मकवानपुर । आगामी मंसिर १६ देखि २७ गतेसम्म हुने दशौं राष्ट्रिय खेलकुद प्रतियोगिताका लागि प्रस्तावित खेलस्थलको टुंगो लागेकाे छ । राष्ट्रिय खेलकुद परिषद् (राखेप) को आयोजना तथा कर्णाली खेलकुद विकास परिषद्को सहआयोजनामा हुने प्रतियोगितामा ३२ खेल विधा संचालन गरिने भएकाे छ ।
प्रतियोगितामा सात प्रदेश, तीन विभागीय टोली र गैरआवासीय नेपाली सङ्घ (एनआरएनए) सहित ११ टोलीका खेलाडी सहभागी हुनेछन् । प्रतियोगितामा करिब छ हजार पाँच सय खेलाडी सहभागी हुने अनुमान गरिएको छ । खेलाडीसँगै प्रशिक्षक, व्यवस्थापक, निर्णायक, प्राविधिक तथा अन्य पदाधिकारीको समेत सहभागिता रहनेछ । खेल तथा खेलस्थल सम्बन्धी विवरण अनुसार प्रतियोगिताका २० खेल पूर्णरूपमा सुर्खेतमा सञ्चालन हुने भएकाे छ । ४ खेल विधा भने सुर्खेतसँगै नेपालगन्ज तथा कर्णालीका अन्य जिल्लामा सञ्चालन हुने बताइएकाे छ । बाँकी ८ खेल भने सुर्खेतबाहिर सञ्चालन गर्ने तयारी गरिएको छ । प्रतियोगिताका लागि कर्णाली प्रदेशका सुर्खेत, दैलेख, जाजरकोट, कालिकोट, सल्याण, पश्चिम रुकुम र जुम्लाका साथै बाँके जिल्लाको नेपालगन्जलाई समेत खेलस्थलका रूपमा प्रस्ताव गरिएको छ। ।
प्रस्तावित विवरण अनुसार सुर्खेतमा एथलेटिक्स, कुस्ती, ब्याडमिन्टन, कबड्डी, बक्सिङ, कराते, बास्केटबल, फुल कन्ट्याक्ट कराते, क्रिकेट, फुटबल, ह्यान्डबल, हक्की, ई -स्पोट्र्स, स्क्वास, रग्बी, साइकलिङ, तेक्वान्दो, भलिबल, उसु र सेपाकताक्रो सञ्चालन हुनेछन् । यस्तै, शारीरिक सुगठन सुर्खेत र कालिकोटमा तथा जुडो सुर्खेत र जाजरकोटमा सञ्चालन गर्ने प्रस्ताव गरिएकाे छ भने जिम्न्यास्टिक सुर्खेत र दैलेखमा तथा भारोत्तोलन नेपालगन्ज र सुर्खेतमा सञ्चालन हुनेछ ।
सुर्खेतबाहिर सञ्चालन हुने खेलमा आईटीएफ तेक्वान्दो दैलेख, टेबल टेनिस सल्याण, बुद्धिचाल दैलेख, खो-खो पश्चिम रुकुमको चौरजहारी, सुटिङ नेपालगन्ज, पौडी नेपालगन्ज, टेनिस नेपालगन्ज र आर्चरी जुम्ला रहेका छन् । यसैगरी कर्णाली प्रदेशका विभिन्न जिल्लामा खेल सञ्चालन हुने भएकाले खेलाडी तथा पदाधिकारीको आवास, यातायात, खेल सामग्री, सुरक्षा, स्वास्थ्य र प्रतियोगिता सञ्चालनका लागि आवश्यक पूर्वाधार व्यवस्थापनलाई पनि प्राथमिकतामा राखिएको छ।
शिक्षा तथा खेलकुदमन्त्री एवं दशौं राष्ट्रिय खेलकुदको मूल आयोजक समितिका अध्यक्ष सस्मित पोखरेलको अध्यक्षतामा बसेको बैठकले प्रतियोगितामा सात प्रदेश, तीन विभागीय टोली र गैरआवासीय नेपाली संघ (एनआरएनए) गरी ११ टोलीको सहभागिता गराउने निर्णय गरेको थियो । बैठकमा कर्णाली प्रदेशका मुख्यमन्त्री मंगलबहादुर शाहीसहित सम्बन्धित निकायका पदाधिकारी तथा प्रतिनिधिको सहभागिता थियो ।
दशौँ राष्ट्रिय खेलकुद प्रतियोगिता यसअघि विभिन्न कारणले पटकपटक सर्दै आएको छ । प्रतियोगिता आयोजना हुन नसक्दा खेलाडीको तयारी, छनोट प्रक्रिया र खेलकुद गतिविधिमा समेत असर परेको थियो । यसपटक भने आयोजकले मंसिर १६ देखि २७ गतेसम्म प्रतियोगिता सञ्चालन गर्ने प्रतिबद्धता व्यक्त गरेका छन् । खेलस्थलको टुंगो लागेसँगै अब प्रतियोगिताका लागि आवश्यक पूर्वाधार, व्यवस्थापन र खेल सञ्चालनको तयारीलाई तीव्रता दिने बाटो खुलेको छ ।
आइतबार वीरेन्द्रनगरमा बसेको मूल आयोजक समितिको बैठकमा शिक्षा तथा खेलकुदमन्त्री पोखरेलले प्रतियोगिता निर्धारित मितिमै हुनेमा कुनै शङ्का नरहेको बताए । उनले प्रतियोगितालाई प्रभावकारी र उपलब्धिमूलक बनाउन सङ्घीय, प्रदेश र स्थानीय सरकारबीच समन्वय तथा सहकार्य आवश्यक रहेको उल्लेख गर्दै देशभरका खेलाडीलाई कर्णालीमा स्वागत गर्न सबै सरोकारवालालाई आह्वान गरे ।
कर्णाली प्रदेशका मुख्यमन्त्री मङ्गलबहादुर शाहीले प्रतियोगिताका लागि प्रदेश सरकारले बजेट विनियोजन गरेको जानकारी दिए । उनका अनुसार प्रदेश रङ्गशालाका लागि नौ करोड, खेल पूर्वाधारका लागि पाँच करोड र दशौँ राष्ट्रिय खेलकुद प्रतियोगिता सञ्चालनका लागि तीन करोड रुपैयाँ विनियोजन गरिएको छ । प्रतियोगिता निर्धारित समयमै सम्पन्न गर्न आवश्यक तयारी र व्यवस्थापनमा प्रदेश सरकारले प्राथमिकता दिएको उनको भनाइ छ ।
प्रतियोगितामा सहभागी हुने पाहुनालाई कर्णालीका पर्यटकीय क्षेत्र, सांस्कृतिक सम्पदा र स्थानीय जीवनशैलीसँग परिचित गराउन सके भविष्यमा आन्तरिक पर्यटन प्रवर्द्धनमा समेत सहयोग पुग्न सक्छ ।
१ लाख ११ राशीको भैरव पुरस्कारबाट रिजाल सम्मानित
Tags: No Comments
मकवानपुर । मकवानपुरका अग्रज साहित्यकार तथा हास्यव्यङ्गयकार आरसी रिजाल १ लाख ११ हजार राशीको भैरव पुरस्कार–२०८३ बाट सम्मानित हुनुभएको छ ।
आइतबार काठमाडौंमा भैरव पुरस्कार गुठीले एक लाख ११ हजार १११ रुपैयाँ नगदसहित रिजाललाई सम्मानित गरेको हो । भैरव अर्यालको ५० औं स्मृति दिवसको सन्दर्भमा मकवानपुरका रिजालसँगै अन्य दुई जना पनि सम्मानित हुनु भएको छ ।
भैरव वाङ्मय पुरस्कारबाट टेकवीर मुखिया सम्मानित हुनु भएको छ । यस्तै भैरव प्रतिभा पुरस्कारबाट देवीप्रसाद चापागाई सम्मानित हुनुभएको छ । मुखिया १ लाख १ हजार रुपैयाँ नगद तथा चापागाई ५१ हजार १११ रुपैयाँ नगदको उक्त पुरस्कारबाट सम्मानित हुनुभएको हो ।
रिजाल सिस्नुपानी नेपाल मकवानपुरका संस्थापक, साहित्य संगम मकवानपुरका पूर्वअध्यक्ष बुढ्यौली साहित्य समाज मकवानपुरका अध्यक्ष हुनुहुन्छ । हाँस्यव्यंग्यकार रिजालको हाँस्यव्यंग्य कृति समेत प्रकाशित छन् ।
भैरव पुरस्कार गुठीका अध्यक्ष रोचक घिमिरेको अध्यक्षता तथा भैरव अर्यालका छोरा दीपक अर्याल र छोरी रश्मि अर्यालको उपस्थितीमा काठमाडौंको गोकर्णेश्वर जोरपाटीस्थित भैरव स्मृति भवनको सभाकक्षमा सम्मान कार्यक्रम भएको हो ।
मकवानपुर । चैनपुर जेसीज मनहरीको आयोजनामा सुरु भएको जेसीज कप खुला फुटबल प्रतियोगितामा मनहरी ४ ले विजयी सुरुवात गरेको छ ।
शनिबार भएको उद्घाटन खेलमा लामिटार एफसी मनहरी ३ लाई २-० ले हराउँदै मनहरी ४ नम्बर वडाले विजय सुरुवात गरेको हो । मनहरी ४ को जितमा दर्शन अधिकारीले २ गोल गरे । खेलको म्यान अफ द म्याच अधिकारी नै घोषित भए ।
प्रतियोगिता अन्तरगत आइतबार (आज) खरंगा एफसी र मनहरी ५ नम्बर वडा बीच खेल हुनेछ । प्रतियोगिताको उद्घाटन बागमती प्रदेश खेलकुद विकास परिषदका सदस्य सचिव दीपक लामाले गरेका हुन् । उनले खेल क्षेत्रको विकासमा सबै क्षेत्रसँग सहकार्य एवम् हातेमालो गर्न तयार रहेको बताए ।
प्रतियोगिता संयोजक नवराज रिजालको संयोजकत्व एवम् चैनपुर जेसीज मनहरीका अध्यक्ष सुरेश गौतमको अध्यक्षता भएको कार्यक्रममा मनहरी गाउँपालिका उपाध्यक्ष सीता पुलामी मगर, मनहरी ४ नम्बर वडा अध्यक्ष प्रकाश थापा, सानाकिसान कृषि सहकारीका अध्यक्ष गीता प्रजा लगायतले जेसीजसँगको सहकार्यले खुसी लागेको बताए । उनीहरुले आगामी दिनमा पनि सहकार्यलाई जारी राख्ने प्रतिबद्धता ब्यक्त गरेका थिए ।
प्रतियोगितामा चितवन जिल्लाको एक र मकवानपुरका ११ गरी १२ क्लवको सहभागिता रहेको छ । प्रतियोगिताको विजेताले १ लाख १ हजार १११ रुपैयाँ तथा उपविजेताले ५१ हजार १५१ रुपैयाँसहित ट्रफी र प्रमाणपत्र प्राप्त गर्नेछन् । यस्तै सर्वोत्कृष्ट खेलाडीले १० हजार तथा अन्य विधागत उत्कृष्टले जनही ५ हजार रुपैयाँसहित ट्रफी र प्रमाणपत्र प्राप्त गर्नेछन् ।
मकवानपुरको पश्चिमी क्षेत्रमा कृयाशिल युवाहरुको संस्था चैनपुर जेसीजले स्थापनाकालदेखी नै जेसीज कप खुला फुटबलको आयोजना गर्दै आएको छ ।
जंगलमा भेटिएको शवको पहिचान २ महिनापछि खुल्यो
Tags: No Comments
मकवानपुर । मकवानपुरको हेटौंडा स्थित एक सामुदायिक वनमा बोरा हालेर खाल्टोमा फालिएको शवको पहिचान २ महिनापछि खुलेको छ ।
हेटौंडा उपमहानगरपालिका–१५ स्थित सेल्फी रोड नजिक सामुदायिक वनमा गत साउन २२ गते भेटिएको महिलाको शव करिब दुई महिनापछि पहिचान खुलेको हो। शव डीएनए परीक्षणपछि भारतकी २२ वर्षीया अफ्रिना प्रविन भन्ने रुची खातुनको रहेको पुष्टि भएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार मृतक खातुन भारतको बेतिया बैरिया थाना सरैया भटवलिया–६ निवासी विवाहित महिला हुन्। उनी गत वैशाख ९ गते ६ महिनाकी छोरीसहित श्रीमानको घरबाट दाँतको उपचारका लागि भन्दै निस्किएपछि सम्पर्कविहीन भएकी थिइन्। मृतकको पहिचान उनका कपडा, गहनालगायतका आधारमा खोजी गर्ने क्रममा भारतको प्रहरीसँगको समन्वयमा खुलेको मकवानपुर प्रहरीले जनाएको छ ।
चितवनको भरतपुर महानगरपालिका–३, बेलचोक, नौघरे, गणेशमार्गमा कोठा भाडामा लिएर बस्दै आएका २७ वर्षीय राहुल कुमार गुप्ता भन्ने ईश्वर कुमारसँग उनी बस्दै आएको समेत खुलेको मकवानपुर प्रहरीले जनाएको छ । अनुसन्धानबाट रुची खातुनको हत्या भएको र घटनामा राहुल कुमार गुप्ताको संलग्नता रहेको खुलेको हो ।
मृतककी आमा फातमा खातुनले भदौ ४ गते राहुलविरुद्ध जिल्ला प्रहरी कार्यालय मकवानपुरमा कर्तव्य ज्यान मुद्दामा किटानी जाहेरी दिएकी थिइन् । डीएनए परीक्षणमा मृतकको डीएनए उनकी आमाको नमुनासँग मेल खाएपछि असोज १६ गते शुक्रबार फातमाले शव बुझेर लगेको प्रहरीले जनाएको छ।
घटनामा संलग्न भनिएका राहुलविरुद्ध भारतको नगर थाना बेतियामा समेत मुद्दा दर्ता भएको र उनी हाल भारतको कारागार कार्यालय बेतियामा थुनामा रहेको प्रहरीले जनाएको छ।
मकवानपुर । बागमती प्रदेशका मुख्यमन्त्री किरण थापा मगरले विश्वविद्यालयलाई ज्ञान निर्माण, अनुसन्धान र नयाँ विचारको केन्द्रका रूपमा विकास गर्नुपर्ने बताउनु भएकाे छ। शुक्रबार वन विज्ञान अध्ययन संस्थान, हेटौँडा क्याम्पसद्वारा आयोजित फर्स्ट ग्राजुएट कन्फ्रेन्समा मुख्यमन्त्री थापामगरले यस्तो कुरा बताउनु भएकाे हाे ।
वन क्षेत्र वातावरणीय सन्तुलन, जैविक विविधता संरक्षण, जलाधार तथा माटो संरक्षणसँगै नागरिकको जीविकोपार्जनको महत्त्वपूर्ण आधार रहेको छ’ मुख्यमन्त्री थापामगरले भने ‘शिक्षा र ज्ञानलाई समाज, राष्ट्र तथा वातावरणको हितमा प्रयोग गर्नुपर्ने हुन्छ ।’ वनले वातावरणीय सन्तुलन, जैविक विविधता, जलाधार, -माटो संरक्षण र जीविकोपार्जनमा महत्वपूर्ण भूमिका खेल्ने भएपनि जलवायु परिवर्तन, वन डढेलो, जैविक विविधता ह्रास र मानव–वन्यजन्तु द्वन्द्व प्रमुख चुनौतीका रूपमा रहेको उहाँले जानकारी दिनुभयो ।
‘वन तथा वातावरण संरक्षणका लागि सरकार, विश्वविद्यालय, अनुसन्धान संस्था, समुदाय र निजी क्षेत्रबीच सहकार्य आवश्यक छ’ उहाँले भन्नुभयो । वन विज्ञानबाट उत्पादित दक्ष जनशक्तिको ज्ञान, अनुसन्धान र सीप प्रदेशको वन तथा प्राकृतिक स्रोत व्यवस्थापनमा प्रयोग गर्नुपर्ने उहाँले बताउनु भयो। बागमती प्रदेशमा प्राकृतिक स्रोत संरक्षण र आर्थिक विकासबीच सन्तुलन कायम गर्दै दिगो विकासमा जोड दिनुपर्ने बताउँदै उहाँले भन्नुभयो ‘अनुसन्धानलाई नीति निर्माण र स्थानीय समस्याको समाधानसँग जोड्नुपर्छ ।’
मुख्यमन्त्री थापाले भन्नुभयो ‘युवाहरूले आफ्नो ज्ञान र सीपलाई स्थानीय आवश्यकता, वन, वातावरण र जैविक विविधताको संरक्षणमा प्रयोग गर्नुपर्छ।’ सम्मेलनले विद्यार्थी, प्राध्यापक, अनुसन्धानकर्ता र नीति निर्माताबीच ज्ञान तथा अनुभव आदान–प्रदान गर्ने अवसर प्रदान गर्ने भएकाेले वन तथा वातावरणसँग सम्बन्धित विषयमा दक्ष जनशक्ति उत्पादनसँगै उनीहरूले हासिल गरेको ज्ञान, अनुसन्धान र सीपलाई प्रदेशको वन तथा प्राकृतिक स्रोत व्यवस्थापनमा प्रभावकारी रूपमा उपयोग गर्नुपर्नेमा मन्त्री थापाको जोड दिनुभयो ।
मुख्यमन्त्रीले पछिल्लो समय जलवायु परिवर्तन, वन डढेलो, जैविक विविधताको ह्रास तथा मानव–वन्यजन्तु द्वन्द्व वन तथा वातावरण संरक्षणका प्रमुख चुनौतीका रूपमा देखापरेको उल्लेख गर्दै यस्ता चुनौतीको सामना गर्न सरकारको एकल प्रयास पर्याप्त नहुने बताउनु भयो ।