वडास्तरीय टि–२० क्रिकेट प्रतियोगिता हुने
Tags: No Comments
मकवानपुर । मकवानपुरकाे हेटौडामा वडास्तरीय टि–२० क्रिकेट प्रतियोगिता हुने भएको छ । नेपाल खेलकुद महासंघ हेटौंडा उपमहानगरपालिका ८ नम्बर वडा कमिटीको आयोजना क्रिकेट प्रतियोगिता हुने भएको हाे ।
२९ भदौदेखि ५ असोजसम्म हेटौडा उपमहानगरपालिकाका वडास्तरीय टि–२० क्रिकेट प्रतियोगिता सञ्चालन गरिने आयोजकले शनिबार हेटौंडामा पत्रकार भेटघाट गरी जानकारी दिएकाे हाे । नेकपा एमाले हेटौंडा उपमहानगरपालिका–८ नम्बर कमिटीको व्यवस्थापनमा क्रिकेट प्रतियोगिता गर्न लागिएको हो ।
‘खेलकुदको विकासको लागि स्थानीय तहदेखि केन्द्रसम्म भौतिक पूर्वाधार, व्यवसायीक र प्रतिस्पर्धा खेलकुद गतिविधि हाम्रो आधार’ भन्ने अभिप्रायले टि–२० क्रिकेट प्रतियोगिता आयोजना गर्न लागिएको प्रतियोगितका संयोजक धर्मराज पुडासैनीले जानकारी दिए । पुडासैनीकाे संयोजकत्वमा ३१ सदस्यीय क्रिकेट खेल सञ्चालन तथा व्यवस्थापन मूल समिति तथा अन्य ५ वटा विभिन्न उपसमितिहरु गठन गरिएको छ ।
प्रतियोगितामा हेटौंडा उपमहानगरपालिकाका १९ वटै वडाको सहभागिता रहने बताइएको छ । प्रतियोगितामा प्रथम हुने टिमले ५० हजार रुपैंया पुरस्कार सहित शिल्ड र प्रमाणपत्र प्राप्त गर्ने छन् । द्वितीय हुने टिमले २५ हजार रुपैंया, शिल्ड र प्रमाण र पत्र वितरण प्राप्त गर्ने छन् । यस्तै, उत्कृष्ट पार्चपास गर्ने क्रिकेट टिमलाई विविध पुरस्कार र प्रमाणपत्र वितरण गरिने उनले बताए । उत्कृष्ट खेलाडी तथा लामो समय खेल क्षेत्रमा लागेका व्यक्तित्वलाई सम्मान गरिने आयोजकले जनाएको छ ।
प्रतियोगितामा सहभागिता जनाउने टिमले ५ हजार रुपैंया शुुल्क बुझाउनु पर्नेछ । हेटौंडा–८ कमानेमा रहेको चन्द्रोदय माध्यामिक विद्यालय खेल मैदानमा हुने प्रतियोगिताकाे लागि ३ लाख ५० हजार रुपैंया लाग्ने आयोजकको अनुमान रहेकाे छ । प्रतियोगिता हरेक वर्ष आयोजना गरिने बताइएकाे छ ।
मकवानपुर । सामुदायिक विद्यालय माध्यमिक तहस्तरीय हाजिरी जवाफ प्रतियोगितामा ज्योति माध्यमिक विद्यालय प्रथम भएको छ ।
नगरस्तरीय शैक्षिक समन्वय समिति हेटौंडाको आयोजनामा भएको हाजिरी जवाफ प्रतियोगितामा हेटौंडा–१८ स्थित ज्योति माविका सलिना सुवेदी, शान्ती गोले र समिप घिमिरेको समुह प्रथम भएको हो । त्यसैगरी, हेटौंडा–१७ को बालबोध माविका श्रृष्टि भुजेल,स्मृति तिमल्सिना र सकृना पुडासैनीको समुह द्वितीय भए । त्यस्तै हेटौंडा–१६ को जनप्रिय माविका रामकृष्ण आचार्य, एरिना चौलागाई र कौस्तुभ सुवेदीको समुह तृतीय भएका थिए ।
विजेता समूहले क्रमशः ७ हजार, ५ हजार र ३ हजार नगद पुरस्कार र प्रमाणपत्र प्राप्त गरे । प्रतियोगितामा हेटौंडा नगरका २१ वटा सामुदायिक विद्यालयको सहभगागिता रहेको थिए ।
कार्यक्रममा हेटौंडा १६ का वडा अध्यक्ष रामकृष्ण कोईरालाले यस्ता प्रतियोगिता विद्यार्थीको समग्र विकासमा महत्त्वपूर्ण भूमिका हुने बताए । शैक्षिक समन्वय समिति अतिरिक्त क्रियाकलाप संयोजक बालकुमार श्रेष्ठले प्रतियोगिताले विद्यार्थीहरूको व्यक्तित्व, सामाजिक र बौद्धिक विकासमा योगदान र्पुयाउनुका साथै उनीहरूलाई आफ्नो ज्ञान र क्षमता प्रदर्शन गर्ने अवसर प्रदान गरेको बताए । ‘यस्ता प्रतियोगिताहरूले विद्यार्थीहरूमा स्वस्थ प्रतिस्पर्धाको भावना जगाउदै र उनीहरूको बौद्धिक क्षमता अभिवृद्धि गर्न मद्दत पुर्याउँछ’ उनले भने ।
कार्यक्रममा हेटौंडा उपमहानगरपालिकाका शिक्षा विकास महाशाखा प्रमुख सीताराम कोईराला, शिक्षा अधिकृत हरिचन्द्र सापकोटा , जनप्रिय मावि विद्यालय व्यवस्थापन समिति अध्यक्ष मोहन वस्ताकोटी, प्रधानाध्यापक भुपेन्द्र चौलागाईले सहभागी विद्यालय र विद्यार्थीहरूको सहभागिताको प्रशंसा गर्दै यस्ता कार्यक्रमको निरन्तरताले भविष्यमा स्थानीय शैक्षिक वातावरणलाई थप सुदृढ बनाउन मद्दत पुग्ने अपेक्षा गरे।
समन्वय समिति अध्यक्ष भोगेन्द्र लुईटेलको सभाध्यक्षतामा भएको प्रतियोगिता हेटौंडा १६ का वडा अध्यक्ष एवम् सामाजिक विकास समिति प्रमुख कोईरालाको प्रमुख आतिथ्यतामा भएको हो ।
समिति उपाध्यक्ष प्रतिमा गौतमले स्वागत गरेको कार्यक्रमको सहजीकरण सचिव जनकप्रसाद घिमिरेले गरेका थिए।
मकवानपुर । मकवानपुरको बकैया गाउँपालिकामा ढुङ्गा लागेर एक स्कुले बालिकाको मृत्यु भएकाे छ।
बकैया गाउँपालिका–६ सानो ज्यामिरेमा बिहीबार बाटो माथिबाट खसेको ढुंगाले लागेर एक बालिकाको मृत्यु भएको मकवानपुर प्रहरीले जनाएको छ । बिहीबार विद्यालयबाट घर फर्किदै गरेकी हिरालाल थिङको छोरी १० वर्षीया बालिका सुष्मा थिङलाई ढुङगाले लागेर ज्यान गएको हाे ।
उनकाे शव परिवारले लगेको भन्ने जानकारी वडा अध्यक्ष फुलबहादुर भोम्जन मार्फत प्राप्त भएकाे प्रहरीले बताएकाे छ । उनी बकैया गाउँपालिका–६ साततलेस्थित जनश्रम आधारभूत विद्यालयमा २ कक्षामा अध्ययनरत छात्रा भएको बुझिएको छ।
इलाका प्रहरी कार्यालय फापरबारीका टोली घटनास्थल पुगेको र आवश्यक अनुसन्धान भइरहेको मकवानपुर प्रहरी प्रवक्ता प्रहरी नायब उपरीक्षक लक्ष्मी भण्डारीले जानकारी दिए ।
मकवानपुर । मकवानपुरकाे हेटौंडा उपमहानगरपालिका २ बनस्खण्डी देवी सामुदायिक बन उपभोक्ता समितिको प्राङ्गणमा शुक्रबारबाट श्रीमद् भागवत ज्ञान महायज्ञ सुरु भएको छ ।
बनस्खण्डी सामुदायिक वनका अध्यक्ष भवसागर श्रेष्ठको सभाध्यक्षता एवं नेपाली कांग्रेस बागमती प्रदेश सभापति एवं बागमती प्रदेशसभा सदस्य ईन्द्रबहादुर बानियाँको प्रमुख आतिथ्यतामा महायज्ञको उद्घाटन गरिएको हो ।
महायज्ञको उद्घाटन गर्दै नेता बानियाँले हेटौंडाको मुटुमा रहेको बनस्खण्डी वन क्षेत्रभित्र रहेको राधाकृष्ण मन्दिरको विस्तार र विकास गर्दै यस क्षेत्रलाई धार्मिक एवं पर्यटकीय क्षेत्रको रुपमा विस्तार गरिने बताए । नेपालमा विभिन्न धर्म संस्कृति र जातिजातिको विशेष बाहुल्य रहेको बताउँदै नेता बानियाँले महायज्ञमा उपस्थित भई कथा श्रवण गरी आफ्नो आर्थिक स्थिति हेरी सकेको दान गर्न आग्रह गरे । ‘हामी सबै मिलेर यस क्षेत्रलाई धार्मिक पर्यटकीय स्थल बनाउन लाग्नुपर्छ’ उनले भने ।
महायज्ञ उद्घाटन कार्यक्रममा हेटौंडा उपमहानगरपालिकाका उपमेयर राजेश बानियाँ, कथा बाचक पण्डित कपिलदेव भट्ट, उपबाचक पण्डित टेकनाथ ढकाल, बनस्खण्डी वन उपभोक्ता समितिकी सचिव लक्ष्मी तिमल्सिना गौतमलगायतले मन्तव्य ब्यक्त गरेका थिए ।
भदौं १३ गतेसम्म संचालन हुने महायज्ञमा उठेको रकमबाट राधाकृष्ण मन्दिरको बिस्तार, ब्यवस्थापन तथा अक्षयकोष स्थापना गर्ने उदेश्य रहेको अध्यक्ष श्रेष्ठले जानकारी दिए ।
मकवानपुर । हाल देशभर मनसुनी वायुको प्रभाव रहेको छ। जसको प्रभावले बागमतीको मकवानपुर सहित अन्य जिल्लामा समेत वर्षा भैरहेको छ ।
मनसुनको न्यून चापीय रेखा पश्चिमतिर सरदर स्थानमा र पूर्वतिर सरदर स्थानको केही उत्तर दिशा तर्फ अवस्थित रहेको जल तथा मौसम बिज्ञान विभागको मौसम पूर्वानुमान महाशाखाले जनाएको छ । जसको प्रभावले हाल देशभर आंशिक देखि साधरणतया बदली रहेको हो। कोशी प्रदेशका केही स्थानहरूमा तथा मधेस र बागमती प्रदेशका थोरै स्थानहरूमा चट्याङ्गसहित हल्कादेखि मध्यम वर्षा भइरहेको छ।
शुक्रबार दिउँसो देशभर साधरणतया बदली रहने छ । कोशी, मधेस, बागमती, गण्डकी, लुम्बिनी प्रदेशका केही स्थानहरूमा तथा बाँकी प्रदेशका थोरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ। कोशी र बागमती प्रदेशका एक दुई स्थानमा भारी वर्षाको पनि सम्भावना रहेको छ।
यसैगरी शुक्रबार राति कोशी, मधेस, बागमती र सुदूरपश्चिम केही स्थानहरूमा तथा बाँकी प्रदेशका थोरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ। कोशी, मधेस र सुदूरपश्चिम प्रदेशका एक–दुई स्थानमा भारी वर्षाको पनि सम्भावना रहेको महाशाखाले जनाएको छ।
कोशी, मधेस, बागमती र सुदूरपश्चिम प्रदेशका केही स्थानहरूमा भारी वर्षाको सम्भावना रहेकोले ती क्षेत्रमा हुन सक्ने गेग्रान बहाव, बाढी, पहिरो तथा भूक्षय जस्ता प्रकोपको जोखिम तथा क्षतिबाट बच्न आवश्यक सतर्कता अपनाउन समेत महाशाखाले सबैलाई आग्रह गरेको छ ।