मकवानपुर । मकवानपुरको मनहरी गाउँपालिकाले ग्रामीण अल्ट्रासाउन्ड(एक्स-रे) सेवा सुरु गरेको छ । पालिकाले गर्भवती महिला लक्षित कार्यक्रम अन्तर्गत अल्ट्रासाउन्ड मेसिन खरिद गरी सेवा सञ्चालन गरेको हो ।
गाउँपालिका अध्यक्ष रन्जन कालाखेतीले स्वास्थ्य शाखालाई भिडियो एक्स-रे मेशिन हस्तान्तरण गरे संगै सेवा सञ्चालन गरिएको बताए । ‘गर्भवती अवस्थामा आमा र बच्चाको स्वास्थ्य अवस्था बुझ्न भिडियो एक्सरे गर्न आवश्यक छ’ मेशिन हस्तान्तरण गर्दै उनले भने ‘वडाका स्वास्थ्य संस्थामार्फत सहजरुप सेवा दिनु पर्छ ।’
ग्रामिण भिडियो एक्सरे सेवा मार्फत प्रत्येक वडाका गर्भवती महिलाहरुले नजिकैको स्वास्थ्य चौकीबाट निःशुल्क सेवा प्राप्त गर्ने स्वास्थ्य शाखा प्रमुख रामचन्द्र दाहालले जानकारी दिए । एक्सरे सेवाले गर्भवती आमा र बच्चाको स्वास्थ्य अवस्थाको जानकारीसंगै शिशु तथा मातृ मृत्युदर न्यूनिकरण गर्न सहयोग पुग्ने उनले विश्वास व्यक्त गरे ।
यसअघि भिडियो एक्सरे सेवाका लागि मनहरीका दुर्गम गाउँका गर्भवती महिलाहरु महनरी बजारदेखि हेटौंडा आउनु पर्ने बाध्यता रहेको थियो । यस्तै उक्त सेवा लिन स्थानीय निजी अस्पतालमा महँगो शुल्क तिर्न बाध्य थिए ।
यस सेवाले विशेष गरी मनहरीका दुर्गम क्षेत्रका गर्भवती महिलाहरु बढी लाभान्वित हुने पालिकाको विश्वास छ । एक्सरेको लागि हेटौंडासम्म धाउनु पर्ने बाध्यताको अत्य भएपछि मनहरीका स्थानीयहरुले खुशी व्यक्त गरेका छन् ।
यसैगरी गाउँपालिकाले गर्भवती महिलाहरुलाई पुर्ण संस्थागत प्रसुती सेवाका लागि निःशुल्क एम्बुलेन्स सेवाको ब्यवस्था गरेको छ । त्यस्तै पालिकाले गर्भवती महिलालाई प्रयोगशालाको पनि सुविधा उपलब्ध गराएको अध्यक्ष कालाखेतीले जानकारी दिए।
मकवानपुर । मकवानपुरकाे राक्सिराङ्ग गाउँपालिकाले अपाङ्गता भएका व्यक्तिलाई निःशुल्क बिमा गराउने भएकाे छ । विश्व अपाङ्गगता दिवसको अवसरमा राक्सिराङ्ग गाउँपालिकामा गरिएको संवाद कार्यक्रममा अध्यक्ष राजकुमार मल्लले अपाङ्गता भएको व्यक्तिहरुलाई पहिलो प्राथमिकतामा राखेर निशुल्क स्वास्थ्य बीमा गराइने बताए ।
उनीहरुलाई आयआर्जनको लागि विभिन्न प्रकारको तालिम गराई आत्मानिर्भर बनाउने समेत उनले बताए । आपाङ्गता भएका व्यक्तिलाई संरक्षण तथा सुरक्षा दिनु पालिकाको दायित्व रहेकोले अपाङग कस्तो प्रकारको छ, उसको आवश्यकता अनुसार पालिकाले आयआर्जन गरि जीवन निर्वाहको लागि पालिकाले सहयोग गर्ने उनले बताए । सहभागीहरुले सीपमुलक तालिमको आवश्यकता, स्वास्थ्य तथा दैनिक जीवन निर्वाहको पाटोमा सहयोग र पालिकाको नीति निर्माण गर्ने बेला सक्रिय सहभागी गराउनु पर्ने लगायतका विषयमा जोड दिएका थिए ।
पालिका स्तरीय अपाङ्गता समन्वय समिति गठन
विश्व अपाङ्गता दिवसको अवसरमा राक्सिराङ्ग गाउँपालिका स्तरीय अपाङ्गता समन्वय समिति गठन गरिएको छ। गाउँ कार्यपालिका सदस्य चन्द्रमान प्रजाको संयोजत्वमा ११ सदस्यीय अपाङ्गता समन्वय समिति गठन गरिएको हाे । समिति सदस्यहरुमा मंगलबहादुर घलान, संचलाल वाइबा, होम बहादुर पाख्रिन, जितन प्रजा, सुरेश घलान, शंखलाल चेपाङ्ग, शरद स्याङ्गतान, फुलमाया स्याङ्गतान, श्रीकृष्ण प्रजा र सदस्य सचिवमा गाउँपालिकाको महिला तथा बालबालिका शाखाको प्रमुख गोमा पन्थी लगायत रहेका छन् ।अब वडा स्तरको अपाङ्गता समिति गठन र संयोजक तोकिने संयोजक चन्द्रमान प्रजाले जानकारी दिए ।
गाउँपालिका अध्यक्ष राजकुमार मल्लको अध्यक्षतामा भएको सम्वाद कार्यक्रममा प्रमुख प्रसशाकीय अधिकृत देवचन्द्र गर्तौला, ठाडेचुरे आधारभूत अस्पतालका मेडिकल अधिकृत डा. गजल पन्त, सामाजिक विकास शाखा प्रमुख गोविन्द अधिकारी, ५ नम्बर वडा अध्यक्ष हरि बहादुर प्रजा, ९ नम्बर वडा अध्यक्ष रामकुमार बाल्पा थिङ्ग, ३ नम्बर वडा अध्यक्ष उत्तम वाइवा लगायतको आतिथ्यता रहेको थियो। राक्सिराङ्ग गाउँपालिकाको आयोजनामा भएको संवाद कार्यक्रमलाई राष्ट्रिय जनवकालत मन्च (नाफान)ले सहजीकरण गरिएको थियो।
मकवानपुर । मदन भण्डारी स्वास्थ्य विज्ञान प्रतिष्ठान हेटौंडा र प्राध्यापक कल्याणकारी समितिबीच सहमति भएकाे छ । सहमतीसँगै पठनपाठन सुरु भएको छ । प्रतिष्ठान र समितिबीच २ बुँदे सहमति भएसँगै सोमबारबाट पठनपाठन सुरु भएको समिति अध्यक्ष विश्वास सापकोटाले बताए ।
प्राध्यापकहरुले गत कार्तिक २२ गतेदेखि तलबभत्ता समयमै नपाएकोलगायतका विभिन्न ७ बुँदे माग राख्दै पेनडाउन गर्दै आएका थिए । १९ दिनदेखि बन्द रहेकाे प्रतिष्ठानको शैक्षिक कार्यक्रम सुचारु गर्न ५ सदस्यीय समिति गठन गरिएकाे छ । पदाधिकारीको तर्फबाट रजिष्ट्रार राजेश प्रसाई, डीन प्रा. दुर्गाकुमारी खड्का मिश्र र प्राध्यापक कल्याणकारी समितिको डाक्टरहरु रोशनकुमार चौधरी, अजय यादव र वीपिन्द्र पाण्डे रहने गरी मागका सन्दर्भमा सुझाव पेश गर्न समिति गठन गरिएको हाे । उक्त समितिले उपकूलपति समक्ष १० दिनभित्र सुझाव पेश गर्नेछ ।
प्रतिष्ठानका तर्फबाट शिक्षाध्यक्ष डा. सुरेन्द्र शेरचन र प्राध्यापक समितिका तर्फबाट अध्यक्ष सापकोटाले सहमतिपत्रमा हस्ताक्षर गरेका छन् । आइतबार प्रतिष्ठानका कूलपति तथा बागमती प्रदेशका मुख्यमन्त्री शालिकराम जम्कट्टेल र प्राध्यापक कल्याणकारी समितिबीच छलफल पश्चात सहमति भएको थियाे । सहमतिअनुसार प्रतिष्ठानका कूलपति जम्कट्टेलले पुस ११ गतेसम्ममा भुक्तानी हुनुपर्ने रकम प्रतिष्ठानलाई उपलब्ध गराउने मौखिक सहमति भएको अध्यक्ष सापकोटाले बताए । उक्त सहमतिअनुसार आफूहरुको माग पूरा नभए आन्दोलनलाई निरन्तरता दिइने उनले जानकारी दिए ।
प्रतिष्ठानमा कार्यरत प्राज्ञिक जनशक्तिहरुको स्थायित्व तथा वृत्तिविकासका लागि हाल रहेको ऐन तथा नियमावलीमा केही संशोधन गर्नका लागि आवश्यक पहल गर्ने सहमति समेत भएको छ ।
राजनीतिक खिचातानीकाे कारण प्रदेश सरकार मातहत रहेको मदन भण्डारी स्वास्थ्य विज्ञान प्रतिष्ठान स्थापना भएको ४ वर्षमै चलखेलको सिकारमा परेकाे छ । त्यसकाे असर हस्पतालकाे सेवा प्रवाह र पठनपाठनमा पर्दै आएकाे छ ।
पूर्व मुख्यमन्त्री डोरमणि पौडेल नेतृत्वको सरकारले २०७६ मा प्रदेशसभाबाट प्रतिष्ठान ऐन जारी गरेर संरचना खडा गरेका थिए । स्थापनाको १ वर्षपछि प्रतिष्ठानमा पदाधिकारी नियुक्त गरी काम सुरु गरिए पनि सत्ता समीकरण परिवर्तनसँगै द्वन्द्व पनि बढेको हो ।
सुरुवाती चरणमा हेटौँडा अस्पताललाई प्रतिष्ठान मातहत ल्याएसँगै सुरु भएको विवाद अझै साम्य हुन सकेको छैन । सरकार परिवर्तनसँगै ऐन संशोधन गर्दै प्रतिष्ठान र अस्पताललाई एक अर्काबाट अलग गर्ने र सँगै राख्ने काम पटक पटक हुँदै आएकाे छ । राजनीतिक अन्योलका बिचमै प्रतिष्ठानले शैक्षिक कार्यक्रम अघि बढाए पनि संरचनागत स्थायित्वका लागि अझै कुनै काम हुन सकेको छैन ।
प्रतिष्ठानले हाल चिकित्सा शिक्षा आयोगबाट अनुमति प्राप्त गरी ४ वटा विषयमा अध्यापन गरिरहेको छ । प्रतिष्ठानले स्नातक तहको नर्सिङ, फार्मेसी, पब्लिक हेल्थ र ल्यावरोटरी विषयमा आयोगले तोकेको कोटामा विद्यार्थी सहभागी गराएर अध्यापन गरिरहेको छ । प्रतिष्ठानमा अहिले २४ जना प्राध्यापकहरु कार्यरत छन् भने २ सय जना विद्यार्थीहरु अध्ययनरत छन् ।
मकवानपुर । मकवानपुरको मनहरी मसिनेमा रहेको पशुपतिनाथ माविका बालबालिका र अभिभावकको कान परीक्षण शिविर भएको छ । मनहरी ४ मसिनेस्थित पशुपति माविले अन्तराष्ट्रिय संस्था किवानिज क्लब मकवानपुरको संगको सहकार्यमा विद्यालयमा अध्ययन गर्ने बालबालिका र अभिभावकको कान परीक्षण शिबिर संचालन गरेको हो ।
किवानिज क्लब मकवानपुरका संस्थापक अध्यक्ष तीर्थराज पराजुलीको सभाध्यक्षतामा भएको कार्यक्रमको उद्घाटन गर्दै मनहरी गाउँपालिका अध्यक्ष रञ्जन कालाखेतीले बालबालिकाको क्षेत्रमा काम गर्ने संस्थाहरुलाई पालिकाले सघाउने बताए । ‘मानिसको शरीरका महत्वपूर्ण अंग आँखा, कान, मुटुलगायतको अवस्थाबारे समयमै जानकारी लिन सके भबिश्यमा ठूलो नोक्सानी हुनबाट जोगाउछ’ अध्यक्ष कालाखेतीले भने–‘स्वास्थ्य परीक्षण शिविर मनहरी गाउँपालिकामा रहेका ३२ वटै विद्यालयमा गर्नु जरुरी छ ।’
गाउँपालिकाले शिक्षा र स्वाथ्यलाई बिशेष प्राथमिकताका साथ काम गरिरहेको बताउदै अध्यक्ष कालाखेतीले विद्यालयमा पठनपाठनका साथै स्वास्थ्य शिविरले बालबालिकालाई स्वस्थ्य रहन सहयोग पु¥याउने बताए । विद्यालय ब्यवस्थापन समितिका अध्यक्ष माधब गौतमले बालबालिकालाई आफ्नो कान कमजोर छ भन्ने कुरा थाहा नहुने भएकोले शिबिर संचालन गरिएको बताए । शिबिरमा नेपालगंजस्थित आइडियल फर्मासिटिकल्स प्रालिले औषधि सौजन्य गरेको किवानिज क्लबका मकवानपुरका संस्थापक अध्यक्ष पराजुलीले जानकारी दिए ।
कार्यक्रममा वडाअध्यक्ष प्रकाश थापा, साहित्यकार तथा सेवानिबृत्त शिक्षक हयग्रीव आचार्य, किवानिज क्लब मकवानपुरका सचिव भीमप्रसाद फुँयाल (दिनेश)लगायतले बालबालिकाको आँखा, कान जस्ता अंगको परीक्षण गर्ने शिविरको आयोजना गरी विद्यालयले पुण्यको काम गरेको बताए । गाउँपालिका अध्यक्ष कालाखेतीको कान परीक्षण गरी सुरुवात गरिएको शिविरमा करिब दुई सय ५० जना बालबालिका तथा अभिभावकको कानको परीक्षण गरिनुको साथै नि:शुल्क औषधि बितरण गरिएको थियो । शिविररमा हेटौंडा अस्पतालका नाक, कान, घाँटी बिशेषज्ञ डा. अनुप सञ्जेलले कानको परीक्षण गरेका थिए ।
यसैबीच पशुपतिनाथ माविबाट २०७९ को एसईई परीक्षामा उत्कृष्ठ नतिजा ल्याउन सफल २ जना विद्यार्थीलाई छात्रवृत्ति प्रदान गरिएको छ ।
२०७९ सालको एसईईमा छात्र रितेश बिष्ट र छात्रा पार्वती तितुङले उत्कृष्ठ नतिजा ल्याएकोले जनही ११ हजार पाँच सय रुपैयाँका दरले छात्रबृत्ति रकम पनि प्रदान गरिएको हो ।
पशुपतिनाथ माविका पूर्वप्रधानाध्यापक तीर्थराज पराजुलीले आफ्नो मातापीता शिबकुमारी, रामजीप्रसाद पराजुलीको स्मृतिमा स्थापना गरेको कोषबाट दुई जना उत्कृष्ठ छात्रछात्रालाई रकम प्रदान गरिएको हो । बिगत ३ वर्षदेखि पराजुलीले विद्यालयमा छात्रबृत्ति प्रदान गर्दै आएका छन् ।
कार्यक्रममा किवानिज क्लब मकवानपुरका कोषाध्यक्ष शम्भु घर्ती, लायन्स क्लब अफ गुल्मोहर काठमाडौंकी सकुन्तला बस्नेत, किवानिज क्लब मकवानपुरका सदस्य शारदा भुजेल, दिपेश अधिकारी, मनहरी गाउँ कार्यपालिका सदस्य मीरा खत्री, विद्यालय ब्यवस्थापन समितिका सदस्य सीता नेपाली, कल्पना कार्की, मुकुन्द सुबेदी, विद्यालयका शिक्षकहरुलगायतको सहभागिता रहेको थियो ।
मकवानपुर । मदन भण्डारी स्वास्थ्य विज्ञान प्रतिष्ठानका प्राध्यापक शैक्षिक हडतालमा उत्रिएका छन् । प्रतिष्ठानमा कार्यरत प्राध्यापकले तलब र भत्ताबापतको रकम नपाएको जनाउँदै हडतालमा उत्रिएपछि १५ दिनदेखि पठनपाठन प्रभावित भएको हो ।
प्रतिष्ठानमा गत कात्तिक २२ गतेदेखि पठनपाठन ठप्प रहेकाे प्राध्यापक कल्याणकारी समिति मदन भण्डारी स्वास्थ्य विज्ञान प्रतिष्ठान हेटौँडाका अध्यक्ष विश्वास सापकोटाले बताए । प्राध्यापकहरूले ‘पेनडाउन’ गरेसँगै पठनपाठन पूर्णरूपमा ठप्प भएको छ । पठनपाठन बन्द हुँदा विद्यार्थी मर्कामा परेका छन् ।
प्राध्यापक कल्याणकारी समिति अध्यक्ष सापकोटाले प्रतिष्ठानमा सेवारत २४ जना प्राध्यापकले विगत चार महिनादेखि तलब र भत्तालगायतका अन्य सुविधाबापतको रकम नपाए पछि हडतालमा उत्रिएकाे बताए । ।
चालु आर्थिक वर्षको पहिलो महिना (साउन)को तलब सुविधाबापतको रकम पनि सङ्घर्षपूर्ण तवरबाट प्राप्त गरेको र त्यसयताको रकम भुक्तानीमा प्रतिष्ठानले कुनै चासो नदिएको उनले बताए । तलब भत्तालगायतका सुविधाबापतको रकम माग गर्दा प्रतिष्ठानबाट मन्त्रालयले पैसा नपठाएको भन्ने जवाफ दिँदै आएको जनाइएको छ ।
प्राध्यापक कल्याणकारी समितिले बिहीबार सात बुँदे विज्ञप्ति जारी गरी नियम अनुसार पाउनुपर्ने तलब भत्ता तथा सेवा सुविधा समयमै उपलब्ध गराउनुपर्ने प्रतिष्ठान तथा शिक्षकहरुको स्थायित्वका लागि सेवा आयोग गठन गर्नुपर्ने लगायतका माग गरेका छन् ।
बिहीबार आन्दोलनरत प्राध्यापक र प्रतिष्ठानका कुलपति तथा बागमती प्रदेशका मुख्यमन्त्री शालिकराम जम्कट्टेलबीच भएको छलफल विना निश्कर्ष सकिएको छ । प्रतिष्ठानका शिक्षाध्यक्ष डा. सुरेन्द्र शेरचनले भने बार्ता सहमति नजिक पुगेको बताए । ‘प्रतिष्ठानले समस्या समाधानको लागि सम्बन्धित निकायहरुसँग निरन्तर प्रयत्न गरिरहेको छ । टुंगिने अवस्थामा पुगेको छ’, उनले भने । चिकित्सा शिक्षा आयोगको नियमानुसार स्वास्थ्य मन्त्रालयबाट भर्ना भएका विद्यार्थीको छात्रवृत्तिवापतको ७५ प्रतिशत रकम नपाउँदा प्राध्यापकलाई तलब भत्ता दिन नसकेको उनले जानकारी दिए ।
प्रतिष्ठानले स्नातक तहको नर्सिङ, फार्मेसी, पब्लिक हेल्थ र ल्यावरोटरी विषयमा चिकित्सा शिक्षा आयोगले तोकेको कोटामा विद्यार्थी सहभागी गराएर अध्यापन गराइरहेको छ । प्राध्यापक कल्याणकारी समिति विभिन्न ७ बुदे माग राखेर हडतालमा उत्रिए पछि पठनपाठन प्रभावित भएकाे हाे ।
