मकवानपुर । बागमती प्रदेश सरकारले बाढीपहिरोले क्षति पुर्याएको ४५ वटा स्थानीय तहलाई ५ करोड ८० लाख रुपैयाँ सहायता प्रदान गर्ने भएको छ ।
शनिबार हेटौंडामा बसेको प्रदेश मन्त्रिपरिषद् बैठकले प्रदेशका ७ वटा स्थानीय तहलाई २० लाख, १२ वटा स्थानीय तहलाई १५ लाख र २६ वटा स्थानीय तहलाई १० लाखका दरले रकम दिने निर्णय गरेकाे हाे ।
असोज १० गतेदेखि १२ गतेसम्म परेकाे वर्षाका कारण बाढीपहिरोबाट धेरै क्षति पुगेको मकवानपुरको इन्द्रसरोबर गाउँपालिका काभ्रेपलाञ्चोकको रोशी, बेथानचोक र तेमाल गाउँपालिका तथा पनौती नगरपालिका, सिन्धुलीको सुनकोशी गाउँपालिका, ललितपुरको महांकाल गाउँपालिकालाई बढी जोखिमयुक्त क्षेत्र भएकाले २० लाखका दरले १ करोड ४० लाख रकम निकासा गरिने सरकारका प्रवक्ता आन्तरिक मामिला तथा कानूनमन्त्री सुरजचन्द्र लामिछानेले जानकारी दिए ।
यसैगरी मकवानपुरको बागमती गाउँपालिका, काठमाडौंको चन्द्रागिरी र नागार्जुन नगरपालिका, ललितपुरको गोदावरी नगरपालिका, कोन्ज्योसोम गाउँपालिका, बागमती गाउँपालिका, सिन्धुपाल्चोकको जुगल र लिसंखुपाखर गाउँपालिका, भक्तपुरको सूर्यविनायक नगरपालिका, रामेछापको खाँडादेवी गाउँपालिका, दोलखाको बिगु र धादिङको गजुरी गाउँपालिकामा १५ लाखका दरले १ करोड ८० लाख रुपैयाँ रकम निकासा गर्ने निर्णय भएको मन्त्री लामिछानेले बताए ।
यस्तै दोलखाको शैलुङ, गौरीशंकर र तामाकोशी गाउँपालिका, धादिङको बेनिघाट रोराङ, नेत्रावती डब्जोङ गाउँपालिका र धुनिवेशी नगरपालिका, रामेछापको मन्थली र रामेछाप नगरपालिकासहित गोकुलगंगा, दोरम्बाशैलुङ, सुनापति, लिखुतामाकोशी र उमाकुण्ड गाउँपालिकामा १० लाखका दरले रकम निकासा हुने भएको छ ।
यस्तै, मकवानपुरको बकैया गाउँपालिका, सिन्धुलीको गोलन्जोर र फिक्कल गाउँपालिका सिन्धुपाल्चोकको मेलम्ची नगरपालिका, भोटेकोशी, पाँचपोखरी थाङपाल र हेलम्बु गाउँपालिका, काभ्रेको नमोबद्ध र मण्डनदेउपुर नगरपालिका तथा चौरीदेउराली, महाभारत गाउँपालिका र चितवनको माडी नगरपालिका र इच्छाकामना गाउँपालिकालाई १०–१० लाख गरी २ करोड ६० लाख रुपैयाँ निकासा दिने निर्णय भएको कानूनमन्त्री लामिछानेले जानकारी दिए ।
उक्त रकम प्रदेश विपद् व्यवस्थापन कोषबाट सम्बन्धित स्थानीय तहको विपद व्यवस्थापन कोषमा पठाइने भएकाे छ । प्रदेश विपद् व्यवस्थापन कोषमा रकम न्यून रहेको भन्दै मन्त्रिपरिषद्ले आर्थिक मामिला तथा योजना मन्त्रालयबाट १० करोड ५० लाख रुपैयाँ निकासा गर्ने निर्णय समेत गरेकाे मन्त्री लामिछानेले बताए ।
यसैगरी प्रदेश सरकारले चणिकलाल तामाङलाई १ लाख ५० हजार रुपैयाँसहित सम्मान गर्ने भएको छ । प्रदेश मन्त्रिपरिषद् शनिबारकाे बैठकले तामाङलाई नगदसहित सम्मान गर्ने निर्णय गरेको हो ।
गत असोज १२ मा नख्खु खोलामा आएको बाढीमा पसेका २ जनाको जीवन रक्षा गरेको भन्दै उनलाई प्रदेश सरकारले सम्मान गर्ने निर्णय गरेको हो ।
मुख्यमन्त्री तथा मन्त्रीहरूकाे १५ दिनको तलब विपद् कोषमा
बागमती प्रदेशका मुख्यमन्त्री तथा मन्त्रीहरूले १५ दिनको तलब विपद् कोषमा जम्मा गर्ने भएका छन् । शनिवार प्रदेश राजधानी हेटौँडामा मन्त्रीहरूको छलफलले विपद् प्रभावित नागरिकहरूका लागि १५ दिनको तलब प्रदेश विपद् कोषमा जम्मा गर्ने निर्णय गरेको हो ।
उक्त रकम प्रदेशका विपद् प्रभावित नागरिकको उद्धार राहत तथा पुनः स्थापनाको लागि खर्च गरिने छ । प्रदेश सरकारका प्रवक्ता सुरजचन्द्र लामिछानेका अनुसार प्रदेश विपद् कोषमा १३ जना मन्त्रीको १५ दिनको तलब बापत ४ लाख २७ हजार ४४५ रुपैयाँ जम्मा हुनेछ ।
मन्त्रीहरूले मासिक प्राप्त गर्दै आएको ६० हजार २२० रुपैयाँको आधा रकम ३० हजार १६० रुपैयाँ र मुख्यमन्त्रीलाई मासिक प्राप्त हुने ७० हजार ७३० रुपैयाँको आधा रकम ३५ हजार ३६५ रुपैयाँ प्रदेश विपद् काेषमा जम्मा हुनेछ ।
प्रदेशमा विपदबाट क्षतिको यकिन विवरण तयार गर्न प्रदेश नीति तथा योजना आयोगलाई निर्देशन दिइएकाे छ । आयोगले विषयगत मन्त्रालय र क्षेत्रका आधारमा क्षति विवरण सङ्कलन गरी प्रतिवेदन बुझाउने छ ।
११ करोडको सुनसहित २ जना पक्राउ
Tags: #police #hetauda #goldNo Comments
मकवानपुर । मकवानपुर प्रहरीले हेटौंडाबाट ११ करोडको सुनसहित २ जना भारतीय नागरिकलाई पक्राउ गरेको छ । पक्राउ पर्नेमा भारत महाराष्ट्रका २५ वर्षीय अभिषेक अजिनाथ कुटी र २७ वर्षीय राहुल भिट्टिहाल बाड रहेकाे जिल्ला प्रहरी कार्यालय मकवानपुरले जनाएकाे छ ।
पूर्व–पश्चिम राजमार्गअन्तर्गत हेटौंडा–१५ रातोमाटेस्थित प्रहरी चौकीबाट खटिएकाे टोलीले उनीहरुकाे साथबाट ८ किलो ४३.९७ ग्राम सुन बरामद गरिएको जिल्ला प्रहरी कार्यालय मकवानपुरका प्रमुख प्रहरी उपरीक्षक विश्वराज खड्काले जानकारी दिए । उनका अनुसार शनिबार बिहान प्रहरी टोलीले रातोमाटे चेकपोष्टमा पथलैयाबाट हेटौंडातर्फ आउँदै गरेको बागमती प्रदेश ०२–०४७ प ७५०३ नम्बरको स्कुटरलाई जाँच गर्दा उक्त सुन बरामद भएको हो ।
प्रहरीका अनुसार उक्त परिणामकाे सुनको बजार मुल्य ११ करोड ४३ लाख ५७ हजार रुपैयाँ बराबर हुन्छ । बाड र कुटीले शरीरको विभिन्न भागमा लुकाएर बिस्कुटको आकारको ८ थान सुन सुन ल्याएकाे प्रहरी प्रमुख खड्काले जानकारी दिए । उनीहरुले काठमाडौंको गौशालामा सुन बुझाउने गरी जाँदै गरेको प्रारम्भिक अनुसन्धानमा खुलेको प्रहरी प्रमुख खड्काले बताए ।
प्रहरीका अनुसार उनीहरूले जनकपुरबाट सुन लिएर पथलैयासम्म बस आएका थिए । पथलैयाबाट उनीहरु स्कुटरमा हेटौंडा तर्फ आउँदै थिए । बरामद भएको सुन र पक्राउ परेका कुटी र बाडलाई थप अनुसन्धान तथा कारवाहीका लागि राजश्व अनुसन्धान कार्यालय पथलैया पठाइने प्रहरीले जनाएको छ ।
मकवानपुर । बालविकासको सवाल सबैभन्दा महत्त्वपूर्ण भएको हेटौंडा उपमहानगरपालिका प्रमुख मिनाकुमारी लामाले बताएकी छिन् । हेटौंडाको शैक्षिक गुणस्तर बढाउने क्रममा समन्वय सहकार्य गरेर अघि बढ्ने प्रतिबद्धता उनले व्यक्त गरिन ।
नगरस्तरीय शैक्षिक समन्वय समितिको आयोजनामा शनिबार हेटौंडामा आयोजित शैक्षिक अन्तरक्रिया तथा चाडपर्व विशेष शुभकामना कार्यक्रममा उनले यस्तो बताएकी हुन् ।
कार्यक्रममा हेटौंडा उपमहानगरपालिका वडा ४ का अध्यक्ष नवीन सिग्देलले विकास भनेको बाटो मात्रै नभई शिक्षाको विकास मुख्य भएको बताए । सबैको समन्वय र सहकार्यबाट शिक्षामा सुधार संभव भएको अध्यक्ष सिग्देलले बताए। “शिक्षामा योगदान गर्नेहरू जिम्मेवार हुनुपर्छ साथमा अभिभावक विद्यार्थीको योगदान त चाहिन्छ नै” उनले भने ।
कार्यक्रममा राष्ट्रिय शिक्षक संगठन अध्यक्ष श्रीराम दाहालले शिक्षक तालिममा लगानी आवश्यक रहेको बताए । प्रविधिक सीप, शिक्षामा स्थानीय तहले लगानी गर्नुपर्ने दाहालले बताए । निजि विद्यालय र सामुदायिक विद्यालयमा स्रोत साधनको समानता नभएको कारण नतिजामा फरकपना भएको उनले बताए । सबैको सहयोग र समन्वयले नतिजा सुधार हुनसक्ने, सामुदायिक विद्यालयलाई उच्च गुणस्तरीय बनाउन सकिने उनको सुझाव थियो।
यसैगरी नेपाल शिक्षक महासंघ अध्यक्ष जिधराज ढकालले शैक्षिक क्षेत्रमा छुट्याइने बजेट नगन्ने हुने गरेको प्रती गुनासो गरे । केही वडाहरूले शिक्षाको लागि किन बजेट राख्ने भन्नमा समेत चासो कम हुने गरेको ढकालले बताए ।
यसैगरी शैक्षिक व्यक्तित्व ऋषिराम पोखरेलले शिक्षकले आफूलाई समेत सन्तुष्टि मिल्ने गरि पढाउन पर्ने, कक्षामा कष्टका साथ समय बिताउने भन्दा पनि विद्यार्थीसंग अन्तक्रिर्या गरेर, बुझाएर रमाइलो मानेर समय बिताउने परिपाटीले गुणस्तरमा सुधार आउने बताए । विद्यार्थीलाई सिकेर काम गर्ने बनाउन तर्फ ध्यानाकर्षण गराउंदै पोखरेलले भने “पढाउने कि सिकाउने/ कक्षा कार्य गराउने भन्ने मुख्य सवाल हो ।”
कक्षाकोठालाई सिकाई कोठा बनाउन पर्ने उनको सुझाव थियो ।
समन्वय समितिको अध्यक्ष भोगेन्द्र लुइँटेलको अध्यक्षतामा कार्यक्रम गरिएको थियो । अध्यक्ष लुइँटेलले आगामी दिनमा समन्वय समितिले सबै निकायको सहकार्यमा शैक्षिक उन्नयनको लागि कार्य गर्ने बताए ।
कार्यक्रममा राष्ट्रिय परीक्षा बोर्ड हेटौडाका प्रमुख कृष्ण प्रसाद घिमिरे, शिक्षा विकास महाशाखा हेटौडाका हरिशचन्द्र सापकोटा, शिक्षा विकास तथा समन्वय इकाई मकवानपुरको संगिता घलेलगायतको उपस्थिति रहेको समिति उपाध्यक्ष प्रतिमा गौतमले जानकारी दिइन ।
मकवानपुर । मकवानपुरकाे हेटौडामा रहेकाे मदन भण्डारी स्वास्थ्य विज्ञान प्रतिष्ठानको रजिष्ट्रारमा भिमसागर गुरागाईं नियुक्त भएका छन् । प्रतिष्ठानका उपकुलपति डा.प्रदीप ज्ञवालीको सिफारिसमा सामाजिक विकास मन्त्री हरिप्रभा खड्गीले गुरागाईंलाई शुक्रबार रजिष्ट्रारमा नियुक्त गरेका हुन् ।
उनलाई स्वास्थ्य मन्त्री किरण थापाको सहमति गराएको छ । जनस्वास्थ्य अधिकृत सातौं तहका गुरागाईंकाे दरवन्दी स्वास्थ्य कार्यालय मकवानपुरमा रहेकाे छ । काजमा रजिष्ट्रारमा नियुक्त उनकाे अवधि ४ वर्षको हुनेछ । त्यस्तै प्रतिष्ठानको संयोजकमा चिरञ्जीवी चुडाल नियुक्त भएका छन् । उनी दोस्रो कार्यकालका लागि संयोजक पदमा नियुक्त भएका हुन् । यसअघि पनि २०७७ मा उनी प्रतिष्ठानको संयोजकमा नियुक्त भएका थिए । भिसी डा. ज्ञवालीले रजिस्ट्रार गुरागाई र संयोजक चुडाललाई शुक्रबार नै सपथ गराएका छन् ।
यसअघि प्रतिष्ठानका उपकुलपति प्रा.डा.प्रदीप ज्ञवालीले शुक्रबार बिहान बागमती प्रदेशका मुख्यमन्त्री बहादुरसिंह लामाबाट सपथ ग्रहण गरेका थिए ।
मकवानपुर । मकवानपुरकाे हेटौंडा उपमहानगरपालिका वडा नम्बर–११ लाई बालमैत्री स्थानीय शासनयुक्त वडा घोषणा गरिने भएको छ । बिहीबार पत्रकार भेटघाट गरी वडाध्यक्ष जुना दहालले वडालाई शनिबार बालमैत्री स्थानीय शासनयुक्त घोषणा गरिने जानकारी दिइन् ।
“बालबालिकामा लगानीः सुनिश्चित भविष्यको थालनी’ भन्ने मूल नाराका साथ विशेष कार्यक्रम गरेर वडालाई निकृष्ट बालश्रममुक्त, बालविवाहमुक्त तथा बालमैत्री स्थानीय शासनयुक्त वडा घोषणा गरिने वडाअध्यक्ष दहालले बताईन् । दहालका अनुसार वडाले बालमैत्री घोषणाको लागि करिब दुई वर्षदेखि विभिन्न कार्यक्रम तथा अभियान सञ्चालन गरिरहेको छ।
हेटौंडालाई बालमैत्री स्थानीय शासनयुक्त उपमहानगरपालिका घोषणा गर्न २०७९ भाद्र ५ गते सरोकारवालाहरुको उपस्थितिमा प्रतिबद्धतामा हस्ताक्षर गरिएकाेमा ११ नम्बर वडाले २०७९ मंसिर २१ गते उक्त प्रतिबद्धतालाई सरोकारवालाकाे उपस्थितिमा हस्ताक्षर गरी अभियानलाई आत्मासात गर्दै कार्यान्वयन गर्न लागि परेकाे थियाे । साेही अनुसार प्रत्येक विद्यालय, टोल, समुदायमा बालमैत्री सम्बन्धी विभिन्न सचेतनामूलक कार्यक्रमहरु सञ्चालन गर्दै आएको उनले बताईन् ।
‘बालमैत्री सम्बन्धी नेपाल सरकारले निर्धारण गरेका बाल बचाऊ, बाल संरक्षण, बाल विकास र बाल सहभागिता तथा संस्थागत विकासका ५१ वटा सूचकहरु पूरा भएकाेले वडालाई बालमैत्री स्थानीय शासनयुक्त घोषणाको तयारी गरिएकाे हाे’ उनले भनिन् ‘बालमैत्री स्थानीय शासन कार्यान्वयन निर्देशिका, २०७८ ले निर्धारण गरेका ५१ सूचकमध्ये ४४ वटा सूचकमा शत प्रतिशत नतिजा प्राप्त भएको छ ।’ बाँकी ६ वटा सूचकमा ८० देखि ९९ प्रतिशतसम्म नतिजा हासिल गर्दै बालमैत्री स्थानीय शासनयुक्त वडा घोषणा गर्ने अवस्थामा आइपुगेको छ ।
घरधुरी सर्वेक्षण २०७९ अनुसार वडाको कुल जनसंख्या ११ हजार १ सय ५ रहेकोमा ५ हजार ४ सय ५१ महिला र ५ हजार ६ सय ५४ पुरुष रहेको छ । सामुदायिक र संस्थागत गरी ५ विद्यालयहरु सञ्चालनमा रहेको वडामा बालक १ हजार ७ सय ९८ र बालिका १ हजार ६ सय १९ गरी ३ हजार ४ सय १७ जना बालबालिका रहेकाे बताइएकाे छ ।
शनिबार बिहान निकृष्ट बालश्रममुक्त, बालविवाहमुक्त, बालमैत्री स्थानीय शासनयुक्त वडा घोषणा गर्नुअघि वडा कार्यालयको प्राङ्गणमा भेला भई प्रभातफेरी मार्फत वडा परिक्रमा गरि एक कार्यक्रमका बिच वडालाई बालमैत्री घोषणा गरिने कार्यक्रम रहेकाे उनले बताईन् ।