मकवानपुर । हेटाैडा १६ मा रहेकाे शिवम् सिमेन्ट उद्योगले तिर्नु पर्ने विद्युत महशुल भुक्तानी बक्यौता रहेकाे भन्दै ध्यानाकर्षण गरिएकाे छ । विद्युत महशुल भुक्तानी बक्यौता रकम असुल गर्न सचेत नागरिक युवा समूहले नेपाल विद्युत प्राधिकरणको ध्यानाकर्षण गरेकाे हाे ।
२ अर्ब ३४ करोड रुपैयाँ भन्दा बढी बक्यौता भुक्तानी नगरेको शिवम् सिमेन्ट उद्योगसँग बक्यौता रकम असुली गर्न माग गर्दै मंगलबार सचेत नागरिक युवा समूहले नेपाल विद्युत प्राधिकरणको बागमती प्रदेश डिभिजन कार्यालय हेटौंडाका प्रमुख शशिभूषण साहलाई ध्यानाकर्षणपत्र बुझाएको हो ।
बक्यौता रकम भुक्तानी नगरे शिवम् सिमेन्ट उद्योगको विद्युत कटौती गर्न पनि सचेत नागरिकले माग गरेको छ । सचेत नागरिक युवा समूहका अध्यक्ष शिवनारायण श्रेष्ठ नेतृत्वको एक समूहले बक्यौता रकम भुक्तानी नगर्दा सर्वसाधारण नागरिकको विद्युत कटौती प्राधिकरणले २ अर्ब ३४ करोड रुपैयाँ भुक्तानी नगर्ने शिवम्लाई भने किन विद्युत निरन्तर दिइरहेको भन्दै प्रश्न गरेका थिए ।
प्राधिकरणलाई ध्यानाकर्षण गरेको सचेत नागरिक युवा समूहले प्राधिकरणले बक्यौता असुलीमा ढिलाई गरे संघीय मन्त्रीलाई नै ध्यानाकर्षण गराउने जनाएको छ । सचेत नागरिक युवा समूहका अध्यक्ष शिवनारायण श्रेष्ठले राज्यको लगानी रहेको संस्थाले राज्यकै सम्पत्तिको रुपमा बक्यौता असुलीमा ध्यान दिनुपर्ने भन्दै नेपाल विद्युत प्राधिकरणका डिभिजन प्रमुख शशिभूषण साहको ध्यानाकर्षण गराए ।
बक्याैता भुक्तानी असुली गर्ने काम प्राधिकरणको हेटौंडा वितरण केन्द्रकाे भएकाेले मंगलबारै शिवम् सिमेन्ट उद्योगलाई बक्यौता रकम भुक्तानीका लागि वितरण केन्द्रले पत्राचार गरिसकेको पनि डिभिजन प्रमुख साहले जानकारी दिए । शिवम् सिमेन्ट उद्योगसँगै बक्याैता भुक्तानी असुली गर्नु पर्ने १३ अर्ब रुपैयाँ भन्दा बढी बक्यौता हेटौंडा वितरण केन्द्रबाट असुली गर्नु पर्ने भएकाेले उक्त विषय केन्द्रमै छलफल भइरहेकाले रकम असुलीमा ढिलाई भएको बताइएकाे छ ।
यस्तै सचेत नागरिक युवा समूहले प्राधिकरणले मिटर रिडिङ गर्ने मितिमै रिडिङको कार्य गर्न नसकेको, मिटर रिडिङ भए पनि कम्प्युटरमा समयमै अपडेट नहुँदा ग्राहकले समयमै भुक्तानी गर्दा पाउने छुट सुविधा उपयोग गर्न नपाएको विषयमा पनि प्राधिकरणको ध्यानाकर्षण गराएको छ ।
मकवानपुर / कोरोना भाइरसको महामारीपछि गत पाँच महिनादेखि विद्यालयहरु बन्द छन् । २०७२ सालको भुकम्पले भत्केका विद्यालय भवनहरु निर्माणको अन्तिम चरणमा पुगेपछि कोरोना महामारीको सन्त्रासले विद्यालयहरु बन्द भए ।
महामारीको कारण पठनपाठन बन्द भएपनि पुनर्निर्माणको कार्य निरन्तर चल्यो । बैशाखबाट नयाँ विद्यालय भवनमा पठानपाठन सुरु गर्न तयारीको रफ्तामा बनिरहेका विद्यालय भवनहरु अहिले रङरोगन समेत सकिएका छन् । तर माहामारीको कारण विद्यालयहमा भौतिक उपस्थितिमा कक्षा सञ्चालन गर्ने वातावरण अझै नबन्दा विद्यार्थीको चहलपहल बिना विद्यालय भवनहरुले थप शोभा गुमाइरहेका छन् ।
राष्ट्रिय पुननिर्माण प्राधिकरण अन्तर्गत जिल्ला आयोजना कार्यान्वयन इकाई शिक्षाका कार्यालय प्रमुख बद्री पाठक भन्छन् “भूकम्पले चर्केका,ढलेका विद्यालयहरु धमाधम निर्माण हुँदै छन्, धेरै त पठनपाठनको लागि तयारी छन्, शैक्षिक क्षेत्रको भौतिक संरचनामा कायापलट भएको छ ।”
भुकम्पको कारण मकवानपुरमा ५ सय १६ विद्यालय मध्ये ४ सय ९ विद्यालयका दुई हजार ३ सय १० वटा कक्षाकोठालाई भूकम्पले पूर्ण क्षति पु-याएको थियो । क्षति पुगेका कक्षा कोठाहरुको तीन वर्षदेखि पुनर्निर्माण कार्य जारी राखिएको उनले बताए । पाठकका अनुसार विद्यालय भवनहरु ३ वटा मोडालिटीमा पुनर्निर्माणको कार्य अगाडि थियो ।

पहिलो मोडालिटी अनुसार विद्यालय व्यवस्थापन समिति मार्फत सम्झौता भई निर्माण हुने कूल विद्यालय जम्मा ३ सय २१ भवनको १ हजार २६ वटा कक्षाकोठाहरु १ सय ४९ शौचालय तथा ८४ विद्यालय खानेपानी कार्यक्रम रहेका थिए । जसमा आर्थिक वर्ष २०७३/०७४ मा ६८ विद्यालय भवनका २ सय २० कक्षाकोठा, २०७४/०७५ मा ६८ विद्यालय भवनका २ सय २० कक्षाकोठा निर्माण भएका थिए । यसैगरी आर्थिक वर्ष २०७५/०७६ (प्रथम) मा ६५ विद्यालय भवनका २ सय कक्षाकोठा, आ.व.२०७५/०७६ (दोश्रो) मा ५१ विद्यालय भवनका, १ सय ५३ कक्षा कोठा तथा ७० शौचालय निर्माण भएको पाठकले जानकारी दिए ।
यस्तै २०७६/०७७ मा ६१ विद्यालय भवनका २ सय ५ कक्षाकोठा, ७९ शौचालय र ८४ खानेपानी व्यवस्थापन कार्यक्रम प्राप्त भएको र उक्त कार्यक्रम आव २०७७/७८ मा निर्माण भएको उनले बताए । यस्तै आव २०७७/७८ को लागि ८ विद्यालय भवनको २८ कक्षाकोठा निर्माणका लागि कार्यक्रम थप भई आएको पाठकले बताएका छन् ।
दोस्रो मोर्टलिटी अनुसार ठेक्का प्रणालीबाट जापान सरकारको ऋण सहयोग (जाईका) र एशियाली विकास बैंक (एडिबि) को तर्फबाट केन्द्रीय आयोजना कार्यान्वयन इकाईमार्फत ठेक्का सम्झौता भई सबै गरी कूल ५६ विद्यालयका ७ सय कक्षाकोठा निर्माण हुने क्रममा रहको छ। त्यस्तै गरि तेस्रो मोर्टालिटी अनुसार संघ संस्थाको तर्फबाट स्थायी प्रकृतिका जम्मा ३२ विद्यालयमा २ सय २१ कक्षाकोठा निर्माण भएको पाठकले जानकारी दिए।
राष्ट्रिय पुननिर्माण प्राधिकरण अन्तर्गत जिल्ला आयोजना कार्यान्वयन इकाई शिक्षाका कार्यालय प्रमुख बद्री पाठकले भने “आव २०७७/७८ को असार मसान्तसम्म जिल्लामा तीनवटै मोडालिटीबाट कुल ४ सय ९ विद्यालय भवनका १ हजार ९ सय ४७ कक्षाकोठा निर्माण कार्य अगाडि बढेकोमा ३ सय ७५ विद्यालयका १ हजार ६ सय ६५ कक्षाकोठा निर्माण सम्पन्न भएका छन् ।
त्यस्तैगरी १ सय ४९ शौचालय र ८२ विद्यालयमा खानेपानी व्यवस्थापन कार्यक्रम सम्पन्न भएको छ भने सबै गरी ३४ विद्यालयका २ सय ८२ कक्षाकोठा निर्माणधीन रहेका छन् । हालै एसियाली विकास बैकको ऋण सहयोगमा थप ४ विद्यालय निर्माणका लागि टेण्डर प्रक्रियाको सूचना प्रकाशन भइसकेको छ ।
मकवानपुर जिल्लाका १ सय ३८ विद्यालयहरुमा जग्गा अभाव, न्यून विद्यार्थी, यातायातको पँहूच नपुगेको र आवश्यक्ता नभएका जस्ता कारण भौतिक निर्माण कार्यक्रम समावेश गर्न सकिएको अवस्था नभएको आयोजनाले जनाएको छ ।
मकवानपुर । मकवानपुरको बकैया गाउँपालिकामा ९२ जना एमालेमा प्रवेश गरेका छन् । मकवानपुरकाे पूर्वी क्षेत्रमा रहेकाे बकैयामा विभिन्न पार्टी परित्याग गरिआइतबार बकैयाको १ धिँयालमा भएको कार्यक्रममा उनीहरु एमालेमा प्रवेश गरेका हुन् ।
एमालेमा प्रवेश गर्नेहरुलाई प्रतिनिधिसभा सदस्य तथा अर्थ समितिका सभापति कृष्णप्रसाद दाहाल सहितका एमाले नेताहरुले टिका, खादा लगाएर स्वागत गरेका थिए । पार्टी प्रवेश कार्यक्रममा बोल्दै अर्थ समितिका सभापति दाहालले एमाले सरकारले सुरु गरेको भूमिहिनलाई भूमि सहितको लालपुर्जाको कार्यलाई कांग्रेस–माओवादीको संयुक्त सरकारले रोकेको बताए ।
नेकपा माओवादी केन्द्र परित्याग गरि अक्कलबहादुर गोले, हिराबहादुर बल, सुकबहादुर वाईवा, सुकमान घिसिङ लगाएत, नेपाली कांग्रेसका सानुमान वाईवा, मनोज डिमडुङ, कान्छामान वाईवा, चन्द्रध्वज वाईवा, दिल बहादुर घिसिङ, पदमबहादुर मोक्तान सहित तथा राप्रपाबाट गणेश मोक्तान, खड्गबहादुर वाईवा, नेत्रबहादुर वाईवा,इन्द्रलाल मोक्तान, आईतसिंह मोक्ता सहित ९२ जना एमालेमा प्रवेश गरेका हुन् ।
कार्यक्रममा एमाले मकवानपुरका जिल्ला सदस्यहरु बेलप्रसाद दाहाल, कृष्ण चौँलागाई, भूमि सम्वन्धि समस्या समाधान आयोग बाराका अध्यक्ष अम्बिका चौँलागाई, बकैया गाउँपालिकाकी उपाध्यक्ष सरला बोलखे, एमाले बकैयाका अध्यक्ष गोपाल दाहाल, सचिव फुलमान लामाल लगाएतको आतिथ्यता रहेको थियो ।
‘मुर्ति पार्क जसले मन तान्छ’ (फाेटाे फिचर सहित)
Tags: No Comments
मकवानपुर (हर्नामाडी) । कला अर्थात् अन्तरमनको प्रष्फुटन । कला अर्थात विगतको स्मरण र आगतको प्रक्षपण गराउने अन्तर “वस्तु” । एउटा कलाकारको अन्तरमनले कोरेका सांकेतिक कलाको अर्थ दर्शकहरुले कसरी बुझ्छन् । अवश्य पनि आ–आफ्नो बुझाइको गहिराईमा भर पर्छ यसको अर्थ । कलाको मूल्य या त कुनै नयाँ कुरा सिक्दा थाहा हुन्छ या त बिर्सिएको याद पुनः फर्काउन खोज्दा । कलाको साधना चाहेर पनि सबैले सहजै गर्न सक्ने पाटो हैन । यसको लागि अद्वितीय सामथ्र्य निरन्तरको लगाव र अविचलित धैर्यता अपरिहार्य छ ।
तयारी कलाको प्रभाव हाम्रो आँखाबाट प्रवेश गरी मन मस्तिष्कमा गहिरो प्रभाव छाड्ने हुन्छन् । कलाले सिङ्गो जीवन बोलेको हुन्छ । सिङ्गो संसारको भाव बोकेको हुन्छ । चित्रकला, मूर्तिकला, वास्तु, गायन, नृत्य, हाँस्य, वाचन, वाक् वा भाषण, अभिनय, शिक्षण वा प्रशिक्षण, जादुगरीजस्ता विविध कलाका रुप हुन्छन् । कलामा अनुकरण सपाट मात्र भयो भने त्यसले कलात्मकताले अझै भव्यता पाउँछ । भव्य तर अनुकरण भनेको कुनै पनि वस्तुको चित्रण गर्दा त्यसका सुन्दर पक्षको मात्रै होइन, कुरूप पक्ष वा कमी–कमजोरीहरूको पनि ढाकछोप गरेर सौन्दर्यमूलक ढङ्गले चित्रण गर्नु हो । पाश्चात्य जगतका महान् दार्शनिक अरिस्टोटलले भनेको छन् “कला प्रकृतिको अनुकृति हो ।”

कलाको एउटा पाटोको कुरा गरौः मुर्तिकला । नेपालमा मूर्तिकलाको विकास मल्लकालमा उत्कर्षमा पुगेको इतिहासमा ब्याख्या गरिएको छ । त्रिबिक्रम मल्लले बनाएको मानदेब कालिन वामन मुर्ति नै नेपालको प्रामाणिक सबभन्दा पुरानो मुर्ति मानिन्छ ।
झण्डै ४० लाख खर्चेर ललितकला अनुसन्धान स्थलको रुपमा विकास गर्ने उद्देश्यले निर्माण गरिएको मूर्तिपार्क हेटौंडा उपमहानरपालिकाको वडा–१८ मा अवस्थित छ । नेपालमै पहिलो पटक मकवानपुर जिल्लाको हर्नामाडी गुम्बा डाँडामा अन्तराष्ट्रिय मूर्तिकला महोत्सव आयोजना गरी कोरीएका २३ वटा मुर्तिहरु खुला चौरमा राखिएका छन् ।
हेटौंडा उपमहानगरपालिका मुख्य बजारबाट १८ किलोमिटर पूर्वमा पर्ने हर्नामाडीको साविक गुम्बा डाँडा सल्लाघारी सामुदायिक वनमा मुर्ति पार्क निर्माण गरिएको थियो । अन्तराष्ट्रिय मुर्तिकला महोत्सव चलिरहँदा देश विदेशमा चर्चा पाएको यो स्थल अहिले गुमनाम जस्तै बन्दै आएको छ । मूर्तिहरुको व्यवस्थापन तथा पर्यटकीय पूर्वाधार विकास गर्न नसकिएपछि महोत्सवताका चर्चित यो स्थलको चर्चा विस्तारै हराउँदै गएको हो । नेपाल सहित विभिन्न ६ राष्ट्रका २३ जना कलाकारहरुले ढुङ्गामा कुदेको २३ वटा मूर्ति छन् । प्रकृतिका अनेक रुपहरुलाई मुर्तिकाहरुले ढुङ्गा कुदेर जिवन्त बनाएका छन् । जहाँ पुग्दा प्राकृतिक रुपमा शरिरले त शितलता आभाष गर्दछ नै, मन र अन्तष्करणमा पनि उत्सुकता जन्माउँछ ढुङ्गामा कोरिएका मुर्तिहरुले ।

यस्ता छन् मुर्तिहरुः
मुर्तिपार्कमा २३ प्रकारका मुर्तिहरु छन् । जसमा प्रकृतिका अनेकन रुपहरु र मानवीय शक्ति देखाउने जमर्को गरीएको छ । इटालीका मुर्तिकार बेटीनो फ्रान्सीनीले विश्वको पहिलो आमाको परिकल्पना गरी ढुङ्गाको मुर्ति बनाएका छन् । जसलाई मुर्तिपार्कको मध्यभागमा राखिएको छ । यसैगरी दक्षिण कोरियाका मुर्तिकार शीम जूम् शूले औद्योगिक वातावरणको परिकल्पना गरि एउटै ढुङ्गामा कलाको प्रस्तुति गरेका छन् । जापानका मुर्तिकार सूगीमोतो जुन यूचीरोले प्रकृतिमा पुष्ट छिप्पिएको भटमासको कोसा बनाएका छन् ।

यसैगरी मकवानपुरका स्थानीय कलाकारहरु लक्ष्मण भुजेलले उत्सुकताको मुर्ति र अर्का स्थानीय कलाकार ओमभक्त भण्डारीले भगवान गणेश एवम् कछुवाको स्वरुपको मुर्ति बनाएका छन् । यसैगरी रुपन्देही जिल्लाका बुद्ध थारुले ढुङ्गाको आकारलाई कुदेर “बुद्धको अर्थ आकार एवम् अष्टमंगल” बनाएका छन् । काठमाडौका पूर्णकाजी शाक्यले तयार पारेको “शान्तिभूमी नेपाल”, मकवानपुरको बाबुलाल वाइबाले “हामी सबै मिलेर बसौ” भन्ने साँकेतिक मुर्ति तयार गरेका छन् ।
नेपालकै अग्लो बुद्ध प्रतिमा अर्को आकर्षणको केन्द्र
पार्कको उत्तर तर्फ निर्माण गरिएको बुद्धको प्रतिमा अर्को आकषर्णको केन्द्र विन्दु बनेको छ । करिब १ करोडको लागतमा २५ फिट अग्लो ढुंगाको मुर्ति निर्माण कार्य सकिएको छ । कोरोना सन्त्रासका कारण औपचारीक रुपमा मूर्ति उद्घाटन भने गरिएको छैन । ललितपुरको बालकुमारीमा मूर्तिकार अमर शाक्यले ढुंगाको मूर्ति कुँदेका थिए । महामारीको कारण अनावरण गर्न नसकिएको बुद्धमूर्ति निर्माण संयोजन समिति संयोजक कमलचन्द्र सुमनले बताए ।
करिब २ करोड बढी जुटाएर बुद्धमुर्ति बनाइएकाे हाे । बागमती प्रदेश सरकारले मूर्ति प्रतिस्थापन गर्ने स्थान निर्माण र मूर्ति रहने स्थानसम्म पुग्ने सिँढी निर्माणका लागि ३५ लाख रुपियाँ उपलब्ध गराएको थियो । १८ नम्बर वडाले भने ५ लाख रुपियाँ उपलब्ध गराएको थियो । २०७६ को बुद्ध पूर्णिमाका दिन शिलान्यास गरिएको मूर्ति निर्माण तथा स्थापना र उक्त स्थानमा पार्कलगायत संरचना निर्माणका लागि करिब ३ करोड खर्च गरिएको थियो ।

बुद्धमूर्ति निर्माण संयोजन समिति संयोजक सुमनका अनुसार मूर्ति स्थापनासँगै उक्त क्षेत्रमा विभिन्न स्तुपा, ९० किलोको घण्टी, भवनहरु, पानीट्यांकी, मनोरञ्जन पार्क, कम्पाउण्डवाल र अन्य संरचना बन्ने क्रम जारी छ । नेपालमा पहिलो पटक ९० किलोको घण्टी यहाँ राख्न लागेको बताए । ठुलो घण्टी विश्वमा ६० स्थानमा छ हेटौंडामा भने ६१ औं स्थान हुनेछ उनले भने ।

रमणीय वातावरण
यातायातको सहज पहुँच, सल्ला, साल र स्थानीय प्रजातिका बोट विरुवाहरुले हरियारी सामुदायिक वनको काखमा अवस्थित यो पार्क मनोरम छ । धरान चतरा हेटाैडा मार्गकाे हर्नामाडी सडकखण्ड अन्तरगत मुख्य हाइवेबाट झण्डै १ किमी दक्षिण तर्फ , स्थानीय बस्तिभन्दा पनि केही पर रहेको शान्तमय रमणीय वातावरणमा पुगेपछि अन्य साहित्यिक लगायतका रचना गर्नको लागि समेत उपयुक्त वातावरण बन्न सक्दछ । पिकनिक खानको लागि, चिलचित्र तथा भिडियो सुटिङ्गको पनि यो क्षेत्र महत्वपूर्ण रहेको छ । “पार्क धेरै दृष्टिकोण उपयुक्त छ, अझै केही व्यवस्थापान गर्न सकेमा चर्चित स्थल बन्ने थियो” पार्कमा भेटिएका मकवानपुरका पत्रकार दीपकसिंह रुम्बाले बताए ।

अझै अधुरो छ पार्क
करिब सवा ४ हेक्टर क्षेत्रफलमा फैलिएको गुम्बाडाँडाको अवस्था उक्त महोत्सवताका चर्चा भएपनि पछिल्लो समय अधुरा संरचनाहरु निर्माणमा ध्यान पुगेको छैन । पछिल्लो समय कोरोना महामारीको कारण पर्यटनहरुको आवागमन पनि घटेको छ । “महामारीको कारण पर्यटनको आवागमन घटेको छ, केही संरचना चालु आर्थिक वर्षमा बनाइने तयारी भएको छ” पार्कको सहयोगी जमुना कोइरालले भनिन् ।
नेपाल ललितकला प्रज्ञा प्रतिष्ठान, पर्यापर्यटकीय पार्क गुम्बाडाँडा र समसामयीक नेपाली मूर्तिकार समूह (आरम्भ) को संयुक्त आयोजनामा २०६९ मंसिर ११ गतेदेखि २३ गतेसम्म प्रथम अन्तर्राष्ट्रिय मूतिर्कला कार्यशाला–२०६९ भएको थियो ।

मकवानपुर जिल्लाका तत्कालिन स्थानीय विकास अधिकारी भुवनप्रकाश विष्टको संयोजकत्वमा कार्यशाला मूल आयोजक समिति गठन गरिएको थियो । सडक सुविधा नभएको उक्त गूम्बा डाँडामा मूर्तिपार्क बनाउनका लागि २ वटा ग्राभेल सडक निर्माण गरिएको थियो । “विकास होला भनेर आफ्नो नम्बरी बारी नै काटेर बाटो दिएको तर अहिले न विकासको कुनै रुप देख्न पाइयो न आफ्नो जग्गाबाट आम्दानी लिन पाइयो” स्थानीयले गुनासो गरे । मुर्ति पार्कमा पुग्ने कच्चिबाटोहरु पक्की बनाइएका छन्, पार्क प्रवेश गर्ने मुल गेट निर्माण गरिएको छ । तर मुर्ति राखिएको स्थलहरु आकर्षक बनाउनतर्फ भने लगानी गरिएको देखिदैन ।

खुल्ला चौरमा रहेको ढुङ्गाका मुर्तिहरु घाम पानीको कारण डिसकलर भएका छन् । मुर्ति वरपरको ग्राउण्डको व्यवस्थापन गर्न सकिएको छैन । “मुर्ति नियालेर फर्के जुत्ता हिलाम्य र कपडाभरी काँडा नै काँडा भयो” पार्क घुमेर फर्केकी हेटौंडा–५ की स्वरुपा गुरागाईले भनिन् “पिउने पानीको व्यवस्था पनि रहेनछ ।”
पार्कको नियमित रेखदेखको लागि समिति निर्माण गरिएको छ । विश्राम स्थल, पानीको फहरा, पुष्प बगैचा लगायतको निर्माणको काम सकिएको छ । “यसवर्ष बाल उद्यान बनाउने योजनामा छौ” पार्कका अध्यक्ष हर्क रम्तेलले भने । पार्कको व्यवस्थापनको लागि धेरै योजनाहरु भएपनि आर्थिक अभावको कारण योजना अनुसारको काम गर्न समस्या भएको अध्यक्ष रम्तेलले बताए । अबकाे केही समयमा नै धेरै कुराको ब्यबस्थापन गर्ने रम्तेलले जनाकारी दिए ।
अबकाे याेजना
पार्कलाइ अझै व्यवस्थित गर्न यस वर्ष पेन्टिङहरु फ्रेमिङ्ग गर्ने काम, चिल्ड्रेन पार्क बनाउने कार्य, मुर्तिहरु अझै ब्यबस्थापन गर्ने काम गरिने अध्यक्ष रम्तेलले बताए । यसैगरी आगामी भदौ १ गतेबाट पार्क प्रवेशमा प्रतीब्यक्ति १० रूपिया शुल्क लगाउने तयरी भएकाे उनले बताए । प्रवेश शुल्क हेटौंडा-१८ भित्र बसोबास गर्ने लाई भने लाग्ने छैन ।



मकवानपुर । मकवानपुरमा ४ सय ३२ जना काेराेना संक्रमित थपिएका छन् । पछिल्लो २४ घण्टामा ४ सय ३२ जनामा कोरोना पुष्टि भए सँगै संक्रमितकाे संख्या थपिएकाे हाे । मकवानपुरमा पछिल्ला केही दिनहरुमा कोरोना संक्रमण पुष्टि हुनेको संख्या बढ्दै गएको छ ।
पछिल्लो २४ घण्टामा १ सय ३० जनाको पीसीआर परीक्षणमा ६६ जना र १ हजार १५ जनाको एन्टीजेन परीक्षणमा ३ सय ६६ गरी ४ सय ३२ जनामा कोरोना पुष्टि भएको स्वास्थ्य कार्यलय मकवानपुरले जनाएको छ ।
काेराेना पुष्टि हुनेहरुमा सबैभन्दा बढी भीमफेदी गाउँपालिका भित्रका रहेका छन् । भीमफेदी स्थित भीमफेदी कारागार भित्रका ३ सय ५५ जना कैदी सहित ३ सय ६२ जनामा कोरोना पुष्टि भएको छ । अन्य संक्रमित हेटाैडा सहित गाँउपालिकाका रहेकाे छन् । यो संगै जिल्लामा ९ सय ८० जना सक्रिय संक्रमित पुगेको स्वास्थ्य कार्यलय मकवानपुरले जनाएको छ ।
यसैगरि जिल्लामा पछिल्लो २४ घण्टामा ६३ जना संक्रमित संक्रमण मुक्त भएका छन् । मकवानपुरमा हालसम्म १३ हजार २ सय ६१ जनामा कोरोना पुष्टि हुँदा १२ हजार १ सय संक्रमित निकाे भएका छन् ।
यस्तै जिल्लामा पछिल्लो २४ घण्टामा थप एक संक्रमितको मृत्यु भएको छ । मृत्यु हुनेमा हेटौंडा-१८ की ४८ वर्षीया महिला रहेको हेटौंडा अस्पतालका सूचना अधिकारी राजिव झा ले जानकारी दिए । झाका अनुसार महिलामा दुई दिन अघि साउन १३ गते एन्टीजेन परीक्षणमा कोरोना पुष्टि भएको थियो ।
उनलाई हिजो साउन १४ गते उपचारको लागि हेटौंडा अस्पतालमा भर्ना गरिएकोमा आज बिहान ४ बजे उपचारको क्रममा मृत्यु भएको अधिकारी झाले बताए । यो संगै जिल्लामा जिल्ला भित्रका कोरोनाबाट मृत्यु हुनेको संख्या १ सय ४२ पुगेको छ ।