मकवानपुर । मकवानपुरकाे मनहरी गाउँपालिकामा ५ वटा पक्की पुल निर्माण सम्पन्न गरेको छ। गाउँपालिकाले आफ्नै स्रोतको करिब साढे ३३ करोडकाे लगानीमा उक्त पुल निर्माण गरेकाे हाे ।
शनिबार बागमती प्रदेशसभा सदस्य ईन्द्रबहादुर बानियाँले निर्माण सम्मन्न ५ मध्ये २ वटा पुलको उद्घाटन गरेका छन् । ३ वटा पुलकाे गत वर्षनै उद्घाटन गरिएकाे थियाे । शनिरबार उद्घाटन गरिएका मध्ये मनहरी–३ मा रहेको ठाडोखोला पुल ८ दशमलव ४० मिटर चौडाइ र ९० मिटर लम्बाइको ३ स्पानकाे रहेकाे छ । जसको निर्माण हिराचन बानियाँ जेभीले ८ करोड ६७ लाख ५ हजार रुपैयाँमा गरेको हो। त्यस्तै हाँडी खोला पुल ३५ मिटर लम्बाइको १ स्पानको पुल हो, जसलाई भैरव नारायणम् जेभीले ५ करोड ३५ लाख ५१ हजार रुपैयाँको ठेक्का सम्झौतामा निर्माण गरेको हो।
पुल उद्घाटन कार्यक्रममा बानियाँले गाउँपालिकाकाे कामकाे प्रशंसा गर्दै हाँडीखोलाकाका कृषकले उत्पादन गरेका कृषि उपज बजारसम्म पुर्याउन सहज हुने बताए। ‘हाँडीखोलालाई पूर्व-पश्चिम राजमार्गसँग जोड्न प्रदेश सरकारमार्फत राप्ती खोलामा पुल बनायौं’ उनले भने । पालिकाकाे वडालाई जोड्न गाउँपालिकाले आफ्नै स्रोतबाट पुल बनाएकाे छ” उनले भने ‘लामिटार–मकरी सडक पिच गर्न प्रदेश सरकारमार्फत आवश्यक बजेट विनियोजन गर्न पहल गर्नेछु ।
प्रदेश सभा सदस्य बानियाँले २०८४ सालसम्म उक्त सडक जसरी पनि पिच गराएरै छोड्ने आश्वासन दिए । उनले हाँडीखाेलाकाे चकरीबाट हेटौंडा–१३ पदमपोखरी जोड्ने पुल निर्माणका लागि प्रदेश सरकारबाट बजेट व्यवस्थापन गरिने प्रतिबद्धता जनाए। वर्तमान शासन प्रणाली जनताको पक्षमा रहेको बताउँदै उनले भने ‘संघीयता र गणतन्त्र पछि विकासकाे सम्भावना प्रशस्त रहेकाे बताए।’
गाउँपालिकाकाे लामिटार–मकरी–चकरी–बेलडाँडा सडक अन्तर्गतका तीनवटा पुल गत वर्ष नै निर्माण सम्पन्न भई उद्घाटन समेत भइसकेकाे छ । तीमध्ये च्यापल खोला पुल (३ स्पान, लागत: ६ करोड २८ लाख ९८ हजार), ट्वाङ्ग्रा खोला पुल (२ स्पान, लागत: ६ करोड ४९ लाख ६० हजार) र मसिने खोला पुल (२ स्पान, लागत: ६ करोड ५९ लाख ५० हजार) रहेका छन् । यी तीनवटै पुलको निर्माण कार्य पनि बानियाँ हिराचन जेभीले गरेको थियाे ।
‘पुल निर्माण सकिएसँगै स्थानीयको दैनिक जीवनयापनमा सहजता आउने छ’ गाउँपालिकाका अध्यक्ष रञ्जन कालाखेतीले भने ‘पुलका कारण किसानका कृषि उपजले बजार पाउने छ ।’ गाउँपालिकाले हेटौंडा–१३ हुँदै मनहरीका वडा नं. १ देखि ४ लाई जोड्ने वैकल्पिक मार्गको अवधारणाअनुसार २०७७ सालमै एकैपटक ५ वटा पक्की पुल निर्माणको बहुवर्षीय ठेक्का लगाएको थियो।
मकवानपुर । बागमती प्रदेश सरकारको आर्थिक सर्वेक्षण सार्वजनिक भएको छ । शुक्रबारको प्रदेशसभामा प्रदेश सरकारको आर्थिक सर्वेक्षण पेश गरिएको हो ।
उक्त सर्वेक्षण अनुसार चालु आर्थिक वर्षमा प्रदेशको आर्थिक वृद्धिदर ५.१८ प्रतिशत रहने अनुमान गरिएको छ । प्रदेशका आर्थिक मामिला तथा योजना मन्त्री कुन्दनराज काफ्लेले प्रदेशको समग्र आर्थिक स्थितको प्रतिवेदन सभामा प्रस्तुत गरेका हुन् । उनले प्रस्तुत गरेको आर्थिक सर्वेक्षण अनुसार चालू आर्थिक वर्षमा बागमती प्रदेशको कुल ग्राहस्थ उत्पादन २२ खर्ब ३० अर्ब रुपैयाँ रहने प्रारम्भिक अनुमान गरिएको छ ।
प्रदेशले राष्ट्रिय तहको कुल ग्राहस्थ उत्पादनमा ३६.५२ प्रतिशत योगदान पुर्याउने संशोधित अनुमान रहेको छ । चालू आर्थिक वर्षमा पनि प्रतिव्यक्ति कुल ग्राहस्थ उत्पादनमा प्रदेश अगाडी रहने प्रारम्भिक अनुमान गरिएको छ । बागमती प्रदेशका नागरिकको प्रतिव्यक्ति आय २ हजार ६०२ अमेरिकी डलर रहेको छ । प्रदेशको कुल ग्राहस्थ उत्पादन उपभोक्ताको मूल्यमा २२ खर्ब ३० अर्ब रहने अनुमान गरेको छ ।
प्रदेश सरकारको चालु आर्थिक वर्षको फागुनसम्मको खर्च २५.६२ प्रतिशत पुगेको छ । चालु तर्फ ३५.२२ प्रतिशत खर्च भएको छ भने पुँजीगत तर्फ १९.९४ प्रतिशत मात्र खर्च गरिएको छ । सोही अवधिमा सरकारको कुल आय ४४ अर्ब ५६ करोड ५३ लाख रुपैयाँ रहेको छ । आर्थिक सर्वेक्षण अनुसार सवारी साधन करबाट प्रदेश सरकारले १२ अर्ब ५० करोड रुपैयाँ सङ्कलन गर्ने लक्ष्य राखेकोमा फागुनसम्म ७ अर्ब २२ करोड रुपैयाँ सङ्कलन भइसकेको छ ।
नेपाल राष्ट्र बैङ्कले सुरु गरेको प्रदेशगत मुद्रास्फीति प्रकाशन अनुसार, फागुन महिनामा बागमती प्रदेशको मुद्रास्फीति दर २.९८ प्रतिशत रहेको छ । नेपाल जीवनस्तर सर्वेक्षण अनुसार, बागमती प्रदेशमा गरिबीको रेखामुनिको जनसङ्ख्या १२.५९ प्रतिशत, बहुआयामिक गरिबी ७ प्रतिशत, गरिबिको गहनता ०.८९ प्रतिशत र फैलावट १२.६८ प्रतिशत रहेको छ ।
६ वटा समितिको प्रतिवेदन पेश
बागमती प्रदेशसभामा ६ वटा विषयगत समितिको प्रतिवेदन पेश गरिएको छ । प्रदेशसभाको शुक्रबारको बैठकमा ६ वटा संसदीय समितिको विषयगत वार्षिक प्रगति प्रतिवेदन पेश भएको हो ।
प्रदेश मामिला समितिका सभापति छिरिङ दोर्जे लामा, सार्वजनिक लेखा समितिका सभापति श्रीराम लामिछाने, शिक्षा, स्वास्थ्य तथा कृषि समितिका सभापति ठाकुरप्रसाद ढकाल, उद्योग, पर्यटन तथा वातावरण समितिका सभापति आनन्दकुमार श्रेष्ठ, अर्थ तथा विकास समितिका सभापति नुरज श्रेष्ठ र विशेषाधिकार समितिका सभापति मायादेवी शर्माले वार्षिक प्रतिवेदन पेश गरेका हुन् ।
यसैगरी प्रदेश चलचित्र विकास सम्बन्धी विधेयकलाई विषयगत समितिमा पठाउन बैठकले स्वीकृति प्रदान गरेको छ । बैठकमा आन्तरिक मामिला तथा कानून मन्त्री सुरजचन्द्र लामिछानेले प्रदेश चलचित्र विकास सम्बन्धी विधेयकलाई दफावार छलफलका लागि समितिमा पठाइयोस् भन्ने प्रस्ताव पेश गरेका थिए । उक्त प्रस्तावलाई सभामुख भुवनकुमार पाठकले निर्णयार्थ सभामा पेश गर्दा विषयगत समितिमा पठाउन सर्वसम्मत स्वीकृति भएको थियो ।
हेर्नुहोस प्रदेशको आर्थिक सर्वेक्षण
Economic Survey 2081-82_bgl63kdमकवानपुर । मकवानपुरको कैलाश गाउँपालिका पूर्ण खोप सुनिश्चिता, दिगोपना र पूर्ण संस्थागत गर्भजाचँ गाउँपालिका घोषणा भएको छ । शुक्रबार बागमती प्रदेश सभा सदस्य ईन्द्रबहादुर बानियाँले गाउँपालिकालाई पूर्ण खोप सुनिश्चिता गाउँपालिका घोषणा गरे ।
जिल्ला पूर्णखोप समन्वय समितिको सचिवालयले. पूर्णखोप सुनिश्चिता गाउँपालिकाको प्रमाणपत्र प्रदान गरे सँगै कैलाशलाई घोषणा गरिएको हो ।पूर्णखोप गाउँपालिका सुनिश्चित गर्न राष्ट्रिय पूर्णखोप निर्देशिका बमोजिम जेष्ठ २५ गते सम्ममा १६ महिनादेखी २३ महिना सम्मका सबै बालबालिकाहरुलाई १५ महिनाको उमेर भित्र पाउनुपर्ने सबै खोप प्राप्त गरेकोले कैलाश गाउँपालिका जिल्लामै पहिलो पटक सुनिश्चिताको घोषणा गरेको हो ।
कार्यक्रममा ४२ जना स्वास्थ्यकर्मीलाई प्रशंसापत्र प्रदान गरिनुका साथै वडाका १० वटा स्वास्थ्य चौकी, स्वास्थ्य तथा शिक्षा क्षेत्रका काम गर्ने ७ वटा संघसंस्थालाई सम्मानित गरिएको थियो । यसैगरी खोप कार्यमा सक्रिय रहेका उत्कृष्ट तीन स्वास्थ्यकर्मीलाई सम्मान गरिएको थियो । तीन उत्कृष्ट स्वास्थ्य चौकीलाई समेत सम्मान गरिएको छ । कार्यक्रममा पत्रकार गणेश दुलाललाई नगदसहित सम्मान गरिएको थियो ।
गाउँपालिकालाई पूर्णखोप पालिका घोषणा अघि बैशाख अन्तिम साता पूर्णखोप वडा सुनिश्चित घोषणा गरिएको थियो । कार्यक्रममै वडा घोषणा भएको प्रमाणपत्र वडाध्यक्ष र स्वास्थ्य चौकी प्रमुखहरुलाई सम्मानपत्र प्रदान गरिएको थियो । खोप समन्वय समिति गाउँपालिकाका संयोजक एंव गाउँपालिकाका अध्यक्ष लोकबहादुर मुक्तानको सभाध्यक्षता तथा प्रदेश सभा सदस्य ईन्द्रबहादुर बानियाँको प्रमुख आतिथ्यतामा भएकाे कार्यक्रममा गाउँपालिका उपाध्यक्ष बालकुमार मल्ल, जनस्वास्थ्य कार्यालय मकवानपुरका प्रमुख कृष्णबहादुर मिजारको विशेष आतिथ्यता रहेको थियो ।
मकवानपुर । मकवानपुर सुनचाँदी व्यवसायी संघ मकवानपुरले सुनमा लगाइएकाे २ प्रतिशत विलासिताकाे कर खारेज हुनु पर्ने माग गरेकाे छ । संघले बुधबार हेटौंडामा पत्रकार भेटघाट गरी आफ्ना माग सहित विरोधका कार्यक्रम घोषणा गरेकाे छ ।
पत्रकार भेटघाटमा संघ अध्यक्ष पवन शाक्यले सुनमा लगाइएकाे २ प्रतिशत विलासिता कर र बहुमुल्य हिरा पत्थरमा लगाइएकाे १३ प्रतिशत भ्याट खारेज गर्नुपर्ने, सुनकाे भन्सार दर ६ प्रतिशत कायम गर्नुपर्ने, सुनचाँदीकाे काराेबारकाे लागि प्रष्ट नीति नियमावली निर्माण गर्नुपर्ने माग राखेको बारे जानकारी दिए । ‘सुनचाँदी व्यवसायीले कमाउनु मात्रै भन्ने साेच राखेकाे छैन’ उनले भने ‘हामीले उपभाेक्ताकाे अधिकारलाई पनि ध्यानमा राखेका छाैं ।’
सरकारले आर्थिक वर्ष २०८२।०८३ काे बजेट भाषणमा उल्लेखित कर लगाउने उद्देश्य सही नभएकाे उनले बताए । ‘सरकारले लगाउने करले हालको मुल्यमा एक ताेला सुन बनाउँदा उपभाेक्ताले करिव ३५ हजार बढी खर्च गर्नुपर्ने हुन्छ’ उनले भने । नीति बनाएर राज्यलाई दिएकाे १०/१५ बर्ष हुँदा समेत कुनै चासाे नदिएकाे उनले जानकारी दिए । ‘सुनचाँदी व्यवसायीले सरकारसँग स्पष्ट नीति तथा आवश्यक नियमावलीकाे माग गरेका छाैं तर त्याे हाल सम्म प्राप्त हुन नसकेकाे उनले बताए ।
बढाइएकाे करकाे विषयमा संघले बुधबारबाटै हातमा कालाे पट्टी बाधेर विरोध जनाएकाे छ । यसैगरी २९ र ३० जेठ विहान हेटाैडा -१० स्थित संघकाे कार्यालयबाट विराेध र्याली गर्ने तथा सिमाचाेकमा काेणसभा गर्ने भएकाे छ । यस्तै २९ र ३० जेठमा देशव्यापी सुनचाँदी पसल बन्द गर्ने कार्यक्रम रहेकाे छ। हेटौंडा बजारमा मात्रै करिव २ सय वटा र मकवानपुर जिल्लाभर करिव २३५ वटा सुनचाँदी पसल छन् ।
मकवानपुर । मकवानपुरकाे हेटौंडामा सवारी दुर्घटना न्यूनीकरणकाे सचेतना अभिबृद्धी छलफल कार्यक्रम भएकाे छ । मंगलबार जिल्ला ट्राफिक प्रहरी कार्यालय मकवानपुरको आयोजनामा सरोकारवाला पक्षहरुसँग सचेतना अभिबृद्धी कार्यक्रमसँगै प्रतिबद्धता समेत गरिएकाे छ ।
कार्यक्रममा सहभागी यातायात व्यावसायी, प्रहरी, यातायात चालक, नागरिक समाजका प्रतिनिधिहरुले दुर्घटना न्यूनीकरणमा सहयोग गर्ने हस्ताक्षरसहित प्रतिबद्धता जनाए । कार्यक्रममा झल्लर, प्रेशर हर्न, फोकस लाइट सम्वन्धी छलफल र अन्तरक्रिया पनि भएको छ । प्रतिबद्धतासँगै मकवानपुरसहित बागमती प्रदेशमा संचालन हुने यातायातका साधनले झल्लर हटाउनु पर्ने छ । यसैगरी प्रेसर हर्न र फोकस लाइट प्रयोग गर्न नपाइने भएकाे छ ।
बागमती प्रदेश प्रहरी कार्यालय हेटौंडाका प्रहरी नायब महानिरीक्षक अरुण पौडेलले उद्घाटन् गरेकाे कार्यक्रममा प्रहरी बरिष्ठ उपरीक्षक प्रभु प्रसाद ढकाल, प्रहरी उपरीक्षक नरेशराज सुवेदी, विश्वराज खड्का, नेपाल पत्रकार महासंघ बागमती प्रदेश उपाध्यक्ष हरि हुमागाई, पत्रकार महासंघ मकवानपुरका अध्यक्ष बालकृष्ण अधिकारी, समाजसेवी सिद्धीलाल श्रेष्ठ, नारायणी यातायात व्यावसायी संघ महासचिब सरोज खनाल, नारायणी यातायात व्यावसायी कम्पनी निर्देशक माधव अधिकारी लगायतका उपस्थित थिए ।