मकवानपुर । अनलाइनमा यौनशोषण बालअधिकार, साईबर अपराध लगायत बालसंरक्षणका विषयमा प्रहरीसँग अन्तरक्रिया गरिएकाे छ । सिविन नेपालको आयोजना तथा जिल्ला प्रहरी कार्यालय मकवानपुरको समन्वयमा मकवानपुर जिल्लाका अधिकृत स्तरका प्रहरीहरुसँग छलफल कार्यक्रम भएको हाे ।
बालबालिकाहरुलाई डर देखाउने र धम्क्याउन, यौन आशयका सन्देश पठाउने , बाल अश्लिनता, छलकपट, अनलाइन खेल तथा सञ्जालको लत, हाल घटिरहेको घटनाहरुको प्रकारहरु, बालसंरक्षण, विद्युदिय कारोवार ऐन २०६३, बालमैत्री सेवा प्रवाहमा नेपाल प्रहरी एवं बालहेल्पलाइन १०९८ को भूमिका विषयमा १ दिने अभिमुखिकरण कार्यक्रम गरिएकाे सिविन बालहेल्पलाइन मकवानपुरका मेनेजर झबिन्द्र ज्ञवालीले जानकारी दिए ।
कार्यक्रममा साईबर अपराध ब्यरो काठमाण्डौका डीएसपी दिपेश जोशीले सहजीकरण गरेका थिए । प्रमुख अतिथि जिल्ला प्रहरी कार्यालय मकवानपुर प्रमुख एसपी सुरेन्द्र बहादुर गुरुङले साईबर अपराध र बालबालिका सम्बन्धी विषयमा प्रहरीहरुको लागि प्रशिक्षण हुनु राम्राे भएकाे बताए । मकवानपुर प्रहरी प्रवक्ता डीएसपी जयश्वर रिमालले कार्यक्रमबाट सिकेका विषयहरुलाई बालबालिकासम्म पुर्याउने पर्ने विषय भएकाे बताए ।
कार्यक्रममा सिविन बालहेल्पलाइन मकवानपुरका मेनेजर ज्ञवालीले कार्यक्रममा बालबालिकाहरुलाई बालअधिकार, बाल संरक्षण, बालबालिकाहरुको उद्धार, परामर्श, बालबालिकाहरुको सन्र्दभमा कसरी बालहेल्पलाइन १०९८ र नेपाल प्रहरीसँग समन्वय गरि कार्य गर्दा प्रभावकारी हुन्छ भन्ने सन्दर्भमा सहजीकरण गरेका थिए ।
सिविन नेपालका अध्यक्ष माधव प्रधानको अध्यक्षता, जिल्ला प्रहरी कार्यालयका एसपी सुरेन्द्र बहादुर गुरुङको प्रमुख आतिथ्यतामा कार्यक्रम भएको हो । कार्यक्रममा डीएसपी जयश्वर रिमाल, जिल्ला प्रहरी कार्यालय मकवानपुर, जिल्लाका सबै इलाका प्रहरी कार्यालयका, वडा प्रहरी कार्यालयका, प्रहरी चौकीका इन्चार्ज लगायतकाे सहभागीता रहेको थियाे ।
मकवानपुर । मकवानपुर प्रहरीले अवैध लागुऔषध डायलेक्स र नाइट्रोभेट समेत गरी २ भारतिय नागरिक सहित ५ जनालाई पक्राउ गरेकाे छ । लागुऔषध १ सय ७३ बोतल डायलेक्स डीसीसहित पक्राउ ना १ ह ९४५० नम्बरको अटोेचालक भारतको बिहार रक्सौल पुर्वी चम्पारणका ३० वर्षीय अरविन्द कुमार पाण्डे र उक्त अटोमा सवार भारत बिहार रक्सौलका २६ की अमिता साह रहेको जिल्ला प्रहरी कार्यालय मकवानपुरले जनाएको छ ।
लागुऔषध नाइट्रोभेट ६ सय ट्याब्लेटसहित पक्राउ पर्नेमा चितवन जिल्लाको कालिका नगरपालिका–८ बस्ने २१ वर्षीय एन्जल गुरुङ, १८ वर्षीय निश्चल परियार, भरतपुर महानगरपालिका–१६ का ३३ वर्षीय नरबहादुर राना मगर र २८ वर्षीय युवराज गुरुङ रहेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिए ।
मंगलबार दिउँसो १ बजेर ४८ मिनेटको समयमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौंडा–१५ रातोमाटे चेकपोष्ट खण्डमा सवारी साधनहरु रोकी सुरक्षाजाँच गर्ने क्रममा पथलैयाबाट हेटौंडातर्फ आउँदै गरेको ना १ ह ९४५० नम्बरको अटोे अटोमा लुकाई छिपाई ल्याइएको लागुऔषध फेला परेको प्रहरीले जनाएको छ । पक्राउ परेका अटोे चालक पाण्डे र अटाेमा सवार साह दुवै जनालाई उक्त लागुऔषध, अटोसहित नियन्त्रणमा लिई बुधबार जिल्ला अदालत मकवानपुरबाट १० दिन म्याद अनुमति लिई थप अनुसन्धान भइरहेको प्रहरीले जनाएकाे छ ।
यसैगरी मंगलबार दिउँसो ४ बजेर १५ मिनेटको समयमा जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा–१५ रातोमाटे चेकपोष्ट अगाडि गुरुङद्वय परियार र राना मगर सवार बीरगंजबाट हेटौंडातर्फ आउँदै गरेको ना ६ ख ५३०९ नम्बरको बसलाई रोकी सुरक्षाजाँच गर्ने क्रममा उनीहरुको साथमा लागुऔषध फेला परेको जनाइएको छ । पक्राउ परेका चारैजनालाई लागुऔषधसहित नियन्त्रणमा लिई बुधबार जिल्ला अदालत मकवानपुरबाट १० दिन म्याद अनुमति लिई थप अनुसन्धान भइरहेको प्रवक्ता रिमालले जानकारी दिए ।

मकवानपुर । बागमती प्रदेशका कृषि तथा पशुपंक्षी विकास मन्त्री बसुन्धरा हुमागाँईले प्रदेश सरकार किसानको हितको पक्षमा रहेको बताएका छन् । दुग्ध उत्पादन क्षेत्रको अवसर र चुनौती विषयक अन्तरक्रिया कार्यक्रममा बोल्दै मन्त्री हुमागाँईले प्रदेश सरकार किसानको हितको पक्षमा रहेको भन्दै कृषिलाई व्यवस्थित गर्दै कृषकको विकासको लागि लागिपरेको बताए ।
बिन्दाबासिनी मिडिया प्रालिद्वारा सञ्चालित रेडियो थाहासञ्चार ९९.६ हेटौंडाको वार्षिकोत्सवको अवसरमा सप्ताहव्यापी कार्यक्रमको चौथो दिन बुधबार आयोजित अन्तरक्रिया कार्यक्रममा मन्त्री हुमागाँईले पहुँचको आधारमा सरकारले अनुदान नदिने बताए । उनले भने ‘प्रदेश सरकारले वास्तविक किसानसम्म अनुदान पुर्याउने छ ।’ ‘सहज ढंगले किसानले अनुदान,सहुलिलयतपूर्ण ऋण पाउने व्यवस्था सरकारले मिलाउने छ’ मन्त्री हुमागाँईंले भने ‘किसानको हक अधिकारको लागि सदैव आफू तत्पर रहेको छु ।’
कार्यक्रममा किसानहरुले गाई वस्तुलाई खुवाउने खाद्यान्नको मुल्य आकासिदा दुधको मुल्य थोरै मात्रै बढेको र बढेको मुल्य पनि किसानलाई भन्दा धेरै बिचौलियालाई पोस्न खोजिएको गुनासो गरेका थिए । कार्यक्रममा रेडियो थाहासञ्चारको प्रवन्धक अरुणराज सुमार्गीले किसान बलियो भए मात्रै देशको अर्थतन्त्र बलियो हुने भन्दै कृषि क्षेत्रको विकासमा सरकारले ध्यान दिनुपर्ने बताए ।
मनकामना दुग्ध उत्पादक सहकारी सस्था प्रालिका अध्यक्ष अर्जुन दाहालको सभाध्यक्षातामा भएको कार्यक्रममा प्रदेश सहकारी विकास बोर्डको उपाध्यक्ष नारायण देवकोटा,मकवानपुरगढी गाउँपालिकाका अध्यक्ष बिदुर हुमागाँई, जिल्ला दुग्ध उत्पादक सहकारी संघ मकवानपुरका अध्यक्ष बासुदेब अधिकारी,गढी गांउपालीका वडा नम्बर ३ का वडा अध्यक्ष भागवत घिमिरे , श्रमिक साना किसान कृषि सहकारी सस्थाका अध्यक्ष निर्मला लम्साल, वस्तु तथा सेवा उपभोक्ता संरक्षण महासंघ केन्द्रीय अध्यक्ष रोमलाल गिरी र केन्द्रिय उपाध्यक्ष तथा साना किसान अभियानको अभियान्ता राजेन्द्र खनाल लगायतले मन्तव्य व्यत्त गरेका थिए ।
यस्तै रेडियोले कार्यक्रमको पाचौ दिन भोली सडक दुर्घटना न्युनिकरण नहुनुमा जिम्मेवारी कसको भन्ने विषयमा मा.वि स्तरीय वक्तृत्वकला कार्यक्रम गर्ने रेडियोको स्टेसन म्यानेजर मणिराज गौतमले जानकारी दिए । फागुन ६ गते कोरोना रोकथाम तथा नियन्त्रणमा सरोकारवालाहरुको भूमिका विषयक अन्तरिक्रिया कार्यक्रम रहेकाे छ । सप्ताहव्यापी कार्यक्रमको अन्तिम दिन ७ गते थाहा सम्मान तथा १४ औ वार्षिकोत्सव समापन समारोह एवम् साहित्य सम्मेलन हुने छ ।
कार्यक्रमको पहिलो दिन फागुन १ गते आईतबार पर्यावरण प्रवर्द्धन लागि रेडियोले साइकल ¥याली गरेको थियो भने दोस्रो दिन फागुन २ गते सोमबार बृहत रक्तदान कार्यक्रम सम्पन्न गरेको छ । यस्तै फागुन ३ गते रुपचन्द्र विष्ट र अहिलेको राजनीतिक परिवेश विषयक अन्तरक्रिया कार्यक्रम गरिएको थियो ।

मकवानपुर । मकवानपुरको राक्सिराङ गाउँपालिकामा धुलिखेल अस्पतालको शाखा विस्तार गरिने तयारी गरिएको छ । बागमती प्रदेशका भौतिक पूर्वाधार विकास राज्यमन्त्री सन्तबहादुर प्रजाले काभ्रेको धुलिखेल अस्पतालका पदाधिकारीहरुसँग मंगलबार अस्पतालमै पुगेर राक्सिराङ गाउँपालिका वडा नम्बर ७ गर्लिङमा शाखा विस्तार सम्वन्धी छलफल गरेका छन् ।
अस्पतालले प्रदान गरिरहेका सेवा सुविधाहरुको बारेमा जानकारी लिँदै राज्यमन्त्री प्रजाले विपन्न चेपाङ र तामाङ जातिको बाहुल्यता रहेको मकवानपुरकाे विकट राक्सिराङ गाउँपालिकामा स्वास्थ्य सेवाको आवश्यकताबारे अस्पताल पदाधिकारीहरुसँग छलफल गरेका थिए ।
निकट भविष्यमै चार शैयाको शाखा अस्पताल सञ्चालन गर्नेबारे धुलिखेल अस्पतालका पदाधिकारी सहमत भएको राज्यमन्त्री प्रजाले बताए । प्रजाको पहलमा धुलिखेल अस्पतालले यसअघि दुइपटक गर्लिङको क्षेत्रगत निरीक्षण गरिसकेको छ । राज्यमन्त्रीसँगको छलफल सकारात्मक भएको र निकट भविष्यमै गाउँलेको आवश्यकताको आधारमा स्वास्थ्य सेवा प्रदान गर्ने सोच बनाइएको धुलिखेल अस्पतालका पब्लिक हेल्थ अफिसर सुदिप श्रेष्ठले जानकारी दिए ।
‘स्थानीयको आवश्यकताको पहिचान गरिरहेका छौं । गाउँपालिकासँग पनि छलफल गर्ने तयारी गरेका छौं । जग्गा, भवन, उपकरणलगायत पूर्वाधार तयार गर्न स्थानीय तह र अन्य निकायसँग सहकार्य गरेर अघि बढिनेछ ।’ पब्लिक हेल्थ अफिसर श्रेष्ठले भने ।
गर्लिङमा अस्पताल निर्माण गर्ने सोचका साथ भौतिक पूर्वाधार राज्यमन्त्री प्रजाले पूर्वाधार विकास कार्यक्रमअन्तर्गतको ५ लाख रुपैयाँ बजेटसमेत विनियोजन गरेका छन् । धुलिखेल अस्पतालले नागरिकको स्वास्थ्य आवश्यकताको पहिचान गर्नुका साथै अन्य अवस्थाबारे जानकारी लिन तत्कालको लागि फागुन मसान्तसम्ममा राक्सिराङमा स्वास्थ्य शिविरको आयोजना गर्ने तयारी गरेको जनाएको छ ।
राज्यमन्त्रीसँगको छलफलमा अस्पतालका डाइरेक्टर रामकण्ठ माकाजु, संस्थापक डा राजेन्द्र कोजु, अर्थोपेडिक सर्जन डा. दीपक श्रेष्ठ, क्लिनिकल डाइरेक्टर डा. बलराम मल्ल, सामुदायिक विभाग तथा पब्लिक हेल्थ डाइरेक्टर डा. विराजमान कर्माचार्यलगायतको उपस्थिति रहेको थियो ।
काभ्रेको धुलिखेल नगरपालिका–६ मा रहेको धुलिखेल अस्पतालले हालसम्म देशभर १८ वटा शाखा विस्तार गरी स्वास्थ्य सेवा दिइरहेको अस्पतालले जनाएको छ ।
मकवानपुर । हेटाैंडाका २ विद्यालयका विद्यार्थीलाई पोशाक र शैक्षिक सामग्री वितरण गरिएकाे छ । हेटौंडा उपमहानगरपालिका १० नम्बर वडा कार्यालयले आफ्नाे वडामा रहेका २ विद्यालयका विद्यार्थीलाई पोशाक र शैक्षिक सामग्री वितरण गरेको हाे ।
वडा कार्यालयले ज्ञानदा माध्यमिक विद्यालय र संस्कृत वेद विद्यालयका विद्यार्थीलाई मंगलबार सहयोग स्वरुप पोशाक र शैक्षिक सामग्री वितरण गरेकाे छ । करिव २ लाख २६ हजार रुपैयाँको स्वेटर, पोशाक, जुत्ता र १ लाख रुपैयाँको शैक्षिक सामग्री विद्यालयलाई हस्तान्तरण गरिएको वडा अध्यक्ष कितापसिं लामाले जानकारी दिए । यसैगरी शैक्षिक सत्र २०७७ अन्तर्गत ज्ञानदा माविले नेपाल सरकारबाट प्राप्त गरेको ४४ हजार रुपैयाँको छात्रवृत्ति वितरण गरेको छ । ईसिडिदेखि कक्षा १० सम्मका कक्षागत प्रथम, द्वितीय र तृतीय हुने विद्यार्थीलाई पुरस्कार समेत वितरण गरिएको छ ।
वडा अध्यक्ष लामाको सभाध्यक्षता तथा विद्यालयका पूर्व अध्यक्ष फुर्वा दोर्जे लामाको प्रमुख आतिथ्यमा भएकाे कार्यक्रममा विद्यालय व्यवस्थापन समितिका अध्यक्ष ईन्द्रप्रसाद नेपाल, वडा सदस्य धर्म बस्नेत, साधना श्रेष्ठ, उमा सुनुवार र प्रधानाध्यापक रमेश सुवेदी लगायत शिक्षक तथा विद्यार्थीको उपस्थिति रहेको थियो ।