झुरझुरे बागमती । साविक विजेता मछिन्द्र फुटबल क्लब काठमाडौं साताैं संस्करणकाे बागमती गोल्डकप राष्ट्रिय फुटबल प्रतियोगिता फाइनल प्रवेश गरेकाे छ । प्रतियोगिता अन्तरगत शनिबार भएकाे अन्तिम सेमिफाइनलमा थ्रीस्टार क्लब ललितपुरलाई ३–० गोलले पाखा लगाउदैं मछिन्द्र उपाधी नजिक पुगेकाे हाे ।
बागमती–४ स्थित शहीद स्मृति रंगशालामा भएकाे खेलमा साविक विजेता मछिन्द्र क्लबले चौथो संस्करणकाे गोल्डकप विजेता थ्री स्टारलाई पराजीत गरेकाे हाे । थ्रीस्टारका लागि खेलकाे पहिलाे हाफकाे ३७ औं मिनेटमा एलेक्सले १ गोल गर्दैं सुरुवाती अग्रता लिएका थिए । सुरुवाती अग्रता बनाएको थ्रीस्टारले अग्रता कायम राख्न भने सकेन । मछिन्द्रकाे जीतमा खेलकाे बयालिसौं मिनेटमा शिशिर लेखीले गोल गर्दै खेललाई बराबरी पुर्याएका थिए ।
खेलकाे दोस्राे हाफमा ५१ औं मिनेटमा मछिन्द्रका समिरराज थोकरले १ गोल गर्दै टिमलाई अग्रता दिलाए । त्यस्तै खेलकाे ८९ औं मिनेटमा मछिन्द्रका स्टेफेनले थप १ गाेल गर्दै अग्रता बढाएका थिए । थ्रीस्टारले १ गोल पछि खेलका फर्कने प्रयासका बावजुत सकेन । दोस्राे सेमिफाइनलकाे म्यान अफ दी म्याच मछिन्द्रका टिम क्याप्टेन देवेन्द्र तामाङ घाेषित भए । उनले १० हजार रुपैंया हात पारे ।
फाइनल प्रवेशसँगै मछिन्द्रले फाइनलमा पहिलो चर्च व्वाइज युनाइटेडसँगकाे भेट पक्का गरेकाे छ । यसअघि शुक्रबार भएको पहिलो सेमिफाइनल खेलमा विभागीय टोली एपीएफलाई ३–२ गोल अन्तरले हराउँदै चर्च ब्वाइज प्रतियोगिताको फाइनलमा स्थान बनाएकाे थियाे । साेमबार हुने फाइनलमा उपाधी रक्षाका लागि प्रतियाेगितामा पहिलाे पटक सहभागी चर्च व्वाइज र मछिन्द्र भिड्ने छन् ।
प्रतियोगितामा मछिन्द्रले सर्लाहीको बागमती युवा क्लबलाई र थ्री स्टारले हिमालयन शेर्पालाई हराउँदै सेमिफाइनलमा प्रवेश गरेको हो । गत संस्करणमा मछिन्द्रले विभागीय टोलि सशस्त्र प्रहरी बलको एपीएफलाई हराउँदै उपाधी जितेको थियो भने थ्री स्टारले चौथो संस्करणमा क्यामरुनको अफ्रिकन रुट्स एसोसिएसनलाई हराउँदै उपाधी जितेको थियो ।
प्रतियोगिताको उपाधि विजेताले १० लाख र उपविजेताले ५ लाख प्राप्त गर्नेछ । प्रतियोगिताको सर्वोत्कृट खेलाडीलाई १ लाख १ हजार तथा विधागत उत्कृष्ट खेलाडीलाई जनही २५ हजार रुपैयाँसहित ट्रफी प्रदान गरिने आयोजकले जनाएको छ । प्रतियाेगितामा ७ विभागीय टोली तथा ३ वटा माेफसलकाे टाेलीले सहभागिता जनाएका थिए ।
मकवानपुर । सरकारले राष्ट्रिय खोप कार्यक्रम अन्तरगत सञ्चालन गरेको पाठेघरको मुखको क्यान्सरविरूद्धको एचपीभी खोप अभियानमा मकवानपुर जिल्लामा ९७ प्रतिशत किशोरीले खाेप लगाएका छन् । पाठेघरको मुखको क्यान्सर गराउने एचपीभी (ह्युमन प्यापिलोमा भाइरस) विरुद्धको खोप अभियानकाे रुपमा दिइएकाे हाे ।
२२ माघबाट सुरु अभियानकाे अन्तिम दिन ६ फागुनसम्म जिल्लाका १० वटै पालिकामा २० हजार १२३ जनाले खाेप लगाएका हुन् । जिल्ला जनस्वास्थ्य कार्यालयका अनुसार जिल्लाका २० हजार ७८३ जना किशोरीहरुमा खाेप लगाउने लक्ष्य लिइएकाेमा २० हजार १२३ जनालाई उक्त खाेप लगाइएकाे हाे । अभियानका क्रममा ६ कक्षादेखि १० कक्षासम्म अध्ययनरत छात्रा र विद्यालयबाहिर रहेका १० देखि १४ वर्षका किशोरीलाई स्थानीय तहमा रहेका केन्द्रहरूमार्फत खोप प्रदान गरिएको हाे ।
जिल्लाकाे हेटौंडा उपमहानगरपालिकामा सुबै भन्दा बढी किशाेरीले खाेप लगाएका छन् । उपमहानगरमा ९ हजार २३८ जनालाई खाेप लगाउने लक्ष्य लिइएकेमा ९ हजार ११ जनालाई खाेप लगाइएकाे स्वास्थ्य कार्यालयका सूचना अधिकारी लक्ष्मण घिमिरेले जानकारी दिए । यो उपमहानगरमा लगाइएकाे खाेपकाे ९८ प्रतिशत हाे ।
यसैगरी थाहा नगरपालिकामा १ हजार ८८९ जना किशाेरी लक्षितमा १ हजार ८०५ जना अर्थात ९५ प्रतिशत, इन्द्र सरोवर गाउँपालिकामा ४८८ जनकाे लक्ष्य गरिएकाेमा ४ सय ५७ जना अर्थात ९५ प्रतिशत, भीमफेदीमा ८४४ जनाकाे लक्ष्यमा ७९५ अर्थात ९४ प्रतिशत, मकवानपुरगढी गाउँपालिकामा १ हजार ७३ जनाकाे लक्ष्यमा ९ सय ८५ जना अर्थात ९२ प्रतिशत, बकैयामा १ हजार ८५३ जनाकाे लक्ष्यमा १ हजार ७१० अर्थात ९२ प्रतिशत किशाेरीलाई उक्त खाेप लगाइएकाे घिमिरेले जानकारी दिए ।
उनका अनुसार बागमतीमा १ हजार ३३९ जनकाे लक्ष्यमा १ हजार २९५ जना अर्थात ९७ प्रतिशत, मनहरीमा २ हजार २६२ जनाकाे लक्ष्यमा २ हजार ५४ अर्थात ९१ प्रतिशत राक्सिराङमा ७ सय ९८ जनामा ७ सय ७३ अर्थात ९७ प्रतिशत, कैलाशमा १ हजार १ मा ९ सय ९३ अर्थात ९५ प्रतिशत किशाेरीमा खोप लगाइएकाे हाे । यसैगरी एमसीएच क्लिनिक मार्फत २ सय ६३ जना किशोरीलाई एचपीभी खाेप लगाइएकाे उनले बताए ।
हेटौंडा उपमहानगरपालिकालाई वितरण गरिएकाे खाेप डोज मध्ये १५ भायल खाेप ड्यामेज भएकाे तथा मकवानपुर गढीमा ४५ जना किशाेरीले गत वर्ष नै खाेप लगाइएकाे पाइएकाे उनले जानकारी दिए ।
बागमती प्रदेशमा २ लाख ५६ हजारले लगाए खाेप
बागमती प्रदेशका २ लाख ५६ हजार १९१ जना किशाेरीले खोप लगाएका छन् । अभियानकाे अन्तिम दिन ६ फागुनसम्म २ लाख ९८ हजार ९०५ जना किशोरीलाई खोप लगाउने लक्ष्य लिइएकाेमा प्रदेशमा ८६ प्रतिशतले मात्रै खोप लगाएका हुन् । बागमती प्रदेश स्वास्थ्य मन्त्रालयले दिएको जानकारी अनुसार प्रदेशका १३ जिल्लामध्ये लक्ष्यको सबैभन्दा बढी नुवाकोटमा सबै भन्दा बढी ९९.८३ प्रतिशत किशोरीहरुले खोप लगाएका छन् ।
यस्तै दोलखामा लक्षित किशोरीमध्ये ९९ प्रतिशतले खोप लगाएका छन् । रामेछापका ९८ प्रतिशत, सिन्धुपाल्चोकका ९७ प्रतिशत, सिन्धुली र काभ्रेका ९६ प्रतिशत किशोरीलाई खाेप लगाइएकाे छ । मन्त्रालयका अनुसार धादिङका ९५ प्रतिशत, मकवानपुरका ८८ प्रतिशत, चितवनका ८४ प्रतिशत, भक्तपुरका ८५ प्रतिशत, काठमाडौं र ललितपुरका ७९ प्रतिशत र सबैभन्दा कम रसुवाका ९६.१ प्रतिशत एचपिभी खोप लगाइएको हाे ।
संख्यात्मक हिसाबले काठमाडौंमा सबैभन्दा बढी किशाेरीलाई खाेप लगाइएकाे छ । काठमाडौंका १ लाख ११ हजार १०४ जनालाई खाेप लगाउने लक्ष्य राखिएकाेमा ८८ हजार १०८ जना किशोरीलाई खाेप लगाइएकाे मन्त्रालयले जनाएकाे छ । सबैभन्दा कम रसुवाका १ हजार ६८६ जनामा एक हजार ६२० जनालाई खाेप लगाइएकाे हाे । नुवाकोटमा ११ हजार १७८ जनालाई खोप लगाउने लक्ष्य लिइएकोमा ११ हजार १६० जना किशोरीहरुले खोप लगाएकाे मन्त्रालयले जनाएकाे छ ।
यसैगरी दोलखामा ६ हजार ५२० जना किशोरीलाई खोप लगाउने लक्ष्य राखिएकोमा ६ हजार ४८० जनाले खोप लगाएका हुन् । रामेछापका ७ हजार ७८ जना किशोरीलाई खोप लगाउने लक्ष्य राखिएकोमा ६ हजार ९५२, सिन्धुपाल्चोकका १० हजार ४६८ मध्ये १० हजार ११७ जना, सिन्धुलीका १४ हजार ६२२ मध्ये १४ हजार ८२ जनालाई एचपीभी खोप लगाइएको मन्त्रालयले जनाएको छ ।
यस्तै मन्त्रालयका अनुसार काभ्रेका १६ हजार ११३ जनामा १५ हजार ५१५, धादिङका १४ हजार ५७३ जनामा १३ हजार ८२४, मकवानपुरका २२ हजार ७१३ जनामा २० हजार ९३, चितवनका ३१ हजार ५७० जनामा २६ हजार ४४७, भक्तपुरका १९ हजार २९५ जनामा १६ हजार ३७६ ललितपुरका ३१ हजार ९८५ जनामा २५ हजार ११७ जना किशोरीले खोप लगाएका छन् ।
अभियानका क्रममा ६ कक्षादेखि १० कक्षासम्म अध्ययनरत छात्रा र विद्यालयबाहिर रहेका १० देखि १४ वर्षका किशोरीलाई स्थानीय तहमा रहेका केन्द्रहरूमार्फत खोप प्रदान गरिएको छ । खोप अभियान सञ्चालनका लागि प्रदेशमा ८ हजार ७३६ स्वयंसेवक र ४ हजार ३२४ जना कर्मचारी खटाइएको प्रदेशको स्वास्थ्य मन्त्रालयले जनाएको छ ।

मकवानपुर । मकवानपुरकाे हेटौंडा उपमहानगरपालिकामा जारी अनुपम घलान स्मृति यु–१६ नगरस्तरीय फुटबल प्रतियोगिताकाे फाइनल समिकरण पुरा भएकाे छ ।
हेटौंडा नगर खेलकुद विकास समितिको आयोजनामा सञ्चालन भएकाे सेमीफाइनल चरणको खेलमा जीत निकाल्दै हेटौंडा–१५ र हेटौंडा–१८ फाइनलमा प्रवेशका हुन् । उक्त प्रतियोगिता अन्तर्गत शनिबार आज हेटौंडा–१५ र हेटौंडा–१८ बीच उपाधिका लागि भिडन्त हुने भएको छ ।
शुक्रबार भएको पहिलो सेमीफाइनल खेलमा हेटौंडा–८ लाई हेटौंडा–१५ ले २–० गोल अन्तरले पाखा लगाएकाे हाे । हेटौंडा–१५ को जीतमा रोहित डिम्डुङ्गले २ गोल गरे । उनले खेलको १२ औं मिनेटमा पहिलो गोल र ५१ औं मिनेटमा दोस्रो गोल गरेका हुन् । म्यान अफ द म्याच डिम्डुङ्ग नै घोषित भए ।
यस्तै, दोस्रो खेलमा हेटौंडा–९ लाई हेटौंडा–१८ ले २–१ गोल अन्तरले स्तब्ध पारेकाे हाे । हेटौंडा–९ को तर्फबाट पहिलो हाफको पहिलो मिनेटमा नै गोल गर्दै सञ्जिव कार्कीले अग्रता दिलाएका थिए । १–० गोलले पछि परेको हेटौंडा–१८ बाट अभिराज थापा मगरले खेलको ३६ औं मिनेटमा गोल गर्दै १–१ गोलको बराबरीमा ल्याएका थिए । खेलको ३९ औं मिनेटमा अभिराजले दोस्रो गोल गर्दै खेल २–१ को स्थितिमा पुर्याएका थिए । म्यान अफ द म्याच थापा नै घोषित भए ।
हेटौंडा उपमहानगरपालिकाकाे आर्थिक सहयोग तथा नगर खेलकुद विकास समितिकाे व्यवस्थापनमा ७ फागुनबाट हेटौंडा ५ स्थित पिप्ले क्याम्पा रंगशालामा प्रतियोगित भइरहेकाे छ । प्रतियोगितामा प्रथम हुने टिमले १ लाख रुपैया प्राप्त गर्ने छन् भने द्वितीय हुने टिमले ७० हजार रुपैया हात पार्ने छन् ।
यसैगरी विधागत रुपमा उत्कृष्ट तर्फ समेत पुरस्कारकाे व्यवस्था गरिएकाे छ । सर्वोत्कृष्ठ खेलाडी, उत्कृष्ठ फरवार्ड, उत्कृष्ठ किपर, उत्कृष्ठ प्रशिक्षक, उत्कृष्ट डिफेन्सले जनही ५/५ हजार रुपैंया प्राप्त गर्नेछन् । प्रतियाेगिता नक आउटका आधारमा खेलाइएकाे आयोजकले जनाएकाे छ । प्रतियोगितामा हेटौंडा उपमहानगरपालिका भित्रका वडाहरुबाट १२ टिमकाे सहभागिता रहेकाे थियाे ।
मकवानपुर । मकवानपुरकाे हेटौंडामा दोस्रो राष्ट्रिय नवसर्जक उत्सव–२०८१ सुरु भएको छ । नवसर्जक साहित्य चौतारी नेपालको आयोजनामा शुक्रबारबाट सुरु उत्सव शनिबार (आज) सम्म चल्ने छ ।
देशका सातै प्रदेशबाट नवसर्जक सहभागी उत्सवमा शुक्रबार पहिलो दिन साहित्यका विभिन्न विधामा कार्यशाला गरिएकाे थियाे । उत्सव शुभारम्भकाे दिन नवसर्जकहरुले हेटौंडा उपमहनागरपालिका–११ स्थित शहीद स्मारकको भ्रमण गरेका थिए । उनीहरुले बागमती प्रदेशका पहिलाे मुख्यमन्त्री डोरमणि पौडेलसँग ‘शहीद स्मारककाे परिकल्पना, विकास र भावी याेजना’ विषयमा अन्तरसंवाद समेत गरेका छन् ।
यसैगरी हेटौडा–४ स्थित भुटनदेवी माध्यमिक विद्यालय परिसरमा सहित्यका विभिन्न ९ विधामा कार्यशाला आयोजना गरिएकाे थियाे । गजल लेखन, मुक्तक लेखन, लोकलय कविता लेखन, गद्य कविता लेखन, कथा लेखन, यात्रा संस्मरण, नाटक लेखन, हास्ययव्यङ्ग्य लेखन तथा चित्रकलाकाे कार्यशाला भएकाे आयोजकले जनाएकाे छ ।
गजलमा केशव समर्पण, मुक्तकमा विश्वनाथ सञ्जेल, लोकलय कवितामा पुरुषोत्तम आचार्य, गद्य कवितामा सुवास खनाल, कथामा निमेष निखिल, यात्रा संस्मरणमा रमेशमोहन अधिकारी, नाटकमा माधव पोखरेल, हास्ययव्यङ्ग्यमा राजकुमार लामिछाने र चित्रकलामा सूर्य सन्यासीले सहजीकरण गरेका थिए । उक्त कार्यशालाहरुमा विद्यालय तहका २ सय ७० जना विद्यार्थी सहभागी रहेकाे आयोजकले जनाएकाे छ ।
नजसर्जक उत्सवको दोस्रो दिन आज शनिबार भुटनदेवी माध्यमिक विद्यालय परिसरमै नवसर्जक साहित्य चौतारीको प्रथम केन्द्रीय अधिवेशन हुँदैछ । कार्यक्रममा स्रष्टा सम्मान, राष्ट्रव्यापी गजल प्रतियोगिता, गजल तथा नृत्य, बहत्, मुक्तक, कविता वाचन, पुस्तक प्रदर्शनी हुनेछ ।
यसैगरी नवप्रतिभा प्रवर्द्धनमा विद्यालय र स्थानीय सरकारकाे भूमिका विषयमा बहस कार्यक्रम समेत हुनेछ । बहसमा हेटौंडा उपमहानगरपालिका महिला तथा बालबालिका महाशाखा प्रमुख विष्णु कुमारी लामिछाने,श्रीराम दाहाल प्राध्यापक श्रमिक मावि, विनोद सुवेदी प्रिन्सिपल बालजागृति इंग्लिस स्कुल,पत्रकार सुरेश श्रेष्ठ सहभागी हुनेछन् । कार्यक्रमकाे अभिभावकत्व वडाध्यक्ष सिग्देल तथा सहजिकरण नवसर्जक साहित्य चौतारी नेपालकी सचिव कृतिका लौडारीले गर्नेछिन् ।
शुक्रबार नवसर्जक साहित्य चौतारी नेपालकी अध्यक्ष प्रसन्ना चौलागाईको अध्यक्षता तथा प्रा.डा. चुणामणि बन्धुको प्रमुख आतिथ्यमा उद्घाटन समारोह भएको थियो । कार्यक्रममा ४ नम्बर वडाध्यक्ष नवीन सिग्देललगायतकाे आतिथ्यता थियो ।
मकवानपुर । मकवानपुरकाे हेटौंडामा जिल्ला स्तरीय शिक्षक भलिबल प्रतियोगिता शुरू भएको छ । हेटौडा उपमहानगरपालिका ४ नम्वर वडा कार्यालयको आयोजनामा प्रतियोगिता शुरु भएकाे हाे ।
शुक्रबारबाट हेटौंडामा सुरु प्रतियाेगिताकाे उद्घाटन खेलमा भानु माध्यमिक विद्यालय मकवानपुरगढी विजयी भएको छ । हेटौंडा–५ मा रहेको ज्ञानोदय आवासीय माध्यमिक विद्यालयलाई २५–५ र २५–१६ को सोझो सेटले पराजित गर्दै भानुले विजयी सुरुवात गरेका हाे । यस्तै आज भएको दोस्रो खेलमा बागमती गाउँपालिकाको जनता मावि विजयी भएको छ । जनताले कृष्ण आर्दश इङ्लिस सेकेण्डरी विद्यालयलाई २५–१६ र २५–२३ को सोझो सेटले पराजित गरेकाे हाे ।
यस्तै आज भएको तेस्रो खेलमा जनज्योति माध्यमिक विद्यालय विजयी भएको छ । हेटौंडा–१० मा रहेको तुल्सी मेहर मेमोरियल माध्यमिक विद्यालयलाई २५–२२ र २५–१५ को सोझो सेटले पराजित गर्दै जनज्योति विजयी भएको हो । यसैगरी आज भएको चौथो खेलमा बकैयाँ गाउपालिकाको महेन्द्र माध्यमिक विद्यालय विजयी भएको छ । हेटौंडा क्याम्पसलाई २५–५ र २५–९ को सोझो सेटले पराजित गर्दै महेन्द्र विद्यालय विजयी भएको हो ।
आज भएको पाचौँ खेलमा शारदा मावि आमभञ्ज्याङ विजयी भएको हो । शारदाले नवोदय शिशु सदन अङ्ग्रेजी माध्यमिक विद्यालयलाई २५–१६ र २५–८ को सोझो सेटले पराजित गरेको हो । आज भएको छैठौं खेलमा जीएस निकेतन माध्यमिक विद्यालय विजयी भएको छ । जीएसले जनजागृति मावि बकैयाँलाई २५–१६ र २५–११ को सेटमा पराजित गरेको हो । आज भएको सातौं खेलमा बाघभैरव मावि विजयी भएको छ । श्रमिक माविलाई २५–१० र २५–१८ को सोझो सेटले पराजित गर्दै बाघभैरव विजयी भएको हो ।
यसैगरी आज भएको आठौँ खेलमा जनक मावि भिरकोट विजयी भएको छ । बज्रबाराही मावि टिस्टुङलाई २५–१९ र २५–२२ को सेटले पराजित गर्दै जनक विजयी भएको हो । यसैगरी महेन्द्र मावि छतिवन र भुटनदेवी मावि विचको खेलमा पहिलो सेट महेन्द्र मावि विजयी भएता पनि अध्यारोको कारणले गर्दा उक्त खेल पुनः भोलि बिहान खेलाइने प्रतियोगिताका संयोजक राजाराम पोखरेलले जानकारी दिए ।
दुई दिन सम्म सञ्चालन हुने प्रतियोगितामा जिल्लाको २६ वटा विद्यालयले सहभागिता जनाएका छन् । प्रतियोगितामा विजेता टिमलाई नगद २५ हजार रुपैयाँ र दोस्रो हुने टिमलाई नगद १५ हजार रुपैयाँसहित शिल्ड, मेडल र प्रमाणपत्र प्राप्त गर्ने छन् । प्रतियोगिताको सेमिफाइनल संस्करणमा पराजित दुई टिमलाई नगद पाँच हजार रुपैयाँ प्रदान गरिने छ । यसैगरी प्रतियोगितामा उत्कृष्ट स्पाइकरलाई नगद २ हजार रुपैयाँ, उत्कृष्ट खेलाडीलाई नगद ३ हजार रुपैयाँ र उत्कृष्ट सेटरलाई नगद २ हजार रुपैयाँ प्रदान गरिने आयोजकले जनाएको छ ।