मकवानपुर । मकवानपुरका स्वास्थ्य संस्थाहरुमा कार्यरत नर्सहरु आन्दोलित छन् । सेवाकाे सुरक्षा तथा ताोकिएकाे न्यनतम पारिश्रमिकमा समानतालगायतका माग गर्दै उनीहरुले बुधबार २ घण्टा नर्सिङ सेवा बन्द गरेका हुन् ।
आन्दोलनकाे क्रममा अत्यावश्यक बाहेकका सेवा बुधबारदेखि १८ कात्तिकसम्म विहान २ घण्टा सेवा वन्द गरिने भएकाे छ । नेपाल नर्सिङ संघको राष्ट्रव्यापी आन्दोलनको आह्वान अनुसार, नर्सहरुले आफ्ना मागहरू पूरा गराउन दबाब दिँदै बिहान १० बजेदेखि १२ बजेसम्म काम रोकेर विरोध प्रदर्शन गरेकाे नेपाल नर्सिङ संघ मकवानपुरकी अध्यक्ष गंगा दाहालले बताइन् । संघको पूर्वनिर्धारित कार्यक्रमअनुसारकाे यो आन्दोलन दोस्रो चरण भएकाे उनले जानकारी दिइन् ।
१८ गतेसम्म पनि माग सुनुवाई नभए स्वास्थ्य तथा जनसंख्या मन्त्रालयको कार्यदलको प्रतिवेदनअनुसार आन्दोलनका कार्यक्रम थप गर्ने पनि अध्यक्ष दाहालले बताइन् । यसअघि गत कात्तिक ४ गतेदेखि ११ गतेसम्म मकवानपुरका नर्सहरुले हेटौंडा अस्पताललगायत जिल्लाका सबै स्वास्थ्य संस्थामा हातमा कालोपट्टी बाँधेर सेवा प्रदान गरेका थिए ।
नेपाल नर्सिङ संघले गत २ कात्तिकमा स्वास्थ्य तथा जनसंख्या मन्त्रालयमा विभिन्न मागहरु राख्दै आन्दोलनका कार्यक्रम घोषणा गरेका थिए ।मन्त्रालयले गत २ कात्तिकमा नेपाल नर्सिङ संघले पेश गरेको माग पूरा गर्ने सम्बन्धमा कार्यदल बनाएकाे थियाे । अबको एक हप्ता कार्यदलकाे प्रतिक्रिया कुर्ने तथा माग सुनुवाइमा नभए आन्दोलनलाई थप सशक्त बनाउँदै लैजाने संघ मकवानपुर उपाध्यक्ष निर्मला ब्लोनले जानकारी दिइन् ।
नर्सहरुको आन्दोलन मुख्यतया निजी स्वास्थ्य संस्थामा कार्यरत नर्सहरुको श्रम शोषण विरुद्ध केन्द्रित रहेको बताइएकाे छ । निजी अस्पताल तथा शिक्षण संस्थाहरुमा कार्यरत नर्सहरुको न्यूनतम पारिश्रमिक र सेवा सुविधा सरकारी सेवामा कार्यरत सरह हुनुपर्ने माग रहेको उनले बताइन् । सरकारले नर्सहरुको न्यूनतम तलब पाँचौं तहकाे लागि ३४ हजार ७३० रुपैयाँ तोकेको छ । तर धेरै जसो निजी संस्थाहरुले अत्यन्तै न्यून पारिश्रमिकमा काम लगाइरहेको बताइन्छ ।
संघले दक्ष नर्सिङ जनशक्तिलाई स्वास्थ्य ऐन अन्तर्गत व्यवस्थापन गरिनुपर्ने, रात्रिकालीन वा सार्वजनिक वा चाडपर्व बिदाको दिनमा काम गरेबापत सरकारी, निजी तथा शिक्षण अस्पतालमा अतिरिक्त तथा जोखिम भत्ताको व्यवस्था गरिनुपर्ने, योग्यता र अनुभवको आधारमा स्तरवृद्धि तथा बढुवाको व्यवस्था हुनुपर्ने, ग्रेडको व्यवस्था हुनुपर्ने, औद्योगिक नर्सको व्यवस्था हुनुपर्नेलगायत १५ बुँदे मागसहित आन्दोलनको कार्यक्रम सुरु गरेकाे उपाध्यक्ष ब्लोनले जानकारी दिइन् ।
मकवानपुर । बागमती प्रदेशमा लम्पी स्किन रोगको रोकथाम तथा नियन्त्रणका लागि गाई र भैंसी गरी ९६ हजार ३ सय ४७ वटा खोप लगाईएको छ । प्रदेश सरकारले चलाएको सप्ताहव्यापी खोप अभियान अन्तरगत प्रदेशका १३ जिल्लामा उक्त परिमाणमा खाेप लगाइएकाे हाे ।
यो वर्ष प्रदेशकाे ललितपुर जिल्लाबाट लम्पी स्किन रोगको प्रभाव न्यूनिकरणका लागि खोप अभियानको सुरुवात गरिएको थियो । त्यसपछि १३ वटै जिल्लामा अभियान सञ्चालन गरिएको बागमती प्रदेशका कृषि तथा पशुपन्छी विकास मन्त्रालयले जनाएकाे छ । बागमती प्रदेशका १३ जिल्लाका १ लाख २० हजार पशुलाई लम्पी स्किन विरुद्ध खोप लगाइने लक्ष्य सहित गत १ भदौबाट अभियान संचालन गरिएकाे थियाे ।
सप्ताहव्यापी खोप अभियान अन्तर्गत मकवानपुर जिल्लामा सबै भन्दा बढी खोप लगाइएको छ । मकवानपुरका २४ हजार ६ सय ९५ गाईभैँसीलाई खोप लगाइएको छ । यसैगरी सिन्धुलीमा १० हजार ३ सय २८ वटा गाई तथा भैँसीलाई खोप लगाइएको छ । त्यस्तै दोलखामा ९ हजार ९ सय ८२, नुवाकोटमा ७ हजार ७ सय २४, काभ्रेपलाञ्चोकमा ७ हजार ६ सय ९८, सिन्धुपाल्चोकमा ६ हजार २ सय ८४, धादिङमा ६ हजार ५१, चितवनमा ६ हजार १५ वटा लम्की स्किन रोग विरुद्धको खोप लगाइएको छ ।
यसैगरी रामेछापमा ४ हजार ४ सय ३७, काठमाडौंमा ४ हजार ३ सय ५०, रसुवामा ३ हजार ६ सय ३४, ललितपुरमा ३ हजार ६ सय ६, भक्तपुरमा १ हजार ५ सय ४३ वटा गाईभैँसीमा लम्की स्किन रोग विरुद्धको खोप लगाइएको छ । सप्ताहव्यापी कार्यक्रम अन्तर्गत खोप लगाउन सुरु गरिएको खोप कार्यक्रम अहिले पनि निरन्तर जारी रहेको मन्त्री मधुसूदन पौडेलले बताए ।
मन्त्रालयको तथ्यांकअनुसार बागमती प्रदेशभर कुल गाईको संख्या ६ लाख ९४ हजार २ सय १७ रहेको छ भने भैँसीको संख्या ५ लाख ४९ हजार १ सय ८२ रहेको छ । ती पशुहरू मार्फत वार्षिक रूपमा जम्मा ४ लाख ८१ हजार ७७१ मिल्क टन दूध उत्पादन गर्ने गरेका छन्। जिल्लागत रूपमा हेर्दा चितवनमा सबैभन्दा बढी दूध उत्पादन हुने गरेको देखिन्छ । जहाँ सात स्थानीय तहमा ९२ हजार २ सय ५६ गाई र ७२ हजार २ सय भैँसी छन्।
आर्थिक वर्ष २०८०।८१ मा बागमती प्रदेशमा मात्र ११ हजार २१८ गाई तथा भैँसी लम्पी स्किन रोगका कारण मृत्यु भएको मन्त्रालयको तथ्यांक छ। सोही अवधिमा ३७ हजार ८९ गाईभैँसी संक्रमित भएका थिए भने कुल २ लाख ५६ हजार ७५९ पशु प्रत्यक्ष वा परोक्ष रूपमा प्रभावित भएका थिए। यसअघि प्रदेशभर २ लाख ४५ हजार २२२ गाई तथा भैँसीलाई लम्पी स्किन रोगविरुद्धको खोप लगाइसकिएको मन्त्रालयले जनाएको छ ।
मन्त्रालयले १ भाद्र २०८२ बाट प्रदेशका १३ वटै जिल्लामा सप्ताहव्यापी खोप अभियान सञ्चालन गरकाे थियाे । बागमती प्रदेश सरकारले लम्पी स्किन रोगको नियन्त्रण तथा रोकथामका लागि प्रदेशव्यापी खोप अभियान सञ्चालन गरी खोप लगाउँदै आएकाे छ । लम्पी स्किन रोगले गाई तथा भैँसीको छालामा गाँठा वा फोका देखिने, उच्च ज्वरो आउने, दूध उत्पादनमा गिरावट आउने, शरीर सुन्निने र जनावर अशक्त देखिने जस्ता लक्षणहरू देखिन्छन् ।
मकवानपुर । मकवानपुरको हेटौंडा ४ स्थित भुटनदेवी माध्यमिक विद्यालयमा आँखा जाँच शिविर भएको छ ।
भुटनदेवि एल्मुनाई एशाेसिएसन, राेटरी क्लब लफ हेटौंडाकाे आयाेजना र हेटौंडा सामुदायिक आंखा अस्पतालकाे प्राविधिक सहयाेगमा भुटन देवि माविमा आइतबार एक दिने आँखा जांच शिविर भएको हो । शिविरमा ६ सय ६ जनाको आँखा जाँच गरिएकाे थियो ।
त्यस मध्ये थप उपचारकाे लागि ५४ जनालाई आँखा अस्पताल रिफर गरिएकाे कार्यक्रम संयोजक शुदर्शन ढकालले जानकारी दिए । शिविर उद्घाटन भुटनदेवि माविका प्र.अ माधव दाहालको अध्यक्षता, भुटनदेवि एलल्मुनाई एशाेसिएसनका अध्यक्ष बिष्णु गाेपाल महर्जनको प्रमुख आतिथ्यमा भएको थियो ।
मकवानपुर । मकवानपुरकाे हेटौंडा औद्योगिक क्षेत्रमा रहेकाे उद्योगहरुमा कार्यरत कर्मचारीहरुकाे आँखा परीक्षण गरिएकाे छ । उद्योग संघ मकवानपुरले औद्योगिक क्षेत्रका श्रमिक र कर्मचारीहरुकाे लागि आँखा जाँच कार्यक्रम आयोजना गरेकाे हाे ।
हेटौंडा सामुदायिक आँखा अस्पतालको प्राविधिक सहयोगमा शुक्रबार हेटौंडा औद्योगिक क्षेत्रमै आयोजित आँखा परीक्षणमा विभिन्न उद्योगमा कार्यरत श्रमिक तथा कर्मचारी गरी १ सय १६ जनाको आँखा जाँच गरिएको हाे । जाँच गरिएकाहरु मध्ये १ जनामा मोतिविन्दुकाे समस्या देखिएको थियो । यसैगरी अन्य १० जनालाई हेटौंडा सामुदायिक आँखा अस्पतालमै थप उपचारका लागि आउन सल्लाह दिइएकाे अस्पतालका प्रशासकीय अधिकृत सुधिर श्रेष्ठले बताए ।
उनका अनुसार मोतिविन्दु पहिचान भएका १ जनालाई शल्यक्रिया (अपरेशन) का लागि अस्पतालमा बोलाइएको छ । कार्यक्रममा आँखा जाँच पश्चात आवश्यक औषधिहरु पनि निःशुल्क वितरण गरिएको थियो । औद्योगिक क्षेत्रका हेटौंडा ईन्जिनियरिङ, यती पेन्ट्स, सीई हाईड्रो, हेटौंडा फेब्रिकेशन, सामुराई स्टील, केपीजे लगायतका उद्योगका कामदार कर्मचारीहरुको आँखा परीक्षण गरिएको थियो ।
आँखा अस्पतालले सामुदायिक कार्यक्रम अन्तर्गत नियमित रुपमा अस्पताल आउन नसक्ने विरामीहरुका लागि विभिन्नस्थानमा पुगेर आँखा जाँच कार्यक्रम गर्दै आएको श्रेष्ठले जानकारी दिए । उनका अनुसार विद्यालयमा पुगेर विद्यार्थीको आँखा जाँच र कार्यस्थलमा पुगेर कामदार, कर्मचारीहरुको समेत आँखा जाँच गर्दै आएको छ ।
मकवानपुर। बागमती प्रदेशका स्वास्थ्यमन्त्री किरण थापाले मदन भण्डारी स्वास्थ्य विज्ञान प्रतिष्ठानकाे अवलाेकन गरेका छन् । मंगलबार मन्त्री थापाले प्रतिष्ठान अन्तर्गत सञ्चालनमा रहेका विभिन्न शैक्षिक कार्यक्रमहरुको अवलोकन गरेका हुन् ।
प्रतिष्ठानका कक्षाहरु संचालनमा रहेका नलेज भिलेज, गौरीटार र हुप्रचौर तथा अनुसन्धान केन्द्रको मन्त्री थापाले अवलोकन गरेका थिए । प्रधानमन्त्री केपी शर्मा ओलीले शिलान्यास गर्नुभएका आधारभूत अस्पतालहरुको निर्माण सम्पन्न भइसकेको जानकारी दिँदै उनले उक्त अस्पतालमा सेवा विस्तारका लागि आवश्यक दक्ष जनशक्ति यही प्रतिष्ठानबाट उत्पादन हुने विश्वास व्यक्त गरे ।
मन्त्री थापाले प्रतिष्ठानले छोटो अवधिमै उल्लेखनीय उपलब्धी हासिल गरेको भन्दै यसलाई स्थापित गर्न प्रदेश सरकार प्रतिवद्ध रहेको बताए । छिटोभन्दा छिटो नयाँ भवन निर्माण सम्पन्न गरी आफ्नै भवनबाट कक्षा सुचारु गराउने उनले जानकारी दिए । चिकित्सा शिक्षा आयोगले यसै शैक्षिक सत्रदेखि प्रतिष्ठानलाई ५० सिटका लागि एमबीबीएस (MBBS) कार्यक्रम सञ्चालन गर्ने स्वीकृति प्रदान गरिसकेको छ । प्रतिष्ठानमा बीएस्सी नर्सिङ (BSc Nursing), मेडिकल ल्याब टेक्नोलोजी (BMLT), पब्लिक हेल्थ (BPH) र ब्याचलर अफ फार्मेसी (B-Pharmacy) मा स्नातक तहका कार्यक्रम सञ्चालनमा रहेका छन् ।
यसबाहेक यसै शैक्षिक वर्षदेखि प्रतिष्ठानमा मास्टर तह (MD) का सात विषय स्त्री तथा प्रसूति, फिजिसियन, जनरल सर्जरी, बालरोग, हाडजोर्नी तथा नशारोग, फेमिली फिजिसियन र एनेस्थेसियोलोजीमा अध्यापन सुरु हुने भएको छ । अनुगमन कार्यक्रममा मन्त्रालयका सचिव डा. सुमित्रा गौतम, प्रतिष्ठानका उपकुलपति डा. प्रदीप ज्ञवाली, शिक्षाध्यक्ष डा. दिनेश कुमार लम्साललगायतको सहभागिता रहेको थियो ।