका लागि गाउँपालिकाले आगामी दिनमा अझै बजेट बृद्धि गरी भत्ता उपलब्ध गराउने अध्यक्ष कालाखेतीले बताए ।
गाउँपालिकाबाट आंशिक अपाङ्गता भएका ब्यक्तिले पनि परिचय पत्र र भत्ता प्राप्त गरेकाेमा अपाङ्गता क्षेत्रमा क्रियाशील संघसंस्था र ब्यक्तिहरुमा खुसी छाएकाे अपाङ्ग स्वावलम्बन जीवन पद्धति केन्द्र मनहरीका अध्यक्ष दिलबहादुर स्याङ्बो बताए ।
मनहरी गाउँपालिका सामाजिक विकास समितिका संयोजक अनन्त प्रकाश अर्यालको सभाध्यक्षतामा सम्पन्न कार्यक्रममा उपाध्यक्ष सीता पुलामी, प्रमुख प्रशासकीय अधिकृत रमेश सुवेदी, सामाजिक विकास शाखा प्रमुख ज्ञानेन्द्र ढकाल, महिला तथा बालबालिका विकास शाखा प्रमुख शिला अधिकारी, एमआईएस अपरेटर दीपक अधिकारी, अपाङ्ग स्वावलम्बन जीवन पद्धति केन्द्र मनहरीका अध्यक्ष स्याङ्बोलगायतको सहभागिता थियो ।
नेपाल सरकारको तर्फबाट क बर्गमा बर्गीकृत अपाङ्गता भएका व्यक्तिलाई मासिक ४ हजार रुपियाँ, ख बर्गमा बर्गीकृत अपाङ्गता भएका ब्यक्तिलाई मासिक २ हजार १ सय २८ रुपियाँ भत्ता उपलब्ध गराउँदै आएको छ ।

मकवानपुर । बागमती प्रदेशका प्रदेश प्रमुख यादव चन्द्र शर्माले सार्वजनिक निकायका संरचना तथा अन्य हरेक कार्यस्थल अपाङ्गमैत्री बनाइनुपर्नेमा जोड दिएका छन् ।
अपाङ्गता दिवसका अवसरमा आइतबार शुभकामना सन्देश जारी गर्दै प्रदेश प्रमुख शर्माले भनेका छन् ‘हरेक स्थानमा निर्माण गरिने भौतिक संरचनाहरु, सार्वजनिक यातायातका साधन,सडक,सेवा प्रवाह गरिने सार्वजनिक निकाय एवम् विभिन्न कार्यस्थललाई अपाङ्गमैत्री बनाइनुपर्दछ । ’
‘दिगो विकास लक्ष्य प्राप्तिका लागि प्रतिबद्धता स्अपाङ्गता भएका व्यक्तिको अपनत्व र नेतृत्वसहितको ऐक्यबद्घता’ भन्ने नारासहित नेपालमा आइतबार ३२ औं अन्तराष्ट्रिय अपाङ्गता दिवस मनाइँदैछ । प्रत्येक वर्ष डिसेम्बर ३ का दिन यो दिवस मनाउँदै आइएको सन्दर्भ उल्लेख गर्दै प्रमुख शर्माले फरक क्षमताका सम्पूर्ण देशबासीप्रति आफूले उठाउँदै आएका मुद्घाहरुमा सफलता प्राप्तिका लागि सफलता मिलोस् भन्ने शुभकामना दिएका हुन् ।
नेपालमा अपाङ्गता भएका व्यक्तिहरुलाई कानूनी रुपमा अधिकारसम्पन्न बनाइएको उल्लेख गर्दै उनीहरुको पूर्ण र समान सहभागिता सुनिश्चित गर्नुका साथै समाजको हरेक क्षेत्रमा र विकासमा समावेशिताका लागि विभिन्न अभियानहरु सञ्चालन पनि भइरहेको उनको भनाई छ । समाजले अपाङ्गता भएकाहरुको अवस्थालाई हेर्ने दृष्टिकोणलाई रुपान्तरण गर्दै विकासको मूल प्रवाहमा सहभागिता गराउने कार्यमा कन्ज्युस्याँई हुुनु नहुने प्रमुख शर्माको भनाई छ ।
उनीहरुको पक्षमा प्रभावकारी ढङ्गमा क्रियाशील हुनुनुपर्ने शर्माको सन्देशमा उल्लेख छ । ‘फरक क्षमता भएका व्यक्तिका लागि शिक्षा, स्वास्थ्य र रोजगारीजस्ता पक्षमा प्रभावकारी ढङ्गबाट क्रियाशील रहनु सबैको दायित्व हो ।’ शर्माले भनेका छन् ।
प्रदेश प्रमुख शर्माले अपाङ्गता भएका व्यक्ति, यस क्षेत्रमा क्रियाशील सरकारी तथा गैरसरकारी निकाय लगायत सबैलाई भिन्न क्षमता भएका नागरिकको पक्षमा सदैव क्रियाशील रहन यो दिवसले उर्जाकाे लागि शुभकामना दिएका छन् ।
मकवानपुर । यात्राकाे क्रममा रहेकी एक महिलाकाे आफै चढेको बसले किच्दा मृत्यु भएको छ ।
मकवानपुरको इन्द्रसरोबर गाउँपालिका वडा नम्बर–५ कुवामा एक जनाको बस्ने ७० बर्षीया कान्छी माया घलानका आफै चढेकाे बसले किच्दा ज्यान गरेकाे हाे ।
जिल्ला प्रहरी कार्यालय मकवापनुरका अनुसार चखेल मातातिर्थ सडकखण्डमा अन्तर्गत काठमाडौंबाट चखेलतर्फ आउदै गरेको बा २ ख ७२७२ नम्बरको बसमा कान्छीमाया यात्रा गरि आएकी थिइन् । इन्द्रसरोबरका कुवामा बसबाट ओर्लने क्रममा चालकले बस अगाडी बडाउँदा उनी लड्न पुगेकी थिइन् । सोही क्रममा बसको टायरले उनलाई ठक्कर किचेर गम्भीर घाइते बनाएको थियो ।
उनको उद्धार गरी ट्रमा सेन्टर काठमाडौं पठाईएको अवस्था गम्भीर भएपछि थप उपचारका लागि बि एण्ड बि अस्पताल काठमाडौं पठाईएको थियो । उनको उपचारको क्रममा डाक्टरले मृत घोषणा गरेको प्रहरीले जनाएको छ । बस चालक सोही बस्ने वर्ष २६ को राजकुमार दोङलाई प्रहरीले नियन्त्रणमा लिएको छ ।
शव फेला
यसैगरी हेटौंडा उपमहानगरपालिका वडा नम्बर–२ चौकीटोलस्थित खाद्य संस्थानको खुल्ला कोठाभित्र एक पुरुष मृत भेटिएका छन् । अन्दाजी ५४ बर्षीय पुरुषको सुतिरहेको स्थानमा मृत अवस्थामा भेटिएका हुन् । उनको पहिचान खुलेको छैन ।
बागमती प्रदेश प्रहरी कार्यालय हेटौंडा, सञ्चारशाखाका अनुसार घटनास्थलबाट शव हैटौंडा अस्पातलमा लगिएको छ । शव पहिचानका लागि आफन्तको खोजी भइरहेको प्रहरीले जनाएको छ । उनी हेटाैंडा बजार क्षेत्रमा प्लाष्टिक बटुलेर दैनिकी चलाउँदै आएका थिए ।
मकवानपुर । हेटौडा–६, चौघडामा रहेको जनकल्याण बचत तथा ऋण सहकारी संस्थाको २७ औं वार्षीक साधाणसभा शनिवार भएको छ ।संस्थाका अध्यक्ष हिमाल पौडेलको समाध्यक्षता तथा बागमती प्रदेश सभा सदस्य एकालाल श्रेष्ठको प्रमुख आतिथ्यतामा संस्थाले साधारणसभा गरेको हो ।
साधारणसभामा संस्थाका अध्यक्ष हिमाल पौडेलले संस्थागत प्रतिवेदन, कोषाध्यक्ष चेतनाथ खतिवडाले आर्थिक प्रतिवेदन, लेखा संयोजक दिपनराज आचार्यले लेखा समितिको प्रतिवेदन र महिला उपसमितिकी संयोजक रेखा मैनालीले महिला उपसमितिको प्रतिवेदन पेश गरेका थिए ।
२ हजार ८ सय १३ जना शेयर सदस्य रहेको यस सहकारीको शेयर पूँजी २ करोड ५३ लाख रहेको छ । यस्तै निक्षेप २१ करोड १५ लाख र ऋण लगानी २० करोड ५ लाख रहेको छ ।
साधारणसभामा सहकारीले संस्थापक शेयर सदस्य खिल प्रसाद गौतम, रघुप्रसाद आचार्य, रमेश प्रसाद लामिछाने, प्रल्हाद शर्मा आचार्य, ज्येष्ठ शेयर सदस्य ईन्द्र सि थिङ, राममाया डिमडुङ, मासिक बचतकर्ता सानोकान्छा थिङ, बबिता थापालाई सम्मान गरेको छ ।
त्यसैगरी उद्यम ब्यवसायी तर्फ सुशिला श्रेष्ठ, मधुवन श्रेष्ठ, असली कारोवारीमा हेमाकुमारी तिमल्सिना, सोमप्रसाद रुपाखेती र सञ्चारकर्मी श्रीराम दाहाललाई सम्मान गरेको थियो ।
संस्थाले साधारणसभामा बाल बचतकर्ता, धेरै सदस्य बनाउने र एकैदिन सदस्यता लिने जोडीलाई समेत सम्मान गरेको थियो । साधारणसभामा हेटौडा–६ का वडा अध्यक्ष विष्णु बहादुर दाहाल, बागमती प्रदेश दुग्ध विकास बोर्डका सञ्चालक सदस्य एवम संस्थाका संस्थापक अध्यक्ष बासुदेव अधिकारी, जिल्ला बचत तथा ऋण सहकारी संघका सञ्चालक सदस्य शंकर कालाखेती, हेटौडा सहकारीका अध्यक्ष ईन्द्र बहादुर बस्नेत, कामधेनु बहुउद्धेश्यीय सहकारीका अध्यक्ष उदय बिडारी, सुनगाभा बहुउद्धेयीय सहकारीका अध्यक्ष रामहरि न्यौपाने, संस्थाका सल्लाहकार बद्री बहादुर पाठक, रानी सामुदायिक वनका उपाध्यक्ष केशव धिताल लगायतको उपस्थिति रहेको थियो ।
मकवानपुर । हेटौंडा उपमहानगरपालिका वडा ५ का अध्यक्ष सुशील घिमिरेले सानोतिनो खर्चकोलागि धितो खोज्नुपर्ने बाध्यताबाट माथि उठ्न टोल विकास संस्था महत्त्वपूर्ण भएको बताएका छन् ।
टोल विकास संस्थाले टोलको हर क्रियाकलापमा सहभागी हुँदै विकास र रचनात्मक कार्यमा अग्रभागमा खटिने गरेकोमा उनले खुसी व्यक्त गरे । हेटौंडा ५ सिंचाइ टोल स्थिति मनकामना पार्क टोल विकास संस्थाको २२ औं बार्षिक साधारण सभामा बोल्दै उनले यस्तो बताएका हुन् ।
सिचाई हुँदै मकवानपुरगढी स्थित मनकामना मन्दिर जाने बाटोका मन्दिरहरूलाई आकर्षक बनाएर विकासलाई अघि बढाउने, खुला ब्यायमशाला तथा खानेपानीको व्यवस्थापन गर्नमा ध्यान केन्द्रिय रहने उनले बताए ।
संस्थाको अध्यक्ष जानुका संजेलको अध्यक्षतामा भएको बार्षिक साधारण सभा प्रभा-अनुज शैक्षिक अक्षय कोषका संरक्षक कृष्णप्रसाद धितालले शैक्षिक प्रगतिमा पनि टोल विकास संस्थासंग सहकार्य गर्न पाएकोमा खुसी व्यक्त गरे । कार्यक्रममा मकवानपुर बहुमुखी क्याम्पस प्रमुख डाक्टर शंकरप्रसाद उपाध्यायले टोल विकास संस्थाले टोलमा आयमुलक कामको सृजना नगरेको प्रति आपत्ति प्रकट गरे । उनले टोलको सरसफाइमा चासो दिनुपर्ने बताए ।
यसैगरी टोल विकास संस्था नगर समन्वय समितिका महासचिव शिबहरी दाहालले टोलमा रहेका ज्येष्ठ नागरिक, बालबालिका, युवाको लागि बिशेष कार्यक्रम गर्नुपर्ने बताए । हेटौंडा उपमहानगरपालिका वडा ५ को वडा टोल विकास समन्वय समिति संयोजक टीकाबहादुर खड्काले विकाससंगै रचनात्मक कार्य गरेर अघि बढ्नुपर्ने बताए । वडाको विकास निर्माणका काममा समन्वय र सहकार्य गरेर उत्कृष्ट टोल बन्नुपर्ने खड्काले बताए ।
वडा सदस्य रामबहादुर राई थोरै थोरै भने पनि बचत र खर्च कटौती गर्नुपर्ने, उद्यमशीलतामा जोड्नुपर्ने, टोललाई पर्यटकीय क्षेत्रको रूपमा अघि बढाउन लागिपर्नु पर्ने सुझाव दिए ।

टोल विकास संस्थाले आफ्नो संस्थाको सदस्य परिवारबाट यसबर्ष एसईई नतिजामा उत्कृष्ट भएका साईरा उपाध्याय, निश्चल दाहाल, सिद्धान्त सुवेदी र शिशिर खराललाई पुरस्कार सहित सम्मान गरिएको संस्थाको सचीव भीमा गुरागाईले बताइन् ।
साधारणसभामा संस्थाका अध्यक्ष संजेलले संस्थागत प्रतिवेदन तथा कोषाध्यक्ष विश्वप्रसाद गौतमले कोषाध्यक्षको प्रतिवेदन प्रस्तुत गरेका थिए । संस्थामा हाल ५८ लाख कारोवार रहेको प्रतिवेदनमा उल्लेख छ । संस्थामा २ सय २१ जना बचतकर्ता रहेको अध्यक्ष संजेलले बताइन् ।
कार्यक्रम मनकामना खानेपानी उपभोक्ता समितिका अध्यक्ष कृष्णप्रसाद देवकोटा, शुभकामना बाल क्लबको सचिब स्वरुपा गुरागाईलगायतको उपस्थिति रहेको थियो ।
