मकवानपुर । मकवानपुरे साहित्यकार पुरूषोत्तम आचार्यकाे “उठ हे युवा” बाेलकाे गीत सार्वजनिक भएकाे छ । मंगलबार हेटाैडा एक कार्यक्रम गरी गीतसंगै लिरिकल भिडियो सार्वजनिक गरिएकाे हाे ।
गीतमा आचार्यको रचना तथा सङ्गीत रहेको छ भने आचार्यसहित, हरि पौड्याल, आरोह सीले आवाज दिएका छन् । पुरुषोत्तम आचार्य युट्युब च्यानलबाट सार्वजनिक उठ हे युवा गीतका सम्बन्धमा श्यामकुमार बानियाँ, शान्ति प्रिय वन्दना, समर्पण न्यौपाने लगायतको टिप्पणी गरेका थिए । कार्यक्रमका क्रममा उक्त गीत प्रत्यक्ष गायनका साथ सार्वजनिक गरिएको हो ।
नवसर्जक नेपालका महासचिव न्यौपानेले आम जनजीविकाका सवाल उठाएकाे, युवाको भूमिका, क्रान्तिका कुरा, परिवर्तनसमेत सन्देश उठान गरेकाे बताए । नेपाल प्रज्ञा प्रतिष्ठान काव्य विभाग सदस्य शान्तिले गीतले देश र युवाको समस्या उठान गरेको र शब्द मन मष्तिष्क मै छोएकाे बताइन् । साहित्य सङ्गम मकवानपुरका सल्लाहकार बानियाँले कविता, गजल, गीत लेखनका साथसाथै गायनमा समेत सक्रिय आचार्यका यस अघि प्रकाशित पुस्तक तथा गीतले परिचय बनिसकेको बताए । गीत रेकर्डिङमा शब्दलाई सङ्गीतले न्याय गर्न नसकेको महशुस गरेको उनले बताए ।
गीतकार सुवासचन्द्र ढुङ्गेलले काठमाडौंमा समेत गीतमाथि यसरी चर्चा कमै हुने गरेको बताउँदै गीतको शब्दको तौल अनुसार सङ्गीत र गायनले त्यसलाई अझ सुन्दर बनाउने बताए । देशभक्तिका गीत सुन्ने चलन हराइरहेको समयमा गीत रेकर्ड भइ सार्वजनिक हुनु नै सर्जकको सफलता रहेको बताए । सर्जक सञ्जाल मकवानपुरका संयोजक निमेष निखिलले मानव संवेदनासँग सबैभन्दा सजिलै जोडिने साहित्य, गीत, सङ्गीतका रचना भएकोले आचार्यका गीतले परिवर्तनको बाहक बन्ने अपेक्षा गरेकाे बताए । साहित्य सङ्गम मकवानपुरका अध्यक्ष डीबी बर्तौलाले आशा जगाउने गीतमार्फत् युवालाई यही माटोमा रहेर आफ्नो कर्म गर्न प्रेरित गर्ने कालजयी गीत बनेको प्रतिक्रिया दिए ।
आचार्यकाे यस अघि ‘घाम त झुल्क्यो’ गीतको एल्बम सार्वजनिक भैसकेको छ । मकवानपुरकाे हर्नामाडी जन्मस्थान रही मकवानपुरलाई नै कर्म थलो बनाउँदै आएका उनले साहित्यकाे प्रगतिवादी धारमा अनवरत रुपमा कलम चलाउँदै आएका छन् । आचार्यका हालसम्म ५ वटा कृतिहरु प्रकाशित छन् । उनकाे भोको मझेरी – मुक्तक संग्रह २०६८, मुटु र गीतहरू – गीत संग्रह २०७०, Roaring flames – संयुक्त कविता संग्रह- २०७७, छैनौ कसोरी तिमी- ऊर्जाकाव्य २०७९, जुनेली – खण्डकाव्य, २०८० प्रकाशित भएका छन् ।
माध्यमिक तहमा नेपाली विषय अध्यापन गराउदै आएका उनकाे आफ्नै शब्द संगीत र आवाजमा केहि गीत, गजलहरू समेत स्वरबद्ध छन् । सर्जक संजाल मकवानपुरकाे आयोजनामा भंएकाे गीत सार्वजनिक कार्यक्रममा ढुंगेलकाे प्रमुख आतिथ्यता तथा निखिलकाे सभाध्यक्षता रहेकाे थियाे ।
मकवानपुर । मकवानपुरकाे हेटाैडामा विश्व वातावरण दिवस सप्ताहाव्यापी रुपमा विविध कार्यक्रमसहित मनाउने भएकाे छ । टाेल विकास संस्था नगर समन्वय समितिले जेठ १७ देखि २३ गतेसम्म वातावरण दिवस मनाउने भएकाे हाे ।
यद्यपी वडा स्तरीय टाेल विकास संस्थाहरुले यस अघि नै दिवस विशेष कार्यक्रम सञ्चालन गर्दै आएका छन् ।
हेटाैडामा पत्रकार भेटघाटमार्फत यस्ताे जानकारी सार्वजनिक गरिएकाे हाे । टाेल विकास संस्था नगर समन्वय समिति अध्यक्ष ध्रुवप्रसाद अधिकारीले विगत २१ वर्ष अघिदेखि हेटौडावासीको पहिचान तथा वातावरणप्रतिको सामुहिक सचेत प्रतिवद्दता अभिव्यक्ति गर्ने कार्यक्रमकाे रुपमा जनसहभागितामा विश्व वातावरण दिवस सप्ताहव्यापी विविध कार्यक्रमसहित मनाउँदै आएको जानकारी दिए ।
यस वर्ष पनि सप्ताहव्यापी रुपमा ‘Our Land. Our Future. We are #Generation Restoration.” भन्ने मुल नाराका साथ ५२ औं विश्व वातावरण दिवस मनाइने अधिकारीले बताए । जेठ २३ गते वातावरण सचेतना मुलक र्यालीसहित सम्मान पुरस्कार वितरणका साथ कार्यक्रमकाे समापन गरिने उनले जाकारी दिए ।
जेठ १७ गते हेटाैडा १९ वस्तिपुरमा रक्तदान कार्यक्रम गरी शुभारम्भ गरिने कार्यक्रमकाे दोस्राे दिन फाेहाेर खाेज चुनाैति हेटाैडा १० फरेष्ट्री अगाडीबाट बसपार्कसम्म हुनेछ । यसैगरी जेठ १८ गते नै प्लाष्टिक जन्य सामग्रीहरुको विकी वितरण नियन्त्रण गर्न सचेतना अभियान कार्यक्रम हेटौडाकाे वसपार्कमा हुने अधिकारीले जानकारी दिए । यस्तै सफा हेटौडा अभियान अन्तरगत टोल विकास संस्थाहरुमा सरसफाई कार्यक्रम जेठ १९ गते नगरमा रहेकाे सबै टाेल विकास संस्था अन्तरगत गरिने छ । जेठ १९ गतेनै प्राकृतिक वातावरणमा मेयर तथा उपमेयरसँग बालबालिका कार्यक्रम वन विज्ञान अध्ययन संस्थानमा हुने उनले जानकारी दिए ।
यसैगरी फोहोर मैला व्यवस्थापनमा स्थानीय नागरीकको भूमिका” विषय बाल क्लव स्तरीय निबन्ध लेखन प्रतियोगिता रोयल प्यालेसमा जेठ २० गते हुने छ भने वातावरणीय सचेतना मुलक साईकल रयाली तथा सम्मान कार्यक्रम जेठ २१ गते हेटाैडा ४ हुप्राचौरदेखि उपमहानगरपालिका कार्यालयसम्म हुनेछ ।
यस्तै जेठ २२ गते मककानमा मन्दिर जाने बाटाे हेटाैडा ५ र जलेश्वर मन्दिर परिसर हेटौडामा वृक्षरोपण कार्यक्रम गरिने अध्यक्ष अधिकारीले पत्रकार भेटघाट जानकारी दिए । जेठ २२ गते नै खेर गएका वस्तुहरुबाट उत्पादित सामग्रीहरुको प्रतिष्पर्धा राेयल प्यालेसमा हुने उनले बताए ।
जेठ २३ गते कपडाकाे झाेला वितरण कार्यक्रम राेयल प्यालेसमा हुने छ भने वातावरणीय सचेतना मुलक र्याली सम्मान पुरस्कार वितरण तथा सप्ताहव्यापी कार्यक्रम समापन हुप्राचौरबाट सुरु भई राेयल प्यालेसमा गरिने बताइएकाे छ ।
समुदाय परिचालनका माध्यमबाट समावेशी, समतामुलक, वातावरणमैत्री दीगो विकास हासिल गर्न हेटौडामा २०५६ सालदेखि टोल विकास सस्थाहरु स्थापना गरिएको हो। नगरका प्रत्येक नागरिकहरुको सहभागितालाई अभिवृद्धि गराउदै समग्र टोल, वडा तथा उपमहानगरपालिकाको विकासमा योगदान गर्न तथा विकासका अवधारणाबारे टोलका हरेक सदस्यहरुलाई जानकारी गराउदै सचेत, समुन्नत, श्रञ्जनशील र विकसित हेटौडा बनाउन अभियानमा टाेल विकास संस्थाले कार्य गर्दै आएकाे अध्यक्ष अधिकारले जानकारी दिए ।
मकवानपुर । ५२ औ विश्व वातावरण दिवस २०८१ को अवसरमा हेटौंडा ११ मा रहेका टोल विकास संस्थाहरुको सहभागीता टोल स्तरीय सचेतना मुलक प्रदर्सनी, सम्मान एवम् पुरस्कार वितरण कार्यक्रम गरिएकाे छ ।
यस वडामा रहेकाे २३ वटा टाेल विकास सँस्थाहरुकाे सहभागितामा र्यालि तथा सचेतनामुलक कार्यक्रम गरिएकाे हाे । वडा कार्यालयको आर्थिक सहयोगमा टोल विकास संस्था वडा समन्वय समितिको आयोजनामा कार्यक्रम भएको हो । सहिद स्मारककाे प्रवेशद्वारबाट सुरु भएको सचेतना मुलक र्याली हेटौंडा ११ मा रहेको बिपन्न बचत तथा ऋण सहकारी परिसरमा पगेर पुरस्कार वितरण कार्यक्रममा परिणत भएको टाेल विकास संस्था नगरसमन्वय समितीका उपमहासचिव देवकुमार श्रेष्ठले जानकारी दिए ।
टोल विकास संस्था वडा समन्वय समितिका अध्यक्ष यज्ञबहादुर आचार्यको सभाध्यक्षता भएको कार्यक्रममा उप मेयर राजेश बानियाँ वडा अध्यक्ष जुना दहाल, नगरसमन्वय समितीका अध्यक्ष धुर्वप्रसाद अधिकारी, सचिव चन्द्रवती पनेरु, वडा सदस्य गोपिनी सापकोटा, विकास नेपाल, सन्जय बिडारी, गिता सुनार, सामाजिक विकास महाशाखा अधिकृत गोपिनी गौतम, वातावरण ईन्जिनियर चन्दा खड्कालगायतका संघ संस्था एवं टोल विकास संस्थाहरुको उपस्थिति रहेकाे थियाे ।
कार्यकमा सिमलटार टोल विकास संस्था प्रथम,शान्ति चोक टोल विकास संस्था द्वतीय, झोलुङ्गेपुल टोल विकास संस्था तृतीय, र्योदय टोल विकास संस्था र लालिगुरास टोल विकास संस्था सान्त्वना भएका थिए । उनीहरुलाई प्रमाण पत्र र क्रमश : ७ हजार, ५ हजार, ३ हजार र २/२ हजार नगद प्रदान गरिएकाे थियाे ।
यसैगरी कार्यक्रमा कृषि दूध उत्पादनमा टेवा पुर्याउने मधुसुदन अर्याल, शेषराज रिमाल, पुर्णकुमारी बस्नेत, रमेश बर्तौला र निरज गौत्तमलाई पनि नगद २/२ हजार सहित सम्मान पत्र प्रदान गरिएको उपमहासचिव श्रेष्ठले जानकारी दिए ।
मकवानपुर । आज जेठ १५ गते गणतन्त्र दिवस संघीय, प्रदेश र स्थानीय सरकार तथा संघ सस्थाहरुले देशैभर विविध कार्यक्रम गरी मनाइदैछ ।
पहिलो संविधानसभाकाे चुनाव २०६४ सालमा भइ निर्वाचित प्रतिनिधिहरुले २०६५ जेठ १५ गतेका दिन राजतन्त्रको विधिवत् अन्त्य गर्दै नेपालमा संघीय लोकतान्त्रिक गणतन्त्रात्मक शासन व्यवस्था प्रारम्भको घोषणा गरेकाे दिनलाई गणतन्त्र दिवसको रूपमा मनाउने गरिएको छ ।
मंलबार १६ औं गणतन्त्र दिवस मनाइदैछ । दिवसकाे अवसरमा सरकारले सार्वजनिक बिदा दिएको छ । सैनिक यस वर्ष जेठ १४, १५ र १६ गते तीन दिनसम्म नेपालभित्र र विदेशस्थित नेपाली राजदूतावास तथा नियोगहरूमा दीपावलीलगायत कार्यक्रमहरू गरेर गणतन्त्र दिवस मनाउने निर्णय सरकारले गरेको छ ।
वि.सं २०६१ माघ १९ गते राजा ज्ञानेन्द्रले शासन सत्ता आफ्नै हातमा लिएपछि आन्दोलनरत सात दल र तत्कालीन सशस्त्र युद्धरत नेकपा माओवादी समझदारी भएको थियो । २०६२ मंसिरमा १२ बुँदे समझदारीपछि २०६२ फागुनदेखि आन्दोलन सुरु भएकाे थियाे । दाेस्राे जनआन्दाेलन पश्चात तत्कालिन राजाबाट संसद पुनर्स्थापना भएसँगै २०६३ जेठ ४ गते बसेको पुनर्स्थापित संसद्ले राजदरबारको अधिकार कटौती गर्दै राजसंस्थालाई निलम्बन गर्यो ।
प्रदेश प्रमुख शर्माले दिए शुभकामना
बागमती प्रदेश प्रमुख यादवचन्द्र शर्माले मनाइँदै गरिएको १६ औं गणतन्त्र दिवसका अवसरमा स्वदेश तथा विदेशमा रहनुभएका सम्पूर्ण नेपाली दाजुभाई एवं दिदीबहिनीहरुमा शुभकामना व्यक्त गरेका छन् । प्रदेश प्रमुख शर्माले शुभकामना सन्देशमा भनेका छन् ‘गणतन्त्र स्थापनाका लागि विभिन्न कालखण्डमा भएका आन्दोलनहरुमा आफ्नो अमूल्य जीवन उत्सर्ग गर्नुहुने सम्पूर्ण ज्ञात, अज्ञात अमर शहीदहरूप्रति भावपूर्ण श्रद्दाञ्जली अर्पण गर्दै बेपत्ता, घाईते तथा अपाङ्ग योद्धाहरुमा उच्च सम्मान प्रकट गर्दछु ।’
‘नेपाली जनताका प्रतिनिधिमार्फत २०६५ जेठ १५ गते संविधानसभाको पहिलो बैठकबाट हाम्रो देश नेपाल संघीय लोकतान्त्रिक गणतान्त्रिक मुलुक घोषित भएको हो’ शर्माले सन्देश मार्फत भनेका छन् ‘सार्वभौमसत्ता पूर्ण रुपमा जनतामा निहित रही जननिर्वाचित प्रतिनिधिबाट शासन र सरकार सञ्चालन हुने उत्कृष्ट प्रणाली शुभारम्भ भएको यो ऐतिहासिक दिनको सम्झनालाई चिरस्थायी बनाउन हरेक वर्ष आजका दिन हामीले यो दिवस मनाउँदै आएका छौं ।’
जनताका प्रतिनिधिमार्फत निर्मित हाम्रो सविधानमा व्यवस्था गरिएको मौलिक हकसम्बन्धी व्यवस्था, संघीय शासन प्रणाली, धर्मनिरपेक्षता, समावेशी/समानुपातिक प्रणाली, सामाजिक न्यायजस्ता प्रावधानले समाजवादको दिशामा अगाडी बढ्न मार्गप्रशस्त गरेको छ । यो हाम्रो देश नेपाल र हामी सम्पूर्ण नेपालीका लागि अत्यन्त सुखद् र गौरवको विषय हो शुभकामना सन्देशमा उल्लेख छ ।
शर्माले सन्देशमा भनेका छन् हामीले प्राप्त गरेको लोकतान्त्रिक गणतन्त्रात्मक व्यवस्थामार्फत मुलुकको भौगोलिक अखण्डता, सार्वभौमिकता, स्वाधीनता र राष्ट्रिय एकतालाई अझ सुदृढ गर्दै आर्थिक, सामाजिक र सांस्कृतिक रुपान्तरणसहितको सभ्य, सुसंस्कृत र समुन्नत समाज निर्माण हुनेमा विश्वस्त छु । संवैधानिक रुपमा हामीले पाएका हक-अधिकारहरुको प्रभावकारी कार्यान्वयन गर्दै राष्ट्र निर्माणको महाअभियानमा लामबद्द हुन यो दिवसले हामी सबैलाई अभिप्रेरित गरोस् भन्दै पुनः शुभकामना व्यक्त गर्दछु ।
स्वास्थ्य मन्त्री श्रेष्ठले दिए गणतन्त्र दिवसकाे शुभकामना
बागमती प्रदेशका स्वास्थ्य मन्त्री रामेश्वर श्रेष्ठले गणतन्त्र दिवस २०८१ को उपलक्ष्यमा स्वदेश तथा विदेशमा रहनुभएका सम्पुर्ण नेपालीलाई बधाईका साथै तथा शुभकामना दिएका छन् । मन्त्री श्रेष्ठले शुभकामना सन्देश मार्फत गणतन्त्र स्थापनाका लागि भएका जनआन्दोलन एवं विभिन्न संघर्षहरुमा प्राण उत्सर्ग गर्ने सम्पूर्ण सहिदहरुप्रति भावपूर्ण श्रद्धाञ्जली समेत अर्पण गरेका छन् ।
‘नेपाली जनताको ठूलो संघर्ष, बलिदान र त्यागबाट आज मुलुकमा संघीय लोकतान्त्रिक गणतन्त्र स्थापना भएको हो। सङ्घीय लोकतान्त्रिक गणतन्त्रको जगमा निर्माण भएको संविधानले नागरिकको राजनीतिक, आर्थिक, सामाजिक, धार्मिक र सांस्कृतिक स्वतन्त्रताको लक्ष्य राखेको शुभकामना विज्ञप्तिमा उल्लेख छ। संघीयताले दूरदराजका गाउँहरूमा राज्यबाट प्रदान गरिने सेवा सुविधा तथा शासन प्रशासनको प्रभावकारिता र पहुँच सुनिश्चित गरेको मन्त्री श्रेष्ठले उल्लेख गरेका छन्।
संघीयताले समाजका हरेक तप्काका मानिसलाई सम्मानित जीवन दिने, राज्यको सेवा सुविधामा सहज पहुँच दिलाउने र निणर्य प्रक्रियामा सबैको सहभागिताको सुनिश्चितता गर्ने उद्देश्य बोकेको उनकाे सन्देशमा उल्लेख छ । संघीयतालाई सफल बनाउन सबै राजनीतिक दल लगायत सबै समुदायको महत्त्वपूणर् भूमिका रहने समेत उनको भनाई छ ।
“गणतन्त्र दिवसले सबैलाई राष्ट्रिय सहमतिका आधारमा समृद्ध नेपाल सुखी नेपालीको कार्यभार पूरा गर्न प्रेरणा प्रदान गरोस भन्ने विश्वास लिएको छु” मन्त्री श्रेष्ठले शुभकामना सन्देश मार्फत भनेका छन् ।
हाजिरी जवाफमा विष्णुज्याेतिकाे बाल समूह प्रथम
Tags: No Comments
मकवानपुर । मकवानपुरकेा हेटाैडा उपमहानगरपालिका वडा नम्बर १२ मा भएकाे हाजिरी जवाफमा विष्णु ज्याेति आधारभूत विद्यालयकाे बाल समूह प्रथम भएकाे छ ।
वडा बाल समूह संजाल गठन भएकाे एक वर्ष भएकाेमा हेटौडा १२ नम्बर वडाकाे आयोजनामा हाजिरी जवाफ प्रतियाेगिता भएकाे हाे । वडा बाल समूह संजालकाे समन्वयमा वडास्तरीय आधारभूत तह (कक्षा ८ सम्म) का बाल समूह बिचमा भएकाे हाजिरीजवाफमा विष्णु ज्येातिका मानिव मोक्तान ,विवेक रीमाल र दिया पाण्डेकाे समूहले प्रथम स्थान प्राप्त गरेकाे हाे ।
यसैगरी बुद्व माविका सिखा विक, रिदम थीङ र विविका राईकाे समूहले द्वितीय भएकाे छ । यस्तै सन राइज बाेर्डिङ स्कुलका रिजन बल, मिन्ल श्रेष्ठ र नितेन मोक्तानकाे समूहले तृतीय स्थान हासिल गर्दा प्रतिभा आधारभूत विद्यालयका शंकर विक, चाहाना घिसिङ र सानिया योम्जनकाे समूहले सान्त्वना हासिल गरेका छन् ।