मकवानपुर / मकवानपुरको विभिन्न विद्यालयहरुमा व्यावसायिक यौन शोषण विरुद्व सचेतना कार्यक्रम गरिएको छ । माइती नेपाल मकवानपुरको आयोजनामा भिमफेदी–१ को कृष्ण मावि, हेटौंडा–१८ को गोरक्षनाथ मावि, मनहरी–१ को बालजीवन ज्योति माविमा सचेतना कार्यक्रम गरिएको हो ।
उल्लेखित विद्यालयको कक्षा ८, ९ र १० का १५ / १५ जना किशोरीहरु तथा ५ /५ जना किशोरहरुलाई बालबालिकामाथि हुने व्यवसायिक यौन शोषण विरुद्ध अभिमुखिकरण कार्यक्रम गरिएको हो । कृष्ण माविमा भएको कार्यक्रममा विद्यालय व्यवस्थापन समितिका अध्यक्ष तथा भिमफेदी गाउँपालिका वडा १ का वडा अध्यक्ष काशिराम बज्यु, शिक्षकहरु नन्दलाल लामा, दिपक पुडासैनीको उपस्थिति रहेको थियो ।
यसैगरी हेटौंडा–१८ स्थित गोरक्षनाथ माविमा आयोजना गरिएको कार्यक्रममा विद्यालय व्यवस्थापन समिति अध्यक्ष शैलेन्द्रराज बानियाँ, प्रध्यानाध्यापक योगराज खतिवडा, सहायक प्रध्यानाध्यापक प्रेमप्रसाद घिमिरे शिक्षक निर्माला चौलागाईंलगायतको उपस्थिति रहेको थियो । यसैगरी मनहरी–१ को बालजीवन ज्योति माविमा आयेजना गरिएको कार्यक्रममा वडा अध्यक्ष एवम् विद्यालय व्यवस्थापन समिति अध्यक्ष शिवप्रसाद खनाल, प्रध्यानाध्यापक एकराज गौतम, शिक्षकहरु दीलकुमार स्याङ्तान, डीबी अर्याल तथा विद्यालय व्यवस्थापन समिति सदस्य नितुमाया थिङ्गको उपस्थिति रहेको थियो ।
सचेतना कार्यक्रमले आफूहरुलाई सधैं सचेत रहनको लागि प्रेरण दिलाएको र आफूहरुले सिकोका कुराहरु आफ्ना साथीहरुको बिचमा समेत आदनप्रदान गर्ने बालजीवन ज्योति मावि कक्षा ९ कि छात्रा अस्मिता न्यौपानेले बताइन् ।

विद्यालय स्तरका किशोर किशोरीहरुलाई यस्ता व्यवहारीक ज्ञान आवश्यक भएको बताउँदै यस्ता कार्यक्रमहरु समय समयमा विद्यालयहरुका ल्याउनको लागि वडा अध्यक्षहरुले बताएका छन् ।
कार्यक्रममा सहजिकरण गर्दै माइती नेपाल मकवानपुर प्रमुख माया लामाले बालबालिकाहरुमाथि पछिल्लो समय व्यवसायिक यौन शोषणको घटनाहरुमा विभिन्न चुनौतिहरु देखिएको बताइन् ।
सचेतना कार्यक्रममा सहभागीहरुलाई उक्त विषयसँग सम्बन्धित भीडियो पनि देखाइएको थियो ।
कोरोना भाइरसको जोखिमलाई मध्यनजर गर्दै उच्च स्वास्थ्य सावधानी अपनाई कार्यक्रम आयोजना गरिएको लामाले बताइन् । कार्यक्रममा सहभागी विद्यार्थीहरुलाई सामान्य ज्ञानको प्रश्नावली सोधेर उत्कृष्टलाई पुरस्कृत समेत गरिएको थियो । साथै कार्यक्रममा सबै सहभागीलाई स्टेशनरी समेत सहयोग गरिएको माइती नेपाल मकवानपुर सहजकर्ता सरिता तामाङ्गले बताइन् ।

मकवानपुर/मकवानपुरको मनहरी गाउँपालिकाले डेढ दर्जन क्रसर तथा बालुवा उद्योगलाई जरीबाना तिराउने भएको छ । गाउँपालिकाले स्टक प्रमाणित भएको भन्दा बढी परिमाणको ग्रेबल थुपारिएको पाइएपछि जरीबाना तिराउने भएको छ ।
मनहरी गाउँपालिकाले गाउँपालिकाभित्रका डेढदर्जन क्रसर उद्योग तथा बालुवा प्रशोधन उद्योगहरुलाई जरिबाना गर्दै राजश्व असुली गर्ने निर्णय गरेको गाउँपालिका अध्यक्ष एकराज उप्रेतिले बताए । गाउँ कार्यपालिकाको बुधवार भएको बैठकले जिल्ला समन्वय समिति मकवानपुरको निर्देशन बमोजिम राजश्व संकलन गर्ने निर्णय गरेको हो । प्रति घनमिटर ६७ रुपिया ५० पैसाको दरले राजश्व संकलन गरिने छ । सो रकम बराबरको जरिबाना तिर्न व्यवसायीहरु पनि सहमत भएको बताइएको छ ।
गाउँपालिकाका प्रमुख कार्यकारी अधिकृत देवराज चौलागाईंका अनुसार कुल १ लाख ८२ हजार घनमिटर ग्रेबल बापतको जरिबाना रकम उठाइने छ । जस अन्तरगत १ करोड २४ लाख ७ हजार ४ सय रुपियाँ जरीबाना उठ्ने छ । साथै उक्त परिमाणको प्रशोधनपछि निकासी हुँदा निकासी कर पनि थपिनेछ ।
गाउँपालिकामा लामो समयपछि बसेको बैठकले मनहरी अस्पतालको डिपिआर तयार गरी एकमहिनाभित्र ठेक्का प्रक्रिया थाल्ने निर्णय गरेको छ । त्यसैगरी जग्गा नापी गरी लालपुर्जा बितरणका लागि भूमि सम्बन्धी समस्या समाधान आयोगले पठाएको कार्यविधि अनुसार तत्कालै गाउँपालिका तह र वडातहमा आयोग गठन गरी प्रक्रिया अघि बढाउने र गाउँपालिकामा कर्मचारीको बन्दोबस्त भूमिसम्बन्धी डेस्क सञ्चालन गर्ने निर्णय भएको छ ।
गाउँपालिकाले अघिल्लो महिना मनहरी गाउँपालिका ६ नं वडामा उद्घाटन गरेको गाउँघर क्लिनिकमा तत्कालै जनशक्ति उपलब्ध गराएर नियमित स्वास्थ्य सेवा प्रवाह गर्ने निर्णय समेत गरिएको छ । बैठकले गाउँपालिकाको काम कारबाही तथा उपाध्यक्ष मनिला बिष्टका सम्बन्धमा बाहिर आएका समाचारहरुका बारेमा ध्यानाकर्षण जनाउँदै अप्रमाणित समाचारका कारण मनहरीबासीमा पर्न गएको भ्रमबाट मुक्त हुन सबैमा आग्रह समेत गरेको चौलागाईले जानकारी दिए ।
मकवानपुर । मकवानपुरमा बिभिन्न पार्टी परित्याग गरी १३ जना कांग्रेसमा प्रवेश गरेका छन् । कांग्रेस प्रवेश गर्नेहरुमा बैद्य माओवादी समूहका मकवानपुर जिल्ला तदर्थ समिति संयोजक एवं दलित संघका केन्द्रीय सदस्य तथा नेकपा र राप्रपाका १३ जना रहेका छन् ।
नेपाली कांग्रेस बागमती प्रदेश संसदीय दलका नेता एवं मकवानपुर पार्टी सभापति ईन्द्रबहादुर बानियाँको निवासमा भएको पार्टी प्रवेश कार्यक्रममा बैद्य माओवादीका जिल्ला तदर्थ समितिका संयोजक कैलाश गाउँपालिका ९ का हरि विश्वकर्मा नेपाली कांग्रेसमा प्रवेश गरेका हुन् ।
त्यसैगरी भीमफेदी गाउँपालिका १ का नेकपाका सक्रिय कार्यकर्ता ज्ञानु लामा, अमिर लामा, विजय लामा, दावा लामालगायत नेकपा र राप्रपाका १० जना नेपाली कांग्रेसमा प्रवेश गरेका छन् ।
यस्तै नेता बानियाँ निवासमै भएको पार्टी प्रवेश कार्यक्रममा हेटौंडा उपमहानगरपालिका ८ का हरिबहादुर बस्नेत र विक्रम योञ्जन नेपाली कांग्रेसमा प्रवेश गरेका छन् ।
नवप्रवेशीलाई नेता बानियाँ, कार्यबहाक सभापति विष्णुप्रसाद लामिछाने, जिल्ला सदस्य मिलन परियार लामालगायतले टिका तथा खादा लगाएर पार्टीमा स्वागत गरेका थिए ।
मकवानपुर । मकवानपुर प्रहरीले ७ बिगाहा गाँजा खेती नष्ट गरेकाे छ । पुष १ गते बुधबार मकवानपुर बकैया गाँउपालिका ६ गोवरस्थान लगायतको क्षेत्रहरु लगाइएकाे उक्त परिमाणकाे गाँजा खेती नष्ट गरिएकाे जिल्ला प्रहरी कार्यालयका प्रवक्ता प्रहरी नायब उपरीक्षक इन्द्र बहादुर रानाले जानकारी दिए ।

लागू औषधकाे रुपमा प्रयाेग गरिने भएकाेले नेपालमा प्रतिबन्धित गाँजा खेती फडानीलाइ प्रहरीले तिव्रता दिएकाे छ । जिल्ला प्रहरी कार्यालय मकवानपुर र ईलाका प्रहरी कार्यालय फापरबारी मकवानपुरबाट प्रहरी निरीक्षक कमल कुमार लुङगेलीको कमाण्डमा खटिएकाे संयुक्त प्रहरी टोलीले ७ बिगाहा लागू औषध गाँजा खेति फडानी गरी नष्ट गरिएकाे रानाले बताए ।
‘लैङ्गिक सवाल महिलाको मात्रै हैन’
Tags: No Comments
- सरला बोलखे उपाध्यक्ष, बकैया गाउँपालिका, मकवानपुर ।
लैङ्गिक हिंसा भनेकाे महिला हिंसा नभइ लिङ्गकाे आधारमा हुने हिंसा हाे । केही समय दिवसकाे रूपमा मनाइने अभियानले मात्रै लैङ्गिक हिंसा न्यूनिकरण संभव छैन । याे विषयलाइ सामान्य रूपमा लिनु हुन्न, यसै पेरीफेरीमा रहेर मकवानपुर जिल्ला बकैया गाउँपालिका उपाध्यक्ष सरला बाेलखेसँग गरिएकाे छाेटाे कुराकानी :
¤ बकैया गाउँपालिकाले लैङ्गिक हिंसा विरुद्धको कामलाई कसरी अगाडि बढाइरहेको छ ?
हामीले हालै मात्रै लैङ्गिक हिंसा विरुद्वको अभियान सकेका छौ, तर यो अभियान चै अभियान कै रुपमा मात्रै नभई वर्षैभरी मनाइरहन्छौ । महिला हिंसा तथा लैङ्गिक हिंसा न्यूनीकरण बारेको काम त वर्षै जारी छ । महिला चौतर्फी विकासको लागि आय आर्जन बढाउने सीप विकास,महिला सशक्तीकरण गर्ने कार्यक्रमहरु गाउँपालिकाले सधै गरिरहेको छ। महिलालाई सामुहिक रुपमा उद्योमी बनाउने प्रकारको कार्यक्रम पनि लागू गरेका छन् ।
यसैगरी नेपाल सरकारले सुत्केरी महिलालाई प्रदान गर्ने न्यान्यो झोला कार्यक्रम उत्पादन सुरु गरेका छौ ।
¤ यो अभियानलाई लक्ष्यित गरेर चाहिँ के गर्नुभयो ?
यसपाली हामीले प्रचारप्रसारका कार्यक्रम कम ग-यौ, गाउँपालिकालाई बालमैत्री घोषणा गर्ने अन्तिम तयारीमा छौ, हामीले यो १६ दिने अभियानलाई पनि बालमैत्री अभियानमा जोडेर कार्यक्रम ग-यौ । बालमैत्री घोषणाको अन्तिम चरणमा रहेकोले अनुगमन तथा वडास्तरको घोषणामा लागिपरेका छौ । बालमैत्री कार्यक्रम सफल हुदा सबै अभियानले सार्थकता पाउने भएकोले पनि हामीले त्यसतर्फ ध्यान केन्दीत गरेका हौ । वडास्तर वा पालिकास्तरको कार्यक्रम गर्दा हामीले महिला बालबालिका तथा पुरुष सबैको प्रतिनिधित्व गराएर त्यै बालमैत्री अभियानको बिषयमा काम जारी राखेका हौ ।
अभियानको सिलसिलामा हामीले कोभिड १९ को कारण महिला र बालबालिकाहरुमो परेको मानसिक असर र न्यूनिकरणको उपायबारे कार्यशाला ग-यौ । यस कार्यक्रममा पनि बालमैत्री अभियानको लक्ष्यित समूहलाई नै सहभागी गराएका थियौ । बाल अधिकार, बाल स्वस्थ्य, बाल शिक्षा,बाल सहभागिता, बाल न्यायलगायत चौतर्फी चासोको बिषयलाई ध्यान दिएर काम गर्न सके लैङ्गिक हिंसा न्यूनीकरणको सवालमा गर्नुपर्ने काम पूरा हुने देखिन्छ । बालबालिका र महिलाको सामाजिक मनोबैज्ञानिक असर कम गर्न प्रतिनिधिमुलक उपस्थिति जावस भनेर यो कार्यक्रम गरेका हौ ।
कोभिडको कारण अवस्था डामाडोल नै भयो भनेर आत्तिनु पर्दैन भन्ने खालको सन्देश यो कार्यक्रम दिएको छ । कोभिडपछिको मानसिक समस्यालाई व्यवस्थापन गर्दै जनजीवन सहज पार्न र कोभिडपछि उत्पन्न लैङ्गिक हिंसा न्यूनिकरण गर्न यो कार्यशालाले महत्वपूर्ण भुमिका निर्वाह गर्ने अपेक्षा गाउँपालिकाले गरेको छ ।
¤ विभिन्न अभियानको वाबजुत पनि हिंसात्मक घटना भइरहेको छन, हिंसा न्यूनिकरणको लागि पालिकाको योजना विचार के छ ?
सबैभन्दा पहिलो त महिलालाई आत्मनिर्भर बनाउनु पर्छ, आर्थिक रूपमा सशक्त बनाउनु पर्छ, यसको लागि सीप क्षमता बढाउनु छ । यसैगरी महिलाको मात्रै नेतृत्व क्षमता बढाएर पनि हुन्न सँगसँगै पुरुषको पनि सहभागिता बढाउनु जरुरी छ, गाउँपालिकाले यस्ता कार्यक्रम पनि अघि बढाएको छ । विभेद, हिंसा रोक्नको लागि सामाजिक नेतृत्व सामाजिक सहभागिता समान रुपमा गराउनु अनिवार्य छ ।
हामीले चेतनाको स्तर बढाउनमा महिला र पुरुषको समान सहभागिता गराउनेतर्फ ध्यान दिन थालेका छौँ । जसले गर्दा समाजको बढ्दो लैङ्गिक हिंसा न्यूनिकरण गर्न हामी सक्षम हुने छौ ।
¤ महिलाको नेतृत्व विकासको लागि पुरुषहरूको सहभागिता चै कस्तो पाउनु भएको छ ?
पहिले पहिले भन्दा राम्रो छ,तर अझै पनि महिलाको कार्यक्रम भनेर पुरुषहरूको सहजै सहभागिता चाहिँ देखिनुहुन्न । हामीले लैङ्गिक हिंसा विरुद्धको कार्यक्रम ग¥यौ तर महिलाको कार्यक्रम भनेर वडाका अध्यक्ष ज्यूहरु समेत आईदिनु भएन । वडाका अध्यक्ष ज्यूहरु त लैङ्गिकताको सवालको कार्यक्रमलाई महिलाहरुको मात्रै भनेर बुझ्नुहुन्छ भने अरुलाई अझै बुझाउन समय लाग्छ नै । आखिर लैङ्गिक हिंसा भनेको महिलामात्रैको सवाल त हैन नि ।
¤ लैङ्गिक हिंसा विरुद्धकाे अभियानमा लाग्न केही सन्देश छ कि ?
अभियान, अभियान मात्रै हैन, यसले सही सन्देश बाहिर जाओस् भन्न चाहन्छु । अब महिला पुरुष भन्ने हैन कुनै पनि व्यक्तिलाई लिङ्गको आधार हिंसा हुनुहुदैन । हिंसाले महिला, पुरुष, बालबालिका तेस्रो लिङ्गी कसैलाई पनि फाईदा त गर्दैन नि त । हिंसाले त सिङ्गो समाजलाई अधोगतितर्फ लैजान्छ । हिंसा मुक्तिको लागि व्यक्ती र समाजका सबैको समान जिम्मेवारी छ । समान योगदान आवश्यक छ । हाम्रो समाजको विकासको लागि हाम्रो विकासको लागि हामी नै नलाग्ने हो भने कसरी हिंसा उन्मुलन गर्न सकिन्छ ? हिंसा उन्मुलन किन आवश्यक छ भनेर सबैले बुझ्न आवश्यक छ । सबैले हिंसा विरुद्ध ऐक्यबद्धता जनाई सहभागी जनाईदिनुहुन अनुरोध गर्दछु ।